Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 6-й де́нь.
Свята́го и пра́веднаго Іова Многострада́льнаго.

[ВЕЧЕРЪ,]
Стихи́ры, гла́съ 4. Подо́бенъ: Да́лъ еси́ зна́меніе.

Бога́тствомъ благоче́стія,* я́ко багряни́цею многоцѣ́нною, укра́шенъ,* непоро́чный Іове,* ми́лостію, пра́вдою,* я́коже боже́ственнымъ вѣнце́мъ, одѣ́янъ,* надъ страстьми́ томя́щими* ты́ ца́рствовалъ еси́.* Тѣ́мже къ ца́рствомъ разу́мнымъ преста́вился еси́,* Царю́, пресла́вне, Вѣ́чному предстоя́ти.

Іова, непобѣди́маго во искуше́ніихъ бы́вша,* пло́ти своея́ я́звами* столпа́ непоколеби́маго,* му́жеству забра́ло,* всѣ́мъ позна́на бы́вша* мудролю́бнымъ по́мысломъ,* діа́волу жа́ла сокруши́вша,* боже́ственнаго и богому́драго,* благочести́вымъ утвержде́ніе,* Госпо́дня непоро́чнаго восхва́лимъ уго́дника.

Сла́ва, и ны́нѣ, пра́здника.

Тропа́рь, гла́съ 1:

Бога́тство ви́дѣвъ добродѣ́телей Іовлихъ, укра́сти ко́знствоваше пра́ведныхъ вра́гъ, и, растерза́въ сто́лпъ тѣлесе́, сокро́вище не укра́де ду́ха, обрѣ́те бо вооруже́ну непоро́чнаго ду́шу, мене́ же и, обнажи́въ, плѣни́, предвари́въ у́бо мя́ пре́жде конца́, изба́ви мя́, льсти́ваго, Спа́се, и спаси́ мя.


[НА УТРЕНИ,]
Кано́нъ, его́же краегране́сіе, безъ богоро́дичновъ: Тьмострада́льнаго досто́йно пѣ́ти Іова. Гла́съ 4.

Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Крѣ́пкаго адама́нта, терпѣ́нія вѣнце́мъ укра́шена, Христо́ва Це́рковь, у́мныма зря́щи очи́ма, торжеству́етъ въ ра́дости, вопію́щи: пои́мъ Бо́гу на́шему, я́ко просла́вися.

Ни язы́къ прему́дрыхъ возмо́жетъ, ни у́мъ человѣ́чь пости́гнути похвалы́ твоея́, и́бо несозда́нный язы́къ тя́ богочести́ва, и́стинна и непоро́чна нарече́. Тѣ́мже согла́сно вопіе́мъ: пои́мъ Бо́гу на́шему, я́ко просла́вися.

Непщева́въ бога́тствомъ огражде́на, подви́жно побѣди́ти пра́ведника испроша́етъ льсти́вый, и, обнаже́ніемъ ну́ждно побори́въ, разсѣ́деся, терпѣ́ніемъ бо вопія́ше: пои́мъ Бо́гу на́шему, я́ко просла́вися.

Богоро́диченъ: Ли́цы Тя́ проро́честіи пою́тъ, Чи́стая, и безпло́тныхъ мно́жества почита́ютъ, и́бо Зижди́теля всѣ́хъ, изъ утро́бы Твоея́ несказа́нно проше́дшаго, зря́ще. Сему́ немо́лчно пою́тъ: пои́мъ Бо́гу на́шему, я́ко просла́вися.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Пребыва́лъ еси́, непрекло́ненъ умо́мъ, ты́, любе́зныхъ дѣте́й и бога́тства обнаже́нъ, воспѣва́я: благослове́нно Го́спода моего́ и́мя.

Ве́щь добродѣ́тели сотвори́лъ еси́, бога́тство и нищету́, обои́ми бо разжига́емь, я́ко зла́то, седмери́цею, яви́лся еси́ иску́снѣйшій.

Глаго́ломъ жены́ приложи́ся, я́коже нача́льному роди́телю, зло́бы нача́льникъ змíй тебѣ́, но солга́ся, кова́рствомъ безъ мѣ́ры хваля́йся.

Богоро́диченъ: Ра́дуйся, Ма́ти Неискусобра́чная, Яже Бо́га Сло́ва во утро́бѣ Твое́й вмѣ́щши и ро́ждши воплоще́ннаго, я́ко Бо́га ку́пно и Человѣ́ка.

Конда́къ, гла́съ 8. Подо́бенъ: Яко нача́тки.

Яко и́стиненъ и пра́веденъ, богочести́въ и непоро́ченъ, освяще́нъ же я́влься, всесла́вне, Бо́жій уго́дниче и́стинный, просвѣти́лъ еси́ мíръ въ терпѣ́ніи твое́мъ, терпѣли́вѣйшій и до́блѣйшій. Тѣ́мже вси́, богому́дре, па́мять твою́ воспѣва́емъ.

Та́же сѣда́ленъ, гла́съ 3. Подо́бенъ: Красотѣ́ дѣ́вства.

Іова непоро́чнаго и чистѣ́йшаго, превысо́каго столпа́ и непобѣди́маго хитростьми́ врага́ бы́вша ду́хомъ, вси́ ублажи́мъ и вѣ́рно восхва́лимъ, вели́ка уго́дника Христу́ бы́вшаго, и сего́ прилѣ́жно моля́ща спасти́ отъ бѣ́дъ ду́ши на́ша.

Сла́ва, и ны́нѣ, пра́здника.

Пѣ́снь 4.

Ирмо́съ: Услы́шахъ сла́вное смотре́ніе Твое́, Христе́ Бо́же, я́ко роди́лся еси́ отъ Дѣ́вы, да отъ ле́сти изба́виши зову́щія: сла́ва си́лѣ Твое́й, Го́споди.

Дово́льнѣйшій о́бразъ и сто́лпъ одушевле́нъ на́мъ добродѣ́телей Іовъ непоро́чный показа́ся, ему́же ревни́тели ны́, вопію́щія, сотвори́: сла́ва си́лѣ Твое́й, Го́споди.

Исцѣлѣва́етъ твоего́ благоси́лія и терпѣ́нія незло́бныя души́ во гное́ніи страда́нія, е́же во Еде́мѣ су́щаго преступле́нія исцѣле́ніе, Іове преблаже́нне.

По́мысломъ разсужда́я преподо́бнымъ, воспѣва́ше Іовъ: блага́я пріе́мше отъ Го́спода, болѣ́зненная до́блественно не стерпи́мъ ли? Сла́ва си́лѣ Твое́й, Го́споди.

Богоро́диченъ: Неискусобра́чная Богоневѣ́сто, Яже Спа́са ро́ждши пло́тію, Тя́ воспѣва́емъ, Препросла́вленная, и немо́лчно си́це Тебѣ́ взыва́емъ: ра́дуйся, Предста́тельнице Твои́хъ рабо́въ.

Пѣ́снь 5.

Ирмо́съ: Возсія́вый свѣ́тъ, и просвѣти́вый у́тро, и показа́вый де́нь, сла́ва Тебѣ́, сла́ва Тебѣ́, Іису́се, Сы́не Бо́жій.

Утѣша́юще отъ лю́тыхъ, прило́жше струпо́мъ твои́мъ болѣ́зни, множа́йшія тебѣ́ исплето́ша вѣнцы́, Іове сла́вне.

Юношски въ лю́тыхъ непобѣди́мь яви́лся еси́ и въ бога́тствѣ къ досажде́нію, пра́ведниче, не взя́тся, Іове непоро́чне.

Невреди́мо душе́вное храни́ло назида́я, до́блественнѣ терпѣ́лъ еси́, сла́вне, вра́жію лю́тую бу́рю.

Богоро́диченъ: Ангеловъ гла́съ немо́лчно тва́рь приноша́етъ Тебѣ́, Дѣ́во: ра́дуйся, Ма́ти Чи́стая Іису́са, Сы́на Бо́жія.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Диви́тся слу́хъ, наслажда́яся слове́съ твои́хъ, я́ко уста́ та́инъ показа́лся еси́ испо́лнена сотво́ршаго и нау́чшаго тя́ Боже́ственнаго Ду́ха.

Исцѣля́я скорбя́щему болѣ́знь се́рдца, отъ о́чію милосе́рдія пролива́лъ еси́ сле́зы, предстоя́ си́рымъ и вдови́цамъ, Іове сла́вне.

Житіе́ твое́ благоче́стное и боголю́бное бы́сть, сего́ ра́ди и сме́рть яви́ся поко́й, и къ непреста́нному весе́лію, Іове, преста́вился еси́.

Богоро́диченъ: Мо́лимся о рабѣ́хъ Твои́хъ, Пренепоро́чная Богоро́дице, изъ Тебе́ Воплоще́ннаго моли́, я́ко Тя́ еди́ну Предста́тельницу на́шу зна́емъ.

Конда́къ и и́косъ пра́здника.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Зако́нныхъ не невку́сенъ сы́й, но проро́ковъ и зако́на нося́ исполне́ніе, Іове, за любо́вь Бо́гу угоди́лъ еси́, воспѣва́я: препѣ́тый Го́споди, Бо́же оте́цъ на́шихъ, благослове́нъ еси́.

Не сниска́въ сокро́вища на земли́, но на небесѣ́хъ упова́ніе, я́ко пра́хъ, вмѣни́лъ еси́ зла́то, Бо́гови же пѣ́ти возжела́лъ еси́: препѣ́тый Го́споди, Бо́же оте́цъ на́шихъ, благослове́нъ еси́.

Любве́ тя́ ча́дъ и имѣ́нія обнажи́ пра́ведныхъ вра́гъ, души́ же твоея́ крѣ́пость не преста́ вопи́ти: препѣ́тый Го́споди, Бо́же оте́цъ на́шихъ, благослове́нъ еси́.

Тро́иченъ: Сло́во и Ду́хъ отъ Отца́, Еди́но Тріѵпоста́сное естество́ богосло́вяще благоче́стно, богому́дріи, вѣ́рою вопіе́мъ: препѣ́тый Го́споди, Бо́же оте́цъ на́шихъ, благослове́нъ еси́.

Богоро́диченъ: Безбра́чно во чре́вѣ вы́ше сло́ва пріи́мшу непремѣ́ннаго Бо́га, ми́лостію человѣ́комъ прича́щшагося, благоче́стно воспое́мъ я́ко Ма́терь Бо́жію во вѣ́ки.

Пѣ́снь 8.

Ирмо́съ: Во о́бразѣ а́нгела, я́вльшагося въ пещи́ о́гненнѣй пѣсносло́вцемъ, Христа́ Бо́га по́йте, о́троцы, свяще́нницы, благослови́те, лю́діе, превозноси́те во вся́ вѣ́ки.

Торжеству́етъ ве́сь пра́зднующихъ въ вы́шнихъ ли́къ съ чуде́снымъ воспѣва́емымъ Іовомъ: по́йте, о́троцы, свяще́нницы, благослови́те, лю́діе, превозноси́те во вся́ вѣ́ки.

Усугу́би тебѣ́ вѣнцы́ на земли́ и на небеси́ Подвигополо́жникъ, богому́дре Іове. Тѣ́мже взыва́еши: свяще́нницы, благослови́те, лю́діе, превозноси́те во вся́ вѣ́ки.

Исцѣле́нія душа́мъ же и тѣ́ломъ гное́ніе твоея́ пло́ти источа́етъ, пребога́те, воспѣва́ющимъ: свяще́нницы, благослови́те, лю́діе, превозноси́те во вся́ вѣ́ки.

Неду́гъ и здра́віе, бога́тство и нищета́, воскипѣ́ша въ житіи́ твое́мъ, блаже́нне, свѣ́телъ бо я́влься всѣ́ми, зове́ши: лю́діе, превозноси́те во вся́ вѣ́ки.

Богоро́диченъ: Неизрече́нно и безъ сѣ́мене заче́ншую и ро́ждшую ра́дость вселе́ннѣй, Христа́ Бо́га, по́йте, о́троцы, свяще́нницы, благослови́те, лю́діе, превозноси́те во вся́ вѣ́ки.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Іовъ у́бо терпѣ́нія свѣ́тлостію досто́йно вѣнча́ся, ты́ же пла́чеши и сѣ́туеши, не терпя́ пра́веднаго вѣнца́, су́етно бо надѣ́явся, посрами́лся еси́, сатано́, еди́не пра́ведниковъ вра́же.

Яко дости́жно человѣ́комъ ви́дѣти, сла́ву Твою́ усмотри́въ безсме́ртную, стра́хомъ удержа́нъ бы́въ и благоговѣ́ніемъ, возопи́ Іовъ, зѣло́ тре́петенъ: пе́пелъ е́смь и земля́, Ты́ же Госпо́дь. Тѣ́мъ тя́ вси́ велича́емъ.

Кни́ги тя́ досто́йно живо́тныя прія́ша и сокро́вища небе́сная, я́ко пшени́цу зрѣ́лу су́щу, и испо́лнь дне́й духо́вныхъ, Іове, уго́дниче Госпо́день блаже́нне. Тѣ́мже тя́ вси́ ублажа́емъ.

Тро́иченъ: Еди́нице Тріѵпоста́сная, Честна́я Тро́ице и единосла́вная Пресвята́я, Бо́же на́шъ, свѣ́тъ и жи́знь и нетлѣ́ніе мíру показа́лася еси́, зову́щія Твоя́ рабы́ отъ ле́сти спаси́, да вѣ́рою Тебѣ́ поклони́мся.

Богоро́диченъ: Прему́дрости вмѣсти́лище, па́че ума́ лу́чшее, показа́лася еси́, Отрокови́це Пренепоро́чная, одушевле́нъ престо́лъ же и две́рь, тѣ́мже, я́ко Цари́цу возлюби́вше дѣ́вы Тя́, Дѣ́во, въ слѣ́дъ Тебе́ приведо́шася Богоотрокови́цы.


НА ЛИТУРГІИ,

Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 35 – 38.

/ Къ оглавленію раздѣла /


Наверхъ / Къ титульной страницѣ

0