Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 4-й де́нь.
Святы́я преподобному́ченицы Пелагíи.

[ВЕЧЕРЪ,]
Стихи́ры, гла́съ 2. Подо́бенъ: Егда́ отъ дре́ва.

Еди́наго рачи́теля Христа́* добро́ту взыска́вши,* добро́ты мíра ми́мо текла́ еси́,* къ присноживы́мъ же исто́чникомъ* потща́лася еси́ свята́го креще́нія,* и, си́хъ напо́лншися,* жа́ждею страда́нія* а́біе распали́лася еси́.* Тѣ́мже, зѣло́ въ разжже́нъ сосу́дъ* вше́дши усе́рдно,* конца́ боже́ственнаго* сподо́билася еси́.

Невѣ́ста избра́нна и чиста́,* отъ Неискусому́жныя Рожде́нному* невѣ́ста была́ еси́,* пе́рвѣе вре́меннаго жениха́, сла́вная,* ума́ пра́востію твое́ю возгнуша́вшися* и земны́я обагре́ныя оде́жды:* тѣ́мже вѣ́чнующую сла́ву* и одѣя́ніе нетлѣ́нія,* му́ченице Пелагíе,* ны́нѣ воспрія́ла еси́.

Сла́ва, и ны́нѣ, пра́здника.

Тропа́рь, гла́съ 4:

Агница Твоя́, Іису́се, Пелагíя, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша.


[НА УТРЕНИ,]
Кано́нъ, его́же краегране́сіе: Пелагíи хвалу́ и́стинно плету́. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Пучи́ну твои́хъ чуде́съ пла́вающу, хла́дъ духо́вный ны́нѣ ми́ пода́ждь, му́ченице Христо́ва Пелагíе прехва́льная, и ко приста́нищу благоути́шному твои́хъ похвале́ній наста́ви.

Отъ младе́нства проразумѣ́нно Зажди́телю твоему́ возложи́вшися, честна́я, тлѣ́нныхъ отве́ргла еси́ любо́вь, Пелагíе всесла́вная, му́жески же стра́сти боже́ственною си́лою попра́ла еси́.

Ба́ни боже́ственныя жела́ющи, сла́вная, прія́ти креще́нія, святи́теля обрѣ́тши Христо́ва, Пелагíе, притекла́ еси́ и, приобщи́вшися, свѣ́та боже́ственнаго, му́ченице, испо́лнилася еси́.

Богоро́диченъ: Святы́хъ святѣ́йши была́ еси́, Дѣ́во Чи́стая, святы́хъ Свята́го Христа́ на руку́ носи́вши, боже́ственными си́лами всю́ тва́рь содержа́щаго.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Якоже земля́ блага́, пріе́мши слове́сная сѣ́мена, му́ченице Христо́ва всему́драя, сія́ бога́тно израсти́ла еси́. [Два́жды.]

Упра́вилася еси́, я́ко избра́нна, ко Влады́цѣ и Бо́гу тща́щися, му́ченице Христо́ва сла́вная, боже́ственными укрѣпля́ема уче́ніи.

Богоро́диченъ: Возста́вила еси́, о Чи́стая, па́дшій мо́й о́бразъ, ро́ждши я́вѣ Вино́внаго па́че есте́ственнаго воскресе́нія.

Конда́къ святы́я, гла́съ 3. Подо́бенъ: Дѣ́ва дне́сь.

Вре́менная презрѣ́вши и небе́сныхъ бла́гъ прича́стница бы́вши, вѣне́цъ страда́нія ра́ди пріи́мши, Пелагíе всечестна́я, я́ко да́ръ принесла́ еси́ кро́вныя пото́ки Влады́цѣ Христу́. Моли́ отъ бѣ́дъ изба́вити на́съ, твою́ па́мять почита́ющихъ.

Та́же, сѣда́ленъ, гла́съ 1. Подо́бенъ: Гро́бъ Тво́й, Спа́се.

Любо́вію Христо́вою ду́шу распа́льши, вошла́ еси́ му́жески въ зѣло́ разжже́нный, богому́драя, коно́бъ, Пелагíе, и была́ еси́ Влады́цѣ твоему́ благово́нная же́ртва. Тѣ́мже дне́сь, всесвяту́ю твою́ па́мять творя́ще, воспѣва́емъ тя́.

Сла́ва, и ны́нѣ, пра́здника.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Влады́чнею багряни́цею одѣ́яна, ба́нею, пресла́вная, пакибытія́ всея́ жите́йскія кра́сныя багряни́цы совлекла́ся еси́, му́ченице Пелагíе всечестна́я.

Жела́ніемъ небе́сныхъ красо́тъ, я́же на земли́ омрачи́вши жела́ніе, страстоно́сице, тѣ́мже окрили́лася еси́, Христу́ вопію́щи и глаго́лющи: сла́ва си́лѣ Твое́й, Го́споди.

Оскверне́нную вѣ́ру оста́вльши, ко Христу́ притекла́ еси́ му́дрѣ, Пелагíе му́ченице всесла́вная, и́дольскую попра́вши вся́ку пре́лесть, богопрія́тная.

Богоро́диченъ: Неискусобра́чно родила́ еси́, о Дѣ́во, и по рождествѣ́ яви́лася еси́, дѣ́вствующи па́ки. Тѣ́мже немо́лчными гла́сы, — ра́дуйся, Влады́чице, — Тебѣ́ вѣ́рою несумнѣ́нною взыва́емъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Возмогла́ еси́ вра́жіе разруши́ти свирѣ́пство, прехва́льная Пелагíе, кресто́мъ Влады́чнимъ укрѣ́пльшися и благода́тію. [Два́жды.]

Ны́нѣ ра́дуешися вои́стинну, сочета́вшися Жениху́ твоему́, пресвѣ́тлая, муче́ніемъ, твоего́ дѣ́вства свѣщу́ иму́щи.

Богоро́диченъ: Госпо́дь въ Тя́, Богома́ти, всели́ся, человѣ́ка назида́я, въ тлѣ́ніе па́дшаго пре́лестію зміи́ною.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Зако́нно Христу́ уневѣ́стившися, сконча́ла еси́ муче́нія тече́ніе и, призыва́ющи твоего́ Жениха́, въ приста́нище ти́хое Сего́ утверди́лася еси́. [Два́жды.]

Изплете́ся твоему́ верху́ прекра́сенъ вѣне́цъ пра́вды, богому́драя Пелагíе, му́ченице вѣнцено́сице, вѣ́ру бо да́же до конца́ соблюла́ еси́ безпоро́чно.

Богоро́диченъ: Ядъ пе́рвѣе во у́ши Евы излія́ стропо́тный змíй; Ты́ же сего́ еди́на оттрясла́ еси́, Богома́ти, Губи́теля тому́ ро́ждши.

Конда́къ и и́косъ пра́здника.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Пе́щнымъ о́бразомъ, сокрове́ннымъ, му́ченице, орга́номъ, боже́ственною распала́ема любо́вію Христо́вою, терпя́щи, взыва́ла еси́: благослове́нъ еси́ въ хра́мѣ сла́вы Твоея́, Го́споди. [Два́жды.]

Одѣва́яй не́бо о́блаки, сла́вная му́ченице, обнаже́ну су́щу боже́ственныя оде́жды, просвѣти́ тя́, пою́щую: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Вы́шняго освяще́нное боже́ственное селе́ніе, ра́дуйся, Тобо́ю бо даде́ся ра́дость, Богоро́дице, зову́щимъ: благослове́на Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Яко му́ченица, я́ко зѣло́ нело́жна Христо́ва, прехва́льная, Сего́ си́лу богосло́вила еси́, всѣ́хъ богому́дренно науча́ющи, и къ благоче́стію лю́ди привлекла́ еси́, пою́щія: благослови́те, вся́ дѣла́ Госпо́дня, Го́спода. [Два́жды.]

Явѣ уневѣ́стившися Христу́, мучи́теля стремле́ніе все́ погаси́ла еси́, прему́дрости пучи́ну источа́ющи, Пелагíе всечестна́я, и вѣнцы́ треми́, му́ченице, украси́лася еси́, пою́щи: благослови́те, вся́ дѣла́ Госпо́дня, Го́спода.

Богоро́диченъ: Изъ Отца́ Безнача́льнаго, Сы́на, и Ду́ха Свята́го исповѣ́дуемъ, вѣ́рніи, изъ Тебе́, Всенепоро́чная, глаго́люще воплоти́тися Собезнача́льное, Единоро́дное Сло́во Отцу́ и Боже́ственному Ду́ху, и вопіе́мъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Сло́во изрещи́ не мо́жетъ твои́хъ похва́лъ, Пелагíе, пучи́ну бо чуде́съ источа́еши твоего́ Жениха́ си́лою и благода́тію, Его́же ны́нѣ моли́ вся́ спасти́, пою́щія тя́.

Ста́вши на суди́щи, невѣ́сто, вѣнцено́сице Пелагíе, жела́нію кра́йнему сподо́билася еси́, му́ченице, предста́ти и пи́щу воспрія́ла еси́ вѣ́чнаго наслажде́нія.

Мíру ми́ръ пода́ти твоего́ Жениха́ умоли́, му́ченице Пелагíе богому́драя, Це́рковь сохрани́ти отъ напа́стей и благода́тію тя́ пою́щія озари́ти.

Богоро́диченъ: Яви́лася еси́ Дѣ́ва и Ма́ти, па́че естества́, Богороди́тельнице, Сло́во, заче́ншая Отчее, воплоще́нно Сіе́ ро́ждши, Имже ны́нѣ спаса́еми, Тя́, Богоро́дице, велича́емъ.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 29 об. – 32.

/ Къ оглавленію раздѣла /


Наверхъ / Къ титульной страницѣ

0