Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 7-й де́нь.
Слу́жба преподо́бному отцу́ на́шему Ни́лу, Со́рскому чудотво́рцу.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ [4]. Подо́бенъ: Да́лъ еси́ зна́меніе.

Твои́хъ исправле́ній высоту́ и глубину́ смире́нія безмѣ́рную кто́ сказа́ти дово́ленъ, преподо́бне о́тче Ни́ле приснопа́мятне? Просія́лъ бо еси́, я́ко свѣти́ло, въ Россíйстѣй земли́, осіява́я мона́шествующихъ собо́ры добродѣ́телей твои́хъ свѣ́тлостію.

Безмо́лвія вои́стинну бы́лъ еси́ люби́тель, о́тче приснопа́мятне, и пусты́ни граждани́нъ преизря́денъ, и, я́ко дре́во, насажде́нное при вода́хъ, е́же пло́дъ дае́тъ во вре́мя свое́, то́чиши бо исцѣле́нія съ вѣ́рою приходя́щимъ ко гро́бу твоему́ и чту́щимъ отъ любве́ всесвяще́нныя твоя́ по́двиги.

Яко скрижа́ли богопи́санныя, оста́вилъ еси́ ча́домъ твои́мъ, о́тче, твои́хъ слове́съ списа́нія, я́же на горѣ́ богомы́слія въ се́рдцѣ твое́мъ пе́рстомъ Бо́жіимъ написа́шася, тѣ́мже тя́ почита́емъ и свято́е твое́ соверша́емъ торжество́, сла́вяще тя́ просла́вльшаго Іису́са Человѣколю́бца и Спа́са ду́шъ на́шихъ.

Сла́ва, гла́съ 6:

Преподо́бне о́тче на́шъ Ни́ле, вои́стинну сна́ твои́мъ очесе́мъ не да́лъ еси́, ниже́ пло́ти твое́й упокое́нія, до́ндеже угото́валъ еси́ въ себѣ́ мѣ́сто Го́сподеви и селе́ніе Бо́гу Іа́ковлю, тѣ́мъ и во дворы́ Его́, ра́дуяся, вше́лъ еси́, идѣ́же всѣ́хъ веселя́щихся жили́ще, но, о́тче приснопа́мятне, о на́съ моля́ся не преста́й, твою́ па́мять всесвяще́ннѣйшую вѣ́рою и любо́вію благоче́стно соверша́ющихъ.

И ны́нѣ, пра́здника или́ богоро́диченъ:

Влады́чице Блага́я, христіа́нъ всѣ́хъ славосло́віе немо́лчное, пріими́, Богороди́тельнице, хвале́нія ра́бъ Твои́хъ, любо́вію Тя́ велича́ющихъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Ни́ле богому́дре, твоя́ рабы́ пріими́ торжеству́ющія любо́вію, о́тче, всесвяще́нную па́мять твою́.

Сти́хъ: Честна́ предъ Го́сподемъ [сме́рть преподо́бныхъ Его́].

Вѣ́рно ны́нѣ соше́дшеся въ па́мяти твое́й, о́тче, ублажа́емъ тя́ любо́вію, велича́юще тебе́ Просла́вльшаго.

Сти́хъ: Пра́ведникъ, я́ко фи́никсъ, процвѣте́тъ и, [я́ко ке́дръ, и́же въ Лива́нѣ, умно́жится].

Пріими́ ны́нѣ пѣ́ніе твои́хъ ча́дъ, преподо́бне, ра́достно торжеству́ющихъ въ честнѣ́й твое́й па́мяти, Ни́ле богому́дре, о́тче на́шъ.

Сла́ва, и ны́нѣ, гла́съ и подо́бенъ то́йже:

Пріими́, Влады́чице, моле́ніе Твои́хъ ра́бъ и Сы́на Твоего́ умоли́, съ Ни́ломъ богому́дрымъ, пода́ти на́мъ грѣхо́въ проще́ніе.

Тропа́рь, гла́съ 4:

Удали́вся, бѣ́гая, Дави́дски, мíра, и вся́, я́же въ не́мъ, я́ко уме́ты, вмѣни́въ, и, въ мѣ́стѣ безмо́лвнѣ всели́вся, духо́вныя ра́дости испо́лнился еси́, о́тче на́шъ Ни́ле, и, еди́ному Бо́гу изво́ливъ служи́ти, процвѣ́лъ еси́, я́ко фи́никсъ, и, я́ко лоза́ благопло́дна, умно́жилъ еси́ ча́да пусты́ни. Тѣ́мъ благода́рственно вопіе́мъ: сла́ва Укрѣ́пльшему тя́ въ по́двигѣ пустынножи́тельства; сла́ва Избра́вшему тя́ въ Россíи отше́льникомъ уставополо́жника изря́дна; сла́ва моли́твами твои́ми и на́съ Спаса́ющему.

Сла́ва, и ны́нѣ, пра́здника или́ богоро́диченъ:

[Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди, воззва́хъ: стихи́ры на 8, гла́съ 6. Подо́бенъ: Все́ отло́жше.

Все́ отложи́въ мірско́е пристра́стіе, преподо́бне, и кре́стъ тво́й на ра́мо взе́мъ, чи́стымъ и немяте́жнымъ умо́мъ Христу́ послѣ́довалъ еси́: въ пусты́ни, я́ко въ раи́, живы́й, Тому́ угоди́лъ еси́, я́ко безпло́тенъ, на земли́ жи́тельствуя, посто́мъ, и моли́твою, и всено́щными стоя́ніи стра́сти умертви́лъ еси́, молча́ніемъ же и богомы́сліемъ Бо́гу соедини́лся еси́, Его́же моли́ о душа́хъ на́шихъ.

Ти́хое и безмяте́жное житіе́ пожи́въ, въ мѣ́стѣ безмо́лвнѣмъ уединя́яся, непреста́нною моли́твою Бо́гу бесѣ́довалъ еси́ и поуче́ніемъ Боже́ственныхъ писа́ній, я́ко дожде́мъ благода́ти, ни́ву твоего́ се́рдца бога́тно напои́лъ еси́, богому́дре, тѣ́мъ и Свята́го Ду́ха вмѣсти́лище показа́лся еси́ и пло́дъ стори́чествующь прине́слъ еси́, преподо́бне о́тче на́шъ Ни́ле приснопа́мятне, моли́ся у́бо вы́ну ко Го́споду о душа́хъ на́шихъ.

Неукло́нно ше́ствуя, преподо́бне, путе́мъ Христо́выхъ за́повѣдей, оте́ческихъ богому́дрыхъ преда́ній опа́сный храни́тель бы́лъ еси́, Ни́ле богому́дре, о́тче на́шъ приснопа́мятне. Къ си́мъ и законополо́жникъ и основатель въ Россíйстѣй земли́ ски́тскаго жи́тельства показа́лся еси́, и, я́ко скрижа́ли завѣ́та, твоя́ богому́драя словеса́ и преда́нія твоему́ житію́ послѣ́довати жела́ющимъ оста́вилъ еси́, о́тче. Тѣ́мъ мо́лимъ тя́, преподо́бне, Христу́ прилѣ́жно моли́ся о душа́хъ на́шихъ.

Любо́вію ко Христу́ уя́звленъ бы́въ, преподо́бне, Того́ стра́сти спаси́тельныя непреста́нно во умѣ́ обноси́лъ еси́ и си́хъ подража́тель изря́денъ показа́лся еси́, по́стными по́двиги пло́ть распина́я со страстьми́ и похотьми́, о́строю же власяни́цею и ины́мъ жестокожи́тіемъ пло́ти неудобопокорли́вое души́ разу́мному покори́лъ еси́. Тѣ́мъ мо́лимъ тя́, боголюбе́зне о́тче на́шъ Ни́ле приснопа́мятне, Христу́ прилѣ́жно моли́ся о душа́хъ на́шихъ.

Сла́ва, гла́съ 8:

Ски́тскаго жи́тельства наста́вника тя́ почита́емъ, о́тче на́шъ Ни́ле, твое́ю бо стезе́ю вои́стинну пра́во ходи́ти въ безмо́лвіи пусты́ни позна́хомъ: пра́вый бо пу́ть сего́ жи́тельства словесы́ и дѣ́лы показу́я, я́ко о́бразъ одушевле́нъ, самаго́ себе́ на́мъ предста́вилъ еси́. И блаже́нъ еси́ и́стинно, я́ко, сотвори́въ, научи́лъ еси́, тѣ́мъ и ве́лій въ Ца́рствіи небе́снѣмъ, по глаго́лу Госпо́дню, наре́клся еси́. Тому́ бо трудолю́бно порабо́тавъ и вра́жію всю́ си́лу, ко́зни и лови́тельства, я́ко паучи́ну, разтерза́въ, побѣдоно́сецъ во всѣ́хъ показа́лся еси́ и ко Христу́ вѣнцено́сецъ восте́клъ еси́, ра́дуяся. Его́же моли́, преподо́бне, о всѣ́хъ, вѣ́рою соверша́ющихъ твою́ па́мять всесвяще́ннѣйшую, е́же дарова́тися на́мъ грѣхо́въ проще́нію и ве́ліей ми́лости.

И ны́нѣ, пра́здника или́ богоро́диченъ:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Вхо́дъ. Проки́менъ дне́ и чте́нія три́.

Проро́чества Иса́іина чте́ніе. [Глава 35.]

Ра́дуйся, пусты́ня жа́ждущая, да весели́тся пусты́ня и да цвѣте́тъ я́ко кри́нъ. И процвѣте́тъ, и возвесели́тся пусты́ня Іорда́нова, и сла́ва Лива́нова даде́ся е́й, и че́сть Карми́лова, и у́зрятъ лю́діе Мои́ сла́ву Госпо́дню и высоту́ Бо́жію. Укрѣпи́теся, ру́цѣ осла́бленныя и колѣ́на разсла́бленная, утѣ́шитеся, малоду́шніи умо́мъ, укрѣпи́теся, не бо́йтеся: се́ Бо́гъ на́шъ су́дъ воздае́тъ и возда́стъ, То́й пріи́детъ и спасе́тъ на́съ. Тогда́ отве́рзутся о́чи слѣпы́хъ и у́ши глухи́хъ услы́шатъ. Тогда́ ско́читъ хромы́й я́ко еле́нь и я́сенъ бу́детъ язы́къ гугни́выхъ, я́ко прото́ржеся вода́ въ пусты́ни и де́брь въ земли́ жа́ждущей; и безво́дная бу́детъ во езе́ра и на жа́ждущей земли́ исто́чникъ водны́й бу́детъ, та́мо бу́детъ весе́ліе пти́цамъ, и сели́тва тро́сти, и лу́зи. И та́мо бу́детъ пу́ть чи́стъ и пу́ть свя́тъ нарече́тся, и не пре́йдетъ та́мо нечи́стый, ниже́ бу́детъ та́мо пу́ть нечи́стъ; разсѣ́янніи же по́йдутъ по нему́ и не заблу́дятъ. И не бу́детъ та́мо льва́, ни отъ звѣре́й злы́хъ не взы́детъ на́нь, ниже́ обря́щется та́мо, но по́йдутъ по нему́ изба́вленніи, и со́бранніи Го́сподемъ обратя́тся и пріи́дутъ въ Сіо́нъ съ ра́достію, и ра́дость вѣ́чная надъ главо́ю и́хъ, надъ главо́ю бо и́хъ хвала́ и весе́ліе, и ра́дость пріи́метъ я́, отбѣже́ болѣ́знь, печа́ль и воздыха́ніе.

При́тчей чте́ніе. [Главы́ 10, 3 и 8.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе. [Главы́ 10, 6, 8 и 9.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

На литíи стихи́ра хра́ма и свята́го стихи́ры, самогла́сны, гла́съ 1:

Во благознамени́тый де́нь пра́здника на́шего востру́бимъ духо́вною трубо́ю, духо́вно ра́дующеся и свѣ́тло торжеству́юще, всесвяту́ю и всечестну́ю па́мять отца́ на́шего и любе́зно воззове́мъ ему́, глаго́люще: ра́дуйся, па́стырю и учи́телю на́шъ и свѣти́ло мона́шествующихъ пресвѣ́тлѣйшее, о́тче на́шъ Ни́ле приснопа́мятне. Христу́, Ему́же усе́рдно порабо́талъ еси́, о́тче, о на́съ прилѣ́жно моли́ся, вѣ́рою и любо́вію чту́щихъ тя́.

Гла́съ 4:

Свяще́нными дне́сь пѣ́сньми свяще́ннѣйшую па́мять отца́ на́шего, я́ко цвѣ́ты, увѣнча́емъ, похва́льныя вѣнцы́ плету́ще, и любо́вію прославля́юще того́ свяще́ннѣйшія по́двиги, и въ весе́ліи вопію́ще ему́: ра́дуйся, цвѣ́те мона́шествующихъ краснѣ́йшій, во удо́ліихъ пусты́нныхъ прозя́бшій и до́брыхъ дѣ́телей совокупле́ньми страну́ Бѣлоезе́рскую украси́вый; ра́дуйся, дре́во благопло́дное, при исхо́дищахъ во́дъ псало́мски насажде́нное и плода́ми исправле́ній и богому́дрыхъ писа́ній твои́хъ мно́жества и́ночествующихъ пита́ющее; ра́дуйся, по́стническихъ мѵ́ръ алава́стръ многоцѣ́нный, Христо́ву Це́рковь облагоуха́вшій. Но, о преблаже́нне и приснопа́мятне Ни́ле, о́тче на́шъ, не преста́й о на́съ моля́ся ко Го́споду, да изба́витъ на́съ отъ вся́каго вре́да и спасе́тъ ду́ши на́ша.

Пріиди́те, празднолю́бныхъ собо́ры, пріиди́те, возвесели́теся съ на́ми, и, ли́къ соста́вльше, торжеству́имъ: се́ бо наста́ всепра́зднственная и свѣтоно́сная па́мять богоно́снаго отца́ и свѣ́тлаго мíру свѣти́льника, на́мъ же превожделѣ́ннѣйшаго па́стыря и учи́теля, и ко спасе́нію наста́вника, и о всѣ́хъ те́плаго предста́теля, мо́литбося вы́ну ко Го́споду дарова́тися всѣ́мъ ве́ліей ми́лости.

Сла́ва, гла́съ 6:

Еже по о́бразу Христо́ву соблю́лъ еси́ невре́дно, у́мъ влады́ку на стра́сти па́губныя по́стнически поста́вивъ, и на высоту́ добродѣ́телей, я́же по подо́бію Спа́сову, я́ко мо́щно, возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему и пло́ть порабо́тити ду́ху. Тѣ́мъ и мона́шествующимъ наста́вникъ яви́лся еси́, жи́тель пусты́нный, вои́стинну благотеку́щихъ обучи́тель и добродѣ́телей извѣ́стнѣйшее пра́вило, и ны́нѣ на небесѣ́хъ зерца́ломъ разрѣ́шшимся, о́тче на́шъ Ни́ле приснопа́мятне, чи́стѣ зри́ши Святу́ю Тро́ицу, моля́ся при́сно о всѣ́хъ, вѣ́рою и любо́вію чту́щихъ тя́.

И ны́нѣ, пра́здника или́ богоро́диченъ:

Богоро́дице, Ты́ еси́ лоза́ [и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

На стихо́вне стихи́ры, гла́съ 6. Подо́бенъ: Ангельскія.

Ангельскія премíрныя си́лы твоему́ житію́ удиви́шася, преподо́бне, во пло́ти бо сы́й, безпло́тныя враги́ побѣди́лъ еси́ и, посто́мъ и моли́твами воскриля́емь, внѣ́ мíра и пло́ти богомы́сленно лета́я, кра́я жела́ній дости́глъ еси́, ра́достно Христу́ взыва́я: благослове́нъ, прише́дый спасти́ на́съ, Спа́се на́шъ, сла́ва Тебѣ́.

Сти́хъ: Се́ удали́хся, бѣ́гая, и водвори́хся въ пусты́ни.

Бѣ́гая мíра, удали́лся еси́ въ пусты́ню псало́мски, и, та́мо водвори́вся, Бо́га, спаса́ющаго тя́, обрѣ́лъ еси́, преподо́бне, и, обрѣ́тъ, въ себѣ́ удержа́лъ еси́: прише́дъ бо, Христо́съ со Отце́мъ и Ду́хомъ Святы́мъ оби́тель въ тебѣ́ сотвори́. Тѣ́мже и мы́, па́мять твою́ торжеству́юще, ра́достно взыва́емъ: благослове́нъ еси́, Иже во святы́хъ прославля́емый, Спа́се на́шъ, сла́ва Тебѣ́.

Сти́хъ: Азъ къ Бо́гу воззва́хъ, и Госпо́дь услы́ша мя́.

Непреста́нно моли́твою и ума́ тре́звостію Бо́гу взыва́лъ еси́, преподо́бне, и То́й услы́ша тя́ вои́стинну; тѣ́мъ и, я́ко безпло́тенъ, на земли́ пожи́въ, воздержа́ніемъ стра́сти умертви́лъ еси́ и глубо́кимъ смиренному́дріемъ твои́мъ смири́лъ еси́, я́ко я́звлена, го́рдаго діа́вола, побѣди́тельно Христу́ взыва́я: благослове́нъ, снизше́дый и спасы́й на́съ, Спа́се на́шъ, сла́ва Тебѣ́.

Сла́ва, гла́съ 6. Самогла́сенъ:

Ра́достно дне́сь сте́кшеся, бра́тіе, и духо́вный ли́къ соста́вльше, торжеству́имъ свѣ́тло, и боже́ственными пѣ́сньми лѣ́тнюю па́мять почти́мъ богоно́снаго отца́, па́стыря и учи́теля на́шего, я́ко цвѣ́ты, увѣнча́емъ похвала́ми того́ свяще́нную главу́ и, всечестну́ю его́ ра́ку окружи́вше, возопіе́мъ, глаго́люще: ра́дуйся, Ни́ле благоглаго́ливый, веселя́щій слове́съ твои́хъ тече́ньми собо́ры и́ночествующихъ; ра́дуйся, свѣти́льниче мона́шествующихъ свѣтоза́рный; ра́дуйся, по́стническая красото́ и утвержде́ніе. Пріиди́ и ны́нѣ къ на́мъ неви́димо и благослови́ ча́да твоя́, сподобля́я ны́ твои́хъ невеще́ственныхъ даро́въ, и́хже бога́тно отъ Христа́ прія́лъ еси́, вѣ́рно отъ любве́ тебе́ чту́щія и прера́достно соверша́ющія тво́й всечестны́й и свѣтоно́сный пра́здникъ; изба́ви на́съ отъ страсте́й мучи́тельства и вся́кихъ скорбе́й и обстоя́ній и оби́тель твою́ соблюди́ невреди́му и всѣ́мъ вся́ поле́зная да́руй ко Го́споду твои́ми моли́твами.

И ны́нѣ, пра́здника или́ богоро́диченъ:

Творе́цъ и Изба́витель [мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды, или́ пра́здника. Про́чее по уста́ву.



НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, пра́здника или́ богоро́диченъ.

По 1-мъ стихосло́віи сѣда́ленъ, гла́съ 1:

Усе́рдно дне́сь сте́кшеся, бра́тіе, духо́вный ли́къ соста́вимъ въ честнѣ́й па́мяти отца́ на́шего, пѣ́сни и благохвале́нія тому́ плету́ще, благоговѣ́йно почти́мъ духо́вныя его́ по́двиги, побѣ́ды и боре́нія, и́миже побѣди́ многоко́зненнаго врага́, и я́ко побѣдоно́сецъ вѣнча́ся свѣ́тло отъ Христа́ Бо́га и Спа́са ду́шъ на́шихъ. [Два́жды.]

Сла́ва, и ны́нѣ, пра́здника или́ богоро́диченъ, гла́съ то́йже:

Хвалу́ принесе́мъ, вѣ́рніи, Ма́тери Бо́га на́шего и, ра́бски любо́вію взе́мшеся, воззове́мъ согла́сно, а́нгельски вопію́ще къ Не́й: ра́дуйся, Благода́тная Дѣ́во, ро́ждшая Спасе́ніе ду́шъ на́шихъ.

По 2-мъ стихосло́віи сѣда́ленъ, гла́съ 3:

Свѣ́тлое торжество́ соверша́юще дне́сь, бра́тіе, воспои́мъ Христа́ Изба́вителя на́шего, хвалу́ Тому́ принося́ще и взыва́юще: возвели́чилъ еси́, Христе́, Твоего́ уго́дника, показа́въ на́мъ того́ чуде́съ исто́чникъ: источа́етъ бо отъ свята́го своего́ гро́ба исцѣле́ній струи́, вѣ́рно притека́ющимъ и любо́вію чту́щимъ того́, и Тебе́, Спа́се, сла́вящимъ, сла́вящія Тя́ прославля́ющаго. [Два́жды.]

Сла́ва, и ны́нѣ, пра́здника или́ богоро́диченъ, [гла́съ то́йже]:

Хода́тайства пріими́ преподо́бнаго отца́ на́шего Ни́ла и моли́тву сотвори́, Чи́стая, за на́съ къ Бо́гу.

[Поліелей.

Велича́ніе: Ублажа́емъ тя́, преподо́бне о́тче Ни́ле, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 4. Подо́бенъ: Удиви́ся Іо́сифъ.

Удиви́лъ еси́, Влады́ко Христе́, показа́въ на́мъ во отцѣ́ на́шемъ такова́го свѣти́льника: то́й бо, я́ко со́лнце, лучи́ чуде́съ испуща́я, осіява́етъ вѣ́рныхъ собра́нія и просвѣща́етъ собо́ры мона́шествующихъ свѣ́тлостію жи́тельства. Тѣ́мъ тому́ любе́зно воззове́мъ: богоно́се и всеблаже́нне о́тче на́шъ Ни́ле, моли́ Христа́ Бо́га грѣхо́въ оставле́ніе дарова́ти пра́зднующимъ любо́вію всечестну́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ, гла́съ то́йже:

Удиви́шася, Чи́стая, вси́ а́нгеловъ чи́ни и человѣ́ческая мно́жества та́инству Твоего́ рожде́нія стра́нному: ка́ко бо Неискусому́жная Млекопита́тельница еси́ и держи́ши на руку́ Твое́ю Пита́ющаго всю́ тва́рь и Содержа́щаго? Тѣ́мже вопіе́мъ Ти́: Богоро́дице Приснодѣ́во, моли́ Сы́на Твоего́ грѣхо́въ оставле́ніе дарова́ти вѣ́рою покланя́ющимся пресвято́му Рождеству́ Твоему́.

Степе́нна, 1-й антифо́нъ 4-го гла́са. [Проки́менъ, гласъ 4: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе отъ Матѳе́я, зача́ло 43.]

По 50-мъ псалмѣ́ стихи́ра, [гла́съ 6:

Ра́достно дне́сь сте́кшеся, бра́тіе, и духо́вный ли́къ соста́вльше, торжеству́имъ свѣ́тло, и боже́ственными пѣ́сньми лѣ́тнюю па́мять почти́мъ богоно́снаго отца́, па́стыря и учи́теля на́шего, я́ко цвѣ́ты, увѣнча́емъ похвала́ми того́ свяще́нную главу́ и, всечестну́ю его́ ра́ку окружи́вше, возопіе́мъ, глаго́люще: ра́дуйся, Ни́ле благоглаго́ливый, веселя́щій слове́съ твои́хъ тече́ньми собо́ры и́ночествующихъ; ра́дуйся, свѣти́льниче мона́шествующихъ свѣтоза́рный; ра́дуйся, по́стническая красото́ и утвержде́ніе. Пріиди́ и ны́нѣ къ на́мъ неви́димо и благослови́ ча́да твоя́, сподобля́я ны́ твои́хъ невеще́ственныхъ даро́въ, и́хже бога́тно отъ Христа́ прія́лъ еси́, вѣ́рно отъ любве́ тебе́ чту́щія и прера́достно соверша́ющія тво́й всечестны́й и свѣтоно́сный пра́здникъ; изба́ви на́съ отъ страсте́й мучи́тельства и вся́кихъ скорбе́й и обстоя́ній и оби́тель твою́ соблюди́ невреди́му и всѣ́мъ вся́ поле́зная да́руй ко Го́споду твои́ми моли́твами.]

Кано́ны пра́здника или́ Пресвяты́я Богоро́дицы, гла́съ 8: Во́ду проше́дъ... со ирмосо́мъ на 6, и свята́го на 8.

Кано́нъ свята́го, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Грѣхо́вною тьмо́ю покрыва́емь, не могу́ я́сно зрѣ́ти къ высотѣ́ исправле́ній твои́хъ, о́тче, но ты́, я́ко сострада́теленъ и ми́лостивъ, помози́ ми, возсіява́я спаси́тельный въ души́ мое́й свѣ́тъ, да пою́, ра́дуяся, свѣ́тлая твоя́ исправле́нія и пресла́вная чудеса́.

Мы́сленный ра́й показа́лся еси́, о́тче, произраща́я разли́чныхъ добродѣ́телей цвѣ́ты, плоды́ кра́сны своему́ Влады́цѣ прине́слъ еси́, украси́вшему тя́ чудесы́.

Еди́ну преступи́въ за́повѣдь, первозда́нный изъ рая́ изгна́нъ бы́сть; ты́ же, преподо́бне, за́повѣдей Влады́чнихъ соблюде́ніемъ наслѣ́дникъ сего́ показа́лся еси́, дре́ва живо́тнаго наслажда́яся при́сно и, въ весе́ліи чи́стаго се́рдца твоего́ зря́ Го́спода, Боже́ственнаго свѣ́та Его́ причаща́ешися.

Неукло́нно ше́ствуя по стопа́мъ за́повѣдей, же́злъ си́лы — Кре́стъ Христо́въ въ рука́хъ держа́, въ приста́нище безстра́стія дости́глъ еси́, о́тче, тѣ́мъ и благода́ть прія́лъ еси́ цѣли́ти неду́ги человѣ́ковъ и пресла́вная твори́ти чудеса́.

Богоро́диченъ: Ны́нѣ вре́мя по́мощи Твоея́, Влады́чице, при́зри ми́лостивно на озлобле́ніе Твоего́ раба́, Чи́стая, подаю́щи утѣше́ніе мнѣ́, я́ко да и а́зъ воспою́, ра́дуяся, боже́ственная Твоя́ чудеса́.

Катава́сія по уста́ву.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Не гордя́ся, дерзну́хъ пѣ́снь приноси́ти твое́й свяще́ннѣй па́мяти, о́тче, но любо́вію твое́ю дви́жимь, боголюбе́зне, пріими́ у́бо сію́ отъ твоего́ раба́ и ко Го́споду хода́тайствы твои́ми спасе́нія сподо́би мя́.

Любо́вію тя́ чту́щія, о́тче, спаса́й отъ бѣ́дъ и обстоя́ній, въ честнѣ́й твое́й па́мяти ли́къ себѣ́ совоку́пльшія, и коле́блемыя ны́ страсте́й бу́рею утверди́ твои́ми мольба́ми и во приста́нище спасе́нія дости́гнути сподо́би.

Кто́ изрече́тъ твоя́ по́двиги, о́тче, и смире́нія твоего́ высоту́ кто́ ска́жетъ? Вои́стинну Христо́въ учени́къ бы́лъ еси́, о боголюбе́зне, и снаслѣ́дникъ Того́ Ца́рствія. Помина́й у́бо ча́дъ твои́хъ, о́тче, моля́ся Христу́, да и на́съ ча́сти спаса́емыхъ сподо́битъ.

Неключи́мъ а́зъ е́смь и вся́чески непотре́бенъ и недоумѣ́ю по достоя́нію воспѣ́ти твоя́, я́же къ Бо́гу, исправле́нія, но, о́тче благосе́рде, любо́вь и вѣ́ру пріими́ и твои́ми свяще́нными хода́тайствы спасе́нія мя́ сподо́би.

Богоро́диченъ: Недоумѣ́етъ вои́стинну вся́къ язы́къ человѣ́ческій досто́йно славосло́вити Тя́, о Влады́чице, по достоя́нію; а́зъ же, невѣ́жествіемъ и грѣхи́ мно́гими одержи́мь, что́ и́мамъ принести́ Тебѣ́, Блага́я? оба́че любо́вь и вѣ́ру Твоего́ раба́ пріими́ и спасе́нія сподо́би мя́.

Сѣда́ленъ, гла́съ 8:

Отъ дѣя́нія на высоту́ боже́ственнаго восте́клъ еси́, о́тче, видѣ́нія и, молча́ніе коне́чное облобыза́въ, безмяте́жнымъ умо́мъ Бо́гу при́сно бесѣ́довалъ еси́, сего́ ра́ди разумѣ́ніи Боже́ственными отту́ду обогати́лся еси́, блаже́нне, и бы́лъ еси́ па́стырь и наста́вникъ послѣ́дующимъ равноа́нгельному житію́ твоему́. Тѣ́мъ, богоно́се о́тче на́шъ Ни́ле, моли́ Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Въ пучи́ну лю́тѣ впа́въ уны́нія отъ мно́жества грѣхопаде́ній мои́хъ, Чи́стая, пріидо́хъ въ недоумѣ́ніе и отча́яніемъ ны́нѣ одержу́ся. Влады́чице Богоро́дице, Ты́ мя́ спаси́, Ты́ ми́ помози́, грѣ́шнымъ бо Ты́ еси́ очище́ніе, я́ко да и а́зъ, со всѣ́ми, получи́вшими Тобо́ю спасе́ніе, веселя́ся, воспою́ непости́жное та́инство рождества́ Твоего́ и безмѣ́рную Твою́ ми́лость.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Низве́рглъ еси́ вся́ вра́жія, о́тче, ополче́нія, стоя́ бо́дренно на стра́жи внима́нія и издале́ча предзря́ си́хъ кова́рныя сѣ́ти, моли́твою же и посто́мъ безбѣ́дно прелета́я, побѣди́тельно пѣ́лъ еси́: сла́ва, Христе́, си́лѣ Твое́й.

Всегда́ во умѣ́ имѣ́я страда́нія Спа́са на́шего и во́льное на Крестѣ́ распя́тіе, сраспя́лся еси́ Тому́ умерщвле́ніемъ пло́ти, преподо́бне, и, Того́ Боже́ственною любо́вію уязви́въ твое́ се́рдце, боголюбе́зне, показа́лся еси́ умиле́нія исто́чникъ, слезоточа́ при́сно и поя́: сла́ва, Христе́, благоутро́бному снизхожде́нію Твоему́.

Христо́вою уя́звленъ любо́вію, сле́зныя то́ки непреста́нно изъ оче́съ излива́лъ еси́, Ни́ле, о́тче на́шъ приснопа́мятне, и въ пусты́ни, я́ко въ раи́, водворя́яся, непреста́нныя приноси́лъ еси́ моли́твы, поя́ при́сно: сла́ва, Христе́, си́лѣ Твое́й.

Увы́, коли́кимъ нечу́вствіемъ содержи́мь е́смь, окая́нный а́зъ: ни сме́рти бою́ся, ни стра́шнаго суди́ща трепе́щу, вся́кому злу́ пови́ненъ су́щи! Но, о душе́ всестра́стная, поне́ отны́нѣ воспряни́ въ покая́ніи, Христу́ зову́щи: Твоего́ ра́ди уго́дника Ни́ла, пощади́ мя, Спа́се, и испра́ви стопы́ моя́, Влады́ко, всемогу́щею си́лою Твое́ю.

Богоро́диченъ: Богоро́дице Дѣ́во, христіа́нъ всѣ́хъ всенаде́жное упова́ніе, спаси́ мя, отча́яннаго, о Ма́ти Милосе́рдая, оживи́ душе́ю уме́ршаго, Жи́знь всѣ́хъ ро́ждшая; Живоно́сный Исто́чниче, напо́й мя́ умиле́нія вода́ми, зно́емъ страсте́й лю́тѣ опаля́емаго, да, покая́нія слеза́ми прохлажда́емь, благода́рно воззову́: сла́ва, Влады́чице, всемо́щнѣй си́лѣ Твое́й.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Отце́въ дре́внихъ Святы́я Горы́ житію́ подража́я, богоно́се о́тче на́шъ, Ни́ле приснопа́мятне, во оти́шіе пусты́ннаго безмо́лвія поте́клъ еси́, ра́дуяся, и, та́мо во смире́ніи плоды́ принося́ ду́ха, по премно́гу благоугоди́лъ еси́ сла́вою чуде́съ тя́ Обогати́вшему.

Госпо́дни за́повѣди исполня́я, кро́токъ и незло́бивъ, о́тче, бы́лъ еси́, смире́нъ и про́стъ, и во всѣ́хъ добродѣ́теляхъ благоиску́сенъ, тѣ́мъ и Свята́го Ду́ха орга́нъ яви́лся еси́, прему́дре, науча́я и вразумля́я ча́да твоя́ досто́йно ходи́ти во слѣ́дъ Христу́, во смире́ніи Тому́ служа́щимъ, спасе́ніе подаю́щаго.

Ны́нѣ, преподо́бне, пріе́мля на небесѣ́хъ по́чести трудо́въ твои́хъ, не забу́ди на́съ, тво́й пра́здникъ ра́достно пра́зднующихъ, но испроси́ грѣхо́въ разрѣше́ніе, моля́щи Христа́, просла́вльшихъ Его́ сла́вящимъ, спасе́ніе подаю́щаго.

Обле́клся еси́ во Христа́, богому́дре, безстра́стія оде́ждою украси́вся, сострада́теленъ и ми́лостивъ, о́тче, бы́лъ еси́ согрѣша́ющимъ, смиренному́дро поуча́я и возбужда́я къ покая́нію и ко Христу́ приводя́, всѣ́мъ, во смире́ніи прося́щимъ, спасе́ніе подаю́щему.

Богоро́диченъ: Оде́ждою студа́ облеко́хся окая́нный а́зъ, совлече́нъ боготка́нныя, ю́же во креще́ніи прія́хъ, оде́жды, о Дѣ́во Всенепоро́чная! Но молю́ Тя, Всеми́лостивая, во оде́жду мя́ спасе́нія па́ки облеки́, да досто́инъ бу́ду бра́ка Агнча, Ему́же отъ чи́стыхъ крове́й Твои́хъ багряни́цу пло́ти истка́ла еси́, всѣ́мъ, воспѣва́ющимъ Тя́, спасе́ніе подаю́щему.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Съ ли́ки святы́хъ въ небе́сныхъ ны́нѣ водворя́яся селе́ніихъ, о Ни́ле богоно́се, и со дерзнове́ніемъ предстоя́ Пресвятѣ́й Тро́ицѣ, на́съ, твои́хъ ча́дъ, не забу́ди, о́тче, но испроси́ грѣхо́въ разрѣше́ніе тво́й пра́здникъ ра́достно пра́зднующимъ, да благода́рно тя́ просла́вльшаго Бо́га сла́вимъ.

Но́вый благоте́чный въ Россíйстѣй земли́ исто́чникъ яви́лся еси́, богоно́се, струи́ исцѣле́ній излива́я отъ свята́го твоего́ гро́ба, вѣ́рою несумнѣ́нною притека́ющимъ, Ни́ле, о́тче на́шъ, мы́ же, весе́лія исполня́еми, тя́ прославля́ющаго Бо́га сла́вимъ.

Усе́рдно отъ ю́ности твоея́ да́же до честна́го преставле́нія со́вѣстію чи́стою Христу́ послужи́лъ еси́, преподо́бне, Того́ храня́ Боже́ственныя за́повѣди, нестяжа́ніемъ бо и нището́ю себе́ огради́въ, на ка́мени терпѣ́нія твоя́ стопы́, му́дре, утверди́лъ еси́, Ни́ле, о́тче на́шъ.

Мно́гая твоя́, о, о́тче, исправле́нія и я́же въ Бо́зѣ труды́ и по́двиги твоя́, поще́ніе и бдѣ́ніе, до́лу лега́нія и злострада́нія, нищету́ и соверше́нное нестяжа́ніе кто́ изрещи́ возмо́жетъ? Вои́стинну бо и́стиненъ мона́хъ показа́лся еси́, боголюбе́зне, тѣ́мъ и мы́, любе́зно твою́ па́мять чту́ще, тя́ укрѣ́пльшаго Бо́га сла́вимъ.

Богоро́диченъ: Утро́ба Твоя́, о Дѣ́во Пренепоро́чная, простра́ннѣйшая небе́съ показа́ся, вмѣсти́вшая Невмѣсти́маго Бо́га. О, пресла́вныхъ веще́й! О, непостижи́маго а́нгеломъ и человѣ́комъ, на Тебѣ́ соверши́вшагося та́инства! Тѣ́мъ Тя́, Богоро́дицу, вои́стинну исповѣ́дающе, отъ Тебе́ ро́ждшагося Бо́га сла́вимъ.

Конда́къ, гла́съ 8. Подо́бенъ: Взбра́нной Воево́дѣ.

Любве́ ра́ди Христо́вы удали́вся мірски́хъ смуще́ній, ра́достною душе́ю всели́лся еси́ въ пусты́ни, въ не́йже подвиза́вся до́брѣ, я́ко а́нгелъ на земли́, о́тче Ни́ле, пожи́лъ еси́: бдѣ́ніемъ бо и посто́мъ тѣ́ло свое́ изнури́лъ еси́ вѣ́чныя ра́ди жи́зни. Ея́же ны́нѣ сподо́бився, во свѣ́тѣ неизрече́нныя ра́дости Пресвятѣ́й Тро́ицѣ со святы́ми предстоя́, моли́, мо́лимтися, припа́дающе, ча́да твоя́, сохрани́тися на́мъ отъ вся́каго навѣ́та и злы́хъ обстоя́ній ви́димыхъ и неви́димыхъ вра́гъ и спасти́ся душа́мъ на́шимъ.

Икосъ:

Ангельскому поревнова́въ житію́ и вели́кимъ во отцѣ́хъ подо́бяся, всего́ себе́ отрѣши́лъ еси́ мірска́го сплете́нія, къ по́двигамъ же по́стничества му́жески вооружи́вся, опа́сно путе́мъ Бо́жіихъ за́повѣдей ше́ствовалъ еси́, блаже́нне. Тѣ́мже и мы́, вѣ́рно чту́щіи твою́ свяще́нную па́мять, похвала́ми ублажа́емъ тя́ си́ми: ра́дуйся, а́нгельскаго житія́ подража́телю; ра́дуйся, дре́внихъ вели́кихъ оте́цъ житію́ прее́мниче; ра́дуйся, неви́димыхъ враго́въ му́жественный побѣди́телю; ра́дуйся, за́повѣдей Бо́жіихъ храни́телю усе́рдный; ра́дуйся, оте́ческихъ богодухнове́нныхъ преда́ній опа́сный ревни́телю; ра́дуйся, мона́шескаго по́стническаго жи́тельства законоположи́телю; ра́дуйся, добродѣ́телей чистѣ́йшее зерца́ло; ра́дуйся, Ду́ха Свята́го сладкогла́сный орга́нъ; ра́дуйся, о́бразе глубо́каго смире́нія; ра́дуйся, ре́вностный исполни́телю Боже́ственныхъ дѣ́телей; ра́дуйся, я́ко тобо́ю научи́хомся непреле́стнымъ путе́мъ житія́ ходи́ти; ра́дуйся, я́ко твои́мъ за ны́ хода́тайствомъ спасе́ніе получи́ти надѣ́емся. Ра́дуйся, Ни́ле чудотво́рче, о́тче на́шъ.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Пѣ́снь препро́сту усе́рдно приношу́ ти́, о́тче: пріими́ у́бо сію́ отъ недосто́йнаго и не возгнуша́йся мене́, па́че всѣ́хъ грѣ́шнѣйшаго, о преблаже́нне, но, ми́лостивно прекло́нься, спасе́ніе улучи́ти твои́мъ предста́тельствомъ сподо́би, да, ра́дуяся, пою́: препѣ́тый отце́въ Го́споди и Бо́же, благослове́нъ еси́.

Еди́нъ съ еди́нымъ Бо́гомъ непреста́нно бесѣ́довалъ еси́, о́тче, чи́стыя моли́твы чи́стымъ и немяте́жнымъ умо́мъ Тому́ принося́ и со́вѣстію чи́стою, о богому́дре, отъ дѣя́нія бо къ видѣ́нію восте́къ, ве́сь богови́денъ содѣ́ялся еси́, блаже́нне, при́сно поя́: препѣ́тый отце́въ Го́споди и Бо́же, благослове́нъ еси́.

Плодоно́сенъ са́дъ показа́лся еси́, о́тче, принося́щь плоды́ Ду́ха, любве́ бо и ра́дости преиспо́лненъ бы́лъ еси́, ми́ра, долготерпѣ́нія, кро́тости и воздержа́нія, и, я́ко Христо́въ вои́стинну, пло́ть распина́я со страстьми́ и похотьми́, и при́сно поя́: препѣ́тый отце́въ Го́споди и Бо́же, благослове́нъ еси́.

Не му́дростію, но любо́вію тебе́ пою́щаго пріими́, о о́тче, и, свѣтосія́нною твое́ю моли́твою забве́нія и невѣ́дѣнія тьму́ разгна́въ, помози́ ми вопи́ти при́сно: препѣ́тый отце́въ Го́споди и Бо́же, благослове́нъ еси́.

Богоро́диченъ: Подъ кро́въ Тво́й, Влады́чице, прибѣга́ющаго не отри́ни, но, я́ко Всеми́лостивая, спаси́ убо́гаго раба́ Твоего́, отъ безмѣ́рныхъ согрѣше́ній мои́хъ избавля́ющи мя́, да, ра́дуяся, пою́: препѣ́таго отце́въ Го́спода и Бо́га Ма́ти, во вѣ́ки благослове́нна еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Отче на́шъ Ни́ле приснопа́мятне, красно́ и добро́ вои́стинну житіе́ препроводи́лъ еси́, о боголюбе́зне: мірскíя бо молвы́ избѣжа́въ и въ пусты́ню уедини́вся, ско́рби по́стныя сѣ́ялъ еси́ со слеза́ми, но ны́нѣ, ра́дуяся, жне́ши присноживо́тія кла́сы.

Еди́ному та́йная вѣ́дущему Бо́гу вта́йнѣ порабо́талъ еси́, о́тче, во смире́ніи проходя́ добродѣ́телей по́прище, о блаже́нне, по преставле́ніи же твое́мъ явле́нъ и свѣ́телъ еси́ чудесы́, пѣ́ти воздвиза́я вѣ́рныя: Го́спода по́йте, дѣла́, и превозноси́те Его́ во вся́ вѣ́ки.

Честна́я твоя́ ра́ка источа́етъ исцѣле́нія и прого́нитъ ду́хи лука́вствія отъ приходя́щихъ къ тебѣ́ вѣ́рно, Ни́ле всеблаже́нне. Тѣ́мъ и мы́ любе́зно чти́мъ твою́ всесвяще́нную па́мять, ве́село пою́ще: Го́спода по́йте, дѣла́, и превозноси́те Его́ во вся́ вѣ́ки.

Богоро́диченъ: Услы́ши, Влады́чице, болѣ́зненное воздыха́ніе Твоего́ раба́, разрѣши́вши вери́ги мои́хъ согрѣше́ній, печа́ль на ра́дость преложи́ и болѣ́зни премѣни́ вско́рѣ, да, ра́дуяся, пою́ Тя́, Дѣ́во, и превозношу́, Чи́стая, во вся́ вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Пресвѣ́телъ свѣти́льникъ оте́честву твоему́ яви́лся еси́, преподо́бне, осіявая свѣ́тлостію твое́ю жи́тельства на́ша и чуде́съ сія́ньми, и́миже по преставле́ніи твое́мъ просла́вился еси́, о блаже́нне. Тѣ́мъ, твою́ свѣтоно́сную па́мять чту́ще, Христа́ сла́вимъ, свѣ́тло тя́ прославля́ющаго.

Егда́ кра́сніи твои́ но́зѣ, до́брѣ по спасе́нія пути́ те́кшія, на одрѣ́ сме́ртномъ просте́рлъ еси́, блаже́нне, тогда́ ученицы́ твои́, сле́зы точа́ще, глаго́лаху: ка́мо отхо́диши, па́стырю на́шъ, и кому́ оставля́еши ча́да твоя́, о́тче, и́хже духо́внѣ породи́въ, воспита́лъ еси́ млеко́мъ твоего́ му́драго наставле́нія?

Пла́чемъ моея́ ра́дости не растворя́йте, о ча́да, — ты́ ре́клъ еси́ и́мъ, о богоблаже́нне, — а́зъ бо, веселя́ся, отхожду́ прія́ти вѣне́цъ пра́вды, его́же обѣща́ Христо́съ Того́ лю́бящимъ, идѣ́же и вы́ потщи́теся пости́гнути, соблю́дше Того́, вку́пѣ и моя́ за́повѣди.

Да воспла́четъ вку́пѣ съ на́ми пусты́ня сія́, о о́тче, а́ще бо и процвѣте́, я́ко кри́нъ, красу́ющися богоуго́днымъ жи́тельствомъ твои́мъ, но не имѣ́я по тебѣ́ до́браго дѣ́лателя, те́рніе и волче́цъ и́мать возрасти́ти. Оба́че не оста́ви посѣща́ти ста́до твое́, о́тче, и са́мъ ты́ упаси́ тебе́ велича́ющія.

Не забу́ди и ны́нѣ на́съ, обита́ющихъ на мѣ́стѣ твоего́ трудополо́жнаго жи́тельства, о Ни́ле богоно́се, о́тче на́шъ, и пѣ́снь усе́рдно тебѣ́ принося́щимъ хода́тайствуй спасе́ніе: тя́ бо, о всеблаже́нне, моли́твенника и предста́теля ко Го́споду стяжа́вше, наде́жды да не оттщети́мся, вѣ́рно тя́ чту́щіи.

Богоро́диченъ: Оде́ждою спасе́нія одѣ́й мя́, о всенаде́жное спасе́нія моего́ упова́ніе, Ма́ти Бо́жія, на Тебе́ надѣ́юся, Всеми́лостивая: сокро́вищница бо еси́ ми́лости и вся́ спаса́еши, къ Тебѣ́ прибѣга́ющія. Спаси́ у́бо и мене́, отча́яннаго, да благода́рно пою́: ра́дуйся, Всеблаже́нная Богоро́дице, Чи́стая Приснодѣ́во.

Свѣти́ленъ:

По́двиги твои́ми, о богоблаже́нне, удиви́лъ еси́ а́нгелы и человѣ́ки, Бо́га же возвесели́лъ еси́, тѣ́мъ тя́ чти́мъ вѣ́рно, твою́ торжеству́юще па́мять, Ни́ле богоно́се, о́тче на́шъ. [Два́жды.]

[Сла́ва, и ны́нѣ, пра́здника, или́] богоро́диченъ:

Вели́чія Твоя́, о Дѣ́во и Богоро́дице Чи́стая, превосхо́дятъ вся́кое человѣ́ковъ разумѣ́ніе, оба́че дерза́емъ, бре́нніи, любе́зно Тебѣ́ вопи́ти: ра́дуйся, а́нгеломъ и человѣ́комъ превожделѣ́нная Ра́досте.

На хвали́техъ сти́хиры на 4, гла́съ 8. Подо́бенъ: О, пресла́внаго чудесе́!

О, пресла́внаго чудесе́! Въ послѣ́днихъ ро́дѣхъ просія́ свѣти́ло мона́шествующихъ, Ни́лъ, прему́дрый оте́цъ на́шъ, златостру́йныя бо рѣ́ки уче́ній излія́ и одушевле́нъ о́бразъ себе́ сама́го показа́ и́стинно мона́шествовати жела́ющимъ, его́же моли́твами, Христе́, спаси́ ду́ши на́ша, я́ко еди́нъ Благоутро́бенъ.

О, пресла́внаго чудесе́! Боже́ственныя благода́ти испо́лненъ, яви́ся Ни́лъ, блаже́ннѣйшій оте́цъ на́шъ: у́мъ бо къ Бо́гу впери́въ, ве́сь свѣтови́денъ показа́ся, тѣ́ломъ же въ пусты́ни живы́й, ду́хомъ на небесѣ́хъ обита́ше. Его́же моли́твами, Христе́, спаси́ ду́ши на́ша, я́ко еди́нъ Благоутро́бенъ.

О, пресла́внаго чудесе́! Исто́чникъ чудесе́мъ показа́ся Ни́лъ, преподо́бный оте́цъ на́шъ, и́бо и по сме́рти источа́етъ исцѣле́нія, вѣ́рно притека́ющимъ ко всечестнѣ́й и свяще́ннѣй ра́цѣ моще́й его́. Его́же моли́твами, Христе́, стра́сти ду́шъ и тѣле́съ на́шихъ исцѣли́ и спаси́ на́съ, я́ко еди́нъ Благоутро́бенъ.

Преподо́бне о́тче на́шъ Ни́ле, вои́стинну ты́, бѣ́гая мíра и водворя́яся въ пусты́ни, я́ко а́гнецъ незло́бивъ, въ не́й упа́слся еси́ на зла́цѣ Боже́ственныхъ писа́ній и, я́ко пчела́ трудолю́бна и прему́дра, духо́вныя цвѣ́ты облета́я, па́че ме́да сладча́йшія собра́лъ еси́ словеса́, и́миже пита́еши ча́да твоя́, о́тче. Тѣ́мже, дне́сь соше́дшеся ко гро́бу твоему́, ублажа́емъ тя́ любо́вію, торжеству́юще свяще́нную твою́ па́мять и моля́щеся тобо́ю получи́ти грѣхо́въ оставле́ніе и ве́лію ми́лость душа́мъ на́шимъ.

Сла́ва, гла́съ то́йже. Самогла́сенъ:

Духо́вный ли́къ дне́сь совоку́пльше, боже́ственнѣ возвесели́мся въ свяще́ннѣйшей па́мяти отца́ на́шего: се́ бо предлага́етъ на́мъ трапе́зу та́инственную и питіе́ сладча́йшее, свои́хъ по́стническихъ по́двиговъ высо́кая исправле́нія, вся́кій ра́зумъ удивля́ющія и душе́вныя на́ша чу́вства услажда́ющія, и́миже духо́внѣ насыща́еми, хвалу́ усты́ недосто́йными тому́ принести́ потщи́мся. Се́й бо, лоза́ Христо́ва виногра́да бы́въ и́стинно, стра́хомъ суда́ и болѣ́зньми по́стническими точи́ло се́рдца своего́ изгнета́я, сле́зныя то́ки, я́ко вино́, вои́стинну се́рдце веселя́щее, непреста́нно точа́ше. Тому́ дне́сь, духо́внѣ веселя́щеся, хвалу́ принесе́мъ, псало́мски воспѣва́юще и глаго́люще: честна́ предъ Го́сподемъ твоя́ сме́рть бы́сть, преподо́бне, и прера́достна на́мъ твоя́ па́мять, боголюбе́зне, въ не́йже ны́нѣ духо́внѣ учрежда́еми, моле́бно тебѣ́ вопіе́мъ: моли́ся, богоно́се о́тче на́шъ Ни́ле, ко Спа́су всѣ́хъ, дарова́ти на́мъ единомы́сліе, ми́ръ и ве́лію ми́лость.

И ны́нѣ, пра́здника или́ богоро́диченъ:

Влады́чице, пріими́ моли́твы рабо́въ Твои́хъ [и изба́ви на́съ отъ вся́кія ну́жды и печа́ли].

Славосло́віе вели́кое и про́чее по уста́ву.



НА ЛИТУРГІИ,

Блаже́нна, пра́здника и свята́го, пѣ́снь 6-я, или́ одного́ свята́го, пѣ́сни 3-я и 6-я. Проки́менъ, Апо́столъ, Аллилу́ія, Ева́нгеліе и прича́стенъ, по уста́ву: [Проки́менъ пра́здника и свята́го, гла́съ 7: Честна́ предъ Го́сподемъ сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ дне́ и свята́го, къ Гала́томъ, зача́ло 213. Аллилу́ія пра́здника и свята́го, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе дне́ и свята́го, Луки́, зача́ло 24. Прича́стенъ пра́здника и свята́го: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]


Моли́тва преподо́бному Ни́лу, Со́рскому чудотво́рцу.

О, преподо́бне и богоблаже́нне о́тче Ни́ле, богому́дрый наста́вниче и учи́телю на́шъ! Ты́, любве́ ра́ди Бо́жія удаля́яся мірски́хъ смуще́ній, въ непрохо́днѣй пусты́ни и въ де́брехъ изво́лилъ еси́ всели́тися, и, я́ко лоза́ благопло́дна, умно́живъ ча́да пусты́ни, яви́лъ еси́ себе́ и́мъ сло́вомъ, писа́ніемъ и житіе́мъ о́бразъ вся́кія и́ноческія добродѣ́тели, и, я́ко а́нгелъ во пло́ти, пожи́въ на земли́, ны́нѣ въ селе́ніихъ небе́сныхъ, идѣ́же пра́зднующихъ гла́съ непреста́нный, водворя́ешися, и, съ ли́ки святы́хъ Бо́гу предстоя́, Тому́ хвалы́ и славосло́вія непреста́нно прино́сиши. Мо́лимъ тя́, богоблаже́нне, наста́ви и на́съ, жи́тельствующихъ подъ кро́вомъ твои́мъ, непреткнове́нно ходи́ти по стопа́мъ твои́мъ: люби́ти Го́спода Бо́га всѣ́мъ се́рдцемъ свои́мъ, Того́ Еди́наго вожделѣ́ти и о То́мъ Еди́номъ помышля́ти, му́жественно же и благоиску́сно пра́тися съ до́лу влеку́щими на́съ по́мыслы и прило́ги вра́жіими и тѣ́хъ всегда́ побѣжда́ти; возлюби́ти вся́кую тѣсноту́ мона́шескаго житія́, и возненави́дѣти кра́сная мíра сего́ любве́ ра́ди Христо́вы и насади́ти въ сердца́хъ свои́хъ вся́кую добродѣ́тель, въ не́йже са́мъ потруди́лся еси́. Моли́ Христа́ Бо́га, да и всѣ́мъ правосла́внымъ христіа́номъ, въ мíрѣ живу́щимъ, просвѣти́тъ у́мъ и о́чи серде́чная, е́же ко спасе́нію, утверди́тъ и́хъ въ вѣ́рѣ, и благоче́стіи, и въ дѣ́ланіи за́повѣдей Свои́хъ, сохрани́тъ отъ ле́сти мíра сего́ и да́руетъ и́мъ и на́мъ оставле́ніе грѣхо́въ и къ си́мъ приложи́тъ, по нело́жному обѣтова́нію Своему́, и вся́ потре́бная на́мъ ко вре́менному животу́. Благочести́вѣйшаго же Госуда́ря на́шего, Импера́тора [и́мярекъ] вѣнча́етъ ору́жіемъ благоволе́нія Своего́, укрѣпи́тъ Его́ мы́шщу, удержа́витъ Его́ ца́рство, да́руетъ Ему́ глубо́кій и неотъе́млемый ми́ръ, и ве́сь Августѣ́йшій До́мъ Его́ въ любви́, единомы́сліи и во вся́кой ра́дости и долгоде́нствіи соблюде́тъ, и вся́кое нача́ло и вла́сть, и все́ во́инство Его́ на пу́ть пра́вды и вѣ́рности упра́витъ, да, въ пусты́ни и въ мíрѣ жи́тельствующе, ти́хое и безмо́лвное житіе́ поживе́мъ во вся́комъ благоче́стіи и че́стности, и Того́ усты́ и се́рдцемъ просла́вимъ ку́пно со Безнача́льнымъ Его́ Отце́мъ и Пресвяты́мъ и Благи́мъ и Животворя́щимъ Его́ Ду́хомъ всегда́, ны́нѣ, и при́сно, и во вѣ́ки вѣко́въ. Ами́нь.

Источникъ: Слу́жба преподо́бному отцу́ на́шему Ни́лу, Со́рскому чудотво́рцу. — М.: Сѵнода́льная Тѵпогра́фія, 1860. — 19 л.

/ Къ оглавленію раздѣла /


Наверхъ / Къ титульной страницѣ

0