Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 27-й де́нь.
Свята́го священному́ченика Ирине́я, епи́скопа Сирмíйскаго, Се́рбскаго.

[Зри́:] По мѣсяцесло́ву па́мять свята́го Ирине́я, епи́скопа Сирмíйскаго па́даетъ на де́нь 26 Ма́рта, сíесть отда́ніе Благовѣ́щенія и собо́ръ свята́то арха́нгела Гавріи́ла; преноси́ се́ на 27 Марта.

ВЕЧЕРЪ,
На Го́споди воззва́хъ: предваря́етъ самогла́сенъ дне́, два́жды, и му́чениченъ, и подо́бны тріо́ди три́, та́же священному́ченика на 4.
Стихи́ры самогла́сны гла́съ 4.

Просвѣще́нъ чистото́ю и цѣлому́дріемъ,* ко свяще́нному нача́льству возведе́нъ бы́лъ еси́,* священному́чениче Ирине́е,* тѣ́мъ и свѣтлѣ́йшею оде́ждею свяще́нства украси́лся еси́,* Боже́ственныхъ та́инствъ, о́тче, познава́емъ.

Аще кро́токъ и смире́нъ бы́лъ еси́,* но ре́вность къ Правосла́вію имѣ́лъ еси́, ра́туя,* вѣ́рою обложе́нъ, я́ко броня́ми,* безбоя́зненностію, я́ко копіе́мъ,* повелѣ́ніемъ беззако́ннаго мучи́теля,* веля́щаго отрещи́ся Христа́,* зако́ны Боже́ственныя противоположи́лъ еси́* и вѣне́цъ свы́ше прія́лъ еси́.

Сто́лпъ се́рдца твоего́ не поколеба́ся* пребеззако́ннующаго мучи́теля ласка́ніемъ,* ниже́ устраши́ тя претя́щее муче́ніе,* но, крѣ́постію Христо́вою вооружи́вся,* служа́щаго де́мономъ мучи́теля* чествова́ти и́стиннаго Бо́га увѣря́лъ еси́,* тѣ́мже и терпѣли́вно пострада́въ,* му́ченически вѣнча́лся еси́.

Сла́ва, гла́съ 3:

Утверди́въ стопы́ се́рдца твоего́ на ка́мени Боже́ственныхъ за́повѣдей Христо́выхъ, стоя́лъ еси́ предъ суди́щемъ, исповѣ́дуя Предста́вшего суди́щу Пила́тову, не поколеба́лся еси́ ласка́тельными вѣ́тры, ниже́ лю́тыхъ му́къ бу́рями, богоблаже́нне Ирине́е, но вѣнча́лся еси́ му́ченическими по́двиги, я́же ума́ тве́рдостію подъя́лъ еси́, о́тче.

И ны́нѣ, богоро́диченъ:

Ка́ко не диви́мся [Богому́жному Рождеству́ Твоему́, Пречестна́я? Искуше́нія бо му́жескаго не пріе́мши, Всенепоро́чная, родила́ еси́ безъ отца́ Сы́на пло́тію, пре́жде вѣ́къ отъ Отца́ рожде́ннаго безъ ма́тере, ника́коже претерпѣ́вшаго измѣне́нія, или́ смѣше́нія, или́ раздѣле́нія, но обою́ существу́ сво́йство цѣ́ло сохра́ншаго. Тѣ́мже, Ма́ти Дѣ́во Влады́чице, Того́ моли́ спасти́ся душа́мъ, правосла́вно Богоро́дицу исповѣ́дающихъ Тя́].

Вхо́дъ. Проки́менъ дне́ и чте́нія три́ священному́ченическая.

При́тчей чте́ніе. [Глава́ 3.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе. [Глава́ 10.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе. [Глава́ 4.]

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

И про́чее послѣ́дованіе преждесвяще́нныя.


[Зри́:] Аще ли не соверша́ется Литургíя преждесвяще́нная, тогда́ на Го́споди, воззва́хъ: поста́вимъ стихо́въ 6 и пое́мъ подо́бны тріо́ди 3 и священному́ченика 3. На стихо́внѣ пое́мъ тріо́ди самогла́сенъ дне́, два́жды, и му́чениченъ.

Сла́ва, священному́ченика, гла́съ 2, самогла́сенъ:

Обличи́лъ еси́ словеса́ Про́ва злочести́ваго твердѣ́йшимъ ума́ усе́рдіемъ и яви́лся еси́ рачи́тель любве́ Іису́совы, Его́же предъ мучи́телемъ де́рзостно исповѣ́далъ еси́, повелѣ́нія ева́нгельская и преда́нія церко́вная благоче́стно удержа́лъ еси́, тѣ́мже и ну́ждную сме́рть подъя́лъ еси́, но Христо́съ Подвигополо́жникъ прія́тъ тя́ и всели́ въ жили́ще небе́сное, идѣ́же лику́ютъ а́нгельскія свѣ́тлости и святы́хъ во́инства.

И ны́нѣ, богоро́диченъ, гла́съ то́йже:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

Тропа́рь, гла́съ 8:

Жи́знь твою́ цѣлому́дренно соверши́лъ еси́, ничто́же на земли́ па́че Христа́ предпоче́тъ, ра́дуяся, вше́лъ еси́ на му́ченическое благосла́віе, проти́вяся мучи́теля повелѣ́нію, яви́лся еси́ вѣнцено́сецъ свяще́нный, и́бо Христо́съ возме́здіе тебѣ́ дарова́ и всели́ тя въ Ца́рство небе́сное.

И ны́нѣ, богоро́диченъ:

Иже на́съ ра́ди [рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].


НА УТРЕНИ,
На Бо́гъ Госпо́дь: тропа́рь священному́ченика, два́жды.
Сла́ва, и ны́нѣ, богоро́диченъ воскре́сенъ и обы́чныя каѳи́смы.

По 1-й и по 2-й каѳи́смѣ сѣда́льны тріо́ди. Ектеніи́ же не глаго́лемъ.

По 3-й же каѳи́смѣ глаго́летъ іере́й ектенію́ ма́лую.
Та́же сѣда́ленъ, гла́съ 4:

Предстоя́ пребеззако́нному суди́щу, до́блественно Христа́ исповѣ́далъ еси́, сего́ ра́ди му́ченически жи́знь свою́ соверши́лъ еси́, но къ небесе́мъ восте́клъ еси́, Ирине́е богоблаже́нне, и вѣнце́мъ неувяда́емымъ отъ Бо́га вѣнча́лся еси́, тѣ́мже тя́ вѣ́рою ублажа́емъ.

Сла́ва, гла́съ то́йже:

Сло́вомъ твои́мъ свяще́ннѣйшимъ свяще́нное уче́ніе я́вѣ утверди́лъ еси́ и вся́ велѣ́нія безбо́жнаго Про́ва отве́рглъ еси́, тѣ́мже, святу́ю па́мять твою́ пра́зднующе, вопіе́мъ ти́: помяни́ на́съ, священному́чениче Ирине́е приснопа́мятне.

И ны́нѣ, богоро́диченъ, гла́съ то́йже:

Ты еди́на су́щимъ на земли́, Ма́ти Бо́жія, па́че естества́ была́ еси́ Хода́таица, тѣ́мже Ти́ вси́ — ра́дуйся — зове́мъ.

[Зри́:] Аще ли суббо́та, кромѣ́ пе́рвыя недѣ́ли поста́:
По 1-й каѳи́смѣ сѣда́ленъ: Предстоя́ пребеззако́нному суди́щу.., два́жды.
Сла́ва, и ны́нѣ, богоро́диченъ, гла́съ 4:

Отъ родо́въ всѣ́хъ показа́лася еси́ Блаже́нна, па́че естества́ ро́ждши Содѣ́теля Христа́, блаже́нны содѣва́ющаго Тому́ рабо́тающія, Его́же прилѣ́жно моли́ спасти́ ду́ши на́ша.

По 2-й каѳи́смѣ сѣда́ленъ: Сло́вомъ твои́мъ свяще́ннѣйшимъ... [Два́жды.]
Сла́ва, и ны́нѣ, богоро́диченъ: Ты́ еди́на су́щимъ на земли́...

По поліеле́и сѣда́ленъ, гла́съ 8:

Боже́ственныя ре́вности испо́лненъ бы́въ, свяще́нными исповѣ́даніи украси́лся еси́ и болѣ́зни мно́ги за Христа́ претерпѣ́лъ еси́, Его́же стра́сти, ра́дуяся, поревнова́лъ еси́ и къ Нему́же преше́лъ еси́, тѣ́мже ны́нѣ мо́лимъ тя́: помяни́ вся́, вѣ́рою тя́ помина́ющія, и́маши бо дерзнове́ніе ко Го́споду.

Сла́ва, и ны́нѣ, богоро́диченъ, гла́съ то́йже:

Похвала́ вѣ́рнымъ Ты́ еси́, Безневѣ́стная, и заступле́ніе и прибѣ́жище христіа́нъ, Ты́ стѣна́ и приста́нище, Ты́ Сы́ну Твоему́ мольбы́ но́сиши, Всенепоро́чная, и спаса́еши отъ бѣ́дъ вѣ́рою и любо́вію Богоро́дицу Тя́ чи́сту зна́ющихъ.

Степе́нна, 1-й антифо́нъ, 4-го гла́са. Проки́менъ, гла́съ 4: Восхва́лятся преподо́бніи во сла́вѣ* и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, хвале́ніе Его́ въ це́ркви преподо́бныхъ. Вся́кое дыха́ніе... Ева́нгеліе Луки́, зача́ло 67.

По 50-мъ псалмѣ́ стихи́ра, гла́съ 6:

Восте́къ у́мно на высоту́ Боже́ственнаго позна́нія Христо́ва и одѣ́янъ, му́дре, си́лою свы́ше, получи́лъ еси́ та́йныхъ дарова́ній Христо́выхъ, тѣ́мже, пострада́въ Его́ ра́ди, стяжа́лъ еси́ къ Нему́ дерзнове́ніе, и се́ ны́нѣ мо́лимъ Тя́, помяни́ вся́, вѣ́рою тя́ помина́ющія, богоблаже́нне Ирине́е.

Кано́нъ, его́же краегране́сіе: Се́ Ирине́я пѣсносло́витъ Ми́рко. Въ богоро́дичнахъ же и въ сѣда́льнѣ: Про́та Ми́рко. Гла́съ 8.

Пѣ́снь 1.

Ирмо́съ: Ди́вному Бо́гу вели́чія принесе́мъ, и великолѣ́пно съ на́ми да воспое́тъ земля́ и не́бо я́сно сла́ву Его́.

Съ небесе́ благода́ть исхода́тайствуй ми́, свя́те Ирине́е, я́ко да возмогу́ достодо́лжно восхвали́ти твое́ на земли́ свѣтоно́сное торжество́.

Егда́ предста́лъ еси́ суди́щу Про́ва беззако́ннаго, не убоя́вся претя́щаго муче́нія, возопи́лъ еси́ къ нему́: Го́спода Іису́са не отве́ргуся и де́мономъ безу́мнымъ не пожру́, ты́ же твори́, что́ ти го́дѣ быва́етъ.

Ирине́е о́тче богоно́се, стоя́лъ еси́ до́блественно предъ суди́щемъ, исповѣ́дуя Христа́ Го́спода, Его́же престо́лу ны́нѣ предстоя́, моли́ о спасе́ніи ду́шъ на́шихъ.

Богоро́диченъ: Прече́стно вои́стинну и боже́ственно Бо́жіе селе́ніе, воспое́мъ благоче́стно Марíю Пречи́стую, пріе́мшую Невмѣсти́маго и Непостижи́маго.

Пѣ́снь 3.

Ирмо́съ: Утверди́ мя, Го́споди, си́лою Кре́стною и да́руй мнѣ́ се́рдце чи́стое, да о Тебѣ́ хвалю́ся, Бла́же.

Ре́вностію Бо́жіею дыха́я, одѣ́ялся еси́ Ду́ха си́лою, Ирине́е преблаже́нне, и побѣди́лъ еси́ вся́ ополче́нія, ю́же на Христа́ воздвиго́шася.

Имѣ́я основа́ніе Христа́, Ка́меня незы́блема, добродѣ́тельными же ви́ды удобре́нъ бы́въ, сла́вою муче́нія, всеблаже́нне, освяти́вся, преше́лъ еси́ къ люби́мому Го́споду, прича́стіемъ обожа́емь, богопрія́тне.

Не повину́вся велѣ́нію мучи́телеву, богоме́рзскимъ и́доломъ не поже́рлъ еси́, но Христа́ до́блественно исповѣ́далъ еси́, богоблаже́нне Ирине́е сла́вне.

Богоро́диченъ: Рождество́мъ Твои́мъ, Пречи́стая Богоро́дице, мы́, земноро́дніи, отъ земли́ къ высотѣ́ небе́снѣй вои́стинну вознесо́хомся и а́нгельскимъ ликостоя́ніемъ причто́хомся.

Сѣда́ленъ, гла́съ 4:

Отче Ирине́е богоблаже́нне, добродѣ́тельми твои́ми возсія́лъ еси́ въ Сре́мстѣй странѣ́, я́ко вели́кое со́лнце, и, просвѣти́въ вѣ́рныхъ составле́нія, потреби́лъ еси́ страсте́й омраче́ніе, и ны́нѣ моли́ Христа́ Бо́га дарова́ти на́мъ ве́лію ми́лость. [Два́жды.]

Сла́ва, и ны́нѣ, богоро́диченъ, гла́съ то́йже:

Ты была́ еси́ Сло́ва Боже́ственная ски́нія, чистото́ю а́нгелы превозше́дшая, и мене́, пе́рсть бы́вша, па́че всѣ́хъ оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Пѣ́снь 4.

Ирмо́съ: Услы́шахъ слу́хъ си́лы Твоея́, и возвесели́ся се́рдце мое́ о Го́сподѣ.

Еди́нъ Человѣколю́бецъ Христо́съ Госпо́дь прія́тъ тя́, я́ко боже́ственное всесожже́ніе, тѣ́мъ со а́нгелы ны́нѣ лику́еши, Ирине́е, сла́вне му́чениче.

Ангеломъ равносе́льникъ бы́въ, усе́рдно вше́лъ еси́ на суди́лище, любо́вію Христо́вою разжига́емь, тѣ́мъ и терпѣли́вно пострада́въ, Ирине́е преблаже́нне, му́ченически вѣнча́лся еси́.

Просвѣще́нъ бы́въ Свѣ́томъ Тро́ическимъ, служа́щія де́мономъ увѣ́рилъ еси́ чествова́ти Бо́га и́стиннаго, крѣ́постію же Христо́вою укрѣпля́емь, яви́лся еси́ всѣ́хъ сильнѣ́йши.

Богоро́диченъ: Адовы у́зы расто́ргши рождество́мъ Твои́мъ, расто́ргни плѣни́цы грѣхо́въ мои́хъ, Богоневѣ́сто, и ра́дости вся́ испо́лни.

Пѣ́снь 5.

Ирмо́съ: Твои́мъ Свѣ́томъ озари́ мо́й у́мъ, Бо́же, молю́ся Тебе́, да мно́гую Твою́ воспою́, отъ но́щи у́треневавъ, благосты́ню.

Ѣздя по пути́ за́повѣдей Христо́выхъ и кипя́ Боже́ственнымъ раче́ніемъ, о́тче Ирине́е, вся́ плотскíя болѣ́зни и муче́нія ра́достно претерпѣ́лъ еси́.

Свѣтолу́чными Ева́нгелія сія́ніи просвѣще́нъ, не поколеба́лся еси́ му́къ волна́ми, ниже́ претя́щей сме́рти, му́чениче Христо́въ Ирине́е, тѣ́мъ неизрече́нныя сла́вы Боже́ственныя сподо́бился еси́.

Непоколеби́мыя вѣ́ры огне́мъ изсуши́въ му́тныя пото́ки злочести́выхъ велѣ́ній Про́ва беззако́ннаго, вше́лъ еси́ въ незаходи́мый же́ртвенникъ та́инъ, я́ко таи́нникъ неизрече́нныхъ.

Богоро́диченъ: Млеко́мъ пита́еши Пита́теля всѣ́хъ, рожде́ннаго безъ тли́ изъ пречи́стаго Твоего́ чре́ва и человѣ́ки, тле́ю сокруше́нныя, па́ки назида́юща.

Пѣ́снь 6.

Ирмо́съ: Изъ чре́ва а́дова во́пля моего́ услы́шалъ еси́ гла́съ мо́й и изба́вилъ еси́ отъ тли́ живо́тъ мо́й, Многоми́лостиве.

Отче Ирине́е всеблаже́нне, цѣлому́дренно житіе́ твое́ соверши́лъ еси́ и, врага́ побѣди́въ, ко Христу́ преше́лъ еси́, Его́же моли́ изба́вити отъ страсте́й безче́стія человѣ́ки.

Священнотаи́нниче, Ирине́е му́чениче, ты́ священнодѣ́йствовалъ еси́ Бо́жіе Ева́нгеліе и Боже́ственная уче́нія свѣ́тло запеча́тствовалъ еси́ му́ченическою свое́ю кро́вію.

Лѣ́потный Христо́въ таи́нникъ неизрече́нныхъ та́инъ бы́лъ еси́, себе́ же сама́го страда́ніемъ лѣпоподо́бно прине́слъ еси́ Тому́ же́ртву прія́тну, и же́ртва твоя́, сла́вне, на же́ртвенникъ небе́сный вознесе́ся.

Богоро́диченъ: Иста́явшую мою́ мы́сль пла́менемъ грѣха́ кропле́ніемъ ми́лости Твоея́ напо́й, Дѣ́во Ма́ти, и возжжи́ се́рдца моего́ уга́сшій свѣти́льникъ.

Конда́къ, гла́съ 1:

Многоболѣ́зненныхъ му́къ искуше́нія претерпѣ́лъ еси́, но непрекло́ненъ умо́мъ пребы́лъ еси́, мече́мъ же усѣче́нъ и въ рѣ́ку вве́рженъ, рѣ́чныя струи́ освяти́лъ еси́, сего́ ра́ди восхваля́емъ тя́, о́тче Ирине́е, воспѣва́юще свяще́нную и міроспаси́тельную па́мять твою́.

Пѣ́снь 7.

Ирмо́съ: Отроки ороси́вый въ пещи́ и Дѣ́ву сохрани́вый ро́ждшую Тя́ по рождествѣ́, благослове́нъ еси́, Бо́же оте́цъ на́шихъ.

Оруж́никъ Христо́въ яви́лся еси́, блаже́нне, отри́нувъ тве́рдостнѣ мучи́теля нече́стіе, тѣ́мъ и Христо́съ возмзди́ тя за терпѣ́ніе, угото́вавъ тебѣ́ жили́ще небе́сное, идѣ́же ны́нѣ воспѣва́еши: благослове́нъ еси́, Бо́же оте́цъ на́шихъ.

Влады́ки твоего́ раче́ніемъ насла́ждся, мірску́ю любо́вь пренебре́глъ еси́ и муче́нія вѣнце́мъ, о́тче, украси́лся еси́, тѣ́мже взыва́еши: благослове́нъ еси́, Бо́же оте́цъ на́шихъ.

Иго Христо́во на ра́ме твое́мъ усе́рдно нося́, поко́й обрѣ́лъ еси́ въ души́ свое́й, и вмѣ́сто тѣсноты́ обрѣ́лъ еси́ широту́ ра́дованія, и въ ра́йстѣй сла́дости съ му́ченики восклица́еши: благослове́нъ еси́, Бо́же оте́цъ на́шихъ.

Богоро́диченъ: Ра́дуйся, Благода́тная Богоро́дице Дѣ́во, хра́мъ и свяще́нное жили́ще Сло́ва су́щи, и бу́ди на́мъ прегрѣше́ній очище́ніе.

Пѣ́снь 8.

Ирмо́съ: Преподо́бніи Твои́ о́троцы, въ пе́щь вве́ржени, поя́ху: благослови́те, дѣла́ Госпо́дня, Го́спода.

Ты́ ничто́же предпоче́тъ на земли́, о́тче Ирине́е, Христу́ послѣ́довалъ еси́, злочести́вому Про́ву сопротивля́яся, и, за и́стину пострада́въ, вопія́лъ еси́: благослови́те, дѣла́ Госпо́дня, Го́спода.

Моли́твами и посто́мъ плотска́я мудрова́нія умертви́въ, ре́вностію же вѣ́ры распаля́емъ, прине́слся еси́, о́тче, Бо́гу же́ртва прія́тна, воспѣва́я: благослови́те, дѣла́ Госпо́дня, Го́спода.

Исповѣ́даніемъ Христа́ показа́лся еси́ адама́нта твердѣ́йшій и къ мучи́телю взыва́лъ еси́: не устраша́юся сме́рти, ни му́къ ви́да, ниже́ жру́ де́мономъ, Бо́га Еди́наго, въ Тро́ицѣ познава́емаго, чту́, Ему́же всегда́ пѣсносло́влю: благослови́те, дѣла́ Госпо́дня, Го́спода.

Богоро́диченъ: Кля́твы прароди́тельныя изба́вльшеся, Пречи́стая, благослове́ніе Тобо́ю получи́хомъ. Тѣ́мже Тя́ благослови́мъ, и велича́емъ, и любо́вію ублажа́емъ.

Пѣ́снь 9.

Ирмо́съ: Тя́, ши́ршую небе́съ, Богоро́дице, и свѣ́тлшую со́лнца, пѣ́сньми велича́емъ.

Ра́достно пое́мъ по́двиги твоя́, о́тче Ирине́е, я́же за Христа́ па́че естества́ претерпѣ́лъ еси́, тве́рдымъ по́мысломъ проти́вяся Про́ву злочести́вому. Тѣ́мже тя́ въ пѣ́снехъ велича́емъ.

Ко Го́споду любо́вь огнепа́льную имѣ́лъ еси́, добро́тою же Боже́ственною наслажда́емь, ра́дуяся, соверши́лъ еси́ по́двигъ твоего́ муче́нія, сего́ ра́ди въ пѣ́снехъ тя́ велича́емъ.

Огне́мъ Боже́ственнымъ распаля́емь, ю́зи и многоплете́нныя му́ки до́блественно претерпѣ́лъ еси́ и не прине́слъ еси́ че́сти истука́ннымъ, тѣ́мъ тя́ вѣ́рою ублажа́емъ и въ пѣ́снехъ велича́емъ.

Богоро́диченъ: Отчее Сло́во и прему́дрость несказа́нно ро́ждшая, Дѣ́во Всенепоро́чная, души́ моея́ лю́тую я́зву уврачу́й и се́рдца болѣ́знь укроти́.

Свѣти́ленъ:

Сія́ніемъ небе́снымъ озаря́емь, Христо́вою си́лою укрѣпля́емъ, му́жескимъ нра́вомъ къ му́камъ устреми́лся еси́, исповѣ́дая Бо́жіе свято́е и́мя. [Два́жды.]

Богоро́диченъ:

Сія́ніемъ, отъ Тебе́ па́че ума́ Возсія́вшаго, озари́ на́ша мы́сли, Всенепоро́чная, и по́мысловъ душетлѣ́нныхъ умали́ тму́, я́ко да пое́мъ Тя́, Влады́чице.

На хвали́техъ стихи́ры на 4, гла́съ 1:

Боже́ственный зако́нъ соблюда́я,* достоблаже́нне Ирине́е,* злочести́вому мучи́телю му́жескимъ нра́вомъ противоста́лъ еси́,* Боже́ственное велѣ́ніе я́сно проповѣ́далъ еси́* и бы́лъ еси́ до́брое приноше́ніе и же́ртва непоро́чная.* Тѣ́мже Христу́ непреста́нно моли́ся* спасти́ ду́ши на́ша.

Истины проповѣ́дниче,* нече́стія христоно́сный сопротивобори́телю,* Ирине́е приснопа́мятне,* тве́рдо бо сопроти́вился еси́ суему́дренному Про́ву,* мня́щу повину́ти тя́ чужди́мъ* и ме́рзостнымъ че́сти принести́,* ты́ же не повину́лся еси́ веле́нію Его́,* но, че́стно пострада́въ, просла́вился еси́.

Страстоте́рпче всесла́вне,* Ирине́е всему́дре,* сломи́лъ еси́ льво́въ че́люсти,* подъя́въ лю́тая сокруше́нія,* и, вся́ до́блественно претерпѣ́въ,* въ рѣ́чныя вве́рженъ еси́ глубины́,* и вѣ́чнующую наслѣ́дилъ еси́ ра́дость и красоту́.

Ору́жіемъ терпѣ́нія враги́ побѣди́лъ еси́,* претерпѣ́въ и́стинно болѣ́зненное муче́ніе,* пребеззако́нный же Про́въ, обличе́нъ терпѣ́ніемъ твои́мъ,* отсѣка́етъ главу́ твою́, блаже́нне,* и во глубины́ рѣ́чныя вмета́етъ тя́.* Но Христо́съ Человѣколю́бецъ, пріи́мъ,* всели́ тя въ Ца́рство Свое́ небе́сное.

Сла́ва, гла́съ 2:

Ду́шу свою́ просвѣти́въ огне́мъ боже́ственнаго ра́зума, вѣ́ровавъ и послѣ́довавъ глаго́ломъ Христо́вымъ, неукло́нно къ Нему́ взира́лъ еси́, и, презрѣ́въ все́ преходя́щее благосла́віе, зако́нно Христу́ пострада́ти изво́лилъ еси́, и нетлѣ́нія оде́ждею свѣ́тло обле́клся еси́. Тѣ́мъ тя́ мо́лимъ: испроси́ согрѣше́ній оставле́ніе всѣ́мъ, вѣ́рою пою́щимъ честна́я страда́нія твоя́.

И ны́нѣ, богоро́диченъ, гла́съ то́йже:

Его́же родила́ еси́, тѣле́сно къ на́мъ прише́дшаго Христа́ Го́спода, умоли́, о Богома́ти Всеми́лостивая, ми́лостиву и благоувѣ́тливу бы́ти на́мъ, Тя́ бо Предста́тельницу и спасе́ніе стяжа́хомъ.

На стихо́внѣ въ тріо́ди самогла́сенъ, два́жды, и му́чениченъ.
Сла́ва, священному́ченика, гла́съ 1, самогла́сенъ:

Проти́вился еси́ крѣ́пко злочести́вому мучи́телю, богоблаже́нне Ирине́е, повелѣва́ющу ме́рзскимъ тебѣ́ бого́мъ жре́ти, ты́ же, отри́нувъ повелѣ́ніе, не повину́лся еси́, но́, я́ко а́гня, къ заколе́нію гото́въ бы́лъ еси́. Сего́ ра́ди и мы́ досто́йно тя́ ублажа́емъ.

И ны́нѣ, богоро́диченъ, гла́съ то́йже:

Богора́дованная Дѣ́во Нескве́рная, Ма́ти Зижди́телева, Ты́ чино́въ небе́сныхъ еси́ ра́дованіе, человѣ́ческому же ро́ду Помо́щница Благослове́нная, моли́ о спасе́ніи ду́шъ на́шихъ.

Та́же трисвято́е, тропа́рь, ектенія́ и три́ покло́ны вели́кія. Ча́съ 1-й съ каѳи́смою и отпу́стъ.

[Зри́:] Аще ли суббо́та, на стихо́внѣ не пое́мъ, но пое́мъ славосло́віе вели́кое.



НА ЛИТУРГІИ,

Аще суббо́та: блаже́нна священному́ченика, пѣ́снь 3-я и 6-я, и про́чая слу́жба священному́ченика: [Проки́менъ, гла́съ 7: Восхва́лятся преподо́бніи во сла́вѣ* и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, хвале́ніе Его́ въ це́ркви преподо́бныхъ. Апо́столъ ко Евре́емъ, зача́ло 334. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ. Ева́нгеліе Луки́, зача́ло 67. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Мине́я Ма́ртъ. Ча́сть втора́я. — М.: Издательскій совѣтъ Русской Православной Церкви, 2002. — С. 236-245.

/ Къ оглавленію раздѣла /


Наверхъ / Къ титульной страницѣ

0