Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 11-й де́нь.
Слу́жба и́же во святы́хъ отца́ на́шего Евѳи́мія, архіепи́скопа Новгоро́дскаго, чудотво́рца.

[ВЕЧЕРЪ,]
На Го́споди, воззва́хъ: стихи́ры, гла́съ 8. Подо́бенъ: О, пресла́внаго чудесе́!

Прему́дрости и ра́зума* я́ко испо́лненъ бы́въ, богоблаже́нне,* христоимени́тымъ лю́демъ* изря́дный па́стырь бы́лъ еси́,* тѣ́хъ на па́жити благоче́стія наставля́я,* непокаря́ющіяся же прему́дрѣ исправля́я.* Тѣ́мже ны́нѣ ча́да твоя́, святи́телю Евѳи́міе,* па́мять твою́ пра́зднующе,* воспѣва́емъ Христа́ Бо́га на́шего,* тебе́ просла́вльшаго.

Благоче́стно житіе́ на земли́,* я́ко а́нгелъ, пожи́въ, святи́телю,* Це́рковь Боже́ственную украси́лъ еси́* твои́ми честны́ми уче́ніи,* лю́ди, тебѣ́ Бо́гомъ вруче́нныя,* му́дрѣ наставля́еши къ Того́ разумѣ́нію.* Тѣ́мже и Христо́съ тебе́ не то́кмо въ животѣ́,* но и по преставле́ніи прославля́етъ* и даро́въ чуде́съ сподобля́етъ, еди́нъ Человѣколю́бецъ.

Сла́ва, гла́съ 6:

Сто́лпъ непоколеби́мь Це́ркве Христо́вы, о́тче, бы́лъ еси́, тѣ́мже, боже́ственною ре́вностію разже́гся дерзнове́нно, непра́ведное сочета́ніе пра́ведно разоря́еши и науча́еши всѣ́хъ апо́стольскимъ и оте́ческимъ преда́ніемъ послѣ́довати и отъ любодѣ́йствія, я́ко отъ змíя, отбѣга́ти; непокаря́ющіяся же твоему́ свято́му уче́нію, суду́ Бо́жію ты́я предае́ши. Его́же моли́, архіере́ю Евѳи́міе, спасти́ся всѣ́мъ, и́же любо́вію почита́ющимъ свяще́нную па́мять твою́.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ. Проки́менъ дне́. Чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи, [стихи́ра хра́ма]. Сла́ва, [святи́теля], гла́съ 8:

Пріиди́те, празднолю́бцы, въ наро́читомъ пра́здницѣ до́браго па́стыря и учи́теля духо́внѣ торжеству́емъ, честны́я твоя́ мо́щи любе́зно зря́ще и те́плою вѣ́рою взыва́юще: преблаже́нне святи́телю Евѳи́міе, моли́ Христа́ Бо́га о творя́щихъ святу́ю па́мять твою́.

И ны́нѣ, богоро́диченъ.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Богому́дре святи́телю Евѳи́міе,* ты́ твои́ми моли́твами и посто́мъ,* бдѣ́ніемъ же и ми́лостынею Бо́гови соедини́лся еси́,* тѣ́мже Ду́ху Пресвято́му до́мъ и жили́ще показа́лся еси́.* Отону́дуже архіере́й Це́ркви Христо́вѣ, о́тче, бы́лъ еси́,* моли́ спасти́ся душа́мъ на́шимъ.

Сти́хъ: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ.

Повину́яся за́повѣди Бо́га Вседержи́теля, отъ ю́ности твоея́* Того́ стопа́мъ, святи́телю, послѣ́довалъ еси́.* Тѣ́мже отъ Него́ благода́ть прія́лъ еси́* дѣ́йствовати пресла́вная чудеса́* и ду́хи прогони́ти лука́выя* отъ всѣ́хъ, любо́вію чту́щихъ тя́.

Сти́хъ: Услы́шите сія́, вси́ язы́цы,* внуши́те, вси́, живу́щіи по вселе́ннѣй.

Кро́токъ и незло́бивъ* во все́й жи́зни твое́й бы́лъ еси́, святи́телю Евѳи́міе,* сего́ ра́ди обрѣ́лъ, я́коже жела́лъ еси́,* на небесѣ́хъ со святы́ми поко́й.* Тѣ́мже почита́емъ святу́ю па́мять твою́,* вѣ́рою пра́зднующе, богоблаже́нне и всече́стне.

Сла́ва, гла́съ 4:

Вели́каго архіере́я Евѳи́мія блаже́ннаго свяще́нную па́мять дне́сь соверша́юще, боже́ственными пѣ́сньми, пріиди́те, вси́ почти́мъ, о на́съ всегда́ моля́щася низпосла́ти мно́жество щедро́тъ и спасе́ніе душа́мъ на́шимъ.

И ны́нѣ, богоро́диченъ: При́зри на моле́нія...

Тропа́рь, гла́съ 4:

Избра́нъ бы́въ Бо́гови отъ ю́ности, святи́телю Евѳи́міе, и, сего́ ра́ди архіере́йства са́номъ почте́нъ бы́въ, упа́слъ еси́ лю́ди, и́же тебѣ́ Бо́гомъ вруче́нныя; тѣ́мже и по преставле́ніи чуде́съ дарова́нія отъ Го́спода прія́лъ еси́ исцѣля́ти разли́чныя неду́ги. Того́ моли́ о на́съ, соверша́ющихъ честну́ю па́мять твою́, да тебе́ вси́ непреста́нно ублажа́емъ.

Сла́ва, и ны́нѣ, богоро́диченъ: Еже отъ вѣ́ка утае́нное...



[НА УТРЕНИ,]

По 1-й каѳи́смѣ сѣда́ленъ святи́теля, гла́съ 1. Подо́бенъ: Ка́мени запеча́тану.

Уче́ньми твои́ми и дѣ́лы Це́рковь Христо́ву украси́лъ еси́, Евѳи́міе святи́телю, отону́дуже въ мíрѣ просія́ твое́ добродѣ́тельное житіе́: въ моли́твахъ, и поще́ніихъ, и бдѣ́ніихъ о́бразъ ученико́мъ бы́лъ еси́. Тѣ́мже вопіе́мъ: сла́ва Да́вшему ти́ крѣ́пость, сла́ва Вѣнча́вшему тя́, сла́ва Даю́щему тобо́ю всѣ́мъ исцѣле́ніе.

Сла́ва:

Егда́ къ Боже́ственному жела́нію восклони́вся, горѣ́ мудрова́нія имѣ́лъ еси́: до́лу влеку́щая отри́нувъ, и я́же на земли́ вся́ возненави́дѣвъ, и Христу́, блаже́нне, присво́ился еси́, Его́же моли́ о пою́щихъ тя́.

И ны́нѣ, богоро́диченъ:

Наста́ви ны́ на пу́ть покая́нія, укло́ншіяся при́сно къ безпу́тіемъ зо́лъ и преблага́го прогнѣ́вавшія Го́спода, неискусобра́чная Благослове́нная Марíе, прибѣ́жище отча́янныхъ человѣ́ковъ, Бо́жіе жили́ще.

По 2-й каѳи́смѣ сѣда́ленъ, гла́съ 4:

Смиренному́дріе предпочита́я бы́лъ еси́, Евѳи́міе святи́телю, и отсю́ду просла́вился еси́ я́ко Боже́ственный архіере́й, принося́ же́ртвы поже́ршемуся во́лею Христу́ Бо́гу на́шему, Его́же моли́ спасти́ся душа́мъ на́шимъ.

Сла́ва:

Зе́млю се́рдца твоего́ моли́твеннымъ ра́ломъ обнови́въ, и болѣ́зньми по́стническими, я́ко безпло́тенъ, пожи́въ, и архіере́йства па́ству до́брѣ упа́съ, и сего́ ра́ди пресели́вся въ премíрная, моли́ спасти́ся душа́мъ на́шимъ.

И ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее во страстѣ́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

[Зри́:] Аще ли прилучи́тся въ по́стный де́нь, глаго́лемъ сѣда́льны по 1-й каѳи́смѣ и по 2-й, тріо́ди, а по 3-й каѳи́смѣ глаго́лемъ сѣда́льны о́ба святи́теля.

По поліеле́и сѣда́ленъ святи́теля, гла́съ 8. Подо́бенъ: Прему́дрости.

Яко добродѣ́теленъ и кро́токъ, Це́рковь Христо́ву уясни́лъ еси́, дѣ́лы соблю́дъ е́же по о́бразу Бо́жію, архіере́ю вели́кій Евѳи́міе, просія́ бо добродѣ́тельное твое́ житіе́ въ мíрѣ и отъ всѣ́хъ сла́вится. Тѣ́мже вси́, благодаря́ще, вопіе́мъ ти́: богоблаже́нне святи́телю, моли́ Христа́ Бо́га грѣхо́въ оставле́ніе дарова́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе отъ Іоа́нна, зача́ло 35 отъ полу́.

По 50-мъ псалмѣ́ стихи́ра, гла́съ 6:

Благоуха́етъ честна́я ра́ка моще́й твои́хъ, Евѳи́міе святи́телю, всѣ́мъ вѣ́рнымъ исцѣле́ніе душа́мъ и тѣлесе́мъ да́рующи. Тѣ́мже тя́ мо́лимъ, богодарова́нное твое́ ста́до въ ми́рѣ соблюсти́, Импера́тора же и кня́зи и все́ правосла́віе, да вси́ тя́ я́ко и́стиннаго па́стыря и моли́твенника къ Бо́гу непреста́нно велича́емъ.

Кано́нъ святи́теля Евѳи́мія. Творе́ніе Пахо́мія, и́же отъ Святы́я Горы́. Гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты Еги́петскія, я́ко просла́вися.

Яко рѣка́ прему́дрости и ра́зума, святи́телю Евѳи́міе, бы́лъ еси́, ка́плю и мнѣ́ да́руй, да возмогу́ и а́зъ ма́лое руки́ моея́ хвале́ніе твоему́ вели́честву принести́, блаже́нне.

Судо́мъ Бо́жіимъ и человѣ́ческимъ избра́ніемъ архіере́йства ма́стію пома́занъ бы́въ, святи́телю Евѳи́міе, па́стырь преизря́денъ бы́лъ еси́, же́ртвы Бо́гу вся́чески принося́, свяще́нне.

Источа́ютъ прему́драя уче́нія устнѣ́ твои́, святи́телю, боже́ственную сла́дость иму́ще, е́юже напита́вшеся, ча́да твоя́, тебе́ любо́вію непреста́нно почита́емъ.

Богоро́диченъ: Иже на́съ ра́ди изъ Тебе́, Дѣ́во, въ человѣ́ка премно́гою бла́гостію облекíйся, свяще́нныхъ собо́ры, Того́ возлю́бльшія, просла́вилъ е́сть.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Житіе́ по Бо́зѣ стяжа́въ, святи́телю, въ постѣ́ и моли́твѣ мно́го вре́мя пре́былъ еси́, вери́ги тя́жки нося́ на тѣ́лѣ твое́мъ, я́же ны́нѣ зря́ще, чуди́мся терпѣ́нію твоему́.

Дѣ́лы и словесы́ Боже́ственными укра́шенъ бы́въ, святи́телю Евѳи́міе, Це́рковь Христо́ву благоче́стно упа́слъ еси́, тѣ́мже и ра́дости сподо́бился еси́ Го́спода твоего́, на́съ помина́й, тебе́ сла́вящихъ.

Житіе́ твое́, блаже́нне, добродѣ́тельми уясни́лъ еси́, тѣ́мже твоя́ исправле́нія по мно́гимъ страна́мъ проповѣ́даются, о́тче, и, отъ земли́ преше́дъ, дости́глъ еси́ е́же та́мо со святы́ми пребыва́нія.

Богоро́диченъ: Пала́ту кра́сную неизрече́ннаго бога́тства, Дѣ́во, зна́емъ и по до́лгу Тя́ сла́вимъ, спа́сшіися Рождество́мъ Твои́мъ, Всенепоро́чная.

Сѣда́ленъ, гла́съ 8. Подо́бенъ: Прему́дрости.

Умная очеса́, святи́телю, я́ко всегда́ имѣ́я къ Бо́гу просте́рта, у́жемъ желѣ́знымъ обложи́въ себе́, блаже́нне, мно́гажды всю́ но́щь безъ сна́ пребы́лъ еси́, удруча́я пло́ть твою́, преблаже́нне; вери́ги же, я́же на тебѣ́, не позна́ни бы́ша, да́же до исхо́да е́же отсю́ду. Тѣ́мже и Христо́съ, Его́же ра́ди жесто́кое житіе́ претерпѣ́лъ еси́, да́руетъ тебѣ́ неболѣ́зненное е́же на небесѣ́хъ житіе́. Того́ моли́, святи́телю Евѳи́міе, согрѣше́ній оставле́ніе дарова́ти, чту́щимъ любо́вію свяще́нную па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Храни́тель бу́ди оте́честву твоему́ и лю́демъ, святи́телю, избавля́я вра́гъ наше́ствія, гла́да же и па́губы, да, моли́твами твои́ми спа́сшеся, тебе́ вси́ я́ко засту́пника велича́емъ.

Любому́дренно душе́вный кора́бль въ ти́хое приста́нище управля́я, святи́телю, моли́твамъ и ми́лостыни прилѣжа́лъ еси́, тлѣ́нное бога́тство въ нетлѣ́нное, богоблаже́нне, прелага́я. Тѣ́мже и прія́лъ еси́ небе́сное бога́тство.

Чи́сто о́ко душе́вное имѣ́я, зри́тельно небе́снаго восхо́да, тѣ́мже на земли́ жи́знь твою́ до́брѣ упра́вилъ еси́, святи́телю. Сего́ ра́ди це́рковь Бо́га Жива́го, Евѳи́міе, бы́лъ еси́.

Богоро́диченъ: Бо́гъ, изъ Тебе́ роди́вся, Госпоже́ Всенепоро́чная, отъ облада́юща врага́ мíръ Тебе́ ра́ди изба́ви, святи́тельскій же ли́къ, же́ртву Тому́ принося́щій, возвели́чи.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Блаже́нную жи́знь, святи́телю Евѳи́міе, на земли́ пожи́лъ еси́ и отсю́ду къ небе́сному житію́ сла́вно преше́лъ еси́. Тѣ́мже, и по преставле́ніи твое́мъ ра́ку твою́ обстоя́ще и любе́зно покланя́ющеся тебѣ́, свяще́ніе почерпа́емъ.

Преосвяще́нствованъ душе́ю и тѣ́ломъ, о́тче, бы́лъ еси́, свѣ́тло Влады́чнѣй трапе́зѣ предстои́ши, Же́ртву Тому́ Безкро́вную принося́. Тѣ́мже я́ко священнотаи́нникъ прилѣ́жно о на́съ моли́ся.

Дре́вняго Корни́лія моли́твѣ и ми́лостыни подо́бяся, ми́лостивъ къ тре́бующимъ, о́тче, бы́лъ еси́, тѣ́мъ отъ Христа́ Бо́га досто́йно слы́шиши: моли́твы твоя́ и ми́лостыни взыдо́ша предо Мно́ю. Сего́ гла́са и на́мъ услы́шати, блаже́нне, помоли́ся.

Богоро́диченъ: Свяще́нными гла́сы Тя́, добро́ту Іа́ковлю, пое́мъ, пло́тски ро́ждшую мíрови Свѣ́тъ, Иже отъ Свѣ́та, просвѣща́ющій архіере́йскія собо́ры.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Сы́нъ свѣ́та и дне́, святи́телю, бы́лъ еси́, тѣ́мже и всели́лся еси́, идѣ́же свѣ́тъ невече́рній и поко́ища пра́ведныхъ, того́ свѣ́та моли́ получи́ти всѣ́мъ, па́мять твою́ пра́зднующимъ.

Свяще́нныя и пречестны́я хра́мы въ сла́ву святы́хъ мно́гія воздви́глъ еси́, тѣ́мже и мно́гія святы́я имѣ́лъ еси́ хода́таи, промышля́ющія тебѣ́ поле́зная, но, я́ко съ ни́ми водворя́яся, о на́съ моли́ся.

Свѣ́тло лице́ въ жи́зни имѣ́я, блаже́нне, потща́лся еси́ свѣтлѣ́йшу и ду́шу твою́ Христу́ предста́вити, е́же и получи́лъ еси́, Евѳи́міе. Тѣ́мже бу́ди те́плый моли́твенникъ, я́ко святи́тель о чту́щихъ тя́.

Богоро́диченъ: Во утро́бу Твою́ всели́вся, все́ человѣ́ческое существо́ обожи́ и святи́телей ли́къ мно́жество свяще́нно привлече́ сла́вити Тя́, Богоневѣ́сто.

Конда́къ, гла́съ 8. Подо́бенъ: Взбра́нной.

Яко архіере́емъ сопресто́льникъ и святи́телемъ изря́дный побо́рникъ бы́лъ еси́, святи́телю Евѳи́міе, не преста́й сохраня́я оте́чество твое́, гра́дъ же и лю́ди, и́же тебе́ вѣ́рою почита́ющія и честны́мъ моще́мъ твои́мъ покланя́ющіяся, да велегла́сно тебѣ́ вси́ вопіе́мъ: ра́дуйся, святи́телю богому́дре.

Икосъ:

Ева́нгельскому словеси́ вня́тъ, преподо́бне, душе́вный ра́зумъ впери́въ къ просвѣще́нію свѣтолу́чныя зари́, душетлѣ́нныя стра́сти до конца́ потреби́лъ еси́. Добродѣ́тельнымъ же житіе́мъ а́нгеломъ и человѣ́комъ преди́венъ показа́лся еси́. И сего́ ра́ди вели́каго Нова́града архіере́йства сподо́бився, Це́рковь украси́лъ еси́, лю́ди просвѣти́лъ еси́ и до конца́ въ правосла́віи утверди́лъ еси́, да вси́ велегла́сно вопіе́мъ ти́: ра́дуйся, Евѳи́міе, святи́телю богому́дре.

Пѣ́снь 7.

Ирмо́съ: Тѣ́лу злато́му прему́дрыя дѣ́ти не послужи́ша, и въ пла́мень са́ми поидо́ша, и бо́ги и́хъ обруга́ша, среди́ пла́мене возопи́ша и ороси́ я́ а́нгелъ: услы́шася уже́ у́стъ ва́шихъ моли́тва.

Вели́кій Но́вградъ, и́же въ себѣ́ тебе́ стяжа́вый, ра́достію ра́дуется, святи́телю Евѳи́міе: тя́ бо, я́ко стѣ́ну имѣ́я тве́рду и сто́лпъ необори́мъ, Христа́ воспѣва́етъ, тебе́ сему́ дарова́вшаго.

Иже пре́жде тебе́ бы́вшимъ архіере́омъ красота́ бы́лъ еси́, блаже́нне, святи́телей удобре́ніе, мона́ховъ о́бразъ, Христо́вы же Це́ркве преизря́дный па́стырь яви́лся еси́, богоблаже́нне о́тче Евѳи́міе.

Иліину́ ре́вность воспріи́мъ, святи́телю, тѣ́мже ни преще́нія, ни моле́нія согрѣша́ющихъ возмого́ша увѣща́ти тя́, е́же тѣ́хъ о согрѣше́ніихъ не облича́ти. Ты́ же не преста́лъ еси́, до́ндеже коне́чнѣе о́нѣхъ испра́вилъ еси́.

Богоро́диченъ: Кра́сную обрѣ́тъ и до́брую въ жена́хъ Тя́, Пречи́стая, прекра́сное Сло́во всели́ся въ пречи́стое чре́во Твое́, вся́ ли́ки святи́телей освя́щъ, зову́щія: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Судо́мъ Бо́жіимъ и всенаро́днымъ избра́ніемъ отню́дуже при́званъ бы́лъ еси́, преподо́бне, на престо́лъ вели́кія Це́ркве, та́мо па́ки отхо́диши промышле́ніемъ твоего́ Влады́ки, да отню́дуже сія́ прія́лъ еси́, па́ки та́мо чи́ста того́ съ душе́ю Бо́гу преда́си.

Пречестна́я ра́ка, богоблаже́нне, идѣ́же положено́ бы́сть честно́е тѣ́ло твое́, святи́телю, благово́ніе и освяще́ніе всѣ́мъ, вѣ́рою приходя́щимъ, испуща́етъ, отъ души́ Христу́ вопію́щимъ: благослови́те, вся́ дѣла́, Го́спода и превозноси́те Его́ во вѣ́ки.

Христо́съ тя́ святи́теля избра́, я́ко нѣ́кое свѣти́ло, могу́ща тве́рдь церко́вную просвѣща́ти и свои́ми уче́ньми лю́ди, тебѣ́ вруче́нныя, наставля́ти Творцу́ вопи́ти: благослови́те, вся́ дѣла́, Го́спода и превозноси́те Его́ во вѣ́ки.

Богоро́диченъ: Уны́лъ имѣ́я по́мыслъ и ду́шу, сластьми́ отягче́ну, къ Тебѣ́ прибѣга́ю, Богороди́тельнице Чи́стая, и вопію́ Ти: воздви́гни и спаси́ мя, окая́ннаго и осужде́ннаго.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Оби́тель, въ не́йже сподо́бился еси́ яре́мъ Христо́въ прія́ти, та́мо вся́ дни́ твоя́ вѣ́рою и ду́хомъ кромѣ́ тѣлесе́ неразлу́ченъ, о́тче, пребы́лъ еси́, тѣ́мже и по преставле́ніи та́мо повелѣва́еши положи́тися, идѣ́же и чуде́съ дарова́нія отъ Го́спода, святи́телю Евѳи́міе, прія́лъ еси́.

Руко́ю мое́ю недосто́йною приноси́мое тебѣ́ съ трудо́мъ хвале́ніе, святи́телю Евѳи́міе, не пре́зри, но пріими́ и моли́ Творца́ твоего́ и Влады́ку та́мошняго мя́ изба́вити вѣ́чнаго муче́нія, тебе́ вѣ́рою почита́юща.

Пѣвцы́ твоя́, тебе́ и́скренно воспѣва́ющія и твою́ па́мять честну́ю, святи́телю Евѳи́міе, вѣ́рою прославля́ющія, освяти́ и просла́ви и отъ бѣ́дъ избавля́й, и напа́стей, и та́мо вѣ́чнаго муче́нія, да тебе́ всегда́ воспѣва́ютъ.

Богоро́диченъ: Пощади́ мя, Го́споди, пощади́, егда́ хо́щеши ми́ суди́ти, и не осуди́ мене́ во о́гнь, да не я́ростію обличи́ши мене́, мо́литъ Тя́ Дѣ́ва, Тебе́ ро́ждшая, Христе́, а́нгельстіи собо́ри и святи́телей совокупле́нія.

Свѣти́ленъ. Подо́бенъ: Посѣти́лъ ны́ е́сть.

Дне́сь святи́теля Евѳи́мія свѣ́тлая наста́ па́мять, вѣ́рныя просвѣща́етъ и тму́ пре́лести разоря́етъ, вѣ́рою приходя́щимъ къ честны́мъ того́ моще́мъ. [Два́жды.]

Богоро́диченъ:

Свѣ́тъ возсія́ безлѣ́тный отъ Отца́ пре́жде вѣ́къ, въ лѣ́то ны́нѣ напослѣ́докъ, изъ Тебе́, Дѣ́во, яви́ся на спасе́ніе мíра. Къ Нему́же не преста́й о лю́дехъ Твои́хъ моля́щися.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

Неукло́нно, преблаже́нне,* пу́ть жи́зненный ше́ствовалъ еси́:* по́стническими боре́ніи* вся́ плотска́я мудрова́нія умертви́лъ еси́,* кра́сная мíра оста́вилъ еси́,* небе́сную красоту́ возлюби́лъ еси́,* идѣ́же со а́нгелы при́сно весели́шися.* Святи́телю Евѳи́міе,* моли́ спасти́ся душа́мъ на́шимъ. [Два́жды.]

Въ ю́ности цѣлому́дріе стяжа́лъ еси́,* въ ста́рости ра́зумъ обостри́лъ еси́,* ду́шу пресвѣ́тлу сотвори́лъ еси́,* архіере́йства са́нъ воспріе́мъ,* Це́рковь добро́тами украси́лъ еси́,* лю́ди твоя́ просвѣти́лъ еси́.* Сего́ ра́ди тя́ почита́емъ,* святи́телю богому́дре,* моли́ о творя́щихъ па́мять твою́.

Собери́теся, празднолю́бцы, дне́сь,* въ па́мять Евѳи́мія святи́теля,* и сію́ ку́пно вси́ торжеству́йте:* се́й бо благоче́стія подража́тель* и о ста́дѣ свое́мъ те́плый моли́твенникъ,* Россíйскія земли́ удобре́ніе,* вели́каго же Нова́града похвала́ и утвержде́ніе,* къ нему́же прилѣ́жно возопіе́мъ:* моли́ Христа́ Бо́га о чту́щихъ па́мять твою́.

Сла́ва, самогла́сенъ, гла́съ то́йже:

Дне́сь воспое́мъ святи́теля, благоче́стія наста́вника, Це́ркве столпа́ непоколеби́ма, исто́чника исцѣле́ній неисчерпа́ема, проли́тіе дарова́ній духо́вныхъ, вели́каго же Нова́града просвѣти́теля и о всѣ́хъ моли́твенника те́пла. Къ нему́же возопіи́мъ: святи́телю Евѳи́міе, не преста́й моля́ся за ду́ши на́ша.

И ны́нѣ: Влады́чице, пріими́ моли́твы ра́бъ Твои́хъ...

[Зри́:] Аще ли суббо́та, пое́мъ Славосло́віе вели́кое. Аще ли по́стъ, на стихо́внѣ въ тріо́ди.
Сла́ва, святи́теля, гла́съ 6:

Отрокъ яви́лся еси́ смире́нъ, беззло́біемъ украша́яся, сего́ ра́ди Христо́съ Бо́гъ овца́мъ Свои́мъ па́стыря тя́ поста́ви и я́ко неисче́тно бога́тство Свои́хъ щедро́тъ яви́ тя вели́кому Нову́граду, обурева́емымъ во ско́рбѣхъ ти́хое приста́нище. И ны́нѣ, святи́телю, не премолчи́, вопія́ за ны́ ко Го́споду.

И ны́нѣ: Богоро́дице, Ты́ еси́ лоза́ и́стинная...
Аще ли среда́ или́ пято́къ, крестобогоро́диченъ:

Ви́дящи Тя́ распина́ема, Христе́,* Тебе́ ро́ждшая вопія́ше:* что́ стра́нное* е́же ви́жу та́инство, Сы́не Мо́й?* Ка́ко на дре́вѣ умира́еши, пло́тію повѣ́шенъ,* жи́зни Пода́телю?


НА ЛИТУРГІИ,

Аще суббо́та, блаже́нна святи́теля, пѣ́снь 3-я и 6-я, и про́чая слу́жба святи́тельская: [Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 58 об. – 64 об.

/ Къ оглавленію раздѣла /


Наверхъ / Къ титульной страницѣ

0