Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 1-й де́нь.
Свята́го проро́ка Іеремíи.

[ВЕЧЕРЪ,]
[На Господи воззвахъ:] стихи́ры проро́ка, гла́съ 8. Подо́бенъ: Го́споди, а́ще и на суди́щи.

Го́споди,* а́ще и въ ка́лъ вве́рженъ бы́сть* Іеремíя святы́й,* но кра́сное благово́ніе у́мно воспріима́ше,* въ ра́йскихъ се́лѣхъ я́коже водворя́яся,* его́же моли́твами,* я́ко Благодѣ́тель,* всѣ́хъ на́съ сохрани́.

Го́споди,* Твои́ми пресвѣ́тлыми заря́ми* проро́къ сія́я* и супроти́вными зря́щеся* блаже́нъ и че́стенъ,* добродѣ́телей бо я́вѣ стыди́тся и супоста́тъ,* и бу́дущая, я́ко настоя́щая,* восхожде́нія предувѣ́дѣ.

Сла́ва, и ны́нѣ, пра́здника или́ богоро́диченъ, гла́съ и подо́бенъ то́йже.

Ви́ждь моего́* сокруше́ннаго се́рдца воздыха́ніе, Богоневѣ́сто,* пріими́, Дѣ́во Марíе Чи́стая,* ру́къ мои́хъ воздѣя́ніе,* я́ко Человѣколюби́ва,* и не отри́ни, Всенепоро́чная,* да пою́ и велича́ю Тя́,* возвели́чившую ро́дъ на́шъ.

Крестобогоро́диченъ, подо́бенъ то́йже.

Безнача́льное Сло́во Отчее,* и Сы́не Мо́й,* и Ду́ху сопресто́льное,* ка́ко Твои́ пречи́стыя дла́ни* на дре́вѣ просте́рлъ еси́?* Что́ толи́кая Твоя́ ны́нѣ нищета́, Преблагíй? —* предстоя́щи Твоему́ Кресту́,* вопія́ше Пренепоро́чная.

Тропа́рь, гла́съ 2:

Проро́ка Твоего́ Іеремíи па́мять, Го́споди, пра́зднующе, тѣ́мъ Тя́ мо́лимъ: спаси́ ду́ши на́ша.


[НА УТРЕНИ,]
Канонъ, гласъ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Пре́жде твоего́ созда́нія проувѣ́дѣнно изъ ма́терня чре́ва освяти́лся еси́ и язы́комъ проро́къ пома́зался еси́, взыва́я: Изба́вителю и Бо́гу на́шему пои́мъ.

Всѣ́хъ ра́зумъ пре́жде пріе́мый, твоея́ мы́сли движе́нія прозря́, о Іеремíе богоявле́нне, наста́вника тя́ лю́демъ поставля́етъ.

Твоея́ мы́сли зри́тельное, му́дре, очи́стивъ отъ скве́рнъ плотски́хъ, и́стины свидѣ́тель показа́лся еси́, Творцу́ твоему́ превозлю́бленъ.

Богоро́диченъ: Всели́вшееся въ Тя́ Сло́во Отчее, на земли́, Дѣ́во Богоро́дице, па́че естества́ пло́тію ро́ждши, яви́лася еси́ тва́рей всѣ́хъ Влады́чица.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Ты́, освяти́въ проро́ка Твоего́, Влады́ко, пе́рвѣе рождества́, и блудя́щимъ наста́вника посла́лъ еси́.

Благода́ть Ду́ха, все́льшаяся во устнѣ́ твои́, я́коже пресвѣ́тло свѣти́ло, су́щимъ во тмѣ́ возсія́.

Мѵ́ра благово́нія твоего́ не терпя́щи, собо́ръ тя́ Изра́илевъ скве́рный въ ро́вѣ затвори́.

Богоро́диченъ: Тобо́ю, Пречи́стая, Пресу́щественный Безнача́льный Сы́нъ Бо́жій спожи́ти человѣ́комъ благоизво́ли.

Сѣда́ленъ, гла́съ 8. Подо́бенъ: Воскре́се отъ гро́ба.

Приложи́ тебѣ́ у́хо Бо́гъ услы́шавати словеса́ Его́, богогла́сный проро́че. Тѣ́мже, я́ко настоя́щая не су́щая, всѣ́мъ уясни́лъ еси́, рыда́ньми же о лю́дехъ твои́хъ, уда́льшихся отъ Го́спода, пла́калъ еси́. И ны́нѣ сы́й на небесѣ́хъ, мо́лишися спасти́ся на́мъ.

Сла́ва, и ны́нѣ, пра́здника или́ богоро́диченъ:

Въ пучи́ну лю́таго впадо́хъ уны́нія, отъ мно́жества лука́выхъ и нечи́стыхъ мои́хъ дѣ́лъ пріидо́хъ въ недоумѣ́ніе и отча́яніемъ ны́нѣ одержи́мь е́смь. Влады́чице Богоро́дице, Сама́ мя́ спаси́ благоутро́біемъ Твои́мъ: грѣ́шныхъ бо Ты́ еси́ по́мощь и очище́ніе спаси́тельное.

Крестобогоро́диченъ:

Нескве́рная Агница, Агнца и Па́стыря, ви́сяща на Крестѣ́, зря́щи, вопія́ше: Ча́до Мое́, что́ стра́нное у́бо и ненадѣ́жное сіе́ зрѣ́ніе? Ка́ко Жи́знь всѣ́хъ сме́ртію осужда́ется, земны́мъ подо́бнѣ? Но воскресни́ тридне́вно изъ ме́ртвыхъ, Сло́ве, я́коже ре́клъ еси́, да, ра́дующися, сла́влю Тя́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Пресвѣ́тлое сія́ніе Пресвята́го и Боже́ственнаго Ду́ха, се́рдце твое́ облиста́вшее, су́щимъ во тмѣ́ просвѣще́ніе содѣ́ла.

Проро́ковъ спострада́тельнѣе всѣ́хъ бы́въ, всеблаже́нне богопрія́тне, ми́лости мя́ сподо́би, отча́яннаго мно́гими прегрѣше́ньми.

Яко хода́тай бы́въ явле́ннымъ и боже́ственнымъ сія́ніемъ, хода́тайствомъ твои́мъ умири́ многомяте́жнаго моего́ житія́ бу́рю.

Богоро́диченъ: Бо́га, Его́же родила́ еси́, Пречи́стая Дѣ́во, Сего́ моли́ моли́твами Твои́ми дарова́ти согрѣше́ній проще́ніе.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Якоже мо́лнію, проро́ка Твоего́ посла́лъ еси́, Іеремíю освяще́ннаго, су́щимъ во тмѣ́ свѣ́та Тя́, Христе́, возвѣща́юща.

Стрѣлу́ избра́нну, въ ту́лѣ тя́ сокрове́нну, Іеремíе, проразумѣ́ніемъ Свои́мъ тво́й Влады́ка, въ ни́хже подоба́ше вре́менѣхъ, показа́.

Уши чи́стѣ у́мніи имѣ́я, сла́вне, бесѣ́дующу тебѣ́ Ду́ху сподо́бился еси́, проро́че, послу́шати.

Богоро́диченъ: Ве́ліе и стра́шное Дѣ́вы та́инство: и́бо я́вльшагося на земли́ Ею Бо́га человѣ́комъ милосе́рдія ра́ди ма́терски воспита́.

Пѣ́снь 6.

Ирмо́съ: Бе́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́ отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю! и спаси́.

Привле́клъ еси́ просвѣще́ніе и благода́ть бога́тно, богоно́се, духо́вно уста́ душе́вная разшири́въ, и, испо́лнься, о́бщно всѣ́мъ по́далъ еси́, о проро́че, хотя́щимъ сія́ніе.

Мо́ре мірско́е, возвыша́емое напа́стей треволне́ніемъ, узрѣ́въ, послѣ́дняя дворы́ возжела́лъ еси́, и исто́чникъ, рѣко́ю точа́щъ сле́зы, люде́й твои́хъ злобы́тства го́рцѣ рыда́ти.

Сме́рть Изба́вителя предска́зовалъ еси́ та́йно, богогла́се: я́коже бо Агня, на дре́во Христа́ воздвиго́ша, живота́ Нача́льника, собо́ръ беззако́нный іуде́йскій, Благодѣ́теля всея́ тва́ри.

Богоро́диченъ: Сло́во, е́же отъ Отца́ пре́жде вѣ́къ ро́ждшееся безпло́тно, изъ Тебе́, Чи́стая, въ лѣ́то пло́тски ражда́ется, и въ сѣ́ни Того́ вси́ поживе́мъ, я́коже дре́вле Іеремíя прорече́.

Конда́къ, гла́съ 3. Подо́бенъ: Дѣ́ва дне́сь.

Очи́стивъ ду́хомъ, вели́кій проро́че и му́чениче, твое́ свѣтоза́рное се́рдце, сла́вне Іеремíе, проро́чествія да́ръ свы́ше прія́лъ еси́ и возопи́лъ еси́ велегла́сно во страна́хъ: се́ Бо́гъ на́шъ, и не приложи́тся и́нъ къ Нему́, Иже, вопло́щся, на земли́ яви́лся е́сть.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Ты́ ны́нѣ не ктому́ въ наде́ждахъ, но ве́щію, проро́че, прорече́нная, исполня́ема твоя́ зря́, взыва́еши: благослове́нъ еси́, Го́споди Бо́же, во вѣ́ки.

Орга́нъ боже́ственный яви́ся, ударя́емь руко́ю Утѣ́шителевою, небе́сныя гла́сы вѣща́я и поя́: благослове́нъ еси́, Го́споди Бо́же, во вѣ́ки.

Рыда́нія спису́я, о проро́че, не помрачи́ боже́ственнаго весе́лія, его́же отъ мла́денства я́сно наслади́лся еси́, зовы́й: благослове́нъ еси́, Го́споди Бо́же, во вѣ́ки.

Богоро́диченъ: Во чре́во Дѣ́вы вни́ти я́коже благоволи́лъ еси́, человѣ́ки хотя́ спасти́, проро́ки я́вѣ научи́вый чудеси́, благослове́нъ еси́, Го́споди Бо́же, во вѣ́ки.

Пѣ́снь 8.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилѣжа́ще, о́троцы вопія́ху: благослови́те, вся́ дѣла́ Госпо́дня, Го́спода.

На небеса́ возше́лъ еси́, веселя́ся, богодухнове́нне Іеремíе, и со безпло́тными престо́лу всѣ́хъ Царя́ предстои́ши, — благослови́те, — поя́, — дѣла́, Го́спода и превозноси́те Его́ во вѣ́ки.

Благоче́стія проповѣ́дникъ бы́въ, прехва́льне, освяще́нъ, и нече́стія обличи́лъ еси́ не́мощь, Іеремíе, — благослови́те, — поя́, — дѣла́, Го́спода и превозноси́те Его́ во вѣ́ки.

Боже́ственныя зари́ свѣ́томъ сія́я, облиста́нія лю́бящимъ посыла́еши, зерца́ло многосвѣ́тло я́ко пріи́мъ, — благослови́те, — вопія́, — вся́ дѣла́, Го́спода и превозноси́те Его́ во вѣ́ки.

Богоро́диченъ: Мое́ существо́ изъ Тебе́ воспрія́тъ Животода́вецъ и пре́жднихъ скве́рнъ сіе́ очи́сти, о Богома́ти! Его́же пое́мъ: благослови́те, вся́ дѣла́, Го́спода и превозноси́те Его́ во вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Свѣ́ту сраствори́вся пречи́стому, Божества́ зари́, блаже́нне сла́вне, его́же на земли́ явле́нія я́сно стяжа́лъ еси́.

Исто́чника нетлѣ́ннаго доше́дъ, озаре́ніи же сего́, богодухнове́нне, жела́емый тебѣ́ коне́цъ я́вѣ получи́лъ еси́.

Заре́ю свѣтоно́сною, ея́же ны́нѣ наслажда́ешися, воспѣва́ющихъ твою́ па́мять просвѣща́ти, Іеремíе блаже́нне, всѣ́хъ сподо́би.

Богоро́диченъ: Приста́нище спасе́нія, вѣ́рующіи, Пречи́стому Твоему́ Рождеству́ свѣ́дуще, отъ бѣ́дъ изба́витися Тя́ мо́лимъ.


НА ЛИТУРГІИ,

Проки́менъ, гла́съ 4: Ты іере́й во вѣ́къ,* по чи́ну Мелхиседе́кову. Сти́хъ: Рече́ Госпо́дь Го́сподеви моему́: сѣди́ одесну́ю Мене́, до́ндеже положу́ враги́ Твоя́ подно́жіе но́гъ Твои́хъ. Апо́столъ къ Кори́нѳяномъ, зача́ло 156. Аллилу́ія, гла́съ 5: Моисе́й и Ааро́нъ во іере́ехъ Его́ и Саму́илъ въ призыва́ющихъ и́мя Его́. [Сти́хъ: Свѣ́тъ возсія́ пра́веднику, и пра́вымъ се́рдцемъ весе́ліе.] Ева́нгеліе Луки́, зача́ло 14. Прича́стенъ: Въ па́мять вѣ́чную бу́детъ пра́ведникъ...

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 1 – 3 об.

/ Къ оглавленію раздѣла /


Наверхъ / Къ титульной страницѣ

0