Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 23-й де́нь.
Свята́го преподобному́ченика Ни́кона и дву́ сту́ учени́къ его́, съ ни́мъ му́чившихся.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Яко до́бля.

Сла́сти тѣле́сныя* и пло́ти непоко́рное* браздо́ю повину́лъ еси́, блаже́нне,* воздержа́нія, благода́тію* побѣди́въ, я́ко хра́бръ, всеору́жіе врага́* си́лою Ду́ха.* Отону́дуже во́ждь бы́лъ еси́ мона́шествующихъ,* послѣ́дующихъ всему́дрому твоему́* и боже́ственному, Ни́коне,* проповѣ́данію всегда́.

Возсія́въ, я́ко со́лнце* отъ восто́ка, всесла́вне,* вселе́нную всю́ просвѣти́лъ еси́* чуде́съ свѣ́тлостію,* ли́къ приводя́, я́ко звѣ́здъ свѣ́тлыхъ, ученико́въ твои́хъ.* Съ ни́миже пострада́лъ еси́ крѣ́пко,* мечи́ посѣ́чени бы́вше,* и въ ру́цѣ Всецаря́ Влады́ки* ва́ша ду́ши положи́вше.

Ни гла́дъ, ниже́ бѣда́,* ни нагота́, ни ра́ны,* ни ну́жнѣйшая вои́стинну сме́рть,* ва́съ отъ любве́ Бо́жія* отлучи́ти возмо́же, досточу́дніи,* но я́ко а́гнцы на заколе́ніе,* па́стырю послѣ́дующе,* отъ за́пада къ невече́рнему поко́ю* небе́снаго Ца́рствія,* страстоте́рпцы вѣнцено́сцы, достиго́сте.

Сла́ва, и ны́нѣ, богоро́диченъ, гла́съ и подо́бенъ то́йже:

Осужде́нія изба́ви, Пресвята́я Богоневѣ́сто,* и лю́тыхъ прегрѣше́ній* смире́нную мою́ ду́шу,* и сме́рти измѣни́ моли́твами Твои́ми,* и да́руй оправда́ніе получи́ти* въ де́нь испыта́нія,* е́же получи́ша святы́хъ собо́ри,* покая́ніемъ очище́на мя́ пре́жде конца́ покажи́* и сле́зными излія́ніи.

Крестобогоро́диченъ, подо́бенъ то́йже:

На Крестѣ́ Тя я́ко узрѣ́* пригвожде́на, Го́споди,* Агница и Ма́ти Твоя́ дивля́шеся,* и — что́ видѣ́ніе сіе́, — взыва́ше, —* Сы́не вожделѣ́нне?* Сія́ Ти́ непокори́вый собо́ръ воздаде́ беззако́нный,* и́же мно́гихъ Твои́хъ чуде́съ наслади́выйся.* Но сла́ва неизглаго́ланному* соше́ствію Твоему́, Влады́ко.


[НА УТРЕНИ,]
Кано́нъ, его́же краегране́сіе: Побѣ́ды тя́ пою́ тезоимени́таго, блаже́нне. Іо́сифъ. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Побѣди́въ по́стническими боре́ніи злоко́зненнаго, страда́льческими вѣнча́лся еси́ добро́тами и Бо́гу ны́нѣ предстои́ши, о на́съ моля́ся, преподо́бне Ни́коне, чту́щихъ тя́.

Крѣ́постію на́ша не́мощи укрѣпи́вшаго возмо́гъ, хра́бровалъ еси́ пре́жде во бранѣ́хъ, блаже́нне, и, побѣди́тель бы́въ, ко Христо́ву притека́еши креще́нію.

Украша́ется муче́ніемъ по́лкъ блаже́ннѣйшій учени́къ твои́хъ, пе́рвѣе му́дре просвѣ́щся поще́ньми, и сугу́быми боре́ніи сугу́бы вѣнцы́ исплете́.

Богоро́диченъ: Две́рь, я́же къ на́мъ Твоего́, Го́споди, сни́тія, восто́ка, и со́лнце, и свѣ́тъ, та́инственно Тя́ нарица́емаго, преесте́ственно роди́ сугу́ба естество́мъ Невмѣ́стнаго.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Во́инствомъ духо́внымъ препоя́санъ, во́инство боже́ственное, му́чениче Христо́въ, вооружи́лъ еси́ ко страда́нія подвиго́мъ.

Распя́въ по́стнически пло́ть, всесла́вне, пе́рвѣе, потща́лся еси́ страда́льческими ра́нами полки́ де́монскія побѣди́ти.

Отъ восто́ка я́коже звѣзда́, Ни́коне, прише́дъ, къ за́падомъ дости́глъ еси́. Тѣ́мже, у́меръ, заше́лъ еси́ и ко Христу́ возсія́лъ еси́.

Богоро́диченъ: Му́ченическій собо́ръ Твое́ изобрази́ заколе́ніе, Влады́ко, позна́въ Тя́, изъ Отрокови́цы Неискусобра́чныя прозя́бша.

Сѣда́ленъ, гла́съ 4. Подо́бенъ: Ско́ро предвари́.

Преподо́бно пожи́въ, Ни́коне, пе́рвѣе, и ли́къ собра́лъ еси́ богопокори́выхъ, благоче́стно при́сно послѣ́дующихъ тебѣ́, отъ восто́ка къ за́паду возсія́въ, я́коже со́лнце свѣтоно́сно, заря́ми страда́ній, гно́емъ крове́й ва́шихъ пре́лесть ума́ливше.

Сла́ва, и ны́нѣ, богоро́диченъ:

Дѣ́во Всенепоро́чная, Яже пресу́щнаго Бо́га ро́ждшая, со безпло́тными Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

Крестобогоро́диченъ:

На Крестѣ́ Тя возвы́шена я́ко узрѣ́ Пречи́стая Ма́ти Твоя́, Сло́ве Бо́жій, ма́терски рыда́ющи, вѣща́ше: что́ но́вое и стра́нное сіе́ чу́до, Сы́не Мо́й? Ка́ко, Жи́знь всѣ́хъ, вкуша́еши сме́рти, оживи́ти ме́ртвыя хотя́, я́ко Милосе́рдъ?

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Наслажда́яся Боже́ственными свѣтоли́тіи, му́къ тече́нія неуя́звленъ преше́лъ еси́, Ни́коне досточу́дне, и побѣ́ды вѣне́цъ, му́чениче, досто́йно прія́лъ еси́.

Свѣтлостьми́ прелѣ́потствуя до́блестей, я́ко по́стникъ подвиза́лся еси́, стра́сти умертви́въ пе́рвѣе тѣле́сныя страда́ніемъ, второ́е де́монскія побѣди́въ полки́.

Ополчи́стеся ору́жіемъ благоче́стія на врага́, богому́дріи, и сме́ртію сла́вною безсме́ртіе прія́сте, пою́ще: сла́ва си́лѣ Твое́й, Го́споди.

Богоро́диченъ: Яко су́щу тва́ри вы́шшу Творе́цъ возлюби́въ, о Дѣ́во Ма́ти, показа́ Тя́ Ма́терь Себѣ́, Юже ны́нѣ мо́лятъ собо́ри страда́лецъ благолѣ́пнѣйше.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Боже́ственнымъ твоея́ ма́тере благоповину́яся наказа́ніемъ, си́лу, Ни́коне, имѣ́лъ еси́ кре́стную во бранѣ́хъ, науча́яся лу́чшимъ.

Житіе́ твое́, свѣ́томъ добродѣ́телей просвѣща́емо, страда́ніе, я́коже у́тварь благолѣ́пнѣйшу, и́мать, богому́дре и всече́стне.

Зако́номъ богонача́льнымъ повину́ющеся, му́ченицы хра́бровавше и беззако́нныя Бо́жіимъ посо́біемъ му́жески побѣди́ша.

Богоро́диченъ: Свѣ́тъ безлѣ́тный на́мъ, Отчее сія́ніе, родила́ еси́, подлѣ́тна бога́тствомъ бла́гости бы́вша, Всенепоро́чная.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Отъ восто́ка, я́ко многосвѣ́тлое устреми́лся еси́ со́лнце, я́коже звѣ́зды, богому́дре, ученико́въ ли́къ приводя́, и за́падъ заря́ми ва́шими просвѣти́сте.

Ка́плями крове́й твои́хъ, му́чениче, потопи́лъ еси́ многобо́жія мо́ре и глубино́ю по́двиговъ удави́лъ еси́ зло́бы лю́таго обрѣта́теля и вселука́ваго.

Яко кри́нъ, во страда́ніи зла́чнѣмъ процвѣто́сте, и, я́ко сладкодыха́тельный ши́покъ, на́ша сердца́ благоуха́ете муче́нія добро́тами, страстоте́рпцы богодухнове́нніи.

Богоро́диченъ: Хра́мъ Тя́ Бо́жій и пала́ту одушевле́нну страстоте́рпческій ли́къ позна́въ, Влады́чице, мо́литъ Тя́, еди́ну же́нъ отъе́мшую поно́съ.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Па́че зла́та искуси́вся, богому́дре, ра́нами, сто́лпъ добродѣ́телей яви́лся еси́, напа́денія де́монская отгоня́: благослове́нъ еси́, Бо́же мо́й, — зовы́й, — и Го́споди оте́цъ на́шихъ.

По кончи́нѣ пове́ржено твое́ тѣ́ло, му́чениче, та́йно, Боже́ственныя врачева́ній испуща́я свѣ́тлости, отго́нитъ вре́дъ де́монскій, тя́ явле́ннаго Боже́ственною сотво́ршаго си́лою.

Ве́сь Боже́ственными наслади́вся, всеблаже́нне, манове́ньми, тѣ́ло ра́намъ пре́далъ еси́ терпѣли́вно, вѣнцено́сецъ же предстои́ши Вседержи́телю на небесѣ́хъ, я́ко возжела́лъ еси́, преподо́бне.

Па́стырь ове́цъ сы́й слове́сныхъ, му́дре, отъ волко́въ мы́сленныхъ соблю́лъ еси́ невре́дны и, съ си́ми въ небе́снѣй огра́дѣ всели́вся, жела́ній кра́йнѣйшему предстои́ши.

Богоро́диченъ: Не растли́въ дѣ́вства Твоего́, Отрокови́це, отню́дъ, Сло́во Отчее въ Тя́ всели́ся, и му́чениковъ лобыза́ ли́къ сла́вный, Богоро́дицу Тя́ чи́стую проповѣ́дающъ.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Недрема́нно нося́ сія́ніе се́рдца твоего́, напое́но сле́зъ пото́ки, преподо́бне, и страда́нія кровьми́, въ нерукотворе́ннѣмъ, вопія́, черто́зѣ ны́нѣ живе́ши: благослови́те, вся́ дѣла́ Госпо́дня, Го́спода.

Красота́ по́стниковъ и страда́льцевъ показа́лся еси́, преподо́бне, во обои́хъ бо благоизво́лилъ еси́ побѣ́ды, удивля́юща мы́сль, на еди́наго врага́, Ни́коне, стяжа́въ, зовы́й: благослови́те, вся́ дѣла́ Госпо́дня, Го́спода.

Кровьми́ напои́въ ду́ши, на ре́вность Боже́ственную воздви́глъ еси́, преподо́бне, я́звами муче́ній уязви́лъ еси́ де́монское ополче́ніе, и́стинствующее въ тебѣ́ зва́ніе показа́въ, вопія́: благослови́те, вся́ дѣла́ Госпо́дня, Го́спода.

Богоро́диченъ: Расто́ргни вери́ги тя́жкія мои́хъ паде́ній, испра́вльши Ада́мово испаде́ніе, Чи́стая, рождество́мъ Твои́мъ, Всепѣ́тая, и свѣтово́ждствуй вопи́ти чи́стымъ по́мысломъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Ви́дѣ тя́, ра́нъ добро́тою процвѣ́тша и багряни́цею отъ му́ченическихъ твои́хъ крове́й Вѣнцеда́тель облече́на, съ собо́ю всели́, Ни́коне, боже́ственно ра́дующася.

Яко предобра́ твоя́ любо́вь, ю́же къ Бо́гу стяжа́лъ еси́, Ни́коне, и тепла́ твоя́ ре́вность, огне́мъ Боже́ственнымъ распаля́ема, и чу́дно страда́ніе, съ небе́сными тя́ совоку́пльшее.

Тя́ на церко́внѣй высотѣ́ со́лнце посреди́ иму́ще ли́къ страстоте́рпецъ, я́ко звѣ́зды, свѣ́томъ Боже́ственнымъ облиста́ни, лучеда́тными сія́ніи вселе́нную всю́ озаря́ютъ.

Взя́лся еси́ ко оби́телемъ нетлѣ́ннымъ, ли́къ сугубосо́тный, му́чениче, страда́льцевъ предста́вивъ Вѣнцеда́вцу, съ ни́миже помина́й соверша́ющихъ дне́сь свяще́нную ва́шу па́мять.

Богоро́диченъ: Свѣ́та жили́ще яви́лася еси́ на́съ ра́ди изъ Тебе́ я́вльшагося, Его́же непреста́нно моли́ просвѣти́ти мы́сли на́ша, благоче́стно пою́щихъ Тя́, Дѣ́во Ма́ти Всенепоро́чная.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 110 об. – 114 об.

/ Къ оглавленію раздѣла /


Наверхъ / Къ титульной страницѣ

0