Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 24 iюня 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 16-й де́нь.
Преставле́ніе и́же во святы́хъ отца́ на́шего Серапіо́на, архіепи́скопа Новгоро́дскаго.

[НА ВЕЛИЦѢЙ ВЕЧЕРНИ,]
Блаже́нъ му́жъ.., [1-й антифо́нъ. На Го́споди воззва́хъ:] стихи́ры [на 8], гла́съ 2. Подо́бенъ: Егда́ отъ дре́ва.

Оттрясе́, я́ко лѣ́ностный со́нъ, мірска́я треволне́нія и къ ти́хому приста́нищу притече́, и́го Христо́во на ра́мо взе́мъ, жела́тельно Тому́ послѣ́довалъ еси́, по́мощь имѣ́я ро́ждшую Того́, Богоро́дицу, Всемíрную Засту́пницу, ста́до свое́ до́брѣ упа́слъ еси́ и ко Христу́ приведе́, и ны́нѣ моли́ся Го́сподеви, спасти́ся душа́мъ на́шимъ. [Три́жды.]

Отъ земны́хъ на небе́сная востече́, я́ко небопа́рный оре́лъ, пречу́дне, ле́гкима крила́ми вперя́емь, дости́глъ еси́ вы́шнее Ца́рство, дре́внее оте́чество, и та́мо всели́лся еси́, слико́венъ страда́льцемъ и святи́телемъ яви́лся еси́, и ны́нѣ престо́лу Влады́чню предстоя́, Свѣ́томъ Трисо́лнечнымъ озаря́емь, моли́ся Го́сподеви, спасти́ся душа́мъ на́шимъ. [Два́жды.]

Сла́ва, гла́съ 6:

Свѣ́тлое и свѣтоно́сное наста́ дне́сь, бра́тіе, торжество́, си́мъ торжество́мъ въ па́мять преди́внаго страда́льца, Серапіо́на святи́теля, ра́достно лику́юще и пѣ́сни плету́ще, псало́мски взыва́емъ Христо́ви. Побѣ́дныя о́бразы принося́ще, глаго́лемъ: кто́ подо́бенъ Тебѣ́, Го́споди, прославля́емь во святы́хъ и удивля́я святы́я Своя́, я́коже сего́ до́бляго святи́теля просла́вивъ, и по сме́рти чудесы́ разли́чными обогати́лъ еси́, и ны́нѣ прояви́лъ еси́ на́мъ честны́я его́ и многоцѣле́бныя мо́щи, отъ ни́хже пріе́млемъ исцѣле́ніе душа́мъ же и тѣлесе́мъ, и де́монскихъ навѣ́тъ избавля́емся, къ нему́же возопіе́мъ: ра́дуйся, свяще́нная главо́, па́стырю на́шъ и учи́телю до́брый, подража́я и́стиннаго Па́стыря Христа́, ста́до свое́ до́брѣ упа́слъ еси́ и, къ премíрному Ца́рствію наста́вивъ, во огра́ду небе́сную приве́лъ еси́. И ны́нѣ моли́ся Го́сподеви спасти́ царя́ правосла́внаго и ми́ръ пода́ти гра́ду твоему́ и спасе́ніе при́сно блажа́щимъ тя́.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́. Паремíи три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

Да́лъ еси́ утвержде́ніе Вели́кому Новугра́ду — ди́внаго Своего́ святи́теля Серапіо́на, неистощи́мое сокро́вище изоби́льно чуде́съ мно́гихъ, крѣ́пкаго моли́твенника, и побо́рника, и засту́пника, его́же моли́твами спаси́ царя́ на́шего, и лю́ди, Іису́се Человѣколю́бче, Спа́се душа́мъ на́шимъ.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Да́лъ еси́ украше́ніе мона́хомъ въ вели́цѣй Ла́врѣ преблаже́ннаго Се́ргія — цѣльбоно́сныя мо́щи Серапіо́на святи́теля, и́же послѣ́дующа въ житіи́ стопа́мъ его́, вку́пѣ же и по сме́рти, содѣ́йственника быва́юща чудесе́мъ мно́гимъ и моля́ща Ти ся непреста́нно, Іису́су Преблаго́му, Спа́су душа́мъ на́шимъ.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Да́лъ еси́ зна́меніе вѣ́рующимъ тве́рдо и́стиннымъ Твои́мъ уго́дникомъ, пріе́млютъ бо исцѣле́нія душа́мъ же и тѣлесе́мъ, невѣ́рующіи же отгони́ми быва́ютъ, ми́лостивно наказу́еми. Мы́ же, дне́сь соше́дшеся къ пречу́дней ра́цѣ вели́каго святи́теля Серапіо́на, вѣ́рно Ти́ возопіе́мъ: Іису́се Человѣколю́бче, того́ моли́твами спаси́ ду́ши на́ша.

Сла́ва, гла́съ 5:

Что́ шу́мъ пра́зднующихъ быва́етъ и мона́си ра́достно веселя́тся? Дне́сь бо обрѣто́хомъ сокро́вище некра́домо, цѣле́бъ пода́тельныя мо́щи Серапіо́на, вели́каго святи́теля, источа́ющи исцѣле́нія. Идѣ́же въ житіи́ се́мъ потруди́ся и намѣ́стникъ бы́въ блаже́ннаго Се́ргія, пото́мъ же прему́дрости Бо́жія престо́лъ украси́въ, и во изгна́нія лука́выхъ навѣ́ты осужда́ется, послѣди́ же, въ пе́рвѣмъ пребыва́ніи святу́ю ду́шу свою́ на небеса́ предпосла́, слико́венъ быва́етъ своему́ отцу́, у престо́ла Госпо́дня предстоя́ніемъ свеселя́ся. Къ ни́мже возопіе́мъ въ пѣ́снехъ, ра́дующеся: ра́дуйся, отце́мъ сла́во, вели́кій Се́ргіе; ра́дуйся, до́брый учениче́ и́стиннаго учи́теля, преблаже́нне Ни́коне; ра́дуйся, стопа́мъ и́хъ послѣ́дственниче и житія́мъ и́хъ ревни́телю, святи́телю Серапіо́не, и моли́ся Го́сподеви, да спасе́тъ ду́ши на́ша.

И ны́нѣ, богоро́диченъ, гла́съ то́йже:

Хра́мъ и Две́рь еси́, [Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ].

Тропа́рь, гла́съ 8:

Тве́рдый адама́нтъ вои́стинну, о́тче, показа́лся еси́, во все́мъ подо́бяся Влады́цѣ своему́ и Го́споду, святи́телю, непра́ведная изгна́нія, ра́дуяся, претерпѣ́лъ еси́, тѣ́мже и Христо́съ святи́телемъ и му́ченикомъ слико́вна тя́ сотвори́ и дарова́ тя́ ста́ду твоему́, я́ко сокро́вище неотъе́млемо, чудесы́ всѣ́хъ обогаща́юща, я́ко да и мы́, соше́дшеся къ ра́цѣ моще́й твои́хъ, любо́вію вопіе́мъ: моли́ о на́съ пречестны́й архіере́ю, Серапіо́не о́тче на́шъ.

[Сла́ва, и ны́нѣ, богоро́диченъ.

Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].


[НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.]

По 1-й каѳи́смѣ сѣда́ленъ, гла́съ 1. Подо́бенъ: Ка́мени запеча́тану.

Разу́мнаго адама́нта, до́бляго страда́льца, дне́сь, вѣ́рніи, почти́мъ, святи́теля Христо́ва Серапіо́на, собира́етъ бо трубы́ яснѣ́йши на всечестно́е торжество́, свѣ́тло пра́здновати обрѣ́теніе многоцѣле́бныхъ моще́й его́, подава́я неоску́дно исто́чникъ исцѣле́нія и велегла́сно науча́я Христо́ви вопи́ти: прославля́яй святы́хъ Свои́хъ, Го́споди, сла́ва Тебѣ́. [Два́жды.]

Сла́ва, и ны́нѣ, богоро́диченъ:

Изъ Тебе́, Пречи́стая Богоро́дице, возсія́ на́мъ Жизнода́вецъ и Госпо́дь всѣ́хъ, не оста́вль Оте́ческихъ нѣ́дръ, сни́де на зе́млю и спасе́ніе ро́ду человѣ́ческому дарова́, и отъ тли́ на нетлѣ́ніе возведе́ни бы́хомъ рождество́мъ Твои́мъ, Всенепоро́чная, воспѣва́юще, зове́мъ: ра́дуйся, наде́ждо рабо́мъ Твои́мъ.

По 2-й каѳи́смѣ сѣда́ленъ, гла́съ 5:

Филосо́фскаго суесло́вія возгнуша́вся, и́стиннымъ послѣ́дуя ева́нгельскимъ за́повѣдемъ, преблаже́нне святи́телю Серапіо́не, це́рковь Прему́дрости Бо́жія украси́лъ еси́, сла́вити Тро́ицу Единосу́щную, Ея́же моли́ о пою́щихъ тя́. [Два́жды.]

Сла́ва, и ны́нѣ, богоро́диченъ:

Имамы Тя́ къ Бо́гу и́стинную Предста́тельницу, раби́ Твои́, Всенепоро́чная, дерзнове́ніе бо къ Нему́, я́ко къ Сы́ну Своему́, и́маши, тѣ́мже и дерза́юще, со а́нгеломъ вопіе́мъ вѣ́рно: благослове́нъ Пло́дъ, Пречи́стая, Твоего́ чре́ва.

По поліелео́сѣ сѣда́ленъ, гла́съ 8:

Лука́ваго лови́тельства изба́ви ста́до твое́, о́тче, совѣ́ты льсти́ваго утоли́ моли́твами твои́ми, язы́комъ шата́ніе низложи́, я́коже дре́вле вооружи́вшихся на тя́ обличи́лъ еси́ и страда́нія ра́ди нетлѣ́нный вѣне́цъ пріи́мъ отъ руки́ Вседержи́теля. Сего́ ра́ди вопіе́мъ ти́: Серапіо́не всеблаже́нне, моли́ Христа́ Бо́га согрѣше́ніемъ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Еди́на вѣ́рнымъ заступле́ніе яви́лася еси́, Всенепоро́чная, отъ Твои́хъ бо чи́стыхъ крове́й воплоти́ся Сло́во Бо́жіе совѣ́томъ Отчимъ, и земна́я съ небе́сными совокупи́въ, и въ дре́внее оте́чество невозбра́нно вхо́дъ устро́ивъ. Сего́ ра́ди мо́лимъ Тя́, Богоро́дице, не лише́нны на́съ сотвори́ Сы́на и Бо́га Твоего́ Ца́рствія, вѣ́рою покланя́ющихся пречи́стому о́бразу Твоему́.

[Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе отъ Іоа́нна, зача́ло 35 отъ полу́.]

Стихи́ра по 50-мъ псалмѣ́, гла́съ 2:

Избра́нъ Бо́гомъ бы́въ, пресла́вне, рукоположе́ніемъ святи́тельства, непреста́нно Го́сподеви принося́ безкро́вныя Же́ртвы, чи́стѣ Тому́ послужи́въ, яви́лся еси́ ве́сь освяще́нъ, святи́телю, предстоя́ престо́лу Святы́я Тро́ицы, созерца́я добро́ту неизрече́нную, наслажда́яся весе́лія присносу́щнаго и ра́дости неизглаго́ланныя, моли́ся Го́сподеви, Серапіо́не приснопа́мятне, спасти́ся душа́мъ на́шимъ.

Кано́нъ вели́кому святи́телю Серапіо́ну, архіепи́скопу Вели́каго Новагра́да и Пско́ва, [его́же краегране́сіе по алфави́ту до девя́тыя пѣ́сни.] Гла́съ 8.

Пѣ́снь 1.

Ирмо́съ: Пои́мъ Бо́гу, отъ го́рькія рабо́ты фарао́новы изба́вльшему Изра́иля и о́гненнымъ столпо́мъ и свѣ́тлымъ о́блакомъ наста́вльшему, я́ко просла́вися.

Отве́рзи устнѣ́ мои́, Го́споди, просвѣти́ ми́ смы́слъ помраче́нный, разрѣши́ ю́зу язы́ка моего́, я́ко да свѣ́тло и ра́достно восхвалю́ до́бляго страда́льца Серапіо́на, Твои́мъ страсте́мъ подража́теля.

Аще и гру́бо приноси́мое тебѣ́ пѣ́ніе, но отъ усе́рдія пріими́, о́тче, я́коже двѣ́ ца́ты о́ноя вдови́цы прія́тъ Христо́съ, и не лише́на мя́ сотвори́ Твои́хъ даро́въ, и согрѣше́ніемъ проще́ніе испроси́.

Блага́го Бо́га подража́тель бы́лъ еси́, преблаже́нне Серапіо́не, ми́лость же къ ни́щимъ и любо́вь нелицемѣ́рну ко всѣ́мъ ра́вно стяжа́въ, помина́я рече́нная: возлю́биши и́скренняго своего́, я́ко са́мъ себе́.

Богоро́диченъ: Всепѣ́тая Богоро́дице, Яже Всеми́лостиваго Бо́га поро́ждшая, ду́шу мою́, омраче́нную де́монскими прило́ги, просвѣти́, Всенепоро́чная, и ума́ моего́ уврачу́й изступле́ніе, я́ко да по достоя́нію сла́влю Тя́.

Пѣ́снь 3.

Ирмо́съ: Утвержде́ніе мое́, Спа́се, еси́, прибѣ́жище мое́ и си́ла, поколеба́вшееся се́рдце мое́ утверди́ въ стра́сѣ Твое́мъ, я́ко нѣ́сть свя́тъ, я́коже Ты́, Бо́гъ на́шъ.

Го́спода своего́ во́лю сотвори́въ, сугу́бъ тала́нтъ пріобрѣ́лъ еси́, сего́ ра́ди и благíй о́нъ гла́съ слы́шиши: до́брый ра́бе и вѣ́рный, вни́ди въ ра́дость Го́спода своего́.

Душе́вную чистоту́ стяжа́въ, безъ нея́же никто́ же у́зритъ Го́спода, Серапіо́не о́тче на́шъ, стра́сти окая́нныя души́ моея́ и сла́сти тѣле́сныя утоли́ моли́твами си́.

Егда́ у́бо Бо́гу производя́щу тя́ на лу́чшая, тогда́ мірска́я вся́ оплева́лъ еси́ и, благíй яре́мъ на ра́мо взе́мъ, усе́рдно Тому́ послѣ́довалъ еси́.

Богоро́диченъ: Живо́тъ ро́ждшая Ѵпоста́сный, Дѣ́во Всенепоро́чная, се́рдца моего́ стру́пы исцѣли́ хода́тайствы Твои́ми, е́же къ Сы́ну Своему́, Богоблагода́тная.

Сѣда́ленъ, гла́съ 8:

Чистото́ю душе́вною и тѣле́сною па́че со́лнца облиста́лъ еси́, терпѣ́ніемъ му́жествовавъ, веліа́ру главу́ сте́рлъ еси́, льсти́вно на тя́ вооружи́вшихся по́мощію Вседержи́теля подъ но́зѣ пове́рглъ еси́, самоде́ржца непови́ннаго гнѣ́ва не устраши́лся еси́, ни ласка́ніемъ, ни лю́тымъ преще́ніемъ непревра́тенъ пребы́лъ еси́, Серапіо́не о́тче на́шъ, сего́ ра́ди Христо́съ побѣ́днымъ вѣнце́мъ увязе́ тя́, тѣ́мъ мо́лимъ тя́: моли́ спасти́ся и́же па́мять твою́ любо́вію почита́ющимъ. [Два́жды.]

Сла́ва, и ны́нѣ, богоро́диченъ:

Человѣ́къ вражду́ющихъ и де́монская стреля́нія уста́вила еси́, Всенепоро́чная, хода́тайствомъ Си́ къ Сы́ну Твоему́ и Бо́гу на́шему, душа́мъ спасе́ніе и тѣлесе́мъ здра́віе подаю́щи вѣ́рою при́сно блажа́щимъ Тя́ и пресвято́е Рождество́ Твое́ почита́ющимъ.

Пѣ́снь 4.

Ирмо́съ: Всѣ́лъ еси́ на ко́ни — апо́столы Твоя́, Го́споди, и прія́лъ еси́ рука́ма Твои́ма узды́ и́хъ, и спасе́ніе бы́сть ѣжде́ніе Твое́ вѣ́рно пою́щимъ: сла́ва си́лѣ Твое́й, Го́споди.

Зѣ́льнымъ поще́ніемъ, и моли́твами непреста́нными, и чистото́ю серде́чною живу́ща въ себѣ́ Христа́ имѣ́лъ еси́, преблаже́нне святи́телю, во огра́ду бо вни́де Пречи́стыя Его́ Ма́тери, на Нея́же наде́жду всю́ возложи́лъ еси́.

Земна́я отри́нувъ, небе́сная наслѣ́довалъ еси́, отъ си́лы бо въ си́лу пре́йде, къ премíрному Ца́рствію, идѣ́же угото́ва ти ся, терпѣ́нія ра́ди твоего́, вѣне́цъ нетлѣ́нный и вѣ́чное весе́ліе.

Изволе́ніемъ Бо́жіимъ и избра́ніемъ по́стникъ сосло́вія па́стырь поставля́ешися и наста́вникъ, и́же ко спасе́нію, непреле́стнымъ путе́мъ вводя́ ста́до свое́ во огра́ду небе́сную.

Богоро́диченъ: И ражда́еши, и дѣ́вствуеши, Дѣ́во Всенепоро́чная, иску́са бо му́жескаго не пріе́мши, родила́ еси́ Бо́га воплоще́нна отъ пречи́стую бо́ку Твое́ю, Его́же моли́ о пою́щихъ Тя́.

Пѣ́снь 5.

Ирмо́съ: Утренюетъ ду́хъ мо́й къ Тебѣ́, Бо́же, зане́ свѣ́тъ повелѣ́нія прише́ствія Твоего́, и́миже у́бо озари́ у́мъ на́шъ, Влады́ко, и наста́ви на стезю́ жи́зни.

Крѣ́пко вооружи́вся на неви́димыя враги́, я́коже тве́рдый адама́нтъ, вы́я и́хъ сокруши́лъ еси́ и, подъ но́зѣ попра́въ, го́рдостная шата́нія низве́рглъ еси́, Го́споду тя́ прославля́ющу, и́стиннаго Своего́ уго́дника.

Лука́выхъ де́моновъ ла́янія ста́до свое́ сохраня́я, Истиннаго Па́стыря Христа́ и́стинный учени́къ бы́въ, Серапіо́не, сего́ ра́ди избра́ніемъ первосвяти́теля намѣ́стникъ блаже́ннаго Се́ргія въ вели́цѣй Ла́врѣ устроя́ешися.

Ми́лостивно наказу́я, о́тче, о Христѣ́ поруче́нное тебѣ́ ста́до упасе́ на па́житехъ зако́на живоно́снаго: собо́ю бо о́бразъ показа́лъ еси́, возвѣща́я пу́ть ко спасе́нію и е́же отъ злы́хъ премѣне́ніе.

Богоро́диченъ: На́шего спасе́нія Хода́таица Ты́ яви́лася еси́, Всенепоро́чная, ду́шу мою́ окая́нную изба́ви де́монскаго мучи́тельства и пода́ждь прегрѣше́ніемъ очище́ніе, ра́звѣ бо Тебе́, раби́ Твои́, не имѣ́емъ Помо́щницы.

Пѣ́снь 6.

Ирмо́съ: Изъ чре́ва а́дова во́пля моего́ услы́шалъ еси́ гла́съ мо́й и изба́вилъ еси́ отъ тли́ живо́тъ мо́й, Многоми́лостиве.

О ученицѣ́ свое́мъ провозвѣсти́лъ еси́ иногда́, преблаже́нне Серапіо́не святи́телю, — я́ко бу́детъ се́й, — рече́, — па́стырь киновíи сія́ вели́кія. Того́ ра́ди и поклони́лся еси́ ему́, не я́ко ученику́ своему́, но я́ко собесѣ́днику.

Проро́чества да́ръ ви́дяще, чу́дніи ученицы́ твои́ не я́ко человѣ́ку, но я́ко Христу́ повину́ющеся во все́мъ, зря́ху бо тя́ по стопа́мъ ходя́ща блаже́ннаго Се́ргія, и послѣ́дующа трудолю́бному его́ житію́, и о всѣ́хъ моля́щася Бо́гу, хвалу́ возсыла́ху.

Ра́зумъ отъ Бо́га пріи́мъ благочести́выя па́че приводя́ къ богоразу́мію, нечести́вымъ же уста́ загражда́я, Серапіо́не святи́телю, въ собра́ніи бо бы́вшу ти́ святи́тельстѣмъ, самоде́ржца кро́ткими глаго́лы повину́въ, киновíямъ поле́зная сотвори́лъ еси́.

Богоро́диченъ: Святѣйши херуви́мъ и серафи́мъ яви́лася еси́, Пречи́стая, Зижди́теля бо и́хъ несказа́нно родила́ еси́, не опали́вшися огне́мъ Божества́, и ны́нѣ блажа́тъ Тя́ вси́ ро́ди, я́коже прорекла́ еси́, Препѣ́тая.

Конда́къ, гла́съ 3:

Яко вѣнце́мъ пресвѣ́тлымъ, украси́вся дне́сь, Вели́кій Новгра́дъ лику́етъ въ па́мять па́стыря своего́ и учи́теля, и, я́ко діади́му ца́рскую, возложи́вши, Ла́вра вели́кая о́на свѣ́тло ра́дуется, идѣ́же просла́ви тебе́ Бо́гъ, уго́дника Своего́, и прояви́ послѣ́днему ро́ду на́шему цѣльбоно́сныя мо́щи твоя́, святи́телю Серапіо́не, Це́рковь же Бо́жія весели́тся, созыва́ющи мона́ховъ сосло́віе велегла́сно вопи́ти: ра́дуйся, гра́ду твоему́ похвало́, и оби́тели, и всея́ Россíйскія земли́ пресвѣ́тлый свѣти́льниче.

Икосъ:

Изъ оте́чества ху́да и незна́ема вели́кій граждани́нъ небе́снаго Ца́рствія произы́де, я́ко изъ мра́чна о́блака пресвѣ́тлая звѣзда́, провозсія́ дне́сь вели́кій Серапіо́нъ и всѣ́хъ озари́ чуде́съ луча́ми, и́же съ вѣ́рою приходя́щихъ къ цѣльбо́носному его́ гро́бу и любе́зно цѣлу́ющихъ ра́ку моще́й его́, не вѣ́рующихъ же далече́ отгоня́ и льсти́вая тѣ́хъ шата́нія, я́ко паучи́ну, растерза́я и ка́знемъ предая́, да и тíи науча́тся не ху́лити Бо́жія и́мене и Его́ уго́дниковъ. Мы́ же, вѣ́рніи, обстоя́ще дне́сь свяще́нную его́ ра́ку, не очи́ма то́кмо ви́дяще, но серде́чною любо́вію вѣ́рно возопіе́мъ: ра́дуйся, я́ко отъ младе́нства Бо́гу порабо́тавъ; ра́дуйся, я́ко мірска́я вся́ оплева́въ; ра́дуйся, я́ко Христо́въ яре́мъ на ра́мо взе́мъ, усе́рдно Тому́ послѣ́довалъ еси́; ра́дуйся, я́ко вруче́нное ста́до до́брѣ упа́слъ еси́; ра́дуйся, я́ко намѣ́стникъ бы́въ блаже́ннаго Се́ргія и того́ стопа́мъ во все́мъ поревнова́лъ еси́; ра́дуйся, проро́чества да́ръ воспріе́мый; ра́дуйся, я́ко чуде́съ мно́гихъ дѣ́латель яви́лся еси́; ра́дуйся, Прему́дрости Бо́жія престо́лъ украси́вый; ра́дуйся, чудесы́ гра́дъ сво́й озари́вый; ра́дуйся, я́ко сподо́бился еси́ непови́ннымъ осужде́ніемъ и съ престо́ла [святи́тельскаго] сверже́ніемъ ревнова́ти Златоу́сту Іоа́нну; ра́дуйся, я́ко обличи́лъ еси́ злоко́зненныхъ, на тя́ вооружи́вшихся, мудрова́ніе; ра́дуйся, страда́льче до́брый, во все́мъ подража́я Влады́ки своего́. Его́же моли́ о чту́щихъ святу́ю па́мять твою́, да вси́ въ весе́ліи се́рдца вопіе́мъ ти́: ра́дуйся, святи́телю Серапіо́не, Вели́кому Новугра́ду похвала́ и всея́ Россíйскія земли́ пресвѣ́тлый свѣти́льниче.

Пѣ́снь 7.

Ирмо́съ: Халде́йскія пе́щи всепа́губную си́лу угаси́вше о́бразомъ Ангела снизше́дшаго, Зижди́телю ю́ноши взыва́ху: благослове́нъ еси́ и хва́льный, Бо́же оте́цъ на́шихъ.

Терпѣ́ніемъ свои́мъ и му́жествомъ возвесели́лъ еси́ Иже надъ всѣ́ми Су́щаго Бо́га, и То́й тебе́ просла́ви, я́ко при́снаго Своего́ уго́дника, и чудесы́ обогати́лъ тя́ е́сть, я́ко и я́рость самоде́ржца на кро́тость возмо́глъ еси́ преложи́ти и непови́нныя отъ сме́рти изба́вити, пою́щихъ: благослове́нъ Бо́гъ оте́цъ на́шихъ.

Устроя́етъ тя́ Госпо́дь Це́ркви Свое́й архіере́я, слове́снымъ овца́мъ па́стыря всеизря́дна, ты́ же, прему́дре Серапіо́не, егда́ святи́тельства па́ству пріи́мъ, къ бо́льшимъ подвиго́мъ вдава́шеся, поя́ Христо́ви: благослове́нъ Бо́гъ оте́цъ на́шихъ.

Фараони́тская ка́знь за грѣхи́ на́ши егда́ пріи́де на лю́ди твоя́, святи́телю, тогда́ прилѣ́жно Бо́гу моля́шеся, призыва́я на по́мощь Того́ ро́ждшую Богоро́дицу, смертоно́сіе уста́вилъ еси́ и, тріе́мъ исцѣле́ніе пода́въ, пѣ́ти научи́лъ еси́: благослове́нъ Бо́гъ оте́цъ на́шихъ.

Богоро́диченъ: Христа́, Его́же родила́ еси́, моли́, Богоро́дице, да просвѣти́тъ ду́шу мою́ омраче́нную и лю́таго паде́нія изба́витъ, я́ко да во хвале́ніи сла́влю Тя́, Всенепоро́чная, Сы́ну Твоему́ вопія́: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Нече́стія орга́ны ину́ю пѣ́снь, благоче́стія же боговѣща́нніи поя́ху гу́сли: благослови́те, дѣла́ Госпо́дня, Христа́ во вѣ́ки.

Отъ вся́кихъ напа́стей и озлобле́нія изба́ви на́съ, Серапіо́не о́тче святи́телю, я́коже дре́вле гра́дъ сво́й спа́слъ еси́ отъ запале́нія, и въ ра́дости лю́ди своя́ вопи́ти научи́въ: благослови́те, вся́ дѣла́ Госпо́дня, Го́спода.

Царю́ и Влады́цѣ моля́ся, разсла́бленнаго исцѣли́лъ еси́, по́мощь имѣ́я и заступле́ніе Бо́жія Ма́тере, о́нъ бо проша́ше пи́щи, е́же къ тѣле́снѣй потре́бѣ, ты́ же, святи́телю, пре́жде духо́вною пи́щею напита́въ, здра́віе по́далъ еси́ и пѣ́ти научи́лъ еси́: благослови́те, вся́ дѣла́ Госпо́дня, Го́спода.

Человѣ́цы веселя́хуся, ви́дяще пресла́вная чудеса́ твоя́, е́же возда́ ти́ Госпо́дь возмѣ́здіе проти́ву трудо́мъ твои́мъ, вра́гъ же вооружа́шеся льсти́выхъ наважде́ньми, изгна́ніемъ на тя́ поуча́ется, ты́ же въ ра́дости поя́ше: благослови́те, вся́ дѣла́ Госпо́дня, Го́спода.

Ше́ствіе егда́ творя́ше во изгна́ніе отъ гра́да своего́, святи́телю, рѣ́чное стремле́ніе моли́твою уста́вилъ еси́ и иду́щихъ съ тобо́ю, па́че же по́сланныхъ къ тебѣ́, удиви́лъ еси́, и глаго́лаша: ди́внаго Бо́га на́шего, прославля́ющаго святы́я Своя́, по́йте, вся́ дѣла́ Госпо́дня, Го́спода.

Богоро́диченъ: Ще́драго и Всеми́лостиваго, Ма́ти сподо́бльшися бы́ти, Богоро́дице, щедро́ты низпосли́ на́мъ отъ неистощи́мыхъ сокро́вищь Твои́хъ и пода́ждь въ ну́ждахъ терпѣ́ніе, моли́твами святи́теля Серапіо́на, я́коже о́нъ претерпѣ́ Сы́на Твоего́ ра́ди, въ весе́ліи поя́ Ему́: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Воспита́нная во свята́я святы́хъ и ро́ждшая Свѣ́тъ вселе́нныя, Благода́тная, ра́дуйся, пѣ́сньми Рождество́ Твое́ велича́емъ.

Рве́ніемъ распаля́емь по Го́сподѣ Бо́зѣ, поруга́нія и доса́ды, заточе́нія и изгна́нія претерпѣ́лъ еси́, помина́я Госпо́дни стра́сти, я́же претерпѣ́ и пострада́ на́шего ра́ди спасе́нія, біе́нія и оплева́нія, па́че же и сме́рть поно́сную, сего́ ра́ди, Серапіо́не святи́телю, по́мощію Вседержи́теля льсти́вно на тя́ вооружи́вшихся шата́нія низложи́лъ еси́.

Фарисе́йскаго киче́нія отвраща́яся, Серапіо́не преблаже́нне, Христо́во смире́ніе имѣ́лъ еси́: я́коже Онъ Отцу́ о распина́ющихъ моля́шеся: Отче, не поста́ви и́мъ грѣха́ сего́, не вѣ́дятъ бо что́ творя́тъ, — та́кожде и ты́ сотвори́лъ еси́, святи́телю, преступи́вшихъ предъ тобо́ю и необраща́ющихся проще́нію сподобля́еши, са́мъ взыску́я поги́бшаго.

Легко́, я́коже оре́лъ, крило́ма небе́сную высоту́ дости́глъ еси́, терпѣ́нія ра́ди по́честь прія́лъ еси́ отъ Мздовоздая́теля, и ны́нѣ Госпо́дь показа́ на́мъ цѣльбо́носныя мо́щи твоя́, точа́щія исцѣле́нія вѣ́рою приходя́щимъ. Тѣ́мъ мо́лимъ тя́, святи́телю, помяни́ на́съ, и́же вѣ́рою чту́щихъ тя́, да тя́ достодо́лжно ублажа́емъ.

Богоро́диченъ: Изъ пречи́стыхъ ложе́снъ Твои́хъ, про́йде у́мное Со́лнце, Богоро́дице, просвѣща́я и́же во тмѣ́ сѣдя́щихъ, омраче́нныя невѣ́дѣніемъ, и приводя́ ко свѣ́ту богоразу́мія, страда́вшимъ Его́ ра́ди нетлѣ́нныя вѣнцы́ подава́я и вѣ́чное ра́дованіе. Его́же моли́ о на́съ, Влады́чице, не лиши́ти на́съ десна́го стоя́нія въ ча́съ испыта́нія, да Тя́ вси́ велича́емъ.

Свѣти́ленъ:

Мно́гими лѣ́ты покрове́ны бы́та честны́я мо́щи твоя́, ны́нѣ же прояви́ Госпо́дь пресла́вно, послѣ́днему ро́ду на́шему, вѣ́рнымъ на исцѣле́ніе, невѣ́рнымъ же на обличе́ніе и посрамле́ніе. Сего́ ра́ди велича́емъ Христа́, тя́ просла́вльшаго. [Два́жды.]

Сла́ва, и ны́нѣ, богоро́диченъ:

Всеблага́я Влады́чице, я́же Всеще́драго Бо́га пло́тію ро́ждшая, поми́луй на́съ, озло́бленныхъ прило́ги лука́ваго, и устрани́вшихся Сы́на и Бо́га Твоего́ за́повѣдей, и грѣху́ рабо́тавшихъ свои́мъ хотѣ́ніемъ, привлецы́, Пречи́стая, къ повелѣ́ніемъ Бо́жіимъ и не лиши́ на́съ вѣ́чнаго наслажде́нія моли́твами Си́.

На хвали́техъ стихи́ры, гла́съ 1. Подо́бенъ: Небе́снымъ чино́мъ.

Тро́ическимъ свѣ́томъ озаря́емь, со а́нгелы лику́еши, престо́лу предстоя́ всѣ́хъ Царя́ и по́честь пріе́мля трудо́мъ свои́мъ, Серапіо́не, преблаже́нне святи́телю, Его́же при́сно моли́ о чту́щихъ святу́ю па́мять твою́. [Два́жды.]

Иже отъ любве́ пѣ́ніе принося́щихъ не забу́ди, святи́телю, но моле́ніе къ Бо́гу простри́ и изба́ви де́монскаго нахожде́нія и лю́таго озлобле́нія, да въ де́нь стра́шнаго испыта́нія не посра́млены бу́демъ, раби́ твои́.

И по сме́рти тебе́ Го́сподь просла́ви зна́меніемъ исцѣле́нія, я́ви бо на́мъ честны́я мо́щи твоя́ я́ко сокро́вище некра́домо, къ ни́мъ же притѣка́ющіи пріе́млютъ здра́віе душа́мъ же и тѣлесе́мъ, при́сно блажа́щіи тя́.

Сла́ва, гла́съ 4:

Ева́нгельскихъ уче́ній рачи́теля и Христо́вымъ страсте́мъ подража́теля, дне́сь обстоя́ще ра́ку, исцѣле́нія пріе́млемъ незави́стно и, вѣ́рно торжеству́юще, любо́вію къ нему́ возопіе́мъ, глаго́люще: ра́дуйся, Серапіо́не о́тче на́шъ, я́ко во тлѣ́ннемъ се́мъ житіи́ Христо́ви усе́рдно послужи́лъ еси́ и отъ Него́ пріи́мъ вѣне́цъ нетлѣ́нный и безконе́чное Ца́рствіе, идѣ́же ны́нѣ наслажда́ешися, со а́нгелы лику́я, со проро́ки и апо́столы, Го́сподеви моля́ся, преблаже́нне, царю́ правосла́вному низпосла́ти ми́ръ, и здра́віе, и спасе́ніе, и душа́мъ на́шимъ ве́лію ми́лость.

И ны́нѣ, богоро́диченъ, гла́съ то́йже:

Богоро́дице, всѣ́хъ Цари́це, [правосла́вныхъ похвало́, ерети́чествующихъ шата́нія разори́, и ли́ца и́хъ посрами́, не кла́няющихся, ниже́ чту́щихъ, Пречи́стая, честны́й Тво́й о́бразъ].

Славосло́віе вели́кое. [Ектеніи́] и отпу́стъ.



НА ЛИТУРГІИ,

Слу́жба святи́тельская: [Блаже́нна, отъ кано́на святи́теля пѣ́снь 3 и 6. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Службы и житія святыхъ Серапіона, архіепископа Новгородскаго и Стефана, игумена Махрищскаго. — Рукопись № 637 (№ 1850) 1677 года изъ собранія Свято-Троицкой Сергіевой Лавры («Главная библіотека»). Уставъ четкій, въ листъ, 69 листовъ, заставки фигурныя. — Л. 2. Служба св. Серапіону въ день его преставленія, 16 Марта 1516 года и въ день обрѣтенія мощей 7 Апрѣля 1559 года. — Л. 15. Житіе иже во святыхъ отца нашего Серапіона архіепископа Великаго Новаграда и Пскова. (Листы 33 и 43 порожніе). — Л. 34. Служба, Іюля 14, св. Стефану Махрищскому. — Л. 44. Житіе и подвизи препод. отца нашего Стефана иже на Махрищи. Нач. «Понеже убо Преблагій нашъ Владыка Богъ и Господь Іисусъ Христосъ всегда намъ устрояя благая и полезная и о нашемъ спасеніи промышляя...» Составлено, (л. 68) по волѣ митроп. Макарія, іеромонахомъ Іоасафомъ, игуменом Данилова монастыря. Чудес 12. — Л. 1 об. Послѣсловіе (окружено рамкою): «В лѣто отъ созданія міра 7185, отъ Рождества же Господа нашего Іисуса Христа 1677, индикта 15, мѣс. Декемврія написася сія книга Житія иже во святыхъ отца нашего Серапіона архіеп. Новогородскаго и препод. отца нашего Стефана иже на Махрищи в дому Пресвятыя и Живоначалныя Троицы и препод. и богон. отецъ нашихъ Сергія и Никона Радонежскихъ чюдотворцевъ убогимъ архимандритомъ Викентіемъ».

/ Къ оглавленію раздѣла /


Наверхъ / Къ титульной страницѣ

0