Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 11-й де́нь.
Иже во святы́хъ отца́ на́шего Софро́нія, патріа́рха Іерусали́мскаго.

[ВЕЧЕРЪ,]
На Го́споди воззва́хъ: стихи́ры Софро́нія, гла́съ 4. Подо́бенъ: Яко до́бля.

Изъ у́стъ богослове́сныхъ* богосло́вна возгремѣ́лъ еси́ уче́нія,* Софро́ніе всеблаже́нне,* богосло́вивъ яснѣ́йше Отца́ Безнача́льна,* и Собезнача́льна Сы́на,* и Ду́ха Свята́го Соприсносу́щна,* во Еди́ницѣ Тро́ицу* и Еди́ницу въ Тро́ицѣ,* Бо́га Еди́наго суще́ственнымъ то́ждествомъ.

Пло́ти по ѵпоста́си* соеди́ншася безпло́тнаго* и Отцу́ Собезнача́льнаго Сло́ва, всему́дре,* кромѣ́ преложе́нія и слія́нія,* му́дрѣ научи́лъ еси́,* дѣ́йствующа же сугу́бо* обои́ми естествы́,* изъ ни́хже слежи́тъ и въ ни́хже зри́тся,* Еди́нъ Сы́й, нераздѣ́ленъ Существо́мъ,* въ се́мъ и о́номъ разумѣва́емый.

Сла́ва, и ны́нѣ, богоро́диченъ, гла́съ и подо́бенъ то́йже:

Ту́чами Ду́ха Пресвята́го, Пречи́стая,* мою́ мы́сль ороси́,* я́же ка́плю ро́ждшая — Христа́, неизче́тно* безмѣ́рная беззако́нія человѣ́ковъ* щедро́тами измы́вшую,* изсуши́ исто́чникъ страсте́й мои́хъ* и пото́ка мя́ сподо́би* пи́щи живы́я при́сно* моли́твами Твои́ми.

Крестобогоро́диченъ. Подо́бенъ то́йже:

На Крестѣ́ Тя я́ко узрѣ́* пригвожде́на, Го́споди,* Агница и Ма́ти Твоя́ дивля́шеся* и — что́ видѣ́ніе сіе́? — взыва́ше, —* Сы́не вожделѣ́нне,* сія́ Ти непокори́вый собо́ръ воздаде́ беззако́нный,* и́же мно́гихъ Твои́хъ чуде́съ наслади́выйся?* Но сла́ва неизглаго́ланному* соше́ствію Твоему́, Влады́ко.


[НА УТРЕНИ,]
Кано́нъ, его́же краегране́сіе: Цѣлому́дрія пою́ тезоимени́таго и́скренно же́ртву. Ки́ръ Ѳеофа́на. Гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Цѣлому́дренно преплы́лъ еси́ цѣлому́дрія пучи́ну, вѣ́тры духо́вными направля́емь, и собра́лъ еси́ мно́го бога́тства, му́дрости дарова́нія, о́тче Софро́ніе.

Яко а́нгелъ бы́лъ еси́ Христо́ва Воскресе́нія и предсѣда́тель боже́ственъ, Боже́ственнаго Гро́ба, обогати́вшаго исто́чникомъ безсме́ртія, Христа́, воздви́гшаго паде́ніе ро́да на́шего.

Свѣ́тлостію слове́съ твои́хъ и ума́ острото́ю мíръ уясни́лъ еси́, богосло́вивъ я́сно Тріѵпоста́снаго Божества́ Существо́, Еди́ницу Тричи́сленную, о́тче Софро́ніе.

Глаго́лъ вѣща́ніе твое́ и уче́ній благознамени́тая гу́сль протече́ земны́я концы́, та́инству строе́нія сло́ва уча́щая, о́тче Софро́ніе.

Богоро́диченъ: Сы́й естество́мъ несозда́ненъ, и Отцу́ соприсносу́щенъ, и време́нъ превы́шшій, и превѣ́чный, изъ Тебе́, Влады́чице, зи́ждемь, и подъ лѣ́томъ я́ко Человѣ́къ быва́етъ, спаса́я человѣ́ка.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Утвержда́ема па́лицею слове́съ твои́хъ, преподо́бне, стремле́нія злочести́выхъ и богобо́рныхъ ересе́й отража́етъ, отгоня́щи, Це́рковь Христо́ва.

Побо́рствовавъ по честнѣ́мъ, богоно́се, проповѣ́даніи, показа́лся еси́ побѣди́тель по́мощію Ду́ха, му́дрѣ укрѣпля́емь, о́тче Софро́ніе.

Умертви́въ все́ тлѣ́емое пло́ти сладостра́стіе, нетлѣ́нную ду́шу благоче́стіемъ оживи́лъ еси́ и сію́ показа́лъ еси́ Боже́ственный орга́нъ.

Богосло́вный, и кра́сный, и медото́чный язы́къ тво́й сло́ва рѣ́ки источа́етъ, богопрія́тне, Боже́ственная уче́нія всѣ́мъ излива́я.

Богоро́диченъ: Тя́, ро́ждшую Бо́га, Богоро́дицу сла́вимъ, Рождеству́ Твоему́ именова́ніемъ сли́чествующе и зва́нія по обоему́, Пречи́стая Влады́чице.

Сѣда́ленъ, гла́съ 4. Подо́бенъ: Ско́ро предвари́.

Словесы́ украси́лъ еси́ Це́рковь Христо́ву, дѣ́лы соблю́дъ е́же по о́бразу Бо́жію, Софро́ніе преподо́бне, просія́ бо въ мíрѣ, е́же въ тебѣ́ цѣлому́дріе, благода́ть уче́ній облиста́ющая всѣ́мъ, любо́вію пра́зднующимъ, о́тче, па́мять твою́.

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее во страстѣ́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

Крестобогоро́диченъ:

На Крестѣ́ Тя́ возвы́шена я́ко узрѣ́ Пречи́стая Ма́ти Твоя́, Сло́ве Бо́жій, ма́терски рыда́ющи, вѣща́ше: что́ но́вое и стра́нное сіе́ чу́до, Сы́не Мо́й? ка́ко, Жи́знь всѣ́хъ, вкуша́еши сме́рти, оживи́ти уме́ршія хотя́, я́ко Благоутро́бенъ?

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Еди́но Безнача́льное Существо́ въ Тре́хъ Ѵпоста́сѣхъ сво́йствы соверше́нными ты́, о́тче, му́дрѣ проповѣ́далъ еси́, раздѣля́емое непресѣко́мо, совокупля́емо же неслія́нно во́лею еди́ною и Божество́мъ.

Имѣ́я цѣлому́дренну мы́сль и у́мъ цѣлому́дрѣйшій, не смѣше́ніе мудрова́лъ еси́, о́тче, ни преложе́ніе, ниже́ слія́ніе соедине́нныхъ непрело́жно двои́хъ есте́ствъ во еди́номъ Христѣ́ Единоро́днѣмъ, всеблаже́нне.

Просвѣща́емь Боже́ственнѣ просвѣще́ніемъ Ду́ха, лю́тое неи́стовство Несто́ріево разори́лъ еси́ то́южде во́лею и ра́зумомъ и́же соедине́ніе проповѣ́давшаго Христо́ву обою́ естеству́.

Пи́рра попали́лъ еси́, богому́дре, огне́мъ уче́ній твои́хъ, отмета́юща два́ бы́ти Христо́ва хотѣ́нія, разли́чными существы́, я́же по себѣ́, дѣ́йства же вку́пѣ сугу́ба, о́тче преподо́бне.

Богоро́диченъ: Украси́лася еси́ па́че всего́ а́нгельскаго благолѣ́пія, я́ко ро́ждши си́хъ, Отрокови́це, Творца́ же и Го́спода, отъ Твои́хъ пречи́стыхъ крове́й воплоща́ема, избавля́ющаго вся́, Того́ сла́вящія.

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Честно́е Воскресе́ніе и Гро́бъ Жи́зни неукло́нною любо́вію зря́, боговидѣ́нія поче́рплъ еси́ тайноуче́нія и вѣ́рнымъ препо́далъ еси́, святи́телю, сія́нія.

Вся́чески возлюби́лъ еси́ еди́наго Блага́го, разже́гся заре́ю мы́сленною, и исто́чникъ возлюби́лъ еси́ нетлѣ́нія, видѣ́ньми, всему́дре, къ Нему́ простира́яся.

Хра́мъ жи́въ и одушевле́нъ бы́лъ еси́ Бо́жій, умертви́вся всѣ́мъ, су́щимъ на земли́, сло́ва трапе́зу оби́льную стяжа́въ, преподо́бне, и свѣти́льникъ вѣ́ры.

Богоро́диченъ: Во двою́ разумѣва́ема существу́, Христа́, Сы́на Единоро́днаго Бо́жія, Безнача́льнаго пло́ть бы́вша, па́че сло́ва родила́ еси́, Богома́ти Приснодѣ́во.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Бога́тно излія́ся благода́ть Ду́ха Всесвята́го, богому́дре, во устна́хъ твои́хъ, тѣ́мже вѣща́ніе твои́хъ слове́съ рѣ́чнымъ подо́бится тече́ніемъ.

Яко фи́никсъ, въ Дому́ Госпо́дни процвѣ́лъ еси́, благопло́діемъ слове́съ и чи́стымъ житіе́мъ наслажда́я сердца́, святи́телю, вѣ́рно чту́щихъ тя́.

Умерщвля́ется живи́тельнымъ ору́жіемъ слове́съ твои́хъ ерети́ческій собо́ръ и сверѣ́пое ополче́ніе богобо́рецъ, закала́емо, умерщвля́ется уче́ній твои́хъ мечи́.

Богоро́диченъ: Пое́мъ, Богоро́дице, чи́стое рождество́ Твое́, и́мже спаса́емся вси́ сме́рти сѣ́тей и лю́таго грѣха́ и у́зъ а́довыхъ избавля́емся.

Конда́къ, гла́съ 8. Подо́бенъ: Взбра́нной.

Иже Боже́ственною ре́вностію подви́гся и и́стинныхъ повелѣ́ній устнѣ́ распросте́ръ, церко́вная основа́нія благоузако́нивъ и та́мо су́щимъ мона́шескимъ соста́вомъ преда́въ, прему́дрый въ патріа́рсѣхъ Іерусали́мскій Софро́ніе, всему́драя словеса́ во свѣ́тъ изве́лъ еси́, и́миже наставля́еми, зове́мъ ти́: ра́дуйся, свѣ́тлая правосла́вныхъ похвало́.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Свы́ше манове́ніемъ, ерети́ческимъ языкобо́ліемъ противля́яся, му́дре, побѣдоно́сецъ бы́въ, вопія́лъ еси́, веселя́ся: препѣ́тый Го́споди, Бо́же оте́цъ, благослове́нъ еси́.

Ве́сь возложе́нъ Бо́гу, по́стныхъ садодѣ́лательства прелета́я, му́дре, цвѣтни́къ твои́ми насади́лъ еси́ добродѣ́телей поуче́ньми, Бо́гу, Су́щему въ вы́шнихъ, освяти́въ.

Зако́ну повину́яся Христо́ву, твоего́ худо́жества бога́тство тре́бующимъ благоче́стно, богому́дре, разда́лъ еси́, воспѣва́я: препѣ́тый Го́споди, Бо́же оте́цъ, благослове́нъ еси́.

Богоро́диченъ: Освяти́вши ду́шу и предочи́стивши тѣ́ло, наи́тіемъ на Тя́ Свята́го Ду́ха, Всенепоро́чная, Вы́шняго Си́лу во утро́бѣ Твое́й заче́нши, родила́ еси́ безсѣ́менно.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Іера́ршескаго священнодѣ́йства мѵ́ромъ освяти́лся еси́ благода́ти, идѣ́же яви́ся мíра спасе́ніе, архіере́йствовавъ, всему́дре о́тче Софро́ніе, зовы́й: Го́спода по́йте, дѣла́, и превозноси́те Его́ во вся́ вѣ́ки.

Прему́дрость почита́я лу́чшую, вѣнце́мъ благода́тей вѣнча́лся еси́, сла́ву неувяда́ему и бога́тство неотъе́млемо, прему́дрости, сла́вне, да́ръ пріе́мъ и, Го́спода по́йте, — зовы́й, — и превозноси́те Его́ во вся́ вѣ́ки.

Священнолѣ́пно, священнотаи́нниче, въ Боже́ственную пра́вду одѣ́явся, упра́вилъ еси́, всеблаже́нне о́тче, пра́веднѣйшими Влады́чне ста́до словесы́ и дѣя́ніи, Го́спода по́йте, — науча́я, — и превозноси́те Его́ во вся́ вѣ́ки.

Великолѣ́пно и па́че сло́ва Сло́во, Отцу́, о́тче, Собезнача́льно, сло́во тебѣ́ дарова́, словеса́ развраща́ющо, и языкобо́лія сла́бящо ересе́й, Го́спода по́йте, — вопія́, — и превозноси́те Его́ во вся́ вѣ́ки.

Богоро́диченъ: Святолѣ́пный показа́лася еси́ хра́мъ Сло́ва, всю́ тва́рь освяща́ющаго, гора́ ту́чная свята́я, гора́ пресвѣ́тлая, Благослове́нная Влады́чице, еди́на всепѣ́тая. Тѣ́мъ Тя́, Богома́ти, пое́мъ и превозно́симъ во вся́ вѣ́ки.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Рече́нія, изъ усте́нъ твои́хъ боже́ственныхъ происходя́ща, богоглаго́ливе, благочести́выхъ мы́сли услажда́ютъ благода́тію, я́коже со́тъ, ка́плющій разумѣ́ній благолѣ́піе.

Вну́трь небе́сныхъ незаходи́мыхъ живе́ши, богоглаго́ливе, у всѣ́хъ Влады́ки и Царя́, идѣ́же лику́ютъ а́нгельскія свѣ́тлости и святы́хъ во́инства.

Жи́знь проходя́, о́тче, на земли́ а́нгельскую, а́нгельскаго на небесѣ́хъ сподо́бился еси́ блаже́нства, идѣ́же Христа́ моли́ спасти́ся всѣ́мъ, пою́щимъ тя́.

Якоже арома́тніи фіа́лы, лани́тѣ твои́, богому́дре, на́рда пистикíи многоцѣ́нны, прему́дрости испо́лнь яви́ся алава́стръ, Тѣ́ло Христо́во честно́е арома́тствуя твои́ми уче́ніи.

Богоро́диченъ: Облакъ Тя́ лего́къ, Дѣ́во, Иса́ія зря́ше: на Тя́ бо Госпо́дь наше́дъ, низложи́ вся́ рукотворе́нная и Свое́ разумѣ́ніе Тя́ пою́щимъ яви́лъ е́сть.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 54 об. – 58.

/ Къ оглавленію раздѣла /


Наверхъ / Къ титульной страницѣ

0