Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 1-й де́нь.
Слу́жба преподо́бнаго отца́ на́шего Пафну́тія Бо́ровскаго.

ВЕЧЕРЪ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры, гла́съ 2. Подо́бенъ: Егда́ отъ дре́ва.

Преподо́бне о́тче блаже́нне Пафну́тіе, ты́ отъ ю́ности добродѣ́тели прилѣ́жно возлюби́лъ еси́, сме́ртное попече́ніе въ се́рдцы стяжа́въ, я́ко кро́токъ, и ми́лостивъ, и чи́стъ бы́лъ еси́, у́мъ тво́й безстра́стіемъ просвѣти́въ и боже́ственнымъ смире́ніемъ украси́въ. Вѣ́рою и любо́вію твою́, пресла́вне, па́мять чту́щимъ моли́ спасти́ся къ Бо́гу твои́ми моли́твами.

Преподо́бне о́тче Пафну́тіе всехва́льне, любо́вь имѣ́лъ еси́, соверше́ніе добродѣ́телей, оби́тели твоея́ врата́ отве́рзлъ еси́, ни́щимъ бы́въ покро́въ и прибѣ́жище и всѣ́мъ вся́къ бы́лъ еси́, оби́димымъ помога́лъ еси́, печа́льныя утѣша́я, я́ко оте́цъ чадолюби́въ. Сего́ ра́ди почита́емъ тя́ и свѣтоно́сную па́мять твою́ пра́зднуемъ, богоблаже́нне.

Ины стихи́ры, гла́съ 8. Подо́бенъ: О, пресла́внаго чудесе́!

Преподо́бне о́тче прему́дре Пафну́тіе,* слѣпы́мъ подае́ши свѣ́тъ,* боля́щимъ исцѣле́ніе,* хромы́мъ здра́віе.* Ми́лостивно прекланя́ешися* къ приходя́щимъ вѣ́рою къ ра́цѣ моще́й твои́хъ* и прося́щимъ по́мощи твоея́:* тебе́ бо засту́пника, и предста́теля,* и храни́теля, вѣ́рніи вси́, обрѣто́хомъ, восхваля́юще тя́.

Преподо́бне о́тче всече́стне Пафну́тіе,* до́брыми добродѣ́тельми возше́дъ на колесни́цу,* къ Бо́гу восте́клъ еси́,* побѣ́дныя по́чести пріе́мля:* я́ко ми́лоть, на́мъ тѣ́ло твое́, положе́но во гро́бѣ,* о́тче, оста́вилъ еси́ источа́ти исцѣле́ніе,* прогони́ти ду́хи лука́выя.* Тѣ́мъ блажи́мъ тя́, прехва́льне.

Лико́мъ по́стническимъ сочета́лся еси́,* по́стническимъ житіе́мъ украси́вся,* блаже́нне Пафну́тіе,* и ны́нѣ на небесѣ́хъ живе́ши, веселя́ся,* идѣ́же лику́ютъ а́нгели.* И свѣ́томъ вои́стинну Боже́ственнымъ обожа́емь,* помина́й вы́ну* блажа́щихъ тя́ на земли́* и пресвято́е твое́ пра́зднующихъ успе́ніе.

Сла́ва, гла́съ 6:

Еже по о́бразу соблю́дъ невреди́мо, у́мъ влады́ку на стра́сти па́губныя по́стнически поста́вивъ, во е́же по подо́бію я́ко мо́щно возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему и пло́ть порабо́тити ду́ху. Тѣ́мже мона́шествующихъ яви́лся еси́ ве́рхъ, жи́тель пусты́нный, благотеку́щихъ обучи́тель, пра́вило добродѣ́тели извѣ́стнѣйшее. И ны́нѣ на небесѣ́хъ зерца́ломъ разрѣ́шшимся, о́тче на́шъ Пафну́тіе, чи́стѣ зри́ши Святу́ю Тро́ицу, моля́ся несре́дственнѣ о и́же вѣ́рою и любо́вію чту́щихъ тя́.

И ны́нѣ, пра́здника.
Вхо́дъ, проки́менъ дне́. Чте́нія три́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 8:

Вре́менная презря́ и до́льняя, богому́дре, высо́кая и пребыва́ющая возлюби́лъ еси́ боже́ственнымъ раче́ніемъ: кре́стъ бо тво́й поне́съ на ра́мѣ, ева́нгельски Бо́га возлюби́лъ еси́. Поще́ніемъ му́жески побѣди́въ бѣсо́вскія полки́, съ небе́сными весели́шися ли́ки, я́ко непобѣди́мь. го́рнихъ хра́ма жела́я, безконе́чныя жи́зни сподо́бился еси́. Но моли́ся, богоно́се Пафну́тіе, Спа́су всѣ́хъ умири́ти мíръ и спасти́ ду́ши на́ша.

Пріиди́те, стецы́теся, и́ноческая чета́ боголюби́вая, къ боже́ственнѣй па́мяти отца́ на́шего Пафну́тія: се́й бо отъ ю́ны версты́ взя́тъ и́го Христо́во на ся́. Тѣ́мъ и отъ Него́ прія́тъ да́ръ чудодѣ́йствія и христолюби́вымъ князе́мъ учи́тель бы́въ пра́выя вѣ́ры, вельмо́жамъ тве́рдое защище́ніе, си́рымъ, я́ко оте́цъ милосе́рдъ, вдова́мъ те́плое заступле́ніе, скорбя́щимъ утѣше́ніе, ни́щимъ сокро́вище неоску́дное. И, оби́тели твоея́ врата́ отве́рсты ни́щимъ всегда́ имѣ́я, въ гла́дное лѣ́то вся́ препита́лъ еси́, приходя́щія въ до́мъ Пречи́стыя. И во гряду́щее лѣ́то моли́твою твое́ю плодо́въ умноже́ніе отъ Христа́ испроси́лъ еси́ а́лчущимъ лю́демъ. И кня́зя, вражду́ иму́ща на тя́, моли́твою твое́ю отъ ага́рянскихъ ру́къ изба́вивъ, согрѣше́ній проще́ніе ему́ по́далъ еси́, о́нъ же ве́лію вѣ́ру къ тебѣ́ стяжа́. И ага́рянину новокреще́нну, хотя́щу зажещи́ твое́ жили́ще, запреще́ніемъ твои́мъ слѣпоту́ наве́дъ, пока́явшуся же ему́, моли́твою свѣ́тъ очи́ма его́ дарова́лъ еси́. Тѣ́мъ и мы́ мо́лимъ тя́: изба́ви на́съ отъ вра́гъ ви́димыхъ и неви́димыхъ и моли́ся Христу́ Бо́гу умири́ти мíръ и спасти́ ду́ши на́ша.

Преподо́бне и богоблаже́нне Пафну́тіе, поучи́вся во дни́ и въ нощи́ въ за́повѣдехъ Госпо́днихъ, сподо́бился еси́ обрѣсти́ лѣ́ствицу небе́сную, по не́йже возше́дъ, дости́глъ еси́ го́рняго Іерусали́ма, и, отъ болѣ́зней и трудо́въ досто́йну по́честь пріе́мля, со а́нгельскими ли́ки ны́нѣ ра́дуешися, и Боже́ственнаго зрѣ́нія наслажда́ешися Единосу́щныя Тро́ицы. Тѣ́мже и на́съ помина́й, предстоя́ у престо́ла всѣ́хъ Царя́ Христа́ и Бо́га на́шего. Аще бо и тѣле́снѣ язы́къ тво́й умолче́, но чудеса́ свидѣ́тельствуютъ, Россíйская же земля́ вельми́ тобо́ю хва́лится: имѣ́ю бо, — рече́, — въ себѣ́ сокро́вище неистоща́емое. Са́ми бо, зря́ще честну́ю ра́ку моще́й твои́хъ и чудеса́ быва́емая, прославля́ютъ просла́вльшаго тя́ Го́спода. Тѣ́мже, дерзнове́ніе имѣ́я къ Нему́, и на́мъ испроси́ оставле́ніе грѣхо́въ и ве́лію ми́лость.

Сла́ва, гла́съ 6:

Отче преблаже́нне Пафну́тіе, пусты́нный бы́въ жи́телю, и́же мíръ оста́вивъ, и бы́сть удруча́я тѣ́ло твое́ посто́мъ, и бдѣ́ніемъ, и труды́, зи́му терпя́, и въ наготѣ́ пребыва́я, въ моли́твахъ же у́мъ тво́й возводя́ къ небе́сному Ца́рствію. И ны́нѣ со а́нгелы водворя́ешися во свѣ́тѣ Присносу́щныя Тро́ицы. Тѣ́мъ и о на́съ моли́ся Человѣколю́бцу Бо́гу, сохрани́тися на́мъ отъ сѣте́й лука́ваго и сподо́битися десна́го стоя́нія въ де́нь стра́шнаго суди́ща Христо́ва, твои́ми, свя́те, моли́твами. И си́це хва́ляще тя́, рце́мъ: ра́дуйся, свѣти́льниче многосвѣ́тлый, возводя́ ко Христу́ мона́ховъ мно́жество; ра́дуйся, странѣ́ Россíйстѣй похвала́ и утвержде́ніе, и всѣ́мъ вѣ́рнымъ благоути́шное приста́нище, и очище́ніе боля́щимъ во грѣсѣ́хъ, и на Боже́ственное тѣ́хъ возвыша́я раче́ніе. Тѣ́мъ, пречестну́ю твою́, и святу́ю, и а́нгеломъ говѣ́йную обстоя́ще ра́ку, любе́зно облобыза́емъ и Боже́ственнаго человѣколю́бія про́симъ получи́ти твои́ми къ Бо́гу моли́твами, и мíру ми́ръ дарова́ти и душа́мъ на́шимъ ве́лію ми́лость.

И ны́нѣ, пра́здника.

На стихо́внѣ стихи́ры, гла́съ 1. Подо́бенъ: Всехва́льніи му́ченицы.

Отче преподо́бне Пафну́тіе,* твоя́ кра́сная па́мять* по́стниковъ собра́ніе весели́тъ до́брѣ,* твое́ же житіе́* и чуде́съ благода́ть,* и е́же дарова́ній свѣтлостьми́.* Христа́ моли́* дарова́ти душа́мъ на́шимъ* ми́ръ и ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Отче преподо́бне Пафну́тіе,* твоего́ уста́ва по́стнаго* проти́вніи убоя́шася* и про́кляти бы́ша твои́ми моли́твами* непреста́нными, всехва́льне:* Христа́ бо содѣ́тельствующа стяжа́въ,* Его́же моли́* дарова́ти душа́мъ на́шимъ* ми́ръ и ве́лію ми́лость.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Отче преподо́бне Пафну́тіе,* Христа́ возлюби́въ,* вся́ко Того́ Боже́ственнымъ стопа́мъ* послѣ́довалъ еси́, Кре́стъ взе́мъ,* пло́ть умертви́лъ еси́,* и живе́ши, богоно́се, ду́хомъ.* И ны́нѣ моли́* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Пафну́тіе: твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви поми́ловатися душа́мъ на́шимъ.

И ны́нѣ, пра́здника.

Тропа́рь, гла́съ 4:

Житія́ свѣ́тлостію просвѣти́въ твое́ оте́чество, въ моли́твахъ и постѣ́хъ дарова́ній Боже́ственнаго Ду́ха испо́лнился еси́, и, во вре́меннѣй се́й жи́зни до́брѣ подвиза́вся, ми́лость благоутро́бія всѣ́мъ скорбя́щимъ отве́рзлъ еси́, и ни́щимъ бы́лъ еси́ засту́пникъ. Тѣ́мъ мо́лимъ тя́, о́тче Пафну́тіе, моли́ Христа́ Бо́га, да спасе́тъ ду́ши на́ша.


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, свята́го. И ны́нѣ, пра́здника.

По 1-й каѳи́смѣ, сѣда́ленъ пра́здника.

По 2-й [каѳи́смѣ,] сѣда́ленъ свята́го, гла́съ 4. Подо́бенъ: Ско́ро предвари́.

Го́рняго жела́я премíрнаго живота́, мíра красоту́ и я́же въ не́мъ тлѣ́нная оста́вивъ, преподо́бне, тѣ́мже, въ пусты́няхъ и въ верте́пахъ всели́вся, гра́да небе́снаго показа́лся еси́ граждани́нъ, въ не́мже помяни́ соверша́ющихъ твою́ па́мять. [Два́жды.]

Сла́ва, и ны́нѣ, богоро́диченъ:

Нечи́стыхъ помысло́въ мои́хъ мно́жество и безмѣ́стныхъ мы́слей обурева́нія кто́ изрещи́ мо́жетъ, Всенепоро́чная? Настоя́нія же безпло́тныхъ вра́гъ мои́хъ кто́ исповѣ́сть и си́хъ зло́бы? Но Твое́ю мольбо́ю, Блага́я, си́хъ мнѣ́ всѣ́хъ избавле́ніе да́руй.

По поліеле́и сѣда́ленъ, преподо́бнаго, гла́съ 8. Подо́бенъ: Прему́дрости.

Воздержа́нія по́томъ по́стнымъ погаси́лъ еси́ пла́мень страстны́й, пло́ть бо умертви́лъ еси́, преподо́бныхъ житію́ досто́йно поревнова́въ, Бо́жій показа́лся еси́ уго́дникъ, блаже́нне, тѣ́мже къ ре́вности боже́ственнаго житія́ твоего́ ли́ки совокупи́лъ еси́ мона́шествующихъ, сла́вне. Тѣ́мже, соше́дшеся по до́лгу, почита́емъ всечестну́ю па́мять твою́ моле́бне: преподо́бне богоно́се Пафну́тіе, моли́ Христа́ Бо́га согрѣше́ній оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Ми́лостиваго Сло́ва и милосе́рдаго я́ко ро́ждшая, Влады́чице, всѣ́хъ поми́луй, къ Тебѣ́ прибѣга́ющихъ, напа́стей, и болѣ́зней, и вся́каго озлобле́нія, и вѣ́чнующаго пла́мене свободи́, я́ко да благода́рственно мно́гихъ щедро́тъ Твои́хъ бога́тство просла́вимъ и безмѣ́рную ми́лость и вопіе́мъ Ти́ всегда́: моли́ Христа́ Бо́га грѣхо́въ оставле́ніе пода́ти покланя́ющимся вѣ́рою Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе Матѳе́я, зача́ло 43. Воскресе́ніе Христо́во... Псало́мъ 50-й.

Стихи́ра самогла́сна, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ пра́здника со ирмосо́мъ на 6 и свята́го на 8.

Кано́нъ преподо́бнаго Пафну́тія, творе́ніе ученика́ его́ Инноке́нтія, и́нока тоя́же оби́тели, гла́съ 1.
Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Но́во тебѣ́ пѣ́ніе принести́ моле́бно во отверзе́ніе у́стъ мои́хъ, Пафну́тіе богому́дре, пода́ждь ми́ твои́ми моли́твами благода́ть, да воспою́ тя.

Страсте́й омраче́ніемъ порабоще́на, о́тче, свѣ́тлыми твои́ми моли́твами, преподо́бне Пафну́тіе, ны́нѣ свободи́, да я́ко Христо́ва тя́ раба́ боже́ственными воспою́ пѣ́сньми, я́ко просла́вися.

Христу́ прилѣпля́яся отъ ю́ности, блаже́нне, умо́мъ очище́ннымъ, чистото́ю и цѣлому́дріемъ тѣле́снымъ ду́шу просвѣти́лъ еси́, я́ко безпло́тенъ, на земли́ пожи́въ. И ны́нѣ въ вы́шнихъ Бо́гови предстоя́, на́съ, чту́щихъ тя́, помина́й.

Богоро́диченъ: Яви́лася еси́ вы́шши а́нгелъ, Бо́га вопло́щши ро́ждшагося, и погребе́на, и ме́ртвымъ нетлѣ́ніе, Дѣ́во Чи́стая, пода́вшаго, Его́же моли́ спасти́ на́съ, вѣ́рно чту́щихъ Тя́.

Катава́сія пра́здника.

Пѣ́снь 3.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Боже́ственнымъ свѣтоли́тіемъ, богому́дре, просвѣща́емь, о́тче преблаже́нне, свѣ́тлое, и свѣтоно́сное твое́, и честно́е успе́ніе любо́вію чту́щія, преподо́бне, твои́ми моли́твами просвѣти́.

Ума́ твоего́ о́ко, преподо́бне о́тче, отъ стасте́й мглы́ очи́стивъ, Пресвято́му Ду́ху прія́тно чи́стымъ блиста́ніемъ содѣ́лалъ еси́, богоблаже́нне.

Тве́рдостію ра́зума укрѣпля́емь, всеблаже́нне, разли́чная мечта́нія враго́въ обличи́лъ еси́, му́дре, и горды́ню тѣ́хъ возвы́шенную низложи́лъ еси́, преподо́бне.

Богоро́диченъ: Иже пре́жде вѣ́къ рожде́йся отъ Отца́, и напослѣ́докъ неизрече́нно изъ утро́бы Твоея́ про́йде, и обожи́ на́ше естество́, Ма́ти Дѣ́во, преподо́бныхъ ли́ки я́вѣ изводя́й.

По 3-й пѣ́сни конда́къ и и́косъ пра́здника.
Та́же сѣда́ленъ, гла́съ 8:

Отъ ю́ности, блаже́нне, вся́ оста́вль жите́йская, кра́сная же и лѣ́потная, усе́рдно послѣ́довалъ еси́ Христу́, зва́вшему тя́, преподо́бне, посто́мъ, о́тче, тѣ́ло изнури́лъ еси́, въ моли́твахъ непреста́нно бдя́. Тѣ́мже тя́ Всевѣ́дый Госпо́дь до́брѣ устроя́етъ па́стыря Свои́мъ овца́мъ слове́снымъ, Пафну́тіе богоно́се, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ — позна́ешися, внегда́ пріити́ вре́мени — пока́жешися. Сла́ва си́лѣ Твое́й, Го́споди!

Зако́нъ Бо́жій сохраня́я невреди́мо, преподо́бне, чистоту́ и смиреному́дріе ты́ отъ младе́нства имѣ́лъ еси́, и житіе́ нескве́рно, и нра́въ ми́лостивенъ, досточу́дне.

Возвы́силъ еси́ къ Бо́гу серде́чное жела́ніе, и смири́лъ еси́ па́губныя стра́сти, и лука́вствія бѣсо́въ низложи́лъ еси́, преподо́бне, мона́шествующихъ недви́жимое основа́ніе.

Въ нищетѣ́ пожи́въ, блаже́нне, добродѣ́тельми обогати́лся еси́, и, житія́ свѣ́тлостію бы́въ испо́лненъ, преста́вился еси́ къ вы́шнему гра́ду, о́тче Пафну́тіе, и мо́лишися изба́витися отъ бѣ́дъ ста́ду твоему́.

Богоро́диченъ: Святы́хъ Свята́го па́че смы́сла и естества́ породила́ еси́, Богоро́дице, освяще́ніе, и избавле́ніе, и оставле́ніе грѣхо́въ вѣ́рнымъ хода́тайствомъ Твои́мъ подаю́щи, Его́ сла́вящимъ воскресе́ніе.

Пѣ́снь 5.

Ирмо́съ: Тво́й ми́ръ да́ждь на́мъ, Сы́не Бо́жій: ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.

Оте́цъ си́рымъ бы́лъ еси́ и пита́тель вдови́цамъ, скорбя́щимъ утѣше́ніе, оби́димымъ помо́щникъ, па́стырь и наста́вникъ ста́ду твоему́, преподо́бне Пафну́тіе, и ны́нѣ прилѣ́жно моли́ся Влады́цѣ о на́съ.

Инокъ и́стиненъ бы́лъ еси́, простра́ннаго пути́ удаля́яся, тѣ́сный предпочита́я, дости́глъ еси́ широты́ ра́йскія и дре́ва жи́зни причаща́ешися, но и на́съ, вѣ́рою чту́щихъ тя́, помина́й.

Се́рдце твое́ скрижа́ль чи́сту наше́дши, благода́ть Свята́го Ду́ха, о́тче Пафну́тіе, обрѣ́те, дарова́ тебѣ́ соверше́нно безстра́стіе, вѣ́ру тве́рду и любо́вь нелицемѣ́рну.

Богоро́диченъ: Свяще́нія сѣ́нь явля́ешися, Марíе, оскверне́нную сластьми́ окая́нную мою́ ду́шу освяти́ и Боже́ственныя сла́вы прича́стника мя́ сотвори́.

Пѣ́снь 6.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́ и спаси́ мя, Спа́се мíра, зову́ща: сла́ва Тебѣ́.

Стра́хомъ Христо́вымъ утверди́вся, преподо́бне, тѣ́ло, и ду́шу, и у́мъ очи́стилъ еси́ отъ вся́кія скве́рны, и́миже зарю́ прія́тъ трисо́лнечную, богому́дре о́тче Пафну́тіе всеблаже́нне.

Ве́сь распя́лся еси́ мíрови, о́тче Пафну́тіе, Кре́стъ Христо́въ на ра́мо взе́мъ, блаже́нне, и Того́ страсте́мъ подо́бяся, прича́стникъ бы́лъ еси́ воскресе́нія и сла́вы лу́чшія, въ не́йже на́съ помина́й.

Хра́мъ тя́, вси́ вѣ́рніи, Свята́го Ду́ха вѣ́мы, хра́мъ бо благолѣ́пенъ воздви́глъ еси́ Бо́гу, и Того́ Ро́ждшей именова́лъ еси́, и огра́ду ве́лію устро́илъ еси́, и мона́ховъ мно́жество совокупи́лъ еси́. И ны́нѣ моли́твами твои́ми вся́къ неду́гъ отгоня́ется.

Богоро́диченъ: Ви́дѣвши, Его́же родила́ еси́, Бо́га, отъ ме́ртвыхъ воста́вша, ра́дости испо́лнилася еси́, Дѣ́во Ма́ти Марíе. Того́ у́бо моли́ вся́ку печа́ль, Чи́стая, на́шего се́рдца до конца́ потреби́ти.

Конда́къ, гла́съ 8. Подо́бенъ: Взбра́нной.

Бо́жіимъ свѣтоли́тіемъ просвѣще́нъ, о́тче, по́стническое стяжа́въ жи́тельство, преподо́бне, и́нокомъ предо́брый наста́вниче и по́стникомъ благо́е украше́ніе. Сего́ ра́ди Госпо́дь, труды́, твоя́ ви́дѣвъ, чуде́съ да́ромъ обогати́ тя, источа́еши бо исцѣле́нія. Мы́ же, ра́дующеся, вопіе́мъ ти́: ра́дуйся, о́тче Пафну́тіе.

Икосъ:

Пѣ́снь отъ усте́нъ скве́рныхъ къ похвале́нію по́двигъ твои́хъ, о́тче, прино́сится: не и́мамъ бо се́рдца моего́ чи́стаго, я́ко сіе́ сра́мными дѣя́ньми оскверни́хъ и ду́шу лука́выми по́мыслы осмради́хъ. Но ты́ пода́ждь ми́ сло́во, преподо́бне, чи́стое твое́ воспѣ́ти житіе́, взыва́ющу тебѣ́ такова́я, преблаже́нне: ра́дуйся, преподо́бныхъ всѣ́хъ похвало́; ра́дуйся, по́стниковъ подража́телю и пусты́ни насади́телю; ра́дуйся, я́ко въ не́й прече́стенъ хра́мъ Богоро́дицѣ воздви́глъ еси́; ра́дуйся, я́ко въ не́мъ тобо́ю Бо́гъ сла́вится; ра́дуйся, до́брѣ пасы́й ста́до твое́ отъ навѣ́тъ вра́жіихъ; ра́дуйся, я́ко смири́лъ еси́ злонача́льнаго врага́; ра́дуйся, я́ко посрами́лъ еси́ бѣсо́въ полки́; ра́дуйся, мона́шествующихъ свѣти́льниче пресвѣ́тлый и сто́лпъ терпѣ́нія; ра́дуйся, я́ко собра́лъ еси́ мона́ховъ мно́жество во спасе́ніе; ра́дуйся, о не́мже хва́лимся вси́; ра́дуйся, его́же ра́ди избавля́емся отъ бѣ́дъ; ра́дуйся, о́тче Пафну́тіе.

Пѣ́снь 7.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́ о́гнь. Тогда́ тріе́, я́ко еди́нѣми усты́, поя́ху и благословля́ху, глаго́люще: благослове́нъ Бо́гъ оте́цъ на́шихъ.

Смотря́я бу́дущую жи́знь, блаже́нне, мíрови умертви́лся еси́ вои́стинну, я́ко со́лнце, возсія́въ. Стра́хъ Бо́жій воспріи́мъ въ се́рдцы твое́мъ, вселе́нную всю́ возвесели́лъ еси́ уче́ньми, вопія́: благослове́нъ Бо́гъ оте́цъ на́шихъ.

Зря́ муче́нія та́мошняя мы́сленныма очи́ма и се́рдцемъ болѣ́знуя вы́ну, чи́сто житіе́ по́жилъ еси́, богоблаже́нне, и къ нестарѣ́ющейся преста́вился еси́ пи́щи, въ не́йже на́съ, чту́щихъ тя́, помина́й.

Украси́въ добродѣ́тельми твое́ житіе́, свя́то сконча́въ твою́ жи́знь, усну́лъ еси́, преподо́бне, со́нъ ми́ренъ. Тѣ́мже спаса́й ста́до твое́ всегда́, твою́ па́мять пра́зднующія и вопію́щія: благослове́нъ Бо́гъ оте́цъ на́шихъ.

Богоро́диченъ: Прему́дрость Ѵпоста́сную и Сло́во присносу́щное, Врача́ душа́мъ и тѣ́ломъ поро́ждшая, я́звы и гное́нія души́ моея́ уврачу́й, лю́тыя и лѣ́тнія се́рдца моего́ исцѣли́ болѣ́зни, Дѣ́во.

Пѣ́снь 8.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Подвиза́вся на земли́ зако́нно, ны́нѣ ра́дуешися, преподо́бне, со святы́ми, небе́сный обрѣ́тъ поко́й, и соприча́стникъ бы́лъ еси́ весе́лія тѣ́хъ и ра́дости, взыва́я: лю́діе, превозноси́те Го́спода во вѣ́ки.

Посто́мъ у́мъ очища́я, кро́токъ и незло́бивъ я́влься, на земли́ кро́ткихъ живе́ши, богому́дре, со всѣ́ми пра́ведными и избра́нными поя́: лю́діе, превозноси́те Го́спода во вѣ́ки.

Оляденѣ́вшую страстьми́ ду́шу мою́ очи́сти твои́ми къ Бо́гу свяще́нными моли́твами и содержа́щаго мя́ грѣхо́внаго плѣне́нія изба́ви, о́тче Пафну́тіе богоно́се, да, ра́дуяся, пою́: лю́діе, превозноси́те Го́спода во вѣ́ки.

Богоро́диченъ: Пощади́ на́съ, пою́щихъ Твое́, Го́споди, е́же отъ Дѣ́вы, неизрече́нное рождество́, и изба́ви отъ стра́стныхъ бѣ́дъ и скорбе́й рабы́ Твоя́ мольба́ми Пречи́стыя Твоея́ Ма́тере, я́ко Милосе́рдъ и еди́нъ Человѣколю́бецъ.

Пѣ́снь 9.

Ирмо́съ: Живопріе́мный исто́чникъ приснотеку́щій, свѣтоно́сный свѣти́льникъ благода́ти, хра́мъ одушевле́нный, сѣ́нь пречи́стую, небесе́ и земли́ простра́ннѣйшую, Богоро́дицу, вѣ́рніи, велича́емъ.

Яко у́тро, я́ко со́лнце, возсія́вши, па́мять твоя́, преподо́бне, вѣ́рныхъ сердца́ просвѣща́етъ и тму́ отгоня́етъ душетлѣ́нныхъ страсте́й, ю́же соверша́юще, благоче́стно восхваля́емъ тя́ ра́достными пѣ́сньми.

Яко въ раи́, о́тче, воздержа́нія процвѣ́лъ еси́ и, я́ко ма́слина, псало́мски яви́лся еси́, ли́ца и сердца́ на́ша помазу́я еле́емъ трудо́въ твои́хъ, о́тче Пафну́тіе, благоче́стно чту́щихъ свяще́нную па́мять твою́.

Дне́сь на́мъ возсія́ честна́я па́мять твоя́, преблаже́нне, просвѣща́ющи ду́ши и тѣлеса́ и страсте́й мглу́ отгоня́щи, преподо́бне, пода́ждь моли́твы твоя́, Пафну́тіе о́тче, и наста́ви на стезю́ жи́зни. Тѣ́мже, досто́йно чту́ще тя́, велича́емъ.

Богоро́диченъ: Пріе́мли, Пречи́стая Отрокови́це, боже́ственную пѣ́снь, воздаю́щи благода́ть на Тя́ надѣ́ющимся, и ми́ръ испроси́ Це́рквамъ при́сно пода́ти, и Импера́тору на́шему посла́ти одолѣ́нія и побѣ́ды, да вся́къ язы́къ христіа́нскій Тя́ велича́етъ.

Свѣти́ленъ:

Пусты́ню гра́дъ сотвори́лъ еси́ прему́дрыми о́бразы, отце́мъ украше́ніе, Пафну́тіе богому́дре, и сію́ соверши́лъ еси́ я́ко мы́сленный ра́й, принося́щь цвѣ́ты боже́ственныя, единообра́зныхъ мно́жества, досто́йно творя́щихъ па́мять твою́. [Два́жды.]

Сла́ва, и ны́нѣ, пра́здника, или́ богоро́диченъ:

Яко иму́щи милосе́рдіе и ми́лость ве́лію, при́зри, Препѣ́тая Богоро́дице Дѣ́во, на мое́ смире́ніе и страсте́й мглу́, и собла́знъ житія́ разори́, Отрокови́це, и огня́ гее́нскаго изба́ви моли́твами Твои́ми.

На хвали́техъ стихи́ры на 4, гла́съ 1. Подо́бенъ: Небе́сныхъ чино́въ.

Презира́тель до́льнихъ и пресе́льникъ,* рачи́тель вы́шнихъ* и пусты́нный граждани́нъ Пафну́тій богому́дрый* всѣ́мъ на́мъ пра́здновати предповелѣва́етъ* къ Бо́гу отше́ствія его́* де́нь спаси́тельный.

Внѣ́ пло́ти и мíра добродѣ́тельми бы́въ,* тѣ́мъ просла́ви на земли́ житіе́мъ* Го́спода сла́вы, о́тче богому́дре,* и, по достоя́нію отъ Него́ просла́вився,* исцѣле́ній яви́лся еси́ Боже́ственный исто́чникъ,* Пафну́тіе богопрія́тне.

Смире́нъ, незло́бивъ, кро́токъ, про́стъ* и молчали́въ бы́лъ еси́, о́тче, па́че человѣ́ка вои́стинну* и, невеще́ственъ бы́въ въ ве́щи,* хра́мъ Бо́жій яви́лся еси́ по достоя́нію,* я́же отъ Него́ прибы́вшая тебѣ́ дарова́нія* ми́лостивно подава́я на́мъ.

Сла́ва, гла́съ 4:

Преподо́бне о́тче прехва́льне, житіе́ благоче́стно на земли́ соверши́въ, любве́ луча́ми просвѣща́емь, мона́ховъ свѣти́льниче пресвѣ́тлый, пра́вило добродѣ́тели изря́дно, смире́ніе, бдѣ́ніе, моли́тву и любо́вь нелицемѣ́рну стяжа́лъ еси́. Тѣ́мже къ ре́вности боже́ственнаго житія́ твоего́ ли́къ совокупи́лъ еси́ мона́шествующихъ. Отче преподо́бне, Христа́ Бо́га моли́ согрѣше́ній оставле́ніе пода́ти пра́зднующимъ любо́вію па́мять твою́.

И ны́нѣ, пра́здника.
[Славосло́віе вели́кое, ектеніи́ и отпу́стъ.]



НА ЛИТУРГІИ,

Блаже́нна, пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 10. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 4 – 10 об.

/ Къ оглавленію раздѣла /


Наверхъ / Къ титульной страницѣ

0