Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 22 октября 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 11-й де́нь.
Иже во святы́хъ отца́ на́шего Софро́нія, епи́скопа Вратча́нскаго.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 4. Подо́бенъ: Яко до́бля.

Добродѣ́тельными свѣтлостьми́ просла́вися и́мя твое́ на земли́, сто́лпъ и утвержде́ніе бы́лъ еси́, о́тче Софро́ніе, ду́ши вѣ́рныхъ укрѣпля́я и тму́ грѣхо́вную отгоня́я. Тѣ́мже, свѣтоно́сную твою́ па́мять пра́зднующе дне́сь, мо́лимъ: моли́ спасти́ся душа́мъ на́шимъ.

Бо́жія благода́ти сосу́дъ избра́нъ яви́лся еси́, вѣ́ру Христо́ву проповѣ́дуя, жа́ждущія ду́ши напая́я и немощны́я укрѣпля́я, ста́до твое́ сохрани́лъ еси́ невреди́мо отъ волко́въ. Тѣ́мже мо́лимъ тя́: моли́ спасти́ся душа́мъ на́шимъ.

Исто́чникъ прему́дрости содѣ́ла тя́ му́дрость Бо́жія: рѣ́ки прему́дрости потеко́ша изъ чре́ва твоего́ и напои́ша жа́ждущія лю́ди водо́ю благода́ти Бо́жія, вѣ́рою укрѣпля́еми, съ ра́достію воспѣва́ютъ тя́: моли́ спасти́ся душа́мъ на́шимъ.

Сла́ва, гла́съ и подо́бенъ то́йже:

Скоропи́сная тро́сть рука́ твоя́ бы́сть, свя́те: писа́ньми твои́ми лю́ди, во тмѣ́ невѣ́дѣнія сѣдя́щія, просвѣти́лъ еси́ и, къ и́стинному свѣ́ту позна́нія приве́дши, ду́ши поги́бшія спа́слъ еси́, Христо́ва Ева́нгелія проповѣ́дая, агаря́нская нече́стія истреби́лъ еси́, о́тче Софро́ніе, моли́ спасти́ся душа́мъ на́шимъ.

И ны́нѣ, богоро́диченъ:

Изба́ви на́съ отъ ну́ждъ на́шихъ, Ма́ти Христа́ Бо́га, ро́ждшая всѣ́хъ Творца́, да вси́ зове́мъ Ти́: ра́дуйся, еди́но предста́тельство ду́шъ на́шихъ.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Бо́жіею си́лою укрѣпля́емь, вра́жія ко́зни препобѣди́лъ еси́, вѣ́ру Христо́ву проповѣ́дуя, пога́нскія обы́чаи искорени́лъ еси́. Просвѣти́вый бо́лгарскій наро́дъ, іера́рше Софро́ніе, моли́ Христа́ Бо́га спасти́ся душа́мъ на́шимъ.

Сти́хъ: Честна́ предъ Го́сподемъ сме́рть преподо́бныхъ Его́.

Христо́ва іера́рха тя́ восхваля́емъ и, ра́достно торжеству́юще дне́сь, па́мять твою́ почита́емъ. Тѣ́мже мо́лимъ тя́: не забу́ди лю́ди твоя́, свя́те Софро́ніе, но моли́ся при́сно, отъ вра́гъ ви́димыхъ и неви́димыхъ изба́витися на́мъ моли́твами твои́ми.

Сти́хъ: Свяще́нницы Твои́, Го́споди, облеку́тся пра́вдою, и преподо́бніи Твои́ возра́дуются.

Яко звѣзду́, возсія́лъ еси́ надъ зе́млю Бо́лгарскую, святи́телю Софро́ніе, озаря́я лю́ди свѣ́томъ позна́нія Ева́нгелія Христо́ва. И ны́нѣ, зря́ще на небеси́ сла́ву Бо́жію, не преста́й моли́тися о душа́хъ на́шихъ.

Сла́ва, и ны́нѣ, богоро́диченъ, гла́съ то́йже:

Ра́дуйся, Богоро́дице Дѣ́во; ра́дуйся, похвало́ всея́ вселе́нныя; ра́дуйся, Пречи́стая Ма́ти Бо́жія Благослове́нная.

Тропа́рь, гла́съ 1:

Щито́мъ вѣ́ры вооружи́вся, мече́мъ словесе́ безбо́жныя агаря́ны посѣка́я, ста́до твое́ упа́слъ еси́ на земли́. Въ небе́снѣй же оби́тели всели́вся, Христа́ моли́ дарова́ти наро́ду на́шему ми́ръ и ве́лію ми́лость.

Сла́ва, и ны́нѣ, богоро́диченъ:

Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.

Инъ тропа́рь свята́го, гла́съ 3:
[Творе́ніе Григо́рія, митрополи́та Ло́вчанскаго.]

Бо́жіимъ изволе́ніемъ архипа́стырь и учи́тель бы́лъ еси́ утружде́нному агаря́нами наро́ду твоему́ и неусы́пенъ о не́мъ къ Бо́гу моли́твенникъ. За вѣ́ру Христо́ву ревнова́вый, мно́жество страда́ній терпѣ́лъ еси́, па́ство же твое́ отъ нече́стія охраня́лъ еси́, въ благоче́стіи и чистотѣ́ вѣ́ры наставля́лъ еси́, просвѣща́я его́ словесы́ и списа́ньми твои́ми, тѣ́мже вопіе́мъ ти́, святи́телю о́тче на́шъ Софро́ніе: Христу́ Бо́гу моли́ся дарова́ти наро́ду ми́ръ и душа́мъ на́шимъ ве́лію ми́лость.

Сла́ва, и ны́нѣ, богоро́диченъ:

Тя́, хода́тайствовавшую спасе́ніе ро́да на́шего, воспѣва́емъ, Богоро́дице Дѣ́во: пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ, Кресто́мъ воспріи́мъ стра́сть, изба́ви на́съ отъ тли́, я́ко Человѣколю́бецъ.


НА ВЕЛИЦѢЙ ВЕЧЕРНИ,
Глаго́лемъ пе́рвыя каѳи́смы 1-й антифо́нъ: Блаже́нъ му́жъ... На Го́споди воззва́хъ: поста́вимъ стихо́въ 8 и пое́мъ стихи́ры самогла́сны, гла́съ 2. Подо́бенъ: Кíими похва́льными.

Кíими похва́льными пѣ́сньми воспое́мъ святи́теля Софро́нія? Безпло́тныхъ сожи́теля, небе́снаго граждани́на, незы́блемаго столпа́ церко́внаго, весе́ліе земли́ Бо́лгарскія, свѣти́льника заблу́ждшихся, сиро́тъ пита́теля, ю́ныхъ учи́теля, оби́димыхъ засту́пника и та́инствъ Христо́выхъ пази́теля, ны́нѣ моля́щагося о душа́хъ на́шихъ.

Кíими похва́льными вѣнцы́ увязе́мъ святи́теля Софро́нія? Свяще́нства вѣне́цъ благоче́стія, свѣ́тлое Це́ркве украше́ніе, исто́чника боже́ственныя му́дрости, рѣку́, благода́тныя во́ды точа́щую, зе́млю Бо́лгарскую напая́ющую, ду́ши вѣ́рныхъ веселя́щую, мра́къ грѣхо́вный отгоня́ющаго и подаю́щаго на́мъ ве́лію ми́лость.

Вся́кими добродѣ́тельми укра́шенъ, яви́лся еси́ свѣти́льникъ пресвѣ́телъ, въ епа́рхіи Вратча́нстѣй служа́, сло́во Бо́жіе всѣ́мъ лю́демъ проповѣ́далъ еси́, грѣ́шныхъ ду́ши просвѣща́я и наставля́я. Мно́ги ра́ны и біе́нія отъ агаря́нъ пріе́мъ, не отступи́лъ еси́ отъ Христа́ Бо́га. И ны́нѣ на небесѣ́хъ со а́нгелы пребыва́я, не преста́й моля́ся о на́съ, чту́щихъ тя́.

Ины стихи́ры, гла́съ 8. Подо́бенъ: О, пресла́внаго чудесе́!

Іера́рше блаже́нне Софро́ніе, по́двиги и страда́нія твоя́ кто́ исповѣ́сть, я́же за Христа́ Бо́га претерпѣ́лъ еси́, стопа́мъ Его́ послѣ́дуя. Не да́лъ еси́ сна́ очесе́ма твои́ма, ни ве́ждома твои́ма дрема́нія, до́ндеже недре́млющаго врага́ побѣди́лъ еси́. Зе́млю Бо́лгарскую обходя́, преще́нія врага́ не убоя́лся еси́, долговѣ́чнаго и́га не терпя́, и́го Христо́во на ра́мѣхъ нося́, Мохаме́довы зако́ны попра́лъ еси́, зако́ну Бо́жію лю́ди уча́. Въ небе́сную оби́тель вше́лъ еси́, ра́дуяся, Христа́ о на́съ, чту́щихъ тя́, моли́ всегда́.

Отче преблаже́нне Софро́ніе, ты́, измла́да Христа́ возлюби́въ, вся́ земна́я оста́вилъ еси́, путе́мъ и́стины ше́ствуя, возве́лъ еси́ о́вцы слове́сныя твоя́ на па́жити ту́чныя, сохраня́я и́хъ отъ волко́въ губи́телей, житіе́ ди́вное во страда́ніи препроводи́лъ еси́, о́бразъ всѣ́мъ добродѣ́телей собо́ю показу́я. Архіере́й незло́бивъ и преподо́бенъ бы́въ, Вѣ́чному Архіере́ю ны́нѣ предстоя́, Того́ моли́ о душа́хъ на́шихъ.

Богому́дре іера́рше Софро́ніе, ты́ возше́лъ еси́ на лѣ́ствицу боже́ственнаго ра́зума и, къ Бо́гу приближа́яся, житіе́ Влады́цѣ твоему́ имѣ́лъ еси́ подо́бно, кро́токъ и незло́бивъ бы́въ, съ вы́шними совокупля́яся во́инствы. Ве́сь укра́шенъ добродѣ́тельми, свѣтлостьми́ ны́нѣ сія́я на небеси́, Христа́ у́бо моли́ всегда́ о на́съ.

Ины стихи́ры, гла́съ 5. Подо́бенъ: Ра́дуйся.

Ра́дуйся, архіере́евъ похвало́, Це́ркве Бо́лгарскія утвержде́ніе, о́тче Софро́ніе, ты́ [бо] научи́лъ еси́ лю́ди твоя́ непоколеби́мы бы́ти въ вѣ́рѣ Христо́вѣ. Страда́нія, муче́нія и у́зы не устраши́ша тя́, агаря́ны вся́ посрами́лъ еси́, писа́ньми и словесы́ наставля́я всѣ́хъ храни́ти вѣ́ру оте́ческую. Кни́ги богодухнове́нныя написа́лъ еси́, язы́къ бо́лгарскій прославля́я и утвержда́я. И ны́нѣ Бо́гу предстоя́, о на́съ моли́ся, всеблаже́нне.

Ра́дуйся, ро́де бо́лгарскій, лику́йте, христоно́сніи лю́діе. Дне́сь возсія́ на небеси́ свѣ́тлый ли́къ па́стыря на́шего Софро́нія. Ангели съ ни́мъ ра́дуются, и ли́къ святи́телей торжеству́етъ, земна́я съ небе́сными ликовству́ютъ: и́го долговѣ́чное отве́ржено бы́сть и вѣ́ра Христо́ва проповѣ́дуется. Того́ моли́твами, Христе́ Бо́же, поми́луй и спаси́ на́съ.

Сла́ва, гла́съ 6:

Пріиди́те дне́сь, о празднолю́бцы, да восхва́лимъ пѣ́сненно святи́теля на́шего: ра́дуйся, о́тче Софро́ніе, Це́ркве Христо́вы свѣти́льниче; ра́дуйся, іера́рховъ удобре́ніе, ра́дуйся, ни́щихъ защи́тниче, ра́дуйся, невѣ́дящихъ просвѣще́ніе, малоду́шныхъ укрѣпле́ніе и всему́ наро́ду на́шему покро́въ и спасе́ніе. Ты́ бо процвѣ́лъ еси́ на небеси́, я́ко фи́никсъ, и, я́ко ке́дръ, и́же въ Лива́нѣ, умно́жилъ еси́ ча́да твоя́. Аще и на небеси́ живе́ши ны́нѣ, не оста́ви и на́съ на земли́, но моли́ся Христу́ Бо́гу умири́ти ми́ръ и спасти́ ду́ши на́ша.

И ны́нѣ, богоро́диченъ пе́рвый гла́са:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ, проки́менъ дне́ и чте́нія три́.

При́тчей чте́ніе. [Главы́ 10, 3 и 8.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устнѣ́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе. [Главы́ 10 и 11.]

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 1:

Ве́сь отъ ю́ности благонра́віемъ Христу́ прилѣпи́лся еси́, отъ Него́же святи́тельства досто́инство пріе́мъ, лю́ди твоя́ упа́слъ еси́ и свѣ́томъ Ева́нгелія просвѣти́лъ еси́ я́, и сѣ́мя благоче́стія въ ни́хъ моли́твами твои́ми насади́лъ еси́, іера́рше Софро́ніе. Тѣ́мже [по́чести] трудо́въ ра́ди твои́хъ отъ Христа́ пріе́мъ, Того́ моли́ о душа́хъ на́шихъ.

Гла́съ 2:

Яко труба́ богогла́сная, возгремѣ́ гла́съ тво́й, спя́щихъ сердца́ возбужда́я. Бо́лгарскій наро́дъ отъ и́га долговѣ́чнаго воскреси́лъ еси́ и къ позна́нію язы́ка ма́терняго обрати́лъ еси́ всѣ́хъ, и́стины ева́нгельскія уясня́я и́мъ. Злочести́выхъ агаря́нъ не убоя́лся еси́ отню́дъ, де́рзостію изоблича́я и́хъ, лю́ди твоя́ невре́дно сохрани́лъ еси́. И ны́нѣ Бо́гу при́сно предстоя́, моли́ изба́витися на́мъ, вѣ́рно пою́щимъ тя́.

Гла́съ 3:

Яко Моисе́й Изра́иля въ пусты́ни отъ звѣре́й и гла́да сохрани́, та́ко и ты́, стра́ждущій наро́дъ бо́лгарскій пи́щею духо́вною напита́въ, сохрани́лъ еси́ его́ отъ звѣре́й агаря́нскихъ, вѣ́рою и любо́вію укрѣпля́я его́. Невѣ́дящія Писа́нію научи́въ, малоду́шныя сло́вомъ укрѣпи́лъ еси́, гоне́нія и муче́нія не убоя́вся. И ны́нѣ на небеси́ со а́нгелы лику́я, непреста́нно моля́ся о душа́хъ на́шихъ.

Сла́ва, гла́съ 5:

Іера́рше блаже́нне Софро́ніе, не терпя́ зрѣ́ти ста́до твое́ погиба́ющее, па́стырей и́стинныхъ не иму́щаго, са́мъ прія́лъ еси́ на себе́ и́го Христо́во, во е́же спасти́ ду́ши заблу́ждшія. Благода́ть и му́дрость отъ Бо́га пріе́мъ, писа́нія но́вая ко Христо́ву позна́нію изложи́лъ еси́, язы́къ бо́лгарскій обнови́лъ еси́, и невѣ́дущимъ лю́демъ Бо́гъ тобо́ю позна́нъ бы́сть. Слова́ богодухнове́нная сочини́въ, вѣ́ру Христо́ву въ лю́дехъ утверди́лъ еси́. Тѣ́мже мо́лимъ тя́: моли́ся о на́съ, вѣ́рою и любо́вію сла́вящихъ тя́.

И ны́нѣ, богоро́диченъ, гла́съ то́йже:

Хра́мъ и Две́рь еси́, Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ.

На стихо́внѣ стихи́ры, гла́съ 8. Подо́бенъ: Возше́лъ еси́.

Сокро́вище прему́дрости бы́въ, Софро́ніе свяще́нне, сердца́ стра́ждущихъ люде́й уче́ніемъ твои́мъ му́дростію Бо́жіею просвѣти́лъ еси́, [благоче́стія сѣмена́ насади́въ. Тѣ́мже тя́ вси́,] я́ко учи́теля прему́дра, достодо́лжно по досто́инству ублажа́емъ и мо́лимся: моли́ся Христу́ Бо́гу изба́витися на́мъ отъ навѣ́товъ вра́жіихъ и спасти́ся душа́мъ на́шимъ.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Проповѣ́дуетъ ны́нѣ, іера́рше Софро́ніе, твоя́ страда́нія ве́сь бо́лгарскій наро́дъ: гоне́нія и біе́нія, я́же отъ пога́нскихъ агаря́нъ претерпѣ́лъ еси́ вѣ́ры ра́ди, на́съ отъ болѣ́зней и скорбе́й вѣ́чныхъ избавля́я ны́ твои́ми моли́твами. Пита́телю вдо́въ, учи́телю дѣте́й, оте́цъ сиро́тъ, помо́щникъ су́щимъ въ ско́рбехъ, пла́чущимъ утѣше́ніе, па́стырь и наста́вникъ всѣ́мъ заблу́ждшимъ, Софро́ніе прему́дре, бы́въ. Но моли́ся Христу́ Бо́гу грѣхо́въ оставле́ніе дарова́ти вѣ́рою и любо́вію чту́щимъ святу́ю па́мять твою́.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Благода́ть Бо́жія сни́де на тя́ бога́тно, сни́де, я́ко мѵ́ро, на главѣ́ твое́й, я́ко роса́ аермо́нская, ороша́ющая ка́плями добродѣ́телей твои́хъ [всѣ́хъ], притека́ющихъ къ тебѣ́ усе́рдно. Па́стырь всеизря́денъ бы́лъ еси́, ста́до твое́ сохраня́я отъ волко́въ губи́телей и огражда́я его́ моли́твами твои́ми. Ны́нѣ же стоя́ на небеси́ и призира́я на зе́млю, моли́ спасти́ся душа́мъ на́шимъ.

Сла́ва, гла́съ 8, самогла́сенъ:

Боже́ственною ре́вностію разже́гся, сто́лпъ непоколеби́мъ бы́лъ еси́ всѣ́мъ вѣ́рующимъ, Софро́ніе богому́дре. Це́рковь Бо́жію украси́лъ еси́ твои́ми уче́ньми. Лю́ди, тебѣ́ Бо́гомъ вруче́нныя, му́дрѣ наста́вилъ еси́ въ Того́ разумѣ́ніе. Иже, по Па́влу вели́кому, уста́ и у́мъ наслѣ́довавъ Христо́въ, кни́ги написа́въ богодухнове́нныя, невѣ́рующія умудри́лъ еси́, къ свѣ́ту позна́нія вся́ приводя́, пу́ть спасе́нія показу́я и́мъ. Тѣ́мже моли́ся о на́съ, воспѣва́ющихъ тя́ при́сно.

И ны́нѣ, богоро́диченъ вторы́й гла́са:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

На благослове́ніи хлѣ́бовъ: тропа́рь свята́го, два́жды [пи́санъ на ма́лѣй вече́рни], и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ: Гавріи́лу вѣща́вшу...

По 1-мъ стихосло́віи сѣда́ленъ, гла́съ 4. Подо́бенъ: Яви́лся еси́ дне́сь.

Да́нный отъ Бо́га тебѣ́ тала́нтъ стокра́тно обогати́лъ еси́, уче́ньми твои́ми лю́ди просвѣща́я, ко Христу́ вся́ приве́лъ еси́. Ни́щъ сы́й, нището́ю твое́ю вся́ обогаща́я бога́тствомъ бла́гости боже́ственныя. Небе́снымъ вѣнце́мъ ны́нѣ сподо́бився, не преста́й моля́ся о душа́хъ на́шихъ. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Дѣ́во Всенепоро́чная, Пресу́щественнаго Бо́га ро́ждшая, со святи́телемъ Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

По 2-мъ стихосло́віи сѣда́ленъ, гла́съ 8. Подо́бенъ: Прему́дрость и Сло́во.

Имже о́бразомъ жела́етъ еле́нь на исто́чники водны́я, си́це возжела́лъ еси́, блаже́нне, и ко Исто́чнику — Спа́су на́шему прите́кши, водо́ю жи́зни напая́емь, рѣ́ки благода́тныя изъ чре́ва твоего́ потеко́ша и напои́ша жа́ждущія лю́ди уче́ніемъ слове́съ твои́хъ. Тѣ́мже воспѣва́емъ тя́: моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ же и сло́ва, непреста́нно моли́ съ вы́шними си́лами пода́ти оставле́ніе грѣхо́въ на́шихъ и исправле́ніе житія́ вѣ́рою и любо́вію при́сно Тя́ сла́вящимъ.

По поліеле́и сѣда́ленъ, гла́съ 8. Подо́бенъ: Прему́дрость и Сло́во.

Гоне́нія и муче́нія отъ нечести́выхъ агаря́нъ претерпѣва́я му́жески, Дави́дскимъ гла́сомъ вопія́лъ еси́: на хребтѣ́ мое́мъ дѣ́лаша грѣ́шницы и продолжи́ша беззако́ніе свое́. Преще́нія и ра́нъ не убоя́вся, отъ Бо́га не отступи́лъ еси́, вѣ́ру чи́сту соблюда́я. Сего́ ра́ди пое́мъ ти́: моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе отъ Іоа́нна, зача́ло 35, отъ полу́: Ами́нь, ами́нь глаго́лю ва́мъ, не входя́й две́рьми...

По 50-мъ псалмѣ́ стихи́ра, гла́съ 5, самогла́сна:

Іера́рше блаже́нне Софро́ніе, по и́мени твоему́ та́ко и житіе́ твое́ бы́сть: да́ръ прему́дрости и ра́зума отъ Бо́га пріе́мъ, боже́ственныя та́йны Ева́нгелія уясни́лъ еси́ писа́ніемъ и словесы́ наста́вилъ еси́ лю́ди въ вѣ́ру Бо́жію. И ны́нѣ Тріѵпоста́снѣй Му́дрости предстоя́, не преста́й моли́тися о на́съ, вѣ́рою и любо́вію тя́ воспѣва́ющихъ.

Кано́нъ [Богоро́дицы со ирмосо́мъ на 6, и] свята́го на 8, гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Воспѣ́ти ми́ жела́ющу іера́рха Софро́нія, Го́споди, просвѣти́ мо́й ра́зумъ осія́ніемъ Свята́го Ду́ха и да́руй ми́ свѣ́тъ прему́дрости Твоея́, да досто́йно воспою́ и возвели́чу и́мя его́.

Безъ отца́ и безъ ма́тере измла́да оста́въ, ко Христу́ прите́клъ еси́ и, Того́ за́повѣдьми огражда́яся, злоко́зненнаго врага́ не убоя́лся еси́. Си́рыя и ни́щія возлюби́въ, наста́вилъ еси́ я́ на пу́ть спасе́нія. Тѣ́мже помина́й и на́съ, грѣ́шныхъ, святи́телю Софро́ніе.

Благода́тію Бо́жіею води́мъ, Це́рковь Святу́ю возлюби́лъ еси́ и, са́на архіере́йскаго пріе́мъ, па́стырь и́стинный яви́лся еси́ слове́снаго ста́да Христо́ва, наста́вникъ и учи́тель вѣ́рѣ бы́въ, Софро́ніе, о́тче на́шъ. Сего́ ра́ди вѣне́цъ нетлѣ́нія отъ Бо́га прія́лъ еси́, Того́ моли́ о душа́хъ на́шихъ.

Ига агаря́нскаго не терпя́ зрѣ́ти и язы́ка гре́ческаго отри́нувъ изъ церкве́й, язы́комъ слове́нскимъ сло́во Христо́во проповѣ́далъ еси́ вѣ́рующимъ. Моли́ изба́витися и на́мъ отъ и́га грѣхо́внаго и отъ наше́ствія иноплеме́нникъ.

Богоро́диченъ: Марíю Чи́стую, пріиди́те вси́, воспои́мъ, еди́ну, украси́вшую человѣ́чество и ро́ждшую Бо́га воплоще́нна, Дѣ́ву же пребы́вшую неврежде́нну.

Катава́сія: Отве́рзу уста́ моя́...

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Ре́вностію Бо́жіею, я́ко Илія́ проро́къ, распаля́емь, іера́рше Софро́ніе, обходя́ гра́ды и ве́си бо́лгарскія, вѣ́ру Христо́ву проповѣ́дуя и обы́чаи агаря́нскія въ лю́дехъ искореня́я, не убоя́лся еси́ свирѣ́паго врага́. Моли́ изба́витися на́мъ отъ неви́димыхъ вра́гъ.

Нечести́вый вра́гъ на тя́ разгнѣ́вася зѣло́, ища́ злѣ́ погуби́ти тя́, но ты́, бѣ́гая гнѣ́ва его́, къ Бо́гу Дави́дски взыва́лъ еси́: изми́ мя́, Го́споди, отъ человѣ́ка лука́ва, отъ му́жа непра́ведна изба́ви мя́. — Изба́ви и на́съ, Го́споди, отъ вся́каго грѣха́ моли́твами святи́теля Твоего́.

Сугу́бую благода́ть архіере́йскаго служе́нія пріе́мъ отъ Бо́га, усугу́билъ еси́ по Бо́зѣ ре́вность твою́. Усе́рдно ста́до твое́ пася́ и храня́, дѣви́цу отъ сластолюби́ваго агаря́нина спа́слъ еси́, супру́гу вѣ́рному вѣнча́лъ еси́ ю́ и научи́лъ еси́ ю́ пѣ́ти: сла́ва си́лѣ Твое́й, Го́споди.

Вра́гъ человѣ́ческій искони́ не терпя́ зрѣ́ти тя́, по Бо́зѣ житіе́ иму́щу, блаже́нне, воздви́же на тя́ гоне́нія, я́ко на втора́го Па́вла, отъ сро́дниковъ и лжебра́тій, сего́ ра́ди бѣ́гая, водвори́лся еси́ въ де́брехъ и пеще́рехъ вратча́нскихъ, гла́домъ и мра́зомъ мучи́мь, ду́шу твою́ спа́слъ еси́.

Богоро́диченъ: Свѣ́тлыми сія́ньми, Пречи́стая Ма́ти Бо́жія, озари́ мо́й у́мъ, тмо́ю лю́таго неразу́мія одержи́мый: я́ко улучи́въ боже́ственное просвѣще́ніе, вели́чія Твоя́ возвѣщу́, Приснодѣ́во.

Сѣда́ленъ, гла́съ 4. Подо́бенъ: [Красотѣ́ дѣ́вства.]

Яко заря́ у́тренняя съ небесе́, возсія́ на́мъ всечестна́я па́мять твоя́, святи́телю Софро́ніе, вѣ́рныхъ озаря́ющи и слове́нскій ро́дъ вку́пѣ созыва́ющи. Тѣ́мже и мы́ дне́сь согла́сно вопіе́мъ ти́: моли́ Христа́ Бо́га о душа́хъ на́шихъ. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Яко невоздѣ́ланная, Дѣ́во, лоза́, краснѣ́йшій Гро́здъ прозябла́ еси́, источа́ющь на́мъ вино́ спасе́нія, всѣ́хъ веселя́щее ду́ши же и тѣлеса́. Тѣ́мже, я́ко вину́ Тя́ до́брыхъ блажа́ще при́сно, со а́нгеломъ вопіе́мъ Ти́: ра́дуйся, Благода́тная.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Изба́вивый дре́вле Даніи́ла проро́ка отъ че́люстей льво́выхъ, та́ко и тебе́ изба́ви, о́тче Софро́ніе, отъ султа́на нечести́ваго и сластолюби́ваго, хотя́щаго погуби́ти тя́, неви́нна су́ща. Ве́ліимъ стра́хомъ обдержи́мь, вопія́лъ еси́: сла́ва си́лѣ Твое́й, Го́споди.

Обходя́ зе́млю Бо́лгарскую и утѣша́я стра́ждущія лю́ди, ра́ны, біе́нія и въ темни́цѣ затворе́нія пра́вды ра́ди претерпѣва́я, Софро́ніе блаже́нне, не отступи́лъ еси́ отъ вѣ́ры, Бо́гу тя́ укрѣпля́ющу, я́ко не оста́витъ Госпо́дь жезла́ грѣ́шныхъ на жре́біи пра́ведныхъ. Сего́ ра́ди, изба́вленъ, вопія́лъ еси́: сла́ва си́лѣ Твое́й, Го́споди.

Тя́жкимъ страда́ніемъ искуше́нъ бы́лъ еси́, о́тче Софро́ніе, и, я́ко зла́то въ горни́лѣ, очи́стился еси́, сего́ ра́ди досто́йно Вра́тчанскій престо́лъ пріе́мъ, же́злъ пра́вости въ руцѣ́ нося́, ста́до разу́мно упа́слъ еси́ и вопія́лъ еси́, изба́вленъ: сла́ва си́лѣ Твое́й, Го́споди.

Въ моли́твѣ бо́дрствуя, святи́телю Софро́ніе, не да́лъ еси́ ве́ждома твои́ма дрема́нія и поко́й скраніа́ма твои́ма. Непреста́нно Бо́гу моля́ся о избавле́ніи ро́ду бо́лгарскому отъ и́га долговѣ́чнаго, си́це вопія́лъ еси́: сла́ва си́лѣ Твое́й, Го́споди.

Возненави́дѣша тя́ ту́не и погна́ша тя́ врази́ твои́, но ты́, возлага́я на Го́спода печа́ль твою́, си́це вопія́лъ еси́: Го́споди, Бо́же мо́й, на Тя́ упова́хъ, спаси́ мя́ отъ всѣ́хъ, гоня́щихъ мя́, я́ко не возда́хъ воздаю́щимъ ми́ зла́я; сла́ва си́лѣ Твое́й, Го́споди.

Богоро́диченъ: Украси́лася еси́ па́че всего́ а́нгельскаго благолѣ́пія, я́ко ро́ждши всѣ́хъ, Отрокови́це, Творца́ же и Го́спода, отъ Твои́хъ пречи́стыхъ крове́й воплоща́ема, избавля́ющаго вся́, Того́ сла́вящія.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Ти́хое и необурева́емое приста́нище души́ твоея́ ища́, до Аѳо́на дости́глъ еси́, слеза́ми и те́плыми моли́твами ду́шу свою́ очи́стивъ, па́ки во оте́чество свое́ возврати́лся еси́, взыска́ти и спасти́ хотя́ лю́ди заблу́ждшія. Ко и́стинному свѣ́ту приве́дъ вся́, къ Бо́гу, ра́дуяся, взыва́лъ еси́: сла́ва си́лѣ Твое́й, Го́споди.

Яко ла́стовица отъ ю́га, Паи́сію преподо́бному долетѣ́вшу, съ ве́ліею ра́достію пріе́мъ [его́ и] любому́дренно съ ни́мъ бесѣ́довалъ еси́. Исто́рію славянобо́лгарскую отъ него́ пріе́мъ, прописа́въ ю́ и къ прочита́нію наро́ду бо́лгарскому отда́лъ еси́ ю́. Тѣ́мже и мы́, язы́комъ свои́мъ къ Бо́гу ны́нѣ пою́ще, тебе́ при́сно ублажа́емъ.

Столпи́ незы́блеміи Це́ркве Бо́лгарскія показа́стеся, о Паи́сіе преподо́бне и Софро́ніе свяще́нне: уче́ньми и писа́ньми ва́шими зе́млю Бо́лгарскую просвѣти́сте и лю́ди вся́ ко и́стиннѣй вѣ́рѣ наста́висте. Сего́ ра́ди ве́сь славя́нскій ро́дъ, любо́вію ва́съ чту́ще, велича́етъ.

Іера́рше Софро́ніе, ты́ воздви́глъ еси́ уче́ньми твои́ми лю́ди, во тмѣ́ невѣ́дѣнія и сѣ́ни сме́ртней сѣдя́щія, сы́ны свѣ́та сотвори́въ и́хъ, пу́ть спасе́нія показу́я и́мъ. Сего́ ра́ди вѣнце́мъ небе́снымъ сподо́бился еси́, не преста́й моля́ся о душа́хъ на́шихъ.

Не терпя́ зрѣ́ти му́чимь [бы́ти] бо́лгарскій наро́дъ отъ нечести́выхъ агаря́нъ, писа́ніемъ и словесы́ о́гненными противоста́лъ еси́ и́мъ, не убоя́вся лю́таго преще́нія. Ра́ны мно́ги и гоне́нія вѣ́ры ра́ди претерпѣва́я до́блестно, къ Бо́гу взыва́лъ еси́: спаси́, Го́споди, лю́ди Твоя́ и благослови́ достоя́ніе Твое́.

Богоро́диченъ: Тя́ ору́жіе на враги́ предлага́емъ, ско́рби вся́кія лю́тыхъ обстоя́ній отрѣва́емъ и возмуще́нія ерети́ческаго, Ма́ти Бо́жія, избѣга́емъ.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Излія́ся благода́ть Свята́го Ду́ха во устна́хъ твои́хъ, іера́рше Софро́ніе, рѣ́ки медото́чныхъ слове́съ изъ тебе́ потеко́ша, сердца́ вѣ́рныхъ напая́юще и свѣ́томъ Ева́нгелія ду́ши всѣ́хъ просвѣща́юще. Обновле́нный же ро́дъ славя́нскій дне́сь лику́етъ, Бо́га сла́вяще, тебе́ велича́етъ.

Да воспое́мъ дне́сь ра́достно церко́внаго свѣти́льника, столпа́ вѣ́ры незы́блемаго, Правосла́вія учи́теля, благоглаго́ливаго проповѣ́дника благоче́стія, іера́рха Софро́нія, прославля́ющаго Бо́га всѣ́хъ, смиреному́дренно да просла́вимъ отъ чи́ста се́рдца.

Проро́ческима очи́ма ско́рое избавле́ніе отъ и́га агаря́нскаго зря́, бо́дрыми словесы́ лю́ди въ це́рквахъ поуча́лъ еси́. Отай же зе́млю Бо́лгарскую обходя́, му́дрыя писа́нія лю́демъ раздава́я, Бо́жіею му́дростію озаре́нъ бы́лъ еси́. Не забу́ди и ны́нѣ на́съ на земли́, любо́вію и вѣ́рою тя́ пѣсносло́вящихъ.

Яко го́лубь чи́стый, пожи́лъ еси́ посредѣ́ грѣ́шникъ, ле́сть же ду́шу твою́ не прельсти́. Пра́ведно пожи́въ, и пра́вда Бо́жія изба́ви тя́ отъ сме́рти. Къ вѣ́чному животу́ преше́лъ еси́, со а́нгели на небеси́ лику́еши при́сно, моли́ изба́витися на́мъ отъ вѣ́чныхъ му́къ.

Яко па́стырь преизря́денъ яви́лся еси́, Истинному Па́стырю послѣ́дуя, ста́до слове́сное на па́жити ту́чныя изве́лъ еси́, пи́щею духо́вною напита́въ его́. Не оста́ви и на́съ, чту́щихъ тя́.

Богоро́диченъ: Притеце́мъ, вѣ́рніи, въ це́рковь Бо́жія Ма́тере, и, вѣ́рно моля́щеся, возопіе́мъ Ей: поми́луй, Влады́чице, Твое́ достоя́ніе и отъ вра́гъ изба́ви на́съ моли́твами Твои́ми.

Конда́къ, гла́съ 3. Подо́бенъ: Да веселя́тся.

Архіере́евъ похвала́ и страда́льцевъ украше́ніе бы́въ, святи́телю Софро́ніе, добродѣ́тельми просла́вився, возсія́лъ еси́, я́ко со́лнце, на́съ просвѣща́я и грѣхо́вную тму́ невѣ́дѣнія отгоня́я. Но, я́ко имѣ́я дерзнове́ніе къ Бо́гу, ми́ръ испроси́ душа́мъ на́шимъ и ве́лію ми́лость.

Икосъ:

Се́ возшумѣ́ша врази́ твои́, лю́ди лука́вноваша и воздвиго́ша главу́ свою́ на тя́, святи́телю Софро́ніе, но не убоя́лся еси́ и, благода́тію Бо́жіею укрѣпля́емь, си́це вопія́лъ еси́: да постыдя́тся и посра́мятся вку́пѣ и́щущіи ду́шу мою́. Главу́ врага́ злоко́зненнаго сокруши́въ моли́твами твои́ми, ста́до твое́ сохрани́лъ еси́ неврежде́нно. Тѣ́мже тя́ ве́сь бо́лгарскій наро́дъ сла́витъ, воспѣва́юще твоя́ труды́ и страда́нія, богому́дре Софро́ніе, ми́ръ испроси́ душа́мъ на́шимъ и ве́лію ми́лость.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Обходя́ всю́ зе́млю Бо́лгарскую, лю́ди, спя́щія отъ сна́ долговѣ́чнаго и́га, воздви́глъ еси́. И на́съ ны́нѣ воздви́гни, святи́телю Софро́ніе, отъ сна́ грѣхо́внаго, я́ко да возвели́чимъ возвели́чившаго тя́ Христа́, Бо́га на́шего.

Духо́вная уче́нія возлюби́въ и во чте́ніи Свяще́нныхъ Писа́ній упражня́яся, у́мъ Бо́гу просвѣти́вшу ти́, я́ко фи́никсъ, въ дому́ Госпо́дни, процвѣ́лъ еси́, благопло́дія слове́съ насажда́я бога́тно въ сердца́хъ вѣ́рно пою́щихъ ти́: благослове́нъ Бо́гъ оте́цъ на́шихъ.

Благода́тію Бо́жіею просвѣща́емь, я́ко со́лнце на небеси́, возсія́лъ еси́, те́плыми луча́ми озаря́я зе́млю и лю́ди, добродѣ́тели въ сердца́ люде́й насажда́я. Сего́ ра́ди научи́лъ еси́ я́ пѣ́ти: благослове́нъ Бо́гъ оте́цъ на́шихъ.

Бо́жіимъ манове́ніемъ дре́вле Моисе́й Изра́иля изведе́ отъ рабо́ты Еги́петскія; вторы́й Моисе́й яви́лся еси́, Софро́ніе, о́тче на́шъ, изводя́ лю́ди своя́ отъ рабо́ты агаря́нскія. Изба́ви и на́съ отъ фарао́на мы́сленнаго. Тѣ́мже тя́ пое́мъ во вся́ вѣ́ки.

Яко безпло́дную смоко́вницу, ду́шу мою́ не посѣцы́, Спа́се, но обогати́ ю́ стокра́тными плоды́ духо́вными гобзова́ніемъ щедро́тъ Твои́хъ. Обогати́вый святи́теля Твоего́ добродѣ́тельми, Го́споди, изба́ви и на́съ вѣ́чныхъ му́къ моли́твами его́.

Богоро́диченъ: Свѣтороди́тельнице Дѣ́во, души́ моея́ стра́сти отжени́ и да́ждь ми́ чи́сто зрѣ́ти, Влады́чице, спаси́тельную добро́ту Возсія́вшаго неизрече́нно изъ Твоея́ пречи́стыя утро́бы во свѣ́тъ язы́ковъ, Всепѣ́тая.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Архіере́я Бо́жія тя́ бы́ти вѣ́дяще, къ Вѣ́чному Архіере́ю безкро́вныя же́ртвы о людски́хъ невѣ́дѣніихъ приноси́лъ еси́, на́съ отъ грѣхо́въ искупи́вшему. Тѣ́мже тя́ превозно́симъ во вся́ вѣ́ки.

Бога́тства земна́я въ ничто́же вмѣни́въ, Ева́нгеліе еди́но сокро́вище некра́домо имѣ́лъ еси́. Ни́щь сы́й, нището́ю на́съ обогаща́я благода́тію Христа́, обнища́вшаго на́съ ра́ди и зра́къ раба́ пріи́мшаго. Того́ пое́мъ и превозно́симъ во вся́ вѣ́ки.

Іа́ковъ, бѣ́гая гнѣ́ва бра́та своего́, въ зе́млю чужду́ю оты́де, та́ко и ты́, страда́льче Софро́ніе, въ зе́млю Вла́шскую удали́лся еси́, бѣ́гая гнѣ́ва агаря́нскаго, пѣ́снь спаси́тельную поя́: Го́спода по́йте, дѣла́, и превозноси́те Его́ во вся́ вѣ́ки.

Яко пришле́цъ на земли́ чуждѣ́й бы́въ, Іеремíевымъ пла́чемъ пла́кался еси́ о ста́дѣ твое́мъ, Софро́ніе, о́тче на́шъ. Кни́ги богодухнове́нныя написа́въ и́мъ, благи́ми словесы́ утѣ́шилъ еси́ и́хъ, Бо́жіе избавле́ніе отъ долговѣко́внаго и́га обѣщава́я и́мъ. Тѣ́мже и мы́ ны́нѣ, изба́вленніи, пое́мъ: Изба́вителю Бо́же, благослове́нъ еси́.

Богоро́диченъ: Благослове́нъ Пло́дъ, Пречи́стая, чре́ва Твоего́, Имже, земнíи вси́, кля́твы изба́вихомся, Благослове́нная Всечи́стая, несказа́нное чу́до, недовѣ́домое слы́шаніе, всѣ́хъ же вѣ́рныхъ спасе́ніе.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Бо́жіимъ милосе́рдіемъ дре́вній Изра́иль отъ еги́петскаго зла́ избѣжа́, ны́нѣ и бо́лгарскій наро́дъ Бо́жіимъ промышле́ніемъ отъ и́га агаря́нскаго изба́вленъ бы́сть. Тѣ́мже и мы́ ра́достно зове́мъ: пои́мъ Го́сподеви, сла́вно бо просла́вися.

Ре́вностію Иліино́ю обдержи́мь бы́въ, святи́телю Софро́ніе, не устраша́яся преще́нія, ра́ны и гоне́нія, дерзнове́нно врага́ безбо́жнаго изобличи́лъ еси́ и, въ темни́цѣ затворя́емь, къ Бо́гу взыва́лъ еси́: Изба́вителю Бо́же, благослове́нъ еси́.

Пѣ́сненно дне́сь да почти́мъ іера́рха Христо́ва Софро́нія, отъ земли́ Бо́лгарскія возсія́вшаго и пу́ть спасе́нія на́мъ озаря́ющаго луча́ми свѣ́тлыми добродѣ́телей. Того́ моли́твами, Христе́ Бо́же на́шъ, сподо́би и на́съ чи́стымъ се́рдцемъ сла́вити Тя́ во вся́ вѣ́ки.

Житіе́ свое́ многострада́льное сконча́въ на земли́, къ небе́сному престо́лу возше́лъ еси́, нося́ вѣ́тви благодѣ́ланія. Тлѣ́нными нетлѣ́нная до́брѣ пріобрѣ́тши, Ца́рство Небе́сное отъ Христа́ прія́лъ еси́. Того́ моли́ сподо́битися на́мъ жи́зни вѣ́чныя моли́твами твои́ми.

Богоро́диченъ: Яви́ся на́мъ изъ Тебе́, Богороди́тельнице, пра́вды свѣ́тлое Со́лнце, просвѣща́ющее вся́ческая заре́ю Божества́, вопло́щся Вы́шній, Его́же ны́нѣ воспѣва́емъ: благослови́те, вся́ дѣла́ Госпо́дня, Го́спода.

Свѣти́ленъ, гла́съ 3. Подо́бенъ: Пло́тію усну́въ.

Свѣ́тло дне́сь пра́зднуемъ святу́ю па́мять твою́, іера́рше Софро́ніе, зря́щу ти́ ны́нѣ на небеси́ свѣ́тъ лица́ Бо́жія: моли́ о на́съ, пою́щихъ тя́. [Два́жды.]

Сла́ва, и ны́нѣ, богоро́диченъ, гла́съ то́йже:

По Бо́зѣ упова́ніе на́ше иму́ще на Тя́, Пречи́стая Богоро́дице, мо́лимъ Ти ся: моли́ся о на́съ [ко и́зъ Тебе́ Ро́ждшемуся, невре́дны на́съ] да́же до конца́ сохрани́ти, притека́ющихъ къ покро́ву Твоему́.

На хвали́техъ поста́вимъ стихо́въ 4 и пое́мъ стихи́ры, гла́съ 5, самогла́сны:

Пріиди́те, лю́діе, свѣ́тло торжеству́юще, да восхва́лимъ святи́теля Софро́нія, отъ земли́ Бо́лгарскія возсія́вшаго и просвѣти́вшаго ро́дъ на́шъ писа́ніемъ и уче́ніемъ свои́мъ. Ны́нѣ на небеси́ лику́етъ, боже́ственнымъ сія́ніемъ озаря́емь, лучи́ благода́тныя испуска́я, вся́ концы́ земны́я освяща́етъ. То́й бо мо́лится о на́съ Христу́ Бо́гу, спасти́ся душа́мъ на́шимъ. [Два́жды.]

Возсія́ дне́сь пресвѣ́тлая па́мять твоя́, святи́телю Софро́ніе, а́нгели бо лику́ютъ на небеси́ и ли́къ святи́телей ра́дуется. Це́рковь Бо́лгарская, кровьми́ му́ченикъ обагре́нная, украси́ся сла́внымъ и́менемъ твои́мъ. Сего́ ра́ди и мы́ согла́сно вопіе́мъ ти́: сла́ва Просла́вльшему тя́ на земли́ и Спа́сшему на́съ те́плыми твои́ми моли́твами.

Святи́телю Софро́ніе, мра́къ безбо́жія и тму́ невѣ́дѣнія мо́лніями уче́нія твоего́ отгоня́я, пу́ть спасе́нія лю́демъ показа́лъ еси́, агаря́нская муче́нія и гоне́нія претерпѣва́я, неви́нныя отъ сме́рти спа́слъ еси́, о́трасли но́выя возрасти́лъ еси́ отъ му́ченическія кро́ви, зе́млю Бо́лгарскую напои́вшей. И ны́нѣ на небеси́ пребыва́я, моли́ Христа́ Бо́га, да спасе́тъ ду́ши на́ша.

Сла́ва, гла́съ то́йже:

Іера́рше Софро́ніе, житіе́ и страда́ніе свое́ са́мъ написа́въ, завѣ́тъ на́мъ оста́вилъ еси́, да послѣ́дуемъ стопа́мъ твои́мъ, я́коже и ты́ Христу́ Бо́гу подража́тель бы́лъ еси́, прославля́я Его́ въ души́ и тѣлеси́ свое́мъ. Вѣне́цъ нетлѣ́нія отъ Него́ пріе́мъ, со а́нгелы ны́нѣ на небеси́ лику́еши, о на́съ при́сно моли́ся, да сподо́бимся Ца́рствія Христо́ва моли́твами твои́ми.

И ны́нѣ, богоро́диченъ, гла́съ то́йже.

Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́мую, тве́рдую Предста́тельницу и прибѣ́жище ду́шъ на́шихъ.

Славосло́віе вели́кое, тропа́рь, [ектеніи́] и отпу́стъ.



НА ЛИТУРГІИ,

Блаже́нна [отъ кано́на, пѣ́снь 3-я и 6-я.] Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́емъ, зача́ло 335: Бра́тіе, повину́йтеся наста́вникомъ ва́шимъ... Аллилу́ія, гла́съ 4: Воззва́ша пра́ведніи [и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ [и отъ всѣ́хъ и́хъ изба́витъ я́ Госпо́дь]. Ева́нгеліе отъ Луки́, зача́ло 24: Во вре́мя о́но, ста́ Іису́съ на мѣ́стѣ ра́внѣ... Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Коне́цъ и Бо́гу сла́ва.

Источникъ: Служби на българските светии. — Света Гора, Атон: Славянобългарски манастир «Св. Вмчк Георги Зограф», 2007. — Л. 111-132.

/ Къ оглавленію раздѣла /


Наверхъ / Къ титульной страницѣ

0