Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 19 ноября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 25 де́нь.
Благовѣ́щеніе Пресвяты́я Влады́чицы на́шея Богоро́дицы и Приснодѣ́вы Марíи.

[Зри́:] Вѣ́дати подоба́етъ, я́ко на́вечеріе Благовѣ́щенія а́ще случи́тся въ суббо́ту или́ недѣ́лю:

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 4. Подо́бенъ: Зва́нный свы́ше.

Уще́дривъ тва́рь Зижди́тель,* милосе́рдіемъ же Свои́мъ прекланя́емь,* во утро́бу Дѣ́вы Богоотрокови́цы* всели́тися спѣши́тъ.* Къ Не́йже вели́кій пріи́де арха́нгелъ, —* ра́дуйся, — провѣщава́я, — Богора́дованная,* ны́нѣ съ Тобо́ю Бо́гъ на́шъ.* Не ужаса́йся мене́, Царе́ва архистрати́га,* обрѣла́ бо еси́ благода́ть,* ю́же погуби́ Ева пре́жде, прама́ти Твоя́,* и зачне́ши и роди́ши* Отцу́ Единосу́щнаго. [Два́жды.]

Стра́нно е́сть сло́во твое́ и воззрѣ́ніе,* стра́нны твои́ глаго́лы и возвѣще́нія, —* Марíя ко а́нгелу, —* да не прельсти́ши Мене́,* Дѣ́ва бо е́смь, бра́ка не зна́ющи;* глаго́леши, я́ко зачну́ Необыме́ннаго,* и ка́ко вмѣсти́тъ утро́ба Моя́,* Его́же вели́чества небе́сная вмѣсти́ти не мо́гутъ? —* Авраа́мовъ кро́въ да научи́тъ Тя́ ны́нѣ,* Бо́га вмѣсти́вый,* прообразу́ющій издале́ча, Дѣ́во,* Богопрія́тную Твою́ утро́бу.

Въ Назаре́тъ ны́нѣ гра́дъ прише́дъ,* гра́дъ Тя́ одушевле́нъ Царя́ Христа́* Гавріи́лъ лобыза́етъ, вопія́ Тебѣ́:* ра́дуйся, Благослове́нная Богора́дованная,* пріи́меши во утро́бѣ Твое́й Бо́га воплоща́ема* и Тобо́ю человѣ́чество* на дре́внее блаже́нство за благоутро́біе призыва́юща.* Благослове́нъ чре́ва Твоего́* Боже́ственный Пло́дъ безсме́ртный,* подая́й мíру очище́ніе* и ве́лію ми́лость.

Сла́ва, и ны́нѣ, гла́съ 1:

Въ шесты́й мѣ́сяцъ архистрати́гъ по́сланъ бы́сть къ Тебѣ́, Дѣ́вѣ и Чи́стѣй, возвѣсти́ти Тебѣ́ сло́во спасе́нія, вку́пѣ же и зва́ти Тебѣ́: ра́дуйся, Обра́дованная, Госпо́дь съ Тобо́ю, роди́ши Сы́на Превѣ́чнаго изъ Отца́, и спасе́тъ лю́ди Своя́ отъ грѣ́хъ и́хъ.

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

Нача́льникъ вы́шнихъ си́лъ,* съ небе́съ въ Назаре́тъ слетѣ́въ,* Дѣ́ву лобыза́етъ, —* ра́дуйся, — глаго́ля, —* колесни́це чи́стая Божества́:* Тя́ отъ вѣ́ка Бо́гъ возлюби́, въ жили́ще изво́ли.* Ра́бъ Влады́чень, къ Тебѣ́ прише́льствуяй е́смь вопи́ти:* роди́ши бо Го́спода* и нетлѣ́нна пребу́деши.

Сти́хъ: Благовѣсти́те де́нь отъ дне́* спасе́ніе Бо́га на́шего.

Что́ тво́й ви́дъ о́гненный? —* Гавріи́лу Чи́стая со удивле́ніемъ рече́, —* что́ твое́ досто́инство и слове́съ си́ла?* Зача́ти Сы́на провѣщава́еши Ми́,* Азъ же иску́са му́жеска не вѣ́мъ,* отыди́ дале́че, не прельсти́ши, человѣ́че,* я́коже пре́жде Еву прама́терь змíй льсти́вый.

Сти́хъ: Воспо́йте Го́сподеви пѣ́снь но́ву,* воспо́йте Го́сподеви, вся́ земля́.

Ду́хъ Бо́жій Пресвяты́й* пріи́детъ, Пречи́стая, на Тя́,* Боговмѣсти́мая Влады́чице,* и си́ла Вы́шняго осѣ́нитъ Тя́,* и роди́ши Сы́на,* соблюда́юща Твое́ дѣ́вство неврежде́нно.* Се́й Сы́нъ е́сть неродосло́вимь,* Се́й, я́влься, спасе́тъ лю́ди Своя́,* я́ко благоизво́ли.

Сла́ва, и ны́нѣ, гла́съ 4:

Въ шесты́й мѣ́сяцъ по́сланъ бы́сть арха́нгелъ къ Дѣ́вѣ Чи́стѣй и, ра́доватися Ей прире́къ, благовѣсти́ изъ Нея́ Изба́вителю проити́. Тѣ́мже, пріе́мши цѣлова́ніе, зача́тъ Тя́, Превѣ́чнаго Бо́га, несказа́нно благоволи́вшаго вочеловѣ́читися во спасе́ніе ду́шъ на́шихъ.

Тропа́рь, гла́съ 4:

Дне́сь спасе́нія на́шего глави́зна и е́же отъ вѣ́ка та́инства явле́ніе: Сы́нъ Бо́жій Сы́нъ Дѣ́вы быва́етъ, и Гавріи́лъ благода́ть благовѣству́етъ. Тѣ́мже и мы́ съ ни́мъ Богоро́дицѣ возопіи́мъ: ра́дуйся, Благода́тная, Госпо́дь съ Тобо́ю.


НА ВЕЛИЦѢЙ ВЕЧЕРНИ,
[Зри́:] Благовѣ́щеніе Пресвяты́я Влады́чицы на́шея Богоро́дицы и Приснодѣ́вы Марíи начина́ется отъ четвертка́ 3-я недѣ́ли святы́хъ посто́въ и восхо́дитъ до среды́ свѣ́тлыя седми́цы.
И а́ще е́сть по́стъ, начина́емъ вече́рню безъ каѳи́смы и безъ покло́новъ.

На Го́споди воззва́хъ: ста́вимъ стихо́въ 10 и пое́мъ тріо́ди самогла́сенъ дне́, два́жды, и подо́бны 3, и пра́здника 3, повторя́юще двѣ́, гла́съ 6. Подо́бенъ: Все́ отло́жше.

Совѣ́тъ превѣ́чный* открыва́я Тебѣ́, Отрокови́це,* Гавріи́лъ предста́,* Тебе́ лобза́я и вѣща́я:* ра́дуйся, земле́ ненасѣ́янная;* ра́дуйся, купино́ неопали́мая;* ра́дуйся, глубино́ неудобозри́мая;* ра́дуйся, мо́сте, къ небесе́мъ преводя́й,* и лѣ́ствице высо́кая, ю́же Іа́ковъ ви́дѣ;* ра́дуйся, боже́ственная ста́мно ма́нны;* ра́дуйся, разрѣше́ніе кля́твы;* ра́дуйся, Ада́мово воззва́ніе:* съ Тобо́ю Госпо́дь. [Два́жды]

Явля́ешися мнѣ́ я́ко человѣ́къ, —* глаго́летъ нетлѣ́нная Отрокови́ца ко архистрати́гу, —* и ка́ко вѣща́еши глаго́лы па́че человѣ́ка?* Со Мно́ю бо, ре́клъ еси́, Бо́гу бы́ти,* и всели́тися во утро́бу Мою́.* И ка́ко бу́ду, глаго́ли Ми́,* вмѣсти́лище простра́нное* и мѣ́сто свяще́нія,* херуви́мы превосходя́щаго?* Да не прелсти́ши мене́ ле́стію,* не позна́хъ бо сла́сти,* бра́ку е́смь неприча́стна,* ка́ко у́бо Отроча́ рожду́? [Два́жды]

Бо́гъ, идѣ́же хо́щетъ,* побѣжда́ется естества́ чи́нъ, —* глаго́летъ безпло́тный, —* и я́же па́че человѣ́ка содѣва́ются,* мои́мъ вѣ́руй и́стиннымъ глаго́ломъ,* Всесвята́я Пренепоро́чная. —* Она́ же возопи́:* бу́ди Мнѣ́ ны́нѣ по глаго́лу твоему́,* и рожду́ Безпло́тнаго,* пло́ть отъ Мене́ заи́мствовавшаго,* я́ко да возведе́тъ человѣ́ка,* я́ко еди́нъ Си́ленъ,* въ пе́рвое достоя́ніе, съ растворе́ніемъ.

Сла́ва, и ны́нѣ, гла́съ то́йже, самогла́сенъ. Іоа́нна мона́ха:

По́сланъ бы́сть съ небесе́ Гавріи́лъ арха́нгелъ, благовѣсти́ти Дѣ́вѣ зача́тіе и, прише́дъ въ Назаре́тъ, помышля́ше въ себѣ́, чудеси́ удивля́яся: О, ка́ко, въ вы́шнихъ непостижи́мь Сы́й отъ Дѣ́вы ражда́ется! имѣ́яй престо́лъ не́бо и подно́жіе зе́млю, во утро́бу вмѣща́ется Дѣ́вичу! на Него́же шестокрила́тіи и многоочи́тіи зрѣ́ти не мо́гутъ, сло́вомъ еди́нѣмъ отъ Сея́ воплоти́тися благоизво́ли. Бо́жіе е́сть Сло́во настоя́щее. Что́ у́бо стою́, и не глаго́лю Дѣ́вѣ: ра́дуйся, Благода́тная, Госпо́дь съ Тобо́ю; ра́дуйся, Чи́стая Дѣ́во; ра́дуйся Невѣ́сто неневѣ́стная; ра́дуйся, Ма́ти Живота́, благослове́нъ пло́дъ чре́ва Твоего́!

Вхо́дъ. Свѣ́те Ти́хій... Проки́менъ, и чте́ніе дне́, и пра́здника три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

Та́же: Да испра́вится моли́тва моя́.., и покло́ны три́ вели́кія, и про́чее преждеосвяще́нныхъ.


[Зри:] Аще же нѣ́сть преждесвяще́нныхъ: На Го́споди воззва́хъ: стихи́ры подо́бны 3 въ тріо́ди, и пра́здника 5. Сла́ва, и ны́нѣ: По́сланъ бы́сть... Вхо́дъ. Проки́менъ. И чте́нія дне́ и пра́здника три́. Та́же: Сподо́би, Го́споди... На стихо́внѣ: тріо́ди самогла́сенъ дне́, два́жды, и му́чениченъ. Сла́ва, и ны́нѣ: Дне́сь ра́дость... По Ны́нѣ отпуща́еши..: тропа́рь пра́здника, ектенія́, и три́ покло́ны вели́кія, и отпу́стъ. На трапе́зѣ же разрѣша́емъ на вино́ и еле́й, въ кíй-ли́бо де́нь случи́тся, во сла́ву Пресвяты́я Богоро́дицы.

(Мрк.) Потре́ба е́сть вѣ́дати, я́ко а́ще случи́тся Благовѣ́щеніе въ кото́рую суббо́ту поста́: Чту́тся чте́нія пре́жде дне́ и по си́хъ пра́здника 5: 1) Вни́де Моисе́й... 2) Госпо́дь созда́ мя... 3) Изы́де Іа́ковъ... 4) Бу́детъ отъ дне́ осма́го... 5) Прему́дрость созда́ себѣ́ до́мъ...

Подо́бнѣ чту́тся чте́ній пра́здника 5, а́ще Благовѣ́щеніе случи́тся и въ недѣ́лю.
Аще ли е́сть по́стъ, чту́тся ве́черъ, три́ преждепи́санныя, а на Литургíи двѣ́ сія́.

Исхо́да чте́ніе. [Глава́ 3.]

Вни́де Моисе́й въ го́ру Бо́жію Хори́въ. Яви́ же ся ему́ Ангелъ Госпо́день въ пла́мени о́гненнѣ изъ купины́. И ви́дѣ, я́ко купина́ горя́ше огне́мъ, и купина́ не сгара́ше. Рече́ же Моисе́й: преше́дъ, узрю́ видѣ́ніе вели́кое сіе́, что́ я́ко не сгара́етъ купина́? Якоже ви́дѣ Госпо́дь, я́ко приступа́етъ ви́дѣти, призва́ его́ Госпо́дь изъ купины́, глаго́ля: Моисе́е, Моисе́е. Онъ же рече́: что́ е́сть? И рече́: не прибли́жися сѣ́мо; изу́й сапо́гъ отъ ногу́ твое́ю: мѣ́сто бо, на не́мже ты́ стои́ши, земля́ свята́ е́сть. И рече́ ему́: Азъ е́смь Бо́гъ отца́ твоего́, Бо́гъ Авраа́мовъ, и Бо́гъ Исаа́ковъ, и Бо́гъ Іа́ковль. Отврати́ же Моисе́й лице́ свое́: стыдя́ше бо ся зрѣ́ти предъ Бо́гомъ. Рече́ же Госпо́дь къ Моисе́ю: ви́дя, ви́дѣхъ озлобле́ніе люде́й Мои́хъ, и́же во Еги́птѣ, и во́пль и́хъ услы́шахъ отъ наси́льствующихъ въ дѣ́лѣхъ, вѣ́мъ бо болѣ́знь и́хъ, и снидо́хъ, е́же изъя́ты и́хъ отъ руки́ еги́птянъ, и извести́ и́хъ отъ земли́ о́ныя, и ввести́ и́хъ въ зе́млю бла́гу и мно́гу, въ зе́млю, точа́щу ме́дъ и млеко́.

При́тчей чте́ніе. [Глава́ 8.]

Госпо́дь созда́ мя нача́ло путе́й Свои́хъ въ дѣла́ Своя́. Пре́жде вѣ́къ основа́ мя въ нача́лѣ, пре́жде, не́же зе́млю сотвори́ти, и пре́жде, не́же бе́здны содѣ́лати, пре́жде, не́же произы́ти исто́чникомъ во́днымъ, пре́жде, не́же гора́мъ водрузи́тся, пре́жде же всѣ́хъ холмо́въ ражда́етъ мя́. Госпо́дь сотвори́ страны́, и пусты́ни, и концы́, населе́ны подъ небесе́мъ. Егда́ гото́вяше не́бо, съ Ни́мъ бѣ́хъ, и егда́ отлуча́ше Себѣ́ престо́лъ на вѣ́трѣхъ, егда́ крѣ́пки творя́ше вы́шнія о́блаки и я́ко тве́рды полага́ше исто́чники поднебе́сныя. Внегда́ полага́ти мо́рю предѣ́лъ его́, и во́ды не ми́мо и́дутъ у́стъ Его́, и крѣ́пки творя́ше основа́нія земли́, бѣ́хъ къ Нему́ подо́бна. Азъ бѣ́хъ, о не́йже ра́довашеся: по вся́ же дни́ веселя́хся предъ лице́мъ Его́ на вся́ко вре́мя.

При часѣ́ же 1-мъ но́щи ударя́етъ въ вели́кій кампа́нъ дово́льно и пото́мъ во вся́. И, собра́вшеся во хра́мъ, благослови́вшу іере́ю и кадя́щу, пое́мъ повече́ріе вели́кое и Съ на́ми Бо́гъ... съ пѣ́ніемъ, на гла́съ 8, на о́ба ли́ка. И обы́чныя тропари́: Де́нь преше́дъ... По 1-мъ трисвято́мъ тропа́рь пра́здника: Дне́сь спасе́нія на́шего... По 2-мъ конда́къ пра́здника: Взбра́нной Воево́дѣ... И по Сла́ва въ вы́шнихъ... твори́мъ исхожде́ніе въ притво́ръ. И быва́етъ литíя по обы́чаю.

И пое́мъ стихи́ры пра́здника самогла́сны три́, гла́съ 1.

Византíево: Въ шесты́й мѣ́сяцъ архистрати́гъ по́сланъ бы́сть къ Тебѣ́, Дѣ́вѣ и Чи́стѣй, возвѣсти́ти Тебѣ́ сло́во спасе́нія, вку́пѣ же и зва́ти Тебѣ́: ра́дуйся, Обра́дованая, Госпо́дь съ Тобо́ю; роди́ши Сы́на превѣ́чнаго изъ Отца́, и спасе́тъ лю́ди Своя́ отъ грѣ́хъ и́хъ.

Анато́ліево: Въ мѣ́сяцъ шесты́й по́сланъ бы́сть съ небесе́ Гавріи́лъ арха́нгелъ во гра́дъ галиле́йскій Назаре́тъ принести́ Отрокови́цѣ ра́дость благовѣ́щенія. И, прише́дъ къ Не́й, возопи́, глаго́ля: ра́дуйся, Обра́дованная, Госпо́дь съ Тобо́ю; ра́дуйся, вмѣсти́лище невмѣсти́маго естества́, Его́же бо небеса́ не вмѣсти́ша, утро́ба Твоя́ вмѣсти́, Благослове́нная; ра́дуйся, честно́е Ада́мово воззва́ніе, и Евино избавле́ніе, и ра́дость мíра, и весе́ліе ро́да на́шего.

По́сланъ бы́сть арха́нгелъ Гавріи́лъ съ небесе́ отъ Бо́га къ Дѣ́вѣ нескве́рнѣй во гра́дъ галиле́йскій Назаре́тъ благовѣсти́ти Ей стра́ннаго о́браза зача́тіе. По́сланъ бы́сть ра́бъ безпло́тенъ ко одушевле́нному гра́ду и две́ри мы́сленнѣй возвѣсти́ти Влады́чняго прише́ствія сни́тіе. По́сланъ бы́сть во́инъ небе́сный ко Пресвяты́я Сла́вы пала́тѣ, проугото́вати Зижди́телю жили́ще неотъе́млемо, и, прише́дъ къ Не́й, взыва́ше: ра́дуйся, престо́ле огнезра́чный, четверозра́чныхъ пресла́внѣйшій; ра́дуйся, сѣда́лище Царя́ Небе́снаго; ра́дуйся, горо́ несѣко́мая, прія́телище пречестно́е, въ Тебѣ́ бо все́ исполне́ніе всели́ся Божества́ тѣле́снѣ благоволе́ніемъ Отца́ присносу́щнаго и содѣ́йствомъ Всесвята́го Ду́ха; ра́дуйся, Обра́дованная, Госпо́дь съ Тобо́ю.

Аще суббо́та или́ недѣ́ля: Сла́ва, гла́съ 8. Іоа́нна мона́ха.

Да веселя́тся небеса́, и ра́дуется земля́, и́бо Отцу́ Соприсносу́щный, Собезнача́льный и Сопресто́льный, щедро́тство пріе́мъ и человѣколю́бную ми́лость, Себе́ поста́ви во истоща́ніе благоволе́ніемъ и совѣ́томъ Отчимъ и во утро́бу всели́ся Дѣви́чу, предочище́нную Ду́хомъ. О, чудесе́! Бо́гъ въ человѣ́цѣхъ, Невмѣсти́мый въ ложесна́хъ, Безлѣ́тный въ лѣ́то, и е́же пресла́внѣе, я́ко и зача́тіе безсѣ́менно, и истоща́ніе несказа́нно, и та́инство ели́ко. Бо́гъ бо истощава́ется, и воплоща́ется, и зи́ждется, а́нгелу къ Чи́стѣй зача́тіе глаго́лавшу: ра́дуйся, Обра́дованная, Госпо́дь съ Тобо́ю, имѣ́яй ве́лію ми́лость.

И ны́нѣ, гла́съ 2:

Благовѣству́етъ Гавріи́лъ Благода́тнѣй дне́сь: ра́дуйся, неневѣ́стная Ма́ти и неискусобра́чная! Не удивля́йся стра́нному моему́ зра́ку, ни ужаса́йся, арха́нгелъ бо е́смь. Змíй прелсти́ Еву иногда́, ны́нѣ же благовѣству́ю Тебѣ́ ра́дость, и пребу́деши нетлѣ́нна, и роди́ши Го́спода, Пречи́стая.

Аще же де́нь по́стенъ: Сла́ва и ны́нѣ: Благовѣству́етъ Гавріи́лъ... Та́же моли́твы обы́чныя бдѣ́нія. И, вше́дше въ хра́мъ, пое́мъ:

На стихо́внѣ стихи́ры самогла́сны, гла́съ 4:

Въ шесты́й мѣ́сяцъ* по́сланъ бы́сть арха́нгелъ* къ Дѣ́вѣ Чи́стѣй* и, ра́доватися Ей прире́къ,* благовѣсти́ изъ Нея́ Изба́вителю проити́.* Тѣ́мже, пріе́мши цѣлова́ніе,* зача́тъ Тя́, Превѣ́чнаго Бо́га,* несказа́нно благоволи́вшаго вочеловѣ́читися* во спасе́ніе ду́шъ на́шихъ.

Сти́хъ: Благовѣсти́те де́нь отъ дне́* спасе́ніе Бо́га на́шего.

Язы́ка, его́же не вѣ́дяше,* услы́ша Богоро́дица:* глаго́лаше бо къ Не́й арха́нгелъ* благовѣ́щенія глаго́лы;* отоню́дуже вѣ́рно,* пріи́мше цѣлова́ніе,* зача́тъ Тя́ Превѣ́чнаго Бо́га.* Тѣ́мже и мы́,* ра́дующеся, вопіе́мъ Ти́:* изъ Нея́ воплоти́выйся* непрело́жно Бо́же,* ми́ръ мíрови да́руй,* и душа́мъ на́шимъ ве́лію ми́лость.

Сти́хъ: Воспо́йте Го́сподеви пѣ́снь но́ву,* воспо́йте Го́сподеви, вся́ земля́.

Се́ воззва́ніе* ны́нѣ яви́ся на́мъ:* па́че сло́ва* Бо́гъ человѣ́комъ соединя́ется,* арха́нгеловымъ гла́сомъ* пре́лесть отгоня́ется.* Дѣ́ва бо пріе́млетъ ра́дость,* земна́я бы́ша не́бо,* мíръ разрѣши́ся пе́рвыя кля́твы.* Да ра́дуется тва́рь,* и гла́сы да воспое́тъ:* Тво́рче и Изба́вителю на́шъ,* Го́споди, сла́ва Тебѣ́.

Сла́ва, и ны́нѣ, гла́съ то́йже. Андре́я Іеросалими́ты:

Дне́сь ра́дость благовѣ́щенія, дѣ́вственное торжество́, ни́жняя съ вы́шними совокупля́ются. Ада́мъ обновля́ется, и Ева пе́рвыя печа́ли свобожда́ется, и сѣ́нь на́шего существа́, обоже́ніемъ пріе́мшаго смѣше́ніе, Це́рковь Бо́жія бы́сть. О, та́инства! Образъ истоща́нія невѣ́домь, бога́тство бла́гости несказа́нно: а́нгелъ слу́житъ чудеси́, дѣви́ча утро́ба Сы́на пріе́млетъ, Ду́хъ Святы́й низпосыла́ется, Оте́цъ свы́ше благоволи́тъ, и измѣне́ніе о́бщимъ твори́тся совѣ́томъ, въ не́мже и и́мже спа́сшеся, вку́пѣ съ Гавріи́ломъ Дѣ́вѣ возопіи́мъ: ра́дуйся, Обра́дованная, изъ Нея́же спасе́ніе — Христо́съ Бо́гъ на́шъ, е́же по на́мъ пріе́мъ естество́, къ Себѣ́ возведе́. Того́ моли́ спасти́ся душа́мъ на́шимъ.

Та́же: Ны́нѣ отпуща́еши.., и по Отче на́шъ...

На благослове́ніи хлѣ́бовъ тропа́рь, гла́съ 4:

Дне́сь спасе́нія на́шего глави́зна и е́же отъ вѣ́ка та́инства явле́ніе: Сы́нъ Бо́жій Сы́нъ Дѣ́вы быва́етъ, и Гавріи́лъ благода́ть благовѣству́етъ. Тѣ́мже и мы́ съ ни́мъ Богоро́дицѣ возопіи́мъ: ра́дуйся, Благода́тная, Госпо́дь съ Тобо́ю. [Три́жды.]

И Бу́ди и́мя Госпо́дне... съ пѣ́ніемъ, [три́жды]. И чте́ніе пра́здника.



НА УТРЕНИ,
На Бо́гъ Госпо́дь: тропа́рь пра́здника, три́жды.

По 1-й каѳи́смѣ о́ба сѣда́льны тріо́ди безъ ектеніи́ и чте́ніе дне́.

По 2-й же каѳи́cмѣ ектенія́ и сѣда́ленъ пра́здника, гла́съ 1. Подо́бенъ: Гро́бъ Тво́й.

Вели́кій воево́да невеще́ственныхъ а́нгелъ, во гра́дъ Назаре́тъ предста́въ, Царя́ возвѣща́етъ Тебѣ́, Пречи́стая, вѣко́въ и Го́спода, ра́дуйся, — глаго́ля Тебѣ́, — благослове́нная Марíе, непости́жимое и несказа́нное чу́до, человѣ́ковъ обновле́ніе.

Сла́ва, и ны́нѣ, то́йже. И чте́ніе пра́здника.

По 3-й каѳи́смѣ сѣда́ленъ, гла́съ 3. Подо́бенъ: Красотѣ́.

Дне́сь вся́ тва́рь ра́дуется, я́ко — е́же ра́дуйся, — Тебѣ́ глаго́летъ арха́нгелъ, благослове́нная, честна́я и пречи́стая Ма́ти Христа́ Бо́га. Дне́сь омрача́ется зміи́но шата́ніе, кля́твы бо пра́отчи разрѣша́ется сою́зъ. Тѣ́мже и непреста́нно вопіе́мъ Ти́: ра́дуйся, Обра́дованная.

Сла́ва, и ны́нѣ, то́йже.
По чте́ніи же даю́тся свѣщи́ бра́тіи.

По поліеле́и сѣда́ленъ, гла́съ 4. Подо́бенъ: Удиви́ся.

Гавріи́лъ съ небесе́, — е́же ра́дуйся, — зове́тъ Честнѣ́й, я́ко зачне́тъ во чре́вѣ Превѣ́чнаго Бо́га, сло́вомъ концы́ соста́вльшаго. Тѣ́мже Маріа́мъ отвѣщава́ше: безму́жна е́смь и ка́ко рожду́ Сы́на? безсѣ́менное рожде́ніе кто́ ви́дѣ? И, сказу́я, глаго́лаше а́нгелъ Богоро́дицѣ и Дѣ́вѣ: на́йдетъ на Тя́ Ду́хъ Святы́й и си́ла Вы́шняго осѣ́нитъ Тя́.

Сла́ва, и ны́нѣ, гла́съ и подо́бенъ то́йже:

По́сланъ бы́сть Гавріи́лъ къ Дѣ́вѣ Марíи и возвѣсти́ Ей неизглаго́ланную ра́дость, я́ко безсѣ́менно зачне́тъ и не истлѣ́етъ: Роди́ши бо Сы́на, Превѣ́чнаго Бо́га, и спасе́тъ лю́ди Своя́ отъ грѣ́хъ и́хъ; и свидѣ́тельствуетъ Посла́вый мя́ вопи́ти Тебѣ́ благослове́нная, е́же ра́дуйся, Дѣ́ва роди́ши, и по рождествѣ́ па́ки пребу́деши Дѣ́ва.

И чте́ніе пра́здника.


Таже степе́нна, 1-й антифо́нъ 4-го гла́са. Проки́менъ, гла́съ 4: Благовѣсти́те де́нь отъ дне́* спасе́ніе Бо́га на́шего. Сти́хъ: Воспо́йте Го́сподеви пѣ́снь но́ву, воспо́йте Го́сподеви, вся́ земля́. Вся́кое дыха́ніе... Ева́нгеліе Луки́, зача́ло 4.

По 50-мъ псалмѣ́ стихи́ра, гла́съ 2. Самогла́сна:

Благовѣству́етъ Гавріи́лъ благода́тнѣй дне́сь: ра́дуйся, Неневѣ́стная Ма́ти, и Неискусобра́чная! не удивля́йся стра́нному моему́ зра́ку, ни ужаса́йся, арха́нгелъ бо е́смь; змíй прельсти́ Еву иногда́, ны́нѣ же благовѣству́ю Тебѣ́ ра́дость, и пребу́деши нетлѣ́нна, и роди́ши Го́спода, Пречи́стая.

Кано́нъ пра́здника, ирмосы́ по два́жды, тропари́ же на 12. Катава́сія пра́здника, о́ба ли́ка вку́пѣ.
А идѣ́же трипѣ́снецъ, та́мо пое́мъ пра́здника со ирмосо́мъ на 6 и трипѣ́снецъ на 8. Катава́сія: ирмо́съ тріо́ди, о́ба ли́ка вку́пѣ.

Кано́нъ, творе́ніе ки́ръ Ѳеофа́на, его́же краегране́сіе по алфави́ту до 8-й пѣ́сни. Гла́съ 4.

Пѣ́снь 1.

Ирмо́съ: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Да пое́тъ Тебѣ́, Влады́чице, движа́ свирѣ́ль духо́вную, Дави́дъ, пра́отецъ Тво́й: послу́шай, Дщи́, ра́дованнаго гла́са отъ а́нгела, ра́дость бо возвѣща́етъ Тебѣ́ неизглаго́ланную.

[Ангелъ:] Вопію́ Тебѣ́, веселя́ся, приклони́ у́хо Твое́, и вонми́ ми́, Бо́жіе возвѣща́ющу безсѣ́менное зача́тіе, обрѣла́ бо еси́ благода́ть предъ Бо́гомъ, ея́же никогда́же обрѣ́те друга́я, Всечи́стая.

[Богоро́дица:] Да разумѣ́ю, а́нгеле, твои́хъ глаго́лъ си́лу, ка́ко бу́детъ, е́же ре́клъ еси́, глаго́ли я́вственнѣйше? Ка́ко зачну́, Дѣ́ва су́щи, Отрокови́ца? ка́ко же и Ма́ти бу́ду Зижди́теля Моего́?

[Ангелъ:] Ле́стно мя́ вѣща́ти помышля́еши, я́ко мню́, и ра́дуюся, зря́ Твое́ утвержде́ніе. Дерза́й, Влады́чице, Бо́гу бо хотя́щу, удо́бь сконча́ются и пресла́вная.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

[Богоро́дица:] Оскудѣ́ кня́зь отъ Іу́ды, вре́мя наста́ про́чее, въ не́же яви́тся язы́ковъ наде́жда, Христо́съ; ты́ же, ка́ко Сего́ рожду́, Дѣ́ва су́щи, скажи́?

[Ангелъ:] Ищеши отъ мене́ увѣ́дѣти, Дѣ́во, о́бразъ зача́тія Твоего́, но то́й несказа́ненъ е́сть: Ду́хъ же Святы́й, зижди́тельною си́лою осѣни́въ Тя́, соверши́тъ.

[Богоро́дица:] Моя́ прама́ти, пріе́мши ра́зумъ зміи́нъ, пи́щи Боже́ственныя изгна́на бы́сть, тѣ́мже и Азъ бою́ся цѣлова́нія стра́ннаго твоего́, стыдя́щися поползнове́нія.

[Ангелъ:] Бо́жій предста́тель, по́сланъ е́смь боже́ственный повѣ́дати Тебѣ́ совѣ́тъ. Что́ мене́ бои́шися, Всенепоро́чная, па́че Тебе́ боя́щагося? Что́ благоговѣ́еши мнѣ́, Влады́чице, Тебѣ́ че́стно благоговѣ́ющему?

Сѣда́ленъ, гла́съ 8. Подо́бенъ: Свирѣ́лей па́стырскихъ.

Сло́во Бо́жіе на зе́млю ны́нѣ сни́де, а́нгелъ предста́, вопія́ Дѣ́вѣ: ра́дуйся, Благослове́нная, Яже печа́тію еди́на сохра́ншися, во утро́бѣ пріе́мши Предвѣ́чнаго Сло́ва и Го́спода, да отъ пре́лести спасе́тъ, я́ко Бо́гъ, ро́дъ человѣ́ческій.

Сла́ва, и ны́нѣ, гла́съ то́йже. Подо́бенъ: Повелѣ́нное.

По́сланъ бы́сть съ небесе́ архистрати́гъ Гавріи́лъ отъ Бо́га, ско́ро предста́ ко одушевле́нному гра́ду, глаго́ля къ Не́й я́вственно: Зижди́теля пріи́меши, Дѣ́во, во утро́бѣ и роди́ши Сего́ непрело́жнѣ съ пло́тію. Тѣ́мже по́сланъ е́смь возвѣсти́ти Тебѣ́ стра́нное Рождество́, Чи́стая, и стою́, зовя́ Тебѣ́: ра́дуйся, Невѣ́сто неневѣ́стная.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

[Богоро́дица:] Свяще́нную нѣ́кую Дѣ́ву ражда́ющую слы́шахъ проро́ка, дре́вле Емману́ила проре́кша; хощу́ же разумѣ́ти, ка́ко Божества́ растворе́ніе, естество́ человѣ́ческое претерпи́тъ?

[Ангелъ:] Яви́ла е́сть купина́, неопа́льна пребы́вши, пріе́мши пла́мень, обра́дованная Всепѣ́тая, на Тебѣ́ та́инства пресла́вное: по рождествѣ́ бо пребу́деши Чи́стая Приснодѣ́ва.

[Богоро́дица:] Освѣща́емь сія́ніемъ Бо́га Вседержи́теля, и́стины проповѣ́дниче, глаго́ли, Гавріи́ле, и́стиннѣйшая: ка́ко, нетлѣ́ннѣ бы́вши чистотѣ́ Мое́й, Сло́ва рожду́, съ пло́тію Безпло́тнаго?

[Ангелъ:] Со стра́хомъ Тебѣ́, я́ко ра́бъ Госпоже́, предстою́, съ боя́знію, Отрокови́це, ны́нѣ смотри́ти стыжду́ся Тебе́, я́ко бо до́ждь на руно́, сни́детъ на Тя́ Сло́во Отчее, я́ко благоволи́.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.

[Богоро́дица:] Разумѣ́ти не могу́ Твои́хъ слове́съ извѣ́стія: чудеса́ бо бы́ша мно́жицею, Боже́ственною си́лою чудодѣ́йствуема, зна́менія и о́бразы зако́нніи, роди́ же дѣ́ва неискусому́жнѣ никогда́же.

[Ангелъ:] Диви́тъ, Всенепоро́чная, и стра́нно бо чу́до Твое́, еди́на бо Ты́ всѣ́хъ Царя́ пріи́меши во утро́бѣ, воплоща́ема, и Тя́ прообразу́ютъ проро́ческая рече́нія, и гада́нія, и зако́нніи о́бразы.

[Богоро́дица:] Всѣ́ми Невмѣсти́мый и всѣ́ми Неви́димый, ка́ко Се́й мо́жетъ во чре́во дѣви́че всели́тися, е́же Са́мъ созда́? Ка́ко же и зачну́ Бо́га Сло́ва, собезнача́льна Отцу́ и Ду́ху?

[Ангелъ:] Къ Твоему́ пра́отцу Дави́ду обѣща́ся посади́ти отъ плода́ Твоего́ чре́ва на престо́лѣ ца́рства его́, Іа́ковлю Тя́ добро́ту, еди́ну избра́ въ слове́сное селе́ніе.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

[Богоро́дица:] Глаго́лъ твои́хъ, Гавріи́ле, гла́съ ра́дованенъ пріе́мши, весе́лія Боже́ственнаго испо́лнихся: ра́дость бо повѣ́даеши и весе́ліе возвѣща́еши безконе́чное.

[Ангелъ:] Тебѣ́ даде́ся ра́дость, Богома́ти Боже́ственная, Тебѣ́, е́же ра́дуйся, вся́ тва́рь вопіе́тъ, Богоневѣ́сто: Ты́ бо еди́на Ма́ти Сы́на Бо́жія пронарече́ся, Чи́стая.

[Богоро́дица:] Евы Мно́ю ны́нѣ да упраздни́тся осужде́ніе, да возда́стся Мно́ю до́лгъ дне́сь, Мно́ю заи́мствованіе дре́внее да да́стся преиспо́лнено.

[Ангелъ:] Обѣща́ся Бо́гъ Авраа́му пра́отцу благослови́тися въ сѣ́мени его́ язы́комъ, Чи́стая, Тобо́ю же коне́цъ обѣща́ніе пріе́млетъ дне́сь.

Конда́къ, гла́съ 8:

Взбра́нной Воево́дѣ побѣди́тельная, я́ко изба́вльшеся отъ злы́хъ, благода́рственная воспису́емъ Ти́, раби́ Твои́, Богоро́дице, но, я́ко иму́щая держа́ву непобѣди́мую, отъ вся́кихъ на́съ бѣ́дъ свободи́, да зове́мъ Ти́: ра́дуйся, Невѣ́сто неневѣ́стная.

Икосъ:

Ангелъ предста́тель съ небесе́ по́сланъ бы́сть рещи́ Богоро́дицѣ: радуйся! и, со безпло́тнымъ гла́сомъ, воплоща́ема Тя́ зря́, Го́споди, ужаса́шеся и стоя́ше, зовы́й къ Не́й такова́я: Ра́дуйся, Еюже ра́дость возсія́етъ; ра́дуйся, Еюже кля́тва исче́знетъ. Ра́дуйся, па́дшаго Ада́ма воззва́ніе; ра́дуйся, сле́зъ Евиныхъ избавле́ніе. Ра́дуйся, высото́, неудобовосходи́мая человѣ́ческими по́мыслы; ра́дуйся, глубино́, неудобозри́мая и а́нгельскима очи́ма. Ра́дуйся, я́ко еси́ Царе́во сѣда́лище; ра́дуйся, я́ко но́сиши Нося́щаго вся́. Ра́дуйся, звѣздо́, явля́ющая Со́лнце; ра́дуйся, утро́бо Боже́ственнаго воплоще́нія. Ра́дуйся, Еюже обновля́ется тва́рь; ра́дуйся, Еюже покланя́емся Творцу́. Ра́дуйся, Невѣ́сто неневѣ́стная.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

[Богоро́дица:] Свѣ́тъ невеще́ственный повѣ́дая, въ веще́ственнѣ тѣлеси́ совокупля́емь за милосе́рдіе мно́гое, свѣ́тлое благовѣ́щеніе, Боже́ственная проповѣ́данія, ны́нѣ взыва́еши Ми́: благослове́нъ, Всечи́стая, Пло́дъ Твоего́ чре́ва.

[Ангелъ:] Ра́дуйся, Влады́чице Дѣ́во, ра́дуйся Пречи́стая, ра́дуйся, прія́телище Бо́жіе, ра́дуйся свѣ́щниче Свѣ́та, Ада́мово воззва́ніе, Евы избавле́ніе, горо́ свята́я, прея́вственное свяще́ніе и черто́гъ безсме́ртія.

[Богоро́дица:] Ду́шу очи́сти, тѣ́ло освяти́, це́рковь сотвори́ Мя вмѣсти́тельну Бо́га, ски́нію богоукра́шену, одушевле́нъ хра́мъ наи́тіемъ Пресвята́го Ду́ха и Жи́зни чи́стую Ма́терь.

[Ангелъ:] Яко многосвѣ́тлую свѣщу́, и богодѣ́ланенъ черто́гъ, ви́жу Тя́ ны́нѣ, я́ко зла́тъ киво́тъ, зако́на Пода́теля пріими́, Богоневѣ́сто, благоизво́лившаго человѣ́ческое изба́вити Тобо́ю тлѣ́нное существо́.

Пѣ́снь 8.

Ирмо́съ: Слы́ши, Отрокови́це, Дѣ́во чи́стая, да рече́тъ у́бо Гавріи́лъ, совѣ́тъ Вы́шняго дре́вній и́стинный: бу́ди къ прія́тію гото́ва Бо́жію, Тобо́ю бо Невмѣсти́мый съ человѣ́ки поживе́. Тѣ́мъ и, ра́дуяся, вопію́: благослови́те, вся́ дѣла́ Госпо́дня, Го́спода.

[Богоро́дица:] Умъ вся́къ побѣжда́ется земны́хъ, — отвѣща́ Дѣви́ца, — и́щущи, я́же Мнѣ́ вѣща́еши, пресла́вная: слы́шахъ твоя́ словеса́, но бою́ся, ужаса́ющися, да не ле́стію Мя́, я́ко Еву, дале́че по́слеши отъ Бо́га. Но оба́че се́ вопію́: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

[Ангелъ:] Се́ Тебѣ́ недоумѣ́нное разрѣши́тся, — глаго́летъ къ си́мъ Гавріи́лъ, — до́брѣ бо рекла́ еси́, ве́щь неудобопости́жна. Словесе́мъ Твои́хъ усте́нъ повину́ющися про́чее, не сумни́ся, я́ко ле́сти, я́коже ве́щи, вѣ́руй. Азъ бо, ра́дуяся, вопію́: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

[Богоро́дица:] Зако́нъ се́й отъ Бо́га е́сть человѣ́комъ, — Непоро́чная а́біе глаго́летъ, — отъ о́бщія любве́ рождество́ происхо́дитъ. Не вѣ́мъ супру́жника сла́сти всеконе́чно, ка́ко у́бо глаго́леши, я́ко рожду́? Бою́ся, еда́ ле́сть глаго́леши? Но оба́че се́ вопію́: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

[Ангелъ:] Глаго́лы, я́же мнѣ́ вѣща́еши, Чи́стая, — а́нгелъ па́ки глаго́летъ, — обы́чая е́сть рождества́ человѣ́ковъ сме́ртныхъ; и́стинно Бо́га Тебѣ́ обѣщава́ю, па́че сло́ва же и смы́сла воплоща́ема, я́ко вѣ́сть, изъ Тебе́. Тѣ́мже и, ра́дуяся, вопію́: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

[Богоро́дица:] Явля́ешися Мнѣ́ и́стины вѣща́тель, — рече́ Дѣ́ва, — ра́дости бо о́бщія прише́лъ еси́ благовѣ́стникъ. Ду́шу у́бо очи́стихъ съ тѣ́ломъ, и по глаго́лу твоему́ бу́ди Мнѣ́, да всели́тся Бо́гъ въ Мя́, къ Нему́же вопію́ съ тобо́ю: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

На 9-й пѣ́сни па́ки вжига́ютъ свѣщи́ бра́тія.

Честнѣ́йшую... не пое́мъ, но пое́мъ припѣ́въ пра́здника: Благовѣству́й земле́ ра́дость ве́лію, хвали́те небеса́, Бо́жію сла́ву. Та́же ирмо́съ: Яко одушевле́нному... Подо́бнѣ и 2-й ли́къ припѣ́въ и ирмо́съ. И къ про́чимъ тропаре́мъ пра́здника то́йже припѣ́въ. У трипѣ́снца же къ тропаре́мъ припѣва́емъ: Сла́ва Тебѣ́, Бо́же на́шъ, сла́ва Тебѣ́. Къ богоро́дичнымъ припѣва́емъ припѣ́въ пра́здника.

Пѣ́снь 9.

Ирмо́съ: Яко одушевле́нному Бо́жію киво́ту, да ника́коже ко́снется рука́ скве́рныхъ. Устнѣ́ же вѣ́рныхъ, Богоро́дицѣ, немо́лчно, гла́съ а́нгела воспѣва́юще, съ ра́достію да вопію́тъ: ра́дуйся, Благода́тная, Госпо́дь съ Тобо́ю.

Па́че смы́сла заче́нши Бо́га, естества́ обы́чая утаи́ся, Отрокови́це! Ты́ бо въ Рождествѣ́ ма́терскаго избѣжа́ла еси́ тлѣ́ннаго естества́ и превы́шши су́щи. Тѣ́мже досто́йно слы́шиши: ра́дуйся, Благода́тная, Госпо́дь съ Тобо́ю.

Ка́ко то́чиши млеко́, Дѣ́во Чи́стая, не мо́жетъ изрещи́ язы́къ зе́мленъ; стра́нну бо естества́ показу́еши ве́щь, зако́ннаго рождества́ уста́въ прехо́диши. Тѣ́мже досто́йно слы́шиши: ра́дуйся, Благода́тная, Госпо́дь съ Тобо́ю.

Та́йно во свяще́нныхъ писа́ніихъ глаго́лася о Тебѣ́, Ма́ти Вы́шняго, лѣ́ствицу бо дре́вле Іа́ковъ Тя́ образу́ющую, ви́дѣвъ, рече́: степе́нь Бо́жія сія́. Тѣ́мже досто́йно слы́шиши: ра́дуйся, Благода́тная, Госпо́дь съ Тобо́ю.

Чу́дное священноявле́нному Моисе́ю купина́ и о́гнь показа́ чу́до, ища́й же конца́ въ прехожде́ніи време́нъ, во Отрокови́це чи́стѣй, рече́, узрю́. Ейже, я́ко Богоро́дицѣ, да рече́тся: ра́дуйся, Благода́тная, Госпо́дь съ Тобо́ю.

Даніи́лъ Тя́ го́ру нарече́ мы́сленную, роди́тельницу же Бо́жію Иса́ія, ви́дитъ же я́ко руно́, Гедео́нъ, Дави́дъ же свяще́ніе глаго́летъ, две́рь же Тя́ и́нъ. Гавріи́лъ же Тебѣ́ взыва́етъ: ра́дуйся, Благода́тная, Госпо́дь съ Тобо́ю.

Та́же ирмо́съ тріо́ди, и пра́здника припѣ́въ, и ирмо́съ о́ба ли́ка вку́пѣ.

Свѣти́ленъ. Подо́бенъ: Со ученики́.

Ангельскихъ си́лъ архистрати́гъ по́сланъ бы́сть отъ Бо́га Вседержи́теля къ Чи́стѣй и Дѣ́вѣ благовѣсти́ти стра́нное и неизрече́нное чу́до: зане́ Бо́гъ, я́ко Человѣ́къ, изъ Нея́ младодѣ́йствуется безъ сѣ́мене, назида́яй ве́сь человѣ́ческій ро́дъ. Лю́діе, благовѣсти́те обновле́ніе мíра. [Два́жды.]

Сла́ва, и ны́нѣ. Инъ свѣти́ленъ. Подо́бенъ: Жены́, услы́шите.

Еже отъ вѣ́ка дне́сь открыва́ется та́инство Бо́жіе: Бо́гъ Сло́во Сы́нъ Дѣ́вы Марíи за милосе́рдіе быва́етъ, и ра́дость благовѣ́щенія Гавріи́лъ провѣщава́етъ; съ ни́мже вопіе́мъ Ей: ра́дуйся, Ма́ти Госпо́дня.

На хвали́техъ Вся́кое дыха́ніе... и пое́мъ стихи́ры, на 4. Гла́съ 1. Подо́бенъ: Небе́сныхъ чино́въ.

Съ небе́сныхъ круго́въ слетѣ́въ Гавріи́лъ въ Назаре́тъ,* пріи́де къ Дѣ́вѣ Марíи,* вопія́ Ей: ра́дуйся!* Зачне́ши Сы́на, Ада́ма дре́внѣйшаго,* Творца́ вѣко́въ и Изба́вителя,* вопію́щихъ Тебѣ́: ра́дуйся, Чи́стая.

Соприсносу́щное Сло́во Пребезнача́льного Отца́,* не разлучи́вся го́рнихъ,* ны́нѣ предста́ до́льнимъ, ра́ди кра́йняго благоутро́бія,* ми́лость пріе́мь, е́же на ны́ поползнове́нія,* и, Ада́мову нищету́ вопріе́мь,* вообрази́ся въ чужде́е.

Гавріи́лъ, Дѣ́вѣ благовѣ́стіе съ небесе́ прине́съ,* вопія́ше: ра́дуйся!* Заче́нши во чре́вѣ Твое́мъ, Тобо́ю вмѣсти́маго,* невмѣсти́маго же всѣ́ми,* и ражда́ющая яви́шися,* отъ Отца́ пре́жде денни́цы Возсія́вшаго.

Пресу́щественное Сло́во,* пло́тію всели́вся въ Тя́* Отчимъ совѣ́томъ, Богоро́дице Дѣ́во,* назда́ ро́дъ, и́же по на́мъ,* па́дшій отъ дре́внія кля́твы.* Тѣ́мъ — е́же ра́дуйся — Тебѣ́ вси́, Ма́ти Христо́ва,* со а́нгеломъ вопіе́мъ вѣ́рно.

Сла́ва, и ны́нѣ, гла́съ 2. Ѳеофа́ново:

Еже отъ вѣ́ка та́инство открыва́ется дне́сь, и Сы́нъ Бо́жій Сы́нь человѣ́чь быва́етъ, да, ху́ждшее воспріе́мь, пода́стъ ми́ лу́чшее. Солга́ся дре́вле Ада́мъ, и Бо́гъ возжелѣ́въ бы́ти, не бы́сть: Человѣ́къ быва́етъ Бо́гъ, да бога Ада́ма содѣ́лаетъ. Да весели́тся тва́рь, да ликовству́етъ естество́, я́ко арха́нгелъ Дѣ́вѣ со стра́хомъ предстои́тъ, и — е́же, ра́дуйся — прино́ситъ, печа́ли сопроти́вное. За милосе́рдіе ми́лости вочеловѣ́чивыйся, Бо́же на́шъ, сла́ва Тебѣ́.

Аще е́сть суббо́та или́ недѣ́ля: Славосло́віе вели́кое, и ектеніи́ и отпу́стъ.
Аще же де́нь по́стенъ: пое́мъ на стихо́внѣ тріо́ди самогла́сенъ дне́, два́жды, и му́чениченъ.
Сла́ва, и ны́нѣ, пра́здника, гла́съ 8:

Да веселя́тся небеса́, и ра́дуется земля́, и́бо Отцу́ Соприсносу́щный, Собезнача́льный и Сопресто́льный, щедро́тство пріе́мъ и человѣколю́бную ми́лость, Себе́ поста́ви во истоща́ніе благоволе́ніемъ и совѣ́томъ Отчимъ и во утро́бу всели́ся Дѣви́чу, предочище́нную Ду́хомъ. О, чудесе́! Бо́гъ въ человѣ́цѣхъ, Невмѣсти́мый въ ложесна́хъ, Безлѣ́тный въ лѣ́то, и е́же пресла́внѣе, я́ко и зача́тіе безсѣ́менно, и истоща́ніе несказа́нно, и та́инство ели́ко. Бо́гъ бо истощава́ется, и воплоща́ется, и зи́ждется, а́нгелу къ Чи́стѣй зача́тіе глаго́лавшу: ра́дуйся, Обра́дованная, Госпо́дь съ Тобо́ю, имѣ́яй ве́лію ми́лость.

Та́же: Бла́го е́сть.., еди́ножды. По Отче на́шъ..: тропа́рь пра́здника, и ектенія́, въ коне́цъ три́ покло́ны вели́кія, безъ отпу́ста у́трени; дае́тся же и святы́й еле́й бра́тіи, и пое́тся стихи́ра самогла́сна, и ча́съ 1-й съ каѳи́смою. Тропа́рь и конда́къ пра́здника, и въ коне́цъ три́ покло́ны вели́кія, и моли́тва: Христе́, Свѣ́те и́стинный... и отпу́стъ.

Въ 3-й же ча́съ дне́ исхо́димъ со кресты́ съ литíею внѣ́ монастыря́ и, возвра́щшеся, вхо́димъ въ тра́пезу и пое́мъ ча́съ 3-й и 6-й съ каѳи́смами безъ покло́новъ, тропа́рь и конда́къ пра́здника. На часѣ́хъ же въ кампа́нъ не ударя́емъ; на 6-мъ часѣ́ пое́мъ тропа́рь пареміи́ тріо́ди и про́чая, по чи́ну и́хъ, и паремíя и чте́мъ сло́во, ему́же нача́ло: Па́ки ра́дость Благовѣ́щенія... Присовокупля́емъ же и 9-й ча́съ съ каѳи́смою и чте́ніемъ. Посе́мъ: блаже́нна ско́ро безъ пѣ́нія и безъ покло́новъ. Помяни́ на́съ, Го́споди... Ли́къ небе́сный... Сла́ва: Ли́къ святы́хъ а́нгелъ... Осла́би, оста́ви... По Отче на́шъ..: конда́къ пра́здника. Го́споди, поми́луй, 40. Сла́ва, и ны́нѣ. Честнѣ́йшую херуви́мъ... И покло́ны три́ вели́кія и моли́тва: Всесвята́я Тро́ице... и отпу́стъ. И пое́мъ вече́рню безъ каѳи́смы и безъ покло́новъ.


[НА ЛИТУРГІИ, НАЧИНАЮЩЕЙСЯ ВЕЧЕРНЕЙ,]
На Го́споди воззва́хъ: пое́мъ тріо́ди самогла́сенъ дне́, два́жды, безъ му́ченична, и подо́бны тріо́ди три́, и пра́здника три́, и арха́нгела три́.

Стихи́ры пра́здника, гла́съ 4. Самогла́сны:

Въ шесты́й мѣ́сяцъ* по́сланъ бы́сть арха́нгелъ* къ Дѣ́вѣ Чи́стѣй* и, ра́доватися Ей прире́къ,* благовѣсти́ изъ Нея́ Изба́вителю проити́.* Тѣ́мже, пріе́мши цѣлова́ніе,* зача́тъ Тя́, Превѣ́чнаго Бо́га,* несказа́нно благоволи́вшаго вочеловѣ́читися* во спасе́ніе ду́шъ на́шихъ.

Язы́ка, его́же не вѣ́дяше,* услы́ша Богоро́дица:* глаго́лаше бо къ Не́й арха́нгелъ* благовѣ́щенія глаго́лы;* отоню́дуже вѣ́рно,* пріи́мше цѣлова́ніе,* зача́тъ Тя́ Превѣ́чнаго Бо́га.* Тѣ́мже и мы́,* ра́дующеся, вопіе́мъ Ти́:* изъ Нея́ воплоти́выйся* непрело́жно Бо́же,* ми́ръ мíрови да́руй,* и душа́мъ на́шимъ ве́лію ми́лость.

Се́ воззва́ніе* ны́нѣ яви́ся на́мъ:* па́че сло́ва* Бо́гъ человѣ́комъ соединя́ется,* арха́нгеловымъ гла́сомъ* пре́лесть отгоня́ется.* Дѣ́ва бо пріе́млетъ ра́дость,* земна́я бы́ша не́бо,* мíръ разрѣши́ся пе́рвыя кля́твы.* Да ра́дуется тва́рь,* и гла́сы да воспое́тъ:* Тво́рче и Изба́вителю на́шъ,* Го́споди, сла́ва Тебѣ́.

Арха́нгела стихи́ры, гла́съ 1. Подо́бенъ: Всехва́льніи му́ченицы.

Гавріи́лъ вели́кій,* у́мъ богови́днѣйшій,* свѣтоза́рный и спаси́тельный,* Свѣ́тъ Трисо́лнечный зри́тъ* и пое́тъ съ вы́шними чи́ны* боже́ственное и стра́шное пѣ́ніе,* мо́литъ дарова́ти душа́мъ на́шимъ* ми́ръ и ве́лію ми́лость.

Вели́кое та́инство,* пе́рвѣе а́нгеломъ невѣ́домое,* и пре́жде вѣ́къ соблюда́емое,* еди́ному увѣ́рися тебѣ́, Гавріи́ле,* и сіе́ еди́нѣй повѣ́далъ еси́ Чи́стѣй,* въ Назаре́тъ прише́дъ.* Съ Не́юже моли́* дарова́ти душа́мъ на́шимъ* ми́ръ и ве́лію ми́лость.

Къ 11-му стиху́ припѣ́въ: Творя́й а́нгелы Своя́ ду́хи,* и слуги́ Своя́ пла́мень о́гненный.

Свѣ́та сы́й испо́лнь при́сно* и творя́ хотѣ́ніе,* и скончава́я повелѣ́нія Вседержи́теля,* нача́льниче а́нгеловъ,* Гавріи́ле всеизря́дне,* любо́вію тя́ чту́щія спаса́й,* при́сно прося́* дарова́ти душа́мъ на́шимъ* ми́ръ и ве́лію ми́лость.

Сла́ва, и ны́нѣ, гла́съ 6. Самогла́сенъ:

По́сланъ бы́сть съ небесе́ Гавріи́лъ арха́нгелъ, благовѣсти́ти Дѣ́вѣ зача́тіе и, прише́дъ въ Назаре́тъ, помышля́ше въ себѣ́, чудеси́ удивля́яся: О, ка́ко, въ вы́шнихъ непостижи́мь Сы́й отъ Дѣ́вы ражда́ется! имѣ́яй престо́лъ не́бо и подно́жіе зе́млю, во утро́бу вмѣща́ется Дѣ́вичу! на Него́же шестокрила́тіи и многоочи́тіи зрѣ́ти не мо́гутъ, сло́вомъ еди́нѣмъ отъ Сея́ воплоти́тися благоизво́ли. Бо́жіе е́сть Сло́во настоя́щее. Что́ у́бо стою́, и не глаго́лю Дѣ́вѣ: ра́дуйся, Благода́тная, Госпо́дь съ Тобо́ю; ра́дуйся, Чи́стая Дѣ́во; ра́дуйся Невѣ́сто неневѣ́стная; ра́дуйся, Ма́ти Живота́, благослове́нъ пло́дъ чре́ва Твоего́!

Іере́й же твори́тъ проскоми́дію въ стихи́ры.

Вхо́дъ со Ева́нгеліѣмъ. Свѣ́те ти́хій... Проки́менъ, и чте́нія дне́, и пра́здника два́: 1) Вни́де Моисе́й... 2) Госпо́дь созда́ мя... Та́же ектенія́ ма́лая, и возгла́съ трисвята́го: Яко Свя́тъ еси́, Бо́же на́шъ... и трисвято́е. Проки́менъ, гла́съ 4: Благовѣсти́те де́нь отъ дне́* спасе́ніе Бо́га на́шего. Сти́хъ: Воспо́йте Го́сподеви пѣ́снь но́ву, воспо́йте Го́сподеви, вся́ земля́. Апо́столъ ко Евре́емъ, зача́ло 306: Бра́тіе, святя́й и освяща́еміи... Аллилу́ія, гла́съ 1: Сни́детъ, я́ко до́ждь на руно́, и, я́ко ка́пля, ка́плющая на зе́млю. Сти́хъ: Бу́детъ и́мя Его́ благослове́но во вѣ́ки, пре́жде со́лнца пребыва́етъ и́мя Его́. Ева́нгеліе Луки́, зача́ло 3: Во дне́хъ о́нѣхъ зача́тъ Елисаве́тъ... и про́чая Боже́ственныя Литургíи Златоу́стаго. Вмѣ́сто Досто́йна, пое́мъ ирмо́съ: Яко одушевле́нному... Прича́стенъ: Избра́ Госпо́дь Сіо́на и изво́ли его́ въ жили́ще Себѣ́.


Іоа́нна по́стника:

[Зри́:] Обрѣта́емъ въ нѣ́кіихъ ти́пицѣхъ, е́же пѣ́тися въ се́мъ дни́ честна́го сего́ пра́здника: Да испра́вится моли́тва моя́..; и сіе́ не вѣ́мъ, кíимъ нра́вомъ опредѣли́ся. Нѣ́ціи бо изъ произволе́нія и неуче́нія мно́гая приложи́ша. Азъ же, я́ко мню́, сіе́ не попуща́ти въ Златоу́стаго соверше́нной Литургíи, и въ 6-мъ часѣ́, и проскоми́діи бы́вшей. Глаго́летъ бо, въ яково́мъ дни́ случи́тся пра́здникъ Боже́ственнаго Благовѣ́щенія, Литургíя Златоу́стаго, и на трапе́зѣ разрѣше́ніе ры́бъ, яко́въ а́ще де́нь случи́тся. Сіе́ бо прія́хомъ отъ боже́ственныхъ отце́въ, е́же я́сти ры́бы въ де́нь Боже́ственнаго Благовѣ́щенія. Да испра́вится... же, въ преждесвяще́нныхъ Литургíи зачини́ся пѣ́ти, и въ 9-мъ часѣ́, не бо́ тре́бствуетъ ко́ему пла́ча зна́менію въ се́мъ дни́ пѣ́тися, честву́емъ бо то́й я́ко глави́зну на́шего спасе́нія.


Аще вели́кія ра́ди ну́жды нѣ́сть Литургíи.

[Зри:] На Го́споди воззва́хъ: стихи́ры тріо́ди подо́бны 3, и пра́здника 4, и арха́нгела 3. Сла́ва, и ны́нѣ, пра́здника. Вхо́дъ, проки́менъ и чте́нія дне́ и пра́здника 2. Та́же проки́менъ, Апо́столъ и Ева́нгеліе пра́здника и по чте́ніи: Сподо́би, Го́споди... На стихо́внѣ тріо́ди самогла́сенъ дне́, два́жды, и му́чениченъ. Сла́ва, и ны́нѣ: Дне́сь ра́дость... По Ны́нѣ отпуща́еши..: Тропа́рь арха́нгела. Сла́ва, и ны́нѣ, пра́здника. Ектенія́, и три покло́ны вели́кія, и отпу́стъ. На трапе́зѣ быва́етъ утѣше́ніе бра́тіи ве́ліе, яди́мъ ры́бы, и піе́мъ вино́, въ кíй-ли́бо де́нь случи́тся, еди́ножды дне́мъ, кромѣ́ суббо́ты и недѣ́ли.

Повече́ріе пое́мъ ма́лое въ притво́рѣ поско́ру, безъ покло́новъ и кано́на, то́чію на Сла́ва въ вы́шнихъ... три́ покло́ны, и по трисвято́мъ три́ покло́ны, и по Честнѣ́йшую... три́ покло́ны вели́кія съ моли́твою: Го́споди и Влады́ко... и про́чія 12 и на послѣ́днемъ трисвято́мъ три́ покло́ны и опту́стъ.


[Зри́:] Уста́въ ма́рковыхъ гла́въ, ка́ко соверша́ти слу́жбу Благовѣ́щенію въ кíй-ли́бо де́нь вели́кія Четыредеся́тницы и Страстны́я седми́цы зри́ въ типико́нѣ и въ тріо́ди по́стной. Въ дни́ же Свѣ́тлыя седми́цы — въ типико́нѣ и въ тріо́ди Цвѣтно́й. [1]

Примѣчаніе:
[1] См.: Мине́я пра́здничная, имену́емая Анѳоло́гіонъ, содержа́щая слу́жбы Госпо́дскимъ и Богоро́дичнымъ пра́здникомъ и святы́мъ избра́ннымъ. М.: Сѵнода́льная Тѵпогра́фія, 1901. Л. 288.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 120 – 132.

/ Къ оглавленію раздѣла /


Наверхъ / Къ титульной страницѣ

0