Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 11 декабря 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 26-й де́нь.
Собо́ръ арха́нгела Гавріи́ла.

НА УТРЕНИ,
Обы́чныя стихоло́гіи и сѣда́льны тріо́ди.

Та́же псало́мъ 50-й. И кано́нъ Богоро́дицы на 4 и арха́нгела на 6.
Кано́нъ Богоро́дицы, его́же краегране́сіе по алфави́ту, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Нача́льникъ Вы́шнихъ чино́въ свѣтови́денъ, къ Дѣ́вѣ по́сланъ бы́сть дне́сь Гавріи́лъ, ра́дуйся, Невѣ́сто непоро́чная, — вопія́, — съ Тобо́ю Зижди́тель всѣ́хъ и Госпо́дь.

[Богоро́дица:] Хощу́ увѣ́дѣти стра́нное твое́ лобза́ніе, — Дѣ́ва рече́, — человѣ́честву бо е́сть необы́чна рече́нія, ра́дость, ку́ю ре́клъ еси́, рцы́ я́сно, науча́я Мя́.

[Ангелъ:] Явле́ннѣйше Тебѣ́ реку́, всеблагоговѣ́йно предстоя́, Пречи́стая, Ты́ же приклони́ у́хо Твое́, Вы́шняго си́ла на Тя́ на́йдетъ и вседѣ́тельнымъ всели́тся Ду́хомъ.

Инъ кано́нъ арха́нгела. Творе́ніе Іо́сифово. Гла́съ 4.
Пѣ́снь 1.

Ирмо́съ: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Яко свѣ́та су́ща къ Свѣ́ту кра́йнѣйшему невеще́ственными причаще́ніи, боже́ственнаго и невеще́ственнаго, молю́ тя, арха́нгеле Госпо́день: у́мъ мо́й просвѣти́ моли́твами твои́ми, я́ко да воспѣва́ю тя́.

Соста́вимъ дне́сь ли́къ боже́ственный, веселя́щеся, пе́рваго почита́юще безпло́тныхъ умо́въ, неизрече́нную ра́дость возвѣсти́вшаго, въ мíръ прише́дшую за бла́гость.

Предста́теля тя́ велича́йша, и къ Бо́гу засту́пника, и стѣ́ну, и утвержде́ніе, Гавріи́ле, иму́ще, лю́бящіи тя́, избавля́емся отъ бѣ́дъ и вре́да зміи́на, восхваля́ющіи тя́.

Богоро́диченъ: Чи́сту Тя́, Всенепоро́чную, Гавріи́лъ я́ко узрѣ́, — ра́дуйся! — Тебѣ́, Влады́чице, свѣ́тло возопи́, браконеиску́сная, человѣ́ковъ спасе́ніе, а́нгеловъ похвала́ и честносло́віе.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

[Богоро́дица:] Ле́стно вѣща́ти тя́ ны́нѣ, а́нгеле, смотря́ю, ве́щно бо существо́, и тлѣ́нно, и зе́млено Невеще́ственнаго ка́ко вмѣсти́тъ, нетлѣ́нія Свѣ́томъ одѣва́емаго?

[Ангелъ:] Смы́сленно обличи́ла еси́, Чи́стая, но благоволи́ си́це, и да увѣ́ритъ Тя́ купина́, воспа́льшися, ника́коже сожжена́ огне́мъ, и прообража́ющи Твое́ рождество́ несказа́нное.

[Богоро́дица:] Жи́зни Мнѣ́ глаго́лы вопіе́ши, но увѣря́етъ Мя́ гора́, дымя́щаяся дре́вле, пріе́мшая Бо́га, не мощи́ ве́щному естеству́ отню́дъ Невеще́ственнаго прія́ти.

Инъ.

Ирмо́съ: Твоя́ пѣсносло́вцы, Богоро́дице, живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Прича́стіемъ Свѣ́та невеще́ственнѣйшаго, я́ко невеще́ственъ вои́стинну, Гавріи́ле, невеще́ственно просвѣща́емь, свѣ́тъ ви́дѣнъ бы́лъ еси́ вторы́й, веще́ственныя всегда́ человѣ́ки просвѣща́я, пою́щія тя́.

Велича́йшаго благосла́вія сподо́бился, еси́, вели́кое та́инство на́мъ откры́въ, велича́йше а́нгеловъ, и́мже взя́ти бы́хомъ отъ земли́ къ велича́йшѣй высотѣ́ вельми́ чту́щіи тя́.

Яви́ся всѣ́мъ съ небесе́, любо́вію ищу́щимъ тя́ при́сно, и уста́ви бу́рю на ны́ дви́жимую напа́стей же и скорбе́й, о Гавріи́ле архистрати́же!

Богоро́диченъ: Сказу́я е́же дре́вле сокрове́нное та́инство, Отрокови́це, Тебѣ́ иногда́ Гавріи́лъ взыва́ше: ра́дуйся, Бо́жія пала́то, въ ню́же всели́вся, вся́ человѣ́ки обожи́, я́ко Благоутро́бенъ.

Сѣда́ленъ, гла́съ 4. Подо́бенъ: Вознесы́йся.

Безпло́тныхъ служи́телей ты́ пе́рвствуяй, пре́жде вѣ́къ опредѣле́нное стра́шное та́инство, тебѣ́ еди́ному, Гавріи́ле сла́вне, ввѣ́рися, рождество́ неизрече́нное Святы́я Дѣ́вы, ра́дуйся, провозглаша́я Ей, Обра́дованная. Тѣ́мже тя́ до́лжно, вѣ́рніи, съ весе́ліемъ при́сно ублажа́емъ.

Сла́ва, и ны́нѣ, то́йже.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

[Ангелъ:] Со́лнца носи́ло Твое́ бы́стъ, Пречи́стая, чре́во, и человѣ́комъ роди́ши Свѣ́тъ Невече́рній, — Гавріи́лъ прера́достно Дѣ́вѣ провѣщава́ше.

[Богоро́дица:] Двере́й Мои́хъ отступи́, не вѣща́й глаго́ловъ, и́хже сбытія́ ника́коже мо́жеши показа́ти, архистрати́же, что́ Мо́й у́мъ и ду́шу смуща́еши, сія́ глаго́ля Ми́?

[Ангелъ:] Вѣ́дѣти издале́че сподо́бишася та́инства глубину́ проро́ческія трубы́, Всенепоро́чная, Его́же слуга́ е́смь, предъ две́рьми Твои́ми предстою́.

Инъ.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Стоя́лъ еси́, прича́стіями богонача́льными дре́вле, Гавріи́ле досточу́дне, просвѣща́я проро́ка Даніи́ла и изложи́въ явле́ніе недовѣ́домыхъ ду́хомъ.

Усты́ бре́нными тя́ ра́достно, о́гненна естество́мъ су́ща, восхваля́емъ: изми́ ны огня́ всегда́ паля́щаго, Боже́ственными, Гавріи́ле, хода́тайствы твои́ми.

Па́че со́лнца въ боже́ственную оде́жду, сла́вою непристу́пною блиста́ющуся, одѣва́емь, архистрати́же служи́телей, Царю́ предстои́ши Небе́сному, веселя́ся.

Богоро́диченъ: Всю́ Тя́, ду́хомъ Гавріи́лъ преочище́ну, Всенепоро́чная, разумѣ́въ, вопіе́тъ Тебѣ́ я́вственно: ра́дуйся, кля́твы избавле́ніе и пра́отцевъ воззва́ніе.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

[Богоро́дица:] Облиста́ема тя́ зрю́, а́нгеле, а́нгельскими свѣтлостьми́, — Пренепоро́чная рече́, — оба́че стыжду́ся ско́ро вѣ́ровати, не пе́рвѣе увѣ́дѣвши вся́кую извѣ́стность.

[Ангелъ:] Истлѣ́вшее Зижди́тель естество́ человѣ́ческое зря́, въ Тя́ всели́тися благоизво́лилъ е́сть, сокрове́нное отъ вѣко́въ, Чи́стая, стра́шнѣ ны́нѣ открыва́я та́инство.

[Богоро́дица:] Обручена́ Іо́сифу бы́хъ Азъ, да́же до ны́нѣ не совокуплена́, арха́нгеле, иску́са у́бо не позна́вши му́жеска, ка́ко рожду́? Естества́ сопроти́вныя глаго́леши Мнѣ́ глаго́лы.

Инъ.

Ирмо́съ: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.

Ума́ прича́стіемъ Пе́рваго просвѣща́емь, вторы́й ви́дѣнъ бы́лъ еси́ свѣ́тъ, зовы́й со безчи́сленными а́нгелъ чи́нми: Свя́тъ Оте́цъ Вседѣ́тель, Сы́нъ Собезнача́ленъ и Ду́хъ Сопресто́ленъ.

Ви́дъ тво́й о́гненъ, добро́та пречу́дна, вся́ку мы́сль ужаса́я, ве́лія сла́ва, Гавріи́ле велича́йше, Боже́ственныхъ безпло́тныхъ нача́льниче, всѣ́хъ удобре́ніе, вѣ́рно воспѣва́ющихъ тя́.

Боже́ственный я́ко ви́дѣ тя́, во вре́мя кажде́нія дре́вле стоя́ща, Заха́рія, быва́етъ нѣ́мъ: не вѣ́рова бо твоему́ возвѣще́нію стра́шному, его́же изгласи́лъ еси́, Гавріи́ле архистрати́же.

Богоро́диченъ: Хра́мъ свяще́нія су́щи, Всенепоро́чная, гла́сомъ Гавріи́ла арха́нгела, во святы́хъ почива́ющаго родила́ еси́ Всесвята́го Бо́га, вся́ освяща́ющаго и лю́тыхъ изыма́ющаго.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

[Ангелъ:] Зако́номъ, Отрокови́це, естества́ не рабо́таетъ Іису́съ, Содѣ́тель естества́, и Тя́ да увѣ́ритъ же́злъ Ааро́новъ, невла́жно прора́стшій, Тя́ роди́ти неискусому́жно образова́вшій.

[Богоро́дица:] Дивлю́ся, твоя́ сія́ стра́шныя и честны́я поразумѣва́ющи глаго́лы, и, вѣ́ровати хотя́щи, помышля́ю высоты́ вели́чество, и стыжу́ся вся́, архистрати́же.

[Ангелъ:] Не повину́ешися ли словесе́мъ мои́мъ? Тя́ прови́дѣ Даніи́лъ го́ру, отъ нея́же усѣче́ся безъ руки́ человѣ́ческія Ка́мень, Чи́стая, хра́мы и тре́бища и́дольская истня́я крѣпча́йше.

Инъ.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те рука́ми воспле́щимъ, отъ Нея́ ро́ждшагося Бо́га сла́вимъ.

Земнíи язы́цы почести́ тя, ума́ свѣтоза́рнаго и небе́снаго, не возмо́гутъ, пресвѣ́тло просвѣща́ема па́че ума́ неизрече́нно Боже́ственными свѣтлостьми́.

Заря́ со́лнца многосвѣ́тлая, о́гненныхъ слу́гъ архистрати́же, свѣтоно́сными твои́ми ко Влады́цѣ мольба́ми пою́щія тя́ тмы́ страсте́й исхи́ти.

Совѣ́ты язы́ковъ разори́, вѣ́ру правосла́вную утверди́, уста́ви раздо́ры церко́вныя, арха́нгеле, ко всѣ́хъ Творцу́ твои́ми моли́твами.

Богоро́диченъ: Глаго́ловъ Боже́ственныхъ послушли́ва, Чи́стая, Гавріи́ловыхъ была́ еси́, и Пребезнача́льнаго Сло́ва пло́тію родила́ еси́, безслове́сія мíръ изба́вльшаго.

Конда́къ, гла́съ 8:

Пресвѣ́тлыя, и Честны́я, и Вседѣ́тельныя, пренеисче́тныя и стра́шныя Тро́ицы ты́ еси́, архистрати́же, сла́вный служи́телю и моли́твенниче, ны́нѣ непреста́нно моли́ изба́вится на́мъ отъ вся́кихъ бѣ́дъ и му́къ, да зове́мъ ти́: ра́дуйся, покро́ве рабо́мъ твои́мъ.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

[Богоро́дица:] Пресла́вно я́ко пріи́детъ съ тѣ́ломъ въ мíръ безпло́тный, сказа́лъ еси́, Гавріи́ле: рцы́ же свѣ́тло, ка́ко Сего́ вмѣсти́тъ Мое́ чре́во, Его́же вели́чества небеса́ вмѣсти́ти не мо́гутъ?

[Ангелъ:] Повѣ́даю Тебѣ́, и разумѣ́й, о Всенепоро́чная! ка́ко ски́нія иногда́ Авраа́мова прія́тъ и Бо́га вмѣсти́, Пречи́стая, тѣ́мже не сумни́ся ны́нѣ, но любе́зно цѣлова́ніе пріими́, человѣ́комъ ра́дость.

[Богоро́дица:] Смуща́етъ Мя́ ве́щи вели́чество, но у́бо поне́же благоволи́ Всеблагíй въ Мя́ всели́тися па́че ума́, се́ и душе́ю, и пло́тію хра́мъ е́смь чи́стъ, соблюде́нъ Ему́.

Инъ.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Іоа́нново рождество́, сла́вне, возвѣсти́лъ еси́ Заха́ріи иногда́, вну́трь Боже́ственнаго хра́ма предстоя́щу и пою́щу Изба́вителю и Бо́гу: препѣ́тый отце́въ Госпо́дь и Бо́гъ, благослове́нъ еси́.

Пресла́вное хра́ма твоего́ благолѣ́піе пресвѣ́тло, Гавріи́ле, освяща́етъ ду́ши вѣ́рныхъ и повелѣва́етъ велегла́сно вопи́ти: препѣ́тый отце́въ Госпо́дь и Бо́гъ, благослове́нъ еси́.

Просвѣща́емь прича́стіемъ, архистрати́же, пе́рваго Свѣ́та та́йно, вторы́й свѣ́тъ вои́стинну ви́дѣнъ бы́лъ еси́, пою́щія просвѣща́я всегда́: препѣ́тый отце́въ Госпо́дь и Бо́гъ, благослове́нъ еси́.

Богоро́диченъ: По́сланъ бы́сть Гавріи́лъ архистрати́гъ, ра́дость возвѣща́я Тебѣ́, Дѣ́во-Ма́ти Чи́стая, Ея́же ра́ди печа́ль преста́, и кля́тва вои́стинну онепло́дствися, и благослове́ніе процвѣте́ вѣ́рнымъ во вѣ́ки.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Гла́сомъ а́нгеловымъ Свѣ́тъ зачала́ еси́. Сего́ ра́ди Тебѣ́ — ра́дуйся! — вси́ взыва́емъ, две́ре Свѣ́та, неудобозри́мое видѣ́ніе, престо́ле Вы́шняго, Дѣ́во Богоро́дице.

Высо́каго та́инства, ра́дуйся, соверше́ніе; недоумѣ́нныхъ веще́й, ра́дуйся, явле́ніе; ра́дуйся, къ Бо́гу человѣ́ковъ присвое́ніе; ра́дуйся, Дѣ́во, па́дшихъ воззва́ніе.

Свѣтода́теля Влады́ки, ра́дуйся, Роди́тельнице; приста́нище су́щимъ въ бу́ри, ра́дуйся, Всенепоро́чная; и́стинная и плодови́тая лозо́, ра́дуйся, возрасти́вшая безсме́ртія Гро́здъ.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

Священносло́віи свяще́нными тя́ лю́діе свяще́нніи пою́тъ, веселя́щеся, ты́ бо всевино́вное Сло́во воплоща́емо, е́же по на́мъ, арха́нгеле, су́щей отъ на́съ приглаша́еши Дѣ́вѣ па́че ума́ же и сло́ва. Тѣ́мже тя́ почита́емъ во вся́ вѣ́ки.

Уму вели́кому же и пе́рвому невеще́ственно, арха́нгеле, соединя́яся усты́ о́гненными твои́ми пое́ши пѣснопѣ́ніе стра́шное, е́же пою́тъ вси́ а́нгельстіи ли́цы: Го́спода по́йте, дѣла́, и превозноси́те Его́ во вся́ вѣ́ки.

Благосла́віями я́вѣ испещре́нъ Боже́ственными, прехо́диши небе́сная, та́же и земна́я, соверша́я свяще́нная хотѣ́нія Христа́, всѣ́хъ Бо́га, а́нгеловъ нача́льниче Гавріи́ле, красота́ вѣ́рою при́сно тя́ хва́лящихъ.

Пло́тію по ѵпоста́си Сло́во человѣ́комъ примѣси́тися хотя́, имя́ше тя́, предтеку́ща и предугото́вающа свяще́нную пала́ту, о свяще́нный Гавріи́ле, Го́спода по́йте, вопію́ща, и превозноси́те Его́ во вся́ вѣ́ки.

Богоро́диченъ: Яко престо́лъ красе́нъ Царе́въ, я́ко всѣ́хъ тва́рей преиму́щую, я́ко Пресу́щнаго еди́ну осуществова́вшую, человѣ́ки обожи́вшаго соедине́ніемъ лу́чшимъ рождества́ неизрече́ннаго и стра́ннаго, благослове́нную воспои́мъ Дѣ́ву.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Ра́дости вина́ всеблагослове́нная, ра́дуйся, честна́я добропло́дная и благора́сленная браздо́, Пита́теля всего́ нося́щи; ра́дуйся, исто́чниче живы́я воды́, Пречи́стая, ста́мно и раю́ Бо́жій, ра́дуйся, Всенепоро́чная.

Душа́мъ же и тѣ́ломъ очище́ніе, ра́дуйся, Еюже истека́ютъ человѣ́комъ лу́чшая, вина́ всѣ́хъ обоже́нія; ра́дуйся, о́блаче ле́гкій, Со́лнца нося́щій, мíръ свѣтолу́чными сія́ньми озаря́юща.

Пѣ́снь вопіе́мъ Ти́ ра́достную: ра́дуйся, Чи́стая, му́чениковъ, апо́столовъ похвало́, проро́ковъ пресла́вное рече́ніе, архіере́овъ и преподо́бныхъ, ра́дуйся, удобре́ніе; Ея́же ра́ди небе́сная со земны́ми ра́дуются.

Инъ.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Предстои́ши, стра́шно престо́лу благода́ти служа́, и облиста́емь свѣтоли́тіи су́щими па́че ума́, и свяще́нно обожа́емь, и Свѣ́тъ зри́мь, и просвѣща́я вѣ́рою честву́ющія тя́, свяще́нне Гавріи́ле архистрати́же.

Якоже не́бо, зри́шися, звѣзда́ми укра́шено, Боже́ственными свѣтлостьми́, и, я́коже воево́да, рука́ми держи́ши ски́птръ пресвѣ́тлый и претека́еши всю́ зе́млю, во́лю Влады́чню всегда́ творя́ и лю́тыхъ вѣ́рныя изыма́я.

Утиши́ лю́тую ва́рварскую бу́рю, воздви́жемую всегда́ на рабы́ твоя́, церко́вныя уста́ви раздо́ры, пою́щимъ тя́ пода́ждь прегрѣше́ній избавле́ніе, Импера́тору же да́руй побѣди́тельная, Гавріи́ле, те́плымъ предста́тельствомъ твои́мъ.

Предо́брая дво́ице и пресла́вная, Михаи́ле и Гавріи́ле, престо́лу предстоя́ще Боже́ственныя сла́вы, всѣ́мъ проси́те грѣхо́въ проще́нія и злы́хъ премѣне́нія, я́ко предста́теліе и я́ко бла́гости Влады́чни во все́мъ подо́бящеся.

Богоро́диченъ: Свѣ́тъ блиста́нія рождество́мъ Твои́мъ возсія́, и просвѣти́ всю́ подсо́лнечную, и предста́теля тмы́ погуби́, Богороди́тельнице Всечи́стая, а́нгеловъ хвало́ и человѣ́ковъ всѣ́хъ спасе́ніе, непреста́нными гла́сы восхваля́ющихъ Тя́.

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Умъ предвѣ́чный,* Свѣ́тъ соста́вивый вторы́й,* Гавріи́ла Тебе́ прича́стіями Боже́ственными,* просвѣща́ющаго всю́ вселе́нную* и ю́же отъ вѣ́ка открыва́ющаго на́мъ* боже́ственную и вели́кую вои́стинну та́йну,* во утро́бѣ воплоща́емаго дѣви́честѣй,* су́ща Безтѣле́снаго, и бы́вша Человѣ́ка,* во е́же спасти́ человѣ́ка. [Два́жды.]

Престо́лу предстоя́ Трисо́лнечнаго Божества́* и бога́тно просіява́я Боже́ственными свѣтлостьми́,* испуща́емыми непреста́нно отту́ду,* су́щія на земли́, ра́достно лику́ющія* и восхваля́ющія тя́,* страсте́й мглы́ изба́ви* и просвѣще́ніемъ уясни́,* Гавріи́ле архистрати́же,* моли́твенниче о душа́хъ на́шихъ.

Низложи́ шата́нія ага́рянская,* на ста́до твое́ ча́стѣ находя́щая,* уста́ви раздо́ры Це́ркве,* укроти́ бу́рю безмѣ́рныхъ искуше́ній,* изба́ви бѣ́дъ и обстоя́ній* любо́вію чту́щія тя́* и по́дъ кро́въ тво́й прибѣга́ющія,* Гавріи́ле архистрати́же,* моли́твенниче о душа́хъ на́шихъ.

Сла́ва, и ны́нѣ, гла́съ 2:

Благовѣству́етъ Гавріи́лъ Благода́тнѣй дне́сь: ра́дуйся, неневѣ́стная Ма́ти и неискусобра́чная! Не удивля́йся стра́нному моему́ зра́ку, ни ужаса́йся, арха́нгелъ бо е́смь. Змíй прелсти́ Еву иногда́, ны́нѣ же благовѣству́ю Тебѣ́ ра́дость, и пребу́деши нетлѣ́нна, и роди́ши Го́спода, Пречи́стая.

На стихо́внѣ самогла́сенъ тріо́ди, два́жды, и му́чениченъ.
Сла́ва, и ны́нѣ, богоро́диченъ.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 149 – 154.

/ Къ оглавленію раздѣла /


Наверхъ / Къ титульной страницѣ

0