Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 21-й де́нь.
Преподо́бного отца́ на́шего и исповѣ́дника Іа́кова епи́скопа.

[ВЕЧЕРЪ,]
Стихи́ры, гла́съ 4. Подо́бенъ: Да́лъ еси́ зна́меніе.

Превѣ́чнующее* и ника́коже претека́ющее* возжела́въ благосла́віе,* сла́ву пренебре́глъ еси́,* преходя́щую и погиба́ющую,* и, кре́стъ воспріе́мъ,* Распе́ншемуся послѣ́довалъ еси́* и пло́ть покори́лъ еси́ по́стническими по́двиги.* Сего́ ра́ди па́мять твою́* соверша́емъ, Іа́кове.

Мíру и страсте́мъ распина́емь, Іа́кове,* ду́шу соблю́лъ еси́* нескве́рну и небла́зненну,* несмѣ́шенну до́льными, о́тче, начерта́ньми,* и видѣ́ніи та́йными* воскрили́вся къ небе́снымъ.* Въ ни́хже твое́ житіе́ предвозложи́лъ еси́, преподо́бне,* я́ко Христо́въ дру́гъ и́скренній,* я́ко уго́дникъ вѣ́рнѣйшій.

Незло́бивъ, цѣ́лъ,* ми́лостивъ и братолюби́въ,* смиренному́дръ и кро́токъ,* любве́ испо́лненъ,* ми́лостынею укра́шенъ,* терпѣ́ніемъ пожда́теленъ,* вѣ́рою и наде́ждою украша́емь,* показа́лся еси́, всеприснопа́мятне,* моли́твами удобря́емь* и Боже́ственными свѣ́тлостьми свяще́нно облиста́емь.

Сла́ва, и ны́нѣ, богоро́диченъ:

Скве́рну отмы́й стра́стнаго се́рдца моего́,* Богоро́дице Всепѣ́тая,* и вся́ я́звы и гное́нія сего́,* я́же отъ грѣха́,* очи́сти, Чи́стая,* и ума́ моего́ уста́ви непостоя́ніе,* я́ко да си́лу Твою́* и вели́кое заступле́ніе* велича́ю, окая́нный* и непотре́бный ра́бъ Тво́й.

Крестобогоро́диченъ:

Распина́ема Христа́ Человѣколю́бца* ви́дящи Пречи́стая* и ре́бра ископова́ема копіе́мъ,* пла́чущи, вопія́ше:* что́ сіе́, Сы́не Мо́й?* Что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ,* и тщи́шися безча́дствовати Мя́, Вселюбе́знѣйшій?* Удивля́юся, Благоутро́бне,* Твоему́ во́льному распя́тію.


[НА УТРЕНИ,]
Кано́нъ. Игна́тія. Гла́съ 2.

Пѣ́снь 1.

Ирмо́съ: Гряди́те лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Просвѣще́ніе Тро́ическое, Іа́кове, въ ду́шу пріе́мъ, мíра оста́вилъ еси́ те́мную пре́лесть и премíрную сла́ву получи́лъ еси́.

Ты́, кре́стъ на ра́мо взе́мъ, Распе́ншемуся, преподо́бне, послѣ́довалъ еси́ и, мона́шествовавъ прему́дрѣ, стра́сти воздержа́ніемъ, о́тче, изсуши́лъ еси́.

Вмѣсти́теленъ дарова́ній Ду́ха отъ млады́хъ ногте́й твои́хъ сосу́дъ бы́лъ еси́ и Вы́шняго граждани́нъ Сіо́на и наслѣ́дникъ, блаже́нне Іа́кове.

Богоро́диченъ: Еди́на Бо́га, всѣ́ми су́ща невмѣсти́ма, Тебѣ́ вмѣ́стна бы́вша за бла́гость, родила́ еси́, Отрокови́це, Его́же моли́ спасти́ воспѣва́ющія Тя́.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Житіе́ твое́ красно́, сло́во со́лію любве́, богому́дре, растворе́но, се́рдце благоумиле́нно: сего́ ра́ди тя́ вѣ́рою ублажа́емъ.

Христа́, на́съ ра́ди я́вльшагося пло́тію, Боже́ственный почита́я о́бразъ, гоне́нія, о́тче, претерпѣ́лъ еси́, и бѣды́, и ско́рби, всеблаже́нне.

Яко же́ртву чи́сту, тебе́ сама́го прине́слъ еси́ Го́сподеви умерщвле́ніемъ грѣха́ и же́ртвы безкро́вны Тому́, я́ко святи́тель зако́ненъ, прине́слъ еси́.

Богоро́диченъ: Зла́ту я́ко вои́стинну кади́льницу, и ста́мну ма́нны, и Боже́ственную го́ру, и пала́ту прекра́снѣйшую Бо́жію Тя́, Дѣ́во, имену́емъ.

Сѣда́ленъ, гла́съ 4. Подо́бенъ: Ско́ро предвари́.

Христу́ послѣ́довалъ еси́, мíръ оста́вивъ и пло́ть покори́въ воздержа́ніемъ я́вѣ, преблаже́нне Іа́кове, отню́дуже свяще́нства пома́заніе свято́е имѣ́лъ еси́, ны́нѣ же къ невеще́ственнымъ преста́вился еси́ лико́мъ, моля́ о всѣ́хъ на́съ, восхваля́ющихъ тя́.

Сла́ва, и ны́нѣ, богоро́диченъ:

Еди́на, ро́ждшая Творца́ всему́, еди́на, украси́вшая человѣ́чество Рождество́мъ Твои́мъ, Богоневѣ́сто, изба́ви мя́ отъ сѣ́ти льсти́ваго врага́, поста́ви мя́ на ка́мени Христо́выхъ хотѣ́ній, Того́ моля́щи прилѣ́жно, Его́же воплоти́ла еси́.

Крестобогоро́диченъ:

На Крестѣ́ Тя́ возвы́шена я́ко узрѣ́ Пречи́стая Ма́ти Твоя́, Сло́ве Бо́жій, ма́терски рыда́ющи, вѣща́ше: что́ но́вое и стра́нное сіе́ чу́до, Сы́не Мо́й? Ка́ко — Жи́знь всѣ́хъ — вкуша́еши сме́рти, оживи́ти ме́ртвыя хотя́, я́ко Благоутро́бенъ?

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Всено́щными мольба́ми сла́сти тѣле́сныя умертви́въ, безстра́стія яви́лся еси́ свѣти́льникъ неусы́пный, преподо́бне.

Сле́зъ тече́ньми всегда́ омыва́яся, преблаже́нне, чи́сто прія́телище яви́лся еси́ Свята́го Ду́ха.

Смире́нъ же, и кро́токъ, и сострада́теленъ, и незло́бивъ, и цѣлому́дръ святи́тель, преподо́бне, бы́лъ еси́.

Богоро́диченъ: Неискусобра́чная Влады́чице, Яже Бо́га во чре́вѣ заче́нши, напа́стей и печа́лей вся́ изба́ви.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Сла́вы жела́ній вои́стинну, е́же въ человѣ́цѣхъ высо́каго, преподо́бне, прея́вственно, о́тче, возгнуша́лся еси́ и бы́лъ еси́ свѣти́льникъ, смиренному́дрія сія́я свѣ́тлостію.

Воздержа́ніемъ мно́гимъ и во бдѣ́ніи прилѣ́жнѣмъ, преподо́бне, въ моли́твѣ и въ злострада́ніи взыска́лъ еси́ Бо́га, тя́ къ Вы́шнимъ оби́телемъ преложи́вшаго.

Упражня́я себе́ всено́щными моли́твами, стоя́лъ еси́, душе́внымъ о́комъ Боже́ственныя пріе́мля зари́, о́тче святи́телю богому́дре Іа́кове.

Богоро́диченъ: Уязви́вшееся прило́ги лука́ваго, Пречи́стая, я́ко сострада́тельна, уврачи́ се́рдце мое́, Су́щаго, на Крестѣ́ пло́тію уя́звленнаго, неизрече́нно ро́ждшая.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

То́ки сле́зъ твои́хъ, преподо́бне, мо́ре лю́тыхъ страсте́й изсуши́ша и та́мошнее утѣше́ніе честнѣ́й твое́й души́ исхода́таиша.

Незло́бивъ, кро́токъ, цѣ́лъ, преподо́бенъ, сла́докъ, смиренному́дръ, и ти́хъ, и просвѣще́нія испо́лненъ, пресла́вне о́тче, бы́лъ еси́.

Съ Боже́ственными па́стыри па́мять твоя́, о́тче, спросла́вися, я́коже па́стыря до́браго, па́стырю му́дре Іа́кове, я́ко преподо́бнѣ ста́до упа́слъ еси́.

Богоро́диченъ: Во́лею вся́ содѣ́лавый во утро́бу, восхотѣ́въ, неискусобра́чную всели́ся, тлѣ́ніемъ неду́говавшія нетлѣ́ніемъ почти́въ, я́ко Милосе́рдъ.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Мно́гая гоне́нія и неосла́бная искуше́нія претерпѣ́лъ еси́, иконобо́рцы побѣжда́я, правосла́віемъ сія́я, вся́ зря́щія просвѣща́я и взыва́я, Іа́кове: благослове́нъ еси́, Бо́же оте́цъ на́шихъ.

Христо́во стра́шное прише́ствіе помышля́я, во умиле́ніи все́ житіе́ сконча́лъ еси́, до́ндеже обрѣ́лъ еси́, блаже́нне, очище́ніе прегрѣше́ній соверше́нное и вѣ́чное утѣше́ніе, просвѣще́ніе и́стинное и сла́ву неизрече́нную.

Па́стыря Христа́ въ кро́тости души́ яви́лся еси́ а́гня и, Си́мъ наставля́емь, па́стырь ове́цъ въ Ду́сѣ, о́тче, слове́сныхъ позна́лся еси́, съ ни́ми поя́ всегда́: благослове́нъ еси́, Бо́же оте́цъ на́шихъ.

Богоро́диченъ: Дѣ́во сла́вная, Неискусобра́чная Чи́стая, Благослове́нная, па́дающихъ исправле́ніе, согрѣша́ющихъ избавле́ніе, спаси́ мя, блу́днаго, спаси́, Сы́ну Твоему́ зову́ща: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Чистѣ́йшій тво́й у́мъ, чистото́ю боже́ственною просвѣще́нъ, бѣсо́вскія тмы́ и мглы́ страсте́й разу́мно уклони́ся, преподо́бне, зовы́й: по́йте, вся́ дѣла́, Го́спода и превозноси́те во вся́ вѣ́ки.

Разжже́нныя врага́ стрѣ́лы угаси́лъ еси́, му́дре, одожде́ньми непреста́нныхъ сле́зъ и, разжже́гся Христо́вою любо́вію, всеблаже́нне, попали́лъ еси́ вещенеи́стовное сласте́й те́рніе.

Сіе́ ста́до, прему́дре, е́же собра́лъ еси́ твои́ми уче́ніи, и вѣ́рою соверша́ющія свяще́нную, и честну́ю, и по́лну свѣ́та боже́ственную па́мять твою́ сохрани́ моли́твами твои́ми отъ искуше́ній и бѣ́дъ.

Богоро́диченъ: Живы́й су́щи исто́чникъ, Яже во́ду жи́зни ро́ждшая, ду́шу мою́, иста́явшую грѣхо́внымъ пла́менемъ, Дѣ́во Богоро́дице, напо́й, да Тя́ сла́влю во вся́ вѣ́ки.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

По мно́гихъ трудѣ́хъ и болѣ́знехъ безчи́сленныхъ, по́тѣхъ же и ско́рбѣхъ вои́стинну, въ приста́нищи почи́лъ еси́, небе́сное нося́ бога́тство Боже́ственныхъ добродѣ́телей, свяще́ннѣйше о́тче, преподо́бныхъ удобре́ніе.

Разсужде́нія свѣти́льникъ, чу́вствія престо́лъ, незло́бивъ, кро́токъ, и ми́лостивъ, и благоумиле́нъ бы́лъ еси́, рыда́яй же и омыва́я о́дръ, я́коже рече́ Дави́дъ, съ ни́мже вся́, вѣ́рою чту́щія тя́, помина́й.

Яко дневну́ю звѣзду́, я́ко Ду́ха хра́мъ, я́ко ши́покъ благово́нія та́инственнаго, о́тче, сы́й испо́лненъ, я́ко высоковѣ́твенно дре́во, я́ко сла́вы вѣ́чныя о́бщника и я́ко му́дра святи́теля чти́мъ тя́, Іа́кове.

Сле́зныя пото́ки, въ зе́млю се́рдца посыла́емы бога́тно, вои́стинну кла́съ возрасти́ша зрѣ́лъ, ду́ши пита́ющъ вѣ́рою чту́щія тя́ при́сно, святи́телю богому́дре, о́тче на́шъ Іа́кове.

Богоро́диченъ: Пощади́ мя, Го́споди, пощади́, егда́ хо́щеши ми́ суди́ти, и не осуди́ мене́ во о́гнь, ни я́ростію Твое́ю обличи́ мене́, — мо́литъ Тя́ Дѣ́ва, ро́ждшая Тя́, Христе́, а́нгелъ мно́жества и съ преподо́бными му́ченики.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 103 об. – 106.

/ Къ оглавленію раздѣла /


Наверхъ / Къ титульной страницѣ

0