Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 30 апрѣля 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Текстъ службы въ новой орѳографіи доступенъ здѣсь       

Мѣ́сяца Ма́ія въ 1-й де́нь.
Слу́жба свято́му священному́ченику Мака́рію, митрополи́ту Кíевскому.

ВЕЧЕРЪ,
Блаже́нъ му́жъ.., пе́рвый антифо́нъ. На Го́споди воззва́хъ: стихи́ры, гла́съ 5:

Ра́дуйся, свяще́нная главо́,* Бо́жій избра́нниче Мака́ріе,* ду́шу твою́ за Правосла́вную вѣ́ру положи́вый,* и истерза́ніе тѣлесе́ твоего́ ра́достно претерпѣ́вый,* сего́ ра́ди отъ Го́спода на небеси́ вѣне́цъ прія́лъ еси́.* Того́ у́бо непреста́нно моли́,* спасти́ и просвѣти́ти ду́ши на́ша.

Ра́дуйся, святи́телей красото́,* му́чениковъ честны́й вѣ́нче,* и исповѣ́дниковъ печа́те злата́я,* къ и́хже лико́мъ отъ подвигополо́жника Христа́ причте́нъ бы́лъ еси́,* съ ни́ми же, о Мака́ріе, о на́съ моли́ся,* е́же спасти́ и просвѣти́ти ду́ши на́ша.

Ра́дуйся, слове́сныхъ ове́цъ па́стырю до́брый,* лю́тыхъ волко́въ не убоя́выйся,* но къ ста́ду твоему́ издале́ча потщíйся* и отъ нечести́выхъ ага́рянъ во́льную сме́рть прія́вый,* ду́шу же свою́ въ ру́цѣ Госпо́дни пре́далъ еси́.* Его́же при́сно моли́,* да отъ духо́вныхъ волко́въ огради́тъ ста́до твое́,* ко святы́мъ твои́мъ моще́мъ притека́ющее.

Ра́дуйся, моли́твенниче на́шъ теплѣ́йшій,* свое́ нетлѣ́нное тѣ́ло посредѣ́ це́ркве* во утвержде́ніе наде́жды на́мъ оста́вивый,* и тѣ́мъ утѣше́ніе въ ско́рбѣхъ на́мъ подава́яй,* ду́хомъ же Го́сподеви на небесѣ́хъ предстоя́й,* отъ Него́же ми́ръ испроси́ душа́мъ на́шимъ.

Сла́ва, гла́съ 6:

Преблаже́нне, прему́дре, преблагíй о́тче, кто́ не подиви́тся му́жественному стоя́нію твоему́? Исше́лъ бо на сме́рть а́ки на пи́ръ, и убива́ющихъ тѣ́ло не убоя́лся еси́. Тѣ́мже и мзду́ трудо́въ твои́хъ бога́тно на небеси́ прія́лъ еси́ и со всѣ́ми святы́ми на вѣ́чная времена́ водвори́лся еси́, моли́ о душа́хъ на́шихъ.

И ны́нѣ, пра́здника.
Вхо́дъ, проки́менъ дне́, чте́нія три́.

Проро́чества Иса́іина чте́ніе.

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́, или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи, стихи́ра пра́здника или́ хра́ма.
Сла́ва, свято́му, гла́съ 6:

Пріиди́те, правосла́вныхъ собо́ри, и священному́ченика Христо́ва и исповѣ́дника Правосла́вія, Мака́рія, Кíевскую похвалу́ почти́мъ, то́й бо глаго́лъ Па́вловъ слы́шавъ о Христѣ́, спострада́ти на́мъ могу́щемъ, и моли́тву надъ главо́ю свое́ю чте́нную испо́лнити хотя́, я́ко угото́вася мзда́ архіере́омъ, за Ева́нгеліе Спа́сово пострада́вшимъ, таково́е страда́ніе и сме́рть еще́ сы́й въ пути́ ко гра́ду своему́ изво́ли, и та́ко пу́ть въ небе́сное Ца́рствіе обрѣ́тъ, его́же да не лиши́тъ и на́съ Госпо́дь по моли́твамъ святи́теля Своего́, и да да́руетъ на́мъ пре́жде конца́ покая́ніе.

И ны́нѣ, пра́здника или́ богоро́диченъ: Влады́чице, пріими́ моли́твы ра́бъ Твои́хъ...

На стихо́внѣ стихи́ры, гла́съ 2. Подо́бенъ: До́ме Евфра́ѳовъ:

Архіере́е правосла́вніи,* во гра́дѣ Ви́льнѣ иногда́ собра́вшеся,* ру́цѣ свои́ на главу́ Мака́рія возложи́ша,* но не по мно́зѣхъ же дне́хъ ага́ряне* сію́ свяще́нную главу́ звѣ́рски усѣкну́ша.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Оскудѣ́вшія вѣ́рою* сердца́ на́ша, о святи́телю,* утверди́ въ любви́ Бо́жіей,* и умерщвле́ніе страсте́мъ на́шимъ испроси́,* Христа́ ра́ди умерщвле́ніе прія́вый.

Сти́хъ: Честна́ предъ Го́сподемъ* сме́рть преподо́бныхъ Его́.

Потщи́мся, о бра́тіе, ре́вностію Бо́жіею* сердца́ на́ша испо́лнити,* да спасе́ніе пріи́мемъ* священному́ченика моли́твами.

Сла́ва, гла́съ 8:

О, во́ине Христо́въ неустраши́мый, и гра́да Кíева утѣше́ніе и похвало́, твои́мъ предста́тельствомъ не оста́ви на́съ, но житіе́ на́ше въ ми́рѣ сохрани́, и братолю́бія твоего́ да́ръ на́мъ ниспосли́, да твое́ю па́ствою нарица́тися досто́йни яви́мся.

И ны́нѣ, пра́здника.

Тропа́рь, гла́съ 8: [1]

Боже́ственныя безкро́вныя соверша́я же́ртвы, кро́вь твою́ отъ безбо́жныхъ ага́рянъ излія́нную, въ же́ртву непоро́чную прине́слъ еси́ Влады́цѣ твоему́, Пастыренача́льнику Христу́, Его́же моли́, мо́лимъ тя, проли́ти гнѣ́въ на язы́ки, хотя́щія бра́ней. Благовѣ́рнаго же Импера́тора на́шего [2]. на вся́ враги́ укрѣпи́ и ста́до твое́ отъ вся́кихъ бѣ́дъ неврежде́нно соблюди́. Тебе́ бо крѣ́пкаго засту́пника почита́емъ, но́вый священному́чениче Россíйскій, святи́телю, блаже́нный Мака́ріе.

Инъ тропа́рь, гла́съ 4:

Ко гра́ду твоему́, я́ко па́стырь до́брый поспѣша́я, отъ враго́въ вѣ́ры еще́ въ пути́ сы́й умерщвле́нъ бы́лъ еси́, но свое́ нетлѣ́нное тѣ́ло я́ко немо́лчное науче́ніе, посредѣ́ вели́кія це́ркве гра́да Кíева предложи́лъ еси́, е́же благоговѣ́йно лобыза́юще, мо́лимъ тя́, святи́телю Христо́въ Мака́ріе, моли́ спасти́ся душа́мъ на́шимъ.


НА УТРЕНИ,
По 1-мъ стихосло́віи сѣда́ленъ, гла́съ 3:

Приспѣ́ священному́ченика Мака́рія па́мять, просвѣти́мъ у́бо моли́твою сердца́ на́ша, бра́тіе, да умиле́нія ду́ши на́ша испо́лнятся, и пріи́мемъ отъ Го́спода благода́ть во благовре́менную по́мощь. [Два́жды.]

Сла́ва, и ны́нѣ, пра́здника.

По 2-мъ стихосло́віи, сѣда́ленъ, гла́съ 4:

Свяще́нному твоему́ предстоя́ще гро́бу, о Мака́ріе, святи́телю Христо́въ, му́жественный тво́й по́двигъ те́плѣ воспомина́емъ, покая́ніе о свое́мъ малоду́шіи принося́ще, и твоего́ предста́тельства о на́съ усе́рдно про́симъ, е́же житіе́ на́ше испра́вити и къ подража́нію тебѣ́ устреми́тися. [Два́жды.]

Сла́ва и ны́нѣ, пра́здника.

По поліеле́и сѣда́ленъ, гла́съ 1:

Пріиди́те, е́же моли́твъ ко святы́мъ отмета́ющіися, и ви́дите нетлѣ́ніемъ процвѣ́тшія мо́щи Мака́рія священному́ченика, ка́ко уме́рый живу́щимъ ду́ха жи́зни отъ Го́спода подае́тъ и сердца́ человѣ́ческая во умиле́ніе приво́дитъ, тѣ́мже о свое́мъ ожесточе́ніи раска́явшися, къ моли́твенному ли́ку на́шему приложи́теся. [Два́жды.]

Сла́ва и ны́нѣ, пра́здника.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* смéрть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздадé ми́? Ева́нгеліе Іоа́нна, зача́ло 35 отъ полу́.

Стихи́ра по Ева́нгеліи, гла́съ 6:

Да отве́рзутся сердца́ на́ша, бра́тіе, къ печа́ли небе́сныя сла́вы, е́юже просла́ви Госпо́дь па́стыря на́шего и му́ченика, того́ бо святы́я мо́щи лобыза́ти потщи́мся и до́брѣ намѣ́реніе въ ду́ши на́ша воспріи́мемъ, е́же за вѣ́ру стоя́ти крѣ́пко, ниже́ глаго́лъ Христо́выхъ постыди́тися когда́, но при́сно Спа́са на́шего прославля́ти, да и То́й на́съ исповѣ́сть предъ Отце́мъ Небе́снымъ въ де́нь о́нъ, ку́пно со святы́мъ Мака́ріемъ, предста́телемъ на́шимъ.

Кано́нъ, его́же краегранéсіе си́це: Грѣ́шнаго Анто́нія пріими́, свя́те Мака́ріе, пѣ́снь. Гла́съ 8.

Пѣ́снь 1.

Ирмо́съ: Посѣ́ченный несѣко́маго пресѣче́, и ви́дѣ со́лнце зе́млю, ю́же не ви́дѣ; лю́таго врага́ вода́ потопи́, и непроходи́мое про́йде Изра́иль; пѣ́снь же воспѣва́шеся: Го́сподеви пои́мъ, сла́вно бо просла́вися.

Гряди́, душе́ моя́ лѣни́вая, и къ нетлѣ́ннымъ моще́мъ уго́дника Бо́жія прини́кни, и проси́ Го́спода твоего́, е́же досто́йно святи́теля Мака́рія просла́вити и умиле́ніе стяжа́ти.

Ра́зумъ Христо́въ стяжа́ти Мака́рій потща́вся, я́ко до́брый па́стырь отъ всѣ́хъ познава́ется, тѣ́мже и святи́тельскаго са́на досто́инъ явля́ется, его́же му́ченическимъ вѣнце́мъ Бо́гъ украси́.

Ѣхати хощу́ до гра́да моего́ Кíева, — рече́ Мака́рій блаже́нный, архіере́йскій са́нъ воспрія́въ и отъ люде́й препина́емый, да не вдае́тся опа́сному путеше́ствію, ага́ряномъ та́мо ри́щущимъ.

Шу́ма во́дъ жите́йскихъ не убо́йся, душе́ моя́, Госпо́дню во́лю твори́ти гряду́щи: бо́йся же то́чію грѣха́ и гнѣ́ва Бо́жія, я́коже святы́й Мака́рій тебе́ науча́етъ.

Ника́коже о себѣ́ пекíйся, но о душа́хъ па́ствы своея́, возгрѣва́я ре́вность, посѣче́нія ме́чнаго не устраши́ся Мака́рій блаже́нный, зане́ ме́чь то́й Ца́рствіе Небе́сное исповѣ́днику отве́рзе.

Богоро́диченъ: Порабоще́нный сластьми́ у́мъ мо́й, Влады́чице и Блага́я Еди́на, свободи́, и раба́ и́стиннѣйшаго благи́ми дѣ́лы Твоего́ сы́на мя́ покажи́, я́ко да по до́лгу сла́влю Тя́.

Пѣ́снь 3.

Ирмо́съ: Утверди́ся се́рдце мое́ въ Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Аще и зѣло́ грѣ́шенъ е́смь и малоду́шенъ, но къ твоему́ предста́тельству, о священному́чениче, прибѣга́ю, да вся́кому земно́му стра́ху посмѣява́тися мя́ научи́ши.

Гра́дъ тво́й соблюда́й моли́твами твои́ми, Мака́ріе прему́дрый, а́ще бо того́ въ земнѣ́мъ твое́мъ житіи́, а́ки святи́тель не узрѣ́лъ еси́, но о́ный твое́ нетлѣ́нное тѣ́ло со благоговѣ́ніемъ при́сно содержи́тъ и заступле́нія твоего́ про́ситъ.

Онаго гра́да небе́снаго жела́ніе въ душа́хъ жи́телей свяще́ннаго гра́да Кíева и всего́ оте́чествія на́шего обновля́й, о́тче, твои́ми моли́твами, и жела́ній плотски́хъ ста́до твое́ изба́ви.

Ангелъ храни́тель на́мъ, святи́телю Мака́ріе, бу́ди, да свяще́нную зе́млю предѣ́ловъ Кíевскихъ попира́юще, досто́йни согра́ждане здѣ́ подвиза́вшихся мно́гихъ уго́дниковъ Бо́жіихъ бу́демъ.

Богоро́диченъ: Богоблагода́тная Чи́стая, съ го́рними чи́нми, со всѣ́ми му́дрыми апо́столы, и му́ченики святы́ми, и проро́ки, умоли́ Сы́на Твоего́, я́ко да коне́чное разрѣше́ніе грѣхо́въ пріи́мемъ.

Конда́къ, гла́съ 8: [3]

Весели́тся гра́дъ Кíевъ, вели́кое сокро́вище стяжа́въ, твое́ тлѣ́нію неприча́стное тѣ́ло, святи́телю блаже́нный Мака́ріе. Тво́й бо престо́лъ да́же до кро́ве отъ лю́тыхъ враго́въ наше́ствія храни́лъ еси́, и ны́нѣ небе́сному предстои́ши престо́лу, идѣ́же моли́твенно предъ Творце́мъ помина́й насъ, о́тче на́шъ, да во всѣ́хъ бѣда́хъ имѣ́емъ тя прибѣ́жище и тобо́ю хва́лимся, зову́ще: ра́дуйся Мака́ріе, архіере́омъ честно́е украше́ніе.

Сѣда́ленъ, гла́съ 4:

Предста́телю ду́шъ на́шихъ ми́лостивый, и твоего́ гра́да щи́те и покро́ве, Мака́ріе му́чениче дерзнове́нне, и архіере́ю пречестны́й, твои́ми моли́твами правосла́вную вѣ́ру во странѣ́ на́шей утверди́, и ересе́й вся́кое ухищре́ніе отъ на́съ дале́че отжени́, да во свѣ́тѣ и́стины до́брѣ ходя́ще, сподо́бимся обрѣсти́ благода́ть въ де́нь су́дный. [Два́жды.]

Сла́ва, и ны́нѣ, пра́здника.

Пѣ́снь 4.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́.

На́шего па́стыря до́браго, ду́шу свою́ о лю́дехъ положи́вшаго, любо́вію просла́вимъ, бра́тіе, но не словесы́ то́чію, па́че же дѣя́ньми, ре́вности Бо́жія и братолю́бія испо́лненными.

Твои́мъ моще́мъ, святи́телю Мака́ріе, покланя́ющіися лю́діе жела́ніемъ спасе́нія сердца́ своя́ исполня́ютъ, и су́етнаго житія́ устраня́ются, и́хже моли́твами твои́ми въ се́мъ до́бромъ намѣ́реніи утверди́.

Охрани́ на́съ, Го́споди, отъ колеба́ній грѣхо́вныхъ святи́теля Мака́рія непреста́нными моли́твами, да вѣ́рни за́повѣдемъ Твои́мъ пребы́вше, небе́снаго Ца́рствія съ блаже́ннымъ па́стыремъ на́шимъ сподо́бимся.

Ника́коже да поколе́блется правосла́вныхъ вѣ́ра во гра́дѣ святи́теля Мака́рія пребыва́ющихъ, но да привлече́тъ и маловѣ́рныхъ его́ святы́мъ моще́мъ вѣ́рою покланя́тися.

Іерусали́му го́рнему граждани́нъ Мака́рій священному́ченикъ а́ще и яви́ся, но и свяще́ннаго гра́да нетлѣ́нною пло́тію граждани́нъ пребыва́етъ, и моли́твою свое́ю моля́щимся къ го́рнему гра́ду возноси́тися посо́бствуетъ.

Богоро́диченъ: Еди́на Бо́га воплоти́вшагося ро́ждшая, Всепѣ́тая, Того́ моли́ въ де́нь стра́шный вся́ ны́ спасти́, и му́ки изба́вити, живота́ же вѣ́чнаго и свѣ́та сподо́би со всѣ́ми до́брѣ угоди́вшими.

Пѣ́снь 5.

Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.

Язвы души́ моея́ исцѣли́ предста́тельствомъ твои́мъ, о́тче преподо́бне, я́звы тѣле́сныя за Христа́ ра́достно прія́вый и отъ нерадѣ́нія исцѣли́ мое́ грѣхо́вное се́рдце.

Привожду́ въ моли́тву о мнѣ́, Го́споди, Мака́рія священному́ченика, да пода́си ми́ грѣхо́въ оставле́ніе, и уны́нія вся́каго изба́виши ду́шу мою́, въ моли́твѣ же да́руеши постоя́ніе.

Рѣки́ При́пяти брега́ кро́вію святи́теля Мака́рія ороси́шася, да орося́тся же очеса́ на́ша покая́нія слеза́ми, зане́ николи́же же́ртва Бо́жія бы́хомъ, но во́лю врага́ Его́ твори́ти ревнова́хомъ.

Іису́са Го́спода возлюби́въ Мака́рій священному́ченикъ, за Того́ бра́тій ме́ньшихъ живо́тъ сво́й положи́, тѣ́мже и на́съ отъ чудотво́рнаго гро́ба своего́ науча́етъ, бли́жнія, я́ко себе́ самѣ́хъ люби́ти.

Иже о сла́вѣ церко́внѣй ревну́ющіи христіа́не, о животѣ́ вре́меннѣмъ небреги́те, зане́ невозмо́жно е́сть двѣма́ господи́нома рабо́тати, па́че же моли́те свята́го Госпо́дня, да и на́мъ му́жество души́ отъ Христа́ исхода́тайствуетъ.

Мака́ріе, святи́телю Христо́въ, мно́жества люде́й предстоя́щихъ моли́твъ не отврати́, но я́ко кади́ло благово́нное сія́ пріе́мь, къ Престо́лу Госпо́дню со свои́ми вознеси́ святы́ми моли́твами.

Богоро́диченъ: Всесвята́я Дѣ́во, Сло́во Всесвято́е роди́вшая, души́ моея́ вся́кое уны́ніе и печа́ль отжени́, и благоуспѣ́й мо́й по́мыслъ боже́ственная дѣ́яти, да вѣ́рою и любо́вію сла́влю Тя́.

Пѣ́снь 6.

Ирмо́съ: Іо́ну въ ки́тѣ, Го́споди, еди́наго всели́лъ еси́, мене́ же свя́зана мре́жами вра́жіими, я́ко отъ тли́ о́наго, спаси́.

Имаши, душе́ моя́, святы́я ре́вности о́бразъ, и ко сме́рти безстра́шія небе́снаго ра́ди Ца́рствія, одержа́тели бо си́хъ на земли́ умро́ша и па́мять и́хъ поги́бе, святы́й же, а́ки жи́въ предлежи́тъ очесе́мъ твои́мъ нетлѣ́ненъ.

Священному́ченикъ Мака́рій, я́ко Іо́на проро́къ, свою́ сме́рть о́бщаго ра́ди спасе́нія предложи́, тѣ́мже живота́ вѣ́чнаго и са́мъ сподо́бися, и на́ше житіе́ къ тому́ моли́твами свои́ми возво́дитъ.

Вои́стину оте́цъ лю́демъ твои́мъ бы́лъ еси́, Мака́ріе святи́телю Христо́въ, зане́же и́нокъ сы́й оби́тели Ви́ленскія о просвѣще́ніи кни́жномъ правосла́вныхъ христіа́нъ попече́ніе при́сное явля́лъ еси́.

Яко твоея́ па́ствы кíевскія ча́да, мо́лимъ тя́, священному́чениче, и на́мъ свы́ше духо́вное просвѣще́ніе неви́димо подава́й, да разсужде́нію добра́ и зла́ чу́вствія на́ша науча́тся.

Богоро́диченъ: Пое́мъ Тя́ вѣ́рніи, Богоблагода́тная Влады́чице, препѣ́таго бо Бо́га пло́тію родила́ еси́: Его́же умоли́, Нескве́рная, гра́ду и лю́демъ Твои́мъ въ ми́рѣ спасти́ся.

Конда́къ, гла́съ 3. Подо́бенъ: Дѣ́ва дне́сь.

Въ мíрѣ сы́й не отъ мíра бы́лъ еси́, но небе́сный граждани́нъ еще́ отъ мла́дости твоея́ показа́лся еси́, тѣ́мже святи́тельскимъ са́номъ досто́йно почте́нъ, еще́ и му́ченическимъ вѣнце́мъ украси́лся еси́, о́тче преподо́бне, Христа́ Бо́га моли́ дарова́тися на́мъ ве́ліей ми́лости.

Икосъ:

Гра́дъ Ви́льна твои́мъ житіе́мъ, святи́телю, хва́лится, о твои́хъ трудѣ́хъ, моли́твенныхъ же и кни́жныхъ, свидѣ́тельствуя, но свяще́нный Кíевъ нетлѣ́ніемъ моще́й твои́хъ прославля́ется, и́мже безчи́сленніи лю́діе покланя́ющеся, Го́спода славосло́вятъ, тебе́ же непреста́нно вопію́тъ: о́тче преподо́бне, Христа́ Бо́га моли́, дарова́тися на́мъ ве́ліей ми́лости.

Пѣ́снь 7.

Ирмо́съ: На по́ли Деи́рѣ иногда́ мучи́тель пе́щь поста́ви на муче́ніе богоно́сныхъ, въ не́й же тріе́ о́троци пѣсносло́вяху Еди́наго Бо́га, тро́ично воспѣва́ху, глаго́люще: отце́въ Бо́же, благослове́нъ еси́.

Тебе́, святи́телю Христо́въ, мо́лимъ: зри́ши отъ небе́съ благоче́стія въ земли́ на́шей оскудѣ́ніе, зри́ши ду́шъ человѣ́ческихъ уны́ніе, у́бо отъ Ду́ха Бо́жія, на Тебѣ́ почи́вшаго, дарова́нія вѣ́ры тве́рдыя ка́ющимся пода́ждь.

Егда́ са́нъ іера́ршескій на земли́ воспрія́лъ еси́, Мака́ріе святи́телю, тогда́ свята́я Це́рковь Правосла́вная въ угнете́ніи пребыва́ше, но твои́ми по́двиги крѣ́пость пріима́ше, ны́нѣ у́бо къ тебѣ́ моли́твенныя ру́цѣ подъе́млетъ, твоея́ прося́ще по́мощи.

Мака́ріе, священному́чениче и па́стырю, не оста́ви ста́до твое́ лю́тымъ волко́мъ на расхище́ніе, но си́хъ уста́ ху́льная загради́, вѣ́рныя же въ вѣ́рѣ утверди́.

Апо́стола Наѳана́ила сомня́щася дре́вле Христо́съ сло́вомъ вѣ́ру утверди́, подъ смоко́вницею сѣдя́ща сего́ ви́дѣти ре́къ. Убо и ты́, святи́телю, сомня́щимся отверза́й душе́вныя о́чи, да и тíи вѣ́рою Христа́ исповѣ́дятъ.

Кни́га ра́зума испо́лненная, и вся́кое сомнѣ́ніе отщетева́ющая ра́ка чудотво́рныхъ моще́й твои́хъ на́мъ явля́ется. Не ослѣпля́йте у́бо оче́съ ва́шихъ, лю́діе, но у́мъ сво́й и се́рдце къ покая́нію и вѣ́рѣ отве́рзти потщи́теся.

Богоро́диченъ: Яко престо́лъ огнезра́чный Царя́ но́сиши Твоего́, Его́же умоли́, Дѣ́во, Ца́рствія сподо́бити мя́, пѣсносло́вяща вѣ́рно предста́тельство Твое́.

Пѣ́снь 8.

Ирмо́съ: Покрыва́яй вода́ми превы́спренняя своя́, полага́яй мо́рю предѣ́лъ песо́къ и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Аще и вѣ́ру и́стинную содержу́ во умѣ́ свое́мъ, святи́телю, но хла́дна и боязли́ва е́сть душа́ моя́, оба́че на тво́й му́ченическій взира́я по́двигъ, по́мощь твою́ призыва́ю, да огня́ любве́ Бо́жія да́ръ испро́сиши се́рдцу моему́.

Ре́вность твоя́ о вѣ́рѣ подо́бна тѣ́хъ блаже́нныхъ бы́сть о́трокъ, и́же въ пе́щь о́гненную вше́дше, Го́спода та́мо просла́виша. Ты́ же проповѣ́данія сла́вы Бо́жія ра́ди, въ пу́ть сме́ртный му́жески устреми́лся еси́.

Іису́са Христа́ глаго́лъ страда́льцевъ за вѣ́ру ублажа́ющій, на тебѣ́, о́тче, исполне́ніе сугу́бо прія́тъ, не то́чію бо на небеси́ ра́дость тебѣ́ даде́ся, но и здѣ́ на земли́ сла́ва твоя́ всю́ду проповѣ́дуется.

Егда́ сія́ сла́ва возмогла́ бы ду́шу твою́ ра́довати, а́ще бы не сугу́бую ра́дость ду́хъ тво́й прія́тъ е́же проше́нія человѣ́къ слы́шати и исполня́ти, я́коже рече́ Христо́съ: блаже́ннѣе е́сть па́че дая́ти, не́жели пріима́ти. Убо и на́ша пріими́ смире́нныя моли́твы.

Богоро́диченъ: Послѣ́довати мнѣ́, Всечи́стая, преподо́бно пожи́вшимъ, жи́тельствомъ добродѣ́тельнымъ сотвори́, враги́ поража́ющи, неща́дно мя́ оскорбля́ющія, и къ плотски́мъ ползу́щу страсте́мъ непреста́нно стужа́ющія, да ра́дуяся зову́: лю́діе, превозноси́те Христа́ во вѣ́ки.

Пѣ́снь 9.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Пѣ́снь возсле́мъ Го́споду Бо́гу Изра́илеву, Иже не́бо звѣзда́ми украси́вый и Це́рковь Свою́ свѣ́точами благоче́стія и пра́вды при́сно вѣнча́етъ, да во слѣ́дъ и́хъ теку́ще, лю́діе къ вѣ́чному свѣ́ту возво́дятся.

Ѣжде́ніе Бо́жіе на небеси́ просла́ви со стра́хомъ проро́къ Авваку́мъ, мы́ же обнесе́ніе моще́й твои́хъ вкру́гъ вели́кія це́ркве на ко́ждо лѣ́то творя́ще со безчи́сленными людьми́ по́мощь твою́ призыва́емъ.

Сло́во Бо́жіе изъ у́стъ твои́хъ лю́демъ изоби́льно проповѣ́дашеся, ны́нѣ же нетлѣ́нное твое́ тѣ́ло безмо́лвно си́лу Бо́жію проповѣ́дуетъ. Еюже огради́ ста́до твое́, блаже́нне.

На́шего усе́рдія не омерзи́, святи́телю Бо́жій, и неразумѣ́нія на́шего не возгнуша́йся, но отъ вѣ́рующихъ серде́цъ пѣ́снь сложе́нную пріими́ и благода́ти да́ръ на́мъ отъ Го́спода низпосли́.

Богоро́диченъ: Боголюби́вая Дѣ́во, блага́го моли́ Сы́на Твоего́ и Го́спода вы́ну, озло́бленую прило́гми душетли́теля змíя, и изнемо́гшую мою́ ду́шу исцѣли́ти и спасти́, и вся́кими ублажи́ти свѣтоно́сными восхожде́нми.

Свѣти́ленъ пра́здника.
Сла́ва, свято́му. Подо́бенъ: Ду́хомъ во святи́лищи.

Ду́хомъ твои́мъ, святи́телю Мака́ріе, при́сно съ на́ми пребу́ди и не преста́ни па́ству твою́ те́плымъ предста́тельствомъ заступа́ти, я́ко вѣ́ры учи́тель и іера́рхъ и му́ченикъ, Го́споду зѣло́ уго́дный.

И ны́нѣ, пра́здника.

На хвали́техъ стихи́ры на 6: пра́здника 3 и свята́го 3, гла́съ 4. Подо́бенъ: Зва́нный свы́ше.

Зва́нный отъ Бо́га* гла́сомъ церко́внымъ* и на престо́лъ святи́тельскій превознесе́нъ бы́въ,* и са́мъ на пу́ть Госпо́день* призыва́лъ еси́ бли́жнихъ свои́хъ* уче́ніемъ кни́жнымъ* и моли́твою тѣ́хъ просвѣща́я,* и о́бразъ ре́вности о Правосла́віи всѣ́мъ показу́яй.* Тѣ́мже и мы́ вѣ́ру оте́цъ на́шихъ* до́брѣ содержа́ще,* воспѣва́емъ тя́ любо́вію,* о́тче преподо́бне.

Умиле́ннымъ се́рдцемъ* и душе́ю благоговѣ́йною* блаже́ннаго засту́пника на́шего* воспѣва́юще, бра́тіе,* на подража́ніе ему́ подви́гнемся* и въ братолю́біи до́брѣ* подвиза́тися бу́демъ,* вре́менную жи́знь на́шу* ни во что́ же вмѣня́юще,* но о гряду́щей при́сно помышля́юще,* ея́же сподо́би на́съ, свя́те,* къ Бо́гу моли́твами твои́ми.

Исцѣле́нія чу́дная,* бы́вшая отъ моще́й твои́хъ,* святи́телю, памяту́юще,* ны́нѣ на моле́ніе собра́хомся,* да и на гряду́щая времена́* ми́лость твою́ отъ на́съ не удали́ши,* но я́ко ча́да твоя́* на́съ отъ небе́съ назира́еши* и вся́, я́же душа́мъ на́шимъ и тѣлесе́мъ,* потре́бная отъ Бо́га испроси́ на́мъ,* я́ко Христо́въ слуга́* и лю́демъ па́стырь до́брый.

Сла́ва, гла́съ 2:

Дне́сь прославля́ется священному́ченика Мака́рія па́мять, дне́сь христіа́нстіи ро́ди духо́вно торжеству́емъ, си́лы небе́сныя ра́дуются о сла́вѣ му́ченика и со́нмъ святи́телей съ ли́комъ преподо́бныхъ ликовству́етъ, мы́ же, я́ко научи́хомся, вопіе́мъ: Го́споди, предста́тельствомъ свята́го Твоего́ и Пречи́стыя Твоея́ Ма́тере, проще́ніе грѣхо́въ на́шихъ пода́ждь и душа́мъ на́шимъ низпосли́ ми́ръ и ве́лію ми́лость.

[И ны́нѣ, пра́здника.
Славосло́віе вели́кое. Ектеніи́ и отпу́стъ.]



НА ЛИТУРГІИ,

Блаже́нна пра́здника, пѣ́снь рядова́я на 4, и священному́ченика, пѣ́снь 6 на 4. Проки́менъ, гла́съ 7: Восхва́лятся преподо́бніи во сла́вѣ* и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, хвале́ніе Его́ въ це́ркви преподо́бныхъ. Апо́столъ ко Евре́емъ, зача́ло 334. Аллилу́ія, гла́съ 2: Свяще́нницы Твои́ облеку́тся въ пра́вду, [и преподо́бніи Твои́ возра́дуются. Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ]. Ева́нгеліе отъ Луки́, зача́ло 67. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Примѣчанія:
[1] Тропарь исправленъ по изданію: С. В. Булгаковъ. Настольная книга для священно-церковно-служителей. (Сборникъ свѣдѣній, касающихся преимущественно практической дѣятельности отечественнаго духовенства). — Изданіе третье, исправленное и дополненное. — Кіевъ: Типографія Кіево-Печерской Лавры, 1913. — С. 166.
[2] Въ кіевскомъ изданіи 2007 года: «Страну́ на́шу...»
[3] Источникъ: С. В. Булгаковъ. Настольная книга для священно-церковно-служителей.., С. 166.

Источникъ: Пече́рская Минíа. [Ча́сть втора́я.] — Кíевъ: Въ тѵпогра́фіи Кíево-Пече́рскія Ла́ѵры, 2007. — С. 57-69.

/ Къ оглавленію раздѣла /


Наверхъ / Къ титульной страницѣ

0