Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 16 августа 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 17-й де́нь.
Слу́жба преподо́бнаго отца́ на́шего игу́мена Мака́рія, Каля́зинскаго чудотво́рца.

ВЕЧЕРЪ,
На Го́споди воззва́хъ: стихи́ры, гла́съ 5. Подо́бенъ: Ра́дуйся.

Ра́дуйся, свяще́нная главо́,* о́тче Мака́ріе богому́дре,* Бо́жія ра́зума вода́ми напоя́емь,* и пло́дъ благоуха́ненъ яви́лся еси́* житіе́мъ твои́мъ отъ ю́ности, преподо́бне.* Аще и человѣ́къ естество́мъ бы́лъ еси́,* но а́нгельски на земли́ пожи́лъ еси́,* стра́хъ Бо́жій возлюби́въ* и за́повѣдемъ Его́ при́сно поуча́яся.* Ти́хъ же и утѣ́шителенъ словесы́ показа́вся,* ми́лостивъ и кро́токъ бы́лъ еси́,* и ны́нѣ ра́дости Го́спода твоего́ сподо́бился еси́,* прилѣ́жно моли́ся* дарова́ти душа́мъ на́шимъ ве́лію ми́лость.

Ра́дуйся, преподо́бне о́тче Мака́ріе,* кра́снѣи твои́ но́зѣ до́блественнѣ* къ тече́нію просте́рлъ еси́,* и пусты́ню дости́глъ еси́,* и хра́мъ въ сла́ву Святы́я Тро́ицы воздви́глъ еси́,* и мно́жество мона́ховъ собра́лъ еси́,* и добродѣ́тельми ты́я просвѣти́лъ еси́,* и всели́лся еси́, идѣ́же Свѣ́тъ невече́рній,* идѣ́же а́нгелъ ликостоя́нія,* съ ни́миже предстоя́, преподо́бне,* моли́ спасти́ся душа́мъ на́шимъ.

До́брѣ тече́ніе соверши́въ, Мака́ріе преподо́бне,* ко Христу́ восхожде́ніе получи́лъ еси́,* честны́я же твоя́ мо́щи во гро́бѣ затворе́ны,* земли́ предава́емы.* Земля́ же отъ свои́хъ нѣ́дръ предае́тъ тя́ священнолѣ́пна,* цѣ́ла же и неразруши́ма,* благоуха́ніемъ и чудесы́ удивля́ема;* честна́я же твоя́ ра́ка* па́че ка́мене сапфи́ра, о́тче, показа́ся,* содержа́щи многоцѣле́бныя мо́щи твоя́.* Тѣ́мже Христа́ Бо́га моли́* дарова́ти на́мъ ве́лію ми́лость.

Сла́ва, гла́съ 8:

Кто́ изглаго́летъ до́блести твоя́, Мака́ріе преподо́бне? Ра́вно а́нгеломъ житіе́ пожи́лъ еси́, воздержа́ніемъ у́мъ очи́стивъ, сле́зными тече́ніи ду́шу просвѣти́лъ еси́. Тѣ́мъ и ны́нѣ, свѣ́тло укра́шенъ, предстои́ши со а́нгелы, ра́дуяся, сугу́бымъ вѣнце́мъ увя́злся еси́. Прилѣ́жно, о́тче Мака́ріе, моли́ся, блаже́нне, прося́ ми́ра мíру и царе́мъ держа́вы и утвержде́нія, и на́съ сохрани́, ста́до твое́, моли́твами твои́ми.

И ны́нѣ, богоро́диченъ:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Вхо́дъ. Проки́менъ дне́. И чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ры, гла́съ 5:

Преподо́бне о́тче, отъ ю́ности имѣ́я смиреному́дріе, кро́токъ душе́ю и се́рдцемъ бы́лъ еси́, возжелѣ́въ отлучи́тися мірски́хъ наслажде́ній, тѣле́сныя стра́сти умори́лъ еси́ поще́ніемъ и къ безстра́стія высотѣ́, о́тче, возше́лъ еси́, и, свѣтода́тельными заря́ми просвѣща́емь, источа́еши исцѣле́нія, и отго́ниши ду́хи лука́выя отъ притека́ющихъ ти́ съ вѣ́рою. Тѣ́мъ па́мять твою́ почита́емъ, досточу́дне.

Преподо́бне о́тче, въ пусты́ни жи́тельствуя, еди́ному Бо́гу себе́ возложи́лъ еси́, тѣ́сный пу́ть ше́ствовавъ, воздержа́ніемъ пло́ть умертви́лъ еси́, ду́шу же безстра́стіемъ украси́въ, по́стникомъ похвала́ бы́лъ еси́, Мака́ріе, неви́димаго врага́ побѣди́лъ еси́ и бы́лъ еси́ чи́сто прія́телище Боже́ственнаго Ду́ха. Тѣ́мже вопіе́мъ ти́: ми́ръ мíру испроси́ и душа́мъ на́шимъ ве́лію ми́лость.

Преподо́бне о́тче, Боже́ственнаго Ду́ха благода́тію собра́лъ еси́ ли́къ мона́шествующихъ, во́инствующихъ Христу́, съ ни́миже до́брѣ подвиза́вся, тече́ніе соверши́лъ еси́ твоего́ му́жества, неукло́нно къ небеси́ преводя́щую стезю́ ше́ствовалъ еси́, и ны́нѣ со а́нгелы лику́еши, предстоя́ престо́лу Всецаря́. Моли́ся, блаже́нне, о ста́дѣ твое́мъ, е́же му́дрѣ собра́лъ еси́, да сохране́но бу́детъ твои́ми моли́твами.

Сла́ва, гла́съ 6:

Пріиди́те, празднолю́бцы, усе́рдно вси́ стеце́мся, вѣ́рно торжеству́емъ въ честнѣ́й па́мяти преди́внаго отца́, пѣ́сньми воспѣва́юще всечестно́е и равноа́нгеломъ житіе́ его́, по святѣ́мъ бо его́ преставле́ніи честны́я мо́щи подаю́тъ исцѣле́нія. Къ нему́же возопіе́мъ: ра́дуйся, преподо́бне Мака́ріе, свѣти́льниче многосвѣ́тлый, мона́шествующимъ спасе́нія хода́тай. Но, я́ко имѣ́я дерзнове́ніе ко Христу́ Бо́гу, не преста́й моля́ся о чту́щихъ па́мять твою́.

И ны́нѣ, богоро́диченъ:

Творе́цъ и Изба́витель мо́й, [Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

О, пресла́вное чу́до!* Яко звѣзда́ отъ за́пада,* Мака́ріе, провозсія́лъ еси́* и бы́лъ еси́ пра́вило добродѣ́телей,* мона́ховъ утвержде́ніе,* по́стниковъ удобре́ніе.* Тѣ́мже, соше́дшеся въ па́мять твою́,* Христа́ возвели́чимъ,* прославля́ющего Своя́ уго́дники.

Сти́хъ: Честна́ предъ Го́сподемъ* сме́рть преподо́бныхъ Его́.

О, пресла́вное чу́до!* Въ послѣ́дняя времена́,* я́ко заря́, облиста́лъ еси́, Мака́ріе,* мона́хъ и́стиненъ бы́лъ еси́,* любве́ яви́лся еси́ испо́лненъ* и, я́ко а́нгелъ, на земли́ пожи́лъ еси́,* изобража́я въ себѣ́ добро́ту Боже́ственную.* Тѣ́мъ па́мять твою́* почита́емъ, досточу́дне.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

О, пресла́вное чу́до!* Ма́карій ди́вный,* Креста́ си́лою вооружи́вся,* и, я́ко крѣ́пкій во́инъ,* побѣди́ неви́димыхъ враго́въ ополче́нія,* и со а́нгелы ны́нѣ водворя́ется.* Тѣ́мже въ па́мять его́ возопіе́мъ:* того́ моли́твами, Христе́ Бо́же,* спаси́ ду́ши на́ша, я́ко Милосе́рдъ.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Мака́ріе, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

Тропа́рь, гла́съ 8:

Плотска́я мудрова́нія, о́тче Мака́ріе, воздержа́ніемъ и бдѣ́ніемъ умертви́лъ еси́, мѣ́сто бо, на не́мже по́ты твоя́ излія́лъ еси́, я́ко труба́, вопіе́тъ къ Бо́гу, повѣ́дающи твоя́ исправле́нія, и по сме́рти честны́я твоя́ мо́щи источа́ютъ исцѣле́нія. Тѣ́мже вопіе́мъ ти́: моли́ Христа́ Бо́га, да спасе́тъ ду́ши на́ша.

Сла́ва, и ны́нѣ, богоро́диченъ:

Иже на́съ ра́ди [рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].


НА УТРЕНИ,
На Бо́гъ Госпо́дь: тропа́рь то́йже, [два́жды. Сла́ва, и ны́нѣ, богоро́диченъ.]

По 1-й стихоло́гіи сѣда́ленъ, гла́съ 8:

Заре́ю Боже́ственнаго сія́нія просвѣти́вся, оста́вилъ еси́ мíра житія́ вся́ и воспрія́лъ еси́ со безпло́тными житіе́ невеще́ственно, Ду́ха Боже́ственными благода́тьми усугу́бився, отону́дуже исцѣле́ній да́ръ воспрія́лъ еси́. Тѣ́мъ вопіе́мъ ти́: моли́ Христа́ Бо́га спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Небе́сное благоче́стіе си́ламъ и похва́льную высоту́ душа́мъ на́шимъ, Ма́терь Дѣ́ву Отрокови́цу восхва́лимъ, вѣ́рніи: ра́дуйся, я́же а́нгеловъ Творца́ во утро́бѣ носи́вши; ра́дуйся, па́дающимъ очище́ніе, Бо́га Сло́во вопло́щши; ра́дуйся, Невѣ́сто неневѣ́стная.

По 2-й стихоло́гіи сѣда́ленъ, гла́съ 2:

Страстны́я тмы́ отбѣ́гъ, къ безстра́стію путе́мъ наставля́емь, къ Свѣ́ту невече́рнему восте́клъ еси́ и, отъ Сего́ озари́вся, нетлѣ́нія бога́тство наслѣ́довалъ еси́. Моли́ непреста́нно о всѣ́хъ на́съ. [Два́жды.]

Сла́ва, и ны́нѣ, богоро́диченъ:

Души́ моея́ лѣ́ность лю́тую и се́рдца моего́ пренеможе́ніе, Ма́ти Бо́жія, воззрѣ́вши, исцѣли́ моли́твами Твои́ми и спасе́ныхъ ча́сти сподо́би, избавля́ющи мя́ тмы́ и муче́нія, я́ко еди́на упова́ніе мое́ и утѣше́ніе.

По поліеле́и сѣда́ленъ, гла́съ 6:

Воздержа́ніемъ мно́гимъ мудрова́нія пло́ти умертви́лъ еси́, ду́шу украси́въ оде́ждею безстра́стія, сле́зныя ка́пли съ тече́ніи по́товъ совокупи́лъ еси́. Преше́дъ умо́мъ ко и́стинному Рачи́телю, испроси́ на́мъ ве́лію ми́лость. [Два́жды.]

Сла́ва, и ны́нѣ, богоро́диченъ:

Отъ се́рдца стена́ніе и отъ утро́бы Ти́ приноша́ю, Твое́, Пренепоро́чная, прося́ благопребы́тное заступле́ніе: поми́луй всестрастну́ю мою́ ду́шу, умилосе́рди многоми́лостиваго Бо́га изба́вити мя́ суда́ и е́зера о́гненнаго, еди́на Благослове́нная.

Та́же, степе́нна, 1-й антифо́нъ 4-го гла́са. Проки́менъ, [гла́съ 4:] Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безпоро́чно поревнова́лъ еси́, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Отве́рзи ми́, Христе́, устнѣ́ воспѣ́ти по́двиги уго́дника Твоего́, преподо́бнаго Мака́рія, да моли́твами свои́ми о́блакъ разори́тъ невѣ́денія моего́.

Блаже́нное житіе́ на земли́ пожи́въ, преподо́бне, небе́сное наслажде́ніе дости́глъ еси́, и ны́нѣ со а́нгелы лику́еши.

Па́мять твоя́, Мака́ріе преподо́бне, я́ко пресвѣ́тлое со́лнце, возсія́, въ ню́же на́мъ испроси́ отъ Бо́га благода́ть и ми́лость и согрѣше́ній избавле́ніе.

Богоро́диченъ: Благослове́нъ Пло́дъ, Пречи́стая, чре́ва Твоего́, Имже земнíи вси́ кля́твы изба́вихомся, Благослове́нная Всечи́стая, несказа́нное чу́до, недовѣ́домое слы́шаніе, всѣ́хъ же вѣ́рныхъ спасе́ніе.

Другíй кано́нъ, гла́съ 1.
Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Ума́ чи́стыми свѣтлостьми́ Боже́ственная зря́, му́жескимъ нра́вомъ, блаже́нне, къ подвиго́мъ устреми́лся еси́, премíрными блиста́ніи Трисо́лнечнаго Свѣ́та озаря́емь.

Поста́вивъ но́зѣ на ка́мени вѣ́ры, не поколеба́лся еси́, блаже́нне, отъ искуше́ній и навѣ́тъ вра́жіихъ, но, я́ко огнепа́льна звѣзда́, попаля́я вся́ благода́тію Пресвята́го Ду́ха.

Зако́ны Боже́ственныя соблюда́я, побѣ́ду вѣ́чную взя́лъ еси́, преподо́бне, прогони́ти ду́хи лука́выя и си́хъ до конца́ низложи́лъ еси́.

Богоро́диченъ: Неизглаго́ланно зачала́ еси́ Бо́га и па́че естества́ родила́ еси́, Пречи́стая Влады́чице, земны́я отъ прегрѣше́ній измѣ́ншаго. Тѣ́мже молю́ Тя: мно́гихъ мя́ согрѣше́ній изба́ви.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Крѣ́пкою твое́ю моли́твою, о́тче, возше́лъ еси́ къ премíрному наслажде́нію и отъ честны́я ра́ки чуде́съ сія́нія испуща́еши, Мака́ріе.

Въ боже́ственнѣй па́мяти твое́й дне́сь соше́дшеся, воспѣ́ти твоя́ по́двиги, и болѣ́зни, и исправле́нія, о́тче преподо́бне.

Чу́дно житіе́ твое́ яви́ся, преподо́бне, благода́тію Боже́ственнаго Ду́ха обложе́нъ, блаже́нную кончи́ну прія́лъ еси́, о́тче, ра́дуяся.

Богоро́диченъ: Отъ ложе́снъ Твои́хъ, Пречи́стая, пра́вды Со́лнце возсія́ и мíръ просвѣти́, Его́же Боже́ственными заря́ми и мене́ просвѣти́.

Инъ.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Якоже честны́й би́серъ, твоя́ мо́щи, преподо́бне, всѣ́ми ви́димы, предлежа́тъ, разли́чная исцѣле́нія неоску́дно подаю́ще.

Лику́ютъ собра́нія мона́шествующихъ, моле́бный соверша́юще пра́здникъ въ честнѣ́мъ твое́мъ преставле́ніи, отъ души́ вопію́ще: помина́й ны́, приснопомина́ющія тя́.

Напра́вился еси́, преподо́бне, къ Боже́ственнымъ приста́нищемъ окормле́ніемъ Христа́ Бо́га на́шего, напа́стей преше́дъ свирѣ́пыхъ во́лнъ.

Богоро́диченъ: Дѣ́ло, е́же содѣ́лалъ еси́, Го́споди, кто́ ска́жетъ? Юже бо прокля́лъ еси́ въ печа́лѣхъ роди́ти ча́да, Сы́нъ Ея́ показа́лся еси́, и ра́дуется же́нское отпа́дшее естество́ о Тебѣ́, Бо́зѣ, Богоро́дицы ра́ди.

Сѣда́ленъ, гла́съ 8:

Храни́тель сы́й Боже́ственныхъ повелѣ́ній Влады́ки, сла́вне, чи́стое житіе́ твое́ показа́ тя священнодѣ́теля боже́ственна, ка́плями по́товъ твои́хъ пре́лести лю́тое у́гліе погаси́лъ еси́ и въ ти́хое приста́нище дости́глъ еси́, зри́ши, блаже́нне, Его́же возжелѣ́лъ еси́. Тѣ́мже вопіе́мъ ти́: моли́ Христа́ Бо́га грѣхо́въ оставле́ніе пода́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Въ простотѣ́ души́, я́ко а́нгелъ, пожи́въ, блаже́нне, страсте́й разгна́лъ еси́ душетлѣ́нную пре́лесть Боже́ственною благода́тію.

Че́стенъ сосу́дъ яви́лся еси́ Боже́ственного Ду́ха, нося́ въ се́рдцы твое́мъ, блаже́нне, Боже́ственныя арома́ты, услажда́я сердца́ вѣ́рно па́мять твою́ почита́ющихъ.

Пресвѣ́тлымъ вѣнце́мъ обложе́нъ, предстои́ши престо́лу всѣ́хъ Царя́: моли́ся, преблаже́нне, о вѣ́рою пра́зднующихъ боже́ственную па́мять твою́.

Богоро́диченъ: Зако́ны въ Тебѣ́ испраздни́шася естества́, па́че естества́ бо Сло́во родила́ еси́. Тѣ́мже Тя́ вѣ́рою молю́: па́че естества́ человѣ́ча, Всенепоро́чная, мно́го согрѣ́шша и Бо́га уда́льшася, обра́щшася, спаси́ мя моли́твами Твои́ми.

Инъ.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Поче́тъ до́брыми твои́ми нра́вы Бо́га Преблага́го, Мака́ріе, тѣ́мже исцѣле́ній исто́чникъ излива́еши, зно́й отгоня́я болѣ́зней же и печа́лей, му́дре.

Ны́нѣшняго житія́ красоты́ вся́ уме́ты вмѣни́лъ еси́, да Христа́ приобря́щеши, и сего́ ра́ди до́брѣ потруди́лся еси́, вѣнцено́сче великоимени́тый.

Просте́ръ у́мъ ко еди́ному Влады́цѣ, вѣне́цъ нетлѣ́нія отъ Него́ прія́лъ еси́, сія́ющій свѣ́тлыми свѣтоли́тіи и бога́тыми дарова́ніи, идѣ́же перворо́дныхъ жили́ща.

Богоро́диченъ: Влады́чице мíра, Богоро́дице, помози́ ми, прелука́вый вра́гъ поглоща́етъ мя́ зѣ́льнѣ лю́тыми воспомина́ніи и помышле́ніи, я́же отъ Бо́га мя́ разлуча́ютъ, не оста́ви у́бо мене́, ниже́ пре́зри.

Пѣ́снь 5.

Ирмо́съ: Утренююще вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Егда́ благода́тію Ду́ха смире́нную стяжа́лъ еси́ му́дрость, ражда́ющему сме́рть врагу́ глубоку́ я́зву да́лъ еси́ и высокоу́мный того́ нра́въ до конца́ низложи́лъ еси́.

Возше́дъ ко оби́телемъ вѣ́чнымъ, ли́ку преподо́бныхъ причта́лся еси́, Мака́ріе, съ ни́миже на́съ помина́й, на земли́ тебе́ помина́ющихъ.

Да ублажи́тся досто́йно Мака́рій: поще́ніемъ бо, и моли́твами, и слеза́ми Бо́гу соедини́ся и вся́ просвѣща́етъ духо́вною благода́тію.

Богоро́диченъ: О, Ма́ти Дѣ́во Отрокови́це! Яже необыме́ннаго Бо́га пло́тію ро́ждшая, а́нгеловъ сла́ва и де́моновъ я́зва, Богоневѣ́сто, мое́ се́рдце, уязви́вшееся грѣхо́мъ, цѣльбы́ Боже́ственныя сподо́би.

Инъ.

Ирмо́съ: Тво́й ми́ръ да́ждь на́мъ, Сы́не Бо́жій: ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.

Стра́сти попали́лъ еси́ огне́мъ воздержа́нія, ду́шу озари́въ Боже́ственными сія́ніи, де́моновъ прогони́тель яви́лся еси́, Боже́ственнымъ Ду́хомъ просвѣща́емь.

До́блести твоя́, Мака́ріе, человѣкоубíйца зрѣ́ти не могíй, искуше́нія тебѣ́ простира́етъ, и мужему́дренно противля́яся, до конца́ сего́ низложи́лъ еси́.

Мірска́го смуще́нія отбѣ́глъ еси́, добродѣ́тельми удобри́въ житіе́ твое́, мона́ховъ утвержде́ніе бы́лъ еси́, о́тче Мака́ріе преподо́бне.

Богоро́диченъ: Ты́ крѣ́пость моя́, Ты́ похвала́ и ра́дованіе, храни́тельница ми́ и заступле́ніе, и прибѣ́жище, и предста́тельница непобѣди́ма, Пресвята́я Богоро́дице, тѣ́мже спаси́ раба́ Твоего́.

Пѣ́снь 6.

Ирмо́съ: Моли́тву пролію́ ко Го́споду, и Тому́ возвѣщу́ печа́ли моя́, я́ко золъ душа́ моя испо́лнися, и живо́тъ мой а́ду прибли́жися, и молю́ся, я́ко Іо́на: отъ тли, Бо́же, возведи́ мя.

На земли́ до́брѣ пожи́лъ еси́, преподо́бне, и святы́хъ свѣ́тлости, и вѣ́чныхъ наслажде́ній блаже́нства ви́дѣти сподо́бился еси́.

Честна́ сме́рть яви́ся блаже́ннаго Мака́рія предъ Тобо́ю, Бо́же вся́ческихъ, его́же па́мять почита́ющимъ врачевство́ безме́здно яви́лъ еси́.

Ду́ха благода́ть прія́лъ еси́, о́тче, неду́ги отъ человѣ́къ прогоня́ти и вре́дъ де́монскій истребля́ти, вели́кій уго́дникъ показа́вся Христа́ Бо́га на́шего.

Богоро́диченъ: На́йде на Тя́ Вседѣ́тельный Ду́хъ, Всенепоро́чная, и Сло́во Бо́жіе въ Тя́ всели́ся, и пло́ть бы́сть несказа́нно, пребы́въ неизмѣ́ненъ.

Инъ.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Ду́ха си́лою, блаже́нне, мы́сленныхъ волко́въ че́люсти сокруши́лъ еси́ и просвѣще́ннымъ ра́зумомъ небе́сную тишину́ получи́лъ еси́.

По́стническимъ огне́мъ искуси́вся, о́ко се́рдца твоего́ преочи́стивъ, и добродѣ́тельнымъ нра́вомъ ду́шу просвѣти́лъ еси́.

Вни́де въ тя́ раче́ніе Содѣ́теля, богому́дре, оста́вль земны́хъ пристра́стіе, единосе́льникъ показа́лся еси́ вы́шнимъ служи́телемъ.

Богоро́диченъ: Безъ Сѣ́мене во чре́вѣ Бо́га зачала́ еси́, Дѣ́ва пребы́вши по рождествѣ́, Чи́стая, стра́шнѣмъ. Тѣ́мже хвала́ми Тя́ сла́вимъ, Тобо́ю изба́вльшеся кля́твы, Пречи́стая.

Конда́къ, гла́съ 2. Подо́бенъ: Вы́шнихъ ища́.

Вы́шнихъ жела́я, воздержа́ніемъ, и труды́, и по́ты наслади́вся, жела́ніе пло́ти твоея́ обузда́въ, чуде́съ да́ръ пріе́мъ отъ Христа́ Бо́га, свѣти́льникъ яви́лся еси́ пресвѣ́тлый. Тѣ́мже Христо́ва Це́рковь пѣ́сньми сла́витъ тя́, преподо́бне Мака́ріе, о́тче на́шъ.

Икосъ:

Ангелъ земны́й и человѣ́къ небе́сный, просія́лъ еси́ въ воздержа́ніи вся́цѣмъ моли́твою, и посто́мъ, и чистото́ю и, боже́ственное тече́ніе сконча́въ, вы́шняго нетлѣ́нія прича́стникъ бы́въ, богоно́се, дерзнове́ніе стяжа́въ къ Человѣколю́бцу Бо́гу, Иже исцѣле́ній благода́ть на неду́ги разли́чныя тебѣ́ дарова́. Тѣ́мже ти́ вѣ́рою вопіе́мъ: ра́дуйся, всеблаже́нне о́тче, по́стниковъ похвало́; ра́дуйся, цѣлому́дрія сто́лпе, и́мже де́монскія шата́нія искорени́шася; ра́дуйся, свѣти́льниче многосвѣ́тлый, и́же чуде́съ сія́ніи вселе́нную просвѣща́еши; ра́дуйся, я́ко ста́ду твоему́ подава́еши по́мощь и заступле́ніе; ра́дуйся, Крестоно́сному Импера́тору на́шему похвала́ и утвержде́ніе, его́же соблюди́ моли́твами твои́ми отъ вра́гъ ненавѣ́тна, да вси́ вопіе́мъ ти́: ра́дуйся, преподо́бне Мака́ріе, о́тче на́шъ.

Пѣ́снь 7.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Къ Свѣ́ту незаходи́му возше́дъ и, я́ко со́лнце, просвѣща́еши вселе́нную, Свѣ́та бо дѣла́ соверши́лъ еси́, Мака́ріе преподо́бне, и ны́нѣ вопіе́ши: оте́цъ на́шихъ Бо́же, благослове́нъ еси́.

Плотска́я движе́нія, преподо́бне, воздержа́ніемъ и на земли́ лега́ніемъ умертви́лъ еси́, и добродѣ́телей просвѣще́ніемъ просія́лъ еси́, вопія́ Христу́: оте́цъ на́шихъ Бо́же, благослове́нъ еси́.

Чу́дно житіе́ твое́, преподо́бне, яви́ся, благода́тію Боже́ственнаго Ду́ха обложе́нъ, блаже́нную кончи́ну прія́лъ еси́, о Христѣ́ ра́дуяся, къ Нему́же и взыва́лъ еси́: оте́цъ на́шихъ Бо́же, благослове́нъ еси́.

Богоро́диченъ: Ны́нѣ вся́ испо́лнишася свѣ́та Боже́ственнаго Тобо́ю, Пречи́стая: Ты́ бо две́рь яви́лася еси́, е́юже мíру Бо́гъ пріи́де, просвѣща́я вѣ́рою зову́щія: оте́цъ на́шихъ Бо́же, благослове́нъ еси́.

Инъ.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Воздержа́нія росо́ю до́блественнѣ страстну́ю пе́щь погаси́лъ еси́, сле́зъ же ка́плями, возду́шныхъ князе́й написа́нія растерза́лъ еси́ и со дерзнове́ніемъ вопія́лъ еси́ Христу́: оте́цъ на́шихъ Бо́же, благослове́нъ еси́.

По́стниковъ ты́ бы́лъ еси́ похвала́, Мака́ріе, крѣ́пко низложи́въ де́монская шата́нія, и ны́нѣ наслажда́ешися неизрече́нныя красоты́, вопія́ Христу́: оте́цъ на́шихъ Бо́же, благослове́нъ еси́.

Еди́ному Бо́гу возложи́въ ду́шу и помышле́ніе, тѣ́сный пу́ть ше́ствовалъ еси́, тѣ́мъ получи́лъ еси́ небе́снаго Ца́рствія наслажде́ніе. И ны́нѣ взыва́еши: оте́цъ на́шихъ Бо́же, благослове́нъ еси́.

Богоро́диченъ: Тро́ицѣ во еди́нствѣ правосла́вно служа́ще, Тя́, Ма́ти Дѣ́во Чи́стая, я́ко Бо́га пло́тію ро́ждшую проповѣ́дающе, земнíи, боже́ственнѣ пое́мъ: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Боже́ственными добро́тами наслажда́яся, чуде́съ сія́ніи вся́ просвѣща́еши и де́монскую тму́ разоря́еши Бо́жіею благода́тію, поя́: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Блиста́яся благода́тію Боже́ственнаго Ду́ха, преподо́бне Мака́ріе, честно́е твое́ творя́щимъ успе́ніе свѣ́тлыми твои́ми моли́твами испроси́ грѣхо́въ отпуще́ніе, пою́щимъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Заря́ми тве́рдыхъ по́двигъ твои́хъ, я́ко со́лнце, возсія́лъ еси́: врачева́нія источа́еши и вся́ку болѣ́знь облегча́еши Христу́ вопію́щимъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Яко разбо́йникъ, взыва́ю Ти́: помяни́ мя, Человѣколю́бче; пла́чу, я́ко блудни́ца, и вопію́: согрѣши́хъ, я́ко дре́вле блу́дный, ка́ющася пріими́ мя, отча́яннаго, Богоро́дицы ра́ди, да усе́рдно вопію́: свяще́нніи, воспо́йте, лю́діе, и превозноси́те Христа́ во вѣ́ки.

Инъ.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Ду́ха благода́ть пріи́мъ, о́тче Мака́ріе, сосу́дъ избра́нный показа́лся еси́, святы́ню пріи́мъ отъ Христа́ Бо́га, Ему́же непреста́нно вопія́: да благослови́тъ тва́рь вся́ Го́спода и превозно́ситъ во вся́ вѣ́ки.

Боже́ственною си́лою укрѣпля́емь, побѣди́лъ еси́ неви́димыхъ вра́гъ ополче́нія, къ Свѣ́ту прибли́жился еси́ невече́рнему, при́сно воспѣва́я: да благослови́тъ вся́ тва́рь Го́спода и превозно́ситъ во вся́ вѣ́ки.

Мона́шествующихъ бы́лъ еси́ пра́вило пра́вости и стра́сти вся́ крѣ́пко попра́лъ еси́. Тѣ́мже, возше́дъ на высоту́, научи́лъ еси́ воспѣва́ти: да благослови́тъ тва́рь вся́ Го́спода и превозно́ситъ во вся́ вѣ́ки.

Богоро́диченъ: Спасе́нія хода́таица на́мъ яви́лася еси́, Богоро́дице, ро́ждшая Спа́са и Влады́ку всѣ́хъ. Тѣ́мже молю́ Тя: спасе́нія сподо́би смире́нную мою́ ду́шу пѣсносло́вити Тя́ вѣ́рно во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Ра́ка, идѣ́же лежи́тъ честно́е тѣ́ло твое́, исто́чникъ содѣва́етъ чуде́съ, къ не́йже притека́юще, отъ вся́кія скве́рны и страсте́й избавля́емся.

Огне́мъ Боже́ственнаго стра́ха ду́шу распали́лъ еси́, и къ сія́нію невече́рнему восте́клъ еси́, и ны́нѣ, блаже́нне, трисо́лнечнымъ свѣ́томъ озаря́емь.

Мірскíя сла́дости возненави́дѣвъ, му́жескимъ нра́вомъ къ подвиго́мъ устреми́лся еси́ и преподо́бнымъ красота́ лѣ́потна бы́лъ еси́, тѣ́мъ па́мять твою́ почита́емъ, досточу́дне.

Богоро́диченъ: Низложи́ вознесе́нныя и побѣди́ полки́ иноплеме́нныхъ, Дѣ́во Чи́стая, хотя́щія бра́немъ, и Твоя́ рабы́ невре́дны отъ ни́хъ сохрани́, Отрокови́це.

Инъ.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Мра́зъ нощны́й до́блественнѣ претерпѣ́лъ еси́ и ва́ръ дневны́й поне́слъ еси́, до́мъ Прему́дрости Бо́жія бы́лъ еси́ и возше́лъ еси́ на го́ру боже́ственнаго ра́зума.

Алчбою, и моли́твами непреста́нными, и чистото́ю Бо́гу соединя́яся, мно́жества мона́шествующихъ научи́лъ еси́ веще́ственныхъ всѣ́хъ огреба́тися.

Ста́до твое́, о́тче, возгна́лъ еси́ на па́жить чи́сту воздержа́нія, и приве́лъ еси́ къ безстра́стія исто́чнику, и ны́нѣ потщи́ся, па́стырю до́брый, сохрани́ти сіе́ невре́дно.

Богоро́диченъ: О, Пресвята́я Дѣ́во, Ма́ти Бо́га Вы́шняго! Твое́ Рождество́ на земли́ спасе́ніе яви́ся грѣ́шникомъ и смире́ннымъ, о Тебѣ́ бо спасо́хомся, вѣ́ровавшіи, но спаса́еши мя́ ны́нѣ и во вся́ вѣ́ки жи́зненныя.

Свѣти́ленъ:

Многосвѣ́тлый свѣти́льникъ, пусты́нное воспита́ніе, чистоты́ сокро́вище, а́нгеломъ собесѣ́дниче, до́мъ Ду́ха Пресвята́го, Мака́ріе преподо́бне, непреста́нно моли́ся о вѣ́рою почита́ющихъ пречестну́ю па́мять твою́. [Два́жды.]

Богоро́диченъ:

Тя́ пѣ́сньми немо́лчными ублажа́емъ, Дѣ́во, я́ко отъ Тро́ицы Еди́наго родила́ еси́, Богоро́дице, и но́сиши на Боже́ственныхъ объя́тіяхъ Боже́ственное Сло́во, Его́же пѣ́сньми досто́йно сла́вимъ.

На хвали́техъ стихи́ры, гла́съ 4. Подо́бенъ: Яко до́бля.

Отъ ю́ности возложи́вся Влады́цѣ всѣ́хъ,* Сего́ возжелѣ́лъ еси́,* крѣ́пко къ подвиго́мъ му́жески устреми́лся еси́,* и обогати́лся еси́ Боже́ственною благода́тію* твори́ти исцѣле́нія* и чудодѣ́йствовати пресла́вная,* и возше́ствіе къ небеси́ обрѣ́лъ еси́,* и, со а́нгелы лику́я, непреста́нно моли́ся* о ста́дѣ твое́мъ, богоблаже́нне. [Два́жды.]

Со́лнца свѣтлѣ́йши* свяще́нная па́мять твоя́ провозсія́,* всеблаже́нне Мака́ріе,* пресвѣ́тлыми свѣтлостьми́ озаря́я вся́,* по́двиги твоя́ почита́ющія.* Не преста́й моля́ся, блаже́нне,* Просла́вльшему святу́ю твою́ па́мять* и чуде́съ сокро́вище тя́ су́щимъ въ мѣ́рѣ* Дарова́вшему, преподо́бне.

Мірскíя красоты́, блаже́нне,* ра́дуяся, избѣ́глъ еси́,* тогда́ предпоче́лъ еси́* тѣ́сный и болѣ́зненный пу́ть* и зѣло́ жесто́кій,* и въ слеза́хъ препроводи́лъ еси́ все́ житіе́ твое́, преподо́бне.* Тѣ́мже утѣше́нія боже́ственнаго* и непреста́ннаго весе́лія* ны́нѣ наслажда́ешися, Мака́ріе.

Сла́ва, гла́съ 2:

Преподо́бне о́тче, измла́да въ добродѣ́тели прилѣ́жно подвиза́вся, сосу́дъ бы́лъ еси́ Свята́го Ду́ха. Тѣ́мъ и чуде́съ дарова́нія пріе́мъ, человѣ́ки научи́лъ еси́ преоби́дѣти маловре́менныхъ, ны́нѣ же неизрече́ннымъ свѣ́томъ свѣ́тло сія́еши, просвѣти́ на́ша помышле́нія, о́тче преподо́бне Мака́ріе.

И ны́нѣ, богоро́диченъ.
Славосло́віе вели́кое. Ектеніи́ и отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я, пе́рваго кано́на, и пѣ́снь 6-я, втора́го кано́на. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 84 – 93.

/ Къ оглавленію раздѣла /


Наверхъ / Къ титульной страницѣ

0