Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 6-й де́нь.
Слу́жба свято́му и пра́ведному Іову Многострада́льному.

НА ВЕЛИЦѢЙ ВЕЧЕРНИ,
Пое́мъ Блаже́нъ му́жъ.., 1-й антифо́нъ. На Го́споди воззва́хъ: стихи́ры пра́здника 3 и свята́го 5.
Стихи́ры свята́го, гла́съ 4:

Бога́тствомъ благоче́стія, я́ко порфи́рою многоцѣ́нною одѣ́янъ, милосе́рдіемъ же и пра́вдою, я́ко боже́ственнымъ вѣнце́мъ укра́шенъ, ца́рь яви́лся еси́ надъ страстьми́ борю́щими. Тѣ́мже въ небе́сный ца́рскій черто́гъ, по преставле́ніи твое́мъ, всели́лся еси́, и Вѣ́чному Царю́ предстои́ши, Іове пресла́вне. [Два́жды.]

По́мощь, ю́же отъ Бо́га, имѣ́я себѣ́ спобо́рницу, я́ко во́инъ до́блестнѣйшій, на боре́ніе за добродѣ́тель изше́лъ еси́, Іове, и, въ нестерпи́мыхъ гно́йныхъ я́звахъ сы́й, безмѣ́рно хва́лящася врага́ одолѣ́въ, посрами́лъ еси́, тѣ́мже и досто́йную по́честь побѣ́ды воспрія́лъ еси́ отъ Го́спода. Того́ моли́, блаже́нне, о душа́хъ на́шихъ.

Сла́ва, и ны́нѣ, пра́здника.
Вхо́дъ. Проки́менъ дне́ и чте́нія.

Іова чте́ніе. [Глава́ 1.]

Человѣ́къ нѣ́кій бя́ше во странѣ́ Авситидíйстѣй, ему́же и́мя Іовъ, и бѣ́ человѣ́къ о́нъ и́стиненъ, непоро́ченъ, пра́веденъ, богочести́въ, удаля́яся отъ вся́кія лука́выя ве́щи. Бы́ша же ему́ сы́нове се́дмь и дще́ри три́. И бя́ху ско́ти его́, ове́цъ се́дмь ты́сящъ, велблю́довъ три́ ты́сящи, супру́гъ воло́въ пя́ть со́тъ, и осли́цъ пасо́мыхъ пя́ть со́тъ, и слу́гъ мно́го зѣло́, и дѣла́ ве́лія бя́ху ему́ на земли́, и бѣ́ человѣ́къ о́ный благоро́днѣйшій су́щихъ отъ восто́къ со́лнца. Сходя́щеся же сы́нове его́ дру́гъ ко дру́гу, творя́ху пи́ръ на кíйждо де́нь, спое́млюще вку́пѣ и три́ сестры́ своя́ я́сти и пи́ти съ ни́ми. И егда́ скончава́шася днíе пи́ра, посыла́ше Іовъ и очища́ше и́хъ, востая́ зау́тра, и приноша́ше отъ ни́хъ же́ртвы по числу́ и́хъ, и тельца́ еди́наго о грѣсѣ́ о душа́хъ и́хъ. Глаго́лаше бо Іовъ: не́гли когда́ сы́нове мои́ согрѣши́ша и въ мы́сли свое́й зла́я помы́слиша проти́ву Бо́га. Тако у́бо творя́ше Іовъ вся́ дни́. И бы́сть я́ко де́нь се́й, и се́, пріидо́ша а́нгели Бо́жіи предста́ти предъ Го́сподемъ, и діа́волъ пріи́де съ ни́ми. И рече́ Госпо́дь діа́волу: отку́ду прише́лъ еси́? И отвѣща́въ діа́волъ Го́сподеви, рече́: обше́дъ зе́млю и проше́дъ поднебе́сную, се́ е́смь. И рече́ ему́ Госпо́дь: Вня́лъ ли еси́ мы́слію твое́ю на раба́ Моего́ Іова? зане́ нѣ́сть, я́ко о́нъ, на земли́: человѣ́къ непоро́ченъ, и́стиненъ, богочести́въ, удаля́яся отъ вся́кія лука́выя ве́щи. Отвѣща́ же діа́волъ и рече́ предъ Го́сподемъ: еда́ ту́не Іовъ чти́тъ Го́спода? Не Ты́ ли огради́лъ еси́ внѣ́шняя его́, и вну́тренняя до́му его́, и я́же внѣ́ всѣ́хъ, су́щихъ его́ о́крестъ? Дѣла́ же руку́ его́ благослови́лъ еси́ и скоты́ его́ мно́ги сотвори́лъ еси́ на земли́, но посли́ ру́ку Твою́ и косни́ся всѣ́хъ, я́же и́мать, а́ще не въ лице́ Тя благослови́тъ? Тогда́ рече́ Госпо́дь діа́волу: се́, вся́, ели́ка су́ть ему́, даю́ въ ру́ку твою́, но самого́ да не ко́снешися. И изы́де діа́волъ отъ Го́спода.

Іова чте́ніе. [Глава́ 1.]

Бы́сть я́ко де́нь се́й, сы́нове Іовлевы и дще́ри его́ пія́ху вино́ въ дому́ бра́та своего́ старѣ́йшаго. И се́, вѣ́стникъ пріи́де ко Іову и рече́ ему́: супру́зи воло́въ оря́ху, и осли́цы пася́хуся близъ и́хъ, и прише́дше плѣни́теліе, плѣни́ша и́хъ и о́троки изби́ша мече́мъ, и спасо́хся а́зъ еди́нъ и пріидо́хъ возвѣсти́ти тебѣ́. Еще́ сему́ глаго́лющу, пріи́де и́нъ вѣ́стникъ и рече́ ко Іову: о́гнь спаде́ съ небесе́, и пожже́ о́вцы, и па́стыри пояде́ подо́бнѣ, спасо́хся же а́зъ еди́нъ и пріидо́хъ возвѣсти́ти тебѣ́. Еще́ сему́ глаго́лющу, пріи́де и́нъ вѣ́стникъ и рече́ ко Іову: ко́нницы сотвори́ша нача́льства три́ и окружи́ша велблю́ды и плѣни́ша и́хъ, и о́троки изби́ша мечьми́, спасо́хся же а́зъ еди́нъ и пріидо́хъ возвѣсти́ти тебѣ́. Еще́ сему́ глаго́лющу, и́нъ вѣ́стникъ пріи́де, глаго́ля Іову: сыно́мъ твои́мъ и дще́ремъ твои́мъ, яду́щимъ и пію́щимъ у бра́та своего́ старѣ́йшаго, внеза́пу вѣ́тръ вели́къ на́йде отъ пусты́ни и косну́ся четы́ремъ угло́мъ хра́мины, и паде́ хра́мина на дѣ́ти твоя́, и сконча́шася; спасо́хся же а́зъ еди́нъ и пріидо́хъ возвѣсти́ти тебѣ́. Та́ко (услы́шавъ) Іовъ, воста́въ, растерза́ ри́зы своя́ и остриже́ власы́ главы́ своея́, и посы́па пе́рстію главу́ свою́, и, па́дъ на зе́млю, поклони́ся (Го́сподеви) и рече́: са́мъ на́гъ изыдо́хъ отъ чре́ва ма́тере моея́, на́гъ и отъиду́ та́мо. Госпо́дь даде́, Госпо́дь отъя́тъ, я́ко Го́сподеви изво́лися, та́ко бы́сть. Бу́ди и́мя Госпо́дне благослове́но (во вѣ́ки). Во всѣ́хъ си́хъ, приключи́вшихся ему́, ничто́же согрѣши́ Іовъ предъ Го́сподемъ, (ниже́ устна́ма свои́ма,) и не даде́ безу́мія Бо́гу.

Іова чте́ніе. [Глава́ 2.]

Бы́сть я́ко де́нь се́й, и пріидо́ша а́нгели Бо́жіи предста́ти предъ Го́сподемъ, и діа́волъ пріи́де посредѣ́ и́хъ предста́ти предъ Го́сподемъ. И рече́ Госпо́дь діа́волу: отку́ду ты́ гряде́ши? Тогда́ рече́ діа́волъ предъ Го́сподемъ: проше́дъ поднебе́сную и обше́дъ всю́ зе́млю, пріидо́хъ. И рече́ Госпо́дь ко діа́волу: вня́лъ ли́ еси́ у́бо (мы́слію твое́ю) рабу́ Моему́ Іову? Яко нѣ́сть такова́ отъ су́щихъ на земли́: человѣ́къ незло́бивъ, и́стиненъ, непоро́ченъ, богочести́въ, удаля́яся отъ вся́каго зла́, еще́ же придержи́тся незло́бія; ты́ же ре́клъ еси́ имѣ́нія его́ погуби́ти вотще́. Отвѣща́въ же діа́волъ Го́сподеви, рече́: ко́жу за ко́жу, и вся́, ели́ка и́мать человѣ́къ, да́стъ за ду́шу свою́, оба́че посли́ ру́ку Твою́ и косни́ся косте́мъ его́ и пло́ти его́, а́ще не въ лице́ Тя́ благослови́тъ? Рече́ же Госпо́дь діа́волу: се́, предаю́ ти́ его́, то́кмо ду́шу его́ соблюди́. Изы́де же діа́волъ отъ лица́ Госпо́дня и порази́ Іова гно́емъ лю́тымъ отъ ногу́ да́же до главы́. И взя́ (Іовъ) чре́пъ, да острога́етъ гно́й сво́й, и то́й сѣдя́ше на гно́ищи внѣ́ гра́да. Вре́мени же мно́гу мину́вшу, рече́ къ нему́ жена́ его́: доко́лѣ терпи́ши, глаго́ля: се́, пожду́ вре́мя еще́ ма́ло, ча́я наде́жди спасе́нія моего́. Се́ бо потреби́ся отъ земли́ па́мять твоя́, сы́нове твои́ и дще́ри, моего́ чре́ва болѣ́зни и труды́, и́миже вотще́ труди́хся съ болѣ́зньми, ты́ же са́мъ въ гнои́ черве́й сѣди́ши, обнощева́я внѣ́ безъ покро́ва, и а́зъ скита́ющися и служа́щи, мѣ́сто отъ мѣ́ста преходя́щи и до́мъ отъ до́му, ожида́ющи со́лнца, когда́ за́йдетъ, да почíю отъ трудо́въ мои́хъ и отъ болѣ́зней, я́же мя́ ны́нѣ обдержа́тъ; но рцы́ глаго́лъ нѣ́кій ко Го́споду и умри́. Онъ же, воззрѣ́въ, рече́ къ не́й: вску́ю, я́ко еди́на отъ безу́мныхъ же́нъ, возглаго́лала еси́? Аще блага́я прія́хомъ отъ руки́ Госпо́дни, злы́хъ ли не стерпи́мъ? Во всѣ́хъ си́хъ, приключи́вшихся ему́, ничи́мже согрѣши́ Іовъ устна́ма предъ Бо́гомъ (и не даде́ безу́мія Бо́гу).

На литíи стихи́ра хра́ма или́ пра́здника, та́же настоя́щая стихи́ра свята́го, гла́съ 1:

Многострада́льнаго, вѣ́рніи, восхва́лимъ Іова, и́же пре́жде зако́на пра́ведника и пре́жде проро́ковъ проро́ка, внѣ́ ро́да и завѣ́та Авраа́мова вѣ́ру Авраа́млю до́брѣ сохра́ньшаго, страда́ньми свои́ми стра́сти Христо́вы предъизобрази́вшаго, и ны́нѣ въ вы́шнихъ селе́ніихъ со Христо́мъ ца́рствующаго и моля́щагося о душа́хъ на́шихъ.

Сла́ва, и ны́нѣ, пра́здника.

На стихо́внѣ стихи́ры, гла́съ 6:

Бога́тствомъ изоби́луя, къ сему́ отню́дъ не прилѣпи́лся еси́ се́рдцемъ твои́мъ и, егда́ тя́ вра́гъ попуще́ніемъ Бо́жіимъ лиши́ того́, благослови́лъ еси́ Бо́га, глаго́ля: Госпо́дь даде́, Госпо́дь отъя́тъ; бу́ди и́мя Госпо́дне благослове́нно. Того́ моли́, блаже́нне Іове, да и на́съ научи́тъ не упова́ти на бога́тство ги́бнущее и спасе́тъ ду́ши на́ша, я́ко Человѣколю́бецъ.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Мно́гою че́стію и сла́вою почте́нъ, не превозноси́лся еси́ во умѣ́ твое́мъ, но спаса́лъ еси́ страда́льца вопію́ща и сироту́ безпо́мощна, и се́рдцу вдови́цы ра́дость приноси́лъ еси́, и утѣ́шитель пла́чущихъ бы́лъ еси́. И ны́нѣ на небесѣ́хъ вы́шнія сла́вы и че́сти сподо́бився, моли́, всеблаже́нне, Христа́ Бо́га на́шего, да сохрани́тъ и на́съ отъ богоме́рзкія горды́ни и спасе́тъ ду́ши на́ша, я́ко Человѣколю́бецъ.

Сти́хъ: Сла́ва и бога́тство въ дому́ Его́, и пра́вда Его́ пребыва́етъ въ вѣ́къ вѣ́ка.

Око бы́лъ еси́ слѣпы́мъ, нога́ же хромы́мъ и оте́цъ ни́щимъ, пра́ведный Іове, въ пра́вду облача́лся еси́, одѣва́лся же еси́ въ су́дъ, я́ко въ ри́зу. Тѣ́мже моли́ся Христу́ Бо́гу, да и въ на́ша сердца́ вдохне́тъ ре́вность къ подвиго́мъ христіа́нскаго милосе́рдія и правосу́дія и спасе́тъ ду́ши на́ша, я́ко Человѣколю́бецъ.

Сла́ва, гла́съ то́йже:

Да́лъ еси́ на́мъ о́бразъ терпѣ́нія и му́жества, Преблагíй Го́споди, уго́дника Твоего́ Іова, во всѣ́хъ приклю́чшихся ему́ злострада́ніихъ ничи́мже согрѣши́вша предъ Тобо́ю, ниже́ устна́ма свои́ма, и не да́вша безу́мія Тебѣ́, Бо́гу на́шему. Того́ моли́твами и на́съ сотвори́ побѣди́тели многоразли́чныхъ искуше́ній и спаси́ ду́ши на́ша, я́ко Человѣколю́бецъ.

И ны́нѣ, пра́здника.

Тропа́рь, гла́съ 2:

Па́мять пра́веднаго Твоего́ Іова, Го́споди, пра́зднующе, тѣ́мъ Тя́ мо́лимъ: изба́ви на́съ отъ навѣ́товъ и сѣте́й лука́ваго діа́вола и спаси́ ду́ши на́ша, я́ко Человѣколю́бецъ.

Два́жды, и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь пра́здника, два́жды. Посе́мъ Сла́ва, свята́го. И ны́нѣ, пра́здника.

По 1-мъ стихосло́віи сѣда́ленъ, гла́съ 3:

Утѣ́шителіе дру́зи, вмѣ́сто е́же облегчи́ти неви́нная страда́нія пра́веднаго, мно́жайшія досажде́нія и му́ки приноша́ху ему́ непра́ведными глаго́лы, тѣ́мже и мно́жайшіи вѣнцы́ угото́вашася тому́ отъ Го́спода, заступа́ющаго пра́выя се́рдцемъ.

Сла́ва, и ны́нѣ, пра́здника.

По 2-мъ стихосло́віи сѣда́ленъ, гла́съ то́йже:

Сугу́ба воздая́нія прія́тъ Іовъ на земли́, испо́лньшуся вре́мени искуше́нія его́, и мно́жайшія по́чести обрѣ́те на небеси́ за вѣ́ру и терпѣ́ніе, науча́я всѣ́хъ не отчаява́тися во искуше́ніихъ, но упова́ти на Бо́га, спаса́ющаго пра́выя се́рдцемъ.

Сла́ва, и ны́нѣ, пра́здника.

По поліеле́и велича́ніе:

Велича́емъ тя́, святы́й пра́ведный Іове, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный:

Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сла́ва и бога́тство въ дому́ его́. И пра́вда его́ пребыва́етъ въ вѣ́къ вѣ́ка. Въ па́мять вѣ́чную бу́детъ пра́ведникъ. Пра́ведникъ, я́ко фи́никсъ, процвѣте́тъ, я́ко ке́дръ, и́же на Лива́нѣ, умно́жится. Возвесели́тся пра́ведникъ о Го́сподѣ, и упова́етъ на Него́. Се устна́мъ мои́мъ не возбраню́, Го́споди. Ты́ разумѣ́лъ еси́ пра́вду мою́, и и́стину мою́. И язы́къ мо́й поучи́тся пра́вдѣ Твое́й, ве́сь де́нь хвалѣ́ Твое́й. Свѣ́тъ возсія́ пра́веднику, и пра́вымъ се́рдцемъ весе́ліе. Ро́дъ пра́выхъ благослови́тся. Сла́вою и че́стію вѣнча́лъ еси́ его́. Яко Ты́ благослови́ши пра́ведника, Го́споди.

По велича́ніи сѣда́ленъ, гла́съ 1:

Бога́тство добродѣ́телей Іовлихъ ви́дѣвъ, укра́сти то́е ухищря́шеся злоко́зненный, оба́че, подкопа́въ хра́мину тѣле́сную, отню́дъ не возмо́же плѣни́ти сокро́вища духо́внаго, обрѣ́те бо ду́шу пра́ведника до́брѣ укрѣпле́ну и вооруже́ну, тѣ́мже и отъи́де, посра́мленъ. Но того́ ловле́нія изба́ви, Бо́же, ду́ши на́ша.

Сла́ва, и ны́нѣ, пра́здника.

Степе́нна, 1-й антифо́нъ 4-го гла́са. Проки́менъ, гла́съ 4: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ. Вся́кое дыха́ніе...

Ева́нгеліе отъ Матѳе́я, зача́ло 43:

Рече́ Госпо́дь Свои́мъ ученико́мъ: вся́ Мнѣ́ предана́ су́ть Отце́мъ Мои́мъ, и никто́же зна́етъ Сы́на, то́кмо Оте́цъ, ни Отца́ кто́ зна́етъ, то́кмо Сы́нъ, и ему́же а́ще во́литъ Сы́нъ откры́ти. Пріиди́те ко Мнѣ́ вси́ тружда́ющіеся и обременне́нніи, и Азъ успоко́ю вы́. Возми́те и́го Мое́ на себе́ и научи́теся отъ Мене́, я́ко кро́токъ е́смь и смире́нъ се́рдцемъ, и обря́щете поко́й душа́мъ ва́шимъ. Ибо бо Мое́ бла́го и бре́мя Мое́ легко́ е́сть.

По 50-мъ псалмѣ́ стихи́ра, гла́съ 6:

Да́лъ еси́ на́мъ о́бразъ терпѣ́нія и му́жества, Преблагíй Го́споди, уго́дника Твоего́ Іова, во всѣ́хъ приклю́чшихся ему́ злострада́ніихъ ничи́мже согрѣши́вша предъ Тобо́ю, ниже́ устна́ма свои́ма, и не да́вша безу́мія Тебѣ́, Бо́гу на́шему. Того́ моли́твами и на́съ сотвори́ побѣди́тели многоразли́чныхъ искуше́ній и спаси́ ду́ши на́ша, я́ко Человѣколю́бецъ.

Кано́нъ пра́здника со ирмосо́мъ на 6 и свята́го на 6.

Кано́нъ свята́го, гла́съ 4.
Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Крѣ́пкаго адама́нта терпѣ́нія, вѣнце́мъ укра́шена, Христо́ва Це́рковь, зря́щи духо́вными очесы́, торжеству́етъ ра́достно, пою́щи: пои́мъ Бо́гу на́шему, я́ко просла́вися.

Па́мять пра́веднаго съ похвала́ми, тебѣ́ же, Іове, довлѣ́етъ свидѣ́тельство Го́спода Бо́га: Са́мъ бо нарече́ тя богочести́ва, и́стинна, непоро́чна, и въ тебѣ́ сла́вно просла́вися.

Возмнѣ́въ бога́тствомъ огражда́ема, губи́тель испроша́етъ бори́тельно низве́ргнути пра́веднаго, и крѣ́пко бра́вся съ ни́мъ, на́гу ему́ су́щу, са́мъ низложи́ся, съ терпѣ́ніемъ бо вопія́ше пра́ведный: пои́мъ Бо́гу на́шему, я́ко просла́вися.

Богоро́диченъ: Ли́цы проро́ковъ воспѣва́ютъ Тя́, Чи́стая, и безпло́тныхъ мно́жества прославля́ютъ: Зижди́теля бо всѣ́хъ изъ утро́бы Твоея́ несказа́нно родила́ еси́ и я́ко Богома́терь превы́шши небе́съ яви́лася еси́.

Катава́сія пра́здника.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Пребыва́еши непоколеби́мь ду́хомъ, любе́знѣйшихъ ча́дъ и имѣ́ній лиша́емь, Іове, взыва́я: благослове́но и́мя Бо́га моего́.

Вещество́ добродѣ́тели сотвори́лъ еси́ себѣ́ бога́тство же и нищету́: искуше́ньми бо отъ обою́ разжига́емь, я́ко зла́то седмери́цею, яви́лся еси́ чистѣ́йшій.

Глаго́ломъ жены́ наступи́ на тя́, я́коже на прароди́теля нѣ́когда, началозло́бный змíй, но посрами́ся въ кова́рствѣ се́мъ, и́же безмѣ́рно хваля́йся.

Богоро́диченъ: Ра́дуйся, Ма́ти Неискусобра́чная, Яже Бо́га Сло́ва во чре́вѣ Твое́мъ вмѣсти́вшая и ро́ждшая воплоще́нна Вседержи́теля и Спа́са всѣ́хъ.

Конда́къ, гла́съ 8:

Яко и́стиненъ и непоро́ченъ, пра́веденъ и богочести́въ яви́выйся, сла́вне Іове, просвѣти́лъ еси́ мíръ до́брымъ житіе́мъ твои́мъ и о́бразъ злострада́нія и терпѣ́нія всѣ́мъ бы́лъ еси́. Тѣ́мже чти́мъ па́мять твою́ и воспѣва́емъ страда́нія твоя́, вѣрнѣ́йшій служи́телю Бо́жій.

Сла́ва, и ны́нѣ, сѣда́ленъ пра́здника.

Пѣ́снь 4.

Ирмо́съ: Услы́шахъ сла́вное смотре́ніе Твое́, Христе́ Бо́же, я́ко роди́лся еси́ отъ Дѣ́вы, да отъ ле́сти изба́виши зову́щія: сла́ва си́лѣ Твое́й, Го́споди.

Досто́йнѣйшій о́бразъ и одушевле́нный сто́лпъ добродѣ́телей показа́ся на́мъ Іовъ непоро́чный, прему́дрый. Тому́ ревни́тели ны́ содѣ́лай, вопію́щія: сла́ва си́лѣ Твое́й, Го́споди.

Указу́етъ тебѣ́, подви́жниче, по́двигъ боре́нія Соверши́тель благи́хъ, изъ-подъ спу́да открыва́я всѣ́мъ свѣ́тъ добродѣ́телей твои́хъ.

Во гно́и воспи́тываетъ тебѣ́, всеблаже́нне Іове, си́лу и крѣ́пость непоро́чныя души́ Подвигополо́жникъ, Вра́чь сы́й на́шего во Ада́мѣ преступле́нія.

Богоро́диченъ: Неискусобра́чная Невѣ́сто, Яже Бо́га Спа́са ро́ждшая пло́тію, Тя́ воспѣва́емъ и немо́лчно Тебѣ́ зове́мъ: ра́дуйся, Предста́тельнице ра́бъ Твои́хъ.

Пѣ́снь 5.

Ирмо́съ: Возсія́вый свѣ́тъ, и просвѣти́вый у́тро, и показа́вый де́нь, сла́ва Тебѣ́, сла́ва Тебѣ́, Іису́се, Сы́не Бо́жій.

Утѣ́шителіе твои́, прилага́юще ско́рби къ ра́намъ и му́камъ твои́мъ, мно́жайшія вѣнцы́ сплето́ша тебѣ́, Іове сла́вне.

Юношески неустраши́мь яви́лся еси́ въ бѣда́хъ лю́тыхъ, въ бога́тствѣ же и сла́вѣ къ безчи́нному превозноше́нію не склони́лся еси́, Іове сла́вне.

Необори́мую тверды́ню души́ твоея́ устро́ивъ, му́жественнѣ терпѣ́лъ еси́, сла́вне, лю́тую вра́жію бу́рю.

Богоро́диченъ: Ангельское привѣ́тствіе немо́лчно прино́ситъ Тебѣ́, Дѣ́во, вся́ тва́рь: ра́дуйся, Пречи́стая Ма́ти Іису́са, Сы́на Бо́жія.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Въ бе́зднѣ злострада́ній бы́въ, па́ки на высоту́ сла́вы возведе́нъ бы́лъ еси́, Іове, во о́бразъ Христо́выхъ страсте́й и сла́вы, я́же по си́хъ.

Изцѣля́я болѣ́знь скорбя́щаго се́рдца, излива́лъ еси́ отъ о́чію твое́ю сле́зы сострада́нія, предста́телю вдо́въ и сиро́тъ, Іове сла́вне.

Житіе́ твое́ благоче́стно и боголюбе́зно бы́сть, Іове, сего́ ра́ди и сме́рть яви́ся тебѣ́ упокое́ніе и къ непрестаю́щему весе́лію преселе́ніе.

Богоро́диченъ: Моли́ Вопло́щшагося отъ Тебѣ́ о рабѣ́хъ Твои́хъ, Пренепоро́чная Богоро́дице, мо́лимся Ти́, я́ко Тя́ еди́ну Предста́тельницу на́шу зна́емъ.

Конда́къ и и́косъ пра́здника.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Зако́нныхъ за́повѣдій не вѣ́дый, но зако́на и проро́ковъ нося́ въ себѣ́ исполне́ніе, любо́вь я́же къ Бо́гу, то́ю благоугоди́лъ еси́ Ему́, Іове, воспѣва́я: препѣ́тый Го́споди, Бо́же оте́цъ на́шихъ, благослове́нъ еси́.

Не на земли́, но на небеси́ сокро́вищствовавъ себѣ́ упова́ніе, зла́то въ пра́хъ вмѣни́лъ еси́, взыва́я ра́достно: препѣ́тый Го́споди, Бо́же оте́цъ на́шихъ, благослове́нъ еси́.

Язвою тя́ лю́тою порази́въ и имѣ́ній лиши́въ, пра́ведныхъ вра́гъ не сокруши́ крѣ́пости души́ твоея́, не преста́лъ бо еси́ пѣ́ти: препѣ́тый Го́споди, Бо́же оте́цъ на́шихъ, благослове́нъ еси́.

Богоро́диченъ: Безбра́чно и па́че естества́ пріи́мшую во чре́вѣ Твое́мъ Бо́га, по милосе́рдію пріобщи́вшагося человѣ́комъ, воспѣва́емъ Тя́, я́ко Ма́терь Всевы́шняго, во вѣ́ки.

Пѣ́снь 8.

Ирмо́съ: Во о́бразѣ а́нгела, я́вльшагося въ пещи́ о́гненнѣй пѣсносло́вцемъ, Христа́ Бо́га по́йте, о́троцы, свяще́нницы, благослови́те, лю́діе, превозноси́те во вся́ вѣ́ки.

Торжеству́етъ ве́сь собо́ръ пра́зднующихъ на небеси́, съ чу́днымъ Іовомъ воспѣва́я: свяще́нницы, благослови́те, лю́діе, превозноси́те Го́спода во вся́ вѣ́ки.

Сугу́бы вѣнцы́ дарова́ тебѣ́ Подвигополо́жникъ, богому́дре Іове, на земли́ и на небеси́. Тѣ́мже зове́ши: свяще́нницы, благослови́те, лю́діе, превозноси́те Го́спода во вся́ вѣ́ки.

Изцѣле́нія ду́шъ же и тѣле́съ источа́ютъ, блаже́нне, стру́пи пло́ти твоея́, пою́щимъ: свяще́нницы, благослови́те, лю́діе, превозноси́те Го́спода во вся́ вѣ́ки.

Богоро́диченъ: Неизрѣче́нно и безсѣ́менно заче́ншую и ро́ждшую вселе́ннѣй Христа́ Бо́га по́йте, о́троцы, свяще́нницы, благослови́те, лю́діе, превозноси́те во вся́ вѣ́ки.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Іовъ у́бо сла́вою терпѣ́нія досто́йно увѣнча́ся, ты́ же, сатано́, сѣ́туеши и печа́луешися, не терпя́ вѣнца́ пра́веднича: тще́тно бо надѣ́явся, посрами́лся еси́, пра́ведныхъ вра́же.

Ели́ко возмо́жно е́сть человѣ́ку ви́дѣти, узрѣ́въ Іовъ сла́ву Твою́ незри́мую, стра́хомъ объя́тъ и благоговѣ́ніемъ, возопи́ съ ве́ліимъ тре́петомъ: пе́пелъ е́смь и земля́, Ты́ же — Госпо́дь, Его́же вси́ велича́ютъ.

Кни́га жи́зни досто́йно прія́тъ тя́, и жи́тницы небе́сныя воспрія́ша, я́ко пшени́цу зрѣ́лу, Іове, испо́лнена днíй духо́вныхъ, блаже́нный ра́бе Госпо́день.

Богоро́диченъ: Прему́дрости Ѵпоста́сныя вмѣсти́лище па́че ума́ яви́лася еси́, непоро́чная Отрокови́це, одушевле́нный же Престо́лъ и Две́рь. Тѣ́мже Тя́ вси́, я́ко Богома́терь, велича́емъ.

Свѣти́ленъ:

Іова непоро́чнаго и чистѣ́йшаго, столпа́ благоче́стія твердѣ́йшаго, хитростьми́ врага́ непобѣжде́на пребы́вшаго, ублажи́мъ вси́ и вѣ́рно восхва́лимъ, я́ко вели́каго уго́дника Бо́жія, прилѣ́жно моля́щася спасти́ся отъ бѣ́дъ душа́мъ на́шимъ.

Сла́ва, и ны́нѣ, пра́здника.

На хвали́техъ стихи́ры пра́здника 3 [пи́саны на стихо́внѣ] и свята́го 3, гла́съ 4:

Недоумѣ́емъ по достоя́нію восхвали́ти тя́, Іове: Са́мъ бо Госпо́дь Вседержи́тель, Иже сердца́ и утро́бы испыту́яй и та́йная человѣ́ковъ я́сно вѣ́дый, я́ко пра́ведна и и́стинна, непоро́чна же и богочести́ва па́че всѣ́хъ, тогда́ бы́вшихъ на земли́, похвали́ тя. Но Того́ престо́лу предстоя́ ны́нѣ на небеси́, не забу́ди, всехва́льне, соверша́ющихъ съ любо́вію святу́ю па́мять твою́.

Ни отъя́тіе имѣ́ній, ни лише́ніе любе́зныхъ ча́дъ, ни я́звы и стру́пи лютѣ́йшіи, ниже́ увѣща́нія супру́жницы возмого́ша осла́бити крѣ́пкую вѣ́ру и наде́жду твою́ на Бо́га Блага́го и Пра́веднаго, но, я́ко адама́нтъ нѣ́кій, посредѣ́ си́хъ всѣ́хъ непоколеби́мь пребы́лъ еси́. Сицеву́ю тве́рдость во искуше́ніихъ и на́мъ испроси́, многострада́льче, съ любо́вію соверша́ющимъ святу́ю па́мять твою́.

Бо́га ви́дѣлъ еси́, Іове, въ ви́хри бу́рнѣмъ я́вльшася тебѣ́, и съ Ни́мъ бесѣ́довалъ еси́, и Того́ безпредѣ́льное могу́щество, свою́ же не́мощь и невѣ́дѣніе исповѣ́далъ еси́. Того́ ны́нѣ лице́мъ къ лицу́ въ вы́шнихъ селе́ніихъ созерца́я, помина́й и на́съ, блаже́нне, съ любо́вію соверша́ющихъ святу́ю па́мять твою́.

Сла́ва, и ны́нѣ, пра́здника.
Славосло́віе вели́кое, и про́чее, я́коже обы́чно, и отпу́стъ.



НА ЛИТУРГІИ,

Блаже́нна пра́здника, пѣ́снь рядова́я и свята́го 6-я. Проки́менъ пра́здника и свята́го, гла́съ 7: Возвесели́тся пра́ведникъ о Го́сподѣ и упова́етъ на Него́. Апо́столъ дне́ и свята́го, отъ Собо́рнаго посла́нія Іа́ковля, зача́ло 57. Ева́нгеліе дне́ и свята́го, Матѳе́я, зача́ло 10. Прича́стенъ пра́здника и свята́го: Въ па́мять вѣ́чную бу́детъ пра́ведникъ, отъ слу́ха зла́ не убои́тся.


Ука́зъ о пра́здницѣ свята́го.

Аще случи́тся па́мять пра́веднаго Іова въ недѣ́лю мѵроно́сицъ, или́ разсла́бленнаго, или́ въ сре́ду Преполове́нія, или́ въ недѣ́лю самаряны́ни, или́ слѣпа́го, или́ во отда́ніе Па́схи, или́ въ четверто́къ Вознесе́нія, или́ въ недѣ́лю 7-ю по Па́сцѣ, соверша́ется все́ послѣ́дованіе слу́жбы по уста́ву о пра́здницѣ свята́го апо́стола и евангели́ста Іоа́нна Богосло́ва.

Источникъ: Слу́жба свято́му и пра́ведному Іову Многострада́льному. Мѣ́сяца Ма́ія въ 6-й де́нь.. — Изда́ніе пе́рвое. — СПб.: Сѵнода́льная Тѵпогра́фія, 1893. — 32 с.

/ Къ оглавленію раздѣла /


Наверхъ / Къ титульной страницѣ

0