Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 22-й де́нь.
Свята́го священному́ченика Васи́лія, пресви́тера Анки́рскія Це́ркве.

[ВЕЧЕРЪ,]
Стихи́ры, гла́съ 4. Подо́бенъ: Зва́нный свы́ше.

Свяще́нства оде́ждею укра́шенъ,* Бо́гу служи́лъ еси́, я́коже а́нгелъ,* ве́щною на́съ ра́ди пло́тію я́вльшемуся,* жря́й, Васи́ліе великоимени́те.* Отню́дуже, я́ко овча́ соверше́нное, закла́лся еси́,* и чи́стая же́ртва бы́лъ еси́,* и прине́слся еси́ ны́нѣ* въ го́рній же́ртвенникъ.* Тѣ́мже тя́ ра́достными гла́сы* при́сно ублажа́емъ, вопію́ще ти́:* моли́ непреста́нно* спасти́ся душа́мъ на́шимъ.

Отъя́тѣй бы́вши ко́жи* судо́мъ непра́веднымъ,* болѣ́зни претерпѣ́лъ еси́,* взира́я къ кончи́нѣ неболѣ́зненнѣй, сла́вне,* и къ по́честемъ, страда́вшимъ угото́ваннымъ,* огне́мъ же обостря́емь, я́ко желѣ́зо,* небокова́ненъ бы́лъ еси́, всеблаже́нне, ме́чь,* вся́ посѣка́я вра́жія полки́.* Тѣ́мже тя́ почита́етъ дне́сь* вся́къ благочести́выхъ язы́къ, ра́дующися,* страда́льче доблему́дренне,* достосла́вне Васи́ліе.

Укра́шенъ ра́нами боже́ственными,* отъ гра́да во гра́дъ, свя́занъ, те́клъ еси́,* связу́яй мучи́теля,* и твои́хъ сто́пъ ше́ствіе исправля́я,* и а́біе въ Кесарíйскій гра́дъ вше́дъ,* въ то́мъ коне́цъ блаже́нный прія́лъ еси́,* и ко гра́ду небе́сному вѣнцено́сецъ возше́лъ еси́,* и Бо́гу Царю́* ны́нѣ предстои́ши,* Его́же моли́* спасти́ и просвѣти́ти ду́ши на́ша.

Сла́ва, и ны́нѣ, богоро́диченъ, гла́съ и подо́бенъ то́йже:

Яко во глубины́ мно́гихъ паде́ній* окая́нно снидо́хъ* уны́ніемъ мои́мъ и лѣ́ностію, окая́нный,* и недоумѣ́ніемъ и отча́яніемъ ны́нѣ одержи́мь е́смь,* бу́ди ми́ по́мощь, и очище́ніе,* и спасе́ніе, Пречи́стая,* утѣше́ніе благосе́рднѣйше подаю́щи ми́.* Тя́ молю́, и Тебѣ́ ми́лъ дѣ́юся,* и припа́даю, и вѣ́рою зову́ Ти:* да не бу́ду до конца́* льсти́вому ра́дость.

Крестобогоро́диченъ, подо́бенъ то́йже:

Не рыда́й Мене́, Ма́ти,* зря́щи на дре́вѣ повѣ́шена Твоего́ Сы́на и Бо́га,* на вода́хъ повѣ́сившаго зе́млю неодержи́мо* и всю́ тва́рь созда́вшаго,* и́бо воскресну́, и просла́влюся,* и а́дова ца́рствія сокрушу́ крѣ́постію,* и погублю́ того́ си́лу,* и ю́зники изба́влю отъ злодѣ́йства его́,* я́ко Благоутро́бенъ,* и Отцу́ Моему́ приведу́,* я́ко Человѣколю́бецъ.


[НА УТРЕНИ,]
Кано́нъ, его́же краегране́сіе: Твоя́, великому́чениче, восхвалю́ болѣ́зни. Іо́сифъ. Гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Твоего́ ца́рствія сла́ву, Всецарю́, сла́вный Васи́лій возлюби́въ, крѣ́пко на земли́ пострада́, и́мже Ца́рства небе́снаго на́съ сподо́би.

Достохва́льное житіе́ и чи́стое жи́тельство, сла́вне, по́двиговъ стезя́ наслѣ́дника показа́ша Бо́гу и граждани́на небе́сна тя́ содѣ́лаша.

Повину́вся Го́споду, благи́мъ житіе́мъ, прему́дре, повину́лъ еси́ врага́ и нога́ми попра́лъ еси́ сего́, свѣ́тло воева́въ на него́, му́чениче Васи́ліе.

Крове́й тече́ньми, мы́сленнаго фарао́на погрузи́лъ еси́ всево́инство я́ко вои́стинну и къ земли́ восте́клъ еси́, му́дре, идѣ́же о́блакъ страда́льцевъ при́сно весели́тся.

Богоро́диченъ: Отцу́ Сы́й Единоро́денъ, восхотѣ́въ, всели́ся во Твою́ пречи́стую утро́бу и Человѣ́къ бы́сть, Чи́стая, за бла́гость спасти́ хотя́ человѣ́ки.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Возвы́сився, я́коже а́гня, на дре́вѣ, всеблаже́нне, строга́нія терпя́ мы́слію тве́рдою и низлага́я врага́ возноше́нія си́лою Боже́ственнаго Ду́ха.

Язвъ, му́чениче, добро́тами краснѣ́йшій яви́лся еси́ душе́ю и тѣ́ломъ, мы́слію чи́стою благода́рственныя гла́сы воспуща́я Подвигополо́жнику твоему́.

Вели́ко зва́ніе ища́ велему́дреннымъ нра́вомъ, вели́кія по́двиги претерпѣ́лъ еси́, му́дре, и вельми́ при́сно взима́ющегося, му́чениче, смири́лъ еси́.

Боже́ственныхъ храни́тель бы́въ повелѣ́ній, богому́дре, въ темни́цѣ затворя́емь, вѣ́рнымъ отверза́я уче́нія пу́ть, въ широту́ ра́зума вводя́щій.

Богоро́диченъ: Разумѣ́въ издале́ча Твое́ зача́тіе Иса́ія Ду́хомъ, Отрокови́це, уясни́ сіе́, вопія́: се́ во утро́бѣ Дѣ́ва Бо́га зачне́тъ.

Сѣда́ленъ, гла́съ 3. Подо́бенъ: Боже́ственныя вѣ́ры.

Красота́ бы́лъ еси́ Це́ркве, и держа́ва благоче́стія, и потреби́тель нече́стія, Васи́ліе, и, претерпѣ́въ му́ки, я́ко безпло́тенъ, со безпло́тными совокупи́лся еси́, ра́дуяся, му́чениче сла́вне, Христа́ Бо́га моли́ дарова́ти душа́мъ на́шимъ ве́лію ми́лость.

Сла́ва, и ны́нѣ, богоро́диченъ:

Боже́ственнаго естества́ не отлу́чься, пло́ть бы́въ во чре́вѣ Твое́мъ, но Бо́гъ вочеловѣ́чься и пребы́сть, Иже по рождествѣ́ Ма́терь Тя́ Дѣ́ву я́ко пре́жде рождества́ сохрани́въ Всенепоро́чну, еди́нъ Госпо́дь, Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница, Сло́ва нетлѣ́нная Дѣ́ва Ма́ти, на Крестѣ́ зря́щи повѣ́шена, изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Ви́дѣвъ облиста́емо твое́ боже́ственное лице́ заре́ю духо́вною, злочести́вый, му́чениче, дивля́шеся и я́ко тмы́ служи́тель нечу́вственно объюродѣва́ше.

Прему́дростію лу́чшею удобря́емь, мудрецы́ е́ллинскія богонача́льною си́лою обуи́лъ еси́ и, пострада́въ терпѣли́вно, побѣ́ды вѣне́цъ воспрія́лъ еси́.

Просте́рта и всю́ду изчленя́ема, укрѣпля́ше тя́ Сло́во, Иже на Крестѣ́ простре́ся, Васи́ліе, и стра́стію вѣ́рнымъ дарова́въ безстра́стіе.

Не жру́ де́мономъ, ни устраша́юся сме́рти, ни му́къ ви́да, — свяще́нный взыва́ше Васи́лій, — Еди́наго Бо́га исповѣ́дую, въ Тро́ицѣ познава́емаго.

Богоро́диченъ: Пою́ Тя́, Влады́чице, многопѣ́тую, благословлю́ Тя, Дѣ́во, Ея́же ра́ди человѣ́цы вси́ благослови́хомся и кля́твы дре́внія вои́стинну изба́вихомся.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Желѣ́за тя́жестію сля́ченъ бы́въ, я́коже легча́йшее и́го Госпо́дне носи́ти изво́ливъ, на Творца́ вы́ю сверѣ́пствовавшаго, врага́ го́рдаго, му́чениче, смири́лъ еси́.

Съ весе́ліемъ желѣ́зными, му́чениче, обложе́нъ у́зами, мѣ́ста отъ мѣ́стъ прете́клъ еси́, си́ми, я́коже мони́сты, красу́яся, Васи́ліе, и веселя́ Подвигополо́жника твоего́.

Кро́вными тече́ніи са́мъ себе́, му́чениче, обагри́лъ еси́ вои́стинну ца́рскую оде́жду, сла́вне, побѣ́ды же вѣнце́мъ обложе́нъ, Христу́ сца́рствуеши, ра́дуяся, Васи́ліе.

Утве́рждься благода́тію креста́, претерпѣ́лъ еси́ дале́кій и лю́тый пу́ть, бѣ́дно гони́мь, поя́: на стези́ свидѣ́тельствъ твои́хъ, красу́яся и ра́дуяся, Сло́ве, пойду́.

Богоро́диченъ: Превы́шшую херуви́мъ, высоча́йшую небе́съ, лу́чшую тва́ри, му́дрыхъ му́чениковъ огражде́ніе, еди́ну Богоро́дицу пѣ́сньми почти́мъ.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Возвы́сився страстьми́ твои́ми и низве́ргъ еси́ врага́, великому́чениче сла́вне, и къ Бо́гу преста́вился еси́, побѣди́тельнымъ вѣнча́вся вѣнце́мъ при концѣ́ страда́ній, достохва́льне.

На Крестѣ́ Просте́ршему дла́ни тебе́ ра́ди, му́чениче му́дре, подо́бяся, воздви́женъ бы́въ на дре́во, терпѣли́вно строга́нія претерпѣ́лъ еси́, уязвля́я льсти́ваго твои́ми я́звами.

Связа́лъ еси́ безпло́тныя враги́, вя́жемь за Христа́, Васи́ліе, отрѣши́вся же, сла́вне, отъ пло́ти, до конца́ разруши́лъ еси́ тѣ́хъ злодѣ́йства Боже́ственною благода́тію.

Богоро́диченъ: Пою́ Тя, Всепѣ́тая, Юже пою́тъ во́инства небе́сныхъ чино́въ, и молю́ Тя: стра́сти души́ моея́ исцѣли́, Чи́стая, и огня́ вѣ́чнаго свободи́.

Конда́къ, гла́съ 8. Подо́бенъ: Взбра́нной.

Зако́нно тече́ніе соверши́въ и вѣ́ру соблю́лъ еси́, священному́чениче Васи́ліе, сего́ ра́ди муче́нія вѣнце́въ сподо́бился еси́ и Це́ркве сто́лпъ непоколеби́мь яви́лся еси́, Сы́на, Отцу́ Собезнача́льна и Ду́ху исповѣ́давъ, Тро́ицу Нераздѣ́льную, Юже моли́ изба́витися отъ бѣ́дъ чту́щимъ Тя́, да зове́мъ ти́: ра́дуйся, Васи́ліе богому́дре.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Просвѣще́ніемъ Боже́ственныя благода́ти сія́я, тму́ му́къ проше́лъ еси́, дне́ прича́стникъ бы́въ, му́дре, невече́рняго и вопія́: благослове́нъ еси́, Бо́же оте́цъ на́шихъ.

Водруже́но на ка́мени Боже́ственнаго ра́зума, му́дре, се́рдце твое́, не поколеба́ся напа́стей вѣ́трами, страда́льче, вопію́щее всѣ́хъ Изба́вителю: благослове́нъ еси́, Бо́же оте́цъ на́шихъ.

Бу́йствуя, мучи́тель повелѣва́етъ на реме́ніе рѣ́зати тя́, сла́вне, и, я́ко безпло́тна, терпя́ща тя́ зря́, ника́коже разумѣ́ вопи́ти: благослове́нъ еси́, Бо́же оте́цъ на́шихъ.

Яко зла́то, въ пещи́ му́къ просія́лъ еси́, жего́мь, и, изображе́ніе страсте́й Боже́ственныхъ бы́въ, вопія́лъ еси́, Васи́ліе му́дре: благослове́нъ еси́, Бо́же оте́цъ на́шихъ.

Богоро́диченъ: Дѣ́вство, по рождествѣ́ нетлѣ́нно, Дѣ́во, пребы́вшее, познава́ющи, изъ Тебе́ ро́ждшемуся па́че ума́ вопія́ла еси́ Спа́су и Бо́гу: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Весьма́ къ Бо́гу простира́емь, тѣле́сныя болѣ́зни со́нъ вмѣни́лъ еси́, отню́дуже къ жи́зни блаже́ннѣй и неболѣ́зненнѣй, му́чениче страстоте́рпче, ра́дуяся, преше́лъ еси́.

Вжили́вся любо́вію Вседержи́теля, растерза́нія пло́ти претерпѣ́лъ еси́ крѣ́пко и си́льнаго въ зло́бѣ удавля́еши врага́ струя́ми крове́й твои́хъ, Васи́ліе треблаже́нне.

Ца́рское украше́ніе Це́ркве Христо́вы, страсте́й Спа́совыхъ изображе́ніе му́ченикъ тве́рдый, вѣ́рныхъ утвержде́ніе, пѣ́сньми да восхва́лится Васи́лій вели́кій.

Премíрную сла́ву и Свѣ́тъ невече́рній, небе́сное Ца́рство, вѣне́цъ неувяда́емый, безпеча́льную жи́знь и ра́дость неизглаго́ланную, му́чениче, по кончи́нѣ обрѣсти́ сподо́бился еси́.

Богоро́диченъ: Спасе́нія человѣ́ческій ро́дъ сподо́бися Тобо́ю, Пречи́стая Богора́дованная: еди́на бо на́мъ Спа́са родила́ еси́, Его́же превозно́симъ во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Ви́дѣти святы́хъ кра́сныя свѣ́тлости, разрѣши́вся отъ пло́ти, сподо́бился еси́, пребога́те, и со а́нгельскими совокупи́лся еси́ во́инствы, поя́ при́сно съ ни́ми: Свя́тъ, Свя́тъ, Свя́тъ, Тро́ице вседѣ́тельная и всеси́льная.

Яко свѣ́тъ, всеблаже́нне, я́ко вели́кое со́лнце на небеси́, Христо́вы Це́ркве ви́димь, страда́льческими свѣтлолу́чными сія́ніи и чудотворе́ній боже́ственными свѣтлостьми́ всѣ́хъ озаря́еши ду́ши, восхваля́ющихъ тя́.

Са́мъ ся страда́ній красота́ми всеблагосла́вно, богому́дре страстоте́рпче, украси́лъ еси́, и Христу́ кра́сному предстои́ши, вѣнце́мъ пра́вды ны́нѣ обложе́нъ, тѣ́мже тя́ чти́мъ, вѣ́рніи, ра́дующеся.

Земля́ боже́ственнымъ погребе́ніемъ освяти́ся свяще́ннаго и боже́ственнаго твоего́, Васи́ліе, тѣлесе́, пра́ведныхъ взыгра́шася ду́си, посреди́ себе́ ду́хъ тво́й, блаже́нне, иму́ще, съ ни́миже вся́ ны́ помяни́, помина́ющія тя́.

Богоро́диченъ: Стра́шенъ о́бразъ рождества́ Твоего́, Бо́гъ бо бѣ́, Дѣ́во, вопло́щся, ражда́емый, Его́же моли́ стра́шныя му́ки вся́ ны́ изба́вити, вѣ́рою несомнѣ́нною чту́щія Тя́, Ма́ти чи́стая и неискусобра́чная.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 107 об. – 110 об.

/ Къ оглавленію раздѣла /


Наверхъ / Къ титульной страницѣ

0