Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 17-й де́нь.
Преподо́бнаго отца́ на́шего Алексíя, человѣ́ка Бо́жія.

[ВЕЧЕРЪ,]
На Го́споди воззва́хъ: стихи́ры, гла́съ 1. Подо́бенъ: Всехва́льніи му́ченицы.

Человѣ́ка тя́ позна́хомъ Бо́жія* зва́ніемъ же и ве́щію,* добродѣ́тельми бо просія́лъ еси́,* нищету́ безмѣ́рную* и тѣсноту́ на земли́ стяжа́въ* и чудесы́ вѣ́рныя увѣ́ривъ.* Тѣ́мже моли́ся* дарова́ти душа́мъ на́шимъ* ми́ръ и ве́лію ми́лость.

Жела́ніемъ, ороша́ющимъ пло́ть,* по́хоти паля́щія* угаси́лъ еси́, Алексíе,* черто́гомъ черто́гъ благоче́стно измѣни́лъ еси́,* сла́дость же тѣле́сную* боже́ственнымъ а́нгельскимъ подо́біемъ.* Съ ни́миже моли́ся* дарова́ти душа́мъ на́шимъ* ми́ръ и ве́лію ми́лость.

Пребыва́лъ еси́ невѣ́домъ, му́дре,* предъ враты́ оскорбля́емь* свяще́нныхъ роди́телей твои́хъ,* руга́ющимся тебѣ́ твои́мъ отроко́мъ,* на вре́мени до́лзѣ,* у́меръ же, яви́лся еси́ чудесы́,* я́же соверши́лъ еси́,* исцѣля́я неду́ги* и отгоня́ лука́вствія ду́хи.

Аще суббо́та или́ недѣ́ля, пое́мъ и самогла́сенъ. Сла́ва, гла́съ 2:

Ти́хое твое́, о́тче, и молчали́вое, беззло́бивое и кро́ткое житіе́ возлюби́въ, Христо́съ Бо́гъ, преблаже́нне Алексíе, яви́лъ тя́ е́сть свѣти́льника всему́ мíру, сія́юща па́че со́лнца, и́бо сожи́тельницу и бога́тство вре́менное, я́ко пра́хъ, вмѣни́лъ еси́, въ дому́ о́тчи незна́емь, Еди́наго жела́я, люби́маго тобо́ю Христа́. Но помяни́ твоя́ рабы́ у Престо́ла Всецаря́, Христа́ Бо́га на́шего, преподо́бне о́тче, не преста́й моля́ся за рабы́ своя́.

Сла́ва, и ны́нѣ, богоро́диченъ. Подо́бенъ: Всехва́льніи.

Неду́говавшую, Пресвята́я,* лю́тѣ ду́шу мою́ страстьми́ лука́выми исцѣли́,* я́же Цѣли́теля и Спа́са всѣ́хъ —* Христа́ ро́ждшая,* вся́ку я́зю исцѣли́вшаго* уя́звленнаго діа́вольскимъ зломы́сліемъ* и сме́рти на́съ измѣ́ншаго.

Крестобогоро́диченъ:

Своего́ Агнца* Агница и Непоро́чная Влады́чица* на Крестѣ́ я́ко ви́дѣвши,* зра́ка не иму́ща, ниже́ добро́ты, —* увы́ Мнѣ́, — рыда́ющи, глаго́лаше, —* гдѣ́ добро́та Твоя́ за́йде, Сладча́йшій?* Гдѣ́ благолѣ́піе?* Гдѣ́ благода́ть блиста́ющая о́браза Твоего́,* Сы́не Мо́й Любе́знѣйшій?

Тропа́рь, гла́съ 4:

Возвы́сився на добродѣ́тель и у́мъ очи́стивъ, къ жела́нному и кра́йнему дости́глъ еси́, безстра́стіемъ же украси́въ житіе́ твое́ и поще́ніе изря́дное воспріи́мъ со́вѣстію чи́стою, въ моли́твахъ, я́ко безпло́тенъ, пребыва́я, возсія́лъ еси́, я́ко со́лнце, въ мíрѣ, преблаже́нне Алексíе.


[НА УТРЕНИ,]
Кано́нъ, его́же краегране́сіе: Тя́, Бо́жія человѣ́ка, восхваля́ю, блаже́нне. Ки́ръ Іо́сифа. Гла́съ 2.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Тѣснѣ́йшій ше́ствовалъ еси́ пу́ть, непоро́чное и преподо́бное житіе́, му́дре, проходя́ отъ ю́ности, тѣ́мже мою́ тѣсноту́ разшири́ ума́, восхвали́ти тя́, въ ра́йстѣй широтѣ́ водворя́яся, Алексíе.

Тебе́ сама́го весьма́ Бо́гу возложи́въ, блаже́нне, внѣ́ пло́ти и мíра бы́лъ еси́, бога́тству теку́щу небе́сное предпоче́лъ еси́ и пребыва́ющее и обѣща́нный гра́дъ Сіо́нъ вѣ́чнующій.

Ложе́снъ ты́ ма́тернихъ непло́діе разрѣши́лъ еси́, ро́ждся, я́коже Самуи́лъ, пребога́те, во чре́вѣ же се́рдца чи́стый заче́нъ стра́хъ, роди́лъ еси́ ду́хъ спасе́нія Боже́ственныхъ добродѣ́телей вѣ́рою.

Богоро́диченъ: Бо́жій Собезнача́льный Сы́нъ имѣ́ я́ко вино́вну Тя́ къ на́мъ, Дѣ́во, подо́бія, еди́ну, па́че всея́ тва́ри, Чи́стая, чисту́ Тя́ обрѣ́тъ. Тѣ́мъ Тя́ пое́мъ, вси́ ро́ди, и ублажа́емъ.

Пѣ́снь 3.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Пронза́емь жела́ніемъ чистоты́, черто́гомъ, и́же на земли́, небе́сный премѣни́лъ еси́ и жены́ любо́вію сладча́йшее а́нгельское подо́біе.

Молвы́ жите́йскія и тя́жесть бога́тства оста́вилъ еси́ и пресе́льникъ бы́въ оте́чества, блаже́нне Алексíе, Христо́вѣ нищетѣ́ подо́бяся.

Слеза́ми, и болѣ́зньми, и воздержа́ніемъ, всему́дре, благо́е взыска́лъ еси́, когда́ пріи́детъ свѣ́тъ ра́зума, безстра́стіе дая́ се́рдцу твоему́.

Богоро́диченъ: Горѣ́ неви́димый а́нгеломъ, Чи́стая, до́лѣ изъ Тебе́ ражда́емь, зри́тся соверше́нъ Человѣ́къ, погиба́ющій мíръ обновля́я.

Сѣда́ленъ, гла́съ 3. Подо́бенъ: Красотѣ́.

Мíра красоту́, преподо́бне, оста́вилъ еси́, премѣни́въ бога́тствомъ теку́щимъ непроходи́мое я́вѣ и пребыва́ющее, Алексíе. Тѣ́мже со всѣ́ми тя́ святы́ми сла́вимъ и торжеству́емъ свѣ́тло въ па́мяти твое́й, прося́ще обрѣсти́ моли́твами твои́ми, блаже́нне, ве́лію ми́лость.

Сла́ва, и ны́нѣ, богоро́диченъ:

Недомы́сленно и непости́жно е́сть, Влады́чице Богора́дованная, е́же содѣ́ланное о Тебѣ́ стра́шное Бо́жіе та́инство, и́бо Необыме́ннаго, заче́нши, родила́ еси́, пло́тію обложе́на отъ пречи́стыхъ крове́й Твои́хъ. Его́же всегда́, Чи́стая, я́ко Сы́на Твоего́ моли́ спасти́ся душа́мъ на́шимъ.

Крестобогоро́диченъ:

Неискусобра́чная Чи́стая и Ма́ти Твоя́, Христе́, ви́дящи Тя́, ме́ртва ви́сяща на Крестѣ́, ма́терски пла́чущи, глаго́лаше: что́ Тебѣ́ воздаде́ евре́йскій беззако́нный собо́ръ и неблагода́рный, и́же мно́гихъ и вели́кихъ Твои́хъ, Сы́не Мо́й, даро́въ наслади́выйся? Пою́ Твое́ Боже́ственное снизхожде́ніе.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Претерпѣ́лъ еси́ нищету́, проси́тель бы́въ, ни́щь, я́коже Ла́зарь, жела́ніе бо Боже́ственное утѣша́ше, блаже́нне, се́рдце твое́, пожела́вшее бога́тства небе́снаго.

Безпеча́льнаго и ти́хаго житія́ возжела́лъ еси́, еди́нощи яды́й въ седми́цѣ, Алексíе, жела́ніемъ ожида́ющаго тя́ не мимотеку́щаго, всеблаже́нне, наслажде́нія.

Хра́мъ Бо́гу се́рдце ища́й содѣ́лати, въ дому́ возлюби́лъ еси́ Богома́тере, сла́вне, всегда́ сѣдѣ́ти и небе́сныя добро́ты созира́ти.

Богоро́диченъ: Воздои́вши Да́теля, Дѣ́во, млека́, а́лчущее и утѣсня́емое ны́нѣ се́рдце мое́ насы́ти вся́каго ра́зума и умиле́нія Боже́ственнаго, молю́ Тя.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

То́ки свяще́нными напая́я всегда́ сле́зъ твою́ ду́шу, содѣ́лалъ еси́ кла́съ, вои́стинну стори́чествующь, Дѣ́лателю Безсме́ртному до́брѣ соблюда́емь.

Ви́дѣнъ бы́лъ еси́ на земли́, житіе́ безпло́тныхъ подража́я, премно́гимъ твои́мъ, о́тче, воздержа́ніемъ, досточу́дне, и въ моли́твахъ прилѣжа́ніемъ, и́мже, я́ко свѣ́томъ, просвѣти́лся еси́.

Огне́мъ моли́твъ грѣха́ попали́лъ еси́ ве́щь, му́дре, бдѣ́нными же стоя́ньми вся́кое сладостра́стіе успи́лъ еси́, усну́въ же, къ сія́нію преста́вился еси́ невече́рнему.

Богоро́диченъ: Иже, во Свѣ́тѣ живы́й, во свято́е чре́во Твое́ всели́ся, Чи́стая, мíръ, поги́бшій тмо́ю неразу́мія, па́ки назида́я, Его́же моли́ вся́ просвѣти́ти, пою́щія Тя́.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Яко хра́мъ жи́въ Бо́жій, тя́, бы́вша Христо́во селе́ніе, Неискусобра́чная проявля́етъ кры́ющася и прославля́етъ утаи́тися тща́щагося.

Моли́твы твоя́ Бо́гу, я́ко кади́ло, блаже́нне, прія́тны бы́ша, отсю́ду житіе́мъ твои́мъ вѣ́рныхъ ра́зумы облагово́нилъ еси́ Ду́ха благода́тію.

Свяще́ннымъ житіе́мъ украша́ема, па́ки Христо́съ не хотя́ща, сла́вне, тя́ оте́честву дае́тъ, отбѣга́юща сла́вы привре́менныя.

Богоро́диченъ: Зако́ны естества́, Чи́стая Влады́чице, Зижди́тель, новосодѣ́лавый созда́нія, изъ Тебе́ неизрече́нно ражда́ется и обожа́етъ мя́ безмѣ́рною ми́лостію.

Конда́къ, гла́съ 2:

До́мъ роди́телей твои́хъ, я́ко чу́ждь, имѣ́въ, водвори́лся еси́ въ не́мъ нищеобра́зно и, по преставле́ніи вѣне́цъ пріе́мъ сла́вы, ди́венъ на земли́ яви́лся еси́, Алексíе, человѣ́че Бо́жій, а́нгеломъ и человѣ́комъ ра́дованіе.

Икосъ:

Житіе́мъ и словесы́ украси́лся еси́ и Христо́ву Це́рковь возвели́чилъ еси́ твои́мъ житіе́мъ, отца́ и ма́терь, царя́ и лю́ди торжествова́ти устро́ивъ, дѣ́лы же соблю́дъ, е́же по о́бразу Бо́жію, Алексíе преподо́бне, возсія́лъ еси́ въ мíрѣ твои́мъ цѣлому́дріемъ. Тѣ́мже благода́ть добродѣ́телей твои́хъ облистава́етъ вся́, вѣ́рою пра́зднующія, о́тче, па́мять твою́, яви́лъ бо ся еси́ а́нгеломъ и человѣ́комъ ра́дованіе.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Претерпѣ́лъ еси́, преподо́бне, предъ роди́тельными враты́ сѣдя́, и весьма́ непознава́емь, и отъ о́трокъ руга́нія подъе́мля, и наруга́емь лю́тѣ, и нището́ю мно́гою оскорбля́емь.

Пло́ти твоея́ мудрова́ніе умертви́въ, зря́ роди́тели, и си́ми непознава́емь, естества́ покрыва́лъ еси́ ну́жду, преподо́бне, и презрѣ́ніе твои́хъ неиску́сныхъ о́трокъ, оскорбля́ющихъ тя́.

О, чудесе́! Ка́ко пребы́лъ еси́, при́сно ни́щетствуя, въ бога́тствѣ, Алексíе, безмѣ́рнаго смире́нія? Ка́ко претерпѣ́лъ еси́ руга́нія и укори́зны отъ о́трокъ, прему́дре, твои́хъ, не вѣ́дѣвшихъ житія́ твоего́?

Богоро́диченъ: Вели́каго служи́тельница Ты́ та́инства была́ еси́, Всенепоро́чная: Бо́га бо воплоти́ла еси́, вели́кихъ зо́лъ на́съ изба́вльшаго, Тя́ велича́ющія, Чи́стая Благослове́нная, Богора́дованная.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Невѣ́домъ пре́жде роди́телемъ сы́й, во вре́мя отше́ствія твоего́ си́мъ та́йну открыва́еши, явля́емь въ сла́ву Бо́га на́шего, сла́вне, вельми́ тя́ и досто́йнѣ просла́вльшаго.

Госпо́дь гла́сомъ ве́ліимъ явля́етъ тя́ всему́ Ри́му, сокрове́нное сокро́вище, пребога́те, въ ни́щетнѣ о́бразѣ лежа́ща и да́ры врачева́ній вся́, вѣ́рою къ тебѣ́ приходя́щія, обогаща́юща.

Кня́зи лю́дстіи, и ца́ріе снидо́шася, и свяще́нницы, блаже́нне, погребсти́ тя Бо́жіимъ манове́ніемъ и, ви́дяще ве́ліе видѣ́ніе, диви́шася чудесе́мъ, преподо́бне, я́же твори́лъ еси́ Боже́ственною си́лою Ду́ха.

Богоро́диченъ: Истлѣ́вшія ны́ дре́вле преступле́ніемъ обновля́я, Человѣколю́бецъ нетлѣ́нно воплоти́ся отъ нетлѣ́нныя Твоея́, Всенепоро́чная, утро́бы и изба́ви всѣ́хъ грѣхо́вныя тли́, Богоневѣ́стная.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Исцѣле́нія источи́лъ еси́, ко гро́бу несо́мь, Бо́гу тя́, блаже́нне, вельми́ сла́вящу: свѣ́тъ бо неви́дящіи ви́дѣша и глаго́ланіе прія́ша пре́жде су́ще нѣмíи, всесла́вне Алексíе.

Ви́дѣнъ бы́лъ еси́, предлежа́щь и къ погребе́нію несо́мь, я́ко со́лнце, о́тче, испуща́я исцѣле́ній зари́ пресла́вно, и те́мныя стра́сти отгоня́, и опаля́я де́моны, и просвѣща́я богому́дрыя.

Пріи́де погребсти́ тя патріа́рховъ пе́рвѣйшій, ца́рь же, вельми́ христолюби́вѣйшій, кня́зи, ста́рцы и ю́ніи и мона́шествующихъ ли́цы, Боже́ственнымъ манове́ніемъ освяща́ющеся прикоснове́ніемъ твои́мъ, блаже́нне.

Восхище́нъ бы́лъ еси́, на колесни́цѣ добродѣ́телей несо́мь, и почива́еши, идѣ́же преподо́бныхъ чи́ни, собо́ръ апо́столъ и му́чениковъ, патріа́рховъ и всѣ́хъ пра́ведникъ, съ ни́миже на́съ помяни́, почита́ющія тя́, Алексíе.

Богоро́диченъ: Гла́съ Тебѣ́ прино́симъ Гавріи́ловъ, Всенепоро́чная: ра́дуйся, глаго́люще, ни́во недѣ́ланная; ра́дуйся, кля́твы разрѣше́ніе; ра́дуйся, исто́чниче воды́ живо́тныя, преподо́бныхъ похвало́, Богоро́дице Приснодѣ́во.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 80 об. – 84.

/ Къ оглавленію раздѣла /


Наверхъ / Къ титульной страницѣ

0