Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 30 апрѣля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 20-й де́нь.
Преподо́бныхъ оте́цъ на́шихъ, во оби́тели свята́го Са́ввы убіе́нныхъ.

[ВЕЧЕРЪ,]
Стихи́ры, гла́съ 4. Подо́бенъ: Яко до́бля.

Жела́ній кра́йнѣйшему* до конца́ прилѣжа́ще,* жите́йскія красоты́, преподо́бніи,* я́ко уме́ты, вся́ вмѣни́сте* и еди́на пребыва́ющая* бдѣ́ніемъ и моли́твами,* дожде́мъ же и ва́ромъ стяжа́сте,* единожи́теле вку́пѣ бы́вше,* согра́ждане а́нгеломъ яви́стеся благода́тію.

И дреко́ліемъ біе́ми,* и ка́меніемъ намета́еми,* и ору́жіи разсѣка́еми,* единомы́слія не разруши́сте, му́ченицы,* любо́вію свя́занніи* и жела́ніемъ бра́тскимъ,* но, вку́пѣ умерщвля́еми* и разсѣка́еми на у́ды, страстоте́рпцы,* на трапе́зѣ положи́стеся Боже́ственнѣй,* я́ко же́ртвы непоро́чныя.

И огне́мъ изнуря́еми,* и удавле́ніемъ стяга́еми,* ду́ши преда́сте, я́ко непоро́чныя же́ртвы,* му́ченицы сла́вніи,* въ ру́цѣ Всецаря́,* и совокупи́стеся съ ли́ки безпло́тныхъ си́лъ,* вѣ́чнующую наслѣ́довасте сла́ву.* Ейже причасти́тися ва́съ восхваля́ющимъ* непреста́нно моли́теся.

Сла́ва, и ны́нѣ, богоро́диченъ, гла́съ и подо́бенъ то́йже:

Покая́нія изря́дное* и спаси́тельное врачевство́,* Яже Бо́га ро́ждшая, Спа́са моего́,* и сле́зъ то́ки,* и часа́ по́мыслъ гро́знаго и стра́шнаго,* и Суда́ неумы́тнаго* Ты́ ми да́руй избѣжа́ти моли́твами Твои́ми,* о Дѣ́во! муче́нія тре́петнаго,* и Боже́ственную получи́ти благода́ть.

Крестобогоро́диченъ, подо́бенъ то́йже:

На Крестѣ́ Тя́ я́ко узрѣ́* пригвожде́на, Го́споди,* Агница и Ма́ти Твоя́ дивля́шеся* и — что́ видѣ́ніе сіе́, — взыва́ше, —* Сы́не вожделѣ́нне?* Сія́ Тебѣ́ непокори́вый собо́ръ воздаде́ беззако́нный,* и́же мно́гихъ Твои́хъ чуде́съ наслади́выйся.* Но сла́ва неизглаго́ланному* соше́ствію Твоему́, Влады́ко.


[НА УТРЕНИ,]
Кано́нъ, его́же краегране́сіе: Пѣ́сньми сла́влю му́ченики единонра́вныя. Творе́ніе ки́ръ Стефа́на Савваи́та. Гла́съ 8.

Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, Еди́ному Влады́цѣ.

Пѣ́сньми боговѣнча́нное мно́жество свяще́нныхъ му́ченикъ Твои́хъ жела́ющему похвали́ти, Христе́, съ небесе́ пода́ждь ми́ свѣ́тъ ра́зума си́хъ мольба́ми, да воспою́ боговѣща́нную пѣ́снь.

Скве́рну отверго́сте пло́ти и ду́ха, пребога́тіи, мíра смертоно́сныхъ сласте́й избѣ́гше, равноа́нгельное же житіе́ пожи́вше, въ вы́шнее преидо́сте жили́ще.

Зако́номъ ду́ха я́вѣ у́ды упра́вивше ва́ша и чу́вства, хра́мы освяще́нны Бо́гу показа́стеся, му́ченицы богоно́сніи, въ ва́съ бо Христо́съ водвори́ся.

Бога́тство, тли́мое на земли́, оста́вльше, святíи, и кра́сная житія́, я́ко со́нъ, презрѣ́вше, Христу́ угоди́вше, недви́жимое ца́рство ны́нѣ воспрія́сте.

Богоро́диченъ: Лѣ́ствица яви́лася еси́ мы́сленная, ю́же Іа́ковъ ви́дѣ избра́нный Бо́жій, изъ нея́же неизрече́ннымъ сло́вомъ про́йде Безпло́тный, пло́ть непрело́жно бы́въ па́че сло́ва изъ Тебе́, Богоро́дице.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Освяти́вше все́ ва́ше, му́ченицы, житіе́, нескве́рно вои́стинну всеви́дящему Бо́гу принесо́сте всесожже́нія боже́ственна са́ми себе́ и соверше́нныя вѣнцы́ прія́сте.

Са́ввы богоно́снаго я́ко ученицы́ и́скренніи, е́же кромѣ́ пли́щевъ возжела́вше отше́ствіе, невозвра́тно стезе́ю приско́рбною ше́ствующе, къ жи́зни достиго́сте безконе́чнѣй.

Воздѣ́лавше сѣ́мя, е́же въ ва́съ, преподо́бніи, всѣ́яное сло́во, и сле́зными то́ки оби́льно напои́вше, стори́чествующій кла́съ Бо́гу принесо́сте, плодоноси́вше.

Богоро́диченъ: Всели́вся въ Дѣ́ву пло́тски, Го́споди, яви́лся еси́ человѣ́комъ, я́коже подоба́ше зрѣ́ти Тя́, Юже и показа́лъ еси́ я́ко и́стинную Богоро́дицу и вѣ́рнымъ по́мощь, еди́не Человѣколю́бче.

Сѣда́ленъ, гла́съ 8. Подо́бенъ: Повелѣ́нное та́йно.

Воздержа́ніемъ страсте́й огнепа́льныя умертви́вше зра́ки и двиза́нія, по́стницы богопрія́тніи, послѣ́дующе стопа́мъ вся́ созда́вшему еди́ному Бо́гу, я́коже прія́тна же́ртва, жива́ и освяще́нна, принесо́стеся заколе́ніемъ ру́къ ва́рварскихъ, біе́ми, закала́еми и ну́ждно пресѣка́еми.

Сла́ва, и ны́нѣ, богоро́диченъ:

Богора́дованная, Чи́стая, благослове́нная, за милосе́рдіе щедро́тъ изъ Тебе́ ро́ждшагося съ вы́шними си́лами и арха́нгелы и со всѣ́ми безпло́тными о на́съ моли́ непреста́нно, да́ти на́мъ пре́жде конца́ проще́ніе, и очище́ніе грѣхо́въ, и житія́ исправле́ніе, я́ко да обря́щемъ ми́лость.

Крестобогоро́диченъ:

Сы́на Твоего́ и Бо́га Кресто́мъ, Дѣ́во, сохраня́еми при́сно, де́монскія прило́ги и ко́зни побѣжда́емъ, су́щую Богоро́дицу Тя́ вои́стинну воспѣва́юще, и любо́вію, вси́ ро́ди, блажи́мъ, Пречи́стая, я́коже прорекла́ еси́. Тѣ́мже согрѣше́ній на́шихъ оставле́ніе моли́твами Твои́ми да́руй.

Пѣ́снь 4.

Ирмо́съ: Всѣ́лъ еси́ на ко́ни, апо́столы Твоя́, Го́споди, и прія́лъ еси́ рука́ма Твои́ма узды́ и́хъ, и спасе́ніе бы́сть ѣжде́ніе Твое́ вѣ́рно пою́щимъ: сла́ва си́лѣ Твое́й, Го́споди.

Въ пусты́ни безво́днѣй терпя́щія зря́ вра́гъ, добродѣ́тельми же разли́чными крася́щіяся, непобѣди́мыя му́ченики, распаля́шеся лю́тѣ, за́вистію обложе́нъ, и на ополче́ніе готовля́шеся.

Укорени́въ пре́лесть во свои́хъ ему́ ученицѣ́хъ на дру́гъ дру́жное убíйство поуча́ше ва́рварская колѣ́на змíй лука́вый, и́миже изъ пусты́ни изгна́ти преподо́бныя тща́шеся.

Сверѣ́по и́же окре́стныя объе́мъ, я́коже возжелѣ́, отгна́ти у́бо сія́ не возмо́же непобѣди́мыя, пра́ведныхъ сопротивобо́рецъ, побѣжде́нъ же бы́въ неви́димо, окоявле́ннѣ вооружи́ся.

Яда и неи́стовства испо́лненъ, устреми́ся со ору́жники злонача́льникъ, звѣрови́дно же блаже́ннымъ натече́ и ра́нами нестерпи́мыми кро́вныя пото́ки излія́.

Теку́щаго истя́зоваху вещества́, зла́та тлѣ́ннаго сокро́вища, и́же на земли́ упова́нія утве́рждшіи, до́бліи же на небеса́ поло́жше упова́нія, вопія́ху: сла́ва си́лѣ Твое́й, Го́споди.

Якоже звѣ́ріе, дреко́льми неми́лостивно, и мечи́ преподо́бныя, и ка́меніемъ ураня́ху, своя́ старѣ́йшины сказа́ти веля́ще, но пребыва́ху вси́, зако́номъ любве́ утвержда́еми.

Богоро́диченъ: Дѣ́во и Ма́ти, Ты́ — апо́столовъ удобре́ніе, и му́чениковъ святы́хъ утвержде́ніе, и преподо́бныхъ похвала́ же и спасе́ніе, вѣ́рно сладкопою́щихъ: сла́ва си́лѣ Твое́й.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́, окая́ннаго? Но обрати́ мя, и къ свѣ́ту за́повѣдей Твои́хъ, пути́ моя́ напра́ви, молю́ся.

Научи́вшеся любве́, Спа́се, сою́зу соверше́нія преподо́бніи и, нака́зани Тобо́ю, ду́ши положи́ша по свои́хъ дру́зѣхъ, Твои́мъ па́че человѣ́ковъ во́льнымъ страсте́мъ подо́бящеся.

Вельми́ па́че естества́ пло́тію во́лею рожде́йся, Христе́, повелѣ́ніемъ Твои́мъ сме́рти яви́шася держа́внѣе, и́бо, Твои́мъ составля́ющеся зако́номъ, умре́ти по друзѣ́хъ благохва́льно богому́дріи тща́хуся.

Окропи́вше иссо́помъ креще́нія мы́сленнымъ ду́ши, ва́шими же а́біе окропи́стеся кровьми́, преподо́бніи, во стремле́ніи же огня́, я́ко зла́то, искуси́вшеся, прія́тна бы́сте же́ртва благово́нна Бо́гу.

Богоро́диченъ: Ма́тернее дерзнове́ніе е́же къ Сы́ну Твоему́ стяжа́вши, Пречи́стая, сро́днаго промышле́нія на́шего не пре́зри, мо́лимся, я́ко Тя́ и еди́ну христіа́не во Влады́цѣ очище́ніе ми́лостивно предлага́емъ.

Пѣ́снь 6.

Ирмо́съ: Къ могу́щему мя́ спасти́ Го́споду, изъ глубины́ грѣхо́вныя возопи́хъ, и отъ тли́ возведе́ живо́тъ мо́й, я́ко Человѣколю́бецъ.

Преще́ній ва́рварскихъ не убоя́шася уго́дницы Христо́вы, житіе́ бо непреста́ннымъ поуче́ніемъ сме́ртнымъ предста́виша.

Мня́ще богатѣ́ти, нестяжа́тели нечести́віи неща́дно му́чаху, и́же тлѣ́нная у́бо пове́ргшія, стяжа́вшія же нетлѣ́нная.

Си́лою непобѣди́мою одѣ́явшеся, Христо́вы страда́льны побѣди́ша мы́сленныя лестцы́ и ва́рварская шата́нія.

Богоро́диченъ: Яко на о́блацѣ ле́гцѣмъ, пріи́де на Тя́ ца́рствуяй Госпо́дь низложи́ти, Всенепоро́чная, еги́петская рукотворе́нія.

Конда́къ, гла́съ 4. Подо́бенъ: Вознесы́йся.

Земны́хъ и тлѣ́нныхъ наслажде́ніе презрѣ́вше я́вѣ, преблаже́нніи, пусты́нное житіе́ изво́ливше, мíра же краснѣ́йшее, и пи́щи вре́менныя возненави́дѣвше, отону́дуже сподо́бистеся небе́снаго Ца́рствія, съ ли́ки му́ченикъ и по́стникъ веселя́щеся. Тѣ́мже, чту́ще па́мять ва́шу, вопіе́мъ ва́мъ прилѣ́жно: отъ бѣ́дъ на́съ, отцы́, изба́вите.

Пѣ́снь 7.

Ирмо́съ: Халде́йскія пе́щи всепа́губную си́лу угаси́вше, о́бразомъ Ангела снизше́дшаго, Зижди́телю ю́ноши взыва́ху: благослове́нъ еси́ и хва́льный, Бо́же оте́цъ на́шихъ.

Изнемого́ша вку́пѣ бра́ни проти́вныхъ полко́въ, ви́димыхъ и неви́димыхъ, въ ра́нахъ зря́ще му́ченики, пѣсносло́вящія: благослове́нъ еси́ и хва́льный, Бо́же оте́цъ на́шихъ.

Тебѣ́, Христу́, уневѣ́стившеся и жела́ніемъ Твои́мъ уязвля́емы, еди́наго Су́щаго возлюби́ша; ро́дъ, и оте́чество, и бога́тство отве́ргше, прибѣга́теліе Твои́, о Изба́вителю, Бо́же оте́цъ на́шихъ.

Скверноубíйство ва́рваровъ не претвори́ рачи́тели твоя́, Христе́, пусты́ннаго богослуже́нія, убива́ющихъ бо тѣ́ло не убоя́шася, Твоя́ держа́ще за́повѣди, я́коже незы́блемое основа́ніе.

Все́ къ Тебѣ́ преложи́вше отъ мíра жела́ніе, Христе́, я́рость же то́кмо на грѣ́хъ вооружи́вше, Тебѣ́ угоди́ша, всему́дрымъ объе́мшеся по́мысломъ, уго́дницы Твои́, Го́споди.

Зако́нъ, богопи́санный вну́трь на скрижа́лѣхъ серде́цъ ва́шихъ, отъ Бо́га, му́ченицы, пріе́мше, еди́наго въ Тро́ицѣ Бо́га проповѣ́дасте, Тому́ вопію́ще: благослове́нъ еси́ и хва́льный, Бо́же оте́цъ на́шихъ.

Богоро́диченъ: Во свѣ́тѣ Госпо́дни ходя́щіи, пріиди́те, воспои́мъ боже́ственную две́рь Царя́ ца́рствующихъ, Марíю, чи́стую Богоро́дицу вои́стинну, я́ко упова́ніе ду́шъ на́шихъ.

Пѣ́снь 8.

Ирмо́съ: Нече́стія орга́ны ину́ю пѣ́снь, благоче́стія же Боговѣща́нніи поя́ху гу́сли: благослови́те, дѣла́ Госпо́дня, Христа́ во вѣ́ки.

Небе́снымъ чино́мъ ревнова́вше, равноа́нгельни всено́щными стоя́ніи во бдѣ́ніихъ поя́ху: благослови́те, вся́ дѣла́ Госпо́дня, Христа́ во вѣ́ки.

Кре́стъ взе́мше, Тебѣ́, Влады́цѣ, послѣ́доваша вседу́шно му́ченицы, пою́ще: благослови́те, вся́ дѣла́ Госпо́дня, Христа́ во вѣ́ки.

Всенра́вно тѣ́ло, и ду́шу, и ду́хъ очи́стивше, всесожже́нія Бо́гу принесо́стеся, во огни́ опали́вшеся, отцы́, Христа́ превознося́ще во вся́ вѣ́ки.

Тро́иченъ: Во дву́хъ ѵпоста́сѣхъ Тя́ бы́ти ху́лящіи нераздѣли́маго да постыдя́тся, я́ко четвери́цу чту́щіи: мы́ бо Тебѣ́ Еди́ному Боже́ственныя Тро́ицы покланя́емся.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Разли́чно обна́жшеся по́стницы и побѣди́вше міроде́ржца ко́зни, посрами́ша му́жески я́ко страда́льцы ва́рварское озлобле́ніе, си́хъ претерпѣ́вше стремле́нія. Тѣ́мже и вѣнцы́ сугу́быя отъ пра́веднаго Подвигополо́жника прія́ша.

Въ верте́пахъ и пеще́рахъ, по́стнически жи́знь проходя́ще, блаже́нніи, въ пеще́рѣ тѣ́снѣй про́пасти затворе́ни бы́сте несвѣ́тлѣй, обагре́ни кровьми́, жже́ніемъ же огня́ и и́же отъ ды́ма, лю́тѣ па́рою смѣша́емою, уда́влени бы́вше, побѣдоно́сцы яви́стеся.

Пое́мъ по́двиги па́че естества́, и́миже проти́ву грѣха́ пострада́сте, ю́ношески противоста́вше, я́ко Христо́вы во́ини сла́вніи, и́бо побѣди́сте благосла́вно, и, ны́нѣ предстоя́ще съ чи́нми святы́хъ Всевысоча́йшему, на́съ помина́йте.

Съ Са́ввою отце́мъ и наста́вникомъ, я́ко и́скренняя ча́да, блаже́нніи, на небесѣ́хъ заре́ю одѣ́яни трисія́нною, о на́съ моли́теся, соученицѣ́хъ же и пѣвцѣ́хъ, ми́ръ дарова́ти о́бщій це́рквамъ и спасе́ніе душа́мъ на́шимъ.

Богоро́диченъ: Отринове́нныя небе́снаго житія́ и па́дшія окая́нно въ сме́рть, па́ки на́съ, Ма́ти бы́вши Изба́вителя, воззвала́ еси́, Пречи́стая, и къ пе́рвому па́ки тещи́ сподо́била еси́ оте́честву. Тѣ́мже Тя́, Богома́ти, непреста́нно велича́емъ.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 100 об. – 103 об.

/ Къ оглавленію раздѣла /


Наверхъ / Къ титульной страницѣ

0