Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 16-й де́нь.
Святы́хъ му́ченикъ Сави́на и Па́пы.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: Что́ ва́съ нарече́мъ?

Что́ тя́ имену́емъ, сла́вне?* Во́ина си́льнаго Царя́ и Бо́га,* безпло́тныхъ злоче́стіе низло́жша му́жески,* свѣти́льника, мы́сленный свѣ́тъ облиста́юща,* и́доловъ губи́теля преси́льна,* и подви́жника прете́плаго,* и страда́льца зако́ннѣйшаго.* Моли́ спасти́ся душа́мъ на́шимъ.

Что́ тя ны́нѣ, Сави́не, пронарече́мъ?* Рѣку́ воды́ живо́тныя,* лію́щу на́мъ широту́ духо́вную,* утѣсне́нымъ въ лю́тыхъ,* наводне́ніе исцѣле́ній неизживу́щее,* ча́шу, пи́во свято́е пролива́ющую,* чудодѣ́теля и́стиннѣйша,* безпло́тныхъ равноче́стнаго.* Моли́ спасти́ся душа́мъ на́шимъ.

Что́ тя провѣща́емъ, святы́й?* Заблу́ждшихъ наста́вника* или́ моли́твенника грѣ́шниковъ,* врача́ су́щимъ въ лю́тыхъ обурева́емымъ и́стиннаго,* благоуха́ненъ рая́ кри́нъ че́стенъ,* нача́токъ му́чениковъ и утвержде́ніе,* исто́чника чуде́съ приснотеку́щаго,* подви́жника до́бляго.* Моли́ спасти́ся душа́мъ на́шимъ.

Сла́ва, и ны́нѣ, богоро́диченъ:

Кому́ уподо́билася еси́, окая́нная душе́,* къ покая́нію ника́коже возни́чущи* и огня́ не ужаса́ющися, злы́хъ ожида́ющаго?* Воста́ни, и Еди́ну къ заступле́нію ско́рую призови́, и возопíй:* Дѣ́во Ма́ти,* моли́ Твоего́ Сы́на и Бо́га на́шего* изба́вити мя́ отъ сѣ́ти льсти́ваго.

Крестобогоро́диченъ:

Агница Агнца я́ко ви́дѣ,* на дре́вѣ просте́рта во́лею кре́стнѣмъ,* вопія́ше ма́терски, болѣ́знующи съ пла́чемъ:* Сы́не Мо́й, что́ стра́нное сіе́ видѣ́ніе?* Всѣ́мъ живо́тъ дая́й я́ко Госпо́дь,* ка́ко умерщвля́ешися, Долготерпѣли́ве,* земны́мъ подая́ воскресе́ніе?* Сла́влю Твое́ мно́гое, Бо́же Мо́й, снизхожде́ніе.


[НА УТРЕНИ,]
Кано́нъ, его́же краегране́сіе: Страда́льчески Сави́на восхвалю́ любо́вію. Ки́ръ Ѳеофа́на. Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Нетлѣ́ннаго и Боже́ственнаго пребыва́нія и непости́жныхъ наслажда́яся ны́нѣ бла́гъ, Сави́не, съ му́ченики, богому́дре, восхваля́ющія тя́ спаса́й.

Же́ртву хвале́нія Христу́ себе́ освяща́я къ страда́ніемъ терпѣли́вно, въ пусты́няхъ удали́лся еси́, Сави́не, по́стническими обуча́яся по́двиги.

Цвѣтцы́ наслади́вся духо́вными, ра́й яви́лся еси́, укра́шенъ добродѣ́тельми, объе́млемь мече́мъ муче́нія и снѣ́дь Бо́гу познава́емь.

Богоро́диченъ: Отбѣже́ сме́ртное сѣ́тованіе: Живо́тъ бо изъ утро́бы Твоея́, во ѵпоста́си Бо́гъ про́йде несказа́нно, Богоро́дице, обновля́яй, Дѣ́во, естество́ на́ше.

Пѣ́снь 3.
Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Хра́мъ содѣ́лавъ чи́стую твою́ ду́шу, прія́лъ еси́ въ ню́ Бо́га и хра́мы де́монскія, о Сави́не, низложи́лъ еси́. [Два́жды.]

Ми́лостива ра́ди ми́лости Бо́га обрѣ́тъ, страсте́мъ Его́ подража́тель бы́лъ еси́, преда́телю ученику́ бы́вшу.

Богоро́диченъ: Бо́га ро́ждши всея́ тва́ри, Влады́чице, я́ко вои́стинну еди́на Богоро́дица превы́шшая яви́лася еси́.

Сѣда́ленъ, гла́съ 8. Подо́бенъ: Прему́дрости.

Связа́вся любо́вію Изба́вителя, я́звы многообра́зны и растерза́нія претерпѣ́лъ еси́, свя́те, му́жественнымъ мудрова́ніемъ, въ рѣку́ же вве́рженъ бы́въ, коне́цъ святы́й въ не́й прія́лъ еси́ и бога́тство многоцѣ́нно всѣ́мъ пода́лся еси́, источа́я исцѣле́нія и рѣша́я неду́ги вѣ́рно притека́ющимъ къ тебѣ́, Сави́не блаже́нне. Моли́ Христа́ Бо́га прегрѣше́ній оставле́ніе дарова́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Яко а́гня, води́мо, му́чениче, на же́ртву, ника́коже провѣща́лъ еси́, Влады́цѣ твоему́ подо́бяся, Его́же ра́ди и сме́рть пренебре́глъ еси́.

Цѣлому́дріемъ украша́емь и съ си́мъ живы́й, строга́нія и ра́ны тве́рдымъ умо́мъ твои́мъ терпѣ́въ, враги́, Сави́не, низложи́лъ еси́.

Плотски́ми твои́ми у́ды, му́чениче, Христа́ просла́вивъ, прія́лъ еси́ съ пра́ведныхъ ду́хи весе́ліе боже́ственное и не погиба́ющее.

Богоро́диченъ: Наслажда́ющеся, Пречи́стая, Твои́хъ дарова́ній, Тебѣ́ благода́рственное воспѣва́емъ пѣ́ніе, вѣ́дуще Тя́ Богома́терь.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Тяготу́ строга́ньми пло́ти твоея́ отло́жь, ду́шу уясни́въ, впери́лъ еси́, Бо́жій Сави́не, къ боже́ственному и и́стинному наслажде́нію. [Два́жды.]

Да сла́дости пото́къ и нетлѣ́нія добро́ту обря́щеши, пресла́вне, теку́щую мíра я́вѣ оплева́лъ еси́.

Богоро́диченъ: Умертви́, Чи́стая, страсте́й мои́хъ взыгра́нія, тлѣ́нія избавля́ющи мя́ и безстра́стія спасе́ніе мнѣ́ подаю́щи.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Ника́коже о привре́менныхъ бре́гъ, я́коже въ чужде́й пло́ти претерпѣ́лъ еси́ я́звы, связа́нія, терза́нія, жже́нія и кончи́ну блаже́нную пріе́мъ, отъ Христа́ вѣнце́въ сла́вы, Сави́не, улучи́лъ еси́. [Два́жды.]

Во́дъ я́ко вои́стинну испо́лнися живото́чныхъ Христо́ва Це́рковь изъ глубины́ рѣ́чныхъ во́дъ, тя́, исто́чника чуде́съ, обогати́вшися, обрѣ́тши же себѣ́ би́серъ, Сави́не, многоцѣ́ненъ.

Богоро́диченъ: Испра́вила еси́ па́дшее существо́ Твои́мъ рождество́мъ, Богоро́дице Дѣ́во, Зижди́теля и Влады́ку ро́ждши, на́ша не́мощи поне́сшаго и спа́сшаго ны́ отъ тли́ сме́ртныя стра́стію Свое́ю.

Конда́къ, гла́съ 2. Подо́бенъ: Тве́рдыя.

Боже́ственная прозябе́нія, цвѣ́тъ неувяда́ющій, розга́ многопло́дная, богоно́се Сави́не, и́же вѣ́рою чту́щихъ па́мять твою́ весе́лія твоего́ испо́лни и моли́ся непреста́нно о всѣ́хъ на́съ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Да сла́ву нетлѣ́нную пріи́меши, сла́ву оплева́лъ еси́ житія́, сла́вы ра́ди Бо́жія, наслажда́яся въ му́кахъ, Сави́не, зовы́й непреста́нно: Бо́же, благослове́нъ еси́. [Два́жды.]

Ма́ніемъ Боже́ственнымъ Влады́ки отве́рглъ еси́ безбо́жныхъ ме́рзость, Боже́ственную я́вѣ избра́въ му́дрость, Сави́не, поя́ непреста́нно: Бо́же, благослове́нъ еси́.

Богоро́диченъ: Спасе́ мíръ, Богоро́дице, отъ утро́бы Твоея́ вопло́щшееся Сло́во Боже́ственное, Его́же почита́юще, пое́мъ Тя́, вопію́ще: благослове́нъ, Пречи́стая, пло́дъ Твоего́ чре́ва.

Пѣ́снь 8.

Ирмо́съ: Мусикíйскимъ орга́номъ согласу́ющимъ и лю́демъ безчи́сленнымъ, покланя́ющимся о́бразу въ Деи́рѣ, три́ о́троцы не повину́вшеся, Го́спода воспѣва́ху и славосло́вяху во вся́ вѣ́ки.

Прекриве́нъ бы́въ мучи́телей суровствы́, Христо́вою же любо́вію испра́вленъ, неотъе́млемо обрѣ́лъ еси́ та́мо безстра́стіе, Сави́не, поя́ пѣ́снь Го́сподеви: Тя́ превозно́симъ во вся́ вѣ́ки. [Два́жды.]

Украси́лся еси́, му́чениче, воздержа́ніемъ, уясни́лся еси́ страда́ній лѣ́потою и просія́лъ еси́, я́коже звѣзда́, зову́щимъ: по́йте Го́спода, вся́ дѣла́, и превозноси́те во вся́ вѣ́ки.

Богоро́диченъ: Дѣ́вства просія́ла еси́ заре́ю, мы́сленнаго бо Со́лнца о́блакъ была́ еси́, Ма́ти Бо́жія, угаси́вшаго и́дольскаго пе́щь неи́стовства, Его́же превозно́симъ во вся́ вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Устреми́вся любо́вію всѣ́хъ Бо́га, рѣчны́я во́лны попра́лъ еси́, въ нетлѣ́нія приста́нище дости́гъ, му́чениче сла́вне. [Два́жды.]

Основа́ніе вѣ́ру имѣ́я Спа́сову, прило́гъ безбо́жныхъ не устраши́лся еси́, но изъ глубины́ къ тишинѣ́ жи́зни устреми́лся еси́.

Богоро́диченъ: Яко стѣ́ну Тя́ и покро́въ и я́ко Предста́тельницу еди́ну, Чи́стая, и спасе́ніе иму́ще, отъ бѣ́дъ и прегрѣше́ній при́сно избавля́емся.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 77 об. – 80 об.

/ Къ оглавленію раздѣла /


Наверхъ / Къ титульной страницѣ

0