Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 22 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 27-й де́нь.
Святы́я ма́тере на́шея Матро́ны Селу́нскія.

[ВЕЧЕРЪ,]
Стихи́ры, гла́съ 4. Подо́бенъ: Яко до́бля.

Іуде́йскому сверѣ́пству* и на́глому суровству́* по́мысломъ сопроти́вилася еси́, мужему́дренная,* бу́дущихъ предви́дящи,* богому́драя, наслажде́ніе,* пребыва́ющее при́сно во вѣ́ки неподви́жимо,* е́же получи́ла еси́,* отъ земли́ преста́вльшися* къ черто́гомъ небе́снымъ* и ли́ку неразори́мому, сла́вная.

Ца́рствія благолѣ́піе* и добро́ту кра́сную* ви́дѣти сподо́билася еси́ Жениха́ твоего́,* украше́на ра́нами тве́рдаго твоего́ страда́нія,* и исто́чнику благи́хъ* досто́йно прибли́жилася еси́.* Отону́дуже Боже́ственнаго весе́лія* бога́тно пло́дъ прія́ла еси́, блаже́нная,* и безсме́ртное благосла́віе.

Ни и́го рабо́тное,* ни сла́бость же́нская,* ни гла́дъ, ни ра́ны запя́ша тя́* му́ченическія тве́рдости уподо́битися, всесла́вная,* усе́рдіемъ бо души́* му́ки претерпѣ́ла еси́.* Отону́дуже получи́ла еси́ небе́сный черто́гъ* и вѣнце́мъ благода́тей украси́лася еси́,* предстоя́щи Зижди́телю твоему́.

Сла́ва, и ны́нѣ, богоро́диченъ, гла́съ и подо́бенъ то́йже:

Осужде́нія изба́ви, Пресвята́я Богоневѣ́сто,* и лю́тыхъ прегрѣше́ній* смире́нную мою́ ду́шу,* и сме́рти измѣни́ моли́твами Твои́ми,* и да́руй оправда́ніе получи́ти* въ де́нь испыта́нія,* е́же получи́ша святы́хъ собо́ри,* покая́ніемъ очище́на мя́ пре́жде конца́ покажи́* и сле́зъ излія́ніи.

Крестобогоро́диченъ, подо́бенъ то́йже:

На Крестѣ́ Тя я́ко узрѣ́* пригвожде́на, Го́споди,* Агница и Ма́ти Твоя́ дивля́шеся,* и — что́ видѣ́ніе сіе́, — взыва́ше, —* Сы́не вожделѣ́нне?* Сія́ Тебѣ́ невѣ́рный собо́ръ воздаде́ беззако́нный,* и́же мно́гихъ Твои́хъ чуде́съ наслади́выйся.* Но сла́ва неизглаго́ланному* соше́ствію Твоему́, Влады́ко.


[НА УТРЕНИ,]
Кано́нъ, его́же краегране́сіе: Матро́ны боже́ственную пою́ сла́ву. Творе́ніе Ѳеофа́на. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Боже́ственнымъ безпло́тнымъ чино́мъ ны́нѣ слику́ющи у всѣ́хъ вино́внаго Бо́га и я́сно наслажда́ющися богонача́льнаго осія́нія, пою́щія тя́ просвѣти́.

Ра́бій сподо́бивыйся прія́ти зра́къ Христо́съ Бо́гъ, свободи́ти сего́ восхотѣ́въ отъ тли́ и сме́ртныхъ у́зъ, отъ и́га рабо́тнаго тя́, му́ченице, невѣ́сту обручи́.

Же́нскій по́лъ су́щи, вмужи́вшися благода́тію, вознесе́нную горды́ню и хва́лящуюся безмѣ́рно пре́жде истреби́ти мо́ре, не́мощію тѣ́ла Боже́ственною си́лою низложи́.

Богоро́диченъ: Две́рь, я́же къ на́мъ Твоего́, Го́споди, соше́ствія, восто́къ, и со́лнце, и свѣ́тъ, та́инственно Тя́ нарица́емаго преесте́ственно облиста́, сугу́ба естество́мъ Человѣколю́бца.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Тве́рдостію по́мысла пребеззако́нную и лю́тую претерпѣ́ла еси́ тя́жкую му́ку, сла́вная Матро́но всеблаже́нная.

Ра́ны болѣ́зненныя ощуща́ющи, крѣ́пко терпѣ́ла еси́, осужде́ніемъ же тмы́ Боже́ственную свѣ́тлость воспрія́ла еси́.

Крове́й твои́хъ то́ки нече́стія огни́ще угаси́ша, вѣ́рныя же напои́ша богоче́стія вода́ми.

Богоро́диченъ: Скрижа́ль, ковче́гъ, пріе́мшу во утро́бѣ, Пречи́стая, Сло́во Бо́жіе безнача́льное, богогла́сно восхваля́емъ Тя́.

Сѣда́ленъ, гла́съ 5. Подо́бенъ: Собезнача́льное.

Благоче́стно порабо́тившися Вседержи́телю, злоче́стіемъ влады́чицы не порабо́тилася еси́, честна́я, но претерпѣ́ла еси́ тве́рдо те́мное заключе́ніе и ра́нъ разжже́ніе и преста́вилася еси́ къ Бо́гу, богому́драя му́ченице Матро́но, моли́ся о на́съ, соверша́ющихъ па́мять твою́.

Сла́ва, и ны́нѣ, богоро́диченъ:

Те́плая предста́тельнице и непобѣди́мая, упова́ніе извѣ́стное и непосты́дное, стѣно́, и покро́ве, и приста́нище прибѣга́ющимъ къ Тебѣ́, Приснодѣ́во Чи́стая, Сы́на Твоего́ и Бо́га моли́ со а́нгелы ми́ръ да́ти мíру, и спасе́ніе, и ве́лію ми́лость.

Крестобогоро́диченъ:

На Крестѣ́ зря́щи Тя́, Христе́, Ма́ти Твоя́, во́лею посредѣ́ разбо́йнику ви́сяща, растерза́ющися утро́бою, ма́терски глаго́лаше: безгрѣ́шный Сы́не, ка́ко непра́ведно на Крестѣ́, я́коже злодѣ́й, пригвожде́нъ еси́, человѣ́ческій ро́дъ хотя́ оживи́ти, я́ко Благоутро́бенъ?

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Си́лою Боже́ственною, Матро́но, укрѣпля́ема, го́рькія влады́чицы избѣ́гла еси́ рабо́ты, нра́въ бо смире́нъ души́ стяжа́ла еси́, еди́ному Влады́цѣ рабо́тающи.

Рыка́ющи, и пія́нствомъ неи́стовствующи, и я́ростію терза́ющися, злочести́вѣйшая ра́нами ссѣца́ше, евре́йскимъ суровство́мъ, му́ченице страстоте́рпице, тѣ́ло твое́.

Юношеское показа́ла еси́ терпѣ́ніе, въ несвѣ́тлыхъ мѣ́стѣхъ заключа́ема, му́ченице, и гла́домъ томи́ма, но обрѣла́ еси́ воздая́ніе безсме́ртія трапе́зу.

Богоро́диченъ: Златокова́нный свѣ́щникъ прообразова́ше Бо́га носи́вшую воплоще́нна, заре́ю Божества́ вся́ просвѣща́юща, Тя́, и́стинную Богома́терь.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Тя вѣне́цъ свѣ́телъ богому́драя похвалы́ стяжа́, Жизнода́вче, и отъ тмы́ къ сія́нію Боже́ственному изы́де.

Утверди́ Христо́съ на ка́мени вѣ́ры но́ги твоя́, блаже́нная, къ Нему́же испра́вила еси́ му́дрѣ твоя́ стопы́.

Умъ боже́ственъ вои́стинну, и му́дръ, и богомы́сленъ ты́ иму́щи, сія́еши въ ли́цѣ му́ченикъ, Матро́но всеблаже́нная.

Богоро́диченъ: Божества́ зра́къ и зра́къ человѣ́чества родила́ еси́, Богома́ти, соедине́ніе несмѣ́сно по соедине́нію неслія́нному.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Евы ны́нѣ, страстоно́сице, жела́ніе объя́ла еси́ смы́сленно, Матро́но, обожа́ема манове́ніемъ непреста́ннымъ, и пра́ведно присносу́щныя сла́вы сподо́билася еси́. [Два́жды.]

Ни ра́бъ во Христѣ́, ни свобо́дный су́дится, но добродѣ́тели благообра́зіе, благоче́стія нра́вы укра́шена, ея́же показа́лася еси́ твори́тельница, страстоте́рпице непобѣди́мая.

Богоро́диченъ: Хра́мъ Тя́ Бо́жій и черто́гъ зна́емъ, ста́мну, свѣ́щникъ и скрижа́ль, стяжа́вшую вну́трь написа́ніе за милосе́рдіе вопло́щшася Сло́ва, Всенепоро́чная.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Съ любо́вію и дерзнове́ніемъ отлучи́лася еси́ вои́стинну ко твоему́, всехва́льная, Рачи́телю, благода́рно взыва́ющи: благослове́нъ еси́ въ хра́мѣ сла́вы Твоея́, Го́споди. [Два́жды.]

Съ весе́ліемъ и ра́достію прешла́ еси́, испо́лнь добродѣ́телей всеразли́чныхъ, Матро́но, отъ земли́ къ небе́снымъ лико́мъ, сла́вная, наслѣ́діе получивши безсме́ртное.

Богоро́диченъ: Просвѣще́нна, преиспещре́на всѣ́ми добродѣ́тельми, Сло́во Отчее па́че сло́ва родила́ еси́ воплоще́нное, Ма́ти Дѣ́во, благослове́нна Ты́ въ жена́хъ, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Бога́таго Свѣ́та лучи́ сподо́билася еси́ ви́дѣти, измѣни́вшися пло́ти, и въ небе́снѣй ски́ніи жи́ти вмѣ́сто ски́ніи те́мныя и мра́чныя, идѣ́же заключена́ была́ еси́, сла́вная: благослови́те, вся́ дѣла́, вопію́щи, Госпо́дня Го́спода. [Два́жды.]

Красе́нъ вѣне́цъ, и́мже ны́нѣ вѣнча́лася еси́, сла́вная, живонача́льною десни́цею Вседержи́теля, невѣ́сту бо ви́дя, очервле́ну тя́ крове́й твои́хъ то́ки, ра́дуяся, уясни́, Ему́же пое́мъ: вся́ дѣла́, благослови́те Госпо́дня Го́спода.

Богоро́диченъ: Вои́стинну ро́ждши Бо́га, вои́стинну Всечи́стая яви́лася еси́, Ма́ти Бо́жія, и́стинствующее нося́щи, по ко́емждо рожде́ніи, богоиме́нство вѣ́рнымъ. Тѣ́мже сла́вимъ Богоро́дицу Тя́ богому́дренно, Всенепоро́чная Влады́чице.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Сія́етъ мы́сленными свѣтозаре́ніи свѣтоно́сный тво́й де́нь, свѣтлѣ́йшими блиста́ніи трисо́лнечнаго, му́ченице, сія́нія, въ не́мже ны́нѣ моли́ озари́ти пою́щія тя́.

Обрѣла́ еси́ воздая́нія, страстоно́сице, за ра́ны болѣ́зненныя, небе́сное наслѣ́діе въ Це́ркви перворо́дныхъ, сла́вная, въ не́йже торжеству́ющи, твои́ми моли́твами на́съ соблюди́.

Вои́стинну Христу́ ны́нѣ сочта́лася еси́, безсме́ртному твоему́ Жениху́, процвѣ́тши свѣ́тло боже́ственными Сего́, всему́драя, я́звами и честно́ю кро́вію муче́нія сія́ющи.

Богоро́диченъ: Плѣни́цы мои́хъ ны́нѣ прегрѣше́ній разрѣши́, Дѣ́во Богоро́дице, Яже милосе́рдія Исто́чникъ ро́ждши, еди́на Богоблаже́нная, и душесла́дости испо́лни, я́ко да досто́йно Тя́ велича́ю.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 154 – 157.

/ Къ оглавленію раздѣла /


Наверхъ / Къ титульной страницѣ

0