Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 4.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 17-й де́нь.
Слу́жба преподо́бному Парѳе́нію Кíевскому.

ВЕЧЕРЪ,
Блаже́нъ му́жъ, 1-й антифо́нъ. На Го́споди воззва́хъ: стихи́ры, гла́съ 1. Подо́бенъ: Прехва́льніи му́ченицы.

Пріиди́те, лю́діе,* во святу́ю оби́тель Пече́рскую,* воспои́мъ собесѣ́дника чу́днаго а́нгеловъ,* преподо́бнаго отца́ на́шего Парѳе́нія,* сосу́дъ благода́ти неоскудева́ющія,* любо́вію непреста́нно истека́ющій.* Припаде́мъ къ нему́ съ вѣ́рою и помо́лимся те́плѣ:* моли́ Христа́ Бо́га* спасти́ся душа́мъ на́шимъ.

Пріиди́те, лю́діе,* соста́вимъ похвалу́ честно́му сро́днику на́шему,* у́зкимъ путе́мъ на высоту́ духо́вную восте́кшему,* послуша́ніемъ и бдѣ́ніемъ,* наипа́че же труда́ми моли́твенными просія́вшему,* кра́йнія чистоты́ душе́вныя и тѣле́сныя дости́гшему,* дерзнове́ніе ко Христу́ стяжа́вшему.* Того́ моли́, Парѳе́ніе преподо́бне,* спасти́ся душа́мъ на́шимъ.

Пріиди́те, вѣ́рніи лю́діе,* похва́льными пѣ́сньми дне́сь почти́мъ отца́ чу́днаго* преподо́бнаго Парѳе́нія,* всѣ́мъ се́рдцемъ Христа́ возлюби́вшаго,* и бре́мя Его́ ле́гкое и благо́е подъя́вшаго,* на высоту́ небе́сную со креста́ возне́сшагося.* И ны́нѣ, предстоя́ престо́лу Святы́я Тро́ицы,* моли́ся о на́съ, о́тче преподо́бне,* да спасе́тъ Госпо́дь ду́ши на́ша.

Пріиди́те, празднолю́бцы,* со умиле́ніемъ воспои́мъ* похвала́ми мно́гими* земна́го а́нгела и человѣ́ка небе́снаго* Парѳе́нія преди́внаго,* все́ю жи́знію Ева́нгеліе испо́лнившаго,* бли́жнему послужи́вшаго и Бо́гу угоди́вшаго.* Того́ моли́, о́тче блаже́нне,* да спасе́тъ ду́ши на́ша.

Сла́ва, гла́съ 8:

Иже по о́бразу Ева́нгелія Христо́ва житіе́ твое́ поста́вивъ, по́стнически пребыва́лъ еси́, му́жески естество́ пону́дивъ, да пло́ть порабо́тиши ду́ху, вся́кое злострада́ніе съ любо́вію терпѣ́лъ еси́, я́ко и́стинный учени́къ небе́снаго Учи́теля Христа́; и ны́нѣ, на небеса́ пресели́вся, лице́ Того́ пресвѣ́тлое зри́ши, о́тче на́шъ Парѳе́ніе, и мо́лишися благопрія́тно о вѣ́рою и любо́вію чту́щихъ святу́ю па́мять твою́.

И ны́нѣ, богоро́диченъ догма́тъ:

Ца́рь небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Вхо́дъ. Проки́менъ дне́, и чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 2. Подо́бенъ: Егда́ отъ дре́ва.

Егда́ яви́ся ти́ Ду́хъ Святы́й* въ ви́дѣ голуби́нѣ,* тогда́ Боже́ственная благода́ть* испо́лни ду́шу твою́,* отъ земна́го отрѣша́я,* моли́твѣ науча́я,* да сла́вится тобо́ю* и́мя Бо́га въ Тро́ицѣ Еди́наго,* Ему́же моли́ся, о́тче Парѳе́ніе,* ниспосла́ти на́мъ ми́ръ и ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Егда́ Боже́ственная благода́ть* испо́лни се́рдце твое́,* тогда́ яви́ся ти́ ста́рецъ и рече́:* стра́ненъ мона́хъ — зе́менъ мертве́цъ.* Се́рдце же твое́ распали́ся* огне́мъ невеще́ственнымъ* и роди́ся въ тебѣ́ жела́ніе* уневѣ́стити ду́шу Христо́ви.* Того́ моли́, о́тче преподо́бне,* спасти́ и просвѣти́ти ду́ши на́ша.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Егда́ Боже́ственное зва́ніе* дости́же тя́,* преподо́бне о́тче на́шъ Парѳе́ніе,* тогда́ лѣ́поту мíра презрѣ́въ,* въ Ла́вру Пече́рскую прише́лъ еси́* и житіе́ же́стоко пожи́въ,* въ моли́твѣ непреста́ннѣй и трудѣ́хъ* Го́сподеви угоди́лъ еси́.* Тѣ́мже моли́ся Христу́ Бо́гу* спасти́ и просвѣти́ти ду́ши на́ша.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Парѳе́ніе, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловати ду́ши на́ша.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

Тропа́рь, гла́съ 2:

Небе́сное оте́чество возлюби́въ, су́етнаго мíра отве́рглся еси́, тѣ́мже кро́тость, простоту́ и незло́біе стяжа́въ, поревнова́лъ еси́ подвиго́мъ отце́въ на́шихъ Пече́рскихъ. Соимени́тый чистотѣ́ и дѣ́вству, преподо́бне Парѳе́ніе, кíевская похвало́, моли́ Христа́ Бо́га спасти́ и просвѣти́ти ду́ши на́ша.


НА УТРЕНИ,
По 1-мъ стихосло́віи сѣда́ленъ, гла́съ 4:

Всѣ́мъ се́рдцемъ и душе́ю Бо́га возлюби́лъ еси́, преподо́бне о́тче Парѳе́ніе, мы́сленно Христу́ сораспя́лся еси́, тѣ́мже да́ръ благода́тныхъ сле́зъ и моли́тву непреста́нную стяжа́лъ еси́; научи́ и на́съ при́сно глаго́лати: Го́споди, Іису́се Христе́, Сы́не Бо́жій, поми́луй на́съ. [Два́жды.]

Сла́ва, и ны́нѣ, богоро́диченъ:

Пресвята́я Ма́ти Дѣ́во, не хощу́ тѣ́хъ, я́же въ мíрѣ су́ть, то́чію да́ждь ми́ возлюби́ти всѣ́мъ се́рдцемъ Сы́на Твоего́, и Твои́мъ Ма́тернимъ хода́тайствомъ улучи́ти наслѣ́діе жи́зни вѣ́чныя.

По 2-мъ стихосло́віи сѣда́ленъ, гла́съ 4:

Сле́зными тече́ньми ду́шу твою́ напои́лъ еси́ изря́дно, о́тче богому́дре, многопло́денъ добродѣ́телей твои́хъ пожа́лъ еси́ кла́съ, и па́стырь до́брый овца́мъ слове́снымъ яви́лся еси́. Тѣ́мже, разрѣши́вся отъ житія́ въ де́нь Страсте́й Христо́выхъ и пра́здникъ Благовѣ́щенія, оте́ческимъ лико́мъ сочета́лся еси́, Парѳе́ніе, сего́ ра́ди вопіе́мъ ти́: моли́ Христа́ Бо́га, согрѣше́ній оставле́ніе дарова́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

О Тебѣ́ ра́дуемся, Пренепоро́чная Богома́ти, покро́ве и наде́ждо на́ша несумнѣ́нная, душелю́бная прави́тельнице и́ноковъ и всея́ вселе́нныя храни́тельнице, Ты́ бо мо́лиши о на́съ Христа́ Бо́га на́шего.

По поліеле́и сѣда́ленъ, гла́съ 8:

Духо́вную му́дрость смиренному́дріемъ стяжа́въ, мно́гимъ бы́лъ еси́ учи́тель, мона́хомъ оте́цъ и скорбя́щимъ утѣ́шитель, и моли́твы Іису́совы неумолка́ющій орга́нъ: тѣ́мже въ вѣ́чности просла́ви тя́ Мздовоздая́тель Госпо́дь, Его́же непреста́нно моли́, прегрѣше́ній оставле́ніе дарова́ти, чту́щимъ любо́вію па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, всесвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíру и оставле́ніе дре́внихъ согрѣше́ній. Сего́ ра́ди вопіе́мъ Ти́, Богома́ти: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе трудо́въ твои́хъ: тѣ́ми бо на небесѣ́хъ обрѣ́лъ еси́ мзду́ мно́гу, и де́монскія погуби́въ полки́, со а́нгелы причте́нъ бы́въ, и́хже житію́ безъ поро́ка на земли́ поревнова́лъ еси́. И та́ко дерзнове́ніе ко Христу́ Бо́гу стяжа́въ, Того́ моли́ дарова́ти ми́ръ душа́мъ на́шимъ.

Кано́нъ свята́го, гла́съ 8.

Пѣ́снь 1.

Ирмо́съ: Сокруши́вшему бра́ни мы́шцею Свое́ю и прове́дшему Изра́иля сквозѣ́ Чермно́е мо́ре, пои́мъ Ему́, я́ко Изба́вителю на́шему Бо́гу, я́ко просла́вися.

Освяти́ мою́ ду́шу, Спа́се, помышле́нія испра́ви, мы́сли очи́сти, да возмогу́ пѣ́ти досто́йно па́мять блаже́ннаго Парѳе́нія, ны́нѣ престо́лу Сла́вы Твоея́ предстоя́щаго и за всѣ́хъ те́плѣ моля́щагося.

Отъ млады́хъ ногте́й земли́ отрѣши́выйся, безмо́лвію, богомы́слію и моли́твѣ прилѣжа́лъ еси́, свя́тче Парѳе́ніе, моли́ Христа́ Бо́га, да изба́витъ на́съ суеты́ мірскíя и возведе́тъ ду́ши на́ша въ го́рняя.

Въ ю́ности сподо́бився наи́тія Свята́го Ду́ха въ ви́дѣ голуби́нѣ, моли́твенно воспѣ́лъ еси́: неопи́санне Пара́клите, отъ Отца́ исходя́й и въ Сы́нѣ пребыва́яй, уста́ви во мнѣ́ хра́мъ Своему́ вели́честву.

Богоро́диченъ: Пресвята́я Госпоже́ Дѣ́во Пренепоро́чная, изнемо́же ду́хъ мо́й отъ ра́бства грѣхо́внаго, но я́ко Ма́ти чадолюби́вая угаси́ пла́мень страсте́й мои́хъ, Свое́ю ми́лостію ороша́ющи.

Пѣ́снь 3.

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Не прельсти́вся суето́ю мíра многомяте́жнаго, му́дростію свое́ю роди́телей удиви́лъ еси́, блаже́нне, жела́нія мірскíя и земны́хъ невѣ́стъ отве́ргся, во оби́тель Пече́рскую прите́къ, та́мо пра́ведно пожи́лъ еси́.

Весели́тся Це́рковь и воспѣва́етъ по́двиги твоя́, и́хже подъя́лъ еси́, богому́дре, ра́ди Ца́рствія небе́снаго: бдѣ́ніе, поще́ніе, затво́ръ и псалмопѣ́ніе; восхваля́емъ и по до́лгу благоче́стно ублажа́емъ тя́.

Ангелонра́вное житіе́ твое́ ви́дяще, преподо́бне, восхва́лимъ Го́спода, ниспосла́вшаго рабо́мъ Свои́мъ благода́ть и да́ры пребога́тыя. Сего́ ра́ди прославля́етъ тя́, блаже́нне Парѳе́ніе, оби́тель Пече́рская и вси́ вѣ́рніи ча́да твоя́.

Богоро́диченъ: Кíими похвала́ми просла́вимъ Дѣ́ву Чи́стую, возрасти́вшую во удѣ́лѣ Свое́мъ ди́внаго моли́твенника, преподо́бнаго Парѳе́нія, возлюби́вшаго Сію́, Хода́таицу о спасе́ніи ро́да на́шего.

Сѣда́ленъ, гла́съ 2:

Чу́дный о́тче, чудотво́рче пресла́вный, Бо́гу прія́тный, не оста́ви на́съ въ ско́рбѣхъ су́щихъ, уны́лыхъ, да ду́ши на́ша грѣхми́ омраче́нныя, просвѣти́тъ и поми́луетъ Госпо́дь моли́твами твои́ми. [Два́жды.]

Сла́ва, и ны́нѣ, богоро́диченъ:

Яже ра́дости пріе́мшая исполне́ніе, пріими́ отъ на́съ, рабо́въ Твои́хъ, цѣлова́ніе арха́нгелово: ра́дуйся, ра́дость ро́ждшая мíру; ра́дуйся, ру́чко, изъ нея́же ма́нна небе́сная всѣ́мъ вѣ́рнымъ дарова́ся; ра́дуйся, Благослове́нная.

Пѣ́снь 4.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́.

Во оби́тель Пече́рскую прите́клъ еси́, и въ не́й проти́ву ко́зней де́монскихъ усе́рдно подвиза́яся, у́зкимъ путе́мъ послуша́нія ше́ствовавъ, дости́глъ еси́ высоты́ безстра́стія; помоли́сь о на́съ Христу́, преподо́бне, да и мы́ твои́мъ стопа́мъ послѣ́дуемъ.

Въ духо́внѣй бра́ни моли́твою непреста́нно поуча́яся, видѣ́ніемъ Никоди́ма просфо́рника обра́дованъ бы́въ, подвиго́мъ того́ въ житіи́ подража́лъ еси́. Моли́теся о на́съ, отцы́ преподо́бніи, да не на́зи обря́щемся на суди́щи Христо́вѣ.

Кро́тостію и смире́ніемъ Христу́ уподо́бився, и любо́вію къ Нему́ горя́, сосу́дъ избра́нъ Свята́го Ду́ха яви́лся еси́, о́тче Парѳе́ніе, моли́ся, да не уга́снетъ и въ на́съ о́гнь любве́ Боже́ственныя.

Богоро́диченъ: Невмѣсти́маго вмѣсти́вшая, Необъя́тнаго носи́вшая, Ма́ти Бо́жія, вы́сшая всѣ́хъ свѣ́тлостей, помоли́сь о на́съ Сы́ну Твоему́, да спасе́тъ ду́ши на́ша.

Пѣ́снь 5.

Ирмо́съ: Го́споди Бо́же на́шъ, ми́ръ да́ждь на́мъ, Го́споди Бо́же на́шъ, стяжи́ ны, Го́споди ра́звѣ Тебе́ ино́го не вѣ́мы, и́мя Твое́ имену́емъ.

Не прилѣпля́яся къ земно́му, чистоты́ помысло́въ дости́глъ еси́, сего́ ра́ди и Христо́съ да́ромъ чуде́съ обогати́ тя и просла́ви, я́ко свѣ́тлую звѣзду́, среди́ отце́въ на́шихъ Пече́рскихъ.

Во млады́хъ лѣ́тѣхъ му́дростію ста́рца испо́лнився, бли́жнихъ свои́хъ на пу́ть и́стины наставля́лъ еси́, въ ста́рости кро́тостію младе́нцу уподо́бився, преподо́бне Парѳе́ніе, моли́ Христа́ Бо́га, да помо́жетъ и на́мъ зло́бою младе́нствовати.

Ру́сская похвало́, Ла́вры Пече́рскія украше́ніе, цѣлому́дрія наста́вниче, ду́хомъ горя́й, помоли́сь о на́съ недосто́йныхъ ча́дѣхъ свои́хъ.

Богоро́диченъ: Неизрече́нный свѣ́те, Ма́ти Бо́жія, просвѣти́ ду́ши на́ша во тмѣ́ лежа́щія, и умягчи́ сердца́ окамене́нныя, при́сно о на́съ со слеза́ми моля́щися.

Пѣ́снь 6.

Ирмо́съ: Яко во́ды морскíя, Человѣколю́бче, волна́ми жите́йскими обурева́юся, тѣ́мже, я́ко Іо́на, та́ко вопію́ Ти́: возведи́ отъ тли́ живо́тъ мо́й, Благоутро́бне Го́споди.

Стопы́ на́ша напра́ви пра́во ше́ствовати, преподо́бне, дѣ́вству тезоимени́тый, и сподо́би на́съ чи́стымъ се́рдцемъ Бо́га сла́вити.

Незло́біемъ просія́вый, ути́ши многогрѣ́шное житіе́ на́ше, мíра го́рняго жи́телю, научи́ на́съ мірска́го мудрова́нія отверга́тися.

Помоли́сь, преподо́бне Парѳе́ніе, о всѣ́хъ въ моли́твѣ тружда́ющихся, се́рдцемъ Бо́гу воспѣва́ющихъ и житіе́мъ Ему́ служа́щихъ, да вси́ дости́гнемъ моли́твы соверше́нныя.

Богоро́диченъ: Дѣ́вственныхъ нача́льнице и моли́твы пода́тельнице, мона́шествующихъ покрови́тельнице, Цари́це Небе́сная, услы́ши на́съ и спаси́ отъ искуше́ній мíра, пло́ти и діа́вола.

Конда́къ, гла́съ 3:

Кто́ не удиви́тся чистотѣ́ твое́й, дѣ́вственниче и моли́твенниче при́сный, сосу́дъ бо Ду́ха Свята́го яви́лся еси́ и моли́твою о мíрѣ всѣ́мъ возсія́лъ еси́. И ны́нѣ помяни́ на́съ у престо́ла Бо́жія во Ца́рствіи небе́снѣмъ.

Икосъ:

Отве́рзи уста́ твоя́, ке́лліе убо́гая, и рцы́ на́мъ, колькра́ты пото́ки сле́зными омоча́лася еси́? ка́ко воздыха́нія преподо́бнаго стѣ́ны твоя́ расторго́ша? ка́ко а́нгели приница́ху ко бдѣ́ннымъ подвиго́мъ его́? Тѣ́ми бо освяти́ся земля́, мы́ же сія́ вся́ помышля́юще, слеза́ми умиле́нія исполня́емся, и про́симъ тя́, о́тче: помяни́ на́съ у престо́ла Бо́жія во Ца́рствіи небе́снѣмъ.

Пѣ́снь 7.

Ирмо́съ: Халде́йская пе́щь, огне́мъ распаля́емая, ороша́шеся Ду́хомъ, Бо́жіимъ предстоя́ніемъ, о́троцы поя́ху: благослове́нъ еси́, Бо́же оте́цъ на́шихъ.

Объя́ се́рдце твое́ пла́мень моли́твы непреста́нныя, де́нь и но́щь въ тебѣ́ горя́; сего́ огня́ и на́мъ причасти́тися Го́спода умоли́, да попали́тъ въ на́съ стра́сти серде́чныя.

Безору́жна бы́сть незло́біемъ и кро́тостію твое́ю зло́ба человѣ́ческая; мимоходи́ тебе́, о́тче, но не дрема́ зло́ба дре́вняя, нападе́ніемъ отъ бѣсо́въ ополча́вшаяся и тя́ удруча́вшая, а́ще не бы си́ла Бо́жія помога́ющая, давно́ належа́ло бы тебѣ́ во гро́бъ всели́тися.

Уязвле́нный любо́вію Боже́ственною, непреста́нно взыва́лъ еси́: Іису́се, живи́ во мнѣ́ и да́ждь ми́ въ Тебѣ́ жи́ти! И услы́шалъ еси́ сла́дкій гла́съ: яды́й Мою́ Пло́ть, и пія́й Мою́ Кро́вь, во Мнѣ́ пребыва́етъ, и Азъ въ не́мъ.

Богоро́диченъ: Нетлѣ́нная Роди́тельнице и бра́ку неприча́стная, неискусому́жная Дѣ́во, несгара́емая свѣще́ мíрови свѣтя́щая, всепѣ́тая Ма́ти утѣ́шительнице, спаси́ мене́ отъ непрія́зни въ пагу́бнѣй се́й суетѣ́.

Пѣ́снь 8.

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Обурева́емый ду́хомъ уны́нія, укрѣпля́емь бы́въ благода́тнымъ сновидѣ́ніемъ; помози́ и на́мъ печа́ли и уны́нію не соизволя́ти, взыва́я въ ра́дости: благослове́нъ Бо́гъ оте́цъ на́шихъ!

Безмо́лвнѣ въ Голосѣ́евой пу́стыни пребыва́я, и та́мо моли́твою ду́шу пита́я, ре́клъ еси́: здѣ́ ноша́шеся ду́хъ преподо́бныхъ на́шихъ Пече́рскихъ! Ихже со́нму ны́нѣ сопричте́нный на небеси́ воспѣва́еши: благослове́нъ Бо́гъ оте́цъ на́шихъ!

Поуча́яся о вели́комъ воплоще́нія Госпо́дня та́инствѣ, сподо́бился еси́ видѣ́нія Богомладе́нца, и воскли́кнулъ еси́ ра́достно: благослове́нъ Бо́гъ оте́цъ на́шихъ!

Богоро́диченъ: Все́ю душе́ю Цари́цу Небе́сную возлюби́въ, Парѳе́ніе, услы́шалъ еси́ гла́съ Пречи́стыя: Азъ мона́хиня е́смь! Помоли́сь о на́съ ста́рче, недосто́йныхъ, Игу́меніе оби́тели Пече́рскія, да досто́йни зва́нія и́ноческаго вопіе́мъ: благослове́нъ Бо́гъ оте́цъ на́шихъ!

Пѣ́снь 9.

Ирмо́съ: Чу́жде ма́теремъ дѣ́вство, и стра́нно дѣ́вамъ дѣторожде́ніе; на Тебѣ́, Богоро́дице, обоя́ устро́ишася. Тѣ́мъ Тя́, вся́ племена́ земна́я, непреста́нно велича́емъ.

Безмѣ́рно Ма́терь Бо́жію возлюби́въ, отъ всего́ се́рдца преподо́бный взыва́лъ е́сть: а́зъ на Богома́терь та́ко надѣ́юся, я́ко на го́ру ка́менную. И не посрами́ любве́ твоея́ Пречи́стая.

Затвори́въ окно́ тѣ́сныя ке́лліи ико́ною Богома́тере, ты́ ре́клъ еси́, свя́тче: почто́ мнѣ́ свѣ́тъ чу́вственный, Пречи́стая — свѣ́тъ о́чію мое́ю и души́ моея́! Помоли́ся и на́шимъ очесе́мъ мы́сленнымъ просвѣти́тися, Парѳе́ніе блаже́нне.

Предзря́ кончи́ну свою́, взыва́лъ еси́, преподо́бне: путеводи́ти ми́ бу́детъ Дѣ́ва Богома́ти, несумнѣ́нная моя́ наде́жда, Та́я приведе́тъ мя́ поклони́тися Сы́ну Своему́.

Богоро́диченъ: Вседне́вно сраспина́яся распя́тому Христу́, и принося́ арха́нгельское цѣлова́ніе Пречи́стей Дѣ́вѣ, угото́валъ еси́ ду́шу свою́ къ преселе́нію въ мíръ го́рній, ю́же и прія́ша Госпо́дь и Ма́терь Его́ въ де́нь Страсте́й Христо́выхъ и Благовѣ́щенія.

Свѣти́ленъ. Подо́бенъ: Жены́ услы́шите.

Процвѣ́лъ еси́ я́ко фи́никсъ, дави́дски, о́тче, и оби́тель яви́лся еси́ Ду́ха Пресвята́го, и сла́вна тя́ вселе́ннѣй показа́. О на́съ непреста́нно моли́, почита́ющихъ вѣ́рою пречестну́ю па́мять твою́, преподо́бне Парѳе́ніе. [Два́жды.]

Сла́ва, и ны́нѣ, богоро́диченъ:

Тя́, пѣ́сньми немо́лчными, ублажа́емъ, Дѣ́во, я́ко отъ Тро́ицы Еди́наго родила́ еси́, Богоро́дице, и но́сиши на Боже́ственную руку́ пребога́тое Сло́во, непремѣ́нно и неизмѣ́нно.

На хвали́техъ стихи́ры, гла́съ 5:

Преподо́бне о́тче Парѳе́ніе, я́ко мíра су́етнаго сѣ́тей избѣжа́въ, во оби́тель Бо́жія Ма́тере прите́клъ еси́. Въ не́йже проти́ву ко́зней діа́вольскихъ до́брѣ подвиза́вся, Цари́цѣ Небе́снѣй до конца́ послужи́лъ еси́; Ея́же моли́, да не оты́метъ покро́въ Сво́й отъ на́съ во вѣ́ки.

Свѣще́ пресвѣ́тлая, непреста́нно къ Бо́гу горѣ́вшая, просвѣща́я и пита́я вся́каго гряду́щаго къ тебѣ́ сла́дкимъ и́менемъ Іису́совымъ, и ны́нѣ сподо́би на́мъ ра́йскія пи́щи причасти́тися, моли́твами твои́ми, Парѳе́ніе блаже́нне.

Но́вая звѣздо́ свѣтоза́рная, на не́бѣ духо́внѣмъ возсія́вшая, свои́мъ свѣ́томъ вѣ́рнымъ пу́ть озаря́ющая и ко Христу́ заблу́ждшихъ ду́ши приводя́щая, моли́ Его́, Парѳе́ніе блаже́нне, спасти́ и просвѣти́ти ду́ши на́ша.

Сла́ва, гла́съ 6:

Ка́ко возмо́жемъ восхвали́ти твоя́ по́двиги, преподо́бне Парѳе́ніе, или́ изчести́ твои́хъ добродѣ́телей мно́жество, наипа́че уразумѣ́ти безмо́лвное твое́ Бо́гу собесѣ́дованіе? Но не отри́ни пѣвцы́ твоя́ убо́гія, твоего́ заступле́нія прося́щія, и слы́шаніемъ житія́ твоего́ умиле́нія исполня́ющіяся, о твое́й же святѣ́й па́мяти веселя́щіяся.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со апо́столы поми́ловати ду́ши на́ша].


НА ЛИТУРГІИ,

Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́омъ, зача́ло 333 отъ полу́. Аллилуія, гласъ 6: Блаже́нъ му́жъ, [боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Пече́рская Минíа. [Ча́сть втора́я.] — Кíевъ: Въ тѵпогра́фіи Кíево-Пече́рскія Ла́ѵры, 2007. — С. 23-33.

/ Къ оглавленію раздѣла /


Наверхъ / Къ титульной страницѣ

0