Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 12-й де́нь.
Преподо́бнаго отца́ на́шего и исповѣ́дника Ѳеофа́на Сигріа́нскаго.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Отче богому́дре Ѳеофа́не,* изгна́нія го́рькая,* въ не́мощи пребыва́я,* терпѣли́вно претерпѣ́лъ еси́,* не пощадѣ́въ тѣлесе́ за честны́я ико́ны, всехва́льне,* я́ростію льво́въ заточа́емь,* и́мже руга́яся, совѣ́ты обуи́лъ еси́,* и помышле́нія су́щая суему́дрена,* и у́мъ па́губный.

Пои́стинѣ воздая́нія болѣ́зней твои́хъ* благи́хъ Да́тель бога́тно тебѣ́ дарова́,* отгоня́ти де́моны* и цѣли́ти неду́ги* пода́въ, всеблаже́нне, си́лу,* сподо́бивъ тя́ несказа́нныя ра́дости,* идѣ́же лику́ютъ а́нгельстіи чи́ни,* вы́ну лице́ зря́ще* Вседержи́теля.

Сла́ва, и ны́нѣ, богоро́диченъ, гла́съ и подо́бенъ то́йже:

Ра́дуйся, Свѣ́та Боже́ственнаго носи́ло,* свѣтлѣ́йшая звѣздо́ и сѣ́ни свяще́нія:* Свѣ́тъ на́мъ возсія́ изъ пречи́стыхъ чре́слъ Твои́хъ,* просвѣща́я мíра концы́* и освяща́я Свое́ю благода́тію;* ра́дуйся, нача́ло спасе́нія, Пречи́стая;* ра́дуйся, ужа́сное слы́шаніе и глаго́ланіе* надѣ́ющимся на Тя́.

Крестобогоро́диченъ, подо́бенъ то́йже:

Что́ зри́мое видѣ́ніе,* е́же мои́ма очи́ма ви́дится, о Влады́ко?* Содержа́й всю́ тва́рь,* на дре́во воздви́женъ бы́въ,* и умира́еши, всѣ́мъ дая́й жи́знь, —* Богоро́дица, пла́чущися, глаго́лаше,* егда́ узрѣ́ на Крестѣ́ возноси́ма* изъ Нея́ неизрече́нно возсія́вшаго* Бо́га и Человѣ́ка.

Тропа́рь, гла́съ 5: [1]

Воздержа́ніемъ житіе́ украси́въ и, у́ды умертви́въ, побѣди́лъ еси́ вра́жія ко́зни, о́тче Ѳеофа́не; преста́вился еси́ къ Бо́гу въ вѣ́чную жи́знь, я́ко досто́инъ прича́стникъ, моля́ся непреста́нно поми́ловати ду́ши на́ша.


[НА УТРЕНИ,]
Кано́нъ, его́же краегране́сіе: Ѳеофа́нъ пое́тъ тя́, Ѳеофа́на. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Бо́га, пло́тію я́вльшагося, стопа́мъ послѣ́довалъ еси́, благоче́стіемъ, о́тче, разже́гся, я́ко отсю́ду зва́ніе пріе́мъ, е́же пои́стиннѣ тезоиме́нно, я́ко промышле́ніемъ прообразова́ся.

Насла́ждся жела́ннѣйшимъ раче́ніемъ Влады́ки твоего́, пренебре́глъ еси́ любо́вь мірску́ю; сраствори́въ же ся Боже́ственнѣй любви́, жите́йскую красоту́ въ ничто́же вмѣни́лъ еси́, всеблаже́нне.

Устреми́вся звѣрови́дно, гоня́ше Ле́въ, томи́тель избра́нныя, не терпя́ зрѣ́ти почита́ему ико́ну Христо́ву, съ ни́миже и тя́, Ѳеофа́не, изгна́нію осуди́.

Богоро́диченъ: Две́рь, я́же къ на́мъ Твоего́, Го́споди, сни́тія, Восто́къ, и Со́лнце, и Свѣ́тъ та́инственно Тя́ нарица́емаго преесте́ственно облиста́, сугу́ба естество́мъ Богочеловѣ́ка.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Свѣ́та Боже́ственнаго испо́лненъ ви́дѣнъ бы́лъ еси́, Ѳеофа́не, любо́вію сраствори́вся Жела́емому, блаже́нне. Тѣ́мже твою́ сла́вную па́мять почита́емъ.

Отре́къ злочести́ваго Льва́ повелѣ́нія, преда́нія благоче́стно церко́вная удержа́лъ еси́. Тѣ́мже тя́ Христо́съ чудесы́ просла́ви.

Вжиля́емо наде́ждею и вѣ́рою, преподо́бне, твоея́ пло́ти неможе́ніе, душе́вною крѣ́постію утвержда́емь, Бо́гу присво́илъ еси́ тѣ́ло купнора́бное.

Богоро́диченъ: Созда́вый въ нача́лѣхъ отъ пе́рсти мя́, человѣ́ка, зи́ждется мене́ ра́ди во чре́вѣ Твое́мъ, Всенепоро́чная, дре́внее паде́ніе исправля́я.

Сѣда́ленъ, гла́съ 8. Подо́бенъ: Прему́дрости.

Рачи́тель любве́ Іису́совы бы́въ, отрази́лъ еси́ сла́сти и жите́йскій мяте́жъ, и, мона́шествовавъ, пожи́лъ еси́ на земли́, я́ко небе́сный а́нгелъ, и чуде́съ то́чиши дарова́нія, преподо́бне. Тѣ́мже во свѣтоно́снѣй и святѣ́й твое́й па́мяти вѣ́рно восхваля́емъ тя́ и согла́сно вопіе́мъ ти́: богоно́се Ѳеофа́не, моли́ Христа́ Бо́га прегрѣше́ній оставле́ніе дарова́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Небе́сное угото́вася жили́ще я́ко страда́льцу, тебѣ́, сла́вне: отъ земны́я бо, ра́дуяся, преложи́лся еси́ ски́ніи, вопія́ Влады́цѣ твоему́: сла́ва си́лѣ Твое́й, Го́споди.

Вѣнцено́сецъ, Ѳеофа́не, показа́лся еси́, честно́е бо изображе́ніе Христо́во, богоно́се блаже́нне, не отве́рглся еси́ чествова́ти. Тѣ́мъ и взыва́лъ еси́: сла́ва си́лѣ Твое́й, Го́споди.

Проти́вяся повелѣ́нію мучи́теля злочести́ваго, преподо́бный плотска́го неможе́нія отню́дъ небреже́, взыва́я Созда́вшему: сла́ва си́лѣ Твое́й, Го́споди.

Возвели́чился еси́ чудесы́, богоно́се, и́бо Христо́съ возмзди́ тя́ за терпѣ́ніе. Тѣ́мже исцѣле́нія то́чиши тре́бующимъ, я́коже отъ исто́чника, свяще́ннѣйше.

Богоро́диченъ: Превы́шши а́нгелъ показа́лася еси́, Еди́на: Совѣ́та бо Вели́каго Ангела родила́ еси́ — Сло́во, вся́ просвѣти́вшаго, вѣ́рою зову́щія: сла́ва си́лѣ Твое́й, Го́споди.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Сло́вомъ всеблагочести́вымъ правосла́вно проповѣ́да преподо́бный Ѳеофа́нъ вѣ́ры повелѣ́нія, ду́хомъ сія́я.

Бога́тство всеразли́чно богому́дреннѣ разда́лъ еси́ по повелѣ́нію Влады́ки, въ нищетѣ́ живу́щимъ послѣ́дуя, всехва́льне.

Имѣ́я твою́ ду́шу по о́бразу Созда́вшаго, пречи́стѣй Влады́чнѣй покланя́лся еси́ ико́нѣ, любо́вію облобыза́я.

Богоро́диченъ: Свѣ́та безлѣ́тнаго на́мъ, подъ лѣ́ты бы́вшаго, родила́ еси́, Богома́ти, су́щимъ во тмѣ́ житія́, и мíръ просвѣти́ла еси́.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Напра́ви къ добродѣ́тели житіе́ мое́, преподо́бне, поще́нія стезю́ моли́твами твои́ми, блаже́нне, углажда́я, по не́йже крѣ́пко правоше́ствовати мя́, о́тче, сподо́би.

Цѣлому́дренно твою́ жи́знь соверши́лъ еси́, преподо́бне, съ му́дростію, ю́же имѣ́лъ еси́, съ му́жествомъ же пра́вду, и кру́гомъ добродѣ́телей яви́лся еси́ украша́емь.

На благосла́віе му́ченическое вше́лъ еси́, Ѳеофа́не, Богома́тере Отрокови́цы и му́чениковъ, о́тче, ико́ны я́ко поче́лъ еси́, гони́телемъ сопротивля́яся.

Богоро́диченъ: Всю́ Тя освяти́ Сло́во Свято́е, во Твою́ всели́вся утро́бу освяще́нную неизрече́ннымъ сло́вомъ, Богоро́дице, Его́же моли́ спасти́ся рабо́мъ Твои́мъ.

Конда́къ, гла́съ 2. Подо́бенъ: Вы́шнихъ ища́.

Свы́ше пріе́мъ Боже́ственное открове́ніе, со тща́ніемъ изше́лъ еси́ отъ среды́ молвы́ жите́йскія, и уедини́вся, преподо́бне, чуде́съ прія́лъ еси́ дѣ́йство и проро́чества досто́инство, бога́тства и супру́жницы лиши́вся.

Икосъ:

На земли́ ничто́же предпоче́тъ, послѣ́довалъ еси́, ра́дуяся, зову́щему Христу́, и и́го Его́ прія́тъ на ра́мо твое́ усе́рдно, поко́й обрѣ́лъ еси́ въ души́ твое́й. Его́же и мнѣ́, ни́щему и уны́лому, низпосли́, глаго́лющему и ника́коже соверша́ющему, но еще́ упражня́ющемуся въ жите́йскихъ ве́щехъ и чудя́щемуся, ка́ко всѣ́хъ избѣжа́лъ еси́, сожи́тельницы и бога́тства лиши́вся?

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Еже по о́бразу стяжа́въ и по подо́бію, житіе́мъ пресвѣ́тлымъ, о́тче, пріи́мъ, обою́ду украси́лся еси́, благослове́нъ еси́ въ хра́мѣ, — вопія́, — сла́вы Твоея́, Го́споди.

Исповѣ́данія вѣнце́мъ, о́тче, украси́лся еси́, дѣ́ломъ обличи́лъ еси́ словеса́ злочести́выхъ, вѣ́рныя же извѣсти́лъ еси́, благослове́нъ еси́ въ хра́мѣ, — вопія́, — сла́вы Твоея́, Го́споди.

Ума́ твердѣ́йшимъ усе́рдіемъ тѣле́сныя, о́тче, болѣ́зни подъя́лъ еси́ терпѣли́вно, благода́рно Влады́цѣ твоему́ вопія́: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Яко Богоро́дицу и Цари́цу всея́ тва́ри, вси́ вѣ́рніи, пое́мъ Тя́, Чи́стую, и — е́же ра́дуйся! — Тебѣ́ взыва́емъ: благослове́нна Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Ви́дя блаже́нне, тве́рдость твоего́ противле́нія, Ле́въ мучи́тель во изгна́ніе тя́ осуди́ горча́йшее, вселука́вый, съ весе́ліемъ же вопія́, сіе́ претерпѣ́лъ еси́: благослови́те, вся́ дѣла́ Госпо́дня, Го́спода.

На первообра́зное ви́дя ико́ны че́сть преходя́щу, на три́знище поте́клъ еси́, я́ко страда́лецъ зако́ннѣйшій и, побѣди́тель показа́вся, вѣне́цъ прія́лъ еси́, взыва́я: благослови́те, вся́ дѣла́ Госпо́дня, Го́спода.

Небе́сную вмѣ́сто земны́я ски́нію тебѣ́ даде́ вся́ческихъ Госпо́дь, вмѣ́сто бо тѣсноты́ обрѣ́лъ еси́ широту́ ра́дованія въ ра́йстѣй сла́дости, съ му́ченики вопія́: благослови́те, вся́ дѣла́ Госпо́дня, Го́спода.

Свѣ́томъ облиста́лся еси́ мы́сленнымъ Боже́ственнаго Ду́ха, блаже́нне Ѳеофа́не, тѣ́мже исцѣле́нія то́чиши ны́нѣ вѣ́рою къ тебѣ́ притека́ющимъ и святу́ю твою́ ра́ку любо́вію почита́ющимъ и вопію́щимъ: благослови́те, вся́ дѣла́ Госпо́дня, Го́спода.

Богоро́диченъ: Боже́ственною си́лою содержа́й тва́рь всю́ и управля́я я́вѣ, рука́ми держи́тся Твои́ми, Пречи́стая, я́ко Младе́нецъ, присносу́щный и сопресто́льный Отцу́ и Боже́ственному Ду́ху. Ему́же вопіе́мъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Все́ бога́тство расточи́лъ еси́ убо́гимъ, богоно́се, пра́вду твою́ я́вѣ воспріе́млеши, тебѣ́ возсія́вшую, вмѣ́сто тлѣ́нныхъ пожина́я вѣ́чно пребыва́ющая.

Неду́ги исцѣля́еши, всеблаже́нне, Утѣ́шителевою си́лою, де́моны я́вѣ отго́ниши дѣ́йствомъ Сего́, преблаже́нне. Тѣ́мъ, вѣ́рніи, зря́ще, тя́, богоно́се, ублажа́емъ.

Тво́й свѣтоно́сный, богому́дре, преставле́нія де́нь вся́ призыва́етъ вѣ́рныя къ прича́стію освяще́нія, его́же и ны́нѣ, ра́дующеся, соверша́емъ, свяще́ннѣйше.

Дае́ши мнѣ́ незави́стенъ да́ръ, похвале́ній тебѣ́ словеса́ спле́тшему усе́рдно, богому́дре, единонра́вна тебѣ́, я́коже тезоиме́нна сего́ показа́въ мольба́ми твои́ми благопрія́тными, всеблаже́нне.

Богоро́диченъ: Зако́нъ похва́лъ побѣжда́ется боже́ственною сла́вою Твое́ю, Дѣ́во, но, я́ко Блага́ и Благосе́рда, Тя́ пою́щихъ пріими́ похвалу́, грѣхо́въ очище́ніе воздаю́щи, Богоневѣ́стная.

Примѣчаніе:
[1] Тропарь печатается по изданію: Псалти́ръ съ возслѣ́дованіемъ. Черни́говъ: Въ Тѵпогра́фіи оби́тели Свя́то-Тро́ицкой Ильи́нской, 1763 г. Ли́стъ 473 об. – 474.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 64 об. – 68.

/ Къ оглавленію раздѣла /


Наверхъ / Къ титульной страницѣ

0