Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 14-й де́нь.
Слу́жба Пресвятѣ́й Богоро́дицѣ, соверша́емая въ де́нь пра́зднованія чудотво́рныя Ея́ ико́ны, нарица́емыя Ѳео́доровскія, я́же во гра́дѣ Костромѣ́.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1. Подо́бенъ: Небе́сныхъ чино́въ.

Иже чуде́снаго о́браза* Пресвяты́я Влады́чицы прише́ствіе* благоговѣ́йно пріе́мше костромстíи жи́теліе,* ра́дости вси́ испо́лнишася,* призыва́юще всѣ́хъ дне́сь* на пресла́вное торжество́ Бо́жія Ма́тере.

Съ чи́нми свяще́нныхъ дне́сь* вси́ ро́ди вѣ́рныхъ,* духо́вно возвесели́мся,* пра́зднующе торжество́ Бо́жія Ма́тере,* яви́вшія на́мъ исто́чникъ приснотеку́щій,* незави́стныя да́ры исцѣле́ній всѣ́мъ подаю́щій.

Ѳео́доре, му́чениче Христо́въ, ра́дуйся и лику́й,* при́сный ра́бе Всепѣ́тыя Богома́тере,* я́ко сподо́бился еси́ Тоя́ всечестну́ю ико́ну* рука́ми твои́ми подъя́ти и носи́ти,* и гра́ду Костромѣ́ препода́ти,* я́коже ца́рскую у́тварь,* во спасе́ніе ду́шъ на́шихъ.

Сла́ва, и ны́нѣ, гла́съ 5:

Собра́вшеся, вѣ́рніи, на свяще́нное торжество́ Дѣ́вы дне́сь, предочи́стимъ себе́ воздержа́ніемъ страсте́й, да Чи́стую нескве́рными устна́ми и чи́стыми душа́ми воспои́мъ, глаго́люще: ра́дуйся, преизя́щная красото́ и похвало́ гра́ду Твоему́, ему́же при́сно благотвори́ши, хода́тайствующи поле́зная всѣ́мъ, съ любо́вію къ Тебѣ́ притека́ющимъ.

На стихо́внѣ стихи́ры, гла́съ 2. Подо́бенъ: Егда́ отъ дре́ва.

Якоже прише́ствіемъ иногда́ ко Елисаве́ти Твои́мъ* подви́гла еси́ со устна́ми утро́бу ея́* къ благохвале́нію Твоего́ вели́чія,* си́це и ны́нѣ прише́ствіе Твоего́ чуде́снаго о́браза пра́зднующимъ* моли́твами Твои́ми исхода́тайствуй благода́ть,* по достоя́нію воспѣва́ти Тебе́, Благослове́нная въ жена́хъ,* и благослове́нный Пло́дъ чре́ва Твоего́.

Сти́хъ: Слы́ши, Дщи́, и ви́ждь,* и приклони́ у́хо Твое́.

Нѣ́сть красна́ пѣ́снь во устѣ́хъ грѣ́шника,* я́коже рече́ Писа́ніе,* сего́ ра́ди мы́, пови́нніи мно́гимъ грѣхо́мъ,* не мо́жемъ досто́йнѣ пѣ́ти Тя́,* просла́вленную отъ Самаго́ святы́хъ Святѣ́йшаго.* Тѣ́мже, припа́дающе, вопіе́мъ Ти́:* Богоблаже́нная Отрокови́це,* Твои́мъ предста́тельствомъ содѣ́лай,* да чи́стыми душа́ми и нескве́рными устна́ми* блажи́мъ Тя́, Всепѣ́тая.

Сти́хъ: Лицу́ Твоему́ помо́лятся* [бога́тіи лю́дстіи].

Аще къ высотѣ́ вели́чія и чуде́съ Твои́хъ* не довлѣ́етъ немощно́е сло́во и у́мъ на́шъ,* Ты́ Сама́, Богороди́тельнице,* недостаю́щее въ на́съ Твои́ми моли́твами ны́нѣ испо́лни,* хода́тайствующи на́мъ благода́ть Ду́ха,* Имже дви́жима иногда́, Предте́чева Ма́ти* Тебе́, Ма́терь Го́спода Своего́,* по достоя́нію велича́ше.

Сла́ва, и ны́нѣ, гла́съ то́йже. Самогла́сенъ:

Се́ покрови́тельствуемый Тобо́ю гра́дъ на́шъ, въ ра́дости Ду́ха срѣта́я свѣ́тлый пра́здникъ прише́ствія всечестна́го Твоего́ о́браза, уми́льно взыва́етъ къ Тебѣ́: пріиди́ къ на́мъ, Богоневѣ́сто, и неви́димо ста́ни съ на́ми, вложи́ пѣ́ніе во уста́ на́ша и о́нымъ предначни́ торжество́.

Тропа́рь, гла́съ 4:

Прише́ствіемъ честны́я Твоея́ ико́ны, Богоотрокови́це, обра́дованный дне́сь богохрани́мый гра́дъ Кострома́, я́коже дре́вній Изра́иль къ киво́ту Завѣ́та, притека́етъ ко изображе́нію лица́ Твоего́ и воплоти́вшагося отъ Тебе́ Бо́га на́шего, да Твои́мъ Ма́тернимъ къ Нему́ предста́тельствомъ при́сно хода́тайствуеши всѣ́мъ, подъ сѣ́нь кро́ва Твоего́ прибѣга́ющимъ, ми́ръ и ве́лію ми́лость.


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ. На Го́споди воззва́хъ:] стихи́ры на 8, гла́съ 2:

Пріиди́те, во гла́сѣ шу́ма пра́зднующаго* воспои́мъ Го́сподеви, благодѣ́явшему на́мъ* явле́ніемъ чуде́снаго о́браза Пречи́стыя Своея́ Ма́тере,* прославля́юще бога́тство благода́ти,* ю́же предста́тельствомъ Ея́ излива́етъ оби́льно на всѣ́хъ,* подъ сѣ́нь пречи́стаго лица́ Ея́ притека́ющихъ съ вѣ́рою,* Іису́съ Человѣколю́бецъ и Спа́съ ду́шъ на́шихъ. [Два́жды.]

Благознамени́тъ бы́сть Изра́илю де́нь о́ный,* въ о́ньже руко́ю Моисе́я отъ го́рькія рабо́ты* во блаже́нную свобо́ду лю́діе Бо́жіи превожда́хуся,* си́це и на́мъ ра́достенъ наро́читый се́й пра́здника на́шего де́нь,* я́ко дне́сь руко́ю Вели́каго Кня́зя и Госуда́ря Михаи́ла Ѳео́доровича,* отъ Костромски́хъ предѣ́ловъ возсія́вшаго,* вся́ страны́ оте́чествія на́шего умири́лъ еси́, Го́споди,* да въ ми́рѣ глубо́цѣ прославля́емъ* благодѣя́нія и чудеса́ Твоя́. [Два́жды.]

Благи́ми преизоби́ловаше до́мъ Аведда́ровъ,* бы́вшу иногда́ въ не́мъ киво́ту Завѣ́та,* си́це и гра́дъ на́шъ, имѣ́я въ селе́ніи свое́мъ о́бразъ Тво́й, Влады́ко,* и Пренепоро́чныя Твоея́ Ма́тере,* наслажда́ется бога́тыхъ даро́въ Твои́хъ,* прославля́я Тебе́ и съ Тобо́ю ро́ждшую Тя́,* Хода́таицу ми́ра и ве́лія ми́лости. [Два́жды.]

Обраща́ше дре́вній Изра́иль въ бѣ́гство полки́ чужи́хъ,* разруша́ше тверды́ни иноплеме́нныхъ градо́въ* и всѣ́хъ бѣ́дственныхъ нахожде́ній отъ супоста́товъ свобожда́шеся,* егда́ ковче́гъ Завѣ́та имя́ше съ собо́ю,* но сія́ дре́внія ми́лости* преизоби́льно удиви́лъ еси́ на гра́дѣ на́шемъ, Го́споди,* егда́ нечести́выхъ, на достоя́ніе Твое́ ополчи́вшихся,* стра́хомъ смяте́нныхъ бѣжа́ти вспя́ть сотвори́лъ еси́,* пода́въ на́мъ зна́меніе по́мощи Твоея́* въ чуде́снѣмъ о́бразѣ одушевле́ннаго Твоего́ Киво́та. [Два́жды.]

Сла́ва, и ны́нѣ, гла́съ 6:

Соше́дшеся, вѣ́рныхъ совокупле́нія, на пресла́вное торжество́ Бо́жія Ма́тере, согла́сно воспои́мъ благодѣя́нія и чудеса́, и́миже Госпо́дь сла́вы, въ Костромски́хъ предѣ́лѣхъ пресла́вно просла́ви Ма́терь Свою́: се́ бо чуде́сно яви́ на́мъ всечестны́й о́бразъ Ея́. О, Всеми́лостивый Го́споди, Спа́се на́шъ, творя́й чудеса́ еди́нъ! Удиви́ и на на́съ дре́внія о́ныя Твоя́ ми́лости, имѣ́я о се́мъ моля́щую Тя́ Ма́терь Твою́, Покрови́тельницу и Предста́тельницу гра́ду на́шему, да и мы́, при́сно исполня́ющеся благи́хъ до́му Твоего́, непреста́нно славосло́вимъ Тя́, я́ко Ты́ вчера́, и дне́сь, и во вѣ́ки То́йже еси́ Госпо́дь и Промысли́тель на́шъ.

Вхо́дъ. Проки́менъ дне́. И чте́нія три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 4:

Воспои́мъ, вѣ́рніи, е́же о на́съ Бо́жія благоволе́нія вели́чіе, я́ко прославля́яй разли́чными чудеса́ми вся́ про́чія ца́рствія Своего́ предѣ́лы Госпо́дь, призрѣ́ и на смире́ніе на́съ, рабо́въ Свои́хъ, дарова́въ гра́ду на́шему зна́меніе Своего́ всеблага́го о на́съ про́мысла, чудеса́ми здѣ́ просла́вленный Ма́тере Своея́ о́бразъ. Къ не́му же вѣ́рою притека́юще, пріе́млемъ вся́ блага́я и спаси́тельная на́мъ, да та́ко непреста́нно Богома́терь воспѣва́емъ и рожде́ннаго изъ Нея́ Іису́са Человѣколю́бца и Спа́са ду́шъ на́шихъ.

Гла́съ 6:

Пусты́ня, я́же бя́ше несла́вна и ненаселе́нна иногда́, за явле́ніе Бо́жіе, многоча́стнѣ и многообра́знѣ въ не́й бы́вшее, сотвори́ся напослѣ́докъ духо́вныя прему́дрости учи́лищемъ изше́дшему изъ Еги́пта Изра́илю, си́це и мра́чное о́ное мѣ́сто, въ не́мже богосвѣ́тлое пречестна́го сего́ явле́ніе о́браза просія́ благода́тію изображе́нного на не́мъ Богомладе́нца Іису́са и предста́тельствомъ Пречи́стыя Ма́тере Его́, устро́ися мѣ́сто душе́внаго свѣ́та, и́мже духо́вніи вожди́ но́ваго Изра́иля наставля́ются ко благоуспѣ́шному вели́каго сего́ служе́нія прохожде́нію. Сего́ ра́ди мы́, бра́тіе, толи́кую благода́ть пресла́внымъ явле́ніемъ чуде́сныя о́ныя ико́ны пріе́мше, благодари́мъ Просвѣти́теля ду́шъ на́шихъ и, благодаря́ще, воззове́мъ къ Нему́: Свѣ́те Истинный, просвѣща́яй вся́каго человѣ́ка, въ мíръ гряду́щаго, не преста́й при́сно исполня́я свѣ́томъ Твоего́ богоразу́мія, всѣ́хъ му́дростію, я́же свы́ше просвѣща́емыхъ, во сла́ву и́мене Твоего́ и во спасе́ніе Твоего́ достоя́нія.

Сла́ва, и ны́нѣ, гла́съ 8:

Отку́ду мнѣ́ сіе́, да пріи́де Ма́ти Го́спода моего́ ко мнѣ́? — взыва́ше Ти́ Предте́чева ма́ти, егда́ пришла́ еси́ въ до́мъ Заха́ріинъ, Богома́ти Пресвята́я; си́це покрови́тельствуемый Тобо́ю гра́дъ Кострома́, пріе́мля во предѣ́лы своя́ всечестны́й о́бразъ Тво́й и съ ни́мъ бога́тство небе́сныхъ дарова́ній, а́ки Са́мую Тебе́ и съ Превѣ́чнымъ Сы́номъ Твои́мъ пріе́млетъ, тѣ́мже отъ неопи́санныя ра́дости недоумѣва́етъ: ко́е сло́во принесе́тъ Ти́? Или́ кíими благохвале́ніи въ настоя́щій пра́здникъ явле́нія ико́ны Твоея́ возвели́читъ Тя́? То́чію, е́же Ду́хъ Святы́й подаде́ иногда́ Елисаве́ти, сіе́ вси́ взыва́емъ о Тебѣ́: отку́ду на́мъ сіе́? Яко цѣльбоно́снымъ о́бразомъ Свои́мъ пріи́де Ма́ти Го́спода на́шего, ра́ди Ея́ подаю́щаго на́мъ ми́ръ и ве́лію ми́лость.

На стихо́внѣ стихи́ры самогла́сны, гла́съ 4:

Принесе́ннѣй бы́вшей ико́нѣ Твое́й,* Богоневѣ́сто Влады́чице,* во избра́нный Тобо́ю гра́дъ на́шъ,* испо́лнися премно́гія ра́дости Вели́кій Кня́зь* и съ ни́мъ вси́ вѣ́рныхъ собо́ри,* иму́ще съ собо́ю ви́димое зна́меніе Твоего́ о себѣ́ благоволе́нія,* на не́же и мы́, сы́нове и́хъ, при́сно взира́юще,* въ весе́ліи ду́ха прино́симъ Ти́ дне́сь и Ро́ждшемуся изъ Тебе́* пѣ́снь благодаре́нія.

Сти́хъ: Слы́ши, Дщи́, и ви́ждь,* и приклони́ у́хо Твое́.

Во о́блацѣхъ дугу́ положи́вый во зна́меніе* вѣ́чнаго земли́ съ небеса́ми ми́ра,* да́лъ еси́ зна́меніе гра́ду на́шему* Твоего́ всеблага́го о не́мъ про́мысла, Влады́ко,* утверди́въ во святи́лищи его́ всечестну́ю Ма́тере Твоея́ ико́ну,* на ню́же взира́юще,* воспомина́емъ ве́лія и пресла́вная,* я́же явля́еши къ на́мъ,* вѣ́рою Тя́ сла́вящимъ* и къ хода́тайству Ма́тере Твоея́ съ любо́вію прибѣга́ющимъ.

Сти́хъ: Лицу́ Твоему́ помо́лятся* бога́тіи лю́дстіи.

Волсви́, прише́дшіи отъ восто́къ,* узрѣ́вше звѣзду́,* е́юже ко Христу́, въ Виѳлее́мѣ ро́ждшемуся, руководи́ми бя́ху,* возра́довахуся ра́достію ве́ліею зѣло́,* си́це и мы́, вѣ́рніи, ра́дуемся и весели́мся,* благодаря́ще Человѣколю́бца Іису́са,* чрезъ ико́ну сію́ руководя́щаго на́съ къ позна́нію* вочеловѣ́ченія Его́ отъ Пренепоро́чныя Дѣ́вы.

Сла́ва, и ны́нѣ, гла́съ 8:

Во дне́хъ пло́ти Твоея́, Іису́се, Бо́же на́шъ, предѣ́лы еди́наго до́му Изра́илева проше́лъ еси́, благодѣ́тельствуя и вся́къ неду́гъ и вся́ку я́зю въ лю́дехъ Его́ исцѣля́я, но по дне́хъ воста́нія Твоего́, сѣдя́ со Отце́мъ на престо́лѣ вели́чествія, вся́ концы́ вселе́нныя сла́вою чуде́съ и мно́жествомъ щедро́тъ Твои́хъ испо́лнилъ еси́, и́хже да не лише́нъ бу́детъ и смире́нный гра́дъ на́шъ со предѣ́лы свои́ми: благоволи́лъ еси́, дарова́въ ему́ пречестну́ю Ма́тере Твоея́ ико́ну, всѣ́мъ, къ Тебѣ́ вѣ́рою приходя́щимъ, ощуща́ти Боже́ственную Твою́ си́лу. Сего́ ра́ди и мы́, толи́кихъ дарова́ній наслажда́ющеся, въ ра́дости Ду́ха взыва́емъ Ти́: сла́ва Твоему́ всеблаго́му о на́съ про́мыслу, Еди́не Человѣколю́бче и Спа́се ду́шъ на́шихъ.

На благослове́ніи хлѣ́бовъ: тропа́рь Богоро́дицѣ, гла́съ 4: Прише́ствіемъ честны́я Твоея́ ико́ны.., три́жды. [Пи́санъ на ма́лѣй вече́рни.]



НА УТРЕНИ,
На Бо́гъ Госпо́дь: Тропа́рь Богоро́дицѣ, три́жды.

По 1-мъ стихосло́віи сѣда́ленъ, гла́съ 4:

Сте́кшеся на пѣ́нія чуде́съ, я́же хода́тайствомъ Ма́тере Своея́ яви́ на́мъ Госпо́дь си́лъ во сла́ву Свою́, подража́имъ, вѣ́рніи, богопрія́тнѣй добродѣ́тели Ея́, къ сла́вѣ рожде́ннаго изъ Нея́ Іису́са Человѣколю́бца и Спа́са ду́шъ на́шихъ.

Сла́ва, и ны́нѣ:

Якоже свѣтоно́сное Тя́ и сладча́йшее со́лнце, о́бразомъ Твои́мъ боже́ственнымъ, Влады́чице, приходя́щую, гра́дъ на́шъ Кострома́ со стра́хомъ срѣта́етъ, освяща́ющую на́ша ду́ши и тѣлеса́, тѣ́мъ мо́лимъ Тя́, Всепречи́стая: моли́твами Твои́ми изба́ви ны́ отъ вся́кія напа́сти и ско́рби.

По 2-мъ стихосло́віи сѣда́ленъ, гла́съ 3:

Блаже́нно чре́во бы́сть Приснодѣ́вы, я́ко носи́вшее Христа́ Госпо́дня, блаже́ннѣйше же бы́сть се́рдце Ея́, я́ко пріе́мшее и сохра́ншее словеса́ Его́. Сего́ ра́ди и мы́, бра́тіе, подража́имъ любому́дрію Ея́, да услы́шимъ отъ пра́веднаго Мздовоздая́теля сла́дкій о́ный гла́съ: блаже́ни и вы́, слы́шавшіи сло́во Мое́ и сохра́ншіи е́.

Сла́ва, и ны́нѣ:

Яко иму́щая неизрече́нное дерзнове́ніе къ ро́ждшемуся изъ Тебе́ Христу́, Бо́гу на́шему, Пречи́стая Госпоже́ Богоро́дице, умоли́ поми́ловатися всѣ́мъ, пою́щимъ боже́ственная вели́чія Твоя́ и исповѣ́дающимъ Тя́, су́щую Богороди́тельницу.

Поліеле́й.

Припѣ́въ: Досто́йно е́сть [велича́ти Тя́, Богоро́дице, Честнѣ́йшую херуви́мъ и Сла́внѣйшую безъ сравне́нія серафи́мъ].

Псало́мъ: Бо́же, су́дъ Тво́й царе́ви да́ждь...

По поліеле́и сѣда́ленъ, гла́съ 6:

Да хода́тайство, е́же о на́съ, Богоотрокови́цы дѣ́йственно бу́детъ ко Спа́су на́шему, сотвори́мъ вся́, отъ Христа́ повелѣ́нная, и та́ко моли́твы Ма́тере Его́ исхода́тайствуютъ блага́я, исполня́ющая лише́ніе и нищету́ ду́шъ и тѣле́съ на́шихъ.

Сла́ва, и ны́нѣ:

Боже́ственный приспѣ́ пра́здникъ чуде́снаго прише́ствія во гра́дъ Кострому́ пречестны́я ико́ны Всенепоро́чныя и еди́ныя Богома́тере: ра́дуйтеся у́бо вси́, христоимени́тіи лю́діе, прославля́я вели́чіе Бо́га на́шего и Того́ ро́ждшія Приснодѣ́вы.

Степе́нна, 1-й антифо́нъ, 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Вся́кое дыха́ніе... Ева́нгеліе отъ Луки́, зача́ло 4.

По 50-мъ псалмѣ́ стихи́ра, гла́съ 8:

Отку́ду мнѣ́ сіе́, да пріи́де Ма́ти [Го́спода моего́ ко мнѣ́? — взыва́ше Ти́ Предте́чева ма́ти, егда́ пришла́ еси́ въ до́мъ Заха́ріинъ, Богома́ти Пресвята́я; си́це покрови́тельствуемый Тобо́ю гра́дъ Кострома́, пріе́мля во предѣ́лы своя́ всечестны́й о́бразъ Тво́й и съ ни́мъ бога́тство небе́сныхъ дарова́ній, а́ки Са́мую Тебе́ и съ Превѣ́чнымъ Сы́номъ Твои́мъ пріе́млетъ, тѣ́мже отъ неопи́санныя ра́дости недоумѣва́етъ: ко́е сло́во принесе́тъ Ти́? Или́ кíими благохвале́ніи въ настоя́щій пра́здникъ явле́нія ико́ны Твоея́ возвели́читъ Тя́? То́чію, е́же Ду́хъ Святы́й подаде́ иногда́ Елисаве́ти, сіе́ вси́ взыва́емъ о Тебѣ́: отку́ду на́мъ сіе́? Яко цѣльбоно́снымъ о́бразомъ Свои́мъ пріи́де Ма́ти Го́спода на́шего, ра́ди Ея́ подаю́щаго на́мъ ми́ръ и ве́лію ми́лость].

Кано́нъ Пресвятѣ́й Богоро́дицѣ, гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Отве́рзый у́мъ разумѣ́ти Писа́нія ученико́мъ Твои́мъ, Го́споди, отве́рзи ны́нѣ и на́ша сердца́ къ разумѣ́нію вели́чія Твоего́ и Ма́тере Твоея́, да съ Не́ю боголѣ́пно просла́вимъ Тя́.

Отве́рсти толку́щимъ две́ри милосе́рдія Твоего́ обѣтова́вый, Влады́ко на́шъ, отве́рзи на́мъ утро́бы человѣколю́бія Твоего́, имѣ́я на сіе́ моля́щую Тя́ Хода́таицу.

Отве́рсто иногда́ бы́сть моли́твою Иліино́ю не́бо, ра́ди беззако́нновавшаго Изра́иля заключе́нное, отве́рстъ да бу́детъ и на́мъ, грѣ́шнымъ, вхо́дъ въ небе́сная предста́тельствомъ Твои́мъ, Богороди́тельнице.

Отве́рзшая рождество́мъ Твои́мъ врата́ вѣ́чная, Богороди́тельница Пречи́стая, отве́рзи предста́тельствомъ Твои́мъ заключе́нныя серде́цъ на́шихъ две́ри, да Сы́нъ Тво́й и Бо́гъ на́шъ вни́детъ и освяти́тъ я́.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Твоего́ плотска́го е́же на земли́ смотре́нія да незабве́нно устро́иши воспомина́ніе, да́лъ еси́ на́мъ, Влады́ко, ико́ну Твою́ и Ро́ждшія Тя́, тѣ́мже, взира́юще на о́ную, мо́лимъ Тя́: руководи́ на́съ къ позна́нію и любле́нію Тебе́, воплоще́ннаго Бо́га и Спа́са ду́шъ на́шихъ.

Твоея́ Пренепоро́чныя Ма́тере всечестны́й о́бразъ любо́вію объе́млюще, изъ глубины́ души́ взыва́емъ къ Тебѣ́, живу́щему на небесѣ́хъ: начерта́й на сердца́хъ на́шихъ кра́сный о́бразъ добродѣ́телей Ея́, да велича́емъ Тя́, Го́спода и Спа́са на́шего.

Тво́й всечестны́й о́бразъ, Влады́чице, любе́зно на земли́ пріе́млюще, зове́мъ къ Тебѣ́, су́щей во сла́вѣ небе́сной, да при́сно хода́тайствуеши на́мъ благода́ть мы́слити и твори́ти досто́йная Твоего́ вели́чія, е́же сотвори́ Тебѣ́ Си́льный.

Твои́хъ благодѣя́ній воспомина́ніе, твори́мое дне́сь, дви́жетъ сердца́ на́ша со устна́ми къ благохвале́нію Твоему́, Влады́чице, но сотвори́, да и кра́сный ли́къ Твои́хъ добродѣ́телей привлече́тъ сердца́ на́ша къ любле́нію и подража́нію о́ныхъ.

Сѣда́ленъ, гла́съ 3:

Сíи лю́діе устна́ми чту́тъ Мя́, се́рдце же и́хъ дале́че отстои́тъ отъ Мене́, — рече́ иногда́ Госпо́дь Вседержи́тель ко іуде́емъ, еди́нъ внѣ́шній ви́дъ благоче́стія явля́ющимъ. Но да и мы́ не ту́южде съ ни́ми ча́сть и осужде́ніе воспріи́мемъ, бра́тіе, вся́чески блюде́мся дѣ́лъ, подо́бныхъ лицемѣ́рію. Сего́ ра́ди пра́зднующе и всечестны́й се́й пра́здникъ, да не яви́мся извнѣ́ то́чію благоговѣ́йны, вну́трь же у́ду зли́ и нечести́віи предъ Испыту́ющимъ сердца́ и утро́бы, въ простотѣ́ се́рдца поклони́мся Ему́, я́коже Са́мъ рече́, Ду́хомъ и и́стиною, да та́ко бу́демъ подража́тели Пресвятѣ́й Дѣ́вѣ, въ Не́йже не гла́съ то́чію, но па́че душа́ велича́ше Го́спода и ду́хъ ра́довашеся о Бо́зѣ, Спа́се Свое́мъ.

Сла́ва, и ны́нѣ:

Покро́ва Твоего́ Боже́ственнаго, Пречи́стая Богоро́дице Влады́чице, да не оты́меши отъ рабо́въ Твои́хъ, мо́лятъ Тя́ уго́дники Сы́на Твоего́: великому́ченикъ Ѳео́доръ Стратила́тъ и преподо́бніи чудотво́рцы, страны́ сея́ Костромскíя и Га́лицкія засту́пницы, и́хже моле́ніе пріими́ и поми́луй на́съ.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Сѣдя́й одесну́ю престо́ла вели́чествія на высо́кихъ, снизше́лъ еси́ къ до́льнѣйшимъ страна́мъ земли́ и, всели́вся во чре́во смиренному́дрыя Ма́тере Дѣ́вы, яви́лъ еси́ мíрови, я́ко Ты́ призира́еши на смире́ніе рабо́въ Твои́хъ и дае́ши и́мъ благода́ть Твою́, ея́же да и мы́ сподо́бимся, да́руй на́мъ бы́ти ревни́тели смиренному́дрыя Твоея́ Ма́тере.

Сѣдя́й на ра́мѣхъ херуви́мъ и серафи́мъ, благоволи́лъ еси́ пло́тію сѣдѣ́ти на объя́тіяхъ Чистѣ́йшія Отрокови́цы, да си́мъ пока́жеши на́мъ, я́ко Ты́, Свя́те святы́хъ, обита́еши въ сердца́хъ еди́ныхъ люби́телей чистоты́ и цѣлому́дрія, его́же рачи́тели и на́съ покажи́ моли́твами ро́ждшія Тя́.

Сѣдя́щему во сла́вѣ на престо́лѣ Божества́ сподо́билася еси́ Ма́терь бы́ти, ра́ди изя́щнѣйшія чистоты́ и смиренному́дрія, и́хже люби́тели и на́съ покажи́ моли́твами Твои́ми, да и мы́ сподо́бимся ча́сти, угото́ванной рачи́телемъ чистоты́ и смиренному́дрія Твоего́.

Сѣдѣ́ти во сла́вѣ Сы́на Твоего́ сподо́бившаяся, Пренепоро́чная Дѣ́во, не преста́й моля́щи бла́гость Его́, да и мы́, взира́юще на о́бразъ святы́я жи́зни Твоея́ и о́ному на́шимъ жи́тельствомъ сообразу́ющеся, тоя́жде сла́вы на небесѣ́хъ бу́демъ прича́стницы.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Ужаса́хуся и смуща́хуся костромстíи жи́теліе, мнѣ́вше зна́меніе Твоего́ о ни́хъ про́мысла, ико́ну Ма́тере Твоея́, во пла́мени сгорѣ́вшу, но сіе́ смуще́ніе премѣни́лъ еси́ въ ра́дость, Го́споди, показа́въ и́мъ а́біе о́бразъ се́й, отъ огня́ и пе́пела невреди́мь. Си́це да и мы́, по обурева́ющихъ на́съ искуше́ніяхъ и напа́стехъ, при́сно ра́дуемся о Твое́мъ, е́же о на́съ благоволе́ніи, мо́лимъ Тя́, Человѣколю́бче.

Ужасо́шася иногда́ полки́ наше́дшихъ на гра́дъ Кострому́ супоста́товъ, егда́ отъ воображе́нія зра́ка лица́ Твоего́, Го́споди, и Пресвяты́я Твоея́ Ма́тере пусти́лъ еси́ на си́хъ стрѣ́лы мо́лніины, но се́й у́жасъ да вложи́ши въ сердца́ и всѣ́хъ, стремя́щихся ратобо́рствовати достоя́ніе Твое́, мо́лимъ Тя́ съ Хода́таицею на́шего избавле́нія.

Ужа́сни и ско́рбни бы́вше жи́теліе Городца́, узрѣ́вше ико́ну Твою́, Богома́ти, пренесе́ну во гра́дъ Кострому́: мня́ху бо себе́ си́мъ пренесе́ніемъ лише́нныхъ бы́ти Твоего́ о ни́хъ Ма́терняго благоволе́нія, но да не и мы́, таково́ю же иногда́ ско́рбію объя́ти, бу́демъ лише́ни зна́меній Твоего́ покрови́тельства, не преста́й, Влады́чице, пребыва́ющи съ на́ми Твое́ю ми́лостію.

Яко о́чи рабы́ни въ руку́ госпожи́ своея́, та́ко о́чи на́ши всегда́ къ Тебѣ́ возво́димъ, о Многоблаго́утробная Госпоже́ на́ша и Спаси́тельнице Всесвята́я Богоро́дице! При́зри у́бо на ны́ ми́лостивно, ца́рствующая на небеси́ съ Сы́номъ Твои́мъ и Бо́гомъ, и уще́дрити ны́, грѣ́шныя, потщи́ся, я́ко вся́ Тебѣ́ возмо́жна су́ть.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Боже́ственное Твое́ разумѣ́емъ истоща́ніе, Іису́се, Бо́же на́шъ, егда́, взира́юще на о́бразъ Ма́тере Твоея́, зри́мъ Тя́ съ Не́ю я́ко Младе́нца, рука́ми Ея́ держи́ма, тѣ́мже благодаря́ще сему́ Твоему́ е́же къ на́мъ снизхожде́нію, мо́лимъ Тя́, на́съ ра́ди младе́нствовавшаго, бы́ти на́мъ ми́лостива о грѣсѣ́хъ на́шихъ.

Боже́ственного Твоего́ воплоще́нія е́же отъ Дѣ́вы, да при́сно сла́вится та́инство, дарова́лъ еси́ на́мъ, Христе́ Царю́, всечестну́ю Ма́тере Твоея́ ико́ну съ воображе́ннымъ на не́й ви́домъ Пречи́стаго лица́ Твоего́, тѣ́мже и мо́лимъ Тя́, Вседарови́тый Го́споди, да да́си на́мъ при́сно сла́вити воплоще́ніе Твое́, и́мже человѣ́цы Божеству́ соедини́хомся.

Боже́ственнаго Ду́ха наше́ствіе бы́сть на дѣ́вственную утро́бу Твою́, Богома́ти, егда́ Сы́на Превѣ́чнаго пло́тію зачала́ еси́, Его́же да и мы́ въ сердца́хъ на́шихъ при́сно и́мамы, хода́тайствуй на́мъ благода́ть Того́жде Всесвята́го Ду́ха, е́юже быва́ютъ человѣ́цы та́инственною оби́телію Отца́ и Сы́на.

Боже́ственныхъ писа́ній любому́дрое раче́ніе съ при́снымъ во хра́мѣ Госпо́дни пребыва́ніемъ сотвори́ Тя́ избра́нный Ѵпоста́сныя Бо́жія Прему́дрости Хра́мъ, но да и мы́ устро́имся хра́мы Того́жде Бо́га Жи́ва, исхода́тайствуй на́мъ благода́ть усе́рдно внима́ти и послѣ́довати Сы́на Твоего́ гла́су, Иже при́сно во хра́мѣхъ Его́ проповѣ́дуется.

Конда́къ, гла́съ 8:

Благода́рственная принося́ще Ти́, раби́ Твои́, Богороди́тельнице, о всѣ́хъ, и́миже благодѣ́яла еси́ гра́ду на́шему, изъ глубины́ души́ взыва́емъ къ Тебѣ́ и ми́ли ся дѣ́емъ: не преста́ни, Влады́чице, Ма́терними къ Сы́ну Твоему́ и Бо́гу на́шему моли́твами подава́ти вся́ блага́я и спаси́тельная всѣ́мъ, вѣ́рою и любо́вію вопію́щимъ Ти́: ра́дуйся, Дѣ́во, христіа́нъ похвало́.

Икосъ:

Стѣна́ еси́ дѣ́вамъ, Богоро́дице Дѣ́во, и всѣ́мъ, къ Тебѣ́ прибѣга́ющимъ, и́бо небесе́ и земли́ Творе́цъ устро́и Тя́, Пречи́стая, все́лься во утро́бѣ Твое́й и вся́ приглаша́ти Тебѣ́ научи́въ: ра́дуйся, сто́лпе дѣ́вства; ра́дуйся, две́рь спасе́нія; ра́дуйся, Нача́льнице мы́сленнаго назда́нія; ра́дуйся, Пода́тельнице Боже́ственныя бла́гости; ра́дуйся, Ты́ бо обнови́ла еси́ зача́тыя сту́дно; ра́дуйся, Ты́ бо наказа́ла еси́ окра́денныя умо́мъ; ра́дуйся, тли́теля смы́словъ упраждня́ющая; ра́дуйся, Сѣ́ятеля чистоты́ ро́ждшая; ра́дуйся, черто́же безсѣ́меннаго уневѣ́щенія; ра́дуйся, вѣ́рныхъ Го́сподеви сочета́вшая; ра́дуйся, до́брая Младопита́тельнице дѣ́вамъ; ра́дуйся, Невѣстокраси́тельнице ду́шъ святы́хъ. Ра́дуйся, Невѣ́сто неневѣ́стная.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Не служи́ти тва́ри па́че Творца́ законоположи́вый человѣ́комъ, Спа́се на́шъ, сотвори́, усе́рдно мо́лимъ Тя́ съ Богоро́дицею, да, Ду́хомъ Твои́мъ просвѣща́еми, не къ рукотворе́ннымъ изображе́ніямъ отно́симъ боголѣ́пное служе́ніе, но чрезъ о́бразъ Тво́й возно́симся умы́ и се́рдцы, къ Еди́ному Тебѣ́, отце́въ Бо́гу благослове́нному.

Не послужи́ша бы́вшіи въ пещи́ Вавило́нстѣй му́дріи ю́ноши безду́шному истука́ну, но Еди́ному Тебѣ́, во о́бразѣ Ангела посредѣ́ пла́мене я́вльшемуся Сы́ну Бо́жію, поклони́шася, и́хже ли́ку и ча́сти сопричти́ и всѣ́хъ, изображе́ніемъ сладча́йшаго зра́ка Твоего́ дви́жимыхъ къ прославле́нію Тебе́, отце́въ Бо́га благослове́ннаго.

Не послужи́ла еси́ Бо́гу нра́вомъ плотски́хъ іуде́евъ, Пренепоро́чная Дѣ́во, но Ду́хомъ и и́стиною, я́ко и́стинная Раба́ Его́, покланя́лася еси́ Ему́. Тѣ́мже да и мы́ съ Тобо́ю и́стинніи бу́демъ покло́нницы Его́, хода́тайствуй на́мъ благода́ть, е́же не въ суевѣ́рномъ богопочита́ніи, но во и́стинномъ благоче́стіи и вѣ́рѣ служи́ти отце́въ Бо́гу благослове́нному.

Не послужи́ла еси́ мíру и суетѣ́ его́, Богороди́тельнице, но, всему́ предпоче́тши еди́наго Бо́га и зако́нъ Его́, была́ еси́ усе́рднѣйшая всѣ́хъ Раба́ Госпо́дня, тѣ́мже и сподо́билася еси́ послужи́ти ве́ліей та́йнѣ Бо́жія воплоще́нія, я́ко Богома́терь; но сотвори́, да и мы́, отве́ргшеся мíра и я́же су́ть въ мíрѣ, вседу́шно прилѣпи́мся и послу́жимъ Еди́ному отце́въ Бо́гу благослове́нному.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Отроча́ мла́до на́шего ра́ди спасе́нія бы́лъ еси́, Безлѣ́тный Бо́же на́шъ Іису́се, Его́же воображе́ніе зря́ще на свяще́нной ико́нѣ, усе́рдною въ Тя́ вѣ́рою вопіе́мъ Ти́: бу́ди Воспита́тель, Наста́вникъ и Покрови́тель младе́нцемъ и отроко́мъ на́шимъ, да и сíи во и́стиннѣй вѣ́рѣ навы́кнутъ глаго́лати Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Отрокъ дванадесятолѣ́тенъ бы́вый, Іису́се, посредѣ́ ста́рецъ и учи́телей во святи́лищи пребыва́я, послу́шалъ еси́ и́хъ и, совопроша́яся съ ни́ми, явля́лъ еси́ святу́ю ре́вность къ Боже́ственному зако́ну, да си́мъ и на́ша о́троки наста́виши тща́тися во вре́мя ю́ности стяжава́ти духо́вную, я́же отъ зако́на Твоего́ прему́дрость, да и они́ науча́тся сердцы́ и усты́, словесы же и дѣлы превозноситъ Тя во вся вѣки.

Отроки отъ пе́щи вавило́нскія изба́вльшему Го́споду моли́ся прилѣ́жно, Богоневѣ́стная Отрокови́це, да да́руетъ всѣ́мъ, подъ кро́въ Тво́й прибѣга́ющимъ, неврежде́ннымъ бы́ти отъ огня́ искуше́ній и пла́мене по́хотей, да, та́ко Тобо́ю изба́вльшеся, чи́стыми душа́ми и нескве́рными устна́ми благослови́мъ съ Тобо́ю Еди́наго Изба́вителя Го́спода и превозно́симъ Его́ во вся́ вѣ́ки.

Отрокови́цамъ Твое́ цѣлому́дріе и чистота́ да бу́детъ красота́ и сла́ва; чревонося́щимъ Твое́ безболѣ́зненное и свято́е рождество́ да бу́детъ сла́дкое утѣше́ніе и отра́да; всѣ́мъ же, вся́каго по́ла и во́зраста чту́щимъ Тя́, Богоневѣ́сто, добродѣ́тели Твоя́ да бу́дутъ еди́нымъ упражне́ніемъ и́хъ, я́ко си́ми то́кмо досто́йнѣ отъ человѣ́ка прославля́ется Госпо́дь, живы́й во вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Вся́кое колѣ́но небе́сныхъ, и земны́хъ, и преиспо́днихъ да покланя́ется Тебѣ́, я́ко нося́щему въ Себѣ́ неизмѣ́нный Преблаже́ннаго Отца́ Твоего́ о́бразъ, Іису́се. Съ ни́миже и мы́, вѣ́рою просвѣща́еми, Тя́, Истиннаго Бо́га, о́бразъ человѣ́чь отъ Дѣ́вы пріи́мшаго, боголѣ́пно велича́емъ.

Вся́ка уста́ да заградя́тся суесло́вящихъ, я́ко нѣ́сть досто́йно чествова́ти Твою́ и Пречи́стыя Ма́тере Твоея́ ико́ну, Влады́ко: се́ бо, просла́вивъ сію́ чудеса́ми, научи́лъ еси́ достоя́ніе Твое́ Тебе́ и во о́бразѣ пло́ти Твоея́ съ Пренепоро́чною Твое́ю Ма́терію прославля́ти и велича́ти.

Вси́ ро́ди вѣ́рныхъ, по прорече́нію Твоему́, блажа́тъ Тя́, Благослове́нная, Христа́ Бо́га на́шего Ма́ти. Съ ни́ми же и мы́, вѣ́рою совоку́плени, благоговѣ́йно чту́ще свяще́нное лица́ Твоего́ изображе́ніе, прославля́емъ Твоя́ вели́чія, я́же сотвори́ Тебѣ́ Госпо́дь си́лъ, съ Ни́мъ же Тя́ велича́емъ.

Вся́къ язы́къ сме́ртныхъ, по достоя́нію, изнемога́етъ велича́ти Тя́, надъ всѣ́ми превознесе́нную, о Богоневѣ́сто! Тѣ́мже и мы́, прославля́юще Тя́ дне́сь, исповѣ́дуемъ на́ше кра́йнее неможе́ніе, но, сіе́ исповѣ́дующе, мо́лимъ Тя́, да по мно́жеству щедро́тъ Твои́хъ, пріи́меши ма́лое сіе́ приноше́ніе, во зна́меніе мно́гія любве́ и усе́рдія на́съ, велича́ющихъ Тя́.

Свѣти́ленъ:

Свѣ́тъ лица́ Твоего́ и Пресвяты́я Твоея́ Ма́тере яви́вый на́мъ, Влады́ко, во всечестнѣ́й ико́нѣ се́й, сотвори́ на́съ, я́ко ча́да свѣ́та ходи́ти во свѣ́тѣ за́повѣдей Твои́хъ, да, егда́ яви́шися во сла́вѣ съ Ро́ждшею Тя́, сообра́зны бу́демъ свѣтлѣ́йшему со́лнца о́бразу Твоея́ сла́вы.

Сла́ва, и ны́нѣ:

Бо́жія тезоимени́тый да́ра страда́лецъ Христо́въ Ѳео́доръ боже́ственный вои́стинну да́ръ, пречестну́ю Пречи́стыя Богома́тере ико́ну, гра́ду на́шему Костромѣ́ прине́съ, вруча́етъ, ю́же мы́ съ неизрече́нною ра́достію, я́ко небе́сное сокро́вище, пріе́млюще, игра́имъ духо́внѣ и ликовству́емъ, просвѣща́еми свѣ́томъ боже́ственнаго лица́ Марíи Приснодѣ́вы, отъ Нея́же возсія́ Пра́ведное Со́лнце — Христо́съ, просвѣща́яй вся́каго человѣ́ка, гряду́щаго въ мíръ.

На хвали́техъ стихи́ры на 4, гла́съ 1:

Хвали́мый по мно́жеству вели́чествія Твоего́ отъ небе́сныхъ си́лъ,* пріими́ и отъ на́шихъ бре́нныхъ усте́нъ пѣ́снь благодаре́нія,* е́же возсыла́емъ Тебѣ́ за мно́жество щедро́тъ,* и́миже при́сно благодѣ́еши на́мъ,* дарова́въ Пречи́стыя Богома́тере ико́ну* во утвержде́ніе, и защище́ніе, и спасе́ніе на́ше. [Два́жды.]

Въ наро́читый се́й пра́здника на́шего де́нь* соста́вимъ благокра́сны ли́ки,* орга́нами усте́нъ на́шихъ прославля́юще* посѣти́вшую гра́дъ на́шъ чуде́сною Свое́ю ико́ною Богоро́дицу,* Ея́же предста́тельствомъ прекланя́емь, Всевы́шній Влады́ка* подае́тъ на́мъ со мно́жествомъ щедро́тъ* ми́ръ и ве́лію ми́лость.

Пра́зднующе всечестны́й се́й Богома́тере пра́здникъ,* да не бу́демъ, бра́тіе, я́ко мѣ́дь звѣня́щи* или́ кимва́лъ звяца́яй,* но да вѣ́рою живо́ю* и одушевля́ющею вся́ на́ша дѣла́* любо́вію ликовству́емъ дне́сь:* сицево́е бо то́кмо чествова́ніе Богома́тери* и сицево́е славосло́віе Сы́ну Ея́ и Бо́гу на́шему благопрія́тно е́сть.* Тѣ́мже вся́, я́же глаго́лемъ или́ дѣ́емъ дне́сь,* вѣ́рою и любо́вію на́мъ да быва́ютъ.

Сла́ва, и ны́нѣ, гла́съ 8:

Пріиди́те, вси́ Россíйстіи вѣ́рныхъ собо́ри, воспо́йте дне́сь съ на́ми Го́сподеви пѣ́снь богокра́сную, прославля́юще благодѣя́нія и щедро́ты Его́, да мы́ си́ми вы́ну наслажда́ющеся, непреста́нно хва́лимъ, благослови́мъ и велича́емъ Спаси́теля на́шего, изъ глубины́ души́ вопію́ще къ Нему́: о Влады́ко, всѣ́хъ Преще́дре и Всеси́льне! не преста́й и ны́нѣ продолжа́ти къ на́мъ дре́внія о́ныя Твоя́ ми́лости, сохраня́я Боже́ственнымъ Твои́мъ про́мысломъ багряноро́дное пото́мство вели́каго о́наго му́жа, ему́же въ де́нь се́й ски́птры Россíйскаго Ца́рствія вручи́лъ еси́, да, подъ сѣ́нію о́наго, въ ми́рѣ и тишинѣ́ живу́ще, непреста́нно съ Ро́ждшею Тя́ велича́емъ.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна, пѣ́снь 3-я и 6-я. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отъ ны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 6: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе отъ Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́. Аллилу́ія, три́жды.

Назна́менай: Яко а́ще се́й пра́здникъ случи́тся во еди́нъ отъ дне́й по́стныхъ, Литургíя Преждеосвяще́нныхъ, а не Златоу́стаго пое́тся. Инако же му́дрствующіи проти́вно глаго́лютъ пра́виломъ, и́миже повелѣ́но е́сть, кромѣ́ суббо́ты и недѣ́ли и дне́ Благовѣ́щенія, во всю́ святу́ю Четыредеся́тницу не бы́ти Проскоми́діи.

Источникъ: Слу́жба Пресвятѣ́й Богоро́дицѣ, соверша́емая Ма́рта 14-го, въ де́нь пра́зднованія чудотво́рныя Ея́ ико́ны, нарица́емыя Ѳео́доровскія, я́же во гра́дѣ Костромѣ́. [Де́нь явле́нія ея Августа 16-го]. — Изда́ніе четве́ртое. — М.: Въ Сѵнодальной Тѵпографіи, 1888. — 22 л.

/ Къ оглавленію раздѣла /


Наверхъ / Къ титульной страницѣ

0