Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 23 мая 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 30-й де́нь.
Преподо́бнаго отца́ на́шего Іоа́нна, списа́теля Лѣ́стницы.

[ВЕЧЕРЪ,]
Стихи́ры, гла́съ 8. Подо́бенъ: О, пресла́внаго чудесе́!

Отче Іоа́нне преподо́бне,* вы́ну вои́стинну Бо́жія* въ горта́ни возноше́нія носи́лъ еси́,* поуча́яся дѣ́тельнѣйшимъ* богодохнове́ннымъ словесе́мъ, всему́дре,* и отту́ду истека́ющею благода́тію обогати́лся еси́,* бы́въ блаже́нъ,* нечести́выхъ всѣ́хъ совѣ́тованія низвраща́я.

Отче Іоа́нне пресла́вне,* сле́зъ исто́чники* ду́шу очи́стивъ* и всено́щными стоя́ніи Бо́га уми́лостививъ,* впери́лся еси́ къ любле́нію сего́, блаже́нне, и красотѣ́,* ея́же досто́йно ны́нѣ наслажда́ешися,* непреста́нно ра́дуяся,* съ сострада́льцы твои́ми,* богому́дре преподо́бне.

Отче Іоа́нне преподо́бне,* впери́въ у́мъ къ Бо́гу вѣ́рою,* мірска́го смѣше́нія омерзи́лъ еси́ нестоя́нное* и, кре́стъ тво́й воспріи́мъ,* Всеви́дцу послѣ́довалъ еси́,* тѣ́ло необузда́нное* по́двигами по́стничества* по́мыслу порабо́тивъ,* си́лою Боже́ственнаго Ду́ха.

Аще случи́тся суббо́та или́ недѣ́ля, пое́тся самогласе́нъ. Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Аще по́стенъ де́нь, пое́тся по стихи́рахъ: Сла́ва, и ны́нѣ, богоро́диченъ или́ крестобогоро́диченъ. [Пи́саны въ 31-й де́нь.]
[Богоро́диченъ, гла́съ 8:

Дѣ́вства сосу́дъ* и чи́стое Бо́жіе и кра́сное жили́ще,* молю́ Тя, Всечестна́я:* ду́шу мою́ утѣ́ши,* озло́бленную я́домъ зміи́нымъ* и умерщвле́нную преступле́ньми,* я́ко да сла́влю Тя́,* вѣ́рныя вся́ возвели́чившую,* Богора́дованная.

Крестобогоро́диченъ. Подо́бенъ: О, пресла́внаго чудесе́!

Что́ зри́мое видѣ́ніе,* е́же Мои́ма очи́ма ви́дится, о Влады́ко!* Содержа́й всю́ тва́рь,* на дре́во воздви́женъ бы́въ,* и умира́еши, всѣ́мъ дая́й жи́знь, —* Богоро́дица, пла́чущися, глаго́лаше,* егда́ узрѣ́ на Крестѣ́ возноси́ма,* и́же изъ Нея́ неизрече́нно возсія́вшаго* Бо́га и Человѣ́ка.]

На стихо́внѣ, Сла́ва, гла́съ 8. Самогла́сенъ:

Мона́ховъ мно́жества наста́вника тя́ почита́емъ, о́тче на́шъ Іоа́нне, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче и преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.

Тропа́рь, гла́съ 8:

Сле́зъ твои́хъ тече́ньми пусты́ни безпло́дное воздѣ́лалъ еси́, и и́же изъ глубины́ воздыха́ньми во сто́ трудо́въ уплодоноси́лъ еси́, и бы́лъ еси́ свѣти́льникъ вселе́ннѣй, сія́я чудесы́, Іоа́нне, о́тче на́шъ, моли́ Христа́ Бо́га спасти́ся душа́мъ на́шимъ.

Инъ тропа́рь, гла́съ 4:

Яко боже́ственную лѣ́ствицу, обрѣто́хомъ, Іоа́нне преподо́бне, твоя́ боже́ственныя добродѣ́тели, къ небеси́ возводя́щія на́съ: добродѣ́телей бо ты́ бы́лъ еси́ проображе́ніе. Тѣ́мъ моли́ Христа́ Бо́га, да спасе́тъ ду́ши на́ша. [1]


[НА УТРЕНИ,]
Кано́нъ, творе́ніе Игна́тіево. Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Во свѣ́тъ невеще́ственный и у́мный отъ сѣ́тованія веще́ственныхъ восте́къ, Іоа́нне преподо́бне, моли́твами твои́ми, су́щими ко Го́споду, просвѣти́ мя.

Яко воздержа́нія сла́дость сса́въ, отри́нулъ еси́ го́ресть страсте́й, тѣ́мже па́че ме́да и со́та услажда́еши, о́тче, чу́вства на́ша.

Возше́дъ на высоту́ добродѣ́телей и долѣре́вностныя поплева́въ сла́сти, сла́дость яви́лся еси́ спасе́нія, преподо́бне о́тче, па́ствѣ твое́й.

Богоро́диченъ: Прему́дрость и Сло́во Отчее несказа́нно ро́ждшая, души́ моея́ лю́тую уврачу́й я́зву и се́рдца болѣ́знь укроти́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Попали́лъ еси́ у́глемъ поще́нія, преподо́бне, страсте́й те́рніе и грѣ́еши мона́шествующихъ состоя́нія.

Мѵ́ро освяще́нія, отъ по́стническихъ, преподо́бне, арома́тъ ве́сь сложи́лся еси́ въ воню́ благоуха́нія Бо́жія.

Въ зако́нѣхъ обуче́нія поуча́яся, стра́сти погрузи́лъ еси́, я́коже ины́я ны́нѣ фараони́ты, тече́ніемъ сле́зъ твои́хъ.

Богоро́диченъ: Уста́ви мое́ нестоя́нное помысло́въ, Чи́стая, смуще́ніе, Ма́ти Бо́жія, къ Сы́ну Твоему́ направля́ющи движе́ніе.

Конда́къ, гла́съ 1. Подо́бенъ: Ли́къ а́нгельскій.

Плоды́ присноцвѣту́щія, отъ твоея́ кни́ги принося́ уче́нія, прему́дре, услажда́еши сердца́, си́мъ съ трезвѣ́ніемъ вне́млющихъ, блаже́нне: лѣ́ствица бо е́сть, ду́ши возводя́щая отъ земли́ къ небе́снѣй и пребыва́ющей сла́вѣ вѣ́рою чту́щихъ тя́.

Та́же, сѣда́ленъ, гла́съ 8. Подо́бенъ: Прему́дрости.

Видѣ́ніемъ и дѣя́ніемъ преесте́ственнѣ просія́въ, облиста́еши уче́ньми, зако́ны на́мъ положи́лъ еси́ богому́дрыя, блаже́нне, добродѣ́телей добро́ты степе́ни поста́вль и зло́бы ле́сти показа́въ и ловле́нія. Отону́дуже возво́диши твои́мъ послѣ́дующія боже́ственнымъ уче́ніемъ отъ страсте́й къ безстра́стію, Іоа́нне равноа́нгельне, моли́ Христа́ Бо́га прегрѣше́ній оставле́ніе пода́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и, я́ко младе́нца, дои́ши Зижди́теля и Го́спода. Тѣ́мже, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́, и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти, покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца и Па́стыря и Изба́вителя, Агница зря́щи на Крестѣ́, восклица́ше, пла́чущи, и го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй прегрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Яко цвѣ́тникъ благово́ннѣйшій и добродѣ́телей ра́й одушевле́нный, воздержа́ніе процвѣ́лъ еси́, и́мже вся́ пита́еши, чту́щія тя́.

Законоположи́теля обуче́нія и мона́ховъ пра́вило кротча́йшее, я́ко Моисе́я тя́ и Дави́да, и́стинно стяжа́вше, о́тче, ублажа́емъ.

Насажде́нъ на вода́хъ воздержа́нія, яви́лся еси́, блаже́нне, розга́, о́тче, благоцвѣ́тнѣйшая, благоче́стія гро́зды произнося́щая.

Богоро́диченъ: Подъ лѣ́томъ бы́вша, отъ Отца́ безлѣ́тно возсія́вша, Богома́ти, на́мъ родила́ еси́, Его́же моли́ спасти́ пою́щія Тя́.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Погаси́въ вся́ стра́сти росо́ю подвиго́въ твои́хъ, о́тче блаже́нне, оби́льно вже́гъ огне́мъ любве́ и вѣ́ры воздержа́нія свѣти́льникъ, и просвѣще́ніе безстра́стія, и дне́ сы́нъ бы́лъ еси́.

Вѣ́ры гро́здъ боже́ственнымъ земледѣ́ланіемъ твои́мъ, о́тче, воспита́лъ еси́, и въ точи́ла вложи́лъ еси́, и изгне́лъ еси́ труды́ обуче́нія, и, ча́шу испо́лнивъ духо́вную воздержа́нія, весели́ши сердца́ па́ствы твоея́.

Претерпѣ́въ до́блественно прило́ги и я́звы неви́димыхъ враго́въ, яви́лся еси́ сто́лпъ терпѣ́нія, утвержда́я па́ству твою́ па́лицею боже́ственною на па́житехъ воздержа́нія и на водѣ́ воспитова́я, блаже́нне.

Богоро́диченъ: Рѣ́чемъ Твои́хъ усте́нъ, Всечи́стая, послѣ́дующе, Тя́ ублажа́емъ: съ Тобо́ю бо вои́стинну вели́чія сотвори́вый Госпо́дь возвели́чи Тя́, и и́стинную Бо́жію Ма́терь рожде́йся изъ чре́ва Твоего́ показа́.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Собра́лъ еси́ въ души́ Боже́ственное бога́тство Ду́ха — непоро́чную моли́тву, чистоту́, че́стность, бдѣ́ніе всегда́шнее, воздержа́нія труды́. Имиже до́мъ позна́лся еси́ Бо́жій.

Вещества́ до́льняго, прему́дре, прете́клъ еси́ ху́дость, невеще́ственною же моли́твою у́мъ впери́въ, и вы́шняго упокое́нія яви́лся еси́ наслѣ́дникъ соверше́нствомъ житія́.

По́тами по́стническими у́гліе стрѣ́лъ вра́жіихъ угаси́лъ еси́ вои́стинну и, о́гнь вѣ́ры вже́гъ, попали́лъ еси́ невѣ́рія ересе́й шата́нія.

Богоро́диченъ: Возсія́ отъ Сіо́на вы́шняго благолѣ́піе предложе́ніемъ пло́ти по соедине́нію неизрече́нному, изъ Тебе́, Неискусобра́чная, обложе́нное, и мíръ просвѣти́.

Конда́къ, гла́съ 4. Подо́бенъ: Яви́лся еси́.

На высотѣ́ Госпо́дь воздержа́нія и́стинна тя́ положи́, я́коже звѣзду́ неле́стную, свѣтоводя́щую концы́, наста́вниче Іоа́нне, о́тче на́шъ.

Икосъ:

До́мъ Бо́жій я́ко вои́стинну тебе́ самаго́ содѣ́лалъ еси́, о́тче, боже́ственными твои́ми добродѣ́тельми я́вѣ украси́въ, я́ко зла́то свѣ́тлое, вѣ́ру, наде́жду и любо́вь и́стинную, Боже́ственныя зако́ны излага́я, воздержа́ніемъ обучи́вся, я́ко безпло́тенъ, ра́зумъ, му́жество, цѣлому́дріе стяжа́въ, смире́ніе, и́мже возвы́сился еси́. Тѣ́мже и, просвѣти́вся моли́твами непреста́нными, видѣ́ніи та́йными впери́лся еси́ и небе́сныя прія́лъ еси́ селе́нія, наста́вниче Іоа́нне, о́тче на́шъ.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

На зла́цѣ вы́шняго Ца́рствія ста́до, о́тче, воспита́лъ еси́ и, жезло́мъ догма́товъ звѣ́ри отгна́въ ересе́й, воспѣ́лъ еси́: оте́цъ на́шихъ Бо́же, благослове́нъ еси́.

Въ го́рній вше́лъ еси́ невѣ́стническій черто́гъ Ца́рства Христо́ва, оде́ждею облече́нъ, досто́йною зва́вшаго, въ не́мже и возле́глъ еси́, вопія́: оте́цъ на́шихъ Бо́же, благослове́нъ еси́.

Невла́жная грѣхми́ рѣка́ яви́лся еси́ воздержа́нія, о́тче, по́мыслы потопля́я и скве́рну очища́я вопію́щихъ вѣ́рою: оте́цъ на́шихъ Бо́же, благослове́нъ еси́.

Богоро́диченъ: Изъ чре́ва Твоего́ про́йде воплоти́выйся, Дѣ́во, всѣ́хъ Госпо́дь. Тѣ́мже Тя́, Богоро́дицу, му́дрствующе правосла́вно, Сы́ну Твоему́ зове́мъ: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Сто́лпъ тя́ одушевле́нный я́ко вои́стинну и о́бразъ воздержа́нія, о́тче, стяжа́вше, вси́ твою́ па́мять почита́емъ, Іоа́нне.

Мно́жество ра́дуется мона́ховъ, и лику́етъ преподо́бныхъ собо́ръ и пра́ведныхъ, вѣне́цъ бо досто́йно съ си́ми прія́лъ еси́.

Укра́шенъ добродѣ́тельми, въ невѣ́стникъ неизрече́нныя сла́вы возше́лъ еси́, пѣ́снь воспѣва́я Христу́ во вѣ́ки.

Богоро́диченъ: По́мощи я́же отъ Тебе́ тре́бующія не пре́зри, Дѣ́во, пою́щія и превознося́щія Тя́ во вѣ́ки.

Пѣ́снь 9.

Ирмо́съ: Чи́стую сла́вно почти́мъ, лю́діе, Богоро́дицу, о́гнь Божества́ пріи́мшую во чре́вѣ неопа́льно, пѣ́сньми велича́емъ.

Вра́чь боля́щихъ въ прегрѣше́ніихъ отъ Бо́га, блаже́нне, губи́тель же яви́лся еси́ и прогони́тель лука́выхъ духо́въ, тѣ́мже тя́ ублажа́емъ.

Зе́млю, я́коже тли́ жили́ще, оста́вилъ еси́, о́тче, и въ земли́ всели́лся еси́ кро́ткихъ, и съ ни́ми весели́шися, боже́ственныя наслажда́яся сла́дости.

Дне́сь де́нь пра́зднственный вся́ бо созыва́етъ мона́шествующихъ стада́ въ ли́къ духо́вный, трапе́зу и снѣ́дь нетлѣ́нныя жи́зни.

Богоро́диченъ: Въ Тебѣ́ всели́вся, Всенепоро́чная, пре́жде родонача́льники злонра́внаго прельсти́вшаго человѣкоубíйцу низложи́вый роди́ся и вся́ ны́ спасе́.

Свѣти́ленъ. Подо́бенъ: Жены́, услы́шите.

Мíра пристра́стія, я́ко отъ скве́рны уклони́лся еси́ и, а́лчбою пло́ть увяди́въ, обнови́лъ еси́ души́ крѣ́пость, преподо́бне, и сла́вою обогати́лся еси́ небе́сною, приснопа́мятне. Тѣ́мже не преста́й моля́ся о на́съ, Іоа́нне.

Богоро́диченъ:

Госпо́дственно Богоро́дицу Тя́ исповѣ́дуемъ, Влады́чице, Тобо́ю спа́сшіися, и́бо Бо́га неизрече́нно родила́ еси́, разо́ршаго Кресто́мъ сме́рть, къ Себѣ́ же привле́кшаго преподо́бныхъ собо́ры, съ ни́миже Тя́ восхваля́емъ, Дѣ́во.

Примѣчаніе:
[1] См. Псалти́ръ съ возслѣ́дованіемъ. Черни́говъ: Въ Тѵпогра́фіи оби́тели Свя́то-Тро́ицкой Ильи́нской, 1763 г. Ли́стъ 478 об.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 166 об. – 170.

/ Къ оглавленію раздѣла /


Наверхъ / Къ титульной страницѣ

0