Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 14-й де́нь.
Преподо́бнаго отца́ на́шего Венеди́кта.

[ВЕЧЕРЪ,]
На Го́споди воззва́хъ: стихи́ры, гла́съ 2. Подо́бенъ: Егда́ отъ дре́ва.

Красота́ мона́шествующихъ бы́въ,* собра́лъ еси́ неизче́тное мно́жество пѣ́ти Го́спода,* преподо́бне Венеди́кте,* и къ небе́снѣй вся́ стези́ наста́вилъ еси́,* до́брѣ послѣ́дующія боже́ственнымъ твои́мъ уче́ніемъ* и подо́бящіяся твоему́ житію́ добродѣ́тельному, о́тче.* Съ ни́миже тя́ почита́емъ свяще́нно,* въ преставле́ніи твое́мъ ра́дующеся.

Якоже дре́вле Илія́, до́ждь, о́тче,* съ небе́съ моли́твою боже́ственною низве́лъ еси́,* точи́ти же еле́й сосу́дъ сотвори́лъ еси́,* и мертвеца́ воскреси́лъ еси́,* и ина́я премно́гая чудеса́ сотвори́лъ еси́* въ сла́ву, преподо́бне, всѣ́хъ Спа́са и Бо́га.* Тѣ́мже твою́ сла́вную па́мять* любо́вію пра́зднуемъ, Венеди́кте.

Сла́ва, и ны́нѣ, богоро́диченъ, гла́съ и подо́бенъ то́йже:

Всѣ́хъ скорбя́щихъ ра́досте,* и оби́димыхъ предста́тельнице,* и убо́гихъ пита́тельнице,* стра́нныхъ же утѣше́ніе* и же́зле слѣпы́хъ,* немощны́хъ посѣще́ніе,* тружда́ющихся покро́ве и засту́пнице* и си́рыхъ помо́щнице,* Ма́ти Бо́га Вы́шняго* Ты́ еси́, Пречи́стая,* потщи́ся, мо́лимся,* спасти́ся рабо́мъ Твои́мъ.

Крестобогоро́диченъ, подо́бенъ то́йже:

Доса́ды претерпѣ́вшаго мно́ги* и на Кре́стъ вознесе́наго вся́ческихъ Творца́* ви́дѣвши, Пречи́стая, стеня́ше, глаго́лющи:* препѣ́тый Го́споди, Сы́не и Бо́же Мо́й,* ка́ко почести́ хотя́ созда́ніе Твое́, Влады́ко,* терпи́ши пло́тію безче́стіе?* Сла́ва мно́гому милосе́рдію и соше́ствію Твоему́, Человѣколю́бче.


[НА УТРЕНИ,]
Кано́нъ, его́же краегране́сіе: Пѣ́снь принесу́ му́дрому Венеди́кту. Творе́ніе Іо́сифа. Гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты Еги́петскія, я́ко просла́вися.

Пѣсносло́вити достохва́льную па́мять твою́ усе́рдствующему, преподо́бне, благода́ть да́ти мнѣ́ моли́ся, Венеди́кте, и всѣ́хъ прегрѣше́ній избавле́ніе.

Мона́шески, тво́й отъ младе́нства взе́мъ кре́стъ, послѣ́довалъ еси́ Вседержи́телю и, умертви́въ пло́ть, жи́зни сподо́бился еси́, преблаже́нне.

Зако́ну Бо́жію повину́вся, досточу́дне, и страсте́й взыгра́нія увяди́лъ еси́ воздержа́нія по́двиги, и безстра́стія благода́тію обогати́лся еси́.

Богоро́диченъ: Иже Тебе́ ра́ди нетлѣ́ніемъ обога́щшеся, Богороди́тельнице Всечи́стая, ра́дуйся, вопіе́мъ Ти́, обра́дованнѣй, преподо́бныхъ и пра́ведныхъ удобре́ніе.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Во́дъ живо́тныхъ Боже́ственнаго Ду́ха испо́лнившися, богоно́се, душа́ твоя́ рѣ́ки чуде́съ источи́, неду́говъ изсуша́ющія тече́ніе.

Къ широтѣ́ ра́йстѣй пресели́лся еси́, всеблаже́нне, тѣ́сную ше́ствовавъ стезю́, и де́моновъ кова́рствія, и ше́ствія безчи́нная утѣсни́лъ еси́.

Тече́ніи твои́хъ сле́зъ напая́емь, я́ко дре́во, Венеди́кте, плодоно́сно, благопло́діе Боже́ственно прине́слъ еси́ добродѣ́телей и чуде́съ Боже́ственною благода́тію.

Богоро́диченъ: Еди́нъ Благíй Твою́, воплоща́емь, про́йде, Пренепоро́чная, утро́бу и Человѣ́къ ви́дѣнъ бы́сть соверше́нъ, Его́же моли́ спасти́ пою́щія Тя́.

Сѣда́ленъ, гла́съ 1. Подо́бенъ: Ка́мени запеча́тану.

Мона́шествовавъ богоуго́дно, добродѣ́тельно пожи́лъ еси́ и благода́ть исцѣле́ній прія́лъ еси́, Венеди́кте, чудеса́ соверши́въ стра́шна, оби́тель же совоку́пль свяще́нну, приве́лъ еси́ Го́споду спаса́емыхъ мно́жества, пребога́те. Сла́ва Бо́гу, просвѣти́вшему тя́, сла́ва Вѣнча́вшему тя́, сла́ва святу́ю твою́ па́мять Просла́вльшему.

Сла́ва, и ны́нѣ, богоро́диченъ:

Ру́цѣ Твои́ боже́ственныя, и́миже Созда́теля понесла́ еси́, Дѣ́во Пресвята́я, вопло́щшагося благосты́нею, просте́рши, умоли́ Его́ изба́вити на́съ отъ искуше́ній, и страсте́й, и бѣ́дъ, хва́лящихъ Тя́ любо́вію и вопію́щихъ: сла́ва Все́льшемуся въ Тя́, сла́ва Проше́дшему изъ Тебе́, сла́ва Изба́вльшему на́съ рождество́мъ Твои́мъ.

Крестобогоро́диченъ:

На Крестѣ́ Тебѣ́ распе́ншуся отъ беззако́нныхъ, и отъ во́инъ, Спа́се, копіе́мъ ре́бромъ Твои́мъ прободе́ннымъ, Пречи́стая рыда́ше го́рько и, мно́гому Твоему́ и стра́шному терпѣ́нію ужаса́шеся, вопія́ше: сла́ва къ человѣ́комъ Твое́й любви́, сла́ва Твое́й бла́гости, сла́ва сме́ртію Твое́ю человѣ́ки обезсме́ртившему.

Пѣ́снь 4.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Распе́нъ себе́ сама́го страсте́мъ и мíру, богому́дре о́тче, на Крестѣ́ просте́ршему во́лею дла́ни Христу́ угоди́лъ еси́, Венеди́кте. Его́же моли́ спасти́ ду́ши на́ша.

По́двиги воздержа́нія, преподо́бне, плотскíя умертви́лъ еси́ у́ды, ме́ртвыя же моли́твою возста́вилъ еси́, и разсла́бленнымъ благотече́ніе, вѣ́рно чуди́мь, дарова́лъ еси́, и вся́къ неду́гъ, о́тче, исцѣли́лъ еси́.

Сухíя же и невла́жныя, преподо́бне, содѣ́лалъ еси́ ду́ши ро́дны живи́тельнымъ сло́вомъ твои́мъ, плодо́въ духо́вныхъ и боже́ственныхъ, му́дре, богопрови́дѣнъ бы́въ и мона́шествующихъ красота́, свяще́ннѣйшій.

Богоро́диченъ: Яко до́ждь на руно́, Чи́стая, въ честно́е чре́во Твое́ Сло́во сни́де, воплоща́емо, и уста́ви многобо́жія я́вѣ одожде́нія, Всенепоро́чная, и го́рькую зи́му разори́ло е́сть.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Су́щаго въ ми́лости Бо́га моля́, о́тче преподо́бне, напо́лнилъ еси́, я́коже Илія́ чва́нецъ еле́я, сосу́дъ вели́къ, отъ зря́щихъ вѣ́рно удивля́емь.

Яко чи́стъ душе́ю, ты́, во изступле́ніи бы́въ, ви́дѣлъ еси́ всю́ зе́млю, я́ко подъ заре́ю сія́ющу еди́ною, Бо́гу тя́ почита́ющу, всеблаже́нне Венеди́кте.

Чудодѣ́йствуя о Христѣ́, водѣ́ истещи́ моли́твою, преподо́бне, мо́лиши Подвигополо́жника, я́же пребыва́етъ, возпроповѣ́дающи чудеса́, Венеди́кте.

Богоро́диченъ: Живы́й на небесѣ́хъ, хотя́й всели́ся въ ложесна́ Твоя́, Чи́стая, я́ко да на́съ до́мы Тро́ицѣ сотвори́тъ, Тя́, Богоро́дицу, проповѣ́дающихъ, Чи́стая.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Свѣтозаре́ньми просвѣща́емь Ду́ха, тму́ лука́выхъ де́моновъ отгна́лъ еси́, чудотво́рче Венеди́кте, мона́шествующихъ свѣти́льниче свѣтлѣ́йшій.

Яко пресла́вно, блаже́нне, житіе́ твое́, я́ко пресвѣ́тло честно́е жи́тельство твое́, и́мже стада́ привле́клъ еси́ мона́шествующихъ къ ра́зуму спаси́тельному.

Ца́рствія жи́тель бы́въ небе́снаго, богому́дре Венеди́кте, сего́ улучи́ти моли́ вѣ́рно тя́ при́сно блажа́щимъ.

Богоро́диченъ: Изъ утро́бы Твоея́ святы́я возсія́ Пра́вды невече́рнее Со́лнце и вѣ́рныя просвѣти́, Богоро́дице Дѣ́во Всепѣ́тая.

Конда́къ, гла́съ 6:

Благода́тію Бо́жіею обогати́лся еси́, дѣ́лы же извѣсти́лъ еси́ зва́ніе, и яви́лся еси́, Венеди́кте, уго́дниче Христа́ Бо́га, въ моли́твахъ и постѣ́хъ дарова́ній Бо́жія Ду́ха испо́лненъ, и бы́лъ еси́ неду́жнымъ исцѣли́тель, и прогони́тель враго́мъ, и засту́пникъ ско́рый душа́мъ на́шимъ.

Пѣ́снь 7.

Ирмо́съ: Вѣтíи яви́шася о́троцы любомудрѣ́йшіи дре́вле, отъ богопрія́тныя бо души́, богосло́вяще устна́ми, поя́ху: Пребоже́ственный отце́въ и на́шъ Бо́же, благослове́нъ еси́.

Ме́ртвость живоно́сну стяжа́лъ еси́ сласте́й отложе́ніемъ. Тѣ́мже ме́ртвыя возставля́ти сподо́бился еси́, блаже́нне Венеди́кте, вопія́: Пребоже́ственный отце́въ и на́шъ Бо́же, благослове́нъ еси́.

Удивля́емь отъ мно́жества вѣ́рныхъ, я́ко Илія́ вели́кій, содѣ́лалъ еси́ преподо́бными твои́ми труды́ огра́ду, водрузи́въ, мона́хомъ, я́же при́сно пребыва́етъ, остѣня́ема моли́твами твои́ми, блаже́нне.

Непщева́вше умори́ти безъ ума́ чарова́ньми, о́тче, лука́вными тя́, блюдо́маго Боже́ственною Вседѣ́теля дла́нію, несмы́сленніи постыдѣ́шася, обличе́ни бы́вше су́щимъ въ тебѣ́, Венеди́кте, проразумѣ́ніемъ.

Богоро́диченъ: Исцѣли́ души́ моея́ стра́сти безстра́стія исто́чника заче́ншая несказа́нно, Дѣ́во, и умиле́нія ту́чу пода́ждь ми́, хода́тайствующую ми́ утѣше́ніе та́мо, Свята́я Богоро́дице.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Надъ страстьми́ тлетво́рными ца́рствовавъ о Христѣ́, богому́дре о́тче, въ небе́снѣмъ Ца́рствіи сподо́бился еси́ жи́ти со всѣ́ми, до́брѣ пожи́вшими и Всеви́дца Бо́га возлюби́вшими.

Твоя́ святы́я моли́твы пріе́мля, Бо́гъ су́щимъ во оскудѣ́ніи тобо́ю подава́ше, я́же къ житію́ вины́, вельми́ на земли́ прославля́я тя́ чудодѣ́йствы, Венеди́кте треблаже́нне.

Украси́вся добро́тами боже́ственныхъ добродѣ́телей, къ кра́снымъ черто́гамъ преста́вился еси́, о́тче, пребыва́ти съ Бо́гомъ и сего́ Боже́ственныя красоты́ въ безконе́чныя вѣ́ки наслажда́тися.

Богоро́диченъ: Се́ роди́ся изъ Тебе́, я́коже вопіе́тъ Иса́ія, Чи́стая, Отроча́, Сы́нъ Вы́шняго и Тво́й зри́мь е́сть Сы́нъ, Дѣ́во, сы́ны сотворя́я Небе́снаго Отца́, Тя́ почита́ющія.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Яви́лся еси́, я́ко со́лнце вели́кое, озаря́я зда́ніе зна́меньми, богоно́се, стра́шными и добродѣ́телей сія́ніи, сего́ ра́ди, соверша́юще па́мять твою́, пои́стиннѣ свѣтоза́рную, просвѣща́емся, о́тче, серде́чными чу́вствы.

Тя́ мона́шествующихъ стада́, тобо́ю собра́нна, де́нь восхваля́ютъ и но́щь, посреди́ тѣ́ло твое́ иму́ще, источа́ющее бога́тно чуде́съ рѣ́ки, о́тче му́дре, и просвѣтя́ще си́хъ непреста́нно стопы́.

Па́че со́лнечныхъ лу́чь облиста́лъ еси́, о́тче, испо́лнивъ Бо́жія за́повѣди, и къ Свѣ́ту невече́рнему преста́вился еси́, моля́ пода́тися оставле́нію грѣхо́въ вѣ́рно тя́ чту́щимъ, приснопа́мятне Венеди́кте.

Богоро́диченъ: Свѣтороди́тельнице Дѣ́во, души́ моея́ стра́сти отжени́ и да́ждь чи́сто зрѣ́ти, Влады́чице, спаси́тельную добро́ту возсія́вшаго неизрече́нно изъ Твоея́ пречи́стыя утро́бы во свѣ́тъ язы́ковъ, Всепѣ́тая.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 71 об. – 74 об.

/ Къ оглавленію раздѣла /


Наверхъ / Къ титульной страницѣ

0