Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 30.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 15-й де́нь.
Свята́го му́ченика Ага́пія и съ ни́мъ шести́ му́ченикъ.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Му́чениче страда́льче Ага́піе,* благи́хъ исто́чника,* жела́нныхъ кра́йнѣйшее возлюби́въ,* потща́лся еси́ испи́ти ча́шу муче́нія,* призыва́я Бо́га Жива́го Боже́ственное и́мя.* О, му́жества твоего́!* О, терпѣ́нія твоего́!* и́мже получи́ти сла́вы и свѣ́тлости* я́вѣ сподо́бился еси́.

Му́ченицы преблаже́нніи,* на во́льное заколе́ніе* са́ми себе́ преда́сте,* и зе́млю кровьми́ ва́шими освяти́сте,* и возду́хъ просвѣти́сте прехожде́ніемъ.* Ны́нѣ же живете́ на небесѣ́хъ,* къ Свѣ́ту невече́рнему* о на́съ всегда́* моля́щеся, богови́днѣйшіи.

Сла́ва, и ны́нѣ, богоро́диченъ, гла́съ и подо́бенъ то́йже:

Тя́ мо́лимъ, Пречи́стая,* Предста́тельницу на́шу,* смуща́емыя въ печа́лѣхъ* не пре́зри до конца́ поги́бнути рабы́ Твоя́,* но ускори́ изъя́ти ны́* настоя́щаго гнѣ́ва и печа́ли,* о Богора́дованная Пресвята́я Чи́стая!* Ты́ бо на́мъ еси́ стѣна́* и по́мощь необори́ма.

Крестобогоро́диченъ, подо́бенъ то́йже:

Тя́ ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко,* увы́ Мнѣ́, вопія́ше, Ча́до сла́дкое!* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ всѣ́хъ изба́вивый милосе́рдіемъ Твои́мъ?


[НА УТРЕНИ,]
Кано́нъ, его́же краегране́сіе: Седми́ приноша́ю му́ченикомъ пѣснопѣ́ніе. Ки́ръ Іо́сифа. Гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Въ небе́сныхъ, му́ченицы, су́ще жили́щахъ, ва́съ хва́лящія на земли́ просвѣще́нія сподо́бите.

Столпы́ Це́ркве яви́стеся, стѣ́ны разоря́юще идолонеи́стовства, страстоте́рпцы Христо́вы предо́бліи.

Уязви́лся еси́ любо́вію, му́чениче досточу́дне Ага́піе, Влады́ки всѣ́хъ и умре́ти Его́ ра́ди предусе́рдствовалъ.

Богоро́диченъ: Заре́ю пресвѣтлѣ́йшею, изъ Тебе́, Дѣ́во, возсія́вшею, души́ моея́ зѣ́ницы просвѣти́, я́ко да прославля́ю Тя.

Пѣ́снь 3.

Ирмо́съ: Нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, Его́же пое́тъ вся́ тва́рь: нѣ́сть пра́веденъ, па́че Тебе́, Го́споди.

Огне́мъ разжига́яся любве́ Христо́вы, огни́ще погаси́лъ еси́, му́чениче Ага́піе, идолонеи́стовства тече́ньми крове́й твои́хъ, тѣ́мже восхваля́емъ тя́.

Ору́жія яви́стеся, посѣка́юще тмы́, блаже́нніи, де́моновъ благода́тію, и ны́нѣ тма́мъ совокупи́стеся, ра́дующеся, мы́сленныхъ си́лъ.

Пу́ть соверши́вше муче́нія му́жески, отложе́ніемъ тѣ́ла Вы́шнее постиго́сте Ца́рство, въ не́мже стяжа́сте, му́ченицы боже́ственніи, житіе́.

Богоро́диченъ: Подо́біемъ пло́ти я́вльшагося изъ Твоего́ свѣтоно́снаго чре́ва, Зижди́теля позна́хомъ, за милосе́рдіе ми́лости, на́мъ, пою́щимъ Тя́, Ма́ти Приснодѣ́во.

Сѣда́ленъ, гла́съ 8. Подо́бенъ: Воскре́се.

Седмочи́сленный ли́къ святы́хъ му́ченикъ пострада́ крѣ́пко за Боже́ственную Тро́ицу, погуби́ мно́жества мы́сленныхъ вра́гъ благода́тію и совокупи́шася тма́мъ небе́сныхъ умо́въ ду́хомъ. Тѣ́хъ моли́твами уще́дри на́съ, Человѣколю́бче.

Сла́ва, и ны́нѣ, богоро́диченъ:

Отъ вся́каго преще́нія и зло́бы человѣ́ческія спаси́ на́съ, Пресвята́я Дѣ́во, Тя́ бо и́мамы покро́въ и заступле́ніе, прибѣга́ющіи къ Тебѣ́, Богома́ти, и рожде́нному изъ Тебе́ Бо́гу на́шему, Его́же моли́ изба́вити на́съ бѣ́дъ и скорбе́й.

Крестобогоро́диченъ:

Нескве́рная Агница, Агнца и Па́стыря, ви́сяща на Крестѣ́, зря́щи, вопія́ше: Ча́до Мое́, что́ стра́нное у́бо и ненаде́жное сіе́ зрѣ́ніе? ка́ко Жи́знь всѣ́хъ сме́ртію осужда́ется земны́мъ подо́бнѣ? Но воскресни́ тридне́вно изъ ме́ртвыхъ, Сло́ве, я́коже ре́клъ еси́, да, ра́дующися, сла́влю Тя́.

Пѣ́снь 4.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися, богови́дно усмотри́, и со стра́хомъ славосло́вяше си́лу Твою́.

Вельми́ Христа́, Ага́піе, возлюби́въ, страсте́мъ Того́ му́жески уподо́бился еси́, заколе́нъ бы́въ, я́ко а́гнецъ, во́лею, великому́чениче досточу́дне.

Мечу́ себе́ са́ми вда́вше вседу́шно, му́ченицы му́дріи, кропле́ніи крове́й обагри́сте ри́зу, въ ню́же одѣ́явшеся, на небесѣ́хъ живе́те.

О, ва́шея къ Бо́гу те́плыя любве́! Ея́же ра́ди себе́ са́мыхъ отверго́стеся до конца́ и, ну́жднѣйшую сме́рть подъе́мше, безсме́ртія сподо́бистеся.

Богоро́диченъ: Мѵ́ро во чре́вѣ Сло́ва прія́ла еси́, нескве́рная Чи́стая, ве́сь мíръ отъ злосмра́дія очи́стившаго вся́кихъ согрѣше́ній. Тѣ́мъ вѣ́рно Тя́ ублажа́емъ.

Пѣ́снь 5.

Ирмо́съ: Отъ но́щи невѣ́дѣнія боговѣ́дѣніемъ просвѣти́вый концы́, просвѣти́ мя́ у́тромъ человѣколю́бія Твоего́, Го́споди.

Любо́венъ дѣя́ніемъ, я́коже и зва́ніемъ бы́въ, сла́вне, пострада́лъ еси́ за любо́вь Всецаря́, Христа́ Бо́га на́шего.

Глаго́лъ лю́таго мучи́теля попра́сте, святíи му́ченицы, и, Христу́ вво́инившеся, полки́ де́монскія погуби́сте.

Свяще́нными по́двиги низлага́юще беззако́нныхъ де́рзость, вѣнце́мъ безсме́ртія, му́ченицы Христо́вы, увязо́стеся.

Богоро́диченъ: Пѣсносло́віи боже́ственными Богоро́дицу, вѣ́рніи, ублажи́мъ, ра́дуйся, — глаго́люще, — две́рь, е́юже еди́нъ про́йде Госпо́дь.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Со Алекса́ндрома двѣма́, Діони́сія два́ воспои́мъ, Ага́пія сла́внаго, Тимола́я и Роми́ла, крѣ́пко пострада́вшія и тмы́ вра́жія пора́товавшія.

Исцѣле́ній рѣ́ки источа́юще, му́ченицы, стра́сти земноро́дныхъ боже́ственнѣ очища́ете. Сего́ ра́ди, ра́дующеся, ва́ша вѣ́рою восхваля́емъ до́блести.

Зако́нно свяще́нный по́двигъ соверши́вше, зако́нно вседѣ́тельною дла́нію вѣнча́стеся, седмочи́сленніи му́ченицы, небе́сніи гра́ждане, а́нгеломъ равностоя́теліе.

Богоро́диченъ: Увяди́вшая сады́ безбо́жія, Всенепоро́чная, Твои́мъ святы́мъ прозябе́ніемъ, прозя́бающую во мнѣ́ вы́ну вра́жію зло́бу искорени́, Богоневѣ́сто.

Пѣ́снь 7.

Ирмо́съ: Отъ Іуде́и доше́дше, о́троцы въ Вавило́нѣ иногда́, вѣ́рою тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Са́ми себе́ во́льно къ заколе́нію, я́ко а́гнцы, преда́сте, не убоя́вшеся му́къ, всехва́льніи ору́жницы, но благоду́шно взыва́юще: оте́цъ на́шихъ Бо́же, благослове́нъ еси́.

Просвѣ́щся любо́вію всѣ́хъ Влады́ки, му́чениче Ага́піе, подклони́лъ еси́ вы́ю мечу́ и му́чениковъ счи́слился еси́ во́инству, взыва́я: оте́цъ на́шихъ Бо́же, благослове́нъ еси́.

Яко свѣти́льникъ, зрите́ся въ дому́ Госпо́дни, му́ченицы сла́вніи, седмосте́бленный, мíръ просвѣща́ющій, вопію́ще, сія́ніемъ благода́ти: оте́цъ на́шихъ Бо́же, благослове́нъ еси́.

Богоро́диченъ: Свя́зана мя́ плѣни́цами несказа́нныхъ прегрѣше́ній, разрѣши́, Всенепоро́чная, подаю́щи ми́ ту́чи сле́зъ, пѣснопою́щу изъ Тебе́ Возсія́вшему: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: На горѣ́ святѣ́й просла́вльшася, и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Вра́чеве разли́чныхъ неду́говъ рукодѣ́йствомъ Ду́ха показа́вшеся, вся́ на́ша неду́ги исцѣли́те, я́ко да восхваля́емъ и славосло́вимъ ва́шу боже́ственную па́мять.

Возлюби́лъ еси́ Бо́га, отъ Того́, му́чениче, возлюби́лся еси́. Тѣ́мже тя́, по́двигъ боже́ственный соверши́вша, приве́дъ со единоревни́тели въ небе́сныя, Ага́піе, черто́ги.

Укрѣ́пльшеся любо́вію Влады́ки, наси́лованіе низложи́сте преле́стника и, благосла́вно побѣ́дами украша́еми, въ небе́сныхъ, му́ченицы Госпо́дни, живете́ поко́ищахъ.

Богоро́диченъ: Исцѣли́ стра́сти се́рдца моего́, безстра́стія исто́чника ро́ждшая, и къ животу́ мя́ Боже́ственному наста́ви, да Тя́ сла́влю, Ма́терь Спа́сову, во вся́ вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Кра́сни бы́вше боже́ственными благолѣ́потами муче́нія, Го́сподеви предстоите́ и съ Ни́мъ, страстоте́рпцы, при́сно веселите́ся.

Во́инство а́нгельское ва́съ пріе́млетъ, распря́гшіяся тѣле́съ, му́ченицы, къ небе́сному гра́ду, къ Свѣ́ту невече́рнему.

На́съ, соверша́ющихъ дне́сь па́мять свяще́нную ва́шу, му́ченицы сла́вніи, къ Бо́гу помина́ти не преста́ните.

Богоро́диченъ: Свѣ́томъ мя́ покая́нія, помраче́ннаго небреже́ніемъ, Всенепоро́чная, просвѣти́, я́ко да пою́ и сла́влю вели́чія Твоя́.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 75 – 77 об.

/ Къ оглавленію раздѣла /


Наверхъ / Къ титульной страницѣ

0