Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 11 декабря 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 29-й де́нь.
Преподо́бнаго отца́ на́шего Ма́рка, епи́скопа Ареѳусíйскаго, и Кири́лла діа́кона, и ины́хъ, при Іуліа́нѣ мучи́телѣ пострада́вшихъ.

[ВЕЧЕРЪ,]
Стихи́ры, гла́съ 8. Подо́бенъ: О, пресла́внаго чудесе́!

Му́чениче святи́телю преподо́бне,* свяще́нства свѣ́томъ свяще́нно облиста́емь,* муче́нія просія́лъ еси́* невече́рнею свѣ́тлостію.* И ны́нѣ къ сія́нію преше́лъ еси́ незаходи́мому,* въ не́мже му́ченичестіи ли́цы ра́дуются,* идѣ́же лику́ютъ а́нгельстіи чи́ни.* Съ ни́миже на́съ всегда́ помина́й,* блаже́нне богопрія́тне.

Му́чениче страстоте́рпче Кири́лле,* Боже́ственный служи́тель я́влься,* Христу́ послужи́лъ еси́,* и, поже́рся, я́ко заколе́ніе чи́сто,* прине́слся еси́ на Бо́жію трапе́зу, богоблаже́нне,* и наслѣ́діе честно́е получи́лъ еси́,* во свѣ́тлостехъ святы́хъ* всегда́ пребыва́я,* свя́тъ бы́въ зва́ніемъ и дѣя́ніемъ.

Му́ченицы Христо́вы всехва́льніи,* му́къ пали́телище* росо́ю Боже́ственныя благода́ти* безвре́дно проидо́сте* и на водѣ́ поко́йнѣ обита́ти сподо́бистеся,* натрижне́нія побѣ́ды пріе́мше.* Тѣ́мже, ра́дующеся, вѣ́рою пра́зднуемъ* дне́сь свяще́нную ва́шу па́мять, святíи,* Христа́ сла́вяще.

Сла́ва, и ны́нѣ, богоро́диченъ:

Тя́ мо́лимъ, Пречи́стая,* Предста́тельницу на́шу,* смуща́емыя въ печа́лѣхъ,* не пре́зри до конца́ поги́бнути рабы́ Твоя́,* но ускори́ изъя́ти ны́* настоя́щаго гнѣ́ва и печа́ли,* о Богора́дованная Пресвята́я Чи́стая,* Ты́ бо на́мъ еси́ стѣна́* и по́мощь необори́ма.

Крестобогоро́диченъ:

Тя́ ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, — Ча́до сла́дкое,* ра́ны непра́ведно ка́ко терпи́ши?* Врачу́, исцѣли́вый человѣ́ческое неможе́ніе* и отъ тли́ всѣ́хъ изба́вивый* милосе́рдіемъ Твои́мъ.


[НА УТРЕНИ,]
Кано́нъ, его́же краегране́сіе: Ма́рка честву́ю и Кири́лла вбоже́нныя. Творе́ніе Іо́сифа. Гла́съ 8.

Пѣ́снь 1.

Ирмо́съ: Посѣ́ченый несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль. Пѣ́снь же воспѣва́шеся: Го́сподеви пои́мъ, сла́вно бо просла́вися.

Со а́нгелы Бо́гу предстоя́ще, Царю́ всѣ́хъ, му́ченицы всеблаже́нніи, проси́те на́мъ прегрѣше́ній избавле́нія, любо́вію блажа́щимъ вы́ и во хвале́ніи пою́щимъ: Го́сподеви воспои́мъ, сла́вно бо просла́вися.

Архіере́я Ду́хъ Святы́й тя́ предста́ви, Ма́рко, оби́льны па́ствити лю́ди во вся́комъ преподо́біи догма́товъ па́лицею слове́сною. Съ ни́ми же, блаже́нне, пѣ́лъ еси́: Го́сподеви воспои́мъ, сла́вно бо просла́вися.

Струя́ми крове́й пла́мень многобо́жія угаси́вше, му́дріи, ра́дующеся, пострада́сте, е́ллинскія мудрецы́ коне́чно посра́мльше, и ны́нѣ съ му́ченики Христу́ предстоите́, зову́ще: Го́сподеви воспои́мъ, сла́вно бо просла́вися.

Богоро́диченъ: Изъ Отрокови́цы нетлѣ́нныя Бо́гъ воплоща́ется, Его́же безпло́тныхъ ли́цы, трепе́щуще, сла́вятъ, я́ко всѣ́хъ Творца́ и Еди́наго непремѣ́ннаго, и человѣ́цы на земли́ всегда́ пою́тъ, воспѣва́юще: Го́сподеви пое́мъ, сла́вно бо просла́вися.

Пѣ́снь 3.

Ирмо́съ: Стра́хъ Тво́й, Го́споди, всади́ въ сердца́ ра́бъ Твои́хъ, и бу́ди на́мъ утвержде́ніе, Тя́ во и́стинѣ призыва́ющимъ.

Не прине́слъ еси́ че́сти безслове́снымъ истука́ннымъ, всеблаже́нне, но претерпѣ́лъ еси́ крѣпча́йше му́ки многообра́зныя, Ма́рко доблему́дренне.

Ума́ до́блестію претерпѣ́лъ еси́, пресла́вне Кири́лле, наруга́нія же и му́ки муже́й пребеззако́ннующихъ, му́чениче страстоте́рпче.

Обнажа́еми, му́ченицы многострада́льніи, и ра́нами сокруша́еми, непрело́жни пребы́сте, па́че Христо́вы любве́ ничто́же предпочита́юще.

Богоро́диченъ: Изъ Тебе́ возсія́, Всенепоро́чная, озаря́яй подсо́лнечную пресла́вными осія́ніи Пра́вды Со́лнце, Дѣ́во.

Сѣда́ленъ, гла́съ 4. Подо́бенъ: Яви́лся еси́.

Просвѣ́щшеся благода́тію и́стинною, земны́я концы́ свѣ́тло наставля́ете благоче́стно, священному́ченицы сла́вніи. Тѣ́мже вѣ́рою ва́съ ублажа́емъ.

Сла́ва, и ны́нѣ, богоро́диченъ:

Пречи́стѣи ру́цѣ Твои́, Дѣ́во-Ма́ти, просте́рши, покры́й упова́ющія на Тя́ и Сы́ну Твоему́ зову́щія: всѣ́мъ пода́ждь, Христе́, ми́лости Твоя́.

Крестобогоро́диченъ:

На дре́вѣ ви́дящи воздви́жена Сы́на Твоего́, Пречи́стая, утро́бою ма́тернею растерза́ема, жа́лостно взыва́ла еси́: увы́ Мнѣ́, ка́ко заше́лъ еси́, Свѣ́те Мо́й безлѣ́тный?

Пѣ́снь 4.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися, богови́дно усмотри́, и со стра́хомъ славосло́вяше си́лу Твою́.

Исте́кшая на зе́млю кро́вь твоя́, богому́дре, сію́ пои́стинѣ освяти́ досто́йно и ду́ши напои́ благочеству́ющихъ, къ ре́вности боже́ственнѣй воздвиза́ющи.

Заре́ю мы́сленною я́вѣ просвѣща́еми, но́щь злу́ю безбо́жнаго злосла́вія отгна́сте, му́ченицы, пресла́вно, Ма́рко и Кири́лле всеблаже́нніи.

Исцѣли́ на́ша неду́ги, Благодѣ́телю, Ма́рка моли́твами и Кири́лла боже́ственнаго и ми́лости Твоя́, Благоутро́бне, на вся́ воспѣва́ющія Тя́ низпосли́.

Си́лою Боже́ственною и благода́тію сло́ва, му́ченицы Христо́вы, хра́мы и́дольскія низлага́юще, Ду́ха Свята́го хра́мъ вѣ́рою показа́стеся.

Богоро́диченъ: Яви́лася еси́ Бо́жіе простра́нное вмѣсти́лище, престо́лъ высо́къ и две́рь, Богоро́дице, е́юже про́йде неизрече́ннымъ рождество́мъ, отъ тли́ ны́ воззыва́я.

Пѣ́снь 5.

Ирмо́съ: Отъ но́щи невѣ́дѣнія, Боговѣ́дѣнія де́нь, во свѣ́тѣ лица́ Твоего́, Христе́, да возсія́етъ, ко у́тру хвале́ніе Твое́ въ сердца́хъ на́шихъ.

Міроявле́нніи свѣти́льницы, священному́ченицы боже́ственніи бы́вше, вся́ просвѣща́ете Боже́ственными свѣтлостьми́ Ду́ха.

Усмотря́я, всеблаже́нне, воздая́нія боже́ственная, терпѣ́лъ еси́, Ма́рко, нестерпи́мыя ра́ны и болѣ́зни крѣпча́йше.

Священнодѣ́тель сы́й и, безкро́вныя же́ртвы принося́ Христу́, же́ртву, блаже́нне, благово́нную — тебе́ сама́го — Го́сподеви прине́слъ еси́.

Богоро́диченъ: Рождество́мъ стра́ннымъ Царя́ всѣ́хъ родила́ еси́, Пречи́стая Богоро́дице, на благодѣя́ніе тва́ри.

Пѣ́снь 6.

Ирмо́съ: Іо́ну въ ки́тѣ, Го́споди, еди́наго всели́лъ еси́, мене́ же свя́зана мре́жами вра́жіими, я́ко отъ тли́ о́наго, спаси́.

Претерпѣ́въ му́ки многоплете́нныя и сме́рть хода́тайственную, богому́дре, въ сла́вѣ присносу́щнѣй лику́еши на небесѣ́хъ, о на́съ, Кири́лле, моля́ся.

Глаго́лъ Бо́жій жи́въ въ се́рдцы твое́мъ я́ко имѣ́я, Ма́рко сла́вне, къ вѣ́рѣ Боже́ственнѣй привле́клъ еси́ лю́ди и наро́ды, му́дре, и благосла́вно тече́ніе сконча́лъ еси́.

Священнодѣ́теле и же́ртвы соверше́ны, Го́сподеви принесо́стеся, му́ками всесоже́гшеся, и въ вы́шнихъ свѣ́тли Царю́ всѣ́хъ предстоите́.

Богоро́диченъ: Разрѣше́ніе на́мъ долго́въ испроси́ и житія́ исправле́ніе, Дѣ́во, пѣсносло́вящимъ вели́чія Твоя́ и благочести́вымъ ра́зумомъ Тя́ сла́вящимъ.

Пѣ́снь 7.

Ирмо́съ: Отъ Іуде́и доше́дше, о́троцы въ Вавило́нѣ иногда́, вѣ́рою тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Просвѣ́щшеся заре́ю Святы́я Тро́ицы, богоблаже́нніи, тму́ пре́лести изгна́сте и сла́ву улучи́сте, пѣснопою́ще: оте́цъ на́шихъ Бо́же, благослове́нъ еси́.

Ни́жняя оста́вльшіи и вы́шняя наслѣ́довавшіи, богоно́сный Ма́рко и Кири́ллъ боже́ственный да почту́тся, пѣснопою́ще: оте́цъ на́шихъ Бо́же, благослове́нъ еси́.

Дрема́ніе нерадѣ́нія во вре́мя подвиго́въ оттря́сше, соверши́сте тече́ніе и собо́ромъ страстоте́рпецъ, пѣснопою́ще, совокупи́стеся: оте́цъ на́шихъ Бо́же, благослове́нъ еси́.

Богоро́диченъ: Изъ Тебе́ спасе́ніе па́че ума́ же и сло́ва, Дѣ́во, возсія́ во тмѣ́ сѣдя́щимъ сме́ртнѣй и до́лѣ су́щія небе́сны содѣ́ла, вопію́щія: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилѣжа́ще, о́троцы вопія́ху: благослови́те, вся́ дѣла́ Госпо́дня, Го́спода.

Побѣди́тели мучи́теля, сверѣ́по судя́щаго, показа́вшеся, нетлѣ́нныя вѣнцы́, му́ченицы, прія́сте, вопію́ще: благослови́те, вся́ дѣла́ Госпо́дня, Го́спода.

Щито́мъ любве́, страда́льцы, и вѣ́ры вооруже́ни, вра́жія ополче́нія мече́мъ посѣко́сте боже́ственныя до́блести, вопію́ще: благослови́те, вся́ дѣла́ Госпо́дня, Го́спода.

На земли́ пострада́вше, въ вы́шнихъ, святíи, пра́вды вѣне́цъ отъ руки́ Христо́вы прія́сте, вопію́ще: благослови́те, вся́ дѣла́ Госпо́дня, Го́спода.

Тро́иченъ: Яко Еди́ницу Естество́мъ, я́ко Тро́ицу Тя́ честву́ю начерта́ньми, Отче Вседержи́телю, и Сы́не, и Ду́ше Святы́й, взыва́я: благослови́те, вся́ дѣла́ Госпо́дня, Го́спода.

Богоро́диченъ: Ста́мну Тя́ ма́нны жи́зненныя проповѣ́дуемъ, Благослове́нная, трапе́зу, и же́злъ, и кади́льницу, златы́й свѣ́щникъ, го́ру же и две́рь, купину́ неопали́му, престо́лъ Вы́шняго и мíра спасе́ніе.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Стопа́мъ, му́ченицы, Христа́, пострада́вшаго и стра́сти умертви́вшаго, послѣ́довавше, мно́гихъ ра́нъ искуше́ніе прія́сте, и, обличи́вше враго́въ безбо́жныхъ служе́нія, возвели́чистеся, и а́нгеломъ я́вѣ уподо́бистеся.

Яви́стеся у́гліе о́гненно, приобщи́вшеся Бо́гу, всеблаже́нніи, и попали́сте многобо́жія ве́щь благода́тію, и къ Свѣ́ту у́мному, ра́дующеся, преидо́сте, богоблаже́нніи, озаря́юще на́ша разумѣ́нія.

Поста́вльше на ка́мени мы́сленнѣмъ ду́шъ ва́шихъ стопы́, всехва́льніи, не поколеба́стеся мно́гихъ му́къ приложе́ньми. Тѣ́мже утвержда́йте на́ша при́сно мы́сли, кова́рствы вра́жіими коле́блемыя, добропобѣ́дніи му́ченицы.

Взя́стеся къ пресвѣ́тлому свидѣ́тельства, страстоте́рпцы, краегра́дію, къ высотѣ́ вели́цѣй, и Ца́рство Бо́жіе непоколеби́мое сподо́бистеся прія́ти, Ма́рко свяще́ннѣйшій, Кири́лле сла́вне, его́же получи́ти всѣ́мъ на́мъ моли́теся.

Богоро́диченъ: Сія́ніемъ Твои́мъ, Отрокови́це, мы́сленнымъ просвѣти́ на́ша мы́сли, Богора́дованная, и сердца́, и мудрова́нія, я́ко да по стезя́мъ жи́зни пра́во ше́ствующе, ми́лость улучи́мъ, возвѣща́юще при́сно хвалы́ Твоя́.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 163 об. – 166 об.

/ Къ оглавленію раздѣла /


Наверхъ / Къ титульной страницѣ

0