Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 21 августа 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія во 2-й де́нь.
Иже во святы́хъ отца́ на́шего Аѳана́сія Вели́каго, патріа́рха Александрíйскаго.

[ВЕЧЕРЪ,]
На Го́споди воззва́хъ: стихи́ры на 6, гла́съ 4. Подо́бенъ: Зва́нный свы́ше.

Яко рѣка́ Бо́жія,* напо́лнена во́дъ духо́вныхъ,* яви́лся еси́, пречу́дне,* наводне́на боже́ственными уче́ніи,* и напая́я церко́вное все́ исполне́ніе,* погружа́я же собо́ръ еретико́въ* пучи́ною боже́ственныхъ твои́хъ слове́съ, о́тче,* и во глубинѣ́ твои́хъ разумѣ́ній.* Ты́ бо, прему́дре,* Единосу́щнаго ро́ждшему Отцу́* Влады́ку Христа́ проповѣ́далъ еси́,* боже́ственный Аѳана́сіе пребога́те.

Яко тайносказа́тель* и боже́ственный святи́тель* бѣды́ претерпѣ́лъ еси́, и гоне́нія терпѣли́вно,* и навѣ́ты, блаже́нне, и изгна́нія многовре́менна* вѣ́ры ра́ди Христо́вы,* я́сно Единосу́щнаго, и Соприсносу́щнаго,* и Равнодѣ́теля, и Собезнача́льна Христа́ проповѣ́дая* Первонача́льному и Собезнача́льному Отцу́.* Тѣ́мже тя́ Са́мъ украси́ пресвѣ́тлыми я́вѣ науче́ніи* и пресвѣ́тла все́й вселе́ннѣй показа́.

Ины стихи́ры, гла́съ 5. Подо́бенъ: Преподо́бне о́тче.

Преподо́бне о́тче, богоявле́нне Аѳана́сіе,* отъ младе́нства позна́лся еси́ Це́ркви свѣти́льникъ,* сія́я видѣ́ніи пресвѣ́тлыми* и вся́цѣмъ же о́бразомъ богатѣ́яся добродѣ́телей,* словесы́ огнедухнове́нными попаля́я е́реси,* вѣ́рныя же вся́ наставля́я,* Тро́ицы сія́ніемъ пребоже́ственнымъ,* въ Божествѣ́ еди́номъ разумѣва́емыя* и соприсносу́щную сла́ву иму́щія.* Ту́ моли́ и То́й моли́ся всегда́* дарова́ти вселе́ннѣй единомышле́ніе,* ми́ръ и ве́лію ми́лость.

Преподо́бне о́тче, богоглаго́ливе Аѳана́сіе,* тезоимени́тъ влѣ́поту безсме́ртія нарече́нъ бы́въ,* сего́ хода́тайствующею ше́ствовалъ еси́ стезе́ю,* житія́ свѣ́тлостію обога́щся я́вѣ,* у́мъ чи́стъ, богому́дре, стяжа́въ,* Сло́ву побо́рникъ обрѣ́лся еси́ и по Ду́сѣ дыха́я Пресвятѣ́мъ,* Имже просвѣща́емь, побѣжда́лъ еси́ враги́ твоя́,* Имже огражда́емь, неутоли́мь яви́лся еси́,* Имже и обожа́емь,* Ему́же и прича́стникъ, свя́те,* всѣ́мъ испроси́ дарова́ти единомышле́ніе,* ми́ръ и ве́лію ми́лость.

Преподо́бне о́тче, богопроповѣ́дниче Аѳана́сіе,* бѣды́ претерпѣ́въ и ча́стыя напа́сти,* пи́щи ра́йскія ны́нѣ сподо́бился еси́,* вну́трь бы́въ боже́ственныхъ оби́телей,* къ дре́ву прибли́жился еси́ жи́зни нетлѣ́нныя,* я́ко побѣди́тель, пра́веднымъ вѣнце́мъ укра́шенъ, блаже́нне,* и діади́мою вы́шняго Ца́рствія испещре́нъ,* и добро́тою сія́я.* Христо́ви помоли́ся, у Христа́, богому́дре, проси́* дарова́ти Це́ркви единомышле́ніе,* ми́ръ и ве́лію ми́лость.

Сла́ва, гла́съ 6:

Христо́ва святи́теля воспое́мъ вси́, Аѳана́сія, я́ко Аріева уче́нія вся́ упраздни́въ, и Святы́я Тро́ицы державу во все́мъ мíрѣ я́сно возвѣща́етъ, Еди́наго Бо́га, въ Тре́хъ Ли́цѣхъ Нераздѣ́льна, Его́же и мо́литъ о на́съ, вѣ́рою соверша́ющихъ па́мять его́.

И ны́нѣ, пра́здника.

На стихо́внѣ тріо́ди. Сла́ва, свята́го. Гла́съ 3. Ге́рманово:

Па́ки на́мъ златоте́чный Ни́лъ и безсме́ртія тезоимени́тъ, лѣ́тною па́мятію прише́дъ, до́брыми восхожде́ньми наводня́етъ златостру́нная безсме́ртія лія́нія и пи́щу нетлѣ́нія плододая́ высо́кимъ благовѣща́ніемъ: Тро́ицы нераздѣ́льнѣй держа́вѣ учи́тъ покланя́тися и источа́етъ боже́ственная уче́нія, вѣ́рныхъ напоя́етъ помышле́нія и мо́лится о душа́хъ на́шихъ.

И ны́нѣ, пра́здника.

Тропа́рь, гла́съ 3:

Сто́лпъ бы́лъ еси́ Правосла́вія, боже́ственными догма́ты подтвержда́я Це́рковь, священнонача́льниче Аѳана́сіе: Отцу́ бо Сы́на Единосу́щна проповѣ́давъ, посрами́лъ еси́ Арія. Отче преподо́бне, Христа́ Бо́га моли́ дарова́ти на́мъ ве́лію ми́лость.


[НА УТРЕНИ,]
Кано́нъ пра́здника со ирмосо́мъ на 6 и свята́го на 6, его́же краегране́сіе: Аѳана́сій похвала́ Правосла́вія бы́сть. Творе́ніе Ѳеофа́ново. Гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Аѳана́сію приноша́ю похвалу́, я́ко добродѣ́тель восхваля́я, къ Бо́гу приноша́ю па́че похвале́ніе, отъ Него́же человѣ́комъ дае́тся достохва́льно дарова́ніе добродѣ́тели, е́йже бы́сть одушевле́нъ о́бразъ и печа́ть.

Богому́дрія бы́лъ еси́ испо́лненъ и, па́че со́лнца а́нгельскимъ, блаже́нне, житіе́мъ облиста́въ ны́нѣ, преподо́бне, превозше́лъ еси́ похва́лъ зако́ны, и́же отъ на́съ, но пріими́, о́тче, а́ще и не по достоя́нію похвале́ніе.

Достодо́лжно у́бо пѣ́снь плете́мъ, во сла́внѣй твое́й па́мяти, но лиша́емся бо́льшихъ, Аѳана́сіе, по достоя́нію пѣ́сней твои́хъ, про́симъ проще́ніе на́мъ да́ти и незави́стную благода́ть тобо́ю Ду́ха.

Юношески плотски́хъ страсте́й игра́ніе умертви́лъ еси́, въ ю́ности твое́й стяжа́въ му́дрость ста́рческую и благоуста́вно, Аѳана́сіе блаже́нне, жела́ніемъ бо прему́дрости вся́ чу́вства испра́вилъ еси́.

Богоро́диченъ: Вопло́щшагося на́съ ра́ди, Всенепоро́чная, Яже пре́жде безпло́тнаго, богонача́льнаго Сло́ва Отча родила́ еси́, о дѣ́вственная похвало́, и прія́телище чистоты́, и хра́мъ очище́нія, Влады́чице мíра, Богоневѣ́сто.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Очи́стивъ отъ вся́кія скве́рны ду́шу же и тѣ́ло, Аѳана́сіе, хра́мъ яви́лся еси́, досто́инъ Бо́гу, тѣ́мже Тро́ицы исполне́ніе почи́ въ тебѣ́, священнотаи́нниче пребога́те.

Твою́ ду́шу, я́коже жела́ше, Утѣ́шителева благода́ть отъ страсте́й очище́ну обрѣ́тши, я́вѣ въ не́й дѣ́йственная показу́етъ и пресвѣ́тло свѣти́ло, о́тче, мíру тя́ полага́етъ.

Святи́тельства у́бо пра́вило святи́телемъ показа́лся еси́, дѣ́тельнаго же подписа́ніе житія́; сло́во же твое́ я́сно, видѣ́нія о́бразъ, прему́дре, богосло́вія же твоего́ предѣ́лъ уче́ніе яви́ся.

Богоро́диченъ: Херуви́мъ и серафи́мъ превы́шши яви́лася еси́, Богоро́дице: Ты́ бо еди́на прія́ла еси́ невмѣсти́маго Бо́га во Твое́мъ чре́вѣ, Нескве́рная. Тѣ́мже, вѣ́рніи, Тя́ вси́ пѣ́сньми, Чи́стая, ублажа́емъ.

По 3-й пѣ́сни конда́къ и и́косъ пра́здника.
Та́же сѣда́ленъ свята́го, гла́съ 8. Подо́бенъ: Прему́дрости.

Прему́дрости сло́ва навы́къ, Аріеву ле́сть низложи́въ, мíрови проповѣ́далъ еси́ правосла́вную вѣ́ру: Отца́ бо Сло́во, Христа́, жи́знь на́шу, вои́стинну бы́ти уясни́лъ еси́ сопресто́льна. Тѣ́мже единому́дренно Це́рковь сла́витъ Тро́ицу Единосу́щную, во Еди́ницѣ Божества́, богоно́се Аѳана́сіе. Моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти́: си́лѣ Твое́й сла́ва, Человѣколю́бче.

Все́ тебѣ́ вдохну́ живоно́сное дыха́ніе свы́ше, пе́рвѣе прише́дшее боголѣ́пно, Ду́хъ Христо́въ въ го́рницѣ, и ученики́ насы́щшее, апо́стола тя́ показа́ тринадеся́таго, о́тче, правосла́вную вѣ́ру проповѣ́дающаго.

Ты́, боже́ственною ре́вностію зѣло́ распаля́емь, собо́ру споспѣ́шествовалъ еси́ и пре́жде, е́же соверши́ти тя́ предсѣда́теля, въ Нике́и проповѣ́далъ еси́ Единосу́щное. Тѣ́мже Це́ркве Христо́съ пастыренача́льника и учи́теля тя́ поставля́етъ.

Вруче́на имѣ́я церко́вная корми́ла отъ промышле́нія боже́ственнаго, Аѳана́сіе, еретико́въ душевре́дная вся́ языкобо́лія, я́коже нѣ́кая сѣки́ра, посѣ́клъ еси́, искореня́я, я́коже тѣ́рніе, и сѣ́мя слове́сное напая́я, му́дре воздѣ́лалъ еси́.

Отъ твоего́ язы́ка о́гненнаго сожже́ся Аріево сро́дное раздѣле́ніе и слія́ніе Саве́лліево, я́же отъ безмѣ́рія зла́, и къ нече́стію единоче́стна, и вся́ съ ни́ми хуле́нія ерети́ческая, о Аѳана́сіе!

Богоро́диченъ: Но́въ Ада́мъ за пе́рваго Ты́ бы́лъ еси́ отъ Дѣ́вы, за прама́терь — Изба́витель всѣ́хъ и Спа́съ, за сме́рть — и́стинная Жи́знь безсме́ртная. Тѣ́мже Тя́ ро́ждшую Богоро́дицу вѣ́дуще, по достоя́нію, Чи́стая, ублажа́емъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и къ свѣ́ту за́повѣдей Твои́хъ пути́ моя́ напра́ви, молю́ся.

Христа́ имѣ́я, глаго́люща, о́тче, во орга́нѣ доброгла́снѣмъ язы́ка твоего́, посрами́лъ еси́ у́бо и́доловъ напи́санно е́ресь, заблужде́нныя наставля́я и обраща́я ко и́стинному Бо́гу, Аѳана́сіе.

Губи́тельныя е́реси вся́, о́тче, изобличи́лъ еси́ словесы́ и писа́ньми, разли́чную ле́сть изгоня́я му́дрыми показа́ньми изъ вселе́нныя, уясня́я невоспротивосло́внѣ правосла́вную вѣ́ру, блаже́нне.

Тя́ учи́теля вои́стинну вели́ка учи́телей му́дрыхъ, Аѳана́сіе, нело́жно сказу́етъ и со апо́столы причте́ Це́рковь Христо́ва, о́тче, изъявля́юща сло́во вѣ́ры непоро́чное.

Богоро́диченъ: Ма́тернее дерзнове́ніе къ Сы́ну Твоему́ стяжа́вши, Всечи́стая, сро́днаго промышле́нія, е́же о на́съ не пре́зри, мо́лимся: я́ко Тя́ и еди́ну христіа́не ко Влады́цѣ очище́ніе ми́лостивно предлага́емъ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Чужда́го сѣ́мене сѣ́ятель яви́вся Аполлина́рій, земна́го словесе́ и ума́ Христо́во вочеловѣ́ченіе, крѣ́пко изобличи́ся отъ тебе́, преблаже́нне, я́коже несмы́сленъ и умовре́денъ.

Глаго́лъ твои́хъ, блаже́нне, богодухнове́нныхъ си́ла, я́ко гла́съ гро́ма, во у́ши, богопрія́тне, я́вѣ возгремѣ́ ерети́чествующихъ и ли́ца и́хъ очерни́.

Диви́тся вся́къ твои́мъ, о́тче, влѣ́поту списа́ніямъ му́дрымъ, любе́зно вмѣща́я, хотя́щая бы́ти прозябе́нія ересе́й прови́дя, отвраща́емая отъ тебе́ проро́чески.

Богоро́диченъ: Сы́нъ Единоро́дный и пре́жде вѣ́къ неви́димый, въ послѣ́днія дни́ Пе́рвенецъ бы́сть, зри́мь въ тѣлеси́ изъ Тебе́, Богома́ти, Бо́гъ спасе́нія моего́.

Конда́къ, гла́съ 2. Подо́бенъ: Крове́й Твои́хъ.

Правосла́вія насади́въ уче́нія, злосла́вія те́рнія изсѣ́клъ еси́, умно́живъ сѣ́мя вѣ́ры одожде́ніемъ Ду́ха, преподо́бне, тѣ́мже тя́ пое́мъ, Аѳана́сіе.

Икосъ:

Быстрины́ слове́съ твои́хъ источи́въ боже́ственнаго уче́нія мíрови, ду́ши вѣ́рныхъ напои́лъ еси́, Аѳана́сіе, и ерети́ческія предста́тели потопи́лъ еси́, я́ко другíя еги́птяны, зако́нъ на́мъ богоначерта́нный да́въ Правосла́вія, поклоне́ніе Тро́ицы во еди́номъ Божествѣ́ чти́ти, Еюже на́съ соблюди́, отъ вра́гъ неви́димыхъ избавля́я, тѣ́мже тя́ пое́мъ, Аѳана́сіе.

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Единоче́стное, Сопресто́льное Отцу́ Сло́во, Единоро́дна же Сы́на правосла́вно проповѣ́давъ, безсме́ртія, о́тче тезоимени́те, а́біе науча́еши, Ду́ху Сопресто́льна, и Единосу́щна, и Соприсносу́щна.

Учи́теля тя́ и проповѣ́дника священноявле́нна Трисо́лнечнаго Свѣ́та, возвѣща́юща вѣ́ру Правосла́вія да́же до коне́цъ земли́, нече́стія зря́ роди́тель, изгна́нія на тя́ воздвиза́етъ.

Бѣды́ безмѣ́рныя я́же подъя́лъ еси́, блаже́нне, подвиза́яся по благоче́стію, вѣнцы́ же, та́кожде свѣ́тліи, и́бо адама́нтъ бы́лъ еси́ бію́щимъ, къ себѣ́ же, я́ко магни́тъ, привлача́лъ еси́ вся́.

Стра́нныя догма́ты, чу́ждія же Це́ркве Христо́вы, изгна́лъ еси́, Тро́ицу богосло́вивъ Ѵпоста́сьми, Божество́мъ же Еди́ницу, Юже пѣ́лъ еси́: благослове́нъ Бо́гъ оте́цъ на́шихъ.

Богоро́диченъ: Въ лѣ́то Безлѣ́тнаго, Неискусобра́чна еди́на бы́вши, Яже пе́рвѣе Безпло́тное Сло́во, пло́ти прія́тіемъ, Дѣ́во, родила́ еси́, Ему́же пое́мъ, согла́сно зову́ще: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Святи́телей украше́ніе благосла́вное, Аѳана́сіе, сто́лпе свѣ́та и Це́ркве утвержде́ніе, Тро́ицы побо́рниче, богосло́вія трубо́ злата́я, житія́ же мона́шескаго извѣ́стный законописа́телю, съ на́ми пра́зднуеши, іере́и соверша́я, лю́ди вѣ́рныя приводя́ Христу́ во вѣ́ки.

Безсме́ртія бы́лъ еси́ вои́стинну тезоимени́тъ, дѣ́тельныя бо сло́вомъ превозше́лъ еси́, иску́сныхъ же въ сло́вѣ извѣ́стіемъ житія́ побѣжда́я, во обои́хъ преше́лъ еси́ кра́й. Тѣ́мже, непрело́жною добродѣ́телію просія́въ, безсме́ртную стяжа́лъ еси́ па́мять во вѣ́ки.

Ты́ свѣтлѣ́йшее показа́лъ еси́, тайнонебе́сниче богопрія́тне, святи́тельство до́блими страда́ньми твои́ми, пре́лесть изгна́лъ еси́ твои́ми изгна́ніи ча́стыми по Тро́ицѣ, Юже проповѣ́дуя, вопіе́ши: Отцу́ поклони́теся, Сы́на богосло́вите, Ду́ха воспо́йте во вся́ вѣ́ки.

Богоро́диченъ: Свѣ́та незаходи́маго была́ еси́ прія́телище, Пречи́стая, Свѣ́тъ бо су́щимъ во тмѣ́ и сѣ́ни бы́сть, просвѣща́я вся́ческая богоразу́мія благода́тію, Его́же непреста́нно, вѣ́рніи, во вся́ вѣ́ки пое́мъ.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Просія́ житіе́мъ, я́ко мо́лнія, излія́ся же, о́тче, всѣ́мъ вѣща́ніе твое́, я́коже гро́мъ, и́хже со́лнце назира́етъ, съ небесе́ бо имѣ́лъ еси́ свы́ше вдохнове́ніе и́стинно. Тѣ́мже не угаси́ твое́й па́мяти хода́тай забве́нія гро́бъ, Аѳана́сіе.

Свѣ́томъ трисо́лнечнымъ и трисія́ннымъ яснѣ́йше ны́нѣ осія́емь, пѣвце́мъ твои́мъ осія́ніе зареви́дное явля́еши, я́ко зерца́ломъ, свы́ше испуща́я со́лнечнѣ, и ты́ соста́ви, блаже́нне, а́ще вели́ко и ма́ло па́че досто́инства проси́мое.

Пою́ще, мо́лимъ тя́ прилѣ́жно: о Це́ркви помоли́ся, кресто́мъ побѣ́ды дарова́ти Импера́тору, правосла́внѣй же вѣ́рѣ крѣ́пость на е́реси враго́въ, на́мъ же спасе́ніе, ми́ръ же мíру въ твое́й па́мяти, Аѳана́сіе.

Богоро́диченъ: Всѣ́хъ Предста́тельнице христіа́нъ, Богома́ти Дѣ́во Пренепоро́чная, я́ко Ми́лостива, изба́ви отъ бѣ́дъ и напа́стей оскорбле́нныя рабы́ Твоя́, и неду́гующія лю́тыхъ стру́пъ я́звами, и болѣ́зньми ра́нъ боля́щія изврачу́й.

Свѣти́ленъ. Подо́бенъ: Свѣ́те неизмѣ́нный.

Рѣка́ златото́чная яви́лся еси́, уче́ній вода́ми напая́я, служи́тель Тро́ицы, святи́телей украше́ніе, ты́ бо Аріево уче́ніе, Аѳана́сіе, разори́лъ еси́ уче́ніи твои́ми.

Сла́ва, и́нъ. Подо́бенъ: Не́бо звѣзда́ми.

Архіере́евъ сла́ву и Еги́пта воспита́ніе, безсме́ртія украше́ніе, воспои́мъ во хвале́ніи Аѳана́сія Вели́каго, я́ко низложи́теля Аріева и вѣ́рныхъ засту́пника.

И ны́нѣ, пра́здника.

На хвали́техъ стихи́ры на 4, гла́съ 4. Подо́бенъ: Яко до́бля.

Огненными твои́ми уче́ніи* ересе́й вся́кая хвра́стная* ве́щь попаля́ется, пресла́вне,* глубино́ю разумѣ́ній потопля́ется* во́инство непокори́выхъ злочести́вое,* Аѳана́сіе преподо́бне,* твои́ми же уче́ніи удобря́ется, блаже́нне,* на кíйждо де́нь вѣ́рныхъ Це́рковь,* велегла́сно почита́ющи тя́. [Два́жды.]

Отъ Христо́вы Це́ркве* мы́сленныя во́лки отгна́лъ еси́, прему́дре,* жезло́мъ уче́ній твои́хъ* и сію́ о́крестъ огради́лъ еси́* слове́съ утвержде́ньми* и предста́вилъ еси́ Христу́ недви́жиму и непоколеби́му.* Его́же моли́ отъ тли́ и бѣ́дъ изба́витися* вѣ́рою соверша́ющимъ всечестну́ю па́мять твою́.

Слове́съ твои́хъ боже́ственныхъ свѣтлостьми́, преподо́бне,* Це́рковь вся́ украша́ется,* и благоче́стно удобря́ется* кра́сными добро́тами,* и почита́етъ достодо́лжно* всепра́зднственную па́мять твою́, Аѳана́сіе,* свяще́нниковъ сла́во,* благоче́стія свѣ́тлый и вели́кій проповѣ́дниче,* Тро́ицы побо́рниче.

Сла́ва, гла́съ то́йже. Ге́рмана патріа́рха:

Вели́кая церко́вная и́стинная трубо́, многострада́льный Аѳана́сій къ благохвале́нію дне́сь созыва́етъ вселе́нную свѣ́тло. Вѣ́рніи вси́, къ торжеству́ предусря́щимъ до́браго па́стыря, пѣ́сньми почита́юще свяще́нныя его́ труды́, я́ко да моли́твами его́ пріи́мемъ отъ Христа́ Бо́га ве́лію ми́лость.

И ны́нѣ, пра́здника.

На стихо́внѣ пра́здника. Сла́ва, гла́съ 3:

Вели́кое украше́ніе святи́телей, Аѳана́сія, непобѣди́маго предста́теля, священнолѣ́пно да восхва́лимъ: се́й бо, ересе́й ссѣ́къ полки́ си́лою Пресвята́го Ду́ха, Правосла́вію побѣ́дная воздви́же по все́й вселе́ннѣй, сочета́я благоче́стно Тро́ическое та́инство сво́йствомъ Ли́цъ, и па́ки совокупля́я несмѣ́сно во еди́но Существа́ то́ждествомъ, и херуви́мски богосло́вя, мо́литъ при́сно о душа́хъ на́шихъ.

И ны́нѣ, пра́здника.



НА ЛИТУРГІИ,

Блаже́нна пра́здника, пѣ́снь рядова́я, и свята́го, пѣ́снь 3-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́емъ, зача́ло 318. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. [Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ]. Ева́нгеліе Матѳе́я, зача́ло 11. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 11 – 16.

/ Къ оглавленію раздѣла /


Наверхъ / Къ титульной страницѣ

0