Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 19-й де́нь.
Святы́хъ му́ченикъ Хриса́нѳа и Да́ріи.

[ВЕЧЕРЪ,]
Стихи́ры, гла́съ 4. Подо́бенъ: Да́лъ еси́ зна́меніе.

Боже́ственнаго позна́нія* пріе́мъ осія́ніе,* просвѣти́лъ еси́ о́чи, прему́дре, се́рдца твоего́,* и пре́лести мра́къ отгна́лъ еси́ смы́сленно,* и исповѣ́далъ еси́ Христа́,* пло́ть пріе́мша всѣ́хъ Го́спода.* Отону́дуже укрѣпля́емь* си́лою Ду́ха, Хриса́нѳе,* му́къ вы́шши яви́лся еси́, всехва́льне.

Вра́жія пре́лести* и сла́сти разжже́нія,* я́ко паучи́ну, вмѣни́лъ еси́,* во мра́чнѣ же затво́рѣ ста́въ,* Боже́ственнымъ сія́ніемъ озари́лся еси́,* и благово́нія разу́мнаго испо́лнился еси́,* посреди́ стоя́ смра́да,* и приве́лъ еси́, я́ко невѣстокраси́тель всеизря́днѣйшій,* Христу́ невѣ́сту непоро́чну,* оскверни́ти тя́ тща́щуюся.

Уязви́вшися раче́ніемъ* сладча́йшимъ Зижди́теля,* пре́лести безбо́жія до конца́ уклони́лася еси́* и черто́га Боже́ственнаго вмѣсти́лася еси́ вну́трь,* вневѣ́стившися Христу́ муче́ніи мно́гими тѣлесе́,* Да́рія великоимени́тая,* боже́ственное прія́телище Ду́ха,* страда́льцевъ удобре́ніе* и дѣ́въ украше́ніе.

Сла́ва, и ны́нѣ, богоро́диченъ:

Не́мощь и разслабле́ніе,* Дѣ́во Ма́ти Всенепоро́чная,* души́ моея́ преложи́ въ крѣ́пость и си́лу* стра́хомъ и любо́вію твори́ти же* и дѣ́яти оправда́нія Христо́ва,* я́ко да избѣ́гну огня́ нестерпи́маго* и наслѣ́діе небе́сное* и жи́знь непреходи́мую* Тобо́ю воспріиму́, веселя́ся всегда́.

Крестобогоро́диченъ:

Распина́ема Христа́ Человѣколю́бца* ви́дящи, Пречи́стая,* и ре́бра ископова́ема копіе́мъ,* пла́чущи, вопія́ше:* что́ сіе́, Сы́не Мо́й?* Что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ,* и тщи́шися безча́дствовати Мя́, вселюбе́знѣйшій?* Удивля́юся, Благоутро́бне,* Твоему́ во́льному распя́тію.


[НА УТРЕНИ,]
Кано́нъ, его́же краегране́сіе: Тя́, златоза́рный му́чениковъ цвѣ́тъ, почита́ю. Ки́ръ Іо́сифа. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Вѣнце́мъ, па́че зла́та сія́ющимъ, му́чениче, украша́емь и муче́нія сія́я добро́тами, Влады́цѣ предстои́ши, о на́съ моля́ся, тя́ чту́щихъ, досточу́дне.

Уязви́лся еси́ сла́дкимъ жела́ніемъ, му́чениче, Зижди́теля твоего́ и, кра́сная мíра презрѣ́въ, си́лу всю́ по́далъ еси́ твоего́ се́рдца, Хриса́нѳе, къ Жела́емому ти́ усе́рдно.

Вѣ́рою воору́жся, низложи́лъ еси́ многоко́зненнаго, тебѣ́ прило́жшаго, му́чениче, же́нскою сла́стію прельсти́ти, и чистоты́ че́стенъ сосу́дъ, Хриса́нѳе, бы́лъ еси́.

Богоро́диченъ: Естество́мъ Боже́ственнымъ непристу́пный, присту́пенъ мнѣ́ яви́ся, отъ Тебе́, Дѣ́во, пло́ть пріе́мь, Его́же Да́рія жела́ющи, терпѣли́вно пострада́ и невѣ́стнически Тому́ приведе́ся.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Зла́то, искуше́но муче́ній огне́мъ, бы́лъ еси́, ца́рскихъ, Хриса́нѳе, нося́й страда́ній изображе́ніе.

Ри́торовъ оста́вль глумле́ніе, плени́цами улови́лся еси́ ученико́въ, Хриса́нѳе, прея́снѣ тебе́ умудри́вшаго.

Повину́лася еси́ Рачи́телю, невѣстоводя́щему тя́ Христу́, всему́драя, честны́я ра́ди вѣ́ры, рачи́теля плотска́го оста́вльши.

Богоро́диченъ: Пло́тію ро́ждься изъ утро́бы Твоея́, Дѣ́во, Іису́съ, Чи́стая, невѣ́сту чи́сту, му́ченицу Себѣ́ Да́рію обруча́етъ.

Сѣда́ленъ, гла́съ 3. Подо́бенъ: Красотѣ́ дѣ́вства.

Краснѣ́йшую добро́ту возжелѣ́лъ еси́, и ви́димыя добро́ты прете́клъ еси́, и приве́лъ еси́ Христу́ златы́ми вои́стинну словесы́ твои́ми, Хриса́нѳе блаже́нне, Да́рію сла́вную, страда́нія претерпѣ́вшую и томи́теля посра́мльшую. Съ не́юже вся́ ны́ помина́й, вѣ́рою соверша́ющія па́мять ва́шу.

Сла́ва, и ны́нѣ, богоро́диченъ:

Недомы́сленно и непостижи́мо е́сть, Влады́чице Богора́дованная, е́же содѣ́ланное о Тебѣ́ стра́шное Бо́жіе та́инство, и́бо Необыме́ннаго, заче́нши, родила́ еси́, пло́тію обложе́на отъ пречи́стыхъ крове́й Твои́хъ; Его́же всегда́, Чи́стая, я́ко Сы́на Твоего́, моли́ спасти́ся душа́мъ на́шимъ.

Крестобогоро́диченъ:

Поно́сную, Ще́дре, сме́рть въ распя́тіи во́лею претерпѣ́лъ еси́, Тебе́ же ро́ждшая, Христе́, зря́щи, уязвля́шеся. Ея́же мольба́ми за милосе́рдіе ми́лости Твоея́, еди́не Преблагíй Человѣколю́бче Го́споди, уще́дри и спаси́ мíръ, взе́мляй мíра грѣхи́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Ду́ха облиста́ющія зари́ чи́стое се́рдце твое́ всего́ свѣтоза́рна тя́, му́чениче, содѣ́лаша, усе́рдно зову́ща: сла́ва си́лѣ Твое́й, Го́споди.

Истка́нную тя́ Боже́ственныя благода́ти свы́ше, Творе́цъ облече́ нетлѣ́нною ри́зою, непоро́чно соблю́дша тѣ́ло, блаже́нне, и я́ко побѣди́теля вѣнча́.

До́блестію се́рдца оттря́слъ еси́ сла́сти тѣле́сныя, добро́тою несравни́тельною Боже́ственною наслажда́емь, и, ра́дуяся, соверши́лъ еси́ муче́нія твоего́ по́двигъ.

Обожи́лася еси́ по прича́стію, страстоно́сице, Боготво́рнаго соедине́нія, и въ небе́сныя всели́лася еси́ черто́ги, ра́дующися, я́ко непоро́чна невѣ́ста Влады́ки тва́ри.

Богоро́диченъ: Соблю́дъ Тя́ Дѣ́ву, я́ко пре́жде рождества́, по рождествѣ́, Пречи́стая, изъ Тебе́ воплоти́ся недомы́сленный, Да́рію му́ченицу невѣ́сту Себѣ́ приводя́.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Восхище́нъ у́мъ отъ ве́щныхъ творя́, вя́жемь, зло́бу вра́жію, страстоно́сче, разори́лъ еси́, блаже́нне.

Чистоты́ рачи́тель бы́въ свяще́ннѣйшій, претвори́лъ еси́ дѣ́вы огнепа́льную любо́вь ко Го́споду, прехва́льне.

Пове́ржена зря́ и нога́ми спопира́ема мучи́теля, ра́дованною мы́слію Влады́ку, преблаже́нне, велича́лъ еси́.

Богоро́диченъ: Кто́ мо́жетъ Твое́ сказа́ти та́инство, о Всечи́стая! Бо́га Сло́ва, па́че ума́ бо и сло́ва, сугу́ба естество́мъ, родила́ еси́.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Пою́ща Влады́ку всѣ́хъ, приснопа́мятне, свѣ́тъ съ небесе́, всю́ду тя́ окружи́въ, просвѣти́, заключе́на въ те́мнѣйшей хра́минѣ, Хриса́нѳе.

Ри́мъ тя́, муче́ніемъ честны́мъ сла́вимаго, златови́дну я́коже звѣзду́, стяжа́въ, му́чениче, украша́ется по́двиги и боже́ственными твои́ми, Хриса́нѳе, чудесы́.

Красна́, преудо́брена же и пресла́вна, му́ченице Да́рія дѣ́ва, показа́вшися Сло́ву краснѣ́йшему, уневѣ́стилася еси́ болѣ́зньми вся́кими тѣле́сными.

Богоро́диченъ: Мла́да Тя́ я́ко Дѣ́тища Дѣ́ва роди́, Превѣ́чнаго Сло́ва, Его́же жела́юще, отрокови́цы Се́ю въ слѣ́дъ Тебѣ́, всѣ́хъ Царю́, невѣ́стнически приведо́шася.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Цвѣ́тъ му́чениковъ златови́денъ ты́ бы́лъ еси́, собо́ръ же страда́льцевъ приве́лъ еси́ Христу́ боже́ственными словесы́ твои́ми и чудесы́, му́чениче богопрія́тне, съ ни́миже вѣ́рно тя́ ны́нѣ ублажа́емъ.

Въ хлѣви́нѣ скве́рнѣй затворе́на, на́га тя́, блаже́нне, Боже́ственными благово́ніи, сла́вою свѣтови́дною Іису́съ просвѣща́етъ, Его́же чи́стою мы́слію, всему́дрѣ, возлюби́лъ еси́.

Звѣ́ря храни́теля тебѣ́ дѣ́вства Христо́съ посла́, па́губу нечести́выхъ отгоня́ща я́вѣ, пѣснопою́щей тебѣ́, всехва́льная: благослове́нъ еси́ въ хра́мѣ сла́вы Твоея́, Го́споди.

Богоро́диченъ: По существу́ Боже́ственному Сы́й неопи́санъ, въ нѣ́дрѣхъ Твои́хъ, Дѣ́во, бы́сть по на́мъ пло́тію опису́емь. Благослове́на Ты́ въ жена́хъ еси́, Пренепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Тве́рдымъ, блаже́нне, по́мысломъ проти́вяся суему́дренному, строга́нія претерпѣ́лъ еси́ тѣле́сная и, свѣща́ми опаля́емь, неопали́мь пребы́лъ еси́, со о́троки воспѣва́я, Хриса́нѳе: благослови́те, вся́ дѣла́ Госпо́дня, Го́спода.

Прему́дростію укра́шенъ Христо́вою, обуи́лъ еси́ нему́дрыхъ шата́ніе, и у́мъ льсти́ваго посрами́лъ еси́, Еву прельсти́вшаго, плѣни́въ благоче́стно сего́ ору́жіе, му́дре, и приве́лъ еси́ невѣ́сту Бо́гу, избра́нну вѣ́ры ра́ди.

Едине́ніемъ души́ плотска́го избѣжа́сте совокупле́нія, чи́стыя сосу́ды Вседержи́теля яви́стеся и въ хра́мъ принесо́стеся небе́сный, страда́льцы, вопію́ще Христу́: благослови́те, вся́ дѣла́ Госпо́дня, Го́спода.

Во́лею Бо́жіею плотскíя стра́сти удержа́вше, о́гнь испепели́ша му́къ Хриса́нѳъ и Да́рія росо́ю Ду́ха и вѣнце́въ жи́зни улучи́ша, пою́ще: благослови́те, вся́ дѣла́ Госпо́дня, Го́спода.

Богоро́диченъ: Яко ши́покъ посреди́ те́рнія жите́йскаго, Пречи́стая, Бо́гъ обрѣ́тъ Тя́, нескве́рную, всели́ся во утро́бу Твою́ чи́стую и благово́нія та́инственнаго мíръ испо́лни, взыва́ющій: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Священносло́вящу Боже́ственная, Боже́ственное во́инство тебѣ́ приложи́ся, ле́сти скве́рныя изба́влься, и мече́мъ непоро́чныя же́ртвы на́съ ра́ди, я́ко овча́ти, му́ченицы Поже́ршемуся принесо́шася.

Яви́стеся посреди́ звѣре́й, я́коже а́гнцы, страстоте́рпцы, воплоще́ніе проповѣ́дающе Боже́ственное Излія́вшагося да́же и до пло́ти, и болѣ́зньми неболѣ́зненную кончи́ну боже́ственнѣ наслѣ́довасте.

Дне́сь свѣ́тло пра́зднуетъ вся́къ гра́дъ же и страна́, Ри́мъ созыва́етъ гра́дъ, боже́ственныя стра́сти и боре́нія, я́ко всечрежде́ніе невеще́ственное, предлага́ющи ва́съ, святíи.

Взя́ти бы́сте къ безмѣ́рнѣй сла́вѣ, Хриса́нѳе му́чениче и Да́рія, и вседержи́тельному Сло́ву, вѣнцено́сцы, вку́пѣ предстоите́, о на́съ моля́щеся, блажа́щихъ ва́съ всегда́.

Богоро́диченъ: Трепе́щетъ по́мыслъ и се́рдце, помышля́юще Твое́ рождество́ недомы́слимое, Отрокови́це: Бо́га бо Сло́ва чревоноси́ла еси́, избавля́ющаго Тобо́ю вся́кія ну́жды чту́щія Тя́.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 96 об. – 99 об.

/ Къ оглавленію раздѣла /


Наверхъ / Къ титульной страницѣ

0