Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 28-й де́нь.
Преподо́бнаго отца́ на́шего Иларіо́на Но́ваго и свята́го Стефа́на чудотво́рца.

[ВЕЧЕРЪ,]
Стихи́ры, гла́съ 4. Подо́бенъ: Да́лъ еси́ зна́меніе.

Житіе́ нескве́рно,* терпѣ́ніе, и кро́тость,* и любо́вь нелицемѣ́рну,* воздержа́ніе безмѣ́рно,* всено́щное стоя́ніе,* умиле́ніе Боже́ственно,* вѣ́ру, наде́жду и́стинну въ сострада́ніи, о́тче, стяжа́въ,* я́ко а́нгелъ пожи́лъ еси́ на земли́ съ пло́тію,* Иларіо́не блаже́нне,* моли́твенниче о душа́хъ на́шихъ.

Земны́й а́нгелъ* и небе́сный человѣ́къ бы́лъ еси́, преподо́бне,* исто́чникъ умиле́нія,* сострада́нія струя́,* пучи́на чуде́съ,* грѣ́шныхъ пору́чникъ,* ма́слина вои́стинну Бо́жія плодови́та,* еле́емъ трудо́въ твои́хъ умаща́я ли́ца,* Иларіо́не чу́дне,* вѣ́рно восхваля́ющихъ тя́.

Умъ тво́й, просвѣща́емь* Боже́ственными ра́зумы,* тѣле́сныхъ страсте́й превы́ше бы́сть,* непримѣ́шенъ земны́мъ,* нося́ начерта́ніе* и изобража́я въ себѣ́ боже́ственную добро́ту,* и познава́емь ве́сь богови́днѣйшій* содѣ́йствомъ Ду́ха,* Иларіо́не о́тче на́шъ,* мона́шествующихъ украше́ніе.

Ины стихи́ры свята́го Стефа́на, гла́съ то́йже. Подо́бенъ: Яко до́бля.

Мона́хъ и́стиннѣйшій,* звѣзда́ свѣтлѣ́йшая* и исто́чникъ бы́въ умиле́нія,* любве́ яви́лся еси́ испо́лненъ* и кро́токъ, и ти́хъ,* сострада́теленъ и смире́нъ,* беззло́бивъ, непоро́ченъ, о́тче Стефа́не.* Сего́ ра́ди Христо́съ тя́* преподо́бныхъ поставля́етъ стадо́мъ па́стыря,* чудодѣ́йствіи почита́ема.

Бдѣ́ніе всено́щное* и воздержа́ніе неизрече́нно,* моли́тву нему́тну,* житіе́ боже́ственно,* вѣ́ру, наде́жду и́скренню,* правосла́вну му́дрость,* чу́дно пребыва́ніе* и велича́йшее сострада́ніе, о́тче, имѣ́лъ еси́,* и у́меръ, и пре́жде конца́ облиста́въ во зна́меніихъ пресла́вныхъ.* Тѣ́мже тя́ почита́емъ, преподо́бне Стефа́не.

Яко звѣзду́ многосвѣ́тлу,* и я́ко со́лнце незаходи́мо,* и я́ко не́бо одушевле́нное,* боже́ственными чудесы́, я́ко звѣзда́ми, укра́шено,* и я́ко цвѣ́тникъ благово́нный, и ра́й сла́дости,* я́ко исто́чникъ свяще́нія,* я́ко превели́ка врача́ немощству́ющихъ,* я́ко па́стыря и до́браго на́шего предста́теля,* восхваля́емъ тя́, Стефа́не.

Сла́ва, и ны́нѣ, богоро́диченъ, гла́съ и подо́бенъ то́йже:

Ту́чами Ду́ха Пресвята́го, Пречи́стая,* мою́ мы́сль ороси́,* Яже ка́плю ро́ждшая, Христа́,* неизче́тно безмѣ́рная беззако́нія человѣ́ковъ* щедро́тами измы́вшую,* изсуши́ исто́чникъ страсте́й мои́хъ* и пото́ка мя́ сподо́би* пи́щи живы́я при́сно* моли́твами Твои́ми.

Крестобогоро́диченъ, подо́бенъ то́йже:

На Крестѣ́ Тя я́ко узрѣ́* пригвожде́на, Го́споди,* Агница и Ма́ти Твоя́ дивля́шеся,* и — что́ видѣ́ніе сіе́, — взыва́ше, —* Сы́не вожделѣ́нне?* Сія́ Ти невѣ́рный собо́ръ воздаде́ беззако́нный,* мно́гихъ Твои́хъ чуде́съ наслади́выйся.* Но сла́ва неизглаго́ланному* соше́ствію Твоему́, Влады́ко.


[НА УТРЕНИ,]
Кано́нъ преподо́бнаго Иларіо́на, его́же краегране́сіе: Твоя́ ти́хія восхвалю́, о́тче, нра́вы. Творе́ніе Іо́сифа. Гла́съ 2.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Сострада́теленъ, и кро́токъ бы́въ, о́тче, и цѣ́лъ, и ти́хъ я́ко вои́стинну ду́хомъ, сострада́нія боже́ственнаго мя́ хода́тайствомъ твои́мъ, Иларіо́не, сподо́би, я́ко да воспою́ тя́ ны́нѣ, въ тишинѣ́ се́рдца моего́.

Очи́стився, о́тче, отъ дѣ́тства и взе́мъ кре́стъ тво́й, Го́сподеви послѣ́довалъ еси́, стра́сти тѣле́сныя воздержа́ніемъ же и ча́стыми моли́твами увяди́лъ еси́ и безстра́стіемъ украша́яся.

Воспріе́мъ ты́ Госпо́дне и́го ле́гкое, и, Того́ послу́шая оправда́ній, Иларіо́не преподо́бне, тяжча́йшее грѣхо́вное отве́рглъ еси́, всему́дре, бре́мя, святы́ню пристяжа́въ.

Богоро́диченъ: Мои́хъ прегрѣше́ній плени́цы, Влады́чице, расто́ргни, Твоего́ Сы́на и Бо́га моля́щи, и му́чащій мя́, Приснодѣ́во, грѣ́хъ низложи́, я́ко да восхвалю́ Тя́ при́сно, Всенепоро́чная, спаса́емь.

Инъ кано́нъ, свята́го Стефа́на, его́же краегране́сіе: Твоя́ честву́ю, всеблаже́нне, боже́ственныя труды́. Творе́ніе ки́ръ Іо́сифа. Гласъ 1.
Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Боже́ственную па́мять твою́, богому́дре о́тче, вѣ́рно пра́зднующе, всѣ́хъ Го́спода при́сно сла́вимъ, тя́ просла́вльшаго мно́гими, Стефа́не, чудесы́.

Умъ тво́й, манове́ніи боже́ственными, всему́дрѣ, обожа́емь, всеконе́чно отврати́ся отъ страсте́й пло́ти и а́нгела тя́ на земли́ показа́, Стефа́не.

Подъя́лъ еси́ по́стничества болѣ́зни, о́тче, и стра́сти умертви́лъ еси́ пло́ти неудобоудержа́нныя, и въ безстра́стіе, я́ко во оде́жду свѣ́тлу, я́вѣ одѣ́ялся еси́.

Распе́нъ у́ды твоя́ воздержа́ніемъ, Христу́, о́тче, пожи́лъ еси́, Кресто́мъ сме́рть погу́бльшему и исцѣле́ній оби́льною благода́тію обогати́вшему тя́.

Богоро́диченъ: Зачала́ еси́, Пречи́стая, неизрече́ннымъ сло́вомъ вся́ содержа́щаго земны́я концы́ и Сего́ родила́ еси́, Его́же моли́ прилѣ́жно поми́ловати ны́.

Пѣ́снь 3.

Ирмо́съ: Процвѣла́ е́сть пусты́ня, я́ко кри́нъ, Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Житіе́ твое́, я́ко со́лнце, возсія́, преподо́бне, свѣ́тлыми дѣя́ніи, мона́шествующихъ ли́ки просвѣти́ и де́монскую тму́ отгна́.

Бы́лъ еси́ тиша́йшъ се́рдцемъ, преподо́бне, и смире́нъ ду́хомъ, и любве́ Боже́ственныя испо́лненъ, благопривѣ́тливъ обы́чай имѣ́яй всегда́.

Ка́плями твои́хъ сле́зъ угаси́лъ еси́ у́гли грѣхо́вныя, то́чиши же, я́ко пре́жде конца́ и по концѣ́, му́дре, исцѣле́ній пучи́ну притека́ющимъ.

Богоро́диченъ: Исцѣли́ я́звы души́ моея́, Влады́чице, и ума́ испра́ви движе́нія къ во́лямъ изъ Тебе́ вопло́щшагося Сло́ва, молю́ся.

Инъ.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, и́же надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Дѣ́лы честны́ми и исправле́ніи добродѣ́тельными, о́тче, просія́лъ еси́, я́коже звѣзда́ всесвѣ́тлая, мона́шествующихъ собо́ру и просвѣти́лъ еси́ чуде́сными сія́ніи подсо́лнечную.

Си́лою благода́ти Ду́ха враги́ безпло́тныя низложи́лъ еси́, и возне́слся еси́ благосла́вно смире́нною му́дростію, и чуде́съ самодѣ́латель, о́тче му́дре, бы́лъ еси́.

Ерети́чествующихъ, о́тче, уста́ и́стины сло́вомъ загради́лъ еси́ и, гоне́нія претерпѣ́въ, вѣне́цъ боже́ственный воспрія́лъ еси́, кромѣ́ я́звы бы́въ, му́дре, му́ченикъ изря́днѣйшъ.

Богоро́диченъ: Да Бо́гъ Человѣ́къ бу́детъ, Бо́гъ бы́сть Человѣ́къ, изъ Тебе́, еди́ныя Чи́стыя, нача́ло пріе́мъ Безнача́льный. Сего́ ра́ди Тя́, Дѣ́во, вѣ́рніи, ублажа́емъ.

Сѣда́ленъ, гла́съ 4. Подо́бенъ: Ско́ро предвари́.

Бо́гу освяти́лъ еси́ твою́, всеблаже́нне, жи́знь, бы́въ изря́днѣйшъ священнодѣ́тель, и́стинно Христо́въ, свяще́ннѣйше. Тѣ́мже, по мно́гихъ и по́тѣхъ, и болѣ́знехъ ра́дуяся, къ невеще́ственнымъ преста́вился еси́ ски́ніемъ и ны́нѣ источа́еши на́мъ струи́ врачева́ній.

Сла́ва, сѣда́ленъ, гла́съ 1. Подо́бенъ: Гро́бъ Тво́й.

Яко со́лнце, свѣ́тло возсія́вши, о́тче, па́мять твоя́, вѣ́рныхъ сердца́ просвѣща́етъ, стра́сти отгоня́ющи и тмы́ изъе́млющи. Юже вѣ́рою чи́стою соверша́ющія покры́й, сохрани́ отъ искуше́ній жите́йскихъ на́съ, о́тче Стефа́не.

И ны́нѣ, богоро́диченъ:

Безневѣ́стная Чи́стая Богоро́дице Дѣ́во, еди́на вѣ́рныхъ Предста́тельнице и покро́ве, бѣ́дъ, и скорбе́й, и лю́тыхъ обстоя́ній вся́ изба́ви, на Тя́ упова́ніе, Отрокови́це, иму́щія, и ду́ши на́ша спаси́ боже́ственными моли́твами Твои́ми.

Крестобогоро́диченъ:

Зря́щи Тя́, Христе́, Всенепоро́чная Ма́ти, ме́ртва на Крестѣ́ просте́рта, вопія́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сіе́ строе́ніе? Имже спа́слъ еси́ пречи́стыхъ ру́къ Твои́хъ, Ще́дре, созда́ніе.

Пѣ́снь 4.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Очи́стивъ твое́ се́рдце, честны́ми восхожде́ньми у́мъ впери́лъ еси́ Еди́наго Бо́га зрѣ́ти добро́ту недомы́сленную и отону́дными свѣтлостьми́ озаря́тися.

Сказа́ніе слове́съ Боже́ственныхъ творя́, ра́зумъ Боже́ственный, о́тче, отту́ду поче́рплъ еси́, всѣ́мъ же преда́лъ еси́ благоче́стно, Иларіо́не, къ тебѣ́ притека́ющимъ.

Глаго́лъ твои́хъ сла́достію сердца́ ути́ши притека́ющихъ къ тебѣ́, творя́ бо я́же учи́лъ еси́ сло́вомъ благопрія́тнымъ, въ сострада́ніи любо́вь имѣ́лъ еси́, преподо́бне.

Богоро́диченъ: Госпо́дь Тя́ Госпожу́ и Влады́чицу всѣ́хъ содѣ́ла, Пречи́стая: изъ Твои́хъ бо ложе́снъ воплоти́ся, отъ о́бласти вра́жія Свое́ созда́ніе изба́вивъ.

Инъ.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ, позна́ешися, внегда́ пріити́ вре́мени, пока́жешися. Сла́ва си́лѣ Твое́й, Го́споди.

Ка́плями свяще́нныхъ твои́хъ сле́зъ напои́вся, дре́во яви́лся еси́, Стефа́не, плодови́то, му́дре, плоды́ принося́ добродѣ́телей благово́нныя, и чудеса́ безчи́сленна источа́еши. Тѣ́мже благоче́стно тя́ почита́емъ.

Яко боже́ственный зри́тся ра́й, му́дре, хра́мъ, имѣ́я твои́хъ моще́й ра́ку, цвѣ́ты разли́чныя принося́ чуде́съ, и́миже сердца́ наслажда́ются вѣ́рою, Стефа́не, при́сно хва́лящихъ тя́.

Слѣпы́я разрѣша́еши и уставля́еши лю́тыя человѣ́ковъ неду́ги въ сла́ву Христо́ву, отъ Него́же, благода́тію трудо́въ обогати́вся, возвели́чился еси́, просвѣти́лся еси́ и просла́вился еси́, сла́во мона́шествующихъ, о́тче на́шъ.

Богоро́диченъ: Свята́я Богоро́дице, освяти́ ны, Яже Пресвята́го ро́ждши пло́тію, уподо́битися восхотѣ́вша человѣ́комъ, и небе́снаго жи́тельства вся́ покажи́, Пречи́стая, прича́стники моли́твами Твои́ми.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Истка́лъ еси́ себѣ́ спасе́нія, преподо́бне, ри́зу отъ сво́йственныхъ болѣ́зней твои́хъ, се́ю одѣ́явся, и кня́зя тмы́ въ сту́дъ вѣ́чный обле́клъ еси́.

Пло́ти сла́сти воздержа́ніемъ, преподо́бне, увяди́лъ еси́ и благода́ть небе́сную, о́тче, воспрія́лъ еси́, Иларіо́не, врачева́ти вся́кія человѣ́ковъ неду́ги.

Твои́ къ Бо́гу непреста́нно ру́цѣ воздѣва́емѣ руки́ льсти́ваго, о́тче, благочести́выя изба́виша и вся́кому боля́щему здра́віе пода́ша.

Богоро́диченъ: Крѣ́пость вѣ́рныхъ и преподо́бныхъ была́ еси́ держа́ва, Тобо́ю бо, Чи́стая, всѣ́мъ истеко́ша лу́чшая и на земли́ живу́щіи къ небеси́ восхо́дятъ.

Инъ.

Ирмо́съ: Тво́й ми́ръ да́ждь на́мъ, Сы́не Бо́жій, ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.

Мѵродохнове́ненъ бы́въ боже́ственными добродѣ́тельми, источи́лъ еси́, му́дре, по успе́ніи мѵ́ро благово́нное, удивля́емь вѣ́рными человѣ́ки, любо́вію честву́ющими тя́.

Велича́йшими показа́ніи чуде́съ стра́шныхъ, Стефа́не всему́дре, просія́лъ еси́ и пре́жде сме́рти, досточу́дне, и по изше́ствіи, и свяще́нномъ твое́мъ погребе́ніи.

Свя́то соверши́въ твое́ житіе́ о Христѣ́, Стефа́не богому́дре, о́тче на́шъ, со святы́ми всели́лся еси́ и ны́нѣ освяща́еши вѣ́рою честву́ющія тя́.

Богоро́диченъ: Ро́ждши, Пренепоро́чная, Бо́га Емману́ила, Человѣ́ка я́вѣ за милосе́рдіе бы́вша, Сего́ моли́ я́ко Человѣколю́бца, Чи́стая, уще́дрити согрѣ́шшія.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Умертви́вся, Иларіо́не, мíру всему́, ны́нѣ живе́ши, преста́вився въ небе́сныя хра́мы и живоно́сное всегда́ исцѣле́ній источа́еши дѣ́йство.

Благозва́ненъ, кро́токъ, незло́бивъ, непоро́ченъ, и преподо́бенъ, и благоумиле́нъ, и ти́хъ ду́хомъ бы́лъ еси́, о́тче пребога́те.

Сострада́ніемъ безмѣ́рнымъ украша́емь и нищелю́бія добро́тою честву́емь, Бо́жій уго́дникъ бли́жній, Иларіо́не, показа́лся еси́, всеизря́дне.

Яко че́стно твое́ житіе́ и непоро́чно, я́ко предо́бръ и красе́нъ нра́въ тво́й, я́ко стра́шна чудеса́, я́же соверша́еши всегда́, всечу́дне.

Богоро́диченъ: Черто́гъ Бо́жій нескве́рный, престо́лъ огнеобра́зный Вседержи́теля, Богоро́дицу, вси́ ро́ди родо́въ, ублажа́емъ.

Инъ.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́, и спаси́ мя, Спа́се мíра, зову́ща: сла́ва Тебѣ́.

Исправля́еши, о́тче, хромы́я, вооча́еши слѣпы́я, ходи́ти же твори́ши разсла́бленныя, о Христѣ́, и отгоня́еши лука́выя ду́хи, Стефа́не преподо́бне.

Струя́ истека́етъ при́сно, я́ко отъ исто́чника чи́ста, отъ честны́я твоея́ ра́ки исцѣле́ній бога́тно, блаже́нне, страсте́й изсуша́ющи вся́къ пото́къ.

Чу́денъ чудодѣ́латель и па́стырь и́стиненъ, о́тче Стефа́не, я́влься, сохраня́й при́сно ста́до твое́, е́же совокупи́лъ еси́ мно́гими по́ты твои́ми.

Богоро́диченъ: На Тя́, я́ко до́ждь на руно́, соше́дъ, Богоро́дице, Спа́съ, изсуши́ я́вѣ то́ки безбо́жія, ду́ши же напои́въ при́сно чту́щихъ Тя́.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Ору́жіи уязви́лъ еси́ твои́хъ подвиго́въ безпло́тнаго змíя и всеконе́чно истреби́лъ еси́. Тѣ́мже чуде́съ по́честь воспрія́лъ еси́, стра́сти лютѣ́йшія ду́шъ же и тѣле́съ исцѣля́ти, преподо́бне.

Сло́во твое́ происхо́дитъ, я́коже роса́, отгоня́ зно́й уны́нія, преподо́бне, приходя́щихъ тебѣ́ вѣ́рою, о́тче на́шъ, и добродѣ́тельными твои́ми при́сно просвѣща́я нра́вы ду́хомъ.

Страсте́й самоде́ржца у́мъ сотвори́въ, я́вѣ ца́рствовалъ еси́, я́ко побѣди́тель изря́денъ, и язы́ки иноплеме́нныя побори́лъ еси́, и изгуби́лъ еси́, му́дре, де́моновъ стра́сти всепа́губныя.

Не поколеба́ша, преподо́бне, твоего́ се́рдца столпа́ недви́жимаго искуше́ній вѣ́тры, на ка́мени бо утверди́ся Госпо́дни любве́, е́юже укрѣпля́емь, мно́гимъ бы́лъ еси́ боже́ственное, о́тче, утвержде́ніе.

Тро́иченъ: Пою́ Тя, Тричи́сленную Ли́цы, Тро́ице Пресу́щественная, нераздѣ́льну, неслія́нну Еди́ницу, естество́мъ же недомы́сленну, Еди́наго Вседержи́теля Бо́га — Отче, Сло́ве и Ду́ше Святы́й.

Богоро́диченъ: Образы Тя́ издале́ча прообразова́ше благода́ть Ду́ха проро́ческими проповѣ́даніи, го́ру ту́чну свя́ту, дверь спаси́тельную, сви́токъ же новѣ́йшій, Чи́стая, и киво́тъ Тя́ имену́ющи.

Инъ.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́ о́гнь. Тогда́ тріе́ я́ко еди́нѣми усты́ поя́ху и благословля́ху, глаго́люще: благослове́нъ Бо́гъ оте́цъ на́шихъ.

Священнодѣ́йствовалъ еси́, я́коже тебе́ сама́го у́гліемъ по́стническаго пребыва́нія, ве́сь Христо́во показа́лся еси́, о́тче, благово́ніе и вѣ́рныхъ ли́ца благово́нствуеши при́сно, чудодѣ́йствуя па́че ума́.

Правосла́вія сія́я блиста́ніи, отгна́лъ еси́ тму́ ересе́й, му́дре, и, гоне́нія на лѣ́та мно́жайшая претерпѣ́въ, му́ченикъ безъ кро́ве бы́лъ еси́. Тѣ́мже вѣ́рно тя́ восхваля́емъ.

Терпѣ́ніе стяжа́въ мно́гое, воздержа́ніе, вѣ́ру и любо́вь и́стинну, яви́лся еси́ оте́цъ сиро́тъ, вдови́цъ предста́тель сострада́теленъ и смире́нъ, Стефа́не, мона́ховъ сла́во и похвало́.

Твоему́ удиви́ся по́лкъ злоу́мныхъ всено́щному стоя́нію и моли́твенному пожда́нію, слеза́мъ и воздыха́нію къ Зижди́телю и́стиннѣй любви́, и́миже низложи́лъ еси́ тѣ́хъ, Стефа́не, кова́рствія.

Богоро́диченъ: Ка́ко пита́еши млеко́мъ Сы́на безо́тча, пита́ющаго вся́ко дыха́ніе, Ма́ти Чи́стая? Ка́ко на рука́хъ но́сиши содержа́щаго вся́? Па́че ума́ чу́до Твое́. Тѣ́мъ пое́мъ при́сно вели́чія Твоя́.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Привре́менную оста́вивъ житія́ сла́ву, о́тче, и претека́ющее наслажде́ніе, сла́ву же неотъе́млему и пи́щу немимотеку́щую на небесѣ́хъ воспрія́лъ еси́, всему́дре, со всѣ́ми, боя́щимися Го́спода.

Все́ твое́, сѣ́туя, проше́лъ еси́ житіе́, тѣ́мъ блаже́нства сподо́бился еси́ и утѣше́нія, ему́же причаща́ются святíи, въ земли́ кро́ткихъ, ра́дуяся, ны́нѣ, преподо́бне, всели́лся еси́, я́ко смы́сленъ же и разу́менъ.

Честна́ твоя́ предъ Бо́гомъ яви́ся сме́рть, о́тче свяще́ннѣйше: Того́ бо почти́лъ еси́ ико́ну и гоне́нія претерпѣ́лъ еси́, оскорбля́емь отъ мучи́телей, преподо́бне, му́ченикъ въ се́мъ показу́яся.

Уста́вилъ еси́ я́вѣ ловце́въ, о́тче, негодова́ніе и умно́жилъ еси́ си́хъ ловле́нія, и́же пре́жде не получи́ша, Бо́гу послу́шавшу, преподо́бне, моли́твъ твои́хъ, священнодѣ́йственне всеблаже́нне.

Богоро́диченъ: Скве́рны мя́ страсте́й и ка́ла грѣхо́внаго, Богора́дованная, отмы́й и две́рь мнѣ́ отве́рзи покая́нія, попо́лзшемуся, и соде́ржно прегрѣше́ньми, Чи́стая, срѣта́ющемуся, и Бо́га прогнѣ́вающему.

Инъ.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Преподо́бно преподо́бная, всеблаже́нне, соверша́я, преподо́бнымъ сочта́лся еси́ и всѣ́мъ избра́ннымъ, съ ни́миже тя́ почита́емъ и ра́цѣ моще́й твои́хъ покланя́ющеся, Стефа́не о́тче богоно́се.

Ума́ чистоту́ стяжа́въ, му́дре, Ду́ха зерца́ло бы́лъ еси́ красно́, Сего́ явле́нія пріе́мля и лю́ди просвѣща́я твои́ми уче́ніи.

Ви́дится пресла́вное, всеблаже́нне, тобо́ю, всему́дрѣ, соверша́емое: отъ еди́наго бо твоего́ жена́ видѣ́нія прису́щаго е́й неду́га отрѣ́шшся, пра́во ше́ствоваше.

Тро́иченъ: Воспои́мъ Безнача́льнаго Отца́, и Сы́на, и Ду́ха Свята́го, нераздѣ́льное нача́ло, присносу́щную держа́ву, Тріѵпоста́сное Естество́, еди́ну сла́ву и еди́но Ца́рство.

Богоро́диченъ: Вопло́щся Безпло́тный изъ Тебе́ боголѣ́пнѣ, Его́же моли́, Пречи́стая, стра́сти пло́ти моея́ умертви́ти и оживи́ти мою́ умерщвле́нную ду́шу грѣхми́.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

Врачева́нія гро́бъ тво́й Ду́ха благода́тію источа́я, изсуша́етъ страсте́й ту́чи, ду́хи отго́нитъ пре́лести и просвѣща́етъ всѣ́хъ сердца́, Иларіо́не преподо́бне, вѣ́рно блажа́щихъ тя́.

Яко ши́покъ, процвѣ́лъ еси́ въ цвѣ́тницѣ поще́нія, я́ко сладково́нный кри́нъ, я́ко я́блоко благово́нно, и облагоуха́лъ еси́ всѣ́хъ благочести́выхъ ду́ши и сердца́, Иларіо́не сла́вне, моли́твенниче о благохва́лящихъ тя́.

Сострада́ніе имѣ́лъ еси́, любо́вь, и смире́ніе, и ми́лостыню, и обы́чай про́стъ, вѣ́ру и́стинну и наде́жду, житіе́ че́стно и нра́въ пра́въ, Иларіо́не преподо́бне, мона́шествующихъ удобре́ніе.

Па́мять твоя́ дне́сь, я́ко со́лнце, возсія́, благочести́выхъ сердца́ свѣ́тлостію болѣ́зней твои́хъ и чуде́съ сія́ньми я́ко вои́стинну просвѣща́ющи, о́тче, въ ню́же вся́ помяни́, вѣ́рно чту́щія тя́.

Богоро́диченъ: Гла́съ Тебѣ́ прино́симъ Гавріи́ловъ, ра́дующеся: ра́дуйся, глаго́люще, мѣ́сто свяще́нія; ра́дуйся, преподо́бныхъ сла́во и всѣ́хъ вѣ́рныхъ спасе́ніе, Ея́же ра́ди обожи́хомся, Богоро́дице Приснодѣ́во.

Инъ.

Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́ я́ко Ма́терь Бо́га на́шего Чи́стую.

Стопа́мъ послѣ́дуя, богоно́се, благоче́стно и преподо́бно пожи́вшимъ на земли́, кро́токъ, незло́бивъ яви́лся еси́, сострада́теленъ, и смире́нъ, и ти́хъ, Стефа́не, и любве́ испо́лненъ Боже́ственныя, сего́ ра́ди тя́ вѣ́рно восхваля́емъ.

Якоже сладково́нное мѵ́ро, я́ко пречи́стый кри́нъ, я́ко ши́покъ, о́тче, благоцвѣту́щь, благово́ніе испуща́еши отъ честны́я твоея́ ра́ки безчи́сленныхъ врачева́ній, злосмра́дныя неду́ги отгоня́ вѣ́рою приступа́ющихъ тебѣ́ те́плѣ.

Тя́, па́стыря боже́ственнаго и подража́теля вели́каго Началопа́стыря Христа́, мо́лимъ, богому́дре: су́щія твоего́ ста́да ны́нѣ о́вцы, на́съ спаса́й отъ лука́выхъ волко́въ святы́ми хода́тайствы твои́ми при́сно.

Всесвята́я твоя́ па́мять, я́коже со́лнце ве́ліе, возсія́вши, свѣ́тло озаря́етъ тва́рь, ю́же соверша́юще благоче́стно, вопіе́мъ ти́, Стефа́не: моли́твами твои́ми всѣ́хъ мы́сли озари́въ, покры́й и сохрани́ ны́.

Богоро́диченъ: Грѣхолюби́въ сы́й въ нерадѣ́ніи жи́въ, и Суди́ща, Чи́стая, неумы́тнаго трепе́щу, на не́мже мя́ соблюди́ Твои́ми святы́ми мольба́ми, Богоневѣ́сто, неосужде́нна, да я́ко Предста́тельницу при́сно ублажа́ю Тя́.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 157 – 163 об.

/ Къ оглавленію раздѣла /


Наверхъ / Къ титульной страницѣ

0