Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 18-й де́нь.
Иже во святы́хъ отца́ на́шего Кири́лла, архіепи́скопа Іерусали́мскаго.

[ВЕЧЕРЪ,]
Стихи́ры, гла́съ 4. Подо́бенъ: Яко до́бля.

Яко звѣзда́, возсія́въ,* и вѣ́рныя просвѣти́лъ еси́* свяще́нными свѣтлостьми́ догма́товъ твои́хъ,* и е́реси омрачи́лъ еси́,* и до конца́ побѣди́въ,* и, я́ко ра́бъ, да́нный тебѣ́ тала́нтъ умно́жилъ еси́,* благоугоди́въ Влады́цѣ, богому́дре.* Ему́же въ ру́цѣ отложи́лъ еси́ тво́й ду́хъ,* богоблаже́нне Кири́лле.

Прему́дростію слове́съ твои́хъ* и сія́ніемъ житія́ твоего́,* я́ко звѣзда́ многосвѣ́тлая, досточу́дне,* посреди́ собо́ра просія́лъ еси́ отце́въ,* безбо́жнаго Македо́нія* жи́лами удави́лъ еси́ благода́ти,* и Святы́й и оживля́ющій вся́ Боже́ственный Ду́хъ* ху́лившаго безу́мно* и проявле́нно беззако́нновавшаго.

Умъ па́губный посрами́лъ еси́* пребезу́мнаго Ма́нента,* обличи́въ предо́брѣ и мудрѣ́йше* скве́рная уче́нія сего́ бу́йства,* учи́телей нача́льниче,* іере́евъ благолѣ́піе,* боже́ственный побо́рниче Христо́вы Це́ркве.* Сего́ ра́ди свято́е, веселя́щеся,* соверша́емъ твое́ успе́ніе.

Сла́ва, и ны́нѣ, богоро́диченъ, гла́съ и подо́бенъ то́йже:

Покая́ніе изря́дное* и спаси́тельное врачевство́,* я́же Бо́га ро́ждшая, Спа́са моего́,* и сле́зъ то́ки,* и часа́ по́мыслъ гро́знаго и стра́шнаго* и Суда́ неумы́тнаго* Ты́ ми да́руй избѣжа́ти моли́твами Твои́ми,* о Дѣ́во, муче́нія тре́петнаго* и Боже́ственную улучи́ти благода́ть.

Крестобогоро́диченъ, подо́бенъ то́йже:

На Крестѣ́ Тя́ я́ко узрѣ́* пригвожде́на, Го́споди,* Агница и Ма́ти Твоя́ дивля́шеся* и — что́ видѣ́ніе сіе́, — взыва́ше, —* Сы́не вожделѣ́нне?* Сія́ Ти́ непокори́вый собо́ръ воздаде́ беззако́нный,* и́же мно́гихъ Твои́хъ чуде́съ наслади́выйся.* Но сла́ва неизглаго́ланному* соше́ствію Твоему́, Влады́ко.


[НА УТРЕНИ,]
Кано́нъ, его́же краегране́сіе: Кири́лла пою́, предсѣда́теля Іерусали́мскаго. Ки́ръ Ѳеофа́на. Гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Украси́въ ду́шу добродѣ́телей ви́ды, благода́тей прія́тельну Ду́ха сію́ Свята́го соверши́лъ еси́, отню́дуже бе́здну прему́дрости отры́гнулъ еси́, ересе́й пучи́ны изсуша́ющу, Кири́лле.

Превы́шшій у́мъ ве́щныхъ содѣ́лалъ еси́, невеще́ственныхъ служи́телей соо́бщникъ показа́вся, огне́мъ же слове́съ твои́хъ всю́ попали́лъ еси́ ве́щь ересе́й, Кири́лле, церко́вное свѣти́ло неусыпа́ющее.

Глаго́лъ твои́хъ воня́ми сладкодыха́тельными неи́стовства тезоимени́тнаго, прему́дре, ересе́й всѣ́хъ нестерпи́мый ка́лъ отгна́въ, дале́че сотвори́лъ еси́, я́ко па́стырь и́стиннѣйшій, я́ко Христо́во благово́ніе бы́въ.

Богоро́диченъ: Отъ тимѣ́нія страсте́й, помышле́ній треволне́нія, отъ стрѣ́лъ лука́ваго, отъ вся́каго прило́га сопроти́внаго спаси́, Чи́стая Богороди́тельнице, ду́ши воспѣва́ющихъ Твое́ несказа́нное рождество́, Всенепоро́чная.

Пѣ́снь 3.

Ирмо́съ: Яко непло́ды роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Сія́я свѣтлостьми́ духо́вныя прему́дрости, трисія́нное Божество́ Тро́ицы, о́тче, свѣ́тло су́щимъ на земли́ уясни́лъ еси́, и́мже тмы́ пре́лести изба́вихомся.

Цѣвни́ца яви́лся еси́ Всесвята́го Ду́ха, богому́дре, возглаша́ющи пѣ́снь явле́нія Христо́ва, Его́же во дву́ естества́хъ проповѣ́далъ еси́, услажда́я ду́ши на́ша.

До́мъ святы́ни твоя́ душа́ показа́ся, въ него́же Оте́цъ, и Сы́нъ, и Ду́хъ Живонача́льный преесте́ственно всели́ся, Ему́же пое́мъ: Свя́тъ еси́, Го́споди.

Богоро́диченъ: Ниже́ у́мъ небе́сный па́че ума́ рождества́ Твоего́ мо́жетъ сказа́ти, Отрокови́це, Ума́ бо Пе́рваго во утро́бѣ Сло́во, Чи́стая, зачала́ еси́, вся́ческая сло́вомъ соста́вльшаго.

Сѣда́ленъ, гла́съ 8. Подо́бенъ: Прему́дрости.

Прему́дростію Сло́ва обогатѣ́въ, отры́гнулъ еси́ уче́ній рѣ́ки живо́тныя, и вся́ку напои́лъ еси́ благочести́выхъ мы́сль, и па́лицею боже́ственною упа́слъ еси́ ста́до на зла́цѣ, боже́ственнаго напита́лъ еси́ ра́зума. Тѣ́мже я́ко па́стыря и учи́теля вели́ка и вѣ́рныхъ засту́пника восхваля́емъ тя́, Кири́лле святи́телю, зову́ще: моли́ Христа́ Бо́га грѣхо́въ оставле́ніе пода́ти честву́ющимъ любо́вію святу́ю па́мять твою́.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Небеса́ добродѣ́тель Твоя́ покры́ла е́сть, и земля́ испо́лнися сла́вы Твоея́, Христе́. Тѣ́мже вѣ́рно вопіе́мъ: сла́ва си́лѣ Твое́й, Го́споди.

Премíрныя му́дрости струю́, преподо́бне, твое́ се́рдце пріе́мшо, отры́гну уче́нія бе́здну, умы́ нече́ствующихъ погружа́ющую.

Еди́ну крѣ́пость, еди́но существо́, еди́ну во́лю Тріѵпоста́снаго Божества́ проповѣ́далъ еси́ и многобо́жія, Кири́лле, пре́лести пото́къ изсуши́лъ еси́.

Умъ ка́льный и пребезу́мный Ма́нентовъ, я́ко у́мъ имы́й и богонауче́нъ, блаже́нне, блиста́ніи слове́съ твои́хъ попали́въ, я́вѣ обличи́лъ еси́.

Богоро́диченъ: Яко вы́шши всѣ́хъ тва́рей, Чи́стая, Творца́ тва́ри зачала́ еси́ и па́че естества́ ро́ждши, естество́ на́ше обно́вльшаго.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Жезло́мъ честны́я, святи́телю, прему́дрости твоея́ упа́слъ еси́ на водѣ́ правосла́внаго служе́нія па́ству твою́, блаже́нне.

Сло́во твое́ свѣ́томъ Боже́ственнымъ облиста́емо, о Кири́лле! просвѣще́нныхъ во Іерусали́мѣ мглу́ неразу́мія разруши́лъ еси́.

Богоро́диченъ: Но́щь, Пречи́стая, страсте́й и злы́хъ очерне́нія покрыва́етъ ду́шу мою́, Свѣтода́вца ро́ждшая, озари́ мя, молю́ся.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Рѣка́ ты́ я́ко, изъ ино́го Еде́ма изше́лъ еси́, жизното́чныхъ испо́лнена во́дъ Ду́ха, и церко́вныя, святи́телю, напоя́еши бразды́.

Глаго́лъ твои́хъ луче́мъ, я́ко отъ бу́ри морскíя нече́стія спаса́еши лю́ди, освяще́ннѣйше, къ ти́хому приста́нищу правосла́вія тѣ́хъ призыва́я.

Богоро́диченъ: Онебеси́ла еси́ озе́мльствованное естество́, Всенепоро́чная, человѣ́ческое и истлѣ́вшее сіе́ новосодѣ́лала еси́, сего́ ра́ди, Отрокови́це, вси́ немо́лчными гла́сы Тя́ сла́вимъ.

Конда́къ, гла́съ 4:

Язы́комъ твои́мъ, му́дре, Боже́ственными вдохнове́ньми просвѣти́лъ еси́ твоя́ лю́ди еди́ну чести́ Тро́ицу, Естество́мъ нераздѣ́льну, раздѣля́ему же Ли́цы. Тѣ́мже, ра́дующеся, всесвяту́ю твою́ па́мять пра́зднуемъ, и́же къ Бо́гу моли́твенника тя́ предлага́ющіи.

Пѣ́снь 7.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Имѣ́я о́гнь во умѣ́, о́тче, стра́ха Бо́жія, ве́щь испепели́лъ еси́ сласте́й, воспѣва́я: благослове́нъ еси́, Го́споди, Бо́же оте́цъ на́шихъ.

Слеза́ми страсте́й пла́мень погаси́въ, блаже́нне, свѣ́тлость сохрани́лъ еси́ неугаси́му твоея́ души́, взыва́я: благослове́нъ еси́, Го́споди, Бо́же оте́цъ на́шихъ.

Струю́ живу́ю имѣ́я лія́ніемъ Ду́ха, въ души́, богому́дре, источи́лъ еси́, о́тче, рѣ́ки уче́ній, Це́рковь напоя́ющія, благоче́стно тя́ честву́ющую.

Богоро́диченъ: Всю́ Тя́ освяща́етъ Святы́й, отъ Твоея́ пло́ти заи́мствовавый пло́ть Себѣ́, Богоро́дице, во святы́хъ Госпо́дь живы́й, Бо́гъ на́шъ.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Дрема́ніе небреже́нія, блаже́нне, отъ вѣ́ждей душе́вныхъ отри́нувъ, пра́веднымъ прили́чнымъ ны́нѣ усну́лъ еси́ сно́мъ, и ко дню́ невече́рняго Свѣ́та преше́лъ еси́.

Мо́лніями слове́съ твои́хъ попали́лъ еси́ хвра́стную е́ресь, приснопа́мятне, и вѣ́рныя просвѣти́лъ еси́ еди́ну чести́ Тро́ицу начерта́ньми, во Еди́ницѣ су́щую Естества́.

Освяти́въ себе́ поще́ньми, ме́ртву тебе́ ра́ди Бы́вшу, ты́ безкро́вно же́ртвовалъ еси́, я́ко святи́тель Боже́ственный, я́ко та́инъ неизрече́нныхъ служи́тель, Кири́лле.

Богоро́диченъ: Изба́вльшеся кля́твы прама́тернія Тобо́ю, Чи́стая Богома́ти, Благослове́нная Влады́чице, благослови́мъ, Дѣви́це препросла́вленная, пресвято́е Рождество́ Твое́, Всечи́стая.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Ви́дѣти жела́я Христо́ву неизрече́нную, святи́телю, сла́ву, потща́лся еси́ стра́сти умертви́ти душетлѣ́нныя, прія́телище се́рдце сотвори́ти прему́дрости бо́льшія и лу́чшія. Тѣ́мже тя́ вѣ́рою ублажа́емъ.

Звѣзду́ многосвѣ́тлую, Христо́съ Со́лнце, на церко́внѣй высотѣ́ положи́ тя, Кири́лле, луча́ми уче́ній свяще́нныхъ озаря́юща сердца́ вѣ́рно соверша́ющихъ твою́ свѣтоно́сную па́мять, преподо́бне.

Собесѣ́дникъ и сослужи́тель бы́лъ еси́ а́нгеломъ, я́ко бо безпло́тенъ, о́тче, на земли́ пожи́въ, преподо́бнымъ яви́лся еси́ соприча́стникъ и святи́телемъ равностоя́тель; съ ни́миже лику́я, на́съ помина́й.

Богоро́диченъ: Непло́дствующее Боже́ственныхъ добродѣ́телей, Пречи́стая Богоро́дице, се́рдце мое́ покажи́, Дѣ́во, плодоно́сно, я́же отъ непло́дове ро́ждшаяся во́лею вся́ Претворя́ющаго манове́ніемъ, да Тя́ пою́, Всепѣ́тую.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 93 об. – 96 об.

/ Къ оглавленію раздѣла /


Наверхъ / Къ титульной страницѣ

0