Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 12-й де́нь.
Па́мять преподо́бнаго отца́ на́шего Ѳеокти́ста, бы́вшаго Драгути́на, краля́ Се́рбскаго.

Начина́ется съ пятка́ 1-я недѣ́ли поста́ и восхо́дитъ до четвертка́ 6-я недѣ́ли поста́.

ВЕЧЕРЪ,
На Го́споди, воззва́хъ: предваря́етъ самогла́сенъ дне́, два́жды, и му́чениченъ, и подо́бны тріо́ди 3, та́же преподо́бнаго на 4.
Стихи́ры самогла́сны, гла́съ 5:

Возложи́въ Бо́гу себе́ сама́го, послужи́лъ еси́ Ему́ дѣ́лы милосе́рдія, раздава́я тре́бующимъ мно́гая дарова́нія, благода́тію же Ду́ха Свята́го стяжа́лъ еси́ смире́нную му́дрость и ли́ку преподо́бныхъ причта́лся еси́, тѣ́мъ тя́ мо́лимъ, о́тче Ѳеокти́сте, съ ни́миже помина́й на́съ, на земли́ тебе́ помина́ющихъ.

На земли́ до́брѣ пожи́лъ еси́, мірска́го пристра́стія отбѣ́глъ еси́, житіе́ же свое́ удобри́въ добродѣ́тельми, отгна́лъ еси́ тму́ ересе́й, му́дре, терпѣ́ніе же стяжа́въ мно́гое, вѣ́ру, воздержа́ніе и и́стинную любо́вь, показа́лся еси́ оте́цъ сиро́тъ, вдови́цъ предста́тель сострада́теленъ и смире́нъ, сего́ ра́ди вѣ́рно тя́ вси́ восхваля́емъ.

Кро́токъ, непоро́ченъ, незло́бивъ и преподо́бенъ бы́лъ еси́, благоумиле́нъ и ти́хъ ду́хомъ, себѣ́ самому́ наложи́лъ еси́ мно́жайша терпѣ́нія та́йная и бы́лъ еси́ му́ченикъ безъ кро́ве, тѣ́мже мо́лимъ тя́, не забу́ди на́съ, вѣ́рныя лю́ди твоя́, и́же тя́ благоче́стно почита́емъ.

Сла́ва, гла́съ 2:

Аще и владѣ́тель на земли́ бы́лъ еси́, но, послѣ́дуя стопа́мъ преподо́бно пожи́вшихъ на земли́, яви́лся еси́ сострада́теленъ и смире́нъ и боже́ственныя любве́ испо́лненъ, тѣ́мъ и сочта́лся еси́ преподо́бнымъ и всѣ́мъ избра́ннымъ, съ ни́миже тя́ мы́ почита́емъ и сла́вимъ.

И ны́нѣ, богоро́диченъ, гла́съ то́йже:

Пре́йде сѣ́нь зако́нная, [благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ].

Вхо́дъ. Проки́менъ. И чте́нія дне́ и преподо́бнаго 3.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

И про́чее послѣ́дованіе преждесвяще́нныхъ.

Аще же не соверша́ется литургíя преждеосвяще́нная, пое́мъ на стихо́внѣ тріо́ди самогла́сенъ дне́, два́жды, и му́чениченъ.
Сла́ва, преподо́бнаго, гла́съ 6:

Жи́знь твою́ на земли́ цѣлому́дренно соверши́лъ еси́, преподо́бне о́тче Ѳеокти́сте, съ му́дростію, ю́же имѣ́лъ еси́, бога́тство всеразли́чно богому́дреннѣ раздава́лъ еси́, помога́я сооруже́нію и обновле́нію мно́гихъ оби́телей и хра́мовъ, послѣ́дуя же преподо́бно живу́щимъ, поко́й обрѣ́лъ еси́ души́ твое́й.

И ны́нѣ, богоро́диченъ, гла́съ то́йже:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

По Ны́нѣ отпуща́еши: тропа́рь, гла́съ 4:

Боже́ственнаго стра́ха огне́мъ ду́шу свою́ распали́лъ еси́, очи́стився покая́ніемъ и украси́вся кро́тостію и смире́ніемъ, восте́клъ еси́ къ невече́рнему Свѣ́ту — Христу́, преподо́бне о́тче Ѳеокти́сте, и ны́нѣ, трисо́лнечнымъ свѣ́томъ озаря́емь, на небеси́ лику́еши, моли́ о на́съ, вѣ́рою почита́ющихъ честну́ю па́мять твою́.

Сла́ва, и ны́нѣ, богоро́диченъ, гла́съ то́йже:

Еже отъ вѣ́ка утае́нное, [и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша].

Ектенія́, и три́ покло́ны вели́кія, и отпу́стъ.



По шестопса́лміи ектенія́ и посе́мъ: Бо́гъ Госпо́дь... Тропа́рь преподо́бнаго, два́жды. Сла́ва, и ны́нѣ, богоро́диченъ воскре́сенъ и обы́чныя каѳи́смы.
НА УТРЕНИ,

По 1-й и по 2-й каѳи́смѣ сѣда́льны тріо́ди. Ектенíй же не глаго́лемъ.
По 3-й же каѳи́смѣ глаго́летъ іере́й ектенію́ ма́лую.

Та́же сѣда́ленъ, гла́съ 4:

Укрѣпля́емь си́лою свы́ше, побѣди́лъ еси́ вся́ неви́димыхъ вра́гъ ополче́нія, тѣ́мже, возше́дъ на высоту́ добродѣ́телей, возведи́ и на́съ на го́ру боже́ственнаго ра́зума.

Сла́ва, гла́съ то́йже:

Ми́лостынею на земли́ стяжа́лъ еси́ небе́сная, терпѣ́ніемъ же и смире́ніемъ дости́глъ еси́ высо́кая, ны́нѣ же неизрече́ннымъ свѣ́томъ сія́я, просвѣти́ и на́ша помышле́нія.

И ны́нѣ, богоро́диченъ, гла́съ то́йже:

Пречи́стѣи ру́цѣ Твои́, Дѣ́во Ма́ти, просте́рши, покры́й ны́, на Тя́ упова́ющія и Сы́ну Твоему́ зову́щія: всѣ́мъ пода́ждь, Христе́, ми́лости Твоя́.

Аще ли суббо́та, кромѣ́ пе́рвыя недѣ́ли поста́:
По 1-й каѳи́смѣ сѣда́ленъ: Укрѣпля́емь си́лою свы́ше.., два́жды.
Сла́ва, и ны́нѣ, богоро́диченъ, гла́съ 4:

Прему́дрость и Сло́во Отчее несказа́нно ро́ждшая, души́ моея́ лю́тую уврачу́й я́зву и се́рдца болѣ́знь укроти́.

По 2-й каѳи́смѣ сѣда́ленъ: Ми́лостынею на земли́.., два́жды.
Сла́ва, и ны́нѣ, богоро́диченъ, гла́съ то́йже: Пречи́стѣи ру́цѣ Твои́...

Поліеле́й.

Велича́ніе: Ублажа́емъ тя́, преподо́бне о́тче Ѳеокти́сте, и чте́мъ святу́ю па́мять твою́, соприча́стниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́...

По поліеле́и сѣда́ленъ, гла́съ 5:

Нескве́рненъ хра́мъ Тро́ицы содѣ́лалъ еси́ се́рдце и ду́шу свою́, хра́мы же свяще́нныя Го́споду въ хвалу́ созда́лъ еси́, си́лою же Боже́ственною истреби́лъ еси́ собо́рище ересе́й, упражня́я си́хъ губи́тельное зломы́сліе. [Два́жды.]

Сла́ва, и ны́нѣ, богоро́диченъ, гла́съ то́йже:

Хра́мъ яви́лася еси́ Емману́ила и две́рь, е́юже Еди́нъ вни́де и изы́де, я́коже Са́мъ вѣ́сть, Того́ моли́, Богора́дованная, отъ рабо́ты грѣхо́вныя изба́вити вся́, при́сно блажа́щія Тя́ вѣ́рно.

Степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Та́же: Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Высо́къ благоро́діемъ, изя́щенъ благоду́шіемъ, ра́зума му́дростію и чистото́ю сія́я, свѣ́тлымъ смире́ніемъ и благоче́стіемъ себе́ украси́лъ еси́ и всѣ́хъ удиви́лъ еси́, Ѳеокти́сте богоблаже́нне.

Кано́нъ, его́же краегране́сіе: Преподо́бнаго пою́ Ѳеокти́ста. Въ богоро́дичнахъ же и въ сѣда́льнѣ: Про́та Ми́рко. Гла́съ 7.

Пѣ́снь 1.

Ирмо́съ: Отъ стру́й Чермна́го стѣ́ну сотво́ршему лю́демъ и покры́вшему глубино́ю фарао́на со всево́инствомъ, пои́мъ Го́сподеви, сла́вно бо просла́вися.

Преподо́бнаго Ѳеокти́ста, уго́дника Твоего́, пѣ́ти отве́рзи ми́, Христе́, устнѣ́ и разори́ о́блакъ невѣ́дѣнія моего́.

Разу́мно въ коне́цъ уклони́вся бѣсо́вскія тмы́ и мглы́ страсте́й, сочета́лся еси́ ли́ку мона́шествующихъ, соверши́въ тече́ніе твоего́ му́жества.

Ему́же служи́лъ еси́, Христу́, моли́ся вы́ну, да изба́витъ отъ зла́ и просвѣти́тъ вся́, пою́щія тя́.

Богоро́диченъ: Превы́шшую херуви́мъ, высоча́йшу небе́съ, лу́чшую тва́ри, му́дрыхъ му́чениковъ огражде́ніе, еди́ну Богоро́дицу пѣ́сньми почти́мъ.

Пѣ́снь 3.

Ирмо́съ: На вода́хъ зе́млю основа́вый, Сло́ве, Христе́ Бо́же, и на́ша сердца́ сла́вити Тя́ утверди́.

Пронза́емь жела́ніемъ чистоты́, ца́рское владѣ́ніе премѣни́лъ еси́, возлюби́въ па́че сладча́йшее а́нгельское подо́біе.

Оте́честву своему́ вѣ́ренъ блюсти́тель бы́лъ еси́, отгоня́я отъ него́ вся́ ересе́й па́губная уче́нія.

Достохва́льне Ѳеокти́сте блаже́нне, моли́ Христа́ Бо́га исцѣле́ніе и спасе́ніе да́ти всѣ́мъ, съ вѣ́рою къ тебѣ́ притека́ющимъ и въ по́мощь тя́ призыва́ющимъ.

Богоро́диченъ: Родила́ еси́ безъ сѣ́мене Бо́га Спа́са и пребыла́ еси́ па́ки Дѣ́ва, — стра́нно чу́до! Тѣ́мъ Тя́, Ма́терь Емману́илеву, благоче́стно исповѣ́дуемъ.

Сѣда́ленъ, гла́съ 2:

Образъ бы́въ и́стиннаго покая́нія и смире́нія, совокупи́лся еси́ ли́ку преподо́бныхъ оте́цъ, съ ни́миже помина́й, мо́лимъ тя́, и на́съ, и вся́ пою́щія и хва́лящія тя́. [Два́жды.]

Сла́ва, и ны́нѣ, богоро́диченъ, гла́съ то́йже:

Ты́ же́нское поползнове́ніе испра́вила еси́, ро́ждши Сло́ва Христа́, исправля́юща низве́рженныя, и вѣ́рныхъ утвержде́ніе Ты́ еси́, мы́ же наде́ждею Твое́ю крѣпи́мся и любо́вію Тя́ непреста́нно сла́вимъ.

Пѣ́снь 4.

Ирмо́съ: Услы́шахъ слу́хъ Тво́й, Го́споди, я́ко яви́лся еси́ на земли́, за е́же спасти́ ны, тѣ́мъ вопіе́мъ: сла́ва си́лѣ Твое́й, Го́споди.

Отче Ѳеокти́сте приснопа́мятне, не преста́й прилѣ́жно моли́ти о на́съ, да изба́вимся отъ вся́кія ско́рби твои́ми моли́твами.

Боголѣ́пно сконча́въ житіе́ твое́ на земли́, воспріи́мъ а́нгельское подо́біе, женѣ́ же и сы́ну своему́ Владисла́ву совѣ́товалъ еси́ разу́мно жи́ти и оте́чество блюсти́.

Неподви́жима и крѣ́пка тя́ столпа́ вѣ́дуще, се́ дне́сь, вси́ лю́діе, му́жи и же́ны, ста́рцы со младе́нцы, вся́къ во́зрастъ и вся́ко состоя́ніе, свѣ́тло тя́ пра́зднуемъ.

Богоро́диченъ: Апо́столовъ ра́дость, преподо́бныхъ же удобре́ніе Тя́, Богоро́дице, мо́лимъ вѣ́рно: ра́дости вѣ́чныя сподо́би ны́, пою́щія Тя́ непреста́нно.

Пѣ́снь 5.

Ирмо́съ: Утренюетъ ду́хъ мо́й къ Тебѣ́, Бо́же, зане́ Свѣ́тъ еси́, и Твоя́ повелѣ́нія бы́ша исцѣле́нія рабо́мъ Твои́мъ, Человѣколю́бче.

Аще и во бра́цѣ бы́лъ еси́, но благослове́нное цѣлому́дріе соблю́лъ еси́, отбѣга́въ сла́дости привре́менныя.

Глаго́лъ Бо́жій нося́ въ се́рдцы свое́мъ, и́мже жи́лъ еси́, и́мже и благосла́вно тече́ніе преподо́бно сконча́лъ еси́.

Огня́, и му́ки, и вся́каго искуше́нія изба́ви мольба́ми твои́ми вся́, свѣтоно́сную па́мять твою́ соверша́ющія и благоче́стно тя́ блажа́щія.

Богоро́диченъ: Мно́гими бѣда́ми содержи́маго и молво́ю грѣха́ бѣ́дствуемаго, наста́ви мя́ къ безво́лненному стремле́нію тишины́ ду́ха, Ты́ бо еси́ приста́нище христіа́нъ, тѣ́мъ Тя́ пое́мъ во вся́ вѣ́ки.

Пѣ́снь 6.

Ирмо́съ: Возопи́хъ, Го́споди, внегда́ скорбѣ́ти ми́ къ Тебѣ́, углѣбо́хъ бо въ тимѣ́ніи глубины́ прегрѣше́ній мно́гихъ, и, я́влься, возведи́ мя отъ тли́.

Па́мять твоя́ возсія́ на́мъ дне́сь, свѣ́томъ невеще́ственнымъ просвѣща́ющая сердца́ на́ша, моле́бно тя́ вѣ́рою восхваля́ющихъ.

Отце́въ преподо́бныхъ ли́ку сопричасти́вся, сконча́лъ еси́ ми́рно житіе́ свое́, тѣ́мъ ны́нѣ съ ни́ми на небесѣ́хъ сликовству́еши.

Юностныя преступле́нія и́стиннымъ покая́ніемъ упраздни́лъ еси́, слеза́ми же ду́шу очи́стивъ, преподо́бно усну́лъ еси́.

Богоро́диченъ: Изба́ви мя́ вся́каго сопроти́внаго прило́га зміи́на, Ма́ти Дѣ́во Чи́стая, и се́рдце мое́ просвѣти́ вѣ́рою Тя́ сла́вящаго, Всенепоро́чную.

Конда́къ, гла́съ 7:

Вѣ́рою и́стинною укра́шенъ бы́въ, просія́лъ еси́ добродѣ́тельми, хра́мы и оби́тели ще́дро помога́лъ еси́, богоми́ловъ же душетли́тельную е́ресь искорени́лъ еси́, сего́ ра́ди вопіе́мъ ти́: [преподо́бне] Ѳеокти́сте, блаже́нне, со всѣ́ми преподо́бными предстоя́ Христу́, моли́ся о всѣ́хъ на́съ.

Икосъ:

Зако́нъ Бо́жій отъ души́ возлюби́въ, зрѣ́лъ еси́ къ жи́зни гряду́щей, сосу́дъ бы́лъ еси́ добродѣ́тели, о че́сти земнѣ́й и сла́сти небре́гъ, пло́ть же свою́, я́коже рабы́ню, ду́ху покори́лъ еси́, отста́вивъ тлѣ́ную и мимотеку́щую сла́ву, воспрія́лъ еси́ ца́рство нетлѣ́нное, сего́ ра́ди вопіе́мъ ти́: преподо́бне Ѳеокти́сте, блаже́нне, со всѣ́ми преподо́бными предстоя́ Христу́, моли́ся о всѣ́хъ на́съ.

Пѣ́снь 7.

Ирмо́съ: Ангеломъ о́троки въ пещи́ спасы́й и пла́мень въ ро́су и́мъ преложи́вый, благослове́нъ еси́, Го́споди, Бо́же оте́цъ на́шихъ.

Ѳиміа́мъ благоуха́ненъ ты́ еси́, отгоня́яй злосмра́діе е́реси богоми́льскія, тя́ велича́емъ и прилѣ́жно мо́лимъ: при́зри и ны́нѣ на лю́ди вопію́щія: благослове́нъ еси́, Го́споди, Бо́же оте́цъ на́шихъ.

Единонра́венъ преподо́бнымъ яви́лся еси́, не пощадѣ́въ пло́ти своея́ любве́ ра́ди боже́ственныя, ны́нѣ же моли́ся за ны́, пѣснопою́щія: благослове́нъ еси́, Го́споди, Бо́же оте́цъ на́шихъ.

Одръ имѣ́лъ еси́ гро́бъ, ка́меніемъ и те́рніемъ по́стланый, изнуря́я пло́ть свою́ любве́ ра́ди Бо́жія, душе́ю же всегда́ взыва́лъ еси́: благослове́нъ еси́, Го́споди, Бо́же оте́цъ на́шихъ.

Богоро́диченъ: Ро́ждшая Жи́знь, умертви́вшую сме́рть, живу́щій мо́й грѣ́хъ умертви́, Дѣ́во Ма́ти Пречи́стая, да вы́ну Тя́ вси́ велича́емъ.

Пѣ́снь 8.

Ирмо́съ: Пе́щь, дре́вле огне́мъ опаля́емую, благочести́віи попра́ша о́троцы, не бо́ стра́ху мучи́телеву покори́шася, но, любо́вію же па́че благоче́стія пали́ми, глаго́лаху: благослови́те, вся́ дѣла́ Госпо́дня, Го́спода.

Ко́ль вели́ко отечестволю́біе твое́, вѣ́мы вси́, и́бо пре́жде сме́рти свое́й женѣ́ и сы́ну Владисла́ву глаго́лалъ еси́: разу́мно жи́ти и оте́чество блюсти́, сла́ву же Бо́гу возноси́ти, вопію́ще: благослови́те, вся́ дѣла́ Госпо́дня, Го́спода.

Ты́ еси́ вели́чіе на́ше и похвала́, богому́дре Ѳеокти́сте, отъ скве́рны богоми́льскія тобо́ю свободи́хомся и научи́хомся пѣ́ти: благослови́те, вся́ дѣла́ Госпо́дня, Го́спода.

Іа́списъ ду́хомъ бы́лъ еси́, просіява́ющій мно́гими добродѣ́тельми, ны́нѣ же на небесѣ́хъ непреста́нно вопіе́ши: благослови́те, вся́ дѣла́ Госпо́дня, Го́спода.

Богоро́диченъ: Красну́ и избра́нну всечи́стую разумѣ́въ Тя́ Сы́нъ Бо́жій, Всенепоро́чная, Сы́нъ Тво́й бы́сть, сы́ны сотвори́ благода́тію, Богоро́дицу Тя́ чту́щія.

Пѣ́снь 9.

Ирмо́съ: Воплоще́ннаго Сло́ва безсѣ́менно отъ Тебе́ боголѣ́пно родила́ еси́, Дѣ́во Богоро́дице, и Тя́ велича́емъ.

Сто́лпъ добродѣ́телей яви́лся еси́, та́йно подвиза́яся и ко всѣ́мъ милосе́рдствуя, помина́й на́съ, твоя́ пѣвцы́, да тя́ непреста́нно велича́емъ.

Тво́й свѣ́тлый пра́здникъ соверша́юще, мо́лимъ тя́, преподо́бне: моли́ся Христу́ Бо́гу, оте́чество твое́ сохрани́ти и ми́ръ дарова́ти ро́ду се́рбскому, да тя́ всегда́ велича́емъ.

Ангели дне́сь сликовству́ютъ съ на́ми, въ пѣснопѣ́ніи па́мяти твое́й, ты́ же не забу́ди на́съ, но твои́ми моле́ніи отъ напа́стей, бѣ́дъ и скорбе́й спаси́ на́съ, да тя́ вси́ велича́емъ.

Богоро́диченъ: Ору́жіе на́ше и стѣна́ Ты́ еси́, Богоро́дице, и заступле́ніе къ Тебѣ́ прибѣга́ющимъ, Тебе́ и ны́нѣ на моли́тву подвиза́емъ, изба́ви на́съ отъ вра́гъ на́шихъ, да Тя́ вси́ велича́емъ.

Свѣти́ленъ:

Свы́ше озаря́емъ Боже́ственнымъ свѣ́томъ, просія́лъ еси́ добродѣ́тельми, еще́ въ мíрѣ бы́въ, мона́шески подвиза́лся еси́, напослѣ́докъ воспріи́мъ а́нгельскій о́бразъ, къ Свѣ́ту невече́рнему преше́лъ еси́.

Сла́ва, и ны́нѣ, богоро́диченъ:

Свѣ́тъ ро́ждшая, Чи́стая, просвѣти́ о́чи души́ моея́, да не пости́гнетъ мя́ глубоча́йшая тма́ грѣхо́вная, ниже́ глубина́ отча́янія да покры́етъ мя́, но спаси́ мя и окорми́ ко приста́нищу боже́ственнаго хотѣ́нія.

На хвали́техъ стихи́ры на 4, гла́съ 4:

Аще и владѣ́тель бы́лъ еси́, но покая́ніе па́че всѣ́хъ возлюби́лъ еси́, и́мже и безстра́стіемъ житіе́ свое́ украша́лъ еси́, добродѣ́тельми же просія́въ, богоблаже́нне Ѳеокти́сте, благоче́стно черто́гъ измѣни́лъ еси́. Тѣ́мже у престо́ла Всецаря́ предстоя́, не преста́й моля́ся за ве́сь ро́дъ сво́й.

Аще и владѣ́тель бы́лъ еси́, но тѣ́снымъ путе́мъ ходи́ти возжелѣ́лъ еси́, во́лею черто́гъ гро́бомъ измѣни́лъ еси́, ктому́ же о́стрымъ ка́меніемъ и те́рніемъ по́стланымъ, и, та́ко та́йно подвиза́яся, богому́дре Ѳеокти́сте, въ нетлѣ́нія приста́нище я́вѣ дости́глъ еси́.

Пріиди́те, лю́діе, ублажи́мъ Ѳеокти́ста богоизбра́ннаго, покая́ніемъ себе́ очи́стившаго и самаго́ себе́ Бо́гу возложи́вшаго, черто́гъ, и́же на земли́, небе́снымъ премѣни́вшаго, и́бо со сожи́тельницею свое́ю вя́щше не́жели два́десятъ лѣ́тъ, чи́сто и свя́то пожи́вшаго, я́коже со сестро́ю, и возопіи́мъ ему́: не преста́й моля́ся за ны́, о́тче преподо́бне.

Воспои́мъ дне́сь Ѳеокти́ста блаже́ннаго, и́стиннымъ покая́ніемъ ю́ностныя преступле́нія упраздни́вшаго и слеза́ми ду́шу очи́стившаго, добродѣ́тельми просія́вшаго, богоми́ловъ же душетлѣ́нную е́ресь искорени́вшаго, и помо́лимся ему́: богоблаже́нне о́тче, моли́ся со всѣ́ми преподо́бными о спасе́ніи ду́шъ на́шихъ.

Сла́ва, гла́съ 6:

Торжеству́й дне́сь ве́село, вся́ земле́ Се́рбская, лику́й и весели́ся, Це́рковь Бо́жія, пра́зднующи па́мять Ѳеокти́ста богому́драго, пѣ́ньми и пѣ́сньми духо́вными восхваля́юще его́ и вопію́ще: не забу́ди ро́дъ сво́й на земли́, о́тче преподо́бне, но при́сно моли́ Христа́ Бо́га, во е́же спасти́ всѣ́хъ на́съ.

И ны́нѣ, богоро́диченъ, гла́съ то́йже:

Испроси́ на́мъ долго́въ разрѣше́ніе и житія́ исправле́ніе, славосло́вящимъ вели́чія Твоя́, Благослове́нная Ма́ти Бо́жія, и благочести́вымъ ра́зумомъ Тя́ сла́вящимъ.

На стихо́внѣ въ тріо́ди, самогла́сенъ, два́жды, и му́чениченъ.
Сла́ва, свята́го, гла́съ 5, самогла́сенъ:

Соверши́въ до́брѣ тече́ніе, получи́лъ еси́ ко Христу́ восхожде́ніе, и́бо, зако́нъ Бо́жій отъ души́ возлюби́въ, зрѣ́лъ еси́ вы́ну къ жи́зни гряду́щей, тѣ́мже, соше́дшеся въ па́мять твою́, велича́емъ Христа́ Бо́га на́шего, прославля́ющаго уго́дники Своя́.

И ны́нѣ, богоро́диченъ, гла́съ то́йже:

Еди́на, укра́сившая человѣ́чество рождество́мъ Твои́мъ, Прекра́снѣйшая, еди́на бо родила́ еси́ Творца́ всѣ́хъ, изба́ви на́съ отъ сѣ́ти льсти́ваго врага́ и поста́ви на́съ на ка́мени Христо́выхъ хотѣ́ній, Того́ моля́щи прилѣ́жно ми́ръ да́ти на́мъ, и спасе́ніе, и ве́лію ми́лость.

Та́же: Трисвято́е, тропа́рь, ектенія́ и три́ покло́ны вели́кія, ча́съ 1-й съ каѳи́смою и отпустъ.
Аще ли суббо́та, на стихо́внѣ не пое́мъ, но пое́мъ славосло́віе вели́кое.



НА ЛИТУРГІИ,

Аще суббо́та: блаже́нна преподо́бного, пѣ́снь 3-я и 6-я, и про́чая слу́жба преподо́бническая: [Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́, ро́дъ пра́выхъ благослови́тся. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Србљак. — Београд: Издаjе Свети Архиjереjски Синод Српске Православне Цркве, 1986. — С. 122-129.

/ Къ оглавленію раздѣла /


Наверхъ / Къ титульной страницѣ

0