Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 12-й де́нь.
Слу́жба и́же во святы́хъ отцу́ на́шему Григо́рію Двоесло́ву, па́пѣ Ри́мскому.

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры, гла́съ 4:

Нра́вы благи́ми украси́лся еси́, дѣ́вство и нищету́ цѣлова́въ, имѣ́ній твои́хъ Христа́ ра́ди не пощади́въ, и до́мъ сво́й во оби́тель претвори́лъ еси́, сподо́бился еси́ прія́ти сугу́бую благода́ть святи́тельства, и ны́нѣ ра́дуяся въ небе́сныхъ оби́телѣхъ, помоли́ся о на́съ, іера́рше Григо́ріе, чту́щихъ святу́ю па́мять твою́. [Два́жды.]

Вся́ во Христѣ́ стяжа́лъ еси́, и чистоту́ душе́вную, и милосе́рдіе къ убо́гимъ не изрече́нное, со а́нгелы бесѣ́довалъ еси́, и Христа́ прія́ти сподо́бился еси́, отъ Него́ же дара́ми чудотворе́ній обогати́лся еси́, въ мíрѣ житіе́мъ равноа́нгельнымъ просія́въ, и во свѣ́тлости святы́хъ лику́я, моли́ся о на́съ, святи́телю Григо́ріе, спасти́ся душа́мъ на́шимъ. [Два́жды.]

Наслѣ́дникъ престо́ла Петро́ва отъ Самаго́ Го́спода наре́клся еси́, Григо́ріе, и того́ нра́вы воспріи́мъ, всего́ себе́ Христу́ повину́въ, въ поще́ніихъ изря́дно пребыва́я, ми́лостыню благосе́рдно творя́, а́нгельское во́инство возвесели́лъ еси́, съ ни́мъ же еще́ въ тѣлеси́ сы́й непреста́нно пребыва́я, ны́нѣ же созерца́яй Святу́ю Тро́ицу и пѣснопѣ́ніе принося́, моли́ся о на́съ, ублажа́ющихъ тя́, свя́те Григо́ріе. [Два́жды.]

Сла́ва, гла́съ 8:

Чу́дное твое́ милосе́рдіе кто́ исповѣ́сть, о́тче преблаже́нне Григо́ріе? Егда́ а́нгелу Бо́жію во о́бразѣ навкли́ра, прише́дшему къ тебѣ́, ми́лостыню три́жды пода́лъ еси́, сего́ ра́ди Госпо́дь, ви́дя твое́ кра́йнее къ ни́щимъ и вдови́цамъ милосе́рдіе, первопресто́льника святы́я Своея́ Це́ркве, за ню́ же излія́ кро́вь Свою́, и наслѣ́дника свята́го верхо́внаго апо́стола Петра́, тя́ нарече́, его́ же добродѣ́тели стяжа́лъ еси́, и съ ни́мъ вку́пѣ водворя́яся во оби́телѣхъ нерукотворе́нныхъ, помоли́ся о на́съ, свя́те іера́рше Григо́ріе, соверша́ющихъ всера́достную и приснопа́мятную па́мять твою́.

И ны́нѣ, гла́съ то́йже:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Та́же вхо́дъ. Проки́менъ дне́. Чте́нія святи́тельскія.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На стихо́внѣ стихи́ры, гла́съ 1:

Что́ тя́ нарече́мъ, Григо́ріе? Милосе́рдія ли исто́чникъ, я́ко не иму́щимъ и бѣ́днымъ яви́лся еси́ благотвори́тель, и въ ну́ждахъ ско́рый помо́щникъ, сего́ ра́ди и въ ли́цѣ святы́хъ жи́ти сподо́бился еси́. Моли́ся о душа́хъ на́шихъ.

Сти́хъ: Уста́ моя́ возглаго́лютъ прему́дрость, [и поуче́ніе се́рдца моего́ ра́зумъ].

Что́ тя́ возымену́емъ, сла́вне? Кро́тостію бо украси́лся еси́, я́ко мно́жицею на трапе́зѣ посажда́я стра́нныхъ и ни́щихъ, са́мъ служи́тель и́мъ показа́лся еси́, тѣ́мже и сподо́бился еси́ наслѣ́дникъ бы́ти въ земли́ кро́ткихъ, и прише́лъ еси́ въ поко́й несконча́емый, въ Ца́рство небе́сное.

Сти́хъ: Уста́ пра́веднаго поуча́тся прему́дрости, и язы́къ его́ возглаго́летъ су́дъ.

Ве́сь богоно́сецъ показа́ся, Григо́ріе, язы́комъ у́бо боже́ственная явля́я, дѣ́ломъ же творя́ заповѣ́данная Спа́сомъ, и́ноческіе уста́вы преше́лъ еси́, имѣ́нія твоя́ Бо́гу предпосла́въ, чистоту́ и смире́ніе возлюби́въ, въ нерукотворе́нныхъ оби́телѣхъ всели́лся еси́, о́тче, во вѣ́ки.

Сла́ва, гла́съ 2:

Пра́вило вѣ́ры и о́бразъ кро́тости тя́ позна́хомъ, о́тче святи́телю Григо́ріе, и чистоты́ рачи́теля и столпа́ Правосла́вія, а́нгеломъ единонра́вна и моли́твенника о душа́хъ на́шихъ.

И ны́нѣ, гла́съ то́йже:

О, чудесе́ но́ваго, всѣ́хъ дре́внихъ чуде́съ! [Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша].

Тропа́рь, гла́съ 1:

Ми́лости и благоутро́бія сокро́вище, е́же всѣ́мъ отве́рзлъ еси́, правовѣ́рія учи́телю и архіере́овъ Боже́ственное удобре́ніе, о́тче святи́телю Григо́ріе, ни́щихъ бы́лъ еси́ засту́пникъ. Тѣ́мъ моли́ Христа́ Бо́га, спасти́ся душа́мъ на́шимъ.

Сла́ва, и ны́нѣ:

Гавріи́лу вѣща́вшу Тебѣ́, Дѣ́во, ра́дуйся, [со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ].


НА УТРЕНИ,
[На Бо́гъ Госпо́дь: Тропа́рь святи́теля, два́жды. Сла́ва, и ны́нѣ, богоро́диченъ.]

По 1-й стихоло́гіи сѣда́ленъ, гла́съ 2:

Духо́вную му́дрость стяжа́лъ еси́, о́тче Григо́ріе, я́же принесе́ тебѣ́ пло́дъ воздержа́нія и кра́йняго милосе́рдія, и́мже угоди́въ Го́споду, наслѣ́довалъ еси́ ца́рство Христо́во, идѣ́же и на́съ не забу́ди, да изба́вимся тлѣ́нія и искуше́ній, чту́щіи па́мять твою́ вѣ́рно. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

По 2-й стихоло́гіи сѣда́ленъ, гла́съ 8:

Прему́дрости во́ды поче́рплъ еси́ отъ неоскудѣ́емаго исто́чника — Христа́, источи́лъ еси́ правосла́вія рѣ́ки, любо́вію же и милосе́рдіемъ вѣ́рныхъ сердца́ возвесели́лъ еси́, сего́ ра́ди и Христо́съ просла́ви тя́ жи́ти въ ра́дости а́нгеловъ и святы́хъ, идѣ́же о на́съ моли́ся Христу́ Бо́гу прегрѣше́ній оставле́ніе дарова́ти, пра́зднующимъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

Благодари́мъ Тя́ при́сно, Богоро́дице, и велича́емъ, Чи́стая, и покланя́емся, воспѣва́юще Рождество́ Твое́, Благода́тная, вопію́ще непреста́нно: спаси́ на́съ, Дѣ́во Всеми́лостивая, я́ко Блага́я, и прило́га діа́вольскаго исхи́ти, да не посрами́мся въ ча́съ су́дный, раби́ Твои́.

Та́же поліеле́й, посе́мъ сѣда́ленъ, гла́съ 2:

Це́рковь прино́ситъ ти́, о́тче, хвале́бная пѣ́нія, я́ко сію́ до́брѣ упа́слъ еси́, ми́лостію же и нестяжа́ніемъ а́нгелы возвесели́лъ еси́, съ ни́ми же моли́ся о на́съ Го́споду, спасти́ся на́мъ. [Два́жды.]

И ны́нѣ, пра́здника, или́ богоро́диченъ:

Ма́терь Тя́ Бо́жію мо́лимъ вси́, Дѣ́ву вои́стинну и по рождествѣ́ я́вльшуюся, любо́вію прибѣга́ющіи къ Твое́й бла́гости: Тебе́ бо и́мамы, грѣ́шніи, Предста́тельницу, Тебе́ стяжа́хомъ въ напа́стехъ спасе́ніе, еди́ну Всенепоро́чную.

Та́же степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, [внуши́те, вси́ живу́щіи по вселе́ннѣй]. Вся́кое дыха́ніе... Ева́нгеліе отъ Іоа́нна, зача́ло [35 отъ полу́].

По 50-мъ псалмѣ́ стихи́ра, гла́съ 6:

На апо́стольстѣмъ престо́лѣ сѣ́дъ, преподо́бне, того́ и нра́вы украси́лся еси́, смире́ніемъ же высо́кая дости́гъ, къ го́рнему Сіо́ну преста́вился еси́, помоли́ся, святи́телю Григо́ріе, Спа́су Христу́, е́же умири́ти лю́ди и спаст́ся душа́мъ на́шимъ.

Кано́нъ [Богоро́дицы со ирмосо́мъ на 6 и святи́теля на 8], гла́съ 2.

Пѣ́снь 1.

Ирмо́съ: Гряди́те лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

До́браго ко́рене свяще́нная розга́ бы́лъ еси́, житіе́мъ, вѣ́рою и любо́вію процвѣ́лъ еси́, и наслѣ́дникъ небе́снаго ца́рствія яви́лся еси́.

Венце́мъ смире́нія, а́ки нѣ́коею дража́йшею у́тварію украси́лся еси́, вся́ мірска́я возненави́дѣвъ Христа́ ра́ди, и убо́гихъ возлюби́въ, Ца́рство небе́сное наслѣ́довалъ еси́.

Аще въ ю́ностнѣмъ тѣлеси́ у́мъ соверше́нъ стяжа́лъ еси́, бога́тство твое́ не на украше́ніе су́етное, но на созида́ніе оби́телей, и учрежде́ніе убо́гихъ и стра́нныхъ истощи́лъ еси́, тѣ́мъ и Христо́съ украси́ тя́ нетлѣ́ніемъ.

Богоро́диченъ: Кто́ досто́йно изочте́тъ вели́чія чуде́съ Твои́хъ, Богоблагода́тная, я́ко родила́ еси́ Еди́наго отъ Тро́ицы, Христа́ Бо́га на́шего, Его́же моли́ спасти́ся на́мъ.

Пѣ́снь 3.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Процвѣ́лъ еси́ Дави́дски, святи́телю, въ житіи́ твое́мъ, егда́ а́нгелу Бо́жію во о́бразѣ навкли́ра три́жды въ еди́нъ де́нь ми́лостыню пода́лъ еси́, и́же пребы́сть съ тобо́ю во вся́ дни́ живота́ твоего́.

Толи́каго ра́ди нестяжа́нія и кра́йняго къ убо́гимъ милосе́рдія, Госпо́дь нарече́ тя́ первопресто́льника Це́ркве Своея́, и намѣ́стника верхо́внаго Своего́ апо́стола Петра́, съ ни́мже моли́ся о на́съ, свя́те Григо́ріе.

Боже́ственнымъ озаря́емь свѣ́томъ, на престо́лѣ святи́тельстѣмъ сѣ́дъ, лю́ди благоразу́міемъ упа́слъ еси́, науча́я я́ правосла́внымъ догма́тамъ, Христу́ приве́лъ еси́. Но и на́съ не забу́ди, святи́телю, присѣща́я святы́ми твои́ми моли́твами.

Богоро́диченъ: Безсѣ́менно во чре́вѣ Бо́га зачала́ еси́, и ражда́еши несказа́нно воплоще́нна, на Него́же зрѣ́ти не смѣ́ютъ, Чи́стая, небе́сныя си́лы, Приснодѣ́во.

Сѣда́ленъ, гла́съ 6:

Аще у́бо Дави́дъ глаго́летъ: блаже́нъ разумѣва́яй на ни́ща и убо́га; то кольми́ па́че блаже́нъ еси́ ты́, святи́телю Григо́ріе, я́ко убо́гимъ и стра́ннымъ имѣ́ніе твое́ расточи́лъ еси́, того́ ра́ди а́нгелы и Самаго́ Христа́ Го́спода прія́ти и на трапе́зѣ твое́й учреди́ти сподо́бился еси́, но помина́й на́съ, мо́лимъ тя́, во святы́хъ твои́хъ моли́твахъ, и́хже досто́йно ны́нѣ прино́сиши Го́споду. [Два́жды.]

Сла́ва, и ны́нѣ, богоро́диченъ:

Не́бо небеси́ не довлѣ́етъ Тебѣ́, Влады́ко, но на́съ ра́ди обнища́въ всели́лся еси́ во утро́бу смиренному́дрыя Твоея́ Ма́тере, Ея́ же мольбы́ пріими́ о на́съ, Го́споди, и поми́луй ны́.

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Кра́йнимъ милосе́рдіемъ, свя́те, стяжа́лъ еси́ некра́домое бога́тство, я́ко не су́щу ти́ еще́ во святи́тельствѣ, мно́гая во оби́тели твое́й чудеса́ содѣ́лалъ еси́.

Бо́жіимъ нарече́ніемъ избра́нъ бы́лъ еси́ па́пою, но скры́лся еси́ въ пусты́нныя мѣста́, убѣга́я то́ль высо́каго са́на и почита́нія человѣ́ческаго, Бо́жіимъ же про́мысломъ показа́ся то́ мѣ́сто, на не́мъ же бы́лъ еси́ въ столпѣ́ о́гненнѣ.

Егда́ Бо́жіимъ изволе́ніемъ прія́лъ еси́ святи́тельскій са́нъ, усугу́билъ еси́ попече́ніе о ни́щихъ и убо́гихъ, его́же да стяжи́мъ и мы́, помоли́ся о на́съ ко Го́споду.

Богоро́диченъ: Мо́лимъ Тя́, Чи́стая, Яже Бо́га безсѣ́менно заче́нши, при́сно моли́ти за рабы́ Твоя́.

Пѣ́снь 5.

Ирмо́съ: Свѣ́та Пода́телю, и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Восше́дъ на апо́стольскій престо́лъ, я́ко свѣти́льникъ возсія́лъ еси́, свя́те Григо́ріе, уче́ніи я́же о Святѣ́й Тро́ицѣ, Ейже ны́нѣ моли́ся о чту́щихъ тя́.

Не та́ко благоро́дствомъ по пло́ти, я́коже смире́ніемъ и милосе́рдіемъ просія́лъ еси́, отону́дуже и даро́въ невѣще́ственныхъ сподо́бился еси́.

Ца́рства Христо́ва наслѣ́дникъ потща́лся еси́ бы́ти, зла́та и сребра́ не пощади́лъ еси́ убо́гихъ ра́ди, и сего́ ра́ди воспріе́млеши отъ Христа́ стокра́тное мздовоздая́ніе.

Богоро́диченъ: Несказа́нно зача́тіе и не пости́женъ е́сть о́бразъ рожде́нія, Бо́га бо пло́тію родила́ еси́, и на рука́хъ Твои́хъ носи́ла, Ма́ти Дѣ́во Пресвята́я, Его́же моли́ о воспѣва́ющихъ Тя́.

Пѣ́снь 6.

Ирмо́съ: Бе́здна мя́ мно́га грѣхо́вная окружа́етъ, и вопію́ Ти, проро́ка подража́яй: отъ тли́ мя́, Го́споди, возведи́.

Бе́здну милосе́рдія, смире́нія ве́рхъ, и любве́ твоея́, свя́те Григо́ріе, кто́ исповѣ́сть, и́миже украси́лъ еси́ ду́шу твою́ для́ Ца́рства Христо́ва.

Любвеоби́льный исто́чникъ въ тебѣ́, о́тче показа́ся, егда́ не то́чію о приходя́щихъ къ тебѣ́ милосе́рдовавъ, но и во Іерусали́мѣ страннопріи́мницу созда́лъ еси́, да упоко́ятся стра́нніи и ни́щіи.

Тща́ніе еди́но тебѣ́, о́тче, да не иму́щіи пребу́дутъ безбѣ́дны, сего́ ра́ди въ го́ру Сина́йскую, по вся́ лѣ́та живота́ твоего́, мно́гую на препита́ніе и́нокомъ ми́лостыню посыла́лъ еси́.

Богоро́диченъ: Бе́здну милосе́рдія и неисчерпа́емый исто́чникъ бла́гости, позна́хомъ Тя́, Богома́ти Дѣ́во Влады́чице, тѣ́мъ Тя́ велича́емъ.

Конда́къ, гла́съ 2:

Яко Петро́ва престо́ла намѣ́стника, столпа́ Правосла́вія и милосе́рдія исто́чникъ, святи́теля Григо́рія, вѣ́рніи вси́ восхва́лимъ, то́й у́бо язы́комъ вѣща́я, дѣ́ломъ же соверша́я Спа́сова глаго́ланія, сего́ ра́ди и просла́вился еси́, я́ко боже́ственный таи́нникъ Бо́жія благода́ти.

Икосъ:

Не то́чію е́же стяжа́ти, но и своя́ имѣ́нія со усе́рдіемъ истощи́лъ еси́ на созида́ніе оби́телей и дово́льствуя стра́нныхъ и ни́щихъ, тѣ́мъ Христо́съ па́стыря и намѣ́стника Петро́ва престо́ла устроя́етъ тя́, его́же нра́вы украси́лся еси́, и просла́вился еси́, я́ко боже́ственный таи́нникъ Бо́жія благода́ти.

Пѣ́снь 7.

Ирмо́съ: Образу злато́му, на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси́, Бо́же оте́цъ на́шихъ.

Жену́, усумнѣ́вшуюся о пречи́стыхъ та́йнахъ Христо́выхъ, увѣ́рилъ еси́, претвори́въ хлѣ́бъ въ ви́дъ са́маго и́стаго тѣ́ла человѣ́ческаго, и па́ки претвори́въ е́ въ хлѣ́бъ.

Житіе́мъ равноа́нгельнымъ и ди́вными чудесы́ Це́рковь Христо́ву украси́лъ еси́, тѣ́мъ лю́діе взыва́ху о тебѣ́: благослове́нъ Бо́гъ оте́цъ на́шихъ.

Ду́хъ Святы́й въ ви́дѣ голуби́нѣ пока́зовашеся надъ тобо́ю, егда́, о́тче, писа́лъ еси́ боговдохнове́нныя твоя́ бесѣ́ды, и́хже съ любо́вію наслажда́ющеся, взыва́емъ: благослове́нъ Бо́гъ оте́цъ на́шихъ.

Богоро́диченъ: Вся́кій ро́дъ и во́зрастъ чти́мъ Тебе́, Богороди́тельнице, и непреста́нно пое́мъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Неизрече́нною му́дростію соста́вльшаго вся́ческая Бо́га Сло́ва и отъ не су́щихъ во е́же бы́ти приве́дшаго, благослови́те, дѣла́, я́ко Го́спода, и превозноси́те во вся́ вѣ́ки.

Бесѣ́ды твоя́ во умиле́ніе, святи́телю, приво́дятъ чту́щихъ я́, я́коже бо рѣка́ вели́кая очища́етъ ае́ръ, та́ко и сíи отго́нятъ злосмра́діе отъ ду́шъ на́шихъ, при́сно взыва́ющихъ: Го́спода по́йте и превозноси́те во вся́ вѣ́ки.

Не то́чію препода́лъ еси́ Це́рквѣ Христо́вѣ исправле́нія, о́тче Григо́ріе, но и Литургíю Преждеосвяще́нныхъ, Ду́хомъ Бо́жіимъ наставля́емь, соста́вилъ еси́, ю́же свята́я Це́рковь соверша́я по вся́ Четыредеся́тницы, во умиле́ніи взыва́етъ: Го́спода по́йте и превозноси́те во вся́ вѣ́ки.

Собра́лъ еси́ сказа́нія житíй святы́хъ во Италíйстѣй странѣ́ богоуго́дно пожи́вшихъ и поуче́нія душеспаси́тельная, и са́мъ сподо́бился еси́ впи́санъ бы́ти въ кни́гу живота́, тѣ́мъ взыва́еши: Го́спода по́йте и превозноси́те во вся́ вѣ́ки.

Богоро́диченъ: Изъ Отца́ проше́дшаго пре́жде вѣ́къ безлѣ́тнаго Бо́га Сло́ва, и въ послѣ́дняя возсія́вша изъ Дѣ́вы, по́йте и превозноси́те во вся́ вѣ́ки.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Боже́ственныхъ твои́хъ слове́съ наслади́вшеся, Григо́ріе, въ твое́й па́мяти торжеству́юще, вопіе́мъ ти́: моли́ о на́съ Го́спода, да изба́вимся прегрѣше́ній.

Аще и тѣ́ломъ подвиза́лся еси́ на земли́, но со безпло́тными сподо́бился предста́ти Го́споду на небеси́, идѣ́же моли́ся о на́съ, свя́те Григо́ріе.

Ду́хомъ въ вы́шнемъ Сіо́нѣ живе́ши ны́нѣ и назира́еши свы́ше призыва́ющія тя́, святи́телю Григо́ріе, тѣ́мъ мо́лимъ тя́, испроси́ на́мъ у Христа́ очище́нія и ве́лія ми́лости.

Богоро́диченъ: Крѣ́посте моя́, Пречи́стая Богороди́тельнице, моли́ со всѣ́ми святы́ми изба́вити мя́ гее́нны и вѣ́чнаго осужде́нія.

Свѣти́ленъ:

Тро́ичнымъ свѣ́томъ освѣща́емь, и во свѣ́тлости святы́хъ лику́я, о Григо́ріе му́дре! Пода́ждь и на́мъ благода́ть, да воспѣва́емъ непреста́нно Свѣ́та Невече́рняго — Отца́, Сы́на и Свята́го Ду́ха. [Два́жды.]

[Сла́ва, и ны́нѣ,] богоро́диченъ:

Предста́тельство Твое́ воспѣва́емъ, Богороди́тельнице, заступи́ на́съ отъ жите́йскихъ страсте́й прило́га и просвѣти́ на́съ свѣ́томъ Твои́мъ, Влады́чице.

На хвали́техъ стихи́ры, гла́съ 2:

Рѣ́ки источи́лъ, о́тче, воды́ жи́вы по глаго́лу Спа́сову, вѣ́рою и любо́вію украси́лся еси́, Ду́ха Свята́го мѵрополо́жница бы́лъ еси́, я́же бо усты́ вѣща́лъ еси́ во спасе́ніе, потща́лся еси́ вся́ соверши́ти дѣ́ломъ, и сего́ ра́ди ве́лій наре́клся еси́ въ Ца́рствіи Христо́вѣ. [Два́жды.]

Солнцеобра́зно просія́лъ еси́, святи́телю, на тве́рди церко́внѣй, стра́шную о́ну уразумѣ́въ сла́ву святы́хъ, ю́же добродѣ́тельми потща́лся еси́ наслѣ́дити, и ны́нѣ во дво́рѣхъ Госпо́днихъ живе́ши, моли́ся о душа́хъ на́шихъ.

Кто́ исповѣ́сть, о́тче, смире́ніе твое́? Или́ кто́ не просла́витъ кра́йняго милосе́рдія, е́же яви́лъ еси́ къ ни́щимъ и ста́ннымъ? Ими же а́нгельское во́инство возвесели́лъ еси́, съ ни́мъ же моли́ся Го́сподеви о душа́хъ на́шихъ.

Сла́ва, гла́съ 6:

Человѣ́че Бо́жій и вѣ́рный уго́дниче Христо́въ, строи́телю Того́ та́инъ и му́жу жела́ній духо́вныхъ, сто́лпе одушевле́нный и вдохнове́нный о́бразъ, я́ково втора́го Петра́ тя́ Ри́мская Це́рковь, чудя́щися, прія́ла е́сть, и моли́твенника о душа́хъ на́шихъ.

И ны́нѣ, гла́съ то́йже:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].


НА ЛИТУРГІИ,

Слу́жба святи́телемъ о́бща: [Блаже́нна, отъ кано́на святи́теля пѣ́снь 3 и 6. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Служба святому Григорію Двоеслову, папѣ Римскому. Составлена вологодскимъ помѣщикомъ Андреемъ Стефановичемъ Петровскимъ. — Рукопись изъ библіотеки святителя Филарета (Дроздова), митрополита Московскаго, 1855. — [10 л.]

/ Къ оглавленію раздѣла /


Наверхъ / Къ титульной страницѣ

0