Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 5-й де́нь.
Святы́я и сла́вныя му́ченицы Ири́ны.

[ВЕЧЕРЪ,]
Стихи́ры, гла́съ 1. Подо́бенъ: Всехва́льніи му́ченицы.

Огня́ паля́щаго стремле́ніе* стерпѣ́ла еси́, прехва́льная,* и строга́нія вся́ тѣле́сная,* взира́ющи къ воздая́ніемъ та́мошнимъ, всечестна́я,* я́же еди́ный Іису́съ* предугото́ва лю́бящимъ* и те́плѣ Того́ жела́ющимъ,* я́ко Жениха́ ду́шъ краснѣ́йшаго.

Ослади́вшися любо́вію Христо́вою,* бо́ги возненави́дѣла еси́ язы́ческія* и безду́шныя истука́нныя,* Ири́но сла́вная:* богоразу́мія сто́лпъ явле́ннѣйшій* себе́ зря́щимъ возста́вила еси́,* я́ко пострада́вши,* и тече́ніе сконча́вши,* и вѣ́ру непоро́чну соблю́дши.

Сла́ва, и ны́нѣ, пра́здника.

Тропа́рь, гла́съ 4:

Агница Твоя́, Іису́се, Ири́на, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша.


[НА УТРЕНИ,]
Кано́нъ, его́же краегране́сіе: Твои́ми мя́ моли́твами, му́ченице Ири́но, покры́й. Гла́съ 4.

Пѣ́снь 1.

Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Вѣне́цъ сы́й страстоно́сицы, сея́, Христе́, моли́твами ми́ръ мíру и сла́ву неувяда́ему пою́щимъ Тя́ да́руй.

Заре́ю сія́ющи дѣ́вства, укра́шена добро́тою твоего́ муче́нія, Ири́но великоимени́тая, твоему́ Жениху́ предстои́ши.

Ми́лостиву бы́ти Це́рквамъ твоего́ моли́ Жениха́, Ири́но богому́драя, согрѣше́ній же оставле́ніе пода́ти чту́щимъ тя́.

Богоро́диченъ: Пло́ть бы́вша Бо́га Сло́ва и су́щаго, я́ко мы́, Свята́я Дѣ́во, неизрече́нно родила́ еси́, па́че сло́ва и ра́зума.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Мѵ́ра излія́вшагося чу́вствующи и вселе́нную облагоуха́вшаго благода́тію пріи́мши, воспери́ся къ жела́нію сего́, сла́вная.

Имѣ́ла еси́ Бо́га помо́щника во твои́хъ по́двизѣхъ и защища́юща, всему́драя, сего́ ра́ди вѣнча́вшися, мучи́теля побѣди́ла еси́.

Сто́лпъ добродѣ́телей непрекло́ненъ, и благоче́стія жили́ще бы́сть, и му́жества, и цѣлому́дрія прія́телище, всехва́льная.

Богоро́диченъ: Те́кши до Тебе́, сме́рть ста́, прирази́вшися изъ Тебе́ рожде́нному, Всенепоро́чная, сего́ ра́ди безсме́ртія нача́токъ Тя́ имену́емъ.

Конда́къ, гла́съ 4. Подо́бенъ: Яви́лся еси́.

Дѣ́вства добро́тами преиспещре́нна, дѣ́во, страда́льчествомъ была́ еси́ краснѣ́йшая, Ири́но, кровьми́ твои́ми исте́кшими обагре́на, пре́лесть же низложи́вшая безбо́жія. Сего́ ра́ди и прія́ла еси́ по́чести побѣ́ды руко́ю Созда́теля твоего́.

Сѣда́ленъ, гла́съ 8. Подо́бенъ: Воскре́слъ еси́.

Ми́ръ тебѣ́ мно́гъ прибы́сть, му́ченице, разрѣ́шшися пло́ти по болѣ́знехъ мно́гихъ: ра́дуяся бо, Жени́хъ на небесѣ́хъ тя́ горѣ́ прія́тъ, всепросвѣще́ну, и страда́ніемъ облиста́ющу, и въ черто́гъ Боже́ственный введе́ ра́дующуся.

Сла́ва, и ны́нѣ, пра́здника.

Пѣ́снь 4.

Ирмо́съ: Твоего́ на земли́ явле́нія, Христе́ Бо́же, проповѣ́дуя проро́къ прише́ствіе, съ весе́ліемъ вопія́ше: сла́ва си́лѣ Твое́й, Го́споди.

Иже ми́ръ тебѣ́ подава́яй, мироимени́тая, ми́ра ра́ди посо́бствующу тя́ ви́дя, мужеподо́бнымъ ра́зумомъ, му́ченице, и крѣ́постію испо́лни.

Крѣ́пкимъ усе́рдіемъ превозше́дши же́нскую не́мощь, преблаже́нная, тве́рдо изобличи́ла еси́, му́ченице, ле́сти служа́щія.

Боже́ственное терпѣ́ніе показа́вши, мучи́телей де́рзости низложи́ла еси́, твоему́ Жениху́ зову́щи: сла́ва си́лѣ Твое́й, Го́споди.

Пѣсносло́віемъ немо́лчнымъ и мольба́ми Влады́ку, богому́драя, пѣсносло́вила еси́, и, къ Нему́ восте́кши, сла́ву зри́ши неизрече́нную.

Богоро́диченъ: Ра́достно Тебѣ́, веселя́щеся, гла́сы, Пречи́стая, Тебе́ ра́ди спа́сшіися, взыва́емъ: ра́дуйся, Дѣ́во Всечестна́я, ра́дуйся, Богоро́дице Всепѣ́тая.

Пѣ́снь 5.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Му́жескимъ, сла́вная, ра́зумомъ Христа́, Бо́га всѣ́хъ я́сно исповѣ́дала еси́, сло́вомъ же тве́рдымъ сопротивоборца́, страстоте́рпице, посрами́ла еси́.

Послѣ́довати возжелѣ́ла еси́ стра́сти Христо́вѣ и подо́біемъ те́плѣ послѣ́довала еси́, подви́жно стра́ждущи по Влады́цѣ, пребога́тая.

Полки́ му́ченикъ, сла́вная, привела́ еси́ Христу́ твое́ю му́дростію и богосло́віемъ, сія́ и́стинно тайноуча́щи сло́вомъ вѣ́ры.

Богоро́диченъ: Научи́вшеся та́йны зача́тія Твоего́ и неизрече́ннаго и боже́ственнаго Твоего́ рождества́, Дѣ́во, ны́нѣ всеблагоче́стно пѣсносло́вимъ Тя́, Богоро́дице Всепѣ́тая.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Испра́вила еси́ прама́тере Евы паде́ніе, страстоте́рпице, врага́ низложи́вши си́лу и побѣди́вши о́наго шата́ніе Боже́ственною благода́тію.

Крѣ́пость стяжа́вши, Ири́но, ра́зума, мучи́телемъ супроти́вилася еси́ души́ до́блестію и вѣнце́мъ побѣ́днымъ отъ Христа́ Бо́га вѣнча́лася еси́.

Кро́вію страда́нія, му́ченице, свѣтлѣ́йшу содѣ́лала еси́ есте́ственную добро́ту, чи́стая, до́блественныя по́двиги подъе́мши тве́рдо, до́брая дѣ́во.

Богоро́диченъ: Прояви́ та́йну Твоего́ рождества́ Богови́децъ, горя́щу купину́ ви́дѣ, и неопаля́ему, Богоро́дице Чи́стая Приснодѣ́во.

Конда́къ и и́косъ пра́здника.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Вѣнцено́сно, му́ченице, предстоя́щи престо́лу твоего́ Влады́ки, соблюди́ вѣ́рою зову́щія: оте́цъ на́шихъ Бо́же, благослове́нъ еси́.

Въ небе́сныхъ селе́ніихъ ликова́ти, му́ченице, сподо́билася еси́, досточу́дная Ири́но, зову́щи: оте́цъ на́шихъ Бо́же, благослове́нъ еси́.

Жела́ющи улучи́ти Рачи́теля твоего́ добро́ты, муче́нія болѣ́зни претерпѣ́ла еси́, Ири́но, зову́щи: оте́цъ на́шихъ Бо́же, благослове́нъ еси́.

Богоро́диченъ: Глаго́ломъ усте́нъ Твои́хъ послѣ́дующе, вѣ́рою Тя́, Богома́ти, ублажа́емъ, вопію́ще Рождеству́ Твоему́: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Пострада́ла еси́, Ири́но блаже́нная, до́блѣ и мучи́теля низложи́ла еси́, иму́щи посо́біе непобѣди́мое, Влады́ки твоего́ си́лу, содѣ́йствующую тебѣ́, и, — Го́спода по́йте, — вопія́ла еси́, — и превозноси́те Его́ во вѣ́ки.

Юношескою любо́вію уя́звена, во слѣ́дъ твоего́ Жениха́ послѣ́довала еси́, Сего́ страда́нія, му́ченице, и ра́ны на тѣ́лѣ твое́мъ нося́щи и вопію́щи: Го́спода по́йте, дѣла́, и превозноси́те Его́ во вѣ́ки.

Твое́, е́же въ му́кахъ, терпѣ́ніе, Ири́но вѣнцено́сице, посмѣя́ся су́етію и безбо́жію надѣ́ющимся, сла́вная, вѣ́рою же поя́ше: Го́спода воспѣва́йте, дѣла́, и превозноси́те Его́ во вѣ́ки.

Богоро́диченъ: Му́дрость Бо́жія, всѣ́хъ Хитре́цъ, во Твое́ чре́во, Богома́ти, все́льшися, хра́мъ созда́, разу́менъ же и одушевле́нъ Себѣ́, и спасе́ мíръ, зову́щій: Го́спода воспѣва́йте, дѣла́, и превозноси́те Его́ во вѣ́ки.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Окрестъ твоего́ Рачи́теля лику́ющи въ вы́шнихъ, до́брая дѣ́во, испроси́ мíру ми́ръ, Ири́но, и согрѣше́ній оставле́ніе вѣ́рою творя́щимъ па́мять твою́ свѣтоно́сную и свяще́нную.

Вну́трь тя черто́га Христо́съ я́ко му́ченицу и дѣ́ву всели́, идѣ́же съ дѣ́вами ра́дуешися и съ му́ченическими во́инствы, Ири́но вѣнцено́сице всехва́льная, тѣ́мже тя́ вси́ ублажа́емъ.

Две́ри отве́рзъ небе́сныя, прія́тъ ду́шу твою́ всенепоро́чную Еди́нъ, всѣ́ми ца́рствуяй, и пра́вды Строи́тель, Ири́но, боже́ственнаго ми́ра тезоимени́тая, Тѣ́мже тя́ вси́ ублажа́емъ.

Богоро́диченъ: Иму́щи къ Твоему́ Сы́ну, Пренепоро́чная, дерзнове́ніе непосты́дно, Сего́ умоли́ низпосла́ти мíру ми́рно устрое́ніе и всѣ́мъ Це́рквамъ единомышле́ніе, да Тя́ вси́ велича́емъ.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 32 об. – 35.

/ Къ оглавленію раздѣла /


Наверхъ / Къ титульной страницѣ

0