Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 30-й де́нь.
Слу́жба и́же во святы́хъ отцу́ на́шему Софро́нію, епи́скопу Ирку́тскому, чудотво́рцу.

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры на 8, гла́съ 8:

Отче свяще́ннѣйшій Софро́ніе, Бо́жія зако́ны невреди́мо соблюда́лъ еси́ и, лю́ди твоя́ науча́я благоче́стію, вѣ́рѣ, любви́ и милосе́рдію, мона́шествующимъ пра́вило жи́зни полага́лъ еси́, са́мъ показу́я о́бразъ добродѣ́тели, вся́къ чи́нъ и во́зрастъ стра́ху Бо́жію уча́, всѣ́хъ приводя́ ко спасе́нію, прося́ коему́ждо у Бо́га ве́лія ми́лости. [Два́жды.]

Боже́ственная благода́ть призва́ тя, блаже́нне, во святи́теля вели́каго гра́да Ирку́тска и страны́ Сиби́рскія, пра́вило бы́ти вѣ́ры и о́бразъ кро́тости, тѣ́мъ же, богому́дре, житіе́ твое́ тя́ прекра́сна показа́, архіере́евъ бы́лъ еси́ спобо́рникъ, преподо́бныхъ соприча́стникъ и пра́ведныхъ, и ны́нѣ предстоя́ престо́лу Святы́я Тро́ицы, моли́ о спасе́ніи ду́шъ на́шихъ. [Два́жды.]

По твое́мъ преставле́ніи, святи́телю о́тче Софро́ніе, мно́га лѣ́та храни́мы бы́ша мо́щи твоя́, источа́юще чудеса́ съ вѣ́рою призыва́ющимъ тя́, егда́ же приспѣ́ вре́мя прославле́нія твоего́, испепели́ся гро́бъ тво́й запале́ніемъ о́гненнымъ и мо́щи со оде́ждею изнури́шася, грѣ́хъ ра́ди на́шихъ и скве́рнаго житія́, я́ко недосто́йнымъ су́щимъ имѣ́ти сокро́вище небе́сное, но и по си́хъ при́сно съ на́ми пребыва́еши, да́руя на́мъ ми́ръ и ве́лію ми́лость. [Два́жды.]

Сла́ва, гла́съ 6:

Сла́вная и свяще́нная Це́рковь Сиби́рская, архіере́евъ собо́ръ и вся́каго чи́на лю́діе, ны́нѣ воеди́но собери́теся, свѣ́тло да торжеству́емъ па́мять Софро́нія, па́стыря на́шего и учи́теля, ра́достно ему́ взыва́юще: ра́дуйся, Тро́ицы побо́рниче; ра́дуйся, Ирку́тскія ка́ѳедры украше́ніе; ра́дуйся, но́вый и изря́дный чудотво́рче, святы́хъ бо моще́й твои́хъ честны́я оста́нки, не престаю́ще, сія́ютъ чудесы́, озаря́юще и увеселя́юще избра́нныя лю́ди твоя́, и́хже Ева́нгеліемъ породи́лъ еси́ и въ правосла́віи утверди́лъ еси́, и ны́нѣ моли́ся, свя́тче, о на́съ ко Го́споду.

И ны́нѣ, богоро́диченъ, гла́съ то́йже:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́ и чте́нія три́, святи́телемъ о́бща.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ра хра́му и свято́му, гла́съ 1:

Влады́ки Христа́ стопа́мъ послѣ́дуя, свѣ́томъ Боже́ственнаго Ду́ха просвѣти́вся, вмѣсти́лище чистоты́ показа́лся еси́, небе́сныхъ видѣ́ній прича́стникъ бы́лъ еси́, тѣ́мже Христо́съ наслѣ́дника тя́ Ца́рствія показа́ и сожи́теля со всѣ́ми святы́ми, е́же и на́мъ улучи́ти, о́тче, моли́ся, соверша́ющимъ любо́вію па́мять твою́.

Сла́ва, гла́съ 7:

Печа́ль неизрече́нная пости́же па́ству Ирку́тскую, егда́ честны́я мо́щи и свяще́нная ра́ка возгорѣ́шася въ нощи́ о́гненнымъ запале́ніемъ. Но и по си́хъ неоску́дный исто́чникъ чуде́съ показа́лся еси́, святи́телю Христо́въ Софро́ніе: гра́ду — огражде́ніе, вѣ́рнымъ ча́домъ — въ ду́сѣ укрѣпле́ніе и святы́я вѣ́ры утвержде́ніе.

И ны́нѣ, гла́съ то́йже:

Подъ кро́въ Тво́й прибѣга́емъ, Влады́чице, вопіе́мъ Ти́, вси́ земноро́дніи: упова́ніе на́ше, Богоро́дице, изба́ви ны́ отъ безмѣ́рныхъ прегрѣше́ній и спаси́ ду́ши на́ша.

На стихо́внѣ стихи́ры, гла́съ 5:

Ра́дуйтеся, лю́діе гра́да Ирку́тска, се́ бо вторы́й чудотво́рецъ яви́ся, вра́чь и помо́щникъ во вся́кой ско́рби, цѣли́тель и бѣсо́въ прогони́тель, гра́ду защи́тникъ и страсте́й укроти́тель, моли́твенникъ неусы́пный ко Го́споду о всѣ́хъ, съ вѣ́рою къ нему́ прибѣга́ющихъ.

Сти́хъ: Честна́ предъ Го́сподемъ сме́рть преподо́бныхъ Его́.

Ра́дуйся, свяще́нная главо́, о́тче богопрія́тне Софро́ніе, пра́выя вѣ́ры основа́ніе, испо́лнителю вся́кія добродѣ́тели, ни́щихъ пита́телю и ско́рбныхъ утѣше́ніе, врачу́ безме́здный немощству́ющихъ, крѣ́пкая наде́ждо всѣ́хъ, те́плою вѣ́рою тя́ призыва́ющихъ.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Ра́дуйся, ра́досте на́ша, Софро́ніе, моли́твенниче и ско́рбныхъ сострада́льниче, ты́ бо, я́ко а́нгелъ, на земли́ пожи́лъ еси́, незло́біемъ и пра́вдою украша́емь, свѣ́тлый пу́ть къ Бо́гу показу́я, и по отше́ствіи отъ земны́хъ на́съ не оставля́еши. Сла́вимъ тя́, о́тче богопрія́тне.

Сла́ва, гла́съ 3:

Сла́ва Тебѣ́, Христе́ Бо́же, апо́столовъ похвало́ и му́чениковъ весе́ліе, святи́телей и свяще́нниковъ благолѣ́піе, преподо́бныхъ сла́досте духо́вная. Сла́ва Тебѣ́, Христе́ Спа́се, я́ко яви́лъ еси́ на́мъ чудотво́рца но́ва и пресла́вна.

И ны́нѣ, гла́съ то́йже:

Ра́дости испо́лни се́рдце мое́, Дѣ́во, пріи́мшая отъ Гавріи́ла ра́дости вѣща́ніе, ны́нѣ печа́ль грѣхо́вную во мнѣ́ потребля́ющи, се́рдце мое́ испо́лни любо́вію ко Го́споду.

Тропа́рь, гла́съ 4:

Отъ ю́ности Христа́ возлюби́лъ еси́, блаже́нне Софро́ніе, до́брѣ упра́вилъ еси́ и́ноческія оби́тели и, архіере́йскимъ са́номъ почте́нъ бы́въ, упа́слъ еси́ Ирку́тскую па́ству, тѣ́мже и по преставле́ніи дарова́нія чуде́съ отъ Бо́га прія́лъ еси́, ны́нѣ же моли́ Христа́ Бо́га изба́вити стра́ждущую страну́ на́шу отъ и́га безбо́жныя вла́сти, на́съ же отъ бѣ́дъ, и спасти́ ду́ши на́ша.


НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ воскре́сенъ или́ пра́здника.

По 1-мъ стихосло́віи сѣда́ленъ, гла́съ 1:

Излія́ся благода́ть Ду́ха во устна́хъ твои́хъ, о́тче прему́дре Софро́ніе, и бы́лъ еси́ па́стырь Христо́ва ста́да, уча́ слове́сныя о́вцы бли́жняго люби́ти, я́коже себе́, Бо́га же всѣ́мъ се́рдцемъ и все́ю крѣ́постію, и вѣ́рнымъ бы́ти Ему́ да́же до сме́рти. [Два́жды.]

Сла́ва, и ны́нѣ, богоро́диченъ:

Святѣ́йшая безпло́тныхъ си́лъ небе́сныхъ, Честнѣ́йшая всея́ тва́ри, Богоро́дице, моли́ся ко Го́споду со святи́телемъ Софро́ніемъ и всѣ́ми святы́ми отъ бѣ́дъ и мно́гихъ зо́лъ изба́витися на́мъ, я́ко Блага́я.

По 2-мъ стихосло́віи сѣда́ленъ, гла́съ 2:

Прему́дренно соблю́лъ еси́ себе́, Софро́ніе, отъ ловле́ній вселука́ваго и въ коне́цъ низложи́лъ еси́ того́, Правосла́вія бы́лъ еси́ сто́лпъ и утвержде́ніе, тѣ́мже, соше́дшеся дне́сь, па́мять твою́ почита́емъ. [Два́жды.]

Сла́ва, и ны́нѣ, богоро́диченъ:

Иму́ще Тя́, Богоро́дице, упова́ніе и предста́тельство, вра́жіихъ навѣ́тъ не убои́мся, я́ко спаса́еши ду́ши на́ша.

По поліеле́и сѣда́ленъ, гла́съ 3:

Равноа́нгельно пожи́лъ еси́, о́тче, на земли́, ра́вное стоя́ніе и́маши со а́нгелы на небеси́, тѣ́мже тя́, я́ко человѣ́ка Бо́жія ублажа́юще, па́мять соверша́емъ ра́достно, ча́юще отъ Христа́ Бо́га на́шего моли́твами твои́ми улучи́ти ми́ръ и ве́лію ми́лость. [Два́жды.]

Сла́ва, и ны́нѣ, богоро́диченъ:

Безъ сѣ́мене зачала́ еси́ отъ Ду́ха Свята́го, и, славосло́вяще, воспѣва́емъ Тя́: ра́дуйся, Пресвята́я Дѣ́во.

Степе́нна, антифо́нъ пе́рвый 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви [о всѣ́хъ, я́же воздаде́ ми?] Ева́нгеліе Іоа́нна, зача́ло 35 [отъ полу́].

По 50-мъ псалмѣ́ стихи́ра, гла́съ 6:

Чу́до ве́ліе зри́мъ въ запале́ніи моще́й твои́хъ, о́тче на́шъ святи́телю Софро́ніе. Не ума́лися бо си́ла чудодѣ́йственная въ тебѣ́, ниже́ свято́е мѣ́сто запустѣ́ло е́сть, но, я́ко заря́ со́лнечная, просвѣща́еши вѣ́рныхъ сердца́, вѣ́ровати науча́я въ Тро́ицу Единосу́щную, во Еди́но Божество́.

Кано́нъ Богоро́дицы со ирмосо́мъ на 6 и свята́го на 8, гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты Еги́петскія, я́ко просла́вися.

Сла́ву возеле́мъ Христу́, Бо́гу на́шему, ди́вному во святы́хъ Свои́хъ, па́мять уго́дника Его́ дне́сь прославля́юще.

Втора́го тя́ засту́пника гра́ду на́шему прія́хомъ, отъ вся́кихъ находя́щихъ на ны́ зо́лъ твои́мъ предста́тельствомъ на́съ сохрани́.

Всѣ́хъ благи́хъ дѣ́лъ о́бразъ себе́ показу́я па́ствѣ твое́й, привле́клъ еси́ мно́ги ду́ши во спасе́ніе, и́же и улучи́ша ра́йскаго утѣше́нія наслажде́ніе, пою́ще: нѣ́сть свя́тъ, па́че Тебе́, Го́споди.

Богоро́диченъ: Бу́ря напа́стей обдержи́тъ ны́, Влады́чице, и во́лны скорбе́й, но, предвари́вши, пода́ждь на́мъ ру́ку по́мощи и те́плое заступле́ніе и предста́тельство Твое́.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Яко адама́нтъ драгоцѣ́ннѣйшій, возсія́лъ еси́ ко украше́нію Це́ркве Россíйскія, блиста́яй непоро́чностію житія́, да и мы́, недосто́йніи, свѣ́та Христо́ва наслади́мся.

Теплото́ю вѣ́ры согрѣ́й сердца́ на́ша, отъ мра́ка грѣхо́внаго иззя́бшая, ду́хъ благоче́стія и стра́ха Бо́жія вкорени́ въ на́съ, па́мять твою́ ублажа́ющихъ.

Любо́вію утверди́вся Христо́вою, яви́лся еси́, я́ко рѣка́, Сиби́рскую страну́ напая́я уче́ніемъ слове́съ, богоблаже́нне Софро́ніе, тѣ́мже любо́вію па́мять твою́ соверша́емъ.

Богоро́диченъ: Удиви́ла еси́ вои́стину ны́нѣ на на́съ благодѣя́нія и ми́лости Твоя́, Влады́чице, тѣ́мже сла́вимъ мно́гое милосе́рдіе Твое́.

Сѣда́ленъ, гла́съ 5:

Блаже́нъ ты́, іера́рше Софро́ніе, вои́стину и треблаже́нъ еси́: соверше́нною прилѣпля́яся къ Бо́гу любо́вію, и вся́ лю́ди возлюби́лъ еси́, ду́шу полага́я за па́ству твою́, бѣ́дствующимъ благодѣя́нія творя́, ду́ши напая́я смире́ніемъ и покоре́ніемъ промышле́нію Боже́ственному. Сего́ ра́ди тя́ ублажа́емъ. [Два́жды.]

Сла́ва, и ны́нѣ, богоро́диченъ:

Стѣна́ непобѣди́мая на́мъ, христіа́номъ, Ты́ еси́, Дѣ́во Богоро́дице, къ Тебѣ́ бо прибѣга́юще, невреди́ми пребыва́емъ и, па́ки согрѣша́юще, и́мамы Тя́ Моли́твенницу. Тѣ́мъ, благодаря́ще, вопіе́мъ Ти́: ра́дуйся, Благода́тная, Госпо́дь съ Тобо́ю.

Пѣ́снь 4.

Ирмо́съ: Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.

Іера́рше Бо́жій, предстоя́ престо́лу Го́спода сла́вы, моли́ся у́бо ми́ръ дарова́ти странѣ́ на́шей и отъ всѣ́хъ лю́тыхъ изба́витися.

Та́ко просвѣти́ся свѣ́тъ тво́й предъ человѣ́ки твои́ми до́брыми дѣ́лы, и́мже яви́лся еси́ въ ско́рбѣхъ утѣ́шитель, боля́щимъ вра́чь благода́тный, да, вси́ лю́діе Ирку́тстіи, просла́вимъ Отца́ Небе́снаго, дарова́вшаго на́мъ тебе́, вели́каго чудотво́рца.

Ду́ха Пресвята́го хра́мъ, о́тче, бы́лъ еси́, вмѣща́я въ себѣ́ Боже́ственную Прему́дрость, на домострои́тельство Це́ркве Христо́вы и мона́шествующимъ на утвержде́ніе.

Богоро́диченъ: Удивля́ется вся́ земля́ и вси́ язы́цы чудя́тся, зря́ще мно́гое Твое́ милосе́рдіе, Влады́чице, къ странѣ́ на́шей и ро́ду христіа́нскому, оба́че неисправле́ніе на́ше вѣ́рою ко благоче́стію премѣни́.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Ели́цы во Христа́ крести́хомся, лю́діе Ирку́тскія па́ствы, вку́пѣ соше́дшеся дне́сь, облеко́хомся въ ра́дость духо́вную, па́мять святи́теля прославля́юще.

Любве́ Христо́вы подража́тель бы́въ, вся́ на́ша братоненавидѣ́нія умири́, да, тобо́ю въ любви́ ева́нгельстѣй споспѣшеству́еми, благоговѣ́йно хва́лимъ тя́.

Непреобори́мь яви́лся еси́ въ дѣ́лѣ Госпо́дни, Софро́ніе, во все́мъ покаря́яся во́ли Его́ святѣ́й, нима́ло не взира́я на человѣ́ковъ негодова́нія, поя́ всегда́: ра́звѣ Тебе́ ино́го Бо́га не зна́ю.

Богоро́диченъ: Боже́ственнымъ Твои́мъ сія́ніемъ, Блага́я, исцѣли́ на́ша стра́сти, я́же отъ невнима́нія на́мъ прихо́дятъ: мо́литъ Тя́ о се́мъ и святы́й Софро́ній.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Яви́ся па́ки благода́ть спаси́тельная па́ствѣ Ирку́тстѣй въ прославле́ніи, блаже́нне, па́мяти твоея́, не бо́ по грѣхо́мъ на́шимъ воздаде́ся на́мъ, но те́плаго моли́твенника обрѣто́хомъ, чту́щіи па́мять твою́.

Па́стыря тя́ до́браго вѣ́мы, до́брѣ ста́до свое́ упа́сшаго, и ны́нѣ па́ству твою́ въ вѣ́рѣ и единомы́сліи сохрани́, во е́же пребы́ти на́мъ въ сою́зѣ любве́ и ми́ра и досто́йнымъ бы́ти вѣ́чныя любве́.

Напита́лъ еси́ а́лчушія пра́вды пи́щею небе́сною: хлѣ́бъ бо а́нгельскій бы́сть сло́во твое́, Софро́ніе, изыма́я отъ плѣне́нія грѣхо́внаго ду́ши ча́дъ твои́хъ и ко Христу́ тѣ́хъ приводя́.

Богоро́диченъ: Тре́петомъ содержи́ми есмы́, Блага́я, ужаса́ютъ бо на́съ ловле́нія лука́ваго, но Ты́, Влады́чице, отъ бе́здны грѣхо́вныя на́съ возведи́.

Конда́къ, гла́съ 4:

Соиме́ннаго цѣлому́дрію іера́рха, изря́дное Це́ркве Ирку́тскія украше́ніе, отца́ на́шего святи́теля Софро́нія любо́вію восхва́лимъ, вси́ вѣ́рніи, то́й бо е́сть храни́тель гра́да и страны́ сея́ и моли́твенникъ о душа́хъ на́шихъ.

Икосъ:

Цѣлому́дрія добро́тами уязви́вся, святи́телю, невозвра́тнымъ жела́ніемъ послѣ́довалъ еси́ Сотво́ршему тя́, вся́ко плотско́е наслажде́ніе возненави́дѣлъ еси́ и я́ко ино́е со́лнце Ирку́тстѣй па́ствѣ возсія́лъ еси́, тѣ́мъ и Христо́съ да́ромъ тя́ чуде́съ обогати́. Помина́й на́съ, чту́щихъ пресвѣ́тлую па́мять твою́, да зове́мъ ти́: ра́дуйся, архіере́йскаго са́на удобре́ніе; ра́дуйся, гра́да Ирку́тска духо́вное украше́ніе; ра́дуйся, полу́денныя страны́ Россíйскія прозябе́ніе; ра́дуйся, полу́нощныя страны́ Сиби́рскія похвало́; ра́дуйся, чуде́съ не ума́ливый въ опале́ніи моще́й твои́хъ; ра́дуйся, нося́й вѣне́цъ пра́вды въ небе́снѣмъ Ца́рствіи. Ра́дуйся, Софро́ніе богому́дре, моли́твенниче о душа́хъ на́шихъ.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Ра́дости исполня́емся, лю́діе гра́да Ирку́тска, соше́дшеся на честно́е прославле́ніе твое́, да еди́нѣми усты́ и се́рдцемъ Тро́ицу Единосу́щную, тя́ просла́вльшую, почти́мъ, Ейже ты́, святи́телю, предстои́ши, моля́ся о душа́хъ на́шихъ.

Отче, святи́телю Софро́ніе, предстоя́ на небесѣ́хъ, не забу́ди на́съ, до́лу су́щихъ: отъ вся́кія находя́щія напа́сти сохрани́, вся́ раздо́ры и бра́ни умири́, да про́чее вре́мя живота́ на́шего безпеча́льни пребу́демъ, огражда́еми моли́твами твои́ми.

Трисо́лнечный Свѣ́тъ почи́лъ е́сть въ тебѣ́, святи́телю Софро́ніе, пресвѣ́тлую свѣщу́ показа́ тя лю́демъ Свои́мъ, цѣле́бника и врача́ безме́здна, пою́щимъ Го́сподеви: Сы́й благослове́нъ и препросла́вленъ.

Богоро́диченъ: Ма́ти Дѣ́во Препросла́вленная, угаси́ пе́щь страсте́й на́шихъ милосе́рдіемъ Твои́мъ, да воспое́мъ Тя́ во вѣ́ки со избра́нными Твои́ми.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Сла́вы, я́же отъ человѣ́къ, воспрія́ти не восхотѣ́въ, Бо́жіимъ произволе́ніемъ честны́я мо́щи твоя́ о́гненнымъ запале́ніемъ премѣни́лъ еси́, да то́чію отъ Христа́ Бо́га просла́вишися, науча́я на́съ не земна́го, но небе́снаго Ца́рствія жела́ти, его́же улучи́ти ча́емъ моли́твами твои́ми.

Яко лу́чь свѣ́та Христо́ва возсія́лъ еси́ въ странѣ́ Сиби́рстѣй, святи́телю блаже́нне Софро́ніе, просвѣща́я вся́каго гряду́щаго путе́мъ ева́нгельскимъ, да, свѣ́томъ твои́мъ озаря́еми, не заблуди́мъ въ пути́ грѣхо́внѣмъ и вѣ́чнаго Свѣ́та дости́гше, вку́пѣ съ тобо́ю жи́знь вѣ́чную наслѣ́дуемъ.

Апо́стола втора́го Сиби́ри, Софро́нія, просла́вимъ, непоро́чному житію́ его́ послѣ́дуимъ и, вся́ грѣхо́вная злопомнѣ́нія отри́нувше, зове́мъ: ра́дуйся, Софро́ніе, гра́да на́шего заступле́ніе.

Богоро́диченъ: Свя́тъ вои́стину де́нь се́й, въ о́ньже собра́ на́съ Ма́ти Бо́жія просла́вити уго́дника Своего́ Софро́нія, во хра́мѣ Ея́ почива́ющаго и чудесы́ свои́ми пѣ́ти на́съ побужда́ющаго: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Вѣ́ру соблюде́, тече́ніе сконча́, про́чее даде́ся тебѣ́ вѣне́цъ въ Ца́рствіи Христо́вѣ. Утверди и на́съ, маловѣ́ріемъ коле́блемыхъ, да не бу́демъ невѣ́рни, но вѣ́рни, и, взира́юще на честны́й о́бразъ тво́й, спасе́ніе улучи́мъ.

Иже съ вѣ́рою призыва́ху тя́, уго́дниче Бо́жій, ве́лію благода́ть получи́ша, явля́еши бо ся въ ско́рбѣхъ жите́йскихъ утѣ́шитель, въ печа́лѣхъ помо́щникъ, неду́гъ многообра́зныхъ цѣли́тель, отъ вся́кихъ бѣ́дъ и зо́лъ изба́витель: но не оста́ви чудотво́рною по́мощію на́съ, па́мять твою́ вѣ́рою чту́щихъ.

Мы́слію твое́ю къ вѣ́чнымъ и нетлѣ́ннымъ устреми́лся еси́, вся́ же земна́я отри́нулъ еси́. Помози́ и на́мъ, наста́вниче ди́вный, взыска́ти пра́вды и Ца́рствія Бо́жія, да въ ча́съ сме́ртный христіа́нскія кончи́ны сподо́бимся и вку́пѣ съ тобо́ю лицезрѣ́ти Го́спода сла́вы досто́йни бу́демъ.

Богоро́диченъ: Ангеловъ Цари́цу, архіере́йскаго, пресви́терскаго и мона́шескаго чи́на Влады́чицу и всего́ ро́да христіа́нскаго Покрови́тельницу, пріиди́те, вси́, восхва́лимъ и поклони́мся Ей, Та́ бо нело́жно обѣща́ся бы́ти на́мъ Помо́щница до сконча́нія вѣ́ка.

Свѣти́ленъ:

Свѣ́тъ Христо́въ бога́тно въ тя́ всели́ся, прему́дре Софро́ніе, да, предугото́вавъ чистото́ю ду́шу твою́, сотвори́тъ тя́ наслѣ́дника Ца́рствія небе́снаго и моли́твенника о душа́хъ на́шихъ. [Два́жды.]

Сла́ва, и ны́нѣ, богоро́диченъ:

Сла́досте а́нгеловъ, святи́телей и преподо́бныхъ ра́дованіе, христіа́нъ всѣ́хъ Предста́тельнице, Дѣ́во Ма́ти Госпо́дня, заступи́ на́съ и изба́ви отъ вѣ́чныхъ му́къ.

На хвали́техъ стихи́ры на 4, гла́съ 4:

Воздержа́ніемъ до́брѣ воспита́вся, на пресла́вную высоту́ добродѣ́телей возше́лъ еси́, святи́тельства оде́ждею и житія́ свѣ́тлостію украше́нъ, Боже́ственною осіява́емь благода́тію, просвѣти́ и на́съ, восхваля́ющихъ тя́, моли́твами твои́ми, Софро́ніе.

Прему́дре Софро́ніе, Це́рковь Христо́ву ты́ украси́лъ еси́, вруче́нный тебѣ́ тала́нтъ умно́жилъ еси́, въ ра́дость сподо́бився вни́ти Го́спода твоего́, Ему́же предстоя́ со а́нгелы, свя́те, моли́ о душа́хъ на́шихъ.

Якоже зла́то, огне́мъ искуша́емо, чи́сто явля́ется, та́ко и честны́я твоя́ мо́щи, о́тче Софро́ніе, искуше́ни бы́ша въ пеще́рѣ, да свѣ́тлостію чуде́съ возсія́ютъ па́че, озаря́юще ду́ши, маловѣ́рія о́блакомъ омраче́нныя, во е́же просла́вити Христа́, Спаси́теля на́шего, и Его́ вели́кую ми́лость.

Егда́ ро́ду на́шему явле́ни бы́ша нетлѣ́нныя мо́щи твоя́, блаже́нне іера́рше Софро́ніе, вра́жіимъ ненавидѣ́ніемъ во огни́ попали́шася сія́, хотя́щу ему́ нивочто́же вмѣни́ти сла́ву твою́, Бо́гъ же мно́жайшими чудесы́ просла́ви тя́ и моли́твенника сотвори́ о душа́хъ на́шихъ.

Сла́ва, гла́съ 8:

Отче Софро́ніе, благíй и вѣ́рный ра́бе Госпо́день, прилѣ́жный дѣ́лателю виногра́да Христо́ва, оби́тели и́ноковъ до́брѣ устро́ивъ, па́ству твою́ напои́въ водо́ю живо́ю, сѣ́мя благоче́стія въ лю́дехъ возрасти́лъ еси́ и, ны́нѣ ра́дуяся и Бо́гу предстоя́, моли́ся со всѣ́ми святы́ми о спасе́ніи ду́шъ на́шихъ.

И ны́нѣ, богоро́диченъ, гла́съ то́йже:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.


НА ЛИТУРГІИ,

Блаже́нна, отъ кано́на свята́го пѣ́снь 3-я и 6-я на 8. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, [внуши́те вси́ живу́щіи по вселе́ннѣй]. Апо́столъ ко Евре́омъ, зача́ло 318. [Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́.] Ева́нгеліе отъ Матѳе́я, зача́ло 11. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Слу́жба и́же во святы́хъ отцу́ на́шему святи́телю Софро́нію, епи́скопу Ирку́тскому, чудотво́рцу. — New York: Printed by Russian Youth Committee, Б. г. [196-?] — Л. 1-9.

/ Къ оглавленію раздѣла /


Наверхъ / Къ титульной страницѣ

0