Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 23 мая 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 28-й де́нь.
Слу́жба свято́му преподобному́ченику Евстра́тію Пече́рскому.

ВЕЧЕРЪ,
На Го́споди воззва́хъ: стихи́ры, гла́съ 1. Подо́бенъ: Небе́сныхъ чино́въ.

Вторы́й Илія́ колесни́чникъ* ре́вностію по Христѣ́ яви́лся еси́, чу́дне:* я́коже бо то́й ца́рствующаго обличи́ неи́стовство,* та́ко и ты́ укори́лъ еси́ безу́мнаго іуде́я богоубíйство* и отъ него́ бы́лъ еси́ на крестѣ́ распя́тъ тѣ́ломъ,* душа́ же твоя́ о́гненною колесни́цею* востече́ къ небе́снымъ,* идѣ́же ра́дуешися,* немерца́ющимъ Свѣ́томъ озаря́емь,* сего́ и мы́ да не лиши́мся* моли́твами твои́ми.

Стра́сть Влады́ки своего́ изобразу́я,* распя́лся еси́ на крестѣ́ отъ іуде́я,* отъ него́же копіе́мъ въ ре́бра пробо́дся,* возше́дъ на о́гненную колесни́цу,* пла́менну любо́вь твою́* зна́меновалъ еси́ къ Бо́гу,* Ему́же ны́нѣ въ весе́ліи предстоя́,* моли́ о пою́щихъ тя́,* о́тче Евстра́тіе блаже́нне.

Сла́ва, гла́съ 2:

На небе́сную сла́ву при́сно взира́я, преподо́бне, воздержа́ніемъ пе́рвѣе тѣ́ло свое́ распя́лъ еси́, по́слѣжде же пригвожде́нны имѣ́я ру́цѣ и но́зѣ отъ іуде́й, жела́нія лѣ́ствицу обрѣ́лъ еси́, е́юже возше́дъ къ го́рнимъ си́ламъ, великолѣ́пному тя́ призыва́ющу гла́су: се́й е́сть до́брый граждани́нъ небе́снаго Сіо́на. Въ не́мже веселя́ся ны́нѣ со святы́ми, помяни́ на́съ, чту́щихъ святу́ю твою́ па́мять, я́ко да о́наго и мы́ наслѣ́дницы съ тобо́ю бу́демъ.

И ны́нѣ, богоро́диченъ:

Пре́йде сѣ́нь [зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ].

Вхо́дъ. Проки́менъ дне́, и чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На стихо́внѣ стихи́ры, гла́съ 1. Подо́бенъ: Всехва́льніи.

Прехва́льне преподобному́чениче Евстра́тіе,* твое́ житіе́ возложи́лъ еси́* добродѣ́телей попече́ніе,* пѣсносло́віемъ бо вѣ́рніи* вѣ́рою Христа́ похваля́ютъ,* твои́ми покаря́ющеся уче́ніи,* и́мже утверди́тися въ мíрѣ,* предстоя́, умоли́* Боже́ственнаго Ду́ха.

Сти́хъ: Честна́ предъ Го́сподемъ* сме́рть преподо́бныхъ Его́.

Богодухнове́нне му́чениче Евстра́тіе,* твое́ житіе́, у́бо ра́вно а́нгеломъ,* земны́мъ объяви́ся,* небе́снымъ же, я́ко благово́нная же́ртва* и до́брое кади́ло,* твое́ исповѣ́даніе принесе́ся.* И ны́нѣ моли́ся,* дарова́ти душа́мъ на́шимъ* ми́ръ и ве́лію ми́лость.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Пребога́те преподобному́чениче Евстра́тіе,* страсте́й побѣди́тель бы́въ,* мучи́теля побѣди́лъ еси́.* Вѣнцено́сцемъ сликовству́я, блаже́нне,* о всѣ́хъ помина́й, * соверша́ющихъ твою́ па́мять.* И ны́нѣ Христу́ моли́ся* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 4:

Глаго́лъ проро́ческихъ не разумѣ́ша іуде́е, отъ чре́ва заблуди́ша, глаго́люще лжу́ на Спа́са на́шего, и поноше́ніемъ кля́твы сме́рть Влады́чню осужда́ху. Но ты́, блаже́нне, облича́я си́хъ богоубíйство, благослове́ніе распя́тіемъ, мíру всему́ да́нное, показа́лъ еси́. Тѣ́мъ у́бо беззако́нніи ко кресту́ тя пригвозди́ша и копіе́мъ ре́бра твоя́ прободо́ша, не вѣ́дуще, я́ко ты́ креста́ ра́ди своего́ возме́здіе пріе́млеши отъ Бо́га, нечести́віи же вско́рѣ поги́бнутъ. Они́ кля́тву дре́вомъ наслѣ́диша, ты́ же наслажда́ешися дре́ва живо́тнаго, его́же и мы́ прича́стницы съ тобо́ю да бу́демъ, Спа́са и Го́спода въ па́мяти твое́й, о́тче Евстра́тіе, прославля́емъ.

И ны́нѣ, богоро́диченъ:

При́зри на моле́нія Твои́хъ ра́бъ, [Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ].

Тропа́рь, гла́съ 7:

По́стникомъ и му́ченикомъ яви́лся еси́ похвала́, преподо́бне Евстра́тіе, пре́жде бо воздержа́ніемъ пло́ть умертви́въ, послѣ́довалъ еси́ Христу́, нося́ кре́стъ сво́й. Послѣди́ же и са́мъ на кре́стъ вознесе́нъ бы́въ и копіе́мъ въ ре́бра прободе́нъ, въ ру́цѣ Бо́жіи ду́шу преда́лъ еси́. Колесни́цею о́гненною возноси́мь на небеса́, сугу́бо вѣнча́лся еси́ отъ Христа́ Бо́га и Спа́са ду́шъ на́шихъ.

Сла́ва, и ны́нѣ, богоро́диченъ:

[Яко на́шего воскресе́нія сокро́вище, на Тя́ надѣ́ющіяся, Всепѣ́тая, отъ ро́ва и глубины́ прегрѣше́ній возведи́, Ты́ бо пови́нныя грѣху́ спасла́ еси́, ро́ждшая Спасе́ніе на́ше, Яже пре́жде рождества́ Дѣ́ва, и въ рождествѣ́ Дѣ́ва, и по рождествѣ́ па́ки пребыва́еши Дѣ́ва.]


НА УТРЕНИ,
На Бо́гъ Госпо́дь: тропа́рь [свята́го, два́жды. Сла́ва, и ны́нѣ, богоро́диченъ].

По 1-мъ стихосло́віи сѣда́ленъ, гла́съ 1. Подо́бенъ: Ли́къ а́нгельскій.

Стра́стію Влады́цѣ своему́ подо́бяся, кре́стное дре́во подъя́лъ еси́ вселюбе́зно, ху́лящаго же іуде́я посрами́лъ еси́ богодухнове́нными усты́ твои́ми, тѣ́мъ копіе́мъ ре́бра твоя́ пробода́етъ нечести́вый, ты́ же, ра́дуяся, восхо́диши ко Го́споду своему́, Ему́же моли́ся о на́съ вы́ну, отъ любве́ чту́щихъ твоя́ страда́нія, доблему́дре Евстра́тіе. [Два́жды.]

Сла́ва, и ны́нѣ, богоро́диченъ:

Ангельское пѣ́ніе приношу́ Ти́, Безневѣ́стная Дѣ́во: ра́дуйся, Обра́дованная и въ жена́хъ Благослове́нная, пріе́мшая во утро́бѣ безсѣ́менно Бо́жіе Сло́во, отъ безслове́сныхъ дѣ́лъ измѣ́ншее человѣ́ки.

По 2-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Вы́шняго Іерусали́ма граждани́на, свидѣ́теля и́стинна и до́браго ору́жника Христо́ва, доблему́драго Евстра́тія, преподо́бныхъ сожи́теля, му́чениковъ сликостоя́теля, пѣ́сньми, лю́діе, почти́мъ, па́мять его́ пою́ще: то́й бо, предстоя́ Христу́ Бо́гу, непреста́нно мо́лится о душа́хъ на́шихъ. [Два́жды.]

Сла́ва, и ны́нѣ, богоро́диченъ:

Вы́шняго Іерусали́ма Цари́це, еди́на въ жена́хъ Непоро́чная Ма́ти, дѣ́вамъ вѣне́цъ и святы́хъ Святѣ́йшая, Тро́ицы Святы́я неотсту́пная Предста́тельнице, на́съ, удали́вшихся, Ма́ти Бо́жія, поми́луй и изба́ви отъ бѣ́дъ, Тя́ воспѣва́ющихъ.

По поліеле́и сѣда́ленъ, гла́съ 4. Подо́бенъ: Ско́ро предвари́.

Пла́менемъ горя́щія любве́ къ распя́тому Христу́ разжиза́емь, ды́шущаго я́ростію богоху́льнаго евре́ина не убоя́вся, обличи́лъ еси́ того́ мужему́дреннѣ, и зако́нныя па́схи отверже́ніе, благода́ти прише́дшей, отъ Писа́ній проповѣ́далъ еси́; сего́ ра́ди на крестѣ́ пригвожде́нъ бы́лъ еси́ отъ іуде́й и, пріе́мь вѣне́цъ исповѣ́данія, вше́лъ еси́ во дво́ры небе́сныя, идѣ́же не забу́ди и на́съ, о́тче Евстра́тіе. [Два́жды.]

Сла́ва, и ны́нѣ, богоро́диченъ:

Пла́менемъ страсте́й пали́мымъ на́мъ отъ губи́тельныхъ прило́говъ, ско́ро потщи́ся низпосла́ти во́ду благода́ти, Пресвята́я Дѣ́во, и устуди́ о́гнь, во удесѣ́хъ на́шихъ горя́щій, я́ко да въ тишинѣ́ жи́знь сію́ веду́ще, воскресе́нія Христо́ва Тебе́ ра́ди наслади́мся свѣ́тло.

Степе́нна, 1-й антифо́нъ, 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе да хва́литъ Го́спода... Ева́нгеліе Ма́рка, зача́ло 37.

По 50-мъ псалмѣ́ стихи́ра, гла́съ 6:

Дне́сь гора́ Пече́рская весели́тся, содержа́щая мо́щи твоя́, я́ко многоцѣ́нное сокро́вище, и просвѣща́ется заря́ми твои́хъ страда́ній, цвѣ́ты пѣ́сней духо́вныхъ тебѣ́ нося́ще и глаго́люще: уго́дниче Христо́въ, о́тче на́шъ Евстра́тіе, предстоя́ всѣ́хъ Влады́цѣ, непреста́й моля́ся о на́съ ко Го́споду, низпосла́ти душа́мъ на́шимъ ве́лію ми́лость.

Кано́нъ, гла́съ 1.

Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяномъ пу́ть глубины́ новосодѣ́лавшая.

Воскресе́нія дне́ и прича́стникъ свѣ́та хотя́ бы́ти, преподо́бне, въ де́нь стра́сти Влады́чни возне́слся еси́ на кре́стъ, и сообрази́лся еси́ стра́сти Христо́вѣй, побѣди́въ мíръ, и ны́нѣ, прича́стникъ сы́й сла́вы неизрече́нныя, весели́шися, побѣ́дную пѣ́снь пою́щи.

Ничто́же въ мíрѣ се́мъ многомяте́жномъ возлюби́лъ еси́, преподо́бне, я́ко Кре́стъ Христо́въ, и, того́ имѣ́я въ похвалу́, со апо́столомъ взыва́лъ еси́: мнѣ́ да не бу́детъ хвали́тися, то́кмо о Крестѣ́ Госпо́днемъ. О не́мже весели́шися, пѣ́снь побѣ́дную пою́щи.

Ко кресту́ пригвожде́нъ сы́й отъ іуде́й, всеблаже́ннѣйшій о́тче, пригвозди́лъ еси́ вся́ тѣле́сныя стра́сти, я́ко тебѣ́ со апо́столомъ глаго́лати: мнѣ́ мíръ распя́тся, и а́зъ мíру. Тѣ́мже досто́йно ны́нѣ съ Воскре́сшимъ весели́шися, побѣ́дную пою́щи.

Отъ любостра́стнаго Еги́пта мíра сего́ изше́дъ, о крестѣ́ всебу́рное того́ безмяте́жно преше́лъ еси́ мо́ре, свя́те, вопреки́ же написа́въ пригвожде́нныма дла́ньма, погрузи́лъ еси́ мы́сленнаго фарао́на съ возду́шными во́и и ны́нѣ ра́дуешися, побѣ́дную пою́щи.

Богоро́диченъ: Любостра́стнаго мíра сего́ изше́дъ, а́ки отъ Еги́пта, возвраща́юся на пе́рвая, да чре́ву угожда́ю, пита́яся ско́тски; да́ждь ми́, Богоневѣ́стная Дѣ́во, поне́ ма́ло уклони́тися отъ си́хъ, да, свобо́дь сы́й, принесу́ Ти́ хвале́ніе, побѣ́дную пою́щи.

Пѣ́снь 3.

Ирмо́съ: Еди́не Вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й: одушевле́нный хра́ме неизрече́нныя сла́вы Твоея́, Человѣколю́бче.

Пріиди́те ко Мнѣ́, вси́ тружда́ющіися, — Ре́кшему послѣ́довалъ еси́, о́тче, и Того́ Кресто́мъ разгна́лъ еси́ враги́ мы́сленныя, и́же, до конца́ побѣжде́нни, возврати́шася со студо́мъ. Моли́ и о на́съ, да и мы́ проти́ву тѣ́хъ ополче́нія ста́немъ, на сіе́ бо о Христѣ́ утвержда́емся.

Кре́стъ возложи́въ на ра́мо, свя́те, вѣ́рою несумнѣ́нною къ Еди́ному любо́вію привяза́лся еси́, да Христа́ приобря́щеши, и Того́ по жела́нію обрѣ́лъ еси́ тѣ́сною стезе́ю, ю́же проше́лъ еси́, не запе́нся, имы́й кре́стъ держа́ву и утвержде́ніе.

Облекíйся во и́ноческій о́бразъ, мíра обнажи́лся еси́, блаже́нне, и, ле́гцѣ проше́дъ пу́ть, во обѣтова́нную зе́млю, въ Пече́рскую оби́тель, точа́щую, а́ки ме́дъ и млеко́, уче́нія богоно́сныхъ оте́цъ, отъ ни́хже напита́вся, бы́лъ еси́ крѣ́покъ, тѣ́хъ уче́ніемъ сотвори́, да и мы́ утвержда́емся.

Глаго́ломъ моли́твы и посто́мъ чу́вственнаго врага́ покори́въ ду́ху, смире́ніемъ же и послуша́ніемъ мы́сленнаго Амали́ка побѣди́въ, бы́лъ еси́, о́тче, уго́денъ Влады́цѣ своему́ и отъ Него́ прія́лъ кре́стъ, ору́жіе непобѣди́мое, о не́мже и мы́ утвержда́емся.

Богоро́диченъ: Коле́блемь сы́й вра́жіими прило́ги вы́ну, утвержде́нія не имы́й а́зъ, стра́стный, къ Тебѣ́ прибѣга́ю, Ма́ти Бо́жія: Ты́ бо еси́ вѣ́рнымъ Необори́мая Стѣна́, о не́йже утвержда́емся.

Сѣда́ленъ, гла́съ 2:

Побѣдоно́снаго страда́льца пріиди́те, лю́діе, воспое́мъ па́мять, пѣ́сньми и пѣ́ніи де́нь весе́лія его́ провожда́юще, отъ плаче́внаго бо удо́лія сего́ къ неконча́емѣй ра́дости пре́йде, и, предстоя́ Влады́чню престо́лу, вопіе́тъ къ на́мъ: подража́тели мнѣ́ быва́йте, я́коже а́зъ Христу́, Иже пода́стъ всѣ́мъ бога́тую Свою́ ми́лость. [Два́жды.]

Сла́ва, и ны́нѣ, богоро́диченъ:

Въ мíрѣ стра́стное житіе́ имы́й, обурева́юся смертоно́сныхъ вѣ́тровъ волна́ми, Ко́рмчія ро́ждшая, Христа́, къ ти́хому приста́нищу упра́ви живо́тъ мо́й, молю́ся, и пода́ждь ми́ бога́тую Твою́ ми́лость.

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше свято́му, во спасе́ніе на́ше и обновле́ніе.

Вѣ́дый, преподо́бне, невоздержа́нія ра́ди пе́рваго во а́дъ все́льшагося человѣ́ка, приложи́лся еси́ воздержа́нію и поще́нію зѣ́льному и отсю́ду стяжа́лъ и́мя по́стникъ, зане́ сло́вомъ Бо́жіимъ па́че, не́жели бра́шномъ, пита́лся еси́, пою́щи Христу́, я́ко Всеси́ленъ.

Вы́шняго попуще́ніемъ плѣне́нъ, свя́те, бы́въ отъ по́ловцовъ, апо́стольски взыва́лъ еси́: свобо́дь е́сть, и́же плѣня́етъ у́мъ сво́й въ послуша́ніе Христо́во. Тѣ́мъ въ ско́рби не изнемо́галъ еси́, но па́че, судьба́мъ Бо́жіимъ дивя́ся, славосло́вилъ еси́ Христа́, я́ко Всеси́ленъ.

Пре́даннаго Іису́са всегда́ нося́ на тѣ́лѣ свое́мъ о́бразъ, про́данъ бы́лъ еси́ въ гре́ческую зе́млю, во гра́дъ Ко́рсунъ, нѣ́коему богоубíйцѣ іуде́янину, и то́й тебе́ тща́шеся отврати́ти отъ любве́ Бо́жія, ея́же ра́ди и на сме́рть гото́въ бы́лъ еси́, пою́щи: воскре́се Христо́съ, я́ко Всеси́ленъ.

Затворе́нъ бы́въ въ темни́цѣ съ про́чими христіа́ны и гла́домъ му́чимь отъ евре́ина, терпя́, сла́дцѣ ре́клъ еси́: кто́ мя разлучи́тъ отъ любве́ Христо́вы? ни гла́дъ, ни сме́рть, ни тѣснота́ — вся́ бо ма́ла су́ть сія́ къ хотя́щей сла́ве яви́тися въ на́съ, пою́щихъ: воскре́се Христо́съ, я́ко Всеси́ленъ.

Богоро́диченъ: Плѣне́нъ бы́въ отъ враго́въ мы́сленныхъ и бли́зъ уже́ су́щи а́довы темни́цы, къ Тебѣ́ обра́щся, вопію́: Ма́ти Бо́жія, внегда́ возврати́ши плѣ́нъ души́ моея́, тогда́ язы́къ мо́й весе́лія испо́лнится и воспое́тъ: воскре́се Сы́нъ Тво́й, я́ко Всеси́ленъ.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія правосла́вно пою́щихъ Тя́.

Утреневалъ еси́ любо́вію ко Христу́, до́блественне Евстра́тіе, проти́вящеся понужда́ющему евре́ину отступи́ти отъ Христа́ твоего́, Иже е́сть Пра́вды Со́лнце, всѣ́мъ присносу́щную жи́знь возсія́ющее.

Твои́мъ, о́тче, уче́ніемъ вси́ плѣ́нницы, су́щіи въ темни́цѣ, богоубíйственнаго евре́ина поплева́ша бу́йство и изво́лиша па́че гла́домъ и жа́ждею умрѣ́ти, не́же отврещи́ся Христа́, всѣ́мъ жи́знь подаю́щаго.

По́лкъ му́ченикъ пятьдесяточи́сленный, гла́домъ и жа́ждею убіе́нъ отъ жидови́на, предпосла́лъ еси́, блаже́нне, Христу́ своему́, са́мъ послѣди́ то́жде пострада́ти хотя́ за любо́вь Іису́са, всѣ́мъ жи́знь подава́юща.

Ви́дѣвъ окая́нный, я́ко изме́ршимъ всѣ́мъ у́зникомъ въ темни́цѣ погуби́ зла́то и наде́жду привлече́нія къ злоче́стію своему́, умы́сли распя́ти тя́ на крестѣ́, на него́же те́клъ еси́ спѣ́шно, преподо́бне, зовы́й: Христе́ мо́й, изведи́ изъ темни́цы плотскíя ду́шу мою́.

Богоро́диченъ: Преблаже́нная Дѣ́во, уще́дри бла́гостію Твое́ю ду́шу мою́, ги́блющую гла́домъ, и насы́ти ю́ а́нгельскимъ хлѣ́бомъ, напо́й пото́комъ сла́дости небе́сныя, да отсю́ду ми́ръ души́ мое́й обря́щу.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Аки во́днаго звѣ́ря, бы́сть утро́ба беззако́ннаго іуде́янина, и́же хотя́ше тя́ поглоти́ти и въ число́ привести́ омраче́ннаго евре́йскаго со́нмища, но ты́, о́тче, дерзнове́нно ста́лъ еси́ проти́ву того́ зія́нія и одолѣ́лъ еси́ тому́, по́мощію Вы́шняго укрѣпля́емь.

Въ о́ньже де́нь, возшата́вшеся, іуде́е Животода́вца на Крестѣ́ повѣ́сиша, тогда́ и тебе́ окая́нный евре́инъ распя́; да съ Ни́мже страда́лъ еси́, съ Тѣ́мъ и просла́вишися, блаже́нне, въ немерца́емомъ свѣ́тѣ пріе́мь возме́здіе отъ Спа́са своего́.

Руга́ніемъ помина́юще стра́сть Влады́чню скве́рніи богоубíйцы, я́коже отцы́ и́хъ — Христа́, та́ко сíи къ дре́ву кре́стному, руга́ющеся, пригвозди́ша тя́, о́тче: но бы́сть и́мъ дре́во кре́стное — юро́дство, тебѣ́ же, спа́сшемуся, — си́ла Бо́жія.

Обличи́лъ еси́ пра́здники скве́рныя іуде́йскія, на крестѣ́ ви́ся, свя́те, не боя́ся и́хъ кля́твы, я́ко та́ потреби́ся пло́тію пригвожде́нна Христа́ Бо́га и тридне́внымъ Воскресе́ніемъ мíръ просвѣ́щшаго.

Богоро́диченъ: Яже пра́дѣдную кля́тву потреби́вшая благослове́ннымъ Рождество́мъ Твои́мъ, Ма́ти Чи́стая, благослове́нія избра́нныхъ Бо́жіихъ, молю́, да мя́ сподо́биши, Благослове́нная и Просла́вленная.

Конда́къ, гла́съ 8:

Яко ревни́тель стра́сти Влады́чней и по́стниковъ усе́рдный послѣ́дователь сы́й, плѣ́нники уче́ніемъ твои́мъ наста́вль, Христо́ви приве́лъ еси́, Евстра́тіе, и на́съ, плѣне́нныхъ страстьми́, мольба́ми свои́ми свободи́ и подража́тели честно́му твоему́ житію́ покажи́, зову́щихъ: ра́дуйся, испи́вый сла́достнѣ ча́шу Христо́выхъ страда́ній.

Пѣ́снь 7.

Ирмо́съ: Тебе́, у́мную, Богоро́дице, пе́щь разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Безу́мное велѣ́ніе іуде́йское, пригвожде́нъ сы́й, о́тче, на крестѣ́, обличи́лъ еси́ проро́ческими Писа́ньми и па́схи зако́нныя не восхотѣ́лъ еси́ вкуси́ти, жела́я прича́стникъ бы́ти Па́схи, Яже за ве́сь мíръ пожре́ся — Христо́съ Бо́гъ благослове́нный.

Разоре́ніе кля́твы, я́же отъ дре́ва, приводи́лъ еси́, блаже́нне, отъ проро́къ сказу́я, и, вхо́дъ живота́ на дре́вѣ кре́стномъ живото́мъ, ви́сящимъ предъ очи́ма и́хъ, проповѣ́дуя, посрами́лъ еси́ іуде́и, невѣ́дущія пѣ́ти: Бо́же, благослове́нъ еси́.

Распе́ншимъ тя́ іуде́емъ проро́чествовалъ еси́, о́тче преподо́бне: пріи́детъ вско́рѣ отмще́ніе на вы́ за кро́вь мою́ и про́чіихъ христіа́нъ, и́хже уби́сте непови́ннѣ, и пра́здники ва́ша въ сѣ́тованіе обратя́тся, ненави́дитъ бо суббо́тъ ва́шихъ Госпо́дь, въ ни́хже отверго́стеся пѣ́ти: Христе́ Бо́же, благослове́нъ еси́.

Словеса́ твоя́ бы́ша о́стрыя стрѣ́лы беззако́ннымъ, и́миже пробода́еми, не стерпѣ́ша, но копіе́мъ ре́бра твоя́ прободо́ша, и отше́лъ еси́ ко Источи́вшему отъ прободе́ннаго ребра́ жи́знь всему́ мíру пѣ́ти: Бо́же, благослове́нъ еси́.

Богоро́диченъ: Прободе́нну ми́ грѣхолю́бнымъ копіе́мъ лю́таго веліа́ра, ско́ро приложи́ пла́стырь ми́лости Твоея́, Богоневѣ́стная Дѣ́во Ма́ти, я́ко да, исцѣлѣ́въ, вы́ну Ти́ пою́, Влады́чице: Благослове́нна еси́.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Почти́те, лю́діе, до́браго страда́льца, и́же, вся́ у́ды пре́жде собо́ю мы́сленнѣ распя́въ, послѣди́ чу́вственнѣ отъ іуде́й распя́тъ, возопи́лъ ко Христу́: се́ а́зъ я́звы Твоя́ на тѣ́лѣ мое́мъ ношу́ и пою́ Тя́ во вся́ вѣ́ки.

Тебѣ́, о́тче, на не́бо о́гненною колесни́цею и ко́ньми восхище́нну, изыдо́ша въ срѣ́теніе му́ченикъ и пра́ведникъ ли́ки, восхвали́ша ру́чныя и но́жныя я́звы твоя́ и бо́къ прободе́нный, пріе́млюще тя́ въ ски́нію святы́хъ хвали́ти Го́спода во вѣ́ки.

Гла́съ принесе́ся къ тебѣ́, свя́те, отъ велелѣ́пныя сла́вы: се́ до́брый небе́сный граждани́нъ, его́же не бѣ́ досто́инъ ве́сь мíръ, восхо́дитъ отъ су́етнаго мíра къ премíрнымъ селе́ніямъ пѣ́ти Го́спода во вся́ вѣ́ки.

Сокро́вище многоцѣ́нное — мо́щи твоя́, — преблаже́нне, беззако́нный евре́инъ хотя́ утаи́ти, вве́рже въ мо́ре, но Бо́жіимъ смотре́ніемъ обрѣто́шася здѣ́, въ пеще́рѣ, и́мже покланя́ющеся, прославля́емъ просла́вльшаго тя нетлѣ́ніемъ и чудесы́ Го́спода во вся́ вѣ́ки.

Богоро́диченъ: Сокро́вище многоцѣ́нное, дража́йшаго Іису́са, отъ Ма́тернихъ нѣ́дръ произве́дшая, искупи́ ду́шу мою́ отъ плѣне́нія любостра́стнаго мíра, да пою́ Тя́ здѣ́ и въ немерца́ющемъ Свѣ́тѣ во вся́ вѣ́ки.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Свѣти́ся, свети́ся, Бо́жія Ма́тере Пече́рская оби́тель, въ тебѣ́ бо цвѣту́щее дре́во возрасте́, чу́дный Евстра́тій, благово́нными цвѣ́ты страда́нія укра́шенъ. Красотѣ́ того́ и мы́ прича́стницы да бу́демъ, покланя́емся моще́мъ его́ и пѣ́сньми велича́емъ.

Открыва́яй та́йны Бо́гъ скве́рныхъ убíйцевъ яви́ благочести́вому царю́, я́ко, лицемѣ́рствующе, іуде́е въ та́йнѣ христіа́нъ убива́ютъ, и взы́де непра́вда на главу́ и́хъ: ра́вную бо сме́рть воспрія́ша по твоему́ проро́честву, о́тче блаже́ннѣйшій.

Кро́вь твоя́, непови́ннѣ излія́нная отъ іуде́й, а́ки Авелева, о́тче, вопія́ше къ Бо́гу, Иже пра́веднымъ судо́мъ за ню́ наведе́ отмще́ніе, и, повѣ́шенъ бы́въ на дре́вѣ, тво́й мучи́тель получи́ ча́сть со Іу́дою въ гее́ннѣ, твоя́ же ча́сть — Госпо́дь, Ему́же покланя́ющеся, дне́сь велича́емъ.

Кро́вь твоя́, свя́те, и нело́жное проро́чество мно́гія по́слѣжде приведе́ къ вѣ́рѣ: сбытіе́ бо того́ ви́дѣвше, и́стинно пока́явшеся, вѣ́роваша во Христа́, и, кре́щшеся, до́брѣ пожи́ша, и блаже́нныя сподо́бишася жи́зни, ея́же и мы́ да не лиши́мся, кла́няемся ра́цѣ моще́й твои́хъ и тя́ велича́емъ.

Богородиченъ: Жи́знъ присносу́щную въ нѣ́дрѣхъ Свои́хъ объе́мля, отъ вре́менной жи́зни къ вѣ́чной на́съ упра́ви Твои́мъ хода́тайствомъ, Непоро́чная Ма́ти, и да́ждь всѣ́мъ зрѣ́ти невече́рній де́нь Ца́рствія Сы́на Твоего́.

Свѣти́ленъ:

Присносу́щную прови́дя жи́знь, блаже́нне, о вре́меннѣй неради́лъ еси́, вся́, наноси́мая отъ іуде́й, претерпѣ́въ до́блественнѣ, и, зако́нныя па́схи не восхотѣ́въ вкуси́ти, ко кресту́ пригвожде́нъ бы́лъ еси́, и, о́гненною отъ земли́ восходя́ колесни́цею, свидѣ́тельствовалъ еси́: Христо́съ е́сть Па́сха нетлѣ́нія, мíра спасе́ніе. [Два́жды.]

Сла́ва, и ны́нѣ, богоро́диченъ:

Присносу́щнаго Свѣ́та Предста́тельница су́щи, Богоневѣ́стная Дѣ́во, на́мъ, во мра́цѣ живу́щимъ, предста́ни и упра́ви жи́знь на́шу, да безпреткнове́нно до́йдемъ, идѣ́же Христо́съ е́сть Па́сха нетлѣ́нія, мíра спасе́ніе.

На хвали́техъ стихи́ры, гла́съ 6:

Му́ченическими кровьми́* свяще́нную ри́зу очервлени́въ, преподо́бне,* вше́лъ еси́ во свята́я святы́хъ* досто́йно, сла́вне,* идѣ́же Свѣ́тъ неизрече́нный,* идѣ́же Боже́ственная сла́ва,* идѣ́же гла́съ пра́зднующихъ,* отъ него́же трудо́въ твои́хъ* му́ченическія воспрія́лъ еси́ побѣ́ды,* и вѣне́цъ неувяда́ющій,* и вѣ́чнующую до́брую сла́ву,* и ра́йское житіе́, Евстра́тіе прему́дре,* со дерзнове́ніемъ моли́ся о душа́хъ на́шихъ. [Два́жды.]

Муче́ній треволне́нія* не поколеба́ша твоея́ души́,* ни затворе́ніе долготы́* во мра́чнѣй темни́цѣ,* тя́ сокрыва́ющее, страда́льче сла́вне,* но, я́ко свѣ́тъ, возсія́лъ еси́* во тмѣ́ бѣ́дствующимъ су́етія,* и́хже сы́ны дне́ показа́лъ еси́* ба́нею креще́нія,* порожде́ніемъ бо́льшимъ и спаси́тельнымъ* и Боже́ственнымъ пребыва́ніемъ,* я́ко страда́лецъ богопрія́тенъ,* прему́дре Евстра́тіе.

Кто́ досто́йно* добродѣ́телей твои́хъ исповѣ́сть побѣ́ды?* Ка́я уста́ муче́нія* и терпѣ́нія изреку́тъ?* Во обои́хъ бо благоугоди́лъ еси́ Христу́, Евстра́тіе,* и ны́нѣ не преста́й* моля́ся, уго́дниче,* спасти́ ду́ши на́ша,* я́ко имѣ́я, преподобному́чениче,* дерзнове́ніе мно́гое.

Сла́ва, гла́съ 8:

Херуви́мъ, ви́дѣвъ тя́, на о́гненной колесни́цѣ къ небе́снымъ гряду́ща, пла́меннымъ свои́мъ ору́жіемъ не возбрани́лъ тебѣ́ отъ дре́ва жи́зни вкуси́ти, но съ ра́достію тя́ прія́лъ, му́чениче Христо́въ Евстра́тіе. Тѣ́мже ны́нѣ ра́йскія пи́щи наслажда́яся, не забу́ди на́съ, па́мять твою́ почита́ющихъ, но простри́ дла́ни, и́миже ко дре́ву пригвожде́нъ бы́лъ еси́, и моли́ся о всѣ́хъ Творцу́ и Влады́цѣ, я́ко да и мы́ тебѣ́ соприча́стницы бу́демъ, о́тче блаже́ннѣйшій.

И ны́нѣ, богоро́диченъ:

[Влады́чице, пріими́ моли́тву ра́бъ Твои́хъ, и изба́ви на́съ отъ вся́кія ну́жды и печа́ли.]

Славосло́віе вели́кое, [ектеніи́] и отпу́стъ.



[НА ЛИТУРГІИ,

Блаже́нна отъ кано́на, пѣ́снь 3 и 6. Проки́менъ, гла́съ 7: Восхва́лятся преподо́бніи во сла́вѣ* и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, хвале́ніе Его́ въ це́ркви преподо́бныхъ. Апо́столъ къ Тимоѳе́ю, зача́ло 291. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Ма́рка, зача́ло 37. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 66 об. – 71 об.

/ Къ оглавленію раздѣла /


Наверхъ / Къ титульной страницѣ

0