Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 20-й де́нь.
Слу́жба свято́му преподобному́ченику Евфроси́ну, Синеезе́рскому чудотво́рцу.

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди, воззва́хъ: стихи́ры на 8, гла́съ 6:

Науче́нъ бы́въ издѣ́тства любви́ ко Христу́ отъ благочести́выхъ роди́телей твои́хъ, пресла́вне о́тче на́шъ Евфроси́не, все́ житіе́ твое́ на земли́ на служе́ніе Бо́гу посвяти́лъ еси́, при кончи́нѣ же твое́й му́ченическимъ вѣнце́мъ увѣнча́лся еси́ и всели́лся еси́ въ го́рняя со а́нгелы святы́ми. Тѣ́мже мо́лимъ тя́, уго́дниче Бо́жій: осѣня́й съ небе́съ моли́твами твои́ми усе́рдно чту́щія па́мять твою́. [Два́жды.]

Спасе́нія искíй, о́тче Евфроси́не пречу́дне, во оби́тель сла́вную Валаа́мскую всели́лся еси́, та́же велѣ́ніемъ Бо́жіимъ церко́вный чте́цъ ве́си Доло́цкія поста́вленъ бы́лъ еси́, презрѣ́въ же земна́я и тлѣ́нная, прія́лъ еси́ чи́нъ и́ноческій во оби́тели Ти́хвинстѣй, отону́дуже ра́достно пресели́лся еси́ въ пусты́ню Синеезе́рскую и, та́мо оби́тель основа́въ, му́ченически сконча́лся еси́, свѣти́ло церко́вное и преподо́бныхъ ра́дованіе. [Два́жды.]

Сра́дуйтеся на́мъ, вся́ вѣ́рныхъ мно́жества, сликовству́й, Новгоро́дская вся́ Це́рковь и вся́ Россíе правосла́вная, наста́ бо свѣ́тлый де́нь па́мяти ди́внаго пусты́нника, процвѣ́тшаго, я́ко фи́никсъ, облагоуха́нный боже́ственными дарова́ніи, то́читъ бо исцѣле́нія ду́шъ и тѣле́съ всѣ́мъ, съ вѣ́рою прибѣга́ющимъ къ ра́цѣ моще́й его́. Сего́ ра́ди воспои́мъ ему́ усе́рдно: святы́й преподобному́чениче Евфроси́не, Го́сподеви моли́ся о душа́хъ на́шихъ. [Два́жды.]

Сла́ва, гла́съ 5:

Преподо́бне о́тче Евфроси́не, не да́лъ еси́ сна́ очи́ма твои́ма, ни вѣ́ждома твои́ма дрема́нія, до́ндеже ду́шу и тѣ́ло отъ страсте́й свободи́лъ еси́ и себе́ въ хра́мъ Госпо́день угото́валъ еси́, прише́дъ бо, Христо́съ сотвори́ у тебе́ оби́тель Единосу́щныя Тро́ицы и дарова́ ти благода́ть вразумля́ти ко спасе́нію вся́, къ тебѣ́ приходя́щія. Тѣ́мже мо́лимъ тя́: моли́ся Христу́ Бо́гу спасти́ся на́мъ, чту́щимъ тя́.

И ны́нѣ, богоро́диченъ воскре́сенъ:

Въ Чермнѣ́мъ мо́ри [Неискусобра́чныя Невѣ́сты о́бразъ написа́ся иногда́: та́мо Моисе́й, раздѣли́тель воды́, здѣ́ же Гавріи́лъ, служи́тель чудесе́; тогда́ глубину́ ше́ствова немо́кренно Изра́иль, ны́нѣ же Христа́ роди́ безсѣ́менно Дѣ́ва; мо́ре по проше́ствіи Изра́илевѣ пребы́сть непрохо́дно, Непоро́чная по рождествѣ́ Емману́илевѣ пребы́сть нетлѣ́нна. Сы́й и пре́жде Сы́й, явле́йся я́ко Человѣ́къ, Бо́же, поми́луй на́съ].

Вхо́дъ. Проки́менъ дне́ и чте́нія три́.

Проро́чества Иса́іина чте́ніе. [Глава́ 35.]

Та́ко глаго́летъ Госпо́дь: ра́дуйся, пу́стыня жа́ждущая, да весели́тся пусты́ня и да цвѣте́тъ, я́ко кри́нъ. И процвѣте́тъ, и возвесели́тся пусты́ня Іорда́нова, и сла́ва Лива́нова даде́ся е́й, и че́сть Карми́лова, и у́зрятъ лю́діе мои́ сла́ву Госпо́дню и высоту́ Бо́жію. Укрѣпи́теся, ру́цѣ осла́бленыя и колѣ́на разсла́бленая, утѣ́шитеся, малоду́шніи умо́мъ, укрѣпи́теся, не бо́йтеся: се́ Бо́гъ на́шъ су́дъ воздае́тъ и возда́стъ, То́й пріи́детъ и спасе́тъ на́съ. Тогда́ отве́рзутся о́чи слѣпы́хъ, и у́ши глухи́хъ услы́шатъ. Тогда́ ско́читъ хромы́й, я́ко еле́нь, и я́сенъ бу́детъ язы́къ гугни́выхъ, я́ко прото́ржеся вода́ въ пусты́ни и де́брь въ земли́ жа́ждущей. И безво́дная бу́детъ во езе́ра, и на жа́ждущей земли́ исто́чникъ водны́й бу́детъ: та́мо бу́детъ весе́ліе пти́цамъ, и сели́тва тро́сти, и лу́зи. И та́мо бу́детъ пу́ть чи́стъ, и пу́ть свя́тъ нарече́тся; и не пре́йдетъ та́мо нечи́стый, ниже́ бу́детъ та́мо пу́ть нечи́стъ; разсѣ́янніи же по́йдутъ по нему́ и не заблу́дятъ. И не бу́детъ та́мо льва́, ни отъ звѣре́й злы́хъ не взы́детъ на́нь, ниже́ обря́щется та́мо, но по́йдутъ по нему́ изба́вленніи. И со́бранніи Го́сподемъ обратя́тся и пріи́дутъ въ Сіо́нъ съ ра́достію, и ра́дость вѣ́чная надъ главо́ю и́хъ. Надъ главо́ю бо и́хъ хвала́ и весе́ліе, и ра́дость пріи́метъ я́: отбѣже́ болѣ́знь, и печа́ль, и воздыха́ніе.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма и свято́му стихи́ра, гла́съ 4:

Досто́йно хва́лимъ труды́ и по́двиги твоя́, о́тче Евфроси́не богому́дре, щито́мъ бо преподо́бія огради́вся, во́инъ духо́вный непобѣди́мь вои́стинну яви́лся еси́, а́ще и ме́чное усѣче́ніе и главы́ разбіе́ніе претерпѣ́лъ еси́, тѣ́мже и вѣне́цъ сла́вы прія́лъ еси́ отъ руки́ Вседержи́теля и мо́лишися о душа́хъ на́шихъ.

Сла́ва, гла́съ 5:

На небесѣ́хъ ны́нѣ ликовству́еши, преблаже́нне о́тче на́шъ Евфроси́не, и о спасе́ніи почита́ющихъ тя́ мо́лишися, заступле́ніемъ же твои́мъ ду́хи лука́выя отгоня́еши, и исцѣля́еши неду́ги неисцѣ́льныя, и блиста́ніемъ чуде́съ твои́хъ сердца́ вѣ́рныхъ просвѣща́еши. Тѣ́мже дне́сь гла́сы немо́лчными воспѣва́емъ пресвѣ́тлую и свѣтоно́сную па́мять твою́.

И ны́нѣ, богоро́диченъ:

Хра́мъ и Две́рь еси́, [Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ].

На стихо́внѣ стихи́ры, гла́съ 1:

Прехва́льне о́тче Евфроси́не, по и́мени твоему́ бы́сть и житіе́ твое́, зане́ испо́лненъ бы́лъ еси́ ве́лія цѣлому́дрія и нищеты́ ду́ха во вся́ дни́ житія́ твоего́, того́ ра́ди до́мъ Свято́му Ду́ху свя́тъ и че́стенъ сотвори́лъ еси́ себе́, добродѣ́тельными дѣя́ньми и чуде́съ дарова́ньми обогати́вся.

Сти́хъ: Честна́ предъ Го́сподемъ сме́рть преподо́бныхъ Его́.

На тебѣ́, уго́дниче Бо́жій, почи́ ду́хъ прему́дрости и ра́зума, и́мже умудри́лся еси́ бы́ти лю́демъ во спасе́ніе; ду́хъ совѣ́та и крѣ́пости, и́мже возмо́глъ еси́ вопроша́ющимъ отвѣщава́ти; ду́хъ вѣ́дѣнія и благоче́стія, и́мже благоче́стно научи́лъ еси́ и́щущія ду́ха и се́рдца но́ваго вѣ́дѣти Святу́ю Тро́ицу.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Ве́тхаго человѣ́ка совле́клся еси́, Евфроси́не, и во Христа́ обле́клся еси́ вои́стинну, побѣди́въ же вра́жія ополче́нія, яви́лся еси́ крѣ́пкій ду́хомъ нача́льникъ пусты́нныя оби́тели и му́дрый наста́вникъ къ тебѣ́ приходя́щимъ и съ во́племъ, я́ко ста́рцу, взыва́ющимъ: возми́ мою́ кро́вь, да́ждь ми́ тво́й ду́хъ. Сего́ ра́ди мо́лимъ тя́: умудри́ на́съ моли́твами твои́ми спаса́тися и испроси́ душа́мъ на́шимъ ве́лію ми́лость.

Сла́ва, гла́съ 8:

На земли́ яви́лся еси́, о́тче, я́ко а́нгелъ безпло́тный, вся́ плотска́я жела́нія ду́хови покори́въ, тѣ́мже по преставле́ніи въ небе́сныхъ селе́ніихъ водвори́лся еси́. Сего́ ра́ди, свя́те, вопіе́мъ ти́: а́нгеле земны́й, небе́сный же человѣ́че, моли́ся Христу́ Бо́гу о спасе́ніи ду́шъ на́шихъ.

И ны́нѣ, богоро́диченъ:

Изба́ви на́съ отъ бѣ́дъ, Ма́ти Бо́жія, ро́ждшая всѣ́хъ Творца́, да вси́ зове́мъ Ти́: ра́дуйся, еди́но предста́тельство ду́шъ на́шихъ.

По благослове́ніи хлѣ́бовъ: тропа́рь преподобному́ченику, два́жды, и Богоро́дице Дѣ́во.., еди́ножды.

Тропа́рь преподобному́ченику, гла́съ 4:

Отъ ю́ности твоея́ впери́въ у́мъ тво́й къ Бо́гу, блаже́нне Евфроси́не, мíра же отве́ргся, всели́лся еси́ въ пусты́ню непроходи́мую, и та́мо, отъ Го́спода укрѣпля́емь, въ моли́твахъ и поще́ніихъ до́блественнѣ пожи́лъ еси́, и жи́знь твою́ страда́льчески убіе́ніемъ отъ сыно́въ противле́нія сконча́лъ еси́, сего́ ра́ди со преподо́бными и му́ченики вѣнча́лся еси́, съ ни́миже и ны́нѣ предстои́ши престо́лу Пресвяты́я Тро́ицы. Сію́ моли́, мо́лимъ тя́, оставле́ніе пода́ти согрѣше́ній на́шихъ и дарова́ти на́мъ ве́лію ми́лость.


НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 3:

Тече́ніе соверши́въ и́стинное, мучи́телей де́рзость побѣди́лъ еси́, преподобному́чениче, пріи́мъ же вѣне́цъ отъ руки́ Вседержи́теля, а́нгеломъ соприча́стникъ показа́лся еси́. [Два́жды.]

Сла́ва, и ны́нѣ, богоро́диченъ:

Покро́въ бу́ди на́мъ и предста́тельство, и заступле́ніе, и похвала́, Дѣ́во Богоро́дице, я́ко Ты́ еси́ безпомо́щныхъ си́ла необори́мая и безнаде́жныхъ наде́жда.

По 2-мъ стихосло́віи сѣда́ленъ, гла́съ 1:

Наста́, богоно́сне о́тче Евфроси́не, свѣ́тлый де́нь па́мяти твоея́, тѣ́мже, вси́ вѣ́рніи, собра́вшеся въ пусты́ню твою́, свѣ́тло ра́дующеся, припа́даемъ съ вѣ́рою къ ра́цѣ моще́й твои́хъ и восхваля́емъ Го́спода, просла́вльшаго тя́. [Два́жды.]

Сла́ва, и ны́нѣ, богоро́диченъ:

Бо́га, изъ Тебе́ воплоти́вшагося, позна́хомъ, Богоро́дице Дѣ́во. Того́ моли́ о спасе́ніи страны́ на́шея правосла́вныя и всѣ́хъ, запечатлѣ́нныхъ и́менемъ Сы́на Твоего́.

На поліеле́и велича́ніе:

Ублажа́емъ тя́, святы́й преподобному́чениче Евфроси́не, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

[Псало́мъ избра́нный: Услы́шите сія́, вси́ язы́цы...]

По поліеле́и сѣда́ленъ, гла́съ 8:

Дѣ́латель иску́сенъ яви́вся въ поще́ніихъ, просія́лъ еси́ и во страда́ніихъ, вѣ́рныя же просвѣти́лъ еси́ твои́ми уче́ньми, блаже́нне Евфроси́не, тѣ́мже тя́ вси́ согла́сно велича́емъ. [Два́жды.]

Сла́ва, и ны́нѣ, богоро́диченъ:

Наде́ждо непосты́дная на Тя́ упова́ющихъ, ро́ждшая па́че естества́ пло́тію Христа́, Бо́га на́шего, Того́, Влады́чице, моли́ пода́ти всѣ́мъ на́мъ пре́жде конца́ исправле́ніе и ве́лію ми́лость.

Степе́нна, 1-й антифо́нъ 4-го гла́са: Отъ ю́ности моея́ мно́ги бо́рютъ мя́ стра́сти... Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Да испо́лнятся уста́ на́ша хвале́нія Твоего́, Го́споди, я́ко да воспое́мъ сла́ву Твоего́ уго́дника, преподобному́ченика Евфроси́на, въ неду́зѣхъ цѣли́теля, въ ско́рбехъ утѣ́шителя, о всѣ́хъ же, чту́щихъ святу́ю его́ па́мять, те́плаго моли́твенника.

Кано́нъ Пресвятѣ́й Богоро́дицѣ со ирмосо́мъ на 6 и свято́му на 8.

Кано́нъ преподобному́ченику Евфроси́ну, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Страда́льче преподо́бне Евфроси́не, моли́твами твои́ми умири́ на́ша ду́ши и сподо́би воспѣ́ти по́стническія по́двиги твоя́, страда́нія и чудеса́, и́миже Госпо́дь на́шъ сла́вно просла́вися.

Изше́дъ въ са́нѣ и́ночестѣмъ отъ Ти́хвинскія оби́тели, преподо́бне о́тче на́шъ, ты́, я́ко пти́ца, прелетѣ́лъ еси́ въ гнѣздо́ свое́, во излю́бленное тобо́ю мѣ́сто пусты́нное, и здѣ́, на о́стровѣ, во бла́тѣхъ непроходи́мыхъ, при мно́гихъ езе́рѣхъ всели́лся еси́, направля́емь руко́ю Живонача́льнаго.

Водрузи́въ на мѣ́стѣ твоего́ вселе́нія Животворя́щій Кре́стъ и ископа́въ себѣ́ ма́лую пеще́ру, вручи́лъ еси́ себе́ Бо́жію промышле́нію, страда́льче преподо́бне, пребыва́я же та́мо въ по́двизѣхъ, бы́ліемъ травны́мъ пита́лся еси́, до́ндеже обрѣто́ша тя́ велѣ́ніемъ Бо́жіимъ, и́щущіи спасе́нія.

Глаго́ловъ и зако́новъ Бо́жіихъ исполни́тель бы́въ, испо́лнился еси́ въ пусты́ни мно́гихъ дарова́ній Ду́ха, о ни́хже рече́ боже́ственный Па́велъ апо́столъ во свои́хъ писа́ніихъ.

Крѣ́постію Христа́, Его́же возлюби́лъ еси́ издѣ́тства все́ю крѣ́постію се́рдца твоего́, возмо́глъ еси́ низложи́ти си́лу вра́жію, сего́ ра́ди дарова́ ти Бо́гъ да́ръ прозорли́вства и си́лу твори́ти чудеса́.

Богоро́диченъ: Стра́сти пло́ти моея́ и непостоя́ніе ума́ моего́ отжени́ отъ мене́, Пречи́стая Дѣ́во, и наста́ви мя́ на стезю́ спасе́нія.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Благи́ми нра́вы украси́вся, плотскíя стра́сти умертви́лъ еси́ ве́ліимъ воздержа́ніемъ и къ вѣ́чнѣй жи́зни му́ченически преста́вился еси́, прехва́льне о́тче на́шъ.

Ве́сь прилежа́ Вседержи́телю, прему́дре о́тче Евфроси́не, ве́ліими по́двиги отгна́лъ еси́ отъ себе́ діа́вола, смири́въ горды́ню его́ твои́мъ преподо́бническимъ смире́ніемъ.

Ангельски пожи́въ на земли́, возвы́сился еси́, о́тче, къ лицезрѣ́нію красоты́ небе́сныя, и́мже ны́нѣ наслажда́яся, мо́лишися о спасе́ніи на́шемъ.

Имѣ́я споспѣшеству́ющую тебѣ́ Бо́жію си́лу, преподобному́чениче, по сме́рти твое́й оби́льно источа́еши чудеса́ прибѣга́ющимъ къ тебѣ́ съ вѣ́рою.

Ско́ро прише́лъ еси́ на по́мощь, я́ко бы́вый са́мъ чте́цъ, ко чтецу́ пусты́нныя це́ркве Іоа́нну, тя́жко страда́вшему отъ нападе́нія лю́таго звѣ́ря лѣсна́го, и, прикосну́вся болѣ́зненнѣй его́ главѣ́, яви́лъ еси́ на не́мъ дѣла́ Бо́жія. Моли́, чудотво́рче, Христа́ Бо́га на́шего, да исцѣли́тъ отъ мра́ка грѣхо́внаго духо́вная на́ша очеса́.

Богоро́диченъ: Тве́рдое упова́ніе на Тя́ возлага́юще, Богороди́тельнице, Тебѣ́ усе́рдно мо́лимся: сохрани́ ве́сь сію́ и вся́ ве́си и гра́ды страны́ Россíйскія отъ вся́кихъ бѣ́дъ, находя́щихъ человѣ́комъ согрѣша́ющимъ.

Сѣда́ленъ, гла́съ 4:

Покори́лъ еси́ ду́хови, пресла́вне о́тче на́шъ, вся́ плотска́я мудрова́нія, ве́ліимъ же воздержа́ніемъ и те́плыми ко Христу́ моли́твами возсія́лъ еси́ въ пусты́ни, я́ко луча́ со́лнечная. Сего́ ра́ди воспѣва́емъ хвалу́ тебѣ́, по достоя́нію тя́ ублажа́юще. [Два́жды.]

Сла́ва, и ны́нѣ, богоро́диченъ:

Стена́ необори́мая христіа́номъ еси́, Богоро́дице Дѣ́во, къ Тебѣ́ бо прибѣга́юще, невреди́ми пребыва́емъ и, согрѣша́юще, и́мамы тя́ моли́твенницу. Тѣ́мже благода́рственно вопіе́мъ Ти́: ра́дуйся, Благода́тная, Госпо́дь съ Тобо́ю.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Процвѣла́ е́сть, я́ко кри́нъ, пусты́ня Синеезе́рская, егда́ преподо́бніи ру́цѣ твои́ и прите́кшихъ къ тебѣ́ бра́тій сотвори́сте въ не́й хра́мъ Бо́жій; тобо́ю же, о́тче, основана́ бы́сть та́мо и оби́тель и́ноческая, въ не́йже и́щущія спасе́нія на пу́ть пра́вый наставля́лъ еси́.

Вельми́ му́дрый путево́ждь къ Ца́рствію Бо́жію, о́тче, бы́лъ еси́, не то́кмо бо и́ноцы, но и вси́, приходи́вшіи къ тебѣ́, а́ки отъ исто́чника, почерпа́ху отъ тебе́ свято́е уче́ніе: вели́къ бо ра́зумъ имѣ́лъ еси́, свѣ́дущь въ Боже́ственныхъ догма́тѣхъ, зане́ издѣ́тства къ науче́нію въ Боже́ственныхъ Писа́ніихъ попремно́гу прилежа́лъ еси́.

Оби́тель твоя́, о́тче, въ годи́ну сму́ты въ Россíйстѣй земли́ яви́ся убѣ́жище мно́зѣмъ правосла́внымъ христіа́номъ: тогда́ бо Россíйстіи лю́діе мече́мъ зловѣ́рныхъ ля́ховъ, а́ки кла́сы серпо́мъ, пожина́хуся, сего́ ра́ди укрыва́хуся во твое́й оби́тели, обрѣта́юще та́мо ду́шъ и тѣле́съ спасе́ніе.

Содѣ́явъ ду́шу твою́ хра́мъ Свята́го Ду́ха, пресла́вне о́тче на́шъ, наслѣ́дникъ го́рняго Ца́рствія и сожи́тель вы́шнихъ си́лъ яви́лся еси́ и прія́лъ еси́ отъ Бо́га да́ръ содѣва́ти зна́менія и чудеса́.

Якоже Госпо́дь на́шъ прикосну́ся руцѣ́ те́щи Петро́вы, огне́мъ жего́мыя, и а́біе исцѣли́ ю́, та́ко и ты́, уго́дниче Христо́въ, предста́тельствомъ твои́мъ предъ Го́сподемъ укроти́лъ еси́ огневи́цу отрокови́цы Марíи, на одрѣ́ сме́рти лежа́вшія, внегда́ призва́ тя́ на по́мощь іере́й Проко́пій въ моли́твѣ свое́й.

Богоро́диченъ: Дѣ́ва пребыла́ еси́ по рождествѣ́, я́коже и пре́жде рождества́ была́ еси́, зане́ Бо́га Сло́ва родила́ еси́, изба́вльшаго на́съ отъ тлѣ́нія кре́стною сме́ртію Свое́ю, Дѣ́во Пренепоро́чная.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Умныма очи́ма, я́ко прозорли́вецъ, предзрѣ́лъ еси́ кончи́ну твою́ отъ иноплеме́нныхъ и истребле́ніе и́ми твоея́ оби́тели, тѣ́мже умоля́лъ еси́, о́тче, укрыва́вшіяся въ не́й прише́льцы и са́мыя и́ноки ра́ди сохране́нія жи́зни изы́ти изъ оби́тели. Са́мъ же ты́, си́лою Свята́го Ду́ха огради́вся, я́ко началово́ждь, въ срѣ́теніе супоста́томъ изше́лъ еси́, и безтре́петно ста́лъ еси́ у креста́, водруже́ннаго тобо́ю при основа́ніи оби́тели, и та́ко приве́лъ еси́ са́мъ себе́, я́коже овча́, на закла́ніе.

Бѣснíи ля́хове, ви́дѣвше тя́, о́тче, безтре́петно стоя́ща у креста́ и разумѣ́вше, я́ко ты́ еси́ нача́льникъ оби́тели, рѣ́ша ти́ де́рзостно: да́ждь на́мъ имѣ́ніе монастыря́ твоего́. Ты́ же со смире́ніемъ и́ноческимъ отвѣ́тствовалъ еси́, указу́я на созда́нный тобо́ю хра́мъ: все́ имѣ́ніе мое́ обрѣта́ется въ се́мъ хра́мѣ Пречи́стыя Богоро́дицы.

Услы́шавше безбоя́зненный отвѣ́тъ тво́й о имѣ́ніи, де́рзостніи ля́хове разъяри́шася, и се́ еди́нъ отъ во́инъ вы́ю твою́ пресѣче́ мече́мъ до полу́, другíй же раздроби́ честну́ю главу́ твою́, и та́ко пре́далъ еси́ чи́стую ду́шу твою́ въ ру́цѣ Го́сподеви.

На убíйцы укрѣпи́вый тя́, о́тче, Подвигополо́жникъ Христо́съ, пріи́мъ тво́й ду́хъ въ небе́сная селе́нія по сконча́ніи твое́мъ, сотвори́ тя исто́чникъ чуде́съ съ любо́вію и вѣ́рою къ тебѣ́ прибѣга́ющимъ.

Отъ нанесе́нія главотя́жей и убру́сцевъ апо́стола Па́вла вѣ́рующіи исцѣля́хуся, я́коже богоглаго́ливый Лука́ повѣству́етъ. Не про́сты же си́лы твори́тъ Госпо́дь прикоснове́ніемъ и твои́хъ веще́й: нагла́вникъ бо тво́й, о́тче, и пе́рсть отъ гро́ба твоего́, и еле́й отъ лампа́ды у ра́ки моще́й твои́хъ источа́ютъ, твои́ми моли́твами о на́съ, исцѣле́нія боля́щимъ.

Богоро́диченъ: Исцѣли́, Пречи́стая, неду́гующаго ума́ моего́ помраче́ніе, Врача́ ро́ждшая, Христа́, Всенепоро́чная Дѣ́во.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Пріи́мъ му́ченическую тѣле́сную кончи́ну, о́тче, возне́слся еси́ ду́хомъ твои́мъ въ го́рняя селе́нія моли́тися о на́съ Вседержи́телю, моща́ми же твои́ми съ на́ми пребыва́еши, явля́я тѣ́ми мно́гая зна́менія и чудеса́.

Глаго́ломъ Бо́жіимъ свидѣ́тельствована бы́сть си́ла чуде́съ твои́хъ, о́тче Евфроси́не: одержи́ма бо су́щи ве́ліимъ бѣсо́вскимъ пла́чемъ, раба́ Бо́жія Ага́ѳія, егда́ бы́сть въ ра́зумѣ, слы́ша гла́съ свы́ше: гряди́ въ пусты́ню Синеезе́рскую, помоли́ся чудотво́рцу Евфроси́ну и исцѣлѣ́еши. Та́яже пріи́де, и помоли́ся, и исцѣлѣ́.

Ели́цы притека́ху съ вѣ́рою къ ра́цѣ моще́й твои́хъ, ско́рый помо́щниче и моли́твенниче, вси́ исцѣля́хуся, мо́лимъ тя́ у́бо: по́мощію твое́ю посѣти́ и ны́, тѣ́ломъ и душе́ю немощству́ющія.

Умиле́нно призыва́юще свято́е и просла́вленное и́мя твое́, о́тче, крѣ́пость и исцѣле́ніе пріима́ху отъ тебе́ немощству́ющіи пло́тію и ду́хомъ, ско́рбніи же и удруче́нніи печа́льми жите́йскими обрѣта́ху отъ тебе́ ско́рую по́мощь и утѣше́ніе.

Невозмо́жно е́сть исчи́слити мно́гое мно́жество чуде́съ твои́хъ, цѣли́телю ду́шъ и тѣле́съ на́шихъ, о́тче Евфроси́не, сего́ ра́ди творя́ще па́мять твою́, благода́рственно благословля́емъ просла́вльшаго тя́, отце́въ Бо́га благослове́ннаго.

Богоро́диченъ: Отцу́ Собезнача́льнаго Сы́на пло́тію родила́ еси́, Пренепоро́чная Дѣ́во, Его́же моли́ со преподобному́ченикомъ Евфроси́номъ, да сотвори́тъ ны́ сы́ны Своего́ Ца́рствія и наслѣ́дники обѣтова́нія вѣ́чнаго.

Конда́къ, гла́съ 8:

Подража́я житію́ дре́внихъ оте́цъ, богому́дре о́тче Евфроси́не, красоту́ мíра сего́ возненави́дѣлъ еси́, и, въ пусты́ню всели́вся, вѣ́ру Христо́ву, я́коже щи́тъ, въ се́рдце твое́ прія́лъ еси́, съ не́юже изше́лъ еси́, я́ко до́бръ во́инъ Царя́ небе́снаго, не на бра́нь проти́ву пло́ти и кро́ве, но на бра́нь проти́ву ко́зней неви́димаго врага́, и сего́ вознесе́нную горды́ню, по да́ннѣй тебѣ́ отъ Ду́ха Свята́го благода́ти, глубо́кимъ смире́ніемъ твои́мъ низложи́лъ еси́, и отъ небе́снаго Мздовозда́теля неувяда́емымъ вѣнце́мъ побѣ́ды вѣнча́лся еси́. Сего́ ра́ди, соше́дшеся любо́вію, вопіе́мъ ти́: ра́дуйся, о́тче Евфроси́не, пусты́нное украше́ніе.

Икосъ:

Ангельски пожи́въ на земли́, дости́глъ еси́, о́тче, лицезрѣ́нія красоты́ Бо́жія, и́мже наслажда́яся на небеси́, мо́лишися о спасе́ніи на́шемъ. Сего́ ра́ди мы́, земнíи, дне́сь па́мять твою́ пра́зднующе, любо́вію вопіе́мъ ти́: ра́дуйся, благочести́ваго ко́рене правосла́вныхъ роди́телей пречестна́я о́трасле; ра́дуйся, отъ младе́нства Христа́ возлюби́вый; ра́дуйся, въ дѣ́тствѣ и ю́ности и́ноческимъ подвиго́мъ научи́выйся; ра́дуйся, дре́внимъ пусты́нникомъ подража́телю; ра́дуйся, Новгоро́дстѣй Це́ркви въ чи́нѣ чтеца́ церко́внаго послужи́вый; ра́дуйся, кри́не, посредѣ́ бла́тъ пусты́нныхъ процвѣты́й; ра́дуйся, му́дрый наста́вниче и́щущимъ душе́внаго спасе́нія; ра́дуйся, цѣли́телю ду́шъ и тѣле́съ прося́щимъ твоего́ предъ Бо́гомъ заступле́нія; ра́дуйся, похвало́ мона́шествующихъ; ра́дуйся, да́ръ прозорли́вства и си́лу чуде́съ отъ Бо́га пріе́мый. Ра́дуйся, о́тче Евфроси́не, пусты́нное украше́ніе.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Распали́въ се́рдце твое́ любо́вію крѣ́пкою ко Христу́, о́тче, пла́мень по́хоти плотскíя и о́гнь я́рости ея́ претвори́лъ еси́ въ ро́су и всю́ си́лу и́хъ угаси́лъ еси́, поя́ Бо́гу въ безмо́лвіи пусты́ннѣмъ: благослове́нъ еси́, Го́споди Бо́же оте́цъ на́шихъ.

Пло́ти твое́й не послужи́лъ еси́, но, апо́стольски распина́я ю́ со страстьми́ и похотьми́, покори́лъ еси́ ду́ху и че́стенъ хра́мъ Ду́ху Свято́му себе́ сотвори́лъ еси́, взыва́я: благослове́нъ еси́, Го́споди Бо́же оте́цъ на́шихъ.

Просвѣти́въ твое́ се́рдце смиренному́дріемъ, вѣ́ренъ бы́лъ еси́ нача́льникъ собо́ра и́ноковъ, наставля́я, и уча́, и вся́ приводя́ къ Бо́жіей во́ли, пою́щія: благослове́нъ еси́, Го́споди Бо́же оте́цъ на́шихъ.

Ве́ліимъ благоразу́міемъ, о́тче на́шъ Евфроси́не, покори́лъ еси́ ду́хови го́рдость ума́ жите́йскаго, со смире́ніемъ поя́: благослове́нъ еси́, Го́споди Бо́же оте́цъ на́шихъ.

Прекра́сный цвѣ́тъ, о́тче, въ дому́ Бо́жіи произра́слъ еси́, мно́гими добродѣ́тельми красу́яйся и арома́ты чуде́съ благоуха́яй.

Богоро́диченъ: Умъ на́шъ плѣни́ въ послуша́ніе вѣ́ры, ду́хъ и ду́шу всесоверше́нны сотвори́ и тѣ́ло въ прише́ствіе Го́спода на́шего Іису́са Христа́ соблюди́ непоро́чно моли́твами Твои́ми, Всенепоро́чная Богороди́тельнице.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Широ́кій пу́ть, вводя́щій въ па́губу, презрѣ́лъ еси́, страда́льче преподо́бне, и тѣ́сными враты́ вше́лъ еси́ въ небе́сное Ца́рствіе. Тѣ́мже мо́лимъ тя́: укрѣпи́ на́съ моли́твами твои́ми понести́ благо́е и ле́гкое и́го креста́, да и мы́ во вре́мя благопотре́бное вни́демъ въ поко́й Бо́га благослове́ннаго.

Бо́дреннымъ ума́ трезве́ніемъ и те́плымъ ко Христу́ моле́ніемъ діа́вола посрами́лъ еси́, прехва́льне страстоте́рпче, стра́стныя же того́ прило́ги отгна́лъ еси́, крѣ́пкою вѣ́рою во Христа́ вооружи́вся, и та́ко вше́лъ еси́ въ поко́й Бо́га благослове́ннаго.

Ангельски, о́тче, на земли́ пожи́лъ еси́, тѣ́мже ны́нѣ со а́нгелы лику́етъ на небеси́ ду́хъ тво́й; моли́ у́бо о на́съ, чту́щихъ па́мять твою́, небе́сный жи́телю, да всели́тъ Христо́съ и на́съ въ поко́й Бо́га благослове́ннаго.

Во вся́ дни́ житія́ твоего́ неукло́нно ше́ствовалъ еси́, прему́дре о́тче на́шъ, стезя́ми боже́ственными къ небеси́, идѣ́же ны́нѣ пребыва́я, съ ли́ки а́нгельскими ра́достно воспѣва́еши отце́въ Бо́га благослове́ннаго.

Предстои́ши ны́нѣ престо́лу Вседержи́теля, преблаже́нне о́тче Евфроси́не, на́мъ же, на земли́ су́щимъ, явля́ешися вои́стинну а́нгелъ-храни́тель, утвержда́я ны́ въ вѣ́рѣ уче́ньми твои́ми и зна́меньми чуде́сными и соблюда́я ны́ въ чи́стѣмъ исповѣ́даніи отце́въ Бо́га благослове́ннаго.

Богоро́диченъ: Богоуго́днѣ пожи́вшему и страда́льчески житіе́ сконча́вшему преподобному́ченику Евфроси́ну послѣ́довати наста́ви на́съ, Всенепоро́чная, потребля́ющи отъ ду́шъ на́шихъ прило́ги лука́выхъ де́моновъ и возводя́щи при́сно умы́ на́ша къ зрѣ́нію и исполне́нію за́повѣдей Сы́на Твоего́, Бо́га на́шего.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Изба́вився отъ сѣте́й ловя́щихъ тя́, почи́лъ еси́ во благоуха́ніи святы́ни и Го́сподеви ны́нѣ предстои́ши, поя́ со безпло́тными: свя́тъ, свя́тъ, свя́тъ еси́, Бо́же, Тро́ице Вседѣ́тельная.

Яко побѣди́тель мы́сленныхъ враго́въ, прехва́льне о́тче, вѣнце́мъ побѣ́ды неувяда́емымъ увѣнча́лся еси́ отъ Царя́ всѣ́хъ. Сего́ ра́ди мо́лимъ тя́ усе́рдно: моли́ бла́гость Вседержи́теля дарова́ти Вѣнцено́сному Импера́тору на́шему [и́мярекъ] на супоста́ты побѣ́ду.

Яко предста́телю на́шему и ско́рому помо́щнику, су́щему въ небе́сныхъ оби́телехъ, мо́лимся тебѣ́: Влады́ку всѣ́хъ моли́ сохрани́ти отъ гла́да, тру́са, пото́па, огня́, меча́, отъ наше́ствія иноплеме́нниковъ и междоусо́бныя бра́ни ве́сь сію́ и вся́ ве́си, гра́ды и страны́ христіа́нскія и вся́ ны́ спасти́, благоче́стно тя́ почита́ющія.

Честна́я ра́ка святы́хъ моще́й твои́хъ, о́тче пречу́дне, бога́тно источа́етъ исцѣле́нія приходя́щимъ къ тебѣ́ съ вѣ́рою и воздвиза́етъ вѣ́рныя сла́вити ве́лія твоя́ по́двиги и чудеса́.

Пріими́, преблаже́нне о́тче на́шъ Евфроси́не, хвале́бная на́ша пѣснопѣ́нія, любо́вію тебѣ́ возноси́мая, осѣня́й на́съ твои́ми моли́твами и ускори́ на по́мощь благода́тнымъ заступле́ніемъ твои́мъ во вре́мя благопотре́бное.

Богоро́диченъ: Ка́мень краеуго́льный — Христо́съ — вѣ́рнымъ е́сть основа́ніе, невѣ́рнымъ же ка́мень претыка́нія и собла́зна; на вѣ́рнѣмъ ка́мени, Влады́чице, утверди́ мое́ помышле́ніе и спаси́ мя Ма́тернимъ Твои́мъ дерзнове́ніемъ къ Сы́ну Твоему́, Бо́гу на́шему.

Свѣти́ленъ:

Свѣ́та Пода́тель, Госпо́дь, поста́ви тя́ свѣти́льника свѣ́тла Це́ркви Свое́й, о́тче пресла́вне Евфроси́не, озари́ у́бо свѣ́томъ твои́мъ и вся́ ны́, почита́ющія святу́ю па́мять твою́. [Два́жды.]

Сла́ва, и ны́нѣ, богоро́диченъ:

Свѣще́ та́инственная, Богоневѣ́сто, возсія́й свѣ́тъ ра́зума су́щимъ во тмѣ́ неразу́мія и спаси́ вся́ ны́, благоче́стно пою́щія Тя́ и я́ко Ма́терь Бо́жію велича́ющія.

На хвали́техъ стихи́ры, гла́съ 8:

Богоно́сне, преблаже́нне о́тче Евфроси́не, вся́ плотска́я мудрова́нія ду́хови покори́лъ еси́, посто́мъ же и моли́твою утверди́вся, я́ко зла́то, въ горни́лѣ искуше́но, просія́лъ еси́ и хра́мъ Свята́го Ду́ха яви́лся еси́, собра́въ же мона́шествующихъ мно́жества, уче́ньми твои́ми, я́коже лѣ́ствицею, на высоту́ добродѣ́телей сія́ возве́лъ еси́. Помина́й ны́, чту́щія па́мять твою́, и моли́ спасти́ся душа́мъ на́шимъ. [Два́жды.]

Возсія́ дне́сь пресла́вная и всепра́зднственная па́мять твоя́, пресла́вне о́тче Евфроси́не, созыва́ющи многочи́сленное по́стниковъ сосло́віе и преподо́бныхъ ликостоя́нія, человѣ́ки же вся́ и а́нгелы къ похвале́нію ди́внаго во святы́хъ Свои́хъ Христа́ Бо́га на́шего: притека́юще бо ко свяще́ннѣй ра́цѣ моще́й твои́хъ, исцѣле́нія да́ры оби́льно пріе́млемъ и тебе́ вѣнча́вшаго Христа́ прославля́емъ, Спа́са ду́шъ на́шихъ.

Отче богому́дре Евфроси́не, издѣ́тства Христа́ возлюби́въ, ты́ о и́мени Его́ мно́гія труды́ и ско́рби поне́слъ еси́ и да́же до сме́рти пострада́лъ еси́. Предстоя́ у́бо ны́нѣ престо́лу Вседержи́теля и неизрече́нныя добро́ты Его́ наслажда́яся, моли́ся о на́съ, свѣ́тло пра́зднующихъ честну́ю па́мять твою́ и просла́вльшаго тя́ Христа́ велича́ющихъ.

Сла́ва, гла́съ 2:

Пріиди́те, вси́ вѣ́рніи, въ пѣ́снехъ возвели́чимъ Христо́ва уго́дника, преблаже́ннаго ста́рца Евфроси́на: се́й бо, измла́да пло́ть ду́хови покори́въ, по стопа́мъ Госпо́днимъ въ житіи́ свое́мъ ше́ствова, тѣ́мже и наслѣ́дова небе́сное Ца́рствіе. Сего́ ра́ди къ нему́ си́це возопіи́мъ: ра́дуйся, преподо́бне о́тче на́шъ, му́чениче Евфроси́не, вели́каго да́ра чудотворе́ній отъ Христа́ сподо́бивыйся; ра́дуйся, те́плый предста́телю на́шъ предъ Го́сподемъ и моли́твенниче о душа́хъ на́шихъ.

И ны́нѣ, богоро́диченъ:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя́ подъ кро́вомъ Твои́мъ.

Славосло́віе вели́кое. Тропа́рь свята́го. И про́чее до конца́, по уста́ву.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 8: Восхва́лятся преподо́бніи во сла́вѣ* и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, я́ко ди́вна сотвори́ Госпо́дь. Апо́столъ къ Тимоѳе́ю, зача́ло 291. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Ма́рка, зача́ло 37. Прича́стенъ: Ра́дуйтеся пра́ведніи о Го́сподѣ, пра́вымъ подоба́етъ похвала́.

Источникъ: Слу́жба свято́му преподобному́ченику Евфроси́ну, Синеезе́рскому чудотво́рцу. Его́же па́мять соверша́емъ Мѣ́сяца Ма́рта въ 20-й де́нь. — Пг.: Сѵнода́льная Тѵпогра́фія, 1914. — С. 5-45.

/ Къ оглавленію раздѣла /


Наверхъ / Къ титульной страницѣ

0