Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 18 ноября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 3-й де́нь.
Святы́хъ му́ченикъ Тимоѳе́я и Ма́вры.

[ВЕЧЕРЪ,]
Стихи́ры святы́хъ му́чениковъ, гла́съ 4. Подо́бенъ: Яко до́бля.

Вяза́нія тѣле́сная,* оче́съ же избоде́ніе,* провертѣ́ніе уше́съ,* коле́сное озлобле́ніе,* ка́мене тя́жкаго обѣ́шеніе* подъя́лъ еси́, Тимоѳе́е,* низло́жь врага́* и къ боже́ственнѣй сла́вѣ возноси́мь, сла́вне.* Сего́ ра́ди тя́, вѣ́рою соше́дшеся, моле́бно восхваля́емъ,* сла́ва му́чениковъ и похвала́.

Свѣтолу́чными сія́ньми* врага́ омрачи́ла еси́,* чи́сто пострада́вши, Ма́вро сла́вная:* коно́бная бо врѣ́нія,* пе́рстовъ отъя́тіе,* свѣ́щное жже́ніе,* вре́менное пропя́тіе претерпѣ́ла еси́* и прешла́ еси́ къ боже́ственному поко́ю,* идѣ́же ли́къ му́ченикъ всегда́ весели́тся.

Сла́ва, и ны́нѣ, пра́здника.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости; тѣ́хъ моли́твами спаси́ ду́ши на́ша.


[НА УТРЕНИ,]
Кано́нъ, его́же краегране́сіе: Тимоѳе́я и Ма́вры болѣ́зни честву́ю. Творе́ніе Іо́сифово, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Свяще́нныхъ страда́лецъ свяще́нное и честно́е торжество́, лю́діе свяще́нніи, свяще́нно почти́мъ, я́ко да тѣ́хъ мольба́ми отъ бѣ́дъ изба́вимся.

Священнопобѣ́дныя вѣнцы́ отъ Христа́ прія́ти тща́щеся умре́ти па́че, не́же жи́ти, до́бліи му́ченицы, я́вѣ изво́ливше, тѣ́мъ сла́ву получи́ша.

Не убоя́вшеся болѣ́зней плотски́хъ, ни му́къ устраши́вшеся, ни огня́ гони́телей, страстоте́рпцы му́ченицы, Христа́ на суди́щи му́жески проповѣ́дасте.

Богоро́диченъ: Пресу́щное Сло́во, существо́ пріе́мъ отъ чи́стыхъ крове́й Твои́хъ, богосодѣ́ла на́съ и тлѣ́нія изба́ви, Чи́стая, сего́ ра́ди, вѣ́рніи, Тя́ всегда́ сла́вимъ.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Бо́жія кни́ги лю́демъ свяще́нно отверза́я и просвѣща́я сердца́, во́ине Христо́въ Тимоѳе́е, въ честно́е муче́ніе, ра́дуяся, вше́лъ еси́.

Боже́ственнымъ жела́ніемъ ду́шу распали́въ, му́чениче, ко огню́ му́къ приступи́лъ еси́ терпѣли́вно, тѣ́мже тя́ Христо́ва боже́ственная роса́, блаже́нне, прохлади́.

Умъ тво́й, воззрѣ́ніемъ къ Бо́гу просвѣща́емь, му́чениче, не чу́яше отню́дъ желѣ́зъ лю́тыхъ прикоснове́нія, разжже́нныхъ быва́ющихъ, сла́вне Тимоѳе́е.

Богоро́диченъ: Сы́й естество́мъ безстра́стенъ Сы́нъ Тво́й, Дѣ́во, прія́тъ пло́ть отъ крове́й Твои́хъ чи́стыхъ и стра́стію кре́стною отъ страсте́й мя́, Чи́стая, изба́ви.

Конда́къ, гла́съ 4. Подо́бенъ: Вознесы́йся.

Многообра́зныя я́звы претерпѣ́вше и вѣнцы́ отъ Бо́га пріе́мше, о на́съ моли́теся ко Го́споду, па́мять всесвяще́нную ва́шу соверша́ющихъ, превели́кій Тимоѳе́е и пресла́вная Ма́вро, е́же умири́ти гра́дъ и лю́ди, То́й бо е́сть вѣ́рныхъ утвержде́ніе.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Поче́тше Бо́га, омрачи́ша пре́лесть Тимоѳе́й му́дрый и сла́вная Ма́вра и, вся́ко претерпѣ́вше, прехва́льніи, муче́ніе, просвѣти́шася па́че лу́чъ со́лнечныхъ и бы́ша сослужи́тели а́нгеломъ, и́хже вѣ́рою сла́вимъ.

Сла́ва, и ны́нѣ, пра́здника.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Вели́каго благосла́вія возжелѣ́вше, сподо́бистеся сего́, ча́да Свѣ́та Боже́ственнаго бы́вше, великому́ченицы Христо́вы, а́нгеломъ равностоя́тели.

Святы́хъ чино́мъ сочета́вся и благопослушли́вѣ у́ши къ Боже́ственнымъ зако́номъ имѣ́я, сла́вне, провертѣ́нія крѣ́пко претерпѣ́лъ еси́, Тимоѳе́е.

Воздви́гше тя́ на дре́во, суему́дренніи отягчава́ютъ ка́меніемъ главу́, сла́вне Тимоѳе́е, но укрѣпля́ше тя́ Христо́съ, боже́ственною стра́стію украша́ема.

Теку́щихъ непостоя́ннаго, блаже́нніи, возгнуша́стеся вои́стинну тече́нія и са́ми себе́ болѣ́знемъ отда́сте, сего́ ра́ди я́же отъ вѣ́ка блага́я воспрія́сте.

Богоро́диченъ: Чистоты́ селе́ніе, жили́ще Влады́ки всѣ́хъ и проро́ковъ всѣ́хъ сбытіе́, Богора́дованная Чи́стая, пою́щія Тя́ уще́дри.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Супру́жника своего́, Ма́вро, свѣтови́дныхъ слове́съ послу́ша любе́зно и, омраче́ніе зло́е отве́ргши, свѣ́тъ была́ еси́ муче́ніемъ, богоблаже́нная.

Боже́ственнымъ Ду́хомъ себе́, Ма́вро, вооружи́вши, честна́я, къ боре́нію льсти́ваго, ра́дуяся, изошла́ еси́ и, сего́ побѣ́ждши, побѣ́дныя вѣнцы́, му́ченице, прія́ла еси́.

Еди́наго Тя́, Го́спода Іису́са, исповѣ́давши честна́я, руко́ю человѣ́ка созда́вшаго, посѣка́ется пе́рстъ ручны́хъ, непра́ведное томле́ніе му́жески терпя́щи.

Богоро́диченъ: Бу́рю помышле́ній, воста́нія страсте́й, напа́стей волне́ніе ути́ши, Дѣ́во Богора́дованная, и спаси́ мя, пою́ща вели́чія Твоя́.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Святíи му́ченицы, я́дриломъ Креста́ духо́вно окриля́еми, напа́стей пучи́ну безъ вре́да вѣ́рою претеко́сте и въ боже́ственныхъ приста́нищахъ почи́ша.

Разже́гше коно́бъ, въ то́й тя́, Христа́ исповѣ́дающу, вверго́ша злочести́віи, но пребыла́ еси́ неврежде́на, росо́ю Ду́ха обрѣ́тше тя́, Ма́вро, прохлажде́ну.

Связа́еми му́ченицы вся́ вяза́нія вра́жія му́жески разрѣши́сте и любо́вію до конца́ Христу́ ду́ши привяза́сте, пло́ти отложе́ніемъ, всеприснопа́мятніи.

Богоро́диченъ: Всеблага́я Влады́чице, Яже Преблага́го Бо́га пло́тію ро́ждши, озло́бленное страстьми́ мое́ се́рдце ублажи́, да вѣ́рою и любо́вію велича́ю Тя́.

Конда́къ и и́косъ пра́здника.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Не чу́яше, свѣща́ми, пресла́вная, опаля́ема всю́ду, о́гнь въ се́рдцы любве́ нося́щи Христо́въ и Сему́ вопію́щи прилѣ́жно: благослове́нъ еси́, Бо́же оте́цъ на́шихъ.

Дрема́ніе отъ о́чію отри́нулъ зло́бное, о Тимоѳе́е! претерпѣ́лъ еси́ о́чію ослѣпле́ніе, Христа́ серде́чныма очи́ма зря́ и поя́: благослове́нъ еси́, Бо́же оте́цъ на́шихъ.

До́льняя презрѣ́вше, боже́ственніи му́ченицы, вы́шнее же жили́ще наслѣ́доваша, свяще́нными да почту́тся пѣ́сньми, пою́ще непреста́нно съ на́ми: благослове́нъ еси́, Бо́же оте́цъ на́шихъ.

Богоро́диченъ: Препѣ́тая Дѣ́во, препѣ́таго Бо́га поро́ждшая, пою́щія Тя́ прича́стники покажи́ свѣ́та и изба́ви гее́нны, и огня́, и вся́каго вре́да вра́жія моли́твами Твои́ми.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Соблюда́юще зако́ны Вседержи́теля, беззако́ннующихъ держа́вѣ не приклони́стеся, че́сти лука́вымъ де́мономъ не принесо́сте, му́ченицы до́бліи, Госпо́дни наслѣ́дницы.

Сопряже́ніемъ изря́днымъ я́вѣ совокупля́еми, и́го Госпо́дне ле́гкое взя́сте ку́пно на вы́ю, му́ченицы, и му́ченическимъ сопричто́стеся стадо́мъ.

На дре́вѣ пострада́вше кре́стнѣмъ, прехва́льніи, на мно́ги дни́, изобрази́сте стра́сть честну́ю, на́съ ра́ди Пострада́вшаго во́лею, Его́же превозно́симъ во вся́ вѣ́ки.

Ну́жднѣйшую вои́стинну сме́рть, святíи, просте́ртіемъ болѣ́зни претерпѣ́сте, тѣ́мже къ неболѣ́зненнѣй жи́зни преста́вистеся, воспѣва́юще Христа́ во вся́ вѣ́ки.

Богоро́диченъ: Украси́лася еси́, Дѣ́во, поро́ждши прекра́снаго добро́тою Христа́ Го́спода, боже́ственными вѣ́рныя заря́ми просвѣща́ющаго, Его́же превозно́симъ во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Ви́дѣти сла́ву сподо́бистеся Себе́ Излія́вшаго за милосе́рдіе, прехва́льніи, Того́ бо зако́ны сохрани́сте и о́бщницы Сего́ страсте́й бы́сте. Тѣ́мже, соше́дшеся, благоче́стно ва́съ почита́емъ.

Часо́мъ равночи́сленну мѣ́ру сотвори́сте, му́дріи, но́щи и дни́ пригвожде́ни е́же за милосе́рдіе ко Христу́ прибли́жшагося, Его́же исповѣ́дающе, всѣ́ми влады́чествующаго, въ ру́цѣ Сего́ ва́ша ду́хи преда́сте.

Во́инство а́нгелъ, ли́къ блаже́нный проро́къ, апо́столъ, му́ченикъ и преподо́бныхъ во исхо́дъ ва́шъ собра́шася, всѣ́хъ же Влады́ка вѣнцы́ увязе́, му́ченицы, ва́съ побѣ́дными, я́ко Преблагíй.

На́мъ, любо́вію ва́съ почита́ющимъ и честно́е ва́ше соверша́ющимъ торжество́, страда́льцы Христо́вы до́бліи, разрѣше́ніе грѣхо́въ, житія́ исправле́ніе и всѣ́хъ лю́тыхъ премѣне́ніе, му́дріи, испроси́те.

Богоро́диченъ: Свѣ́томъ Твои́мъ мя́, Богора́дованная, въ жена́хъ Дѣ́во, просвѣти́, молю́ся, и огня́ вѣ́чнаго мя́ изба́ви, я́ко да велича́ю Тя́, я́ко да сла́влю Тя́, я́ко да по до́лгу воспою́ вели́чія Твоя́.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 16 – 19.

/ Къ оглавленію раздѣла /


Наверхъ / Къ титульной страницѣ

0