Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 3-й де́нь.
Слу́жба преподо́бнаго отца́ на́шего Ѳеодо́сія, игу́мена монастыря́ Пече́рскаго, и́же въ Кíевѣ, и нача́льника въ Россíйстѣй земли́ мона́шескаго о́бщаго житія́.

НА МАЛѢЙ ВЕЧЕРНИ,
Стихи́ры, гла́съ 1. Подо́бенъ: Небе́сныхъ чино́въ.

Непоро́чнаго и честнѣ́йшаго, превысо́каго столпа́* и непобѣди́маго хитростьми́ вра́жіими,* вси́ ублажа́емъ и вѣ́рно восхваля́емъ* Ѳеодо́сія вели́каго,* уго́дника Христо́ва бы́вшаго и Пречи́стыя Его́ Ма́тере* и сего́ прилѣ́жно моля́ща* спасти́ отъ бѣ́дъ ду́ши на́ша.

Мона́шеское житіе́ ты́ уясни́лъ еси́,* отъ земли́ Россíйскія возсія́въ, я́коже со́лнце,* воздержа́ніемъ бо тѣ́ло твое́ огра́ждь,* страстна́я движе́нія умертви́лъ еси́ моли́твами и бдѣ́ніи.* Тѣ́мъ тя́ мо́лимъ, Ѳеодо́сіе преблаже́нне:* не оскудѣва́й, помога́я на́мъ* и присѣща́я рабы́ твоя́.

Сла́ва, гла́съ 6:

Пріиди́те, вѣ́рныхъ сосло́віе, ве́село дне́сь, пріиди́те вси́ ра́достно въ честну́ю це́рковь, богоно́сныхъ оте́цъ воспое́мъ и рука́ми воспле́щемъ въ пресвѣ́тлой и́хъ па́мяти, и́хже просла́ви Христо́съ, Бо́гъ на́шъ. Тѣ́мъ во гла́сѣ ра́дости и чи́стѣй со́вѣсти возопіе́мъ, глаго́люще: ра́дуйся, земны́й а́нгеле и небе́сный человѣ́че, Анто́ніе преблаже́нне, преподо́бныхъ ссе́льниче; ра́дуйся, восто́чная звѣздо́ златоза́рная, Ѳеодо́сіе о́тче, мона́шествующихъ свѣти́ло и па́стырю. Ра́дуйтеся, на́ша похвало́, вселе́нныя ра́дованіе и помо́щницы, со а́нгелы водворя́ющеся во свѣ́тѣ Святы́я Тро́ицы, ва́съ вѣнча́вшія. Прилѣ́жно моли́те изба́вити на́съ отъ вра́гъ ви́димыхъ и неви́димыхъ и отъ вся́кія бѣды́, вѣ́рою и любо́вію творя́щихъ всепра́зднственную па́мять ва́шу.

И ны́нѣ, пра́здника.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Утро и де́нь свѣ́телъ* тво́й пра́здникъ яви́ся,* просвѣща́я на́ша сердца́,* вѣ́рою хва́лящихъ* честны́я по́двиги твоя́,* о́тче Ѳеодо́сіе.

Сти́хъ: Честна́ предъ Го́сподемъ* сме́рть преподо́бныхъ Его́.

Яви́ся де́нь спасе́нія* и пра́здникъ весе́лія,* стеце́мся, вѣ́рніи,* очи́стивше ду́ши,* воспѣ́ти преблаже́ннаго Ѳеодо́сія.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Яко со́лнце,* на земли́ Анто́нія обрѣ́тъ,* сія́юща добродѣ́тельми,* свѣтлѣ́йшая показа́лся еси́ звѣзда́,* тя́ пою́щія ко Влады́цѣ помяни́,* преподо́бне Ѳеодо́сіе.

Сла́ва, и ны́нѣ, богоро́диченъ:

Ра́дуйся, Яже ра́дость* мíру пріе́мшая,* Христа́ Жизнода́вца,* и утоли́вшаго, Дѣ́во,* печа́ль прама́тернюю.

Тропа́рь, гла́съ 8:

Возвы́сився на добродѣ́тель, измла́да возлюби́въ мона́шеское житіе́, къ жела́нію до́блественнѣ дости́гъ, всели́лся еси́ въ пеще́ру и, украси́въ житіе́ твое́ поще́ніемъ и свѣ́тлостію, въ моли́твахъ, я́ко безпло́тенъ, пребыва́лъ еси́, въ Россíйстѣй земли́, я́ко свѣ́тлое свѣти́ло, просія́въ, о́тче Ѳеодо́сіе, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, пра́здника.



НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ, 1-й антифо́нъ. На Го́споди воззва́хъ: стихи́ры, гла́съ 5. Подо́бенъ: Преподо́бне о́тче.

Преподо́бне о́тче богоно́се Ѳеодо́сіе,* вельми́ подвиза́вся во вре́меннѣй жи́зни* пѣ́сньми, посто́мъ и бдѣ́ніемъ,* о́бразъ бы́лъ еси́ твои́мъ ученико́мъ* и ны́нѣ у́бо лику́еши со безпло́тными,* Христа́ непреста́нно славосло́вя,* отъ Бо́га Бо́жіе Сло́во и Изба́вителя,* прекло́ншаго главу́ на Крестѣ́* и изба́вивша ле́сти ро́дъ человѣ́чь.* Того́ моли́, Тому́ помоли́ся, преподо́бне,* дарова́ти вселе́ннѣй ми́ръ и ве́лію ми́лость.

Преподо́бне о́тче богоно́се Ѳеодо́сіе,* вои́стинну сподо́бился еси́ боже́ственныя жи́зни,* чистото́ю и поще́ніемъ сію́ обрѣ́тъ,* жи́въ бо преста́вился еси́ на и́стинный живо́тъ, всѣ́хъ отре́кся,* со безпло́тными Христа́ непреста́нно славосло́вя,* отъ Дѣ́вы неизрече́нно пло́ть пріе́мша,* испрове́ргшаго а́дъ и воскреси́вшаго ме́ртвыя, я́же отъ вѣ́ка.* Того́ моли́, Тому́ помоли́ся, преподо́бне,* дарова́ти вселе́ннѣй ми́ръ и ве́лію ми́лость.

Преподо́бне о́тче богоно́се Ѳеодо́сіе,* обрѣ́лъ, я́коже возлюби́лъ еси́, чи́стую твою́ ду́шу,* благода́ть бо Всесвята́го Ду́ха въ тебѣ́ всели́ся,* я́ко пречи́стъ свѣ́тъ,* Его́же поспѣше́ніемъ свѣ́тло озаре́нъ,* Христа́ непреста́нно славосло́вилъ еси́,* во двою́ существу́ еди́наго Бо́га,* пострада́вшаго пло́тію на Крестѣ́* и Божество́мъ безстра́стна пребы́вша.* Того́ моли́, Тому́ помоли́ся, преподо́бне,* дарова́ти вселе́ннѣй ми́ръ и ве́лію ми́лость.

Сла́ва, гла́съ 8:

Пріиди́те, стеце́мся вси́ къ боже́ственнѣй па́мяти отца́ на́шего Ѳеодо́сія: то́й бо, отъ ю́ности зва́ніе свы́ше пріе́мь, отъ іере́я Богода́нный да́ръ именова́ся. Тѣ́мже христолюби́вымъ князе́мъ учи́тель пра́выя вѣ́ры, вельмо́жамъ тве́рдое защище́ніе, си́рымъ оте́цъ милосе́рдъ, вдови́цамъ те́плое заступле́ніе, скорбя́щимъ утѣше́ніе, ни́щимъ сокро́вище, мона́шескому ли́ку лѣ́ствица, возводя́щая на высоту́ небе́сную, и про́сто къ нему́ притека́ющимъ исто́чникъ приснотеку́щія воды́ бы́въ, мо́литъ непреста́нно спасти́ся душа́мъ на́шимъ.

И ны́нѣ, пра́здника.
Вхо́дъ. Проки́менъ дне́, и чте́нія три́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1:

Пріиди́те, празднолю́бцы дне́сь, ли́къ совокупи́вше, благоче́стно торжеству́емъ вели́каго отца́, всемíрнаго свѣти́льника, пресла́вную и честну́ю па́мять и сла́вно почти́мъ, глаго́люще: ра́дуйся, Ѳеодо́сіе, преподо́бныхъ и пра́ведныхъ единокро́вниче; ра́дуйся, честны́хъ оте́цъ пресвѣ́тлый по́лкъ совокупи́вый; ра́дуйся, служи́телю и строи́телю вѣ́рный оби́тели Бо́жія Ма́тере; Ейже изря́дный соста́вилъ еси́ хра́мъ во сла́ву Бо́жію, въ не́мже пою́ще, мо́лимъ тя́: моли́ изба́вити на́съ отъ вся́каго искуше́нія, и бѣ́дъ, и ва́рварскаго наше́ствія и спасти́ ду́ши на́ша.

Гла́съ 2:

Учениче́ Спа́совъ, о́тче богому́дре Ѳеодо́сіе, богодви́жимая цѣвни́це, богосказа́нная уста́, духо́вный воево́до, па́стырю до́брый, преподо́бныхъ похвало́. Ты́ Бо́га взыска́лъ еси́ и Сего́ просвѣти́лся еси́ боголу́чными сія́ньми, Бо́гу бесѣ́довалъ еси́ непреста́нными очище́ніи и сія́ніи, сле́зными исто́чники просвѣти́въ мы́сли, сто́лпъ всесвѣ́телъ и огнесія́ненъ яви́лся еси́, всеблаже́нне, мона́ховъ похвала́, отце́въ сла́ва и Тро́ицы служи́тель, и ны́нѣ на́съ всѣ́хъ сохрани́ хода́тайствомъ твои́мъ.

Преподо́бне о́тче Ѳеодо́сіе, ты́ уще́дрилъ еси́ та́ющихъ въ жа́ждѣ зно́я, возме́здилъ еси́ боголѣ́пно, зна́меньми нача́льствуя, я́ко служи́тель изря́денъ твоему́ Влады́цѣ подо́бяся. Вино́ умно́жилъ еси́, и пра́здны жи́тницы повелѣ́ніемъ твои́мъ муки́ напо́лнилъ еси́, и сосу́дъ оскудѣ́вшій ме́ду изоби́ловати сотвори́лъ еси́. Неявле́нная увѣ́давъ, Це́рковь уясни́лъ еси́, му́ченически показа́въ страда́нія, исцѣле́ній мно́жества пода́лъ еси́, ни́щихъ возлюби́лъ еси́, человѣ́ки уще́дривъ обы́чаи твои́ми, и твое́ чре́во хлѣ́бомъ и водо́ю утѣсни́лъ еси́, въ пло́ти житію́ безпло́тныхъ подо́бяся. Ихже ра́ди сла́ву приноша́емъ ти́, моля́щеся: не оста́ви на́съ, сохраня́я рабы́ твоя́ моли́твами твои́ми.

Свѣти́ла возсія́сте въ Россíи два́ свѣтлѣ́йшая, Анто́ніе и Ѳеодо́сіе: о́въ бо боже́ственнымъ сло́вомъ небе́сную ро́су испусти́ на зе́млю, и о́гнь съ небесе́ сведе́, и бу́дущая я́сно проповѣ́да, Тро́ическую благода́ть пріе́мъ; о́въ же съ небесе́ до́ждь испусти́, и кня́зя обличи́ о братоненавидѣ́ніи и властолю́біи непра́веднѣмъ, и Го́спода самоли́чно ви́дѣ, и на возду́сѣ, я́ко Илія́, во свѣ́тѣ пла́меннѣ, надъ монастыре́мъ ви́дѣнъ бы́сть, ру́цѣ воздѣва́я и моли́твы творя́й къ Бо́гу. И ны́нѣ, со а́нгелы ликовству́юще, о на́съ мо́лятъ, съ ни́ми сподо́битися свѣ́та и́стиннаго и спасти́ ду́ши на́ша.

Сла́ва, гла́съ 6:

Еже по о́бразу соблю́дъ невреди́мо, у́мъ влады́ку на стра́сти па́губныя по́стнически поста́вивъ, во е́же по подо́бію, я́ко мо́щно возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему и пло́ть порабо́тити ду́ху. Тѣ́мже мона́шествующихъ яви́лся еси́ ве́рхъ, жи́тель пусты́нный, благотеку́щихъ обучи́тель, пра́вило добродѣ́тели извѣ́стнѣйшее. И ны́нѣ на небесѣ́хъ зерца́ломъ разрѣ́шшимся, о́тче на́шъ Ѳеодо́сіе, чи́стѣ зри́ши Святу́ю Тро́ицу, моля́ся несре́дственнѣ о и́же вѣ́рою и любо́вію чту́щихъ тя́.

И ны́нѣ, пра́здника.

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

Отче богому́дре Ѳеодо́сіе,* ты́, отъ утро́бы Бо́гу* прибли́живъ тво́й смы́слъ,* весьма́ прилѣжа́лъ еси́ Царю́ Вседержи́телю,* плоды́ досто́йны принося́ Ему́* отъ твои́хъ по́двигъ, преподо́бне,* соукраша́емь добродѣ́тельными вѣнцы́,* тѣ́мъ благи́хъ обрѣ́лъ еси́ воспрія́тіе, досточу́дне.

Сти́хъ: Честна́ предъ Го́сподемъ* сме́рть преподо́бныхъ Его́.

Ты́ мона́шествующихъ наказа́тель* и Россíйскія земли́ звѣзда́ пресвѣ́тлая,* осія́ющи чудесы́ всю́ страну́ сію́,* тя́ бо Бо́гъ пре́жде избра́ отъ ю́ности, о́тче,* па́стыря овца́мъ слове́снымъ.* Тѣ́мже преподо́бныхъ ли́къ тя́ воспрія́тъ,* съ ни́миже моли́, мо́лимся,* ста́ду твоему́ грѣхо́въ оставле́ніе дарова́ти.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Ра́дуйся, Дѣ́во Препѣ́тая,* я́же столпо́мъ о́гненнымъ* па́жить показа́вши,* идѣ́же па́ствитися хотя́ше боже́ственное ста́до,* и це́рковь ту́ а́біе воздви́же Ѳеодо́сій,* преукра́шену Тебѣ́ и всечу́дну,* въ не́йже вси́ вѣ́рніи пра́зднуемъ успе́ніе Твое́,* Богоро́дице Пречи́стая,* о́крестъ ра́ки стоя́ще* Твоего́ уго́дника.

Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Ѳеодо́сіе, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ и вра́жію обличи́вый си́лу, а́нгеловъ собесѣ́дниче, преподо́бныхъ соприча́стниче и пра́ведныхъ. Съ ни́ми же моли́ся Го́сподеви, поми́ловатися душа́мъ на́шимъ.

И ны́нѣ, пра́здника.

На благослове́ніи хлѣ́бовъ: Тропа́рь свята́го, два́жды. Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: тропа́рь пра́здника, два́жды. Сла́ва, тропа́рь свята́го. И ны́нѣ, пра́здника.

По 1-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Зва́нію Го́спода твоего́ послѣ́довалъ еси́, мíръ оста́вль и вся́ мíра кра́сная, преблаже́нне Ѳеодо́сіе, претерпѣ́лъ еси́ тѣле́сное озлобле́ніе, въ пеще́рѣ, въ мѣ́стѣ ско́рбнѣ и тѣ́снѣ, укрѣ́плься усе́рдно, и полки́ бѣсо́въ прогна́лъ еси́ му́жески. Тѣ́мже твою́ па́мять при́сно пѣ́сньми похва́лимъ вѣ́рно. [Два́жды.]

Сла́ва, и ны́нѣ, пра́здника.

По 2-й стихоло́гіи сѣда́ленъ, гла́съ 8. Подо́бенъ: Прему́дрости.

Сле́зными тече́ньми твою́ ду́шу напои́въ бога́тно, о́тче му́дре, многопло́денъ добродѣ́телей твои́хъ пожа́лъ еси́ кла́съ и, па́стырь овца́мъ, преподо́бне, бы́въ, въ зла́цѣ си́хъ воздержа́нія воспита́лъ еси́. Тѣ́мже, разрѣ́шся отъ житія́ сла́вно, оте́ческимъ лико́мъ сочта́лся еси́, Ѳеодо́сіе. Сего́ ра́ди вопіе́мъ ти́: моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника.

По поліеле́и сѣда́ленъ, гла́съ 8. Подо́бенъ: Прему́дрости.

Отъ утро́бы освяще́нъ бы́въ я́ко вои́стинну, Ѳеодо́сіе блаже́нне, на земли́, я́ко а́нгелъ, пожи́лъ еси́: пло́ть бо умертви́въ, Анто́нія, и́же въ пеще́рѣ, житію́ досто́йно поревнова́въ, Тро́ицы уго́дникъ показа́лся еси́, блаже́нне. Тѣ́мже и къ ре́вности боже́ственнаго твоего́ житія́ ли́ки совокупи́лъ еси́ мона́шествующихъ, сла́вне, богоно́се о́тче на́шъ, моли́ Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе Луки́, зача́ло 24.

По 50-мъ псалмѣ́ стихи́ра, гла́съ 8:

На не́бо теку́щее возше́дъ, сѣдѣ́ніе боже́ственно, добродѣ́тельми, доше́лъ еси́ ко кра́йнему гра́ду поще́ніемъ, отъ земли́ исходя́й на го́рняя Іерусали́ма прекра́сная, и отъ болѣ́зней и подвиго́въ досто́йно че́сть пріе́мля, и съ небе́сными ра́дуешися чинонача́ліи, преблаже́нне, вѣ́чныхъ бла́гъ наслѣ́дникъ и Ца́рствію жи́тель бы́въ. Но моли́ся, богоно́се Ѳеодо́сіе, Спа́су всѣ́хъ, умири́ти мíръ и спасти́ ду́ши на́ша.

Кано́нъ пра́здника, со ирмосо́мъ на6, и свята́го два́ кано́на на 8.

[Кано́нъ пе́рвый], гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Богоуго́дный по́двигъ стяжа́въ, о́тче Ѳеодо́сіе, богови́децъ яви́лся еси́. Тѣ́мже моли́ся Бо́гу, Ему́же угоди́лъ еси́, отгна́ти мра́къ невѣ́дѣнія моего́, сло́во же блаже́нное вдохну́ти, воспѣ́ти тя́.

Отъ ма́терня чре́ва прилѣпи́лся еси́ Бо́гу, преподо́бне, я́ко прему́дрый Па́велъ и проро́къ же дре́вле Іеремíя. Тѣ́мже тя́ Боже́ственная благода́ть устна́ми, Ѳеодо́сіе, Бо́жія слугу́ нарече́.

Спаси́теля за́повѣди послу́шавъ отъ ю́ности, му́дре, жи́знь сію́ нивочто́же положи́въ, кре́стъ жела́я носи́ти на ра́менахъ твои́хъ, вся́ земна́я возненави́дѣлъ еси́, на небе́сная взира́я, Ѳеодо́сіе.

Богоро́диченъ: Вопло́щся отъ пречи́стыхъ Твои́хъ ложе́снъ, Дѣ́во Пресвята́я, Бо́жіе Сло́во всѣ́хъ просвѣти́ богоразу́мія свѣ́томъ и человѣ́ковъ торжество́ ли́ку а́нгельскому сподо́би, на небе́сная возве́дъ.

Другíй кано́нъ, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Пресвѣ́тлыми Бо́жіими луча́ми просвѣще́нъ, о́тче Ѳеодо́сіе, просвѣти́ у́мъ мо́й твои́ми моли́твами воспѣ́ти свѣ́тло твою́ боже́ственную па́мять.

Еди́ному прине́слся еси́ Бо́гу отъ ю́ности, отъ Него́же прія́лъ еси́ бога́тую благода́ть чуде́съ, тѣ́мже бы́лъ еси́ сокро́вище ста́ду твоему́ нетлѣ́нно.

Но́вый на́мъ яви́ся Авраа́мъ, же́ртву принося́ Бо́гу, Агнца, взе́млющаго грѣхи́ всего́ мíра вои́стинну, хлѣ́бы сотворя́я свои́ма рука́ма чи́стыма.

Богоро́диченъ: Иже пре́жде денни́цы Сы́й, Сло́во Бо́жіе Человѣ́къ на́мъ яви́ся, вопло́щся на́съ ра́ди отъ Пречи́стыя Дѣ́вы, и, отъ Тоя́ изше́дъ, невреди́му сохрани́.

Катава́сія пра́здника.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Нетлѣ́нными да́ры и духо́вными, свя́те, боже́ственную твою́ и блаже́нную обогати́въ ду́шу, ви́дѣти возжелѣ́лъ еси́ гро́бъ Госпо́день, но свы́ше бы́лъ еси́ возбране́нъ Бо́жіимъ смотре́ніемъ.

Же́ртва соверше́нна, и́стинна и непоро́чна восхотѣ́въ бы́ти Агнца, взе́млющему, блаже́нне, пречи́стою кро́вію грѣхи́ всего́ мíра, безкро́вную же́ртву себе́ приноси́лъ еси́.

Уста́вовъ ты́ стяжа́тель отъ версты́ ю́ностныя, о́тче, бы́въ и самоде́ржецъ ума́, мірскíя пучи́ны избѣжа́въ, наставле́ніе прія́лъ еси́ отъ Боже́ственнаго Ду́ха.

Богоро́диченъ: Ра́дуйся, ро́ждшая Еди́на всѣ́хъ Го́спода; ра́дуйся, человѣ́комъ ра́дость провозвѣсти́вшая; ра́дуйся, ски́ніе и несѣко́мая горо́, вѣ́рныхъ утвержде́ніе, еди́на Препѣ́тая.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Ева́нгельскаго послу́ша гла́са Ѳеодо́сій, въ це́рковь прири́ща, возжелѣ́въ взя́ти кре́стъ Госпо́день на ра́мо свое́, мíра всего́ оста́вль пристра́стія, Тому́ послѣ́дова.

Испыта́вши тебе́, ро́ждшая тя́ ма́ти повелѣва́етъ ри́зу твою́ совлещи́ и ви́дѣ ужа́сное видѣ́ніе: чре́сла твоя́, источа́ющая кро́вь, желѣ́знымъ препоя́саніемъ.

Зѣло́ гро́бъ Госпо́день вожделѣ́въ ви́дѣти, блаже́нне Ѳеодо́сіе, но, удержа́нъ бы́лъ еси́ смотре́ніемъ Влады́чнимъ, Анто́нію же бы́лъ еси́ собесѣ́дникъ преподо́бному.

Богоро́диченъ: Па́че ума́ Ты́ зачала́ еси́, Препѣ́тая Дѣ́ва, еди́на бо отъ вѣ́ка всѣ́хъ Творца́, и Бо́га, и Содѣ́теля, Бо́жіе Сло́во родила́ еси́.

Конда́къ и и́косъ пра́здника.
Та́же сѣда́ленъ свята́го, гла́съ 4:

Па́че ума́ человѣ́ча яви́лся еси́, преподо́бне, на земли́, Бо́жій са́дъ свяще́нный, посредѣ́ до́му Госпо́дня стоя́, подае́ши пло́дъ болѣ́зней твои́хъ ученико́мъ твои́мъ: отъ у́стъ бо твои́хъ благода́ть Ду́ха возрасти́лъ еси́, о́бразъ бы́въ подвиго́въ и уста́въ лю́бящихъ Го́спода. Его́же ны́нѣ моли́ти не преста́й спасти́ся пою́щимъ тя́. [Два́жды.]

Сла́ва, и ны́нѣ, пра́здника.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Благода́ть Ду́ха возрасте́ въ тебѣ́, о́тче, егда́ ро́ждшую тя́ ви́дѣлъ еси́, пла́чущуюся и рыда́ющую крѣ́пцѣ, ты́, предстоя́въ струя́ми сле́зы точа́щей, непоколеби́мь сто́лпъ и неподви́жимь пребы́лъ еси́.

Лю́тыми человѣ́ки вра́гъ вселука́вый тща́шеся отто́ргнути тебе́, Ѳеодо́сіе, отъ гнѣзда́ преукраше́на, жела́ема тобо́ю, но ты́ сего́ нивочто́же вмѣни́лъ еси́, полки́ сего́ отгоня́ моли́твами твои́ми и поя́: си́лѣ Твое́й сла́ва, Человѣколю́бче.

Окропля́я себе́ дожде́мъ духо́внымъ, и живо́тнымъ исто́чникомъ напоя́яся, язы́комъ наста́вника Анто́нія, кла́съ боже́ственный прозя́блъ еси́ и пита́еши мно́жества, неистощи́мая вои́стинну Іо́сифова жи́тница бы́въ.

Богоро́диченъ: Кто́ изрещи́ досто́йно возмо́жетъ чуде́съ Твои́хъ, Чи́стая, глубину́? Тобо́ю бо ве́сь мíръ, хвалу́ Ти́ принося́, поми́лованъ быва́етъ и избавля́ется отъ бѣ́дъ лю́тыхъ и разли́чныхъ зо́лъ, враго́въ же и напа́стей.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Увѣ́давши ма́ти твоя́, му́дре, живу́ща тя́ со Анто́ніемъ блаже́ннымъ въ пеще́рѣ (пріи́де), ю́же, прише́дшую и пла́чущуюся, утѣ́шивъ, мірскíя зло́бы увѣща́лъ еси́ убѣжа́ти.

Ты́ іере́й Бо́жій беззло́бный бы́лъ еси́, я́ко вои́стинну, о́тче, безкро́вныя же́ртвы принося́, свяще́нне, и воспѣва́я се́рдцемъ чи́стымъ ко Го́споду, пра́зднуя при́сно.

Грѣхо́въ на́мъ избавле́ніе испроси́, Бо́жій слуго́ и предста́телю, ста́до твое́, вопіе́мъ ти́, и отъ собла́знъ вра́жіихъ пою́щія тя́ сохрани́.

Богоро́диченъ: Твою́ пречи́стую утро́бу освяти́ отъ Отца́ просія́вшее Сло́во Бо́жіе и мно́гія ра́ди бла́гости изба́ви человѣ́ческій ро́дъ отъ дре́внія кля́твы.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Добродѣ́тельныхъ по́двигъ твои́хъ возсія́ исправле́ніе, о́тче: жили́ще бо, бы́вшее дре́вле ху́до, простра́нно сотвори́лъ еси́, мно́ги приве́дъ покло́нники Бо́гу, подаю́щему си́мъ вся́къ дово́лъ твои́ми моли́твами.

Свѣ́тлыми заря́ми подвиго́въ твои́хъ отгони́мо быва́ше мно́жество бѣсо́въ отъ твоего́ жили́ща, сше́ствоваше бо ти́ всѣ́хъ Творца́ благода́ть Ду́ха и сла́вна тя́ яви́, Ѳеодо́сіе.

Спа́са Ще́драго посредѣ́ це́ркве воспѣ́лъ еси́, тѣ́мже щедро́ты Своя́ бога́тыя посла́ тебѣ́, оскудѣ́нія разрѣша́я печа́ль, приснотеку́щія же да́ры источа́я ста́ду твоему́.

Богоро́диченъ: Превы́шши была́ еси́ вы́шнихъ си́лъ, Богоблагода́тная, заче́ншая Сло́во, вся́ческая сло́вомъ сотво́ршее, и ро́ждшая отъ Отца́ пре́жде вѣ́къ неизрече́нно ро́ждшееся.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Чи́стый сосу́дъ, цвѣ́ты добродѣ́тельными украша́емь бы́лъ еси́, о́тче Ѳеодо́сіе, изъ него́же источа́еши исто́чникъ ста́ду поуче́нія, па́че ме́да и со́та сладча́йшаго.

Естество́ плотско́е умертви́лъ еси́ добродѣ́тельными по́двиги, о́тче му́дре Ѳеодо́сіе, тѣ́мже тя́ па́стыря Христо́съ показа́, идѣ́же па́жить пре́жде избра́ Чи́стѣй Дѣ́вѣ.

Мона́хомъ бы́лъ еси́ наста́вникъ и па́стырь овца́мъ, пасо́мымъ на па́жити Бо́жія Ма́тере, сего́ ра́ди Бо́гъ сугу́бу ра́дость подае́тъ ти́, Ѳеодо́сіе, моли́твами Чи́стыя Богома́тере.

Богоро́диченъ: Обрѣ́тъ Тя́ свяще́нный до́мъ, Живы́й на небесѣ́хъ во́лею въ Твою́ утро́бу всели́ся. Тѣ́мъ благода́рными гла́сы пое́мъ пречи́стое Твое́ рождество́ при́сно, въ дому́ Твое́мъ стоя́ще.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Моли́твами, и бдѣ́ніемъ, и псало́мскими пѣ́ніи непреста́нными, твою́ ду́шу ра́й Боже́ственный сотвори́лъ еси́, живоно́сное возрасти́въ дре́во честно́е я́вѣ, Спа́са и Го́спода.

Изво́лилъ еси́ та́йное смире́ніе, Влады́чнѣ нищетѣ́ подо́бяся, блаже́нне: во́лею бо твое́ю въ путеше́ствіи, повелѣ́ніемъ лѣни́ваго раба́ везти́ во́зъ къ боже́ственному мѣ́сту прія́лъ еси́, идѣ́же покланя́емь отъ срѣта́ющихъ позна́лся еси́.

Подо́бяся но́ги Умы́вшему Свои́мъ ученико́мъ, богому́дре, во́ду че́рпати и на ра́му носи́ти изво́лилъ еси́ и дрова́ свои́ма рука́ма принося́ и сѣча́ нача́льника трудо́въ себе́ мона́хомъ показа́лъ еси́.

Богоро́диченъ: Умерщвле́нъ бы́сть, Богоро́дице, Тобо́ю многоко́зненный вра́гъ, всю́ тва́рь пре́жде тле́ю погуби́вый, ме́ртвіи же Тобо́ю къ жи́зни взыдо́хомъ, и́бо родила́ еси́ вои́стинну жи́знь всѣ́хъ, Го́спода.

Инъ.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Истинную воздви́гъ це́рковь Бо́жія Ма́тере, въ не́й мно́жества мона́шествующихъ собра́лъ еси́ ли́къ, любо́вію пою́щихъ честну́ю твою́ па́мять.

Прибѣга́ющимъ къ кро́ву твоему́ съ вѣ́рою, исто́чникъ исцѣле́ній источа́еши всѣ́мъ, и святы́ню излива́еши, преподо́бне, и просвѣща́еши сердца́, бѣсо́вскія ле́сти прогоня́я.

Ко Христу́ Бо́гу воздви́гни твоя́ ру́ки, преподо́бне, и твое́ ста́до е́же собра́лъ еси́ Ду́хомъ, соблюди́, о́тче, моли́твами твои́ми, свѣ́тло пою́щее твою́ па́мять.

Богоро́диченъ: Ра́дуйся, Препѣ́тая, препѣ́таго Бо́га всѣ́хъ поро́ждшая, и пою́щія Тя́ прича́стники свѣ́ту яви́, Чи́стая, и огня́ вѣ́чнаго изба́ви.

Конда́къ, гла́съ 3. Подо́бенъ: Дѣ́ва дне́сь.

Звѣзду́ Россíйскую дне́сь почти́мъ, отъ восто́ка возсія́вшую и на за́падъ прише́дшую, всю́ же страну́ сію́ чудесы́ и добро́тою обогати́вшую и вся́ ны́ содѣ́яніемъ и благода́тію мона́шескаго уста́ва, блаже́ннаго Ѳеодо́сія.

Икосъ:

Кто́ изрещи́ возмо́жетъ по́двиги твоя́, о́тче? Или́ кто́ изочте́тъ мно́жества трудо́въ твои́хъ и чуде́съ ди́вныхъ? Еще́ бо во пло́ти сы́й, Безпло́тнаго ви́дѣлъ еси́, въ пло́тянѣ о́бразѣ бесѣ́дующа къ тебѣ́ и да́ръ принося́ща тебѣ́, Бо́гомъ по́сланное зла́то. Па́че человѣ́ка ты́ яви́лся еси́ смире́ніемъ и кро́ткимъ нра́вомъ и духо́вныя му́дрости испо́лненъ. Тѣ́мъ, Ду́ха въ себѣ́ пріе́мь, во свѣ́тѣ ви́дѣнъ бы́лъ еси́, я́ко со́лнце, сія́я. И мене́, тебе́ пою́ща, просвѣти́ сія́ніемъ твои́мъ, преподо́бне, мона́шескаго уста́ва, боже́ственный Ѳеодо́сіе.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Къ моли́твамъ твои́мъ, блаже́нне, вся́къ прибѣга́я вѣ́рою, никогда́же постыди́тся: пріе́млетъ бо благода́ть проше́нія, о́тче, и возврати́вся, лику́етъ, поя́: благослове́нъ Бо́гъ оте́цъ на́шихъ.

Ты́ оте́цъ яви́лся еси́ и засту́пникъ си́рымъ, и вдови́цамъ наде́жда, и боля́щимъ всѣ́мъ воста́ніе, о́тче, бы́лъ еси́. Тѣ́мже пое́мъ: благослове́нъ Бо́гъ оте́цъ на́шихъ.

Удобре́ніе мона́хомъ и пу́ть спасе́нія человѣ́комъ ты́ бы́лъ еси́: обога́щъ бо вся́ твои́ми глаго́лы боже́ственныхъ та́инъ, учи́лъ еси́ глаго́лати: благослове́нъ Бо́гъ оте́цъ на́шихъ.

Богоро́диченъ: Изъ дѣви́ческія утро́бы вопло́щся, Христе́, яви́лся еси́ на спасе́ніе на́ше. Тѣ́мъ, Твою́ Ма́терь вѣ́дуще Богоро́дицу, благода́рственно пое́мъ: благослове́нъ Бо́гъ оте́цъ на́шихъ.

Инъ.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Ду́ха Бо́жія благода́ть осѣни́вшая тя́, возрасте́ въ тебѣ́, просвѣща́ющи, о́тче, твое́ се́рдце, е́юже учи́лъ еси́ воспѣва́ти: благослове́нъ Бо́гъ оте́цъ на́шихъ.

Извѣще́нія глаго́лъ твои́хъ смотре́нія та́инъ изыдо́ша во вся́ страны́, при́сно пою́щимъ: благослове́нъ Бо́гъ оте́цъ на́шихъ.

Многоразли́чная благода́ть Ду́ха на тебѣ́, о́тче, почи́ и пресла́вная чудеса́ показа́ пою́щимъ: благослове́нъ Бо́гъ оте́цъ на́шихъ.

Богоро́диченъ: Подъ кро́въ Тво́й, Влады́чице, прибѣга́юще, избавля́емся лю́тыхъ, наде́жду бо иму́ще, вѣ́рніи вси́, мо́лимъ: Твоя́ рабы́ не пре́зри, Богоро́дице Дѣ́во.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Якоже проро́къ боже́ственный, прови́дя ду́хомъ, явля́ешися, Ѳеодо́сіе преблаже́нне: и́бо повелѣва́еши я́вѣ испо́лнити обѣща́нное Пресвятѣ́й Богоро́дицѣ; о́нъ же, уди́влся, исповѣ́да чи́стымъ смы́сломъ, прославля́я Бо́га.

Къ твоему́ жили́щу прири́ща, я́ко еле́нь ко исто́чнику, приснотеку́щую нетлѣ́нную пи́щу получи́ти благочести́вый кня́зь, и́же зе́млю сію́ содержа́й. Хотя́ у́бо свечеря́ти ему́, блаже́нне, но оскудѣ́ніе строи́телю извѣща́ющу, повелѣ́ніемъ твои́мъ напо́лнися ме́да ве́сь сосу́дъ тво́й.

Твоя́ по́двиги воспѣ́ша а́нгельскія си́лы, Ѳеодо́сіе, и твое́ житіе́ ли́къ преподо́бныхъ похвали́, свѣ́тлое и украше́нное мона́ховъ ра́дованіе. Тѣ́мъ и ны́нѣ, сра́дуяся Ему́ и свеселя́ся, пое́ши согла́сно: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Тя́, Пречи́стая Богоро́дице, жи́зни моея́ предлага́ю Храни́тельницу и Засту́пницу непобѣди́му, Помо́щница ми́ бу́ди отъ бѣ́дъ и скорбе́й, избавля́ющи Твоего́ недосто́йнаго раба́, любо́вію пою́ща: о́троцы, благослови́те, свяще́нницы, воспо́йте, лю́діе, превозноси́те Чи́стую во вѣ́ки.

Инъ.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Христа́ воспѣва́етъ ли́къ твои́хъ учени́къ, съ наста́вникомъ о́крестъ стоя́ ра́ки твоея́, пріе́мшій твоя́ труды́, досто́йныя Бо́гу, Его́же превозно́симъ во вѣ́ки.

Ра́дуяся, послѣ́довалъ еси́ распя́тому Христу́ Бо́гу, мно́гими бо труды́ и болѣ́зньми тѣ́ло умертви́въ, вѣ́ру и́стинную и любо́вь стяжа́лъ еси́, мíра отве́ргся и Христа́ еди́наго возлюби́въ.

Источа́етъ здра́віе Боже́ственною си́лою ра́ка моще́й твои́хъ, о́тче Ѳеодо́сіе, и стра́сти душе́вныя и плотскíя исцѣля́етъ, тѣ́мъ воспѣва́емъ досто́йно па́мять твою́.

Богоро́диченъ: Гавріи́ловъ Ти́ гла́съ ны́нѣ восклица́емъ: ра́дуйся, Преблагослове́нная Влады́чице Богоблагода́тная, Ея́же ра́ди кля́твы дре́внія избы́хомъ, Ты́ бо Хода́таица всѣ́хъ спасе́нія.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Па́мять твоя́ дне́сь на́мъ, я́ко со́лнце, возсія́, преподо́бне: ра́дуемся, цѣлу́юще ра́ку твою́ и, я́ко о́крестъ Боже́ственнаго киво́та стоя́ще, вѣ́рно пое́мъ твое́ успе́ніе съ вы́шними чи́нми, Ѳеодо́сіе.

Ра́дуйся, земле́ Ро́сская, пріе́мши сокро́вище некра́домо отъ Го́спода, помо́щника вели́ка богоблаже́ннаго и засту́пника те́пла Ѳеодо́сія, и съ ли́комъ по́стническимъ весели́ся и ты́, нача́ло гра́де Ро́сскій.

Собра́ся торжество́ ны́нѣ въ па́мяти твое́й воспѣва́ти Го́спода, тебѣ́ пода́вша до́брыя по́двиги, я́же ты́ претерпѣ́лъ еси́. Тѣ́мже моли́ся Ему́, свя́те, изба́витися ста́ду твоему́ отъ собла́знъ вра́жіихъ, е́же ты́ стяжа́лъ еси́, му́дре, моли́твами твои́ми.

Спаси́ мя, еди́не Изба́вителю, блудни́цы и блу́днаго пріе́мый те́плое покая́ніе и мытаре́во, Спа́се, воздыха́ніе, и бу́ди ми́лостивъ, Христе́, мнѣ́, блу́дному, моли́твами Твоего́ уго́дника, отгоня́я грѣхо́въ мои́хъ мно́жество.

Богоро́диченъ: Пощади́ мя, Спа́се рожде́йся, и сохрани́въ Ро́ждшую Тя́ безъ тли́ по рождествѣ́, егда́ ся́деши суди́ти дѣла́ моя́, грѣхи́ моя́ презрѣ́въ и беззако́нія, Безгрѣ́шенъ сы́й и Ми́лостивъ, я́ко Человѣколю́бецъ.

Инъ.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Отче, вѣ́рою ча́да, я́же совокупи́лъ еси́, добродѣ́тельми сія́ просвѣти́ти сподо́би, па́стыремъ досто́инъ па́стырь; оставле́ніе же грѣхо́въ и житія́ исправле́ніе, преподо́бне, дарова́ти на́мъ моли́ся.

Ра́вно пожи́въ со святы́ми отцы́, Пречи́стыя Дѣ́вы слуга́ бы́лъ еси́, блаже́нне, и па́стырь мона́ховъ изря́денъ, я́ко вои́стинну сто́лпъ правовѣ́рія, вѣ́рныхъ наде́жда и упова́ніе пою́щихъ въ дому́ Бо́жія Ма́тере.

Укрѣпля́емь си́лою Вседержи́телевою, ко́зни вра́жія побѣди́лъ еси́ и си́хъ полки́ прогна́лъ еси́, боля́щимъ здра́віе по́далъ еси́, тѣ́мъ, веселя́щеся, при́сно чти́мъ твою́ па́мять.

Богоро́диченъ: Возсія́вшаго отъ Отца́ безъ ма́тере, неизрече́нно заче́нши, родила́ еси́, Богома́ти препѣ́тая, Дѣ́во Чи́стая, Его́же я́ко Сы́на Твоего́ и Бо́га на́шего моли́, Пресвята́я, за рабы́ Твоя́.

Свѣти́ленъ. Подо́бенъ: Жены́, услы́шите.

Свѣ́тъ Единосу́щныя Тро́ицы воспріе́мь въ се́рдцѣ твое́мъ, Ѳеодо́сіе, отце́мъ о́тче, благочести́выя просвѣти́лъ еси́, въ пеще́рѣ укрѣ́плься съ вели́кимъ Анто́ніемъ, а́нгеломъ единокро́вне. Съ ни́миже помина́й тебе́ вѣ́рою воспѣва́ющихъ. [Два́жды.]

Сла́ва, и ны́нѣ, пра́здника.

На хвали́техъ стихи́ры, на 4, гла́съ 2. Подо́бенъ: Егда́ отъ дре́ва.

Вѣ́рою и любо́вію Христо́вою ве́сь уязви́вся, блаже́нне,* Ему́же послѣ́дуя, мíра отве́рглся еси́,* оте́чества же и ро́да,* ко Анто́нію прите́къ преподо́бному,* у него́же научи́лся еси́ неизрече́ннымъ,* и́хже у́хо не слы́ша,* въ твое́ же се́рдце внидо́ша.* Съ ни́мже тя́ свяще́нно воспѣва́емъ, чту́ще, Ѳеодо́сіе. [Два́жды.]

Жи́знь безскве́рную вожделѣ́въ,* терпѣ́ніе же, и любо́вь, и смире́ніе,* стоя́ніе всено́щное и воздержа́ніе,* и́миже умертви́лъ еси́ плотскíя по́хоти.* Тѣ́мъ, получе́ніе боже́ственно воспріе́мь,* сра́дуешися лико́мъ преподо́бныхъ.* Не забыва́й, блаже́нне, прося́ грѣхо́въ оставле́нія* тя́ досто́йно воспѣва́ющимъ.

Егда́ злонача́льный вра́гъ* разбо́йники наведе́ на ста́до твое́, преподо́бне,* погуби́ти хотя́ су́щія въ не́мъ,* тогда́ ви́дѣвше це́рковь, вы́спрь ви́сящу, отхожда́ху,* боя́щеся да́нныя тебѣ́ благода́ти отъ Бо́га, преподо́бне,* слы́шаша бо гла́съ въ це́ркви пѣ́нія а́нгельскаго неизрече́ннаго.* Съ ни́ми же и ны́нѣ веселя́ся, помина́й на́съ,* вѣ́рою пою́щихъ твою́ свѣтоно́сную и честну́ю па́мять.

Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, пра́здника.
Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна свята́го, пѣ́снь 3-я и 6-я, отъ обою́ кано́новъ. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́емъ, зача́ло 334. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. [Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ]. Ева́нгеліе Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 76 об. – 83 об.

/ Къ оглавленію раздѣла /


Наверхъ / Къ титульной страницѣ

0