Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 6-й де́нь.
Слу́жба преподо́бному отцу́ на́шему Михе́ю Ра́донежскому, ученику́ преподо́бнаго Се́ргія.

НА МАЛѢЙ ВЕЧЕРНИ,
[На Го́споди воззва́хъ:] стихи́ры [на 4], гла́съ 4:

Бо́жіею си́лою укрѣпля́емь,* мы́сль свою́ горѣ́ возвыша́я,* надъ страстьми́ воцари́лся еси́* и ны́нѣ Вѣ́чному Царю́ предстои́ши,* о всѣ́хъ при́сно моля́ся,* творя́щихъ па́мять твою́.

Житіе́ твое́ яви́ся благоче́стно,* добродѣ́тельми укра́шено, простото́ю и смире́ніемъ,* я́ко вѣнце́мъ, вѣнча́емо,* и ны́нѣ лику́еши на небесѣ́хъ со а́нгелы,* моли́ Христа́ Бо́га о воспѣва́ющихъ тя́.

Сла́ва, гла́съ 6:

Сла́ва твоя́ пребыва́етъ во вѣ́къ,* я́ко во пло́ти еще́ су́щи,* ви́дѣти сподо́бился еси́ Пресвяту́ю Богоро́дицу* и послужи́ти усе́рднѣ преподо́бному Се́ргію,* и ны́нѣ на небесѣ́хъ водворя́яся,* моли́ся о на́съ ко Го́споду.

И ны́нѣ, [богоро́диченъ]:

Бо́га, изъ Тебе́ воплоти́вшагося, разумѣ́хомъ,* Богоро́дице Дѣ́во,* Того́ моли́ о спасе́ніи ду́шъ на́шихъ.

На стихо́внѣ стихи́ры, гла́съ 6:

Влады́чне смире́ніе воспріи́мъ,* во́ду возлива́я на ру́цѣ вождя́ твоего́* и послуша́ніе творя́, стра́сти огорчава́я:* и ны́нѣ на небесѣ́хъ ца́рствуеши съ ни́мъ во вѣ́ки.

Сти́хъ: Честна́ предъ Го́сподемъ* сме́рть преподо́бныхъ Его́.

Сле́зными пото́ки, преподо́бне,* зе́млю се́рдца твоего́ напои́лъ еси́,* предстоя́ на моли́твѣ непоколе́блемо,* и всѣ́хъ Творцу́ взыва́лъ еси́:* Го́споди, поми́луй мя́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Страда́ніи по́двиговъ твои́хъ, преблаже́нне,* боже́ственный кла́съ возрасти́лъ еси́* и пита́еши благоче́стно восхваля́ющихъ тя́,* о́тче на́шъ Михе́е преподо́бне.

Сла́ва, гла́съ 8:

Мона́ховъ мно́жества,* пріиди́те, восхва́лимъ ученика́ Се́ргіева,* преподо́бнаго отца́ на́шего Михе́я,* его́же па́мять ны́нѣ соверша́емъ:* се́й бо посѣще́нія боже́ственнаго сподо́бися* и слы́ша пресла́дкій гла́съ Небе́сныя Влады́чицы,* я́коже прему́дрый Епифа́ній повѣству́етъ;* похва́лимъ и ве́сь ли́къ учени́ческій,* и́же на небесѣ́хъ съ ли́ки святы́хъ водворя́ются* и мо́лятся о душа́хъ на́шихъ.

И ны́нѣ, [богоро́диченъ]:

Влады́чице, пріими́ моли́твы рабо́въ Твои́хъ* и изба́ви на́съ* отъ вся́кія ну́жды и печа́ли.

Тропа́рь, гла́съ 4:

Иго Госпо́дне на ра́мо взе́мъ,* послѣ́довалъ еси́ Христо́ви со учи́телемъ свои́мъ преподо́бнымъ Се́ргіемъ,* съ ни́мже и сподо́бился еси́ ви́дѣти Пресвяту́ю Богоро́дицу.* И слы́шалъ еси́ пресла́дкій гла́съ Ея́,* я́ко обѣща́ся неотсту́пна бы́ти мѣ́ста сего́,* но, о преподо́бне Михе́е,* моли́ся о чту́щихъ святу́ю па́мять твою́.

Сла́ва, и ны́нѣ, богоро́диченъ воскре́сенъ.
Ектенія́ и отпу́стъ.



НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры преподо́бному на 8, гла́съ 4:

Отъ ю́ности возлюби́лъ еси́ Христа́, блаже́нне,* плотска́я мудрова́нія ду́ху повину́лъ еси́,* за́повѣди Госпо́дни усе́рдно исполня́я,* въ пусты́ню Се́ргіеву прише́дъ,* люби́телю смире́нія прилѣпи́вся,* подо́бный бо подо́бнаго познава́етъ* и смире́ніе смире́ннаго возно́ситъ,* я́коже и ви́димъ въ тебѣ́, о́тче на́шъ Михе́е,* и ны́нѣ предстоя́ престо́лу Святы́я Тро́ицы,* моли́ о соверша́ющихъ па́мять твою́.

Стихи́ры хра́ма, гла́съ 5:

Въ по́стъ Рождества́ Христо́ва,* но́щи суббо́тнѣй преполовля́ющейся,* ти́хія стопы́ Цари́цы Небе́сныя* услы́шавъ, преподо́бный Се́ргій* вели́кія ра́дости испо́лнися* и потща́ся изы́ти въ срѣ́теніе.* Ты́ же, о́тче на́шъ Михе́е,* послѣ́довалъ еси́ учи́телю твоему́.* небе́снаго на земли́ съ ни́мъ явле́нія* и спребыва́нія на небеси́ сподобля́яся,* Христа́ умоли́те, преподо́бніи,* низпосла́ти на́мъ ве́лію ми́лость.

Свѣ́тъ возсія́ небе́сный въ хра́минѣ твое́й,* преподо́бне о́тче Се́ргіе,* и послы́шася гла́съ невѣ́домый:* се́, Пречи́стая гряде́тъ!* и по ма́лѣ зри́ши Влады́чицу мíра со двѣма́ апо́столома,* и, припа́дъ къ нога́ма Ея́,* моля́ся о заступле́ніи мѣ́ста сего́* и о всѣ́хъ во Христѣ́ ча́дѣхъ твои́хъ,* сего́ ра́ди и мы́, ча́да твоя́, мо́лимся:* моля́ся не преста́й,* получи́ти на́мъ у Христа́ ве́лію ми́лость.

Пе́тръ, верхо́вный апо́столъ,* и дѣ́вства храни́тель Іоа́ннъ Богосло́въ,* учени́къ Христо́въ, дру́гъ и напе́рсникъ,* послѣ́доваху Пречи́стѣй Дѣ́вѣ Марíи,* посѣща́юще отца́ на́шего Се́ргія,* вку́пѣ же и смире́ннаго Михе́я,* сподобля́юще ра́дости небе́сныя* и мѣ́сто сіе́ свѣ́та исполня́юще,* благи́ми обѣтова́ніи утѣша́юще* и моли́тву пріе́млюще о спасе́ніи ду́шъ на́шихъ.

Пѣ́ніе хва́льное ака́ѳистово* уго́дно е́сть Влады́чицѣ мíра,* вы́ бо, отцы́ блаже́нніи,* соверша́юще сіе́ бо́дренно,* посѣще́нія отъ Нея́ сподо́бистеся,* ди́внаго зрѣ́нія, бесѣ́ды и чу́днаго видѣ́нія* и предвкуше́нія Ца́рствія Небе́снаго,* его́же получи́ти Христа́ умоли́те* и на́мъ, ублажа́ющимъ по́двиги ва́ша.

Гла́съ 8:

Егда́ въ нощи́ соверша́лъ еси́ бдѣ́ніе,* преподо́бне о́тче Се́ргіе,* предъ о́бразомъ Чи́стыя Богома́тери,* взира́я ча́сто, къ Не́й глаго́лалъ еси́:* О, Пречи́стая Ма́ти Христа́ моего́!* Крѣ́пкая Помо́щнице ро́ду человѣ́ческому,* бу́ди на́мъ, недосто́йнымъ, Хода́таица,* при́сно моля́щися къ Сы́ну Твоему́ и Бо́гу на́шему,* да при́зритъ на мѣ́сто сіе́ ми́лостиво,* Еди́ному въ Тро́ицѣ Бо́гу возлага́емое,* и спасе́тъ ду́ши здѣ́ иму́щихъ жи́тельствовати* Ца́рствія ра́ди небе́снаго.

О, пресла́внаго чудесе́!* О, неизрече́ннаго снисхожде́нія!* Рука́ми бо Пречи́стая косну́ся Се́ргія, вѣща́ющи:* Не ужаса́йся, избра́нниче Мо́й,* пріидо́хъ бо посѣти́ти тебе́:* моли́тва бо твоя́ о ученицѣ́хъ услы́шана е́сть,* и да не скорби́ши про́чее,* неотсту́пна бу́ду при́сно мѣ́ста сего́* и по твое́мъ е́же ко Го́споду отхожде́ніи,* потре́бная изоби́льно подава́ющи,* сохраня́ющи оби́тель твою́ и покрыва́ющи.* И си́ми благи́ми обѣтова́ніи утѣ́шивши, неви́дима бы́сть.

Отче преподо́бне Михе́е,* ужасе́ся ду́хъ тво́й въ ди́вномъ посѣще́ніи,* и по отше́ствіи въ го́рняя Цари́цы со апо́столы* ко учи́телю твоему́ взыва́лъ еси́:* извѣсти́ ми́, о́тче, Го́спода ра́ди,* что́ сіе́ бы́сть чу́дное видѣ́ніе?* поне́же ду́хъ мо́й вма́лѣ не разлучи́ся отъ мене́,* блиста́нія ра́ди, его́же не мого́хъ зрѣ́ти,* покры́хъ оде́ждою лице́ мое́.* Онъ же отвѣща́ тебѣ́:* ма́ло потерпи́, ча́до мое́,* и́бо и во мнѣ́ ду́хъ мо́й трепе́щетъ,* призови́ ско́ро Исаа́ка и Си́мона,* съ ни́ми же просла́вимъ Ма́терь всѣ́хъ Бо́га,* подаю́щую на́мъ ве́лію ми́лость.

Сла́ва, гла́съ 6:

Хра́мъ, и́же сокрыва́етъ святы́я мо́щи твоя́,* ма́лъ е́сть и показу́етъ смире́ніе,* е́же имѣ́лъ еси́ въ животѣ́ твое́мъ,* о́тче на́шъ Михе́е,* отъ слове́съ бо ева́нгельскихъ научи́лся еси́* кро́тости, смире́нію, послуша́нію,* подража́я Христу́ Бо́гу на́шему,* сего́ ра́ди и возлю́бленъ учени́къ* Се́ргія вели́каго бы́лъ еси́,* сподобля́яся небе́снаго видѣ́нія,* сожи́тельства и отъ ру́къ его́ погребе́нія,* и напу́тія въ го́рнія оби́тели,* съ ни́мъ же и ны́нѣ предстоя́ престо́лу всѣ́хъ Царя́,* моли́ся о соверша́ющихъ па́мять твою́ вѣ́рно.

И ны́нѣ, [богоро́диченъ]:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́. Чте́нія три́.

Проро́чества Иса́іина чте́ніе. [Глава́ 35.]

Ра́дуйся пусты́ня жа́ждущая, да весели́тся пусты́ня и да цвѣте́тъ я́ко кри́нъ. И процвѣте́тъ, и возвесели́тся пусты́ня Іорда́нова, и сла́ва Лива́нова даде́ся е́й, и че́сть Карми́лова, и у́зрятъ лю́діе Мои́ сла́ву Госпо́дню и высоту́ Бо́жію. Укрѣпи́теся ру́цѣ осла́бленныя и колѣ́на разсла́бленныя; утѣ́шитеся малоду́шніи умо́мъ, укрѣпи́теся, не бо́йтеся. Се́ Бо́гъ на́шъ су́дъ воздае́тъ и возда́стъ, То́й пріи́детъ и спасе́тъ на́съ. Тогда́ отве́рзутся о́чи слѣпы́хъ и у́ши глухи́хъ услы́шатъ. Тогда́ ско́читъ хромы́й, я́ко еле́нь, и я́сенъ бу́детъ язы́къ гугни́выхъ; я́ко прото́ржеся вода́ въ пусты́ни и де́брь въ земли́ жа́ждущей. И безво́дная бу́детъ во езе́ра и на жа́ждущей земли́ исто́чникъ водны́й бу́детъ: та́мо бу́детъ весе́ліе пти́цамъ, и сели́тва тро́сти и лу́зи. И та́мо бу́детъ пу́ть чи́стъ и пу́ть свя́тъ нарече́тся; и не пре́йдетъ та́мо нечи́стый, ниже́ бу́детъ та́мо пу́ть нечи́стъ, разсѣ́янніи же по́йдутъ по нему́ и не заблу́дятъ. И не бу́детъ та́мо льва́, ни отъ звѣре́й злы́хъ не взы́детъ на́нь, ниже́ обря́щется та́мо, но по́йдутъ по нему́ изба́вленніи. И со́браніи Го́сподемъ обратя́тся, и пріи́дутъ въ Сіо́нъ съ ра́достію, и ра́дость вѣ́чная надъ главо́ю и́хъ. Надъ главо́ю бо и́хъ хвала́ и весе́ліе, и ра́дость пріи́метъ я́; отбѣже́ болѣ́знь, печа́ль и воздыха́ніе.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма, гла́съ 5:

Въ по́стъ Рождества́ Христо́ва,* [но́щи суббо́тнѣй преполовля́ющейся,* ти́хія стопы́ Цари́цы Небе́сныя* услы́шавъ, преподо́бный Се́ргій* вели́кія ра́дости испо́лнися* и потща́ся изы́ти въ срѣ́теніе.* Ты́ же, о́тче на́шъ Михе́е,* послѣ́довалъ еси́ учи́телю твоему́.* небе́снаго на земли́ съ ни́мъ явле́нія* и спребыва́нія на небеси́ сподобля́яся,* Христа́ умоли́те, преподо́бніи,* низпосла́ти на́мъ ве́лію ми́лость].

Сла́ва, преподо́бному, гла́съ 1:

Влады́цѣ Христу́ стопа́мъ послѣ́дуя,* чистоты́ жили́ще показа́лся еси́,* свѣ́томъ озари́вся Ду́ха Свята́го,* небе́снаго видѣ́нія прича́стникъ бы́лъ еси́,* тѣ́мже и наслѣ́дника тя́ Христо́съ показа́,* Ца́рствія Своего́ небе́снаго,* его́же получи́ти и на́мъ, о́тче Михе́е, моли́,* соверша́ющимъ па́мять твою́,* во спасе́ніе ду́шъ на́шихъ.

И ны́нѣ, богоро́диченъ:

Ра́дуйся, ра́досте пра́отцевъ,* и преподо́бныхъ оте́цъ весе́ліе,* и покро́въ на́съ, Дѣ́во, рабо́въ Твои́хъ.

На стихо́внѣ стихи́ры, гла́съ 5:

Пріиди́те, вси́ вѣ́рніи,* восхва́лимъ пе́рвыя ученики́ вели́каго Се́ргія:* Михе́я, ближа́йшаго сожи́теля,* Ни́кона, стопа́мъ отца́ послѣ́дующаго,* Васи́лія Суха́го и послушли́ваго Іа́кова,* Они́сима діа́кона и привра́тника,* Елиссе́я, въ добродѣ́тели состарѣ́вшагося,* Митрофа́на, са́номъ игу́мена почте́ннаго,* постри́гшаго преподо́бнаго Се́ргія,* и пе́рваго пресе́льника въ вѣ́чныя оби́тели.

Сти́хъ: Честна́ предъ Го́сподемъ* сме́рть преподо́бныхъ Его́.

Ра́дуйся, пусты́не Ра́донежская,* прорасти́вшая кри́ны духо́вныя* въ вертогра́дѣ преподо́бнаго Се́ргія:* Си́мона, архимандри́та Смоле́нскаго,* позна́вшаго свѣ́тлость послуша́нія* и ди́внаго пти́цъ видѣ́нія сподо́бившагося,* Исаа́кія, молчали́ваго и сле́зы точа́щаго,* о́гненное благослове́ніе отъ а́ввы прія́вшаго,* съ ни́мже и чу́днаго Мака́рія,* а́нгела во святи́лищѣ узрѣ́вшаго,* си́хъ воспомяну́вше, Бо́га прославля́емъ.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Ра́дуйся, сла́вная оби́тель Се́ргіева,* па́мять творя́щи учени́къ его́:* Иліи́ пречу́днаго и Іоанни́кія,* Си́мона екклисіа́рха,* ви́дѣвшаго о́гнь Боже́ственный,* окружа́ющь преподо́бнаго,* Игна́тія, по сме́рти Се́ргія узрѣ́вшаго,* Михе́я, Варѳоломе́я и Нау́ма,* явле́нныхъ врага́мъ осажда́ющимъ,* Алекса́ндра, въ схи́мѣ во́ина, ду́шу преда́вшаго за Ру́сь Правосла́вную,* Андре́я же сподви́жника его́,* Епифа́нія Прему́драго, написа́вшаго сія́,* и ве́сь ли́къ учени́ческій,* въ концѣ́хъ земли́ на́шея Бо́гу угоди́вшихъ.

Сла́ва, гла́съ 8:

Мона́ховъ мно́жества, наста́вники ны́нѣ чти́мъ отцы́ преподо́бніи, пожи́вшіи во оби́тели преподо́бнаго Се́ргія: блаже́ни вы́ есте́, Христу́ рабо́тавшіи и вра́жію низложи́вшіи си́лу, а́нгеловъ собесѣ́дницы, пра́ведныхъ сожи́теліе и святы́хъ, съ ни́миже моли́теся Го́сподеви, поми́ловатися душа́мъ на́шимъ.

И ны́нѣ, [богоро́диченъ]:

Хра́мъ воздви́женъ во оби́тели се́й въ сла́ву и па́мять посѣще́нія Богома́тери, Юже моли́те, отцы́ блаже́нніи, пода́ти на́мъ оставле́ніе грѣхо́въ, и душа́мъ на́шимъ ве́лію ми́лость.

[На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.]



НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ воскре́сенъ и́ли же пра́здника.

По 1-мъ стихосло́віи сѣда́ленъ, гла́съ 1:

Благоче́стно на земли́ житіе́ сконча́въ,* прія́телище Ду́ха ты́ яви́лся еси́,* просвѣща́я вѣ́рою къ тебѣ́ притека́ющія;* тѣ́мже моли́ся твоему́ Влады́цѣ* просвѣти́ти ду́ши на́ша,* восхваля́ющихъ тя́, Михе́е, о́тче на́шъ. [Два́жды.]

Сла́ва, и ны́нѣ, богоро́диченъ:

Ра́дуйся, Богоро́дице Дѣ́во,* ра́дуйся, похвало́ всея́ вселе́нныя,* ра́дуйся, Пречи́стая Ма́ти Бо́жія Благослове́нная.

По 2-мъ стихосло́віи сѣда́ленъ, гла́съ 5:

По́стника Госпо́дня пѣ́сньми почти́мъ,* прило́ги страсте́й умертви́вшаго* воздержа́ніемъ и крѣ́пкимъ терпѣ́ніемъ,* и посрами́вшаго горды́ню сопроти́внаго,* и ны́нѣ моля́щагося Го́сподеви* о спасе́ніи ду́шъ на́шихъ. [Два́жды.]

Сла́ва, и ны́нѣ, богоро́диченъ:

Тебѣ́ мо́лимся я́ко Бо́жіей Ма́тери:* Благослове́нная, моли́ о спасе́ніи ду́шъ на́шихъ.

По поліеле́и сѣда́ленъ, гла́съ 1:

Страсте́й воста́ніе погре́блъ еси́* умерщвле́ніемъ пло́ти, о́тче Михе́е,* жи́знь безконе́чную по сме́рти прія́лъ еси́;* тѣ́мже дне́сь Христо́ва Це́рковь* пра́зднуетъ твою́ досточу́дную па́мять,* преподо́бныхъ украше́ніе. [Два́жды.]

Сла́ва, и ны́нѣ, богоро́диченъ:

Въ жена́хъ Свята́я Богоро́дице,* Ма́ти Безневѣ́стная,* моли́, Его́же родила́, Царя́ и Бо́га,* да спасе́тъ на́съ, я́ко Человѣколю́бецъ.

Посе́мъ 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе отъ Матѳе́я, зача́ло 43.

По Ева́нгеліи стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ непоро́чно поревнова́лъ еси́, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ пра́здника со ирмосо́мъ на 6, ирмосы́ по два́жды. И преподо́бному на 6, его́же краегране́сіе: Преподо́бному Михе́ю пою́ хвалу́ отъ се́рдца. Гла́съ 2:

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Похва́льное тебѣ́ привнести́ пѣ́ніе, богоно́се Михе́е, тща́щуся, пода́ждь ми́ благода́ть моли́твами твои́ми, я́ко да по́двиги твоя́ честны́я проповѣ́мъ.

Ра́достно яре́мъ Госпо́день отъ ю́ности, богому́дре, воспріи́мъ, вда́лся еси́ учи́телю твоему́, преподо́бному Се́ргію, и сему́ неотлу́чно сожи́тельствовалъ еси́, сла́вя Бо́га.

Еже па́че всего́ бы́ти въ послуша́ніи позна́лъ еси́, о́тче, мно́жайшими по́ты воспріи́мъ вы́шнее Ца́рство, а́нгельски на земли́ пожи́въ, и ны́нѣ предстоя́ Святѣ́й Тро́ицѣ, на́съ помина́й.

Богоро́диченъ: Пріиди́те, лю́діе, ублажи́мъ Ма́терь Бо́жію, посѣти́вшую мѣ́сто свято́е сіе́ и обѣща́вшуюся неотсту́пна бы́ти, Ея́же словеса́ и Михе́й слы́шати сподо́бися.

Катава́сія по уста́ву.

Пѣ́снь 3.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

О, твоего́ му́жества! О, ду́шевныя до́блести, сла́вне! Ты́ бо, неви́димыя враги́ сокруши́ти жела́я, своея́ во́ли отре́клся еси́, дѣ́ломъ на вся́кое повелѣ́ніе отвѣщава́я.

Досто́йно по́двиги твоя́ похвали́ти кто́ возмо́жетъ? Ты́ бо въ пусты́ни, на Ма́ковицѣ жи́тельствуя, гла́дъ и жа́жду со учи́телемъ твои́мъ претерпѣва́лъ еси́.

Огню́ я́вльшуся во святи́лищи, и окружа́ющу преподо́бнаго Се́ргія, и неопаля́ющу, я́коже дре́вле купина́, ю́же Моисе́й ви́дѣвъ та́инственно, слы́шавъ ты́ о чудеси́ се́мъ, вѣ́рою утверди́лся еси́.

Богоро́диченъ: Богоро́дице, всѣ́хъ Цари́це, умоли́ надъ всѣ́ми ца́рствующаго Сы́на Твоего́ Христа́ Бо́га на́шего, да изба́витъ оби́тель сію́ отъ бѣ́дъ и напа́стей, я́коже предрекла́ еси́.

Сѣда́ленъ, гла́съ 4:

Блаже́нъ ты́, о́тче Михе́е,* вои́стину и треблаже́нъ бы́лъ еси́,* прилѣпля́яся бо къ смиренному́дру ста́рцу,* смире́ніемъ ду́шу твою́ напои́лъ еси́,* послуша́нія же до́блесть усво́ивъ та́ко,* я́ко и по сме́рти дѣ́ломъ сіе́ явля́еши,* ше́ствіе творя́ ско́ро къ Москвѣ́ на ко́нехъ,* я́коже ви́дѣнъ бы́лъ еси́* со инѣ́ми двѣма́, Варѳоломе́емъ и Нау́момъ,* призыва́я ра́тныя лю́ди на по́мощь осажде́ннымъ,* тѣ́мже, ублажа́юще, мо́лимъ тя́:* пріиди́ и ны́нѣ къ на́мъ на по́мощь,* осажде́ннымъ грѣхи́ мно́гими,* крѣ́пкою твое́ю моли́твою* низложи́ враги́, борю́щія ны́. [Два́жды.]

Сла́ва, и ны́нѣ, богоро́диченъ:

Стѣна́ непобѣди́мая на́мъ, христіа́номъ, еси́, Богоро́дице Дѣ́во:* къ Тебѣ́ бо прибѣга́юще, невреди́ми пребыва́емъ.* И па́ки согрѣша́юще, и́мамы Тя́ моли́твенницу.* Тѣ́мъ, благодаря́ще, вопіе́мъ Ти́:* ра́дуйся, Благода́тная, Госпо́дь съ Тобо́ю.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Ни лю́тость враго́въ духо́вныхъ, ни ску́дость пусты́ни разсла́биша терпѣ́нія твоего́, преподо́бне, но я́ко адама́нтъ тве́рдъ, пребы́лъ еси́, ре́вностію Боже́ственною распаля́емь.

Осо́бь бесѣ́дуя Бо́гу и Сему́ приближа́яся душе́ю, Михе́е, о́тче на́шъ, никогда́же побѣди́лся еси́ лѣ́ностію, но бо́дръ при́сно пребыва́я, на вся́кое дѣ́ло угото́ванъ.

Мѵ́ро благово́нное — Христа́ пріи́мъ въ се́рдцы твое́мъ, подо́бяся Ему́, е́же послушли́ву бы́ти до сме́рти, тѣ́мже къ черто́гу небе́сному ра́достно поте́клъ еси́ по стопа́мъ Влады́ки.

Богоро́диченъ: Удивля́ется вся́къ язы́къ и страна́, зря́ще, Влады́чице, сбытіе́ слове́съ Твои́хъ, и́бо да́же и до дне́сь неоску́дно пребыва́етъ вели́кая Ла́вра, оби́тель Се́ргіева.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Му́дрость су́щую, Христа́ Бо́га, обита́ющую въ души́ твое́й, стяжа́въ изоби́льно, богому́дре Михе́е, вся́кія сѣ́ти зло́бы а́дскаго хитреца́ растерза́лъ еси́, самаго́ себе́ вда́въ въ послуша́ніе.

Истинно росо́ю по́двигъ твои́хъ, о́тче преблаже́нне, погаси́въ вся́ стра́сти, возже́глъ еси́ о́гнь любве́ и вѣ́ры къ твоему́ учи́телю, воздержа́ніе во все́мъ имѣ́я, свѣти́льникъ безстра́стія.

Хотя́ Тро́ицѣ жили́ще ду́шу твою́ сотвори́ти, потща́лся еси́ тѣ́снымъ и приско́рбнымъ путе́мъ, подража́я ста́рцу, ше́ствовати, при хра́мѣ Святы́я Тро́ицы живя́ и непреста́нно моля́ся.

Богоро́диченъ: Еже отъ усе́рдія, пріими́, Влады́чице, приноси́мое Тебѣ́ благодаре́ніе и хвалу́ и просвѣти́ ду́ши на́ша, вси́ бо человѣ́цы есмы́, лише́ны сла́вы Бо́жіей.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Юже прія́лъ еси́ благода́ть твори́ти плоды́ ду́ха: любы́, ра́дость, ми́ръ, долготерпѣ́ніе, бла́гость, милосе́рдіе, вѣ́ру, кро́тость, воздержа́ніе, пода́ждь и на́мъ моли́твами твои́ми.

По́стническими по́двиги у́гліе страсте́й угаси́въ вои́стину и огне́мъ любве́ къ Бо́гу попали́лъ еси́ невѣ́ріе, и хулу́, и вся́кое возноше́ніе, взима́ющееся на ра́зумъ Бо́жій, преподо́бне.

Оте́чество и ро́дъ ты́, о́тче, оста́вивъ, въ пусты́ню прише́лъ еси́ къ вели́кому Се́ргію, съ ни́мже подвиза́яся при хра́мѣ Живонача́льныя Тро́ицы, до́мъ Ду́ху Свято́му себе́ сотвори́лъ еси́.

Богоро́диченъ: Юноши, и ста́рцы, и вся́къ во́зрастъ, пріиди́те, ны́нѣ восхва́лимъ Преблагослове́нную въ жена́хъ Ма́терь Дѣ́ву Отрокови́цу, я́вльшуюся со апо́столы преподо́бнымъ отце́мъ Се́ргію и Михе́ю.

Конда́къ, гла́съ 8:

Пріиди́те, мона́шествующихъ собо́ри и по́стниковъ ли́цы,* соше́дшеся, похва́лимъ блаже́ннаго Михе́я,* спо́стника преподо́бнаго Се́ргія,* съ ни́мже предстои́тъ Святѣ́й Тро́ицѣ* и мо́лится спасти́ся душа́мъ на́шимъ.

Икосъ:

Ева́нгельскій гла́съ, о́тче, услы́шавъ: а́ще не бу́дете, я́ко дѣ́ти, не вни́дите въ Ца́рствіе небе́сное, и: а́ще кто́ хо́щетъ по Мнѣ́ ити́, да отве́ржется себе́, — вся́ у́бо оста́вилъ еси́ мірска́я пристра́стія, бога́тство и сла́ву, я́ко пра́хъ, вмѣни́въ, дѣ́тски вда́лся еси́ преподо́бному Се́ргію, повину́яся во все́мъ. Мы́ же, па́мять твою́ соверша́юще, вопіе́мъ ти́ си́це: ра́дуйся, о́тче, за́повѣдей Госпо́днихъ исполни́телю; ра́дуйся, послуша́нія и смире́нія до́брый рачи́телю; ра́дуйся, храни́телю ста́рческихъ повелѣ́ній; ра́дуйся, соприча́стниче та́йныхъ открове́ній; ра́дуйся, сподви́жниче живу́щимъ во и́мя Святы́я Тро́ицы; ра́дуйся, досто́йный зри́телю явле́нія Пресвяты́я Богоро́дицы. Ра́дуйся, Михе́е, дѣ́лателю смиренному́дрый.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Христу́ себе́ сочета́въ, кро́тостію, терпѣ́ніемъ и повинове́ніемъ у́мъ прего́рдый боже́ственнымъ смире́ніемъ смири́лъ еси́, поя́ при́сно: благослове́нъ Бо́гъ оте́цъ на́шихъ.

Въ пусты́ни тружда́яся, я́ко кри́нъ, прозя́блъ еси́, добродѣ́тельми укра́шенъ, краснѣ́йшее прозябе́ніе, о́тче Михе́е, поя́ Бо́гу въ души́ твое́й: благослове́нъ еси́, Го́споди, во вѣ́ки.

Ангеломъ земны́мъ въ дому́ Живонача́льныя Тро́ицы подража́я, жи́тельствовавъ, небе́сный человѣ́къ сотвори́лся еси́, и ны́нѣ на небесѣ́хъ лику́еши со а́нгелы во вѣ́ки.

Богоро́диченъ: Лю́бящая мѣ́сто сіе́, Ма́ти Бо́жія, Препросла́вленная, угаси́ пе́щь страсте́й на́шихъ милосе́рдіемъ Твои́мъ, да воспѣва́емъ Тя́ во вѣ́ки со избра́нники Твои́ми.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Уклони́лся еси́, о́тче досточу́дне, отъ злѣ́ веду́щихъ къ поги́бели, къ стезя́мъ же Боже́ственнымъ прилѣпи́лся еси́ и ду́шу твою́ Христу́ пре́далъ еси́, да ца́рствуеши съ Ни́мъ во вѣ́ки.

Отъ земли́ на не́бо ду́хомъ пресели́лся еси́, о́тче, тѣ́ло же твое́ рука́ми учи́теля въ земли́ погребе́ся. Нынѣ́ же со святы́ми лику́етъ ду́хъ тво́й, взыва́я: благослове́нъ еси́, Го́споди Бо́же, во вѣ́ки.

Святу́ю Тро́ицу чествова́ти научи́лся еси́ отъ учи́теля твоего́ Се́ргія преподо́бнаго, тѣ́мже и Бо́гъ ва́съ превознесе́ и дарова́ че́сть, е́же со а́нгелы и всѣ́ми святы́ми сла́вити Его́ во вѣ́ки.

Богоро́диченъ: Есть вои́стину се́й святы́й де́нь, въ о́ньже собра́ на́съ Ма́терь Бо́жія просла́вити по́двиги преподо́бныхъ оте́цъ, здѣ́ просія́вшихъ, и́хже па́мять пребыва́етъ во вѣ́ки.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу велича́емъ.

Рече́ Госпо́дь: прославля́ющаго Мя́ просла́влю. Вои́стинну сбы́шася словеса́ сія́, та́ко бо просла́ви Госпо́дь преподо́бнаго Се́ргія и учени́къ его́ мно́жество въ земли́ Россíйстѣй, я́ко и до дне́сь сла́ва и́хъ зри́тся.

До́бръ учи́тель, и добри́ су́ть ученицы́ его́: приснопа́мятный Ни́конъ, прія́вшій бре́мя оте́ческое, и Михе́й смире́нный, Іа́ковъ Яку́та и Васи́лій, пре́жде всѣ́хъ прише́дый, Они́симъ діа́конъ и Елисе́й, до́брѣ подвиза́вшіяся.

Ца́рствовати и́мутъ съ ни́ми и Митрофа́нъ игу́менъ, Си́монъ же архимандри́тъ и другíй Си́монъ, Исаа́кій и Мака́рій, зри́тели а́нгела, Илія́, Игна́тій и Іоанни́кій пресла́вніи, Алекса́ндръ и Андре́й во́ини и Епифа́ній прему́дрый.

Богоро́диченъ: Ангеловъ Цари́цу и мона́шескаго чи́на а́нгельскаго Влады́чицу, пріиди́те вси́, восхва́лимъ и поклони́мся Ей, Та́ бо нело́жно обѣща́ся бы́ти неотсту́пна мѣ́ста сего́ до сконча́нія вѣ́ка.

Свѣти́ленъ:

Свѣ́тъ Христо́въ всели́ся въ тя́, Михе́е преподо́бне, да, предугото́вавъ чистото́ю жи́зни ду́шу твою́, у́зриши свѣ́тъ небе́сный въ посѣще́ніи Богома́тери и не у́мреши. [Два́жды.]

Сла́ва, и ны́нѣ, богоро́диченъ:

Сла́дость а́нгеловъ, преподо́бныхъ ра́дованіе, христіа́нъ всѣ́хъ предста́тельнице, Дѣ́во Ма́ти Госпо́дня, заступи́ на́съ и изба́ви вѣ́чныхъ му́къ.

На хвали́техъ стихи́ры, гла́съ 3:

Сла́ва Тебѣ́, Христе́ Бо́же,* преподо́бныхъ похвало́ и по́стниковъ весе́ліе,* подвиза́вшихся въ постѣ́ и моли́твахъ,* и́хже упова́ніе — вѣ́чное блаже́нство,* е́же сла́вити Тро́ицу Единосу́щную.

Возсія́ дне́сь пресвѣ́тлая па́мять* отца́ на́шего Михе́я,* кро́ткаго ученика́ кро́ткаго учи́теля,* созыва́ющи мона́ховъ ликостоя́нія* похвали́ти по́двиги послужи́вша Се́ргію вѣ́рно,* и по сме́рти осажда́ющими ви́дѣннаго,* и получи́вшаго у Христа́ ве́лію ми́лость.

Боже́ственною си́лою, о́тче, одѣ́явся,* умертви́лъ еси́ себе́ мíрови:* житіе́ непоро́чно пожи́въ, пресла́вне,* купножи́тель Се́ргія богоно́снаго бы́въ,* съ ни́мже моли́ся Христу́ Бо́гу* спасти́ ду́ши на́ша.

Чистоты́ сосу́дъ показа́лся еси́,* озаря́емь Боже́ственною свѣ́тлостію,* и ны́нѣ на небесѣ́хъ Христа́ зри́ши лице́мъ къ лицу́,* моли́ Его́, о́тче Михе́е,* о соверша́ющихъ па́мять твою́ вѣ́рно.

Сла́ва, гла́съ 2:

Смире́нъ, незло́бивъ, про́стъ и кро́токъ,* па́че инѣ́хъ вои́стину,* и чи́стъ се́рдцемъ показа́лся еси́,* Боже́ственныхъ видѣ́ній сподобля́емь, —* чи́стіи бо се́рдцемъ Бо́га у́зрятъ, —* я́коже рече́ Госпо́дь.* И ны́нѣ предстоя́й Святѣ́й Тро́ицѣ,* моли́ся, о́тче Михе́е,* во е́же спасти́ся на́мъ.

И ны́нѣ, [богоро́диченъ]:
Все́ упова́ніе мое́ на Тя́ возлага́ю,* Ма́ти Бо́жія,* сохрани́ мя подъ кро́вомъ Твои́мъ.

Славосло́віе вели́кое и про́чее.



НА ЛИТУРГІИ,

Бла́женна отъ кано́на свята́го на 4, пѣ́снь 3-я. Проки́менъ, гла́съ 7: Честна́ предъ Го́сподемъ* [сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́?] Апо́столъ, къ Гала́томъ, зача́ло 213. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе отъ Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].


Моли́тва преподо́бному отцу́ на́шему Михе́ю, Ра́донежскому чудотво́рцу.

О, преблаже́нне и богому́дре о́тче Михе́е! Ты́ и́стиннаго Па́стыря Христа́ за́повѣди исполня́я, вся́ко весе́ліе, е́же въ мíрѣ, возненави́дѣлъ еси́ и житіе́ твое́ въ слеза́хъ препровожда́лъ еси́, тѣле́сныя стра́сти до конца́ умерщвля́я и во все́мъ послѣ́дуя житію́ учи́теля твоего́ преподо́бнаго Се́ргія, съ ни́мже и сподо́бился еси́ ви́дѣти Небе́сную Цари́цу, Пресвяту́ю Богоро́дицу, посѣща́ющую ва́съ и благода́тнѣ обѣщава́ющую, я́ко неотсту́пна бу́детъ отъ мѣ́ста сего́. О таковѣ́й, да́ннѣй тебѣ́ благода́ти, вѣ́дуще мы́, я́ко и ны́нѣ ку́пно съ богоно́снымъ а́ввою твои́мъ во оби́теляхъ свѣ́та обита́еши и Го́споду предстои́ши, смире́нно мо́лимъ тя́, къ честнѣ́й ра́цѣ твое́й припа́дающе: не преста́ни вку́пѣ съ ни́мъ моля́ся о на́съ ко Го́споду на́шему Іису́су Христу́ и Пречи́стѣй Его́ Ма́тери, о е́же сохрани́ти Благочести́вѣйшаго Импера́тора на́шего и держа́ву Его́ въ ми́рѣ и благопребыва́ніи, христолюби́вому Его́ во́инству побѣ́ду на враги́ дарова́ти, всѣ́мъ же на́мъ во благоче́стіи и чистотѣ́ и взаи́мной любви́ ти́хое и безмо́лвное житіе́ устро́ити, отъ гла́да, губи́тельства, огня́, меча́, междоусо́бныя бра́ни и отъ вся́кія бѣды́ и ну́жды на́съ изба́вити, да, спасе́ни душе́ю же и тѣ́ломъ, единоду́шно сла́вимъ въ Тро́ицѣ сла́вимаго Бо́га, Отца́ и Сы́на и Свята́го Ду́ха, ны́нѣ, и при́сно, и во вѣ́ки вѣко́въ. Ами́нь.

Источникъ: Слу́жба преподо́бному отцу́ на́шему Михе́ю Ра́донежскому, ученику́ преподо́бнаго Се́ргія. Ма́ія 6-го дня́. — М.: Сѵнода́льная Тѵпогра́фія, 1913. — 18 л.

/ Къ оглавленію раздѣла /


Наверхъ / Къ титульной страницѣ

0