Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 10-й де́нь.
Свята́го му́ченика Кодра́та и дружи́ны его́.

[ВЕЧЕРЪ,]
На Го́споди воззва́хъ: стихи́ры, гла́съ 1. Подо́бенъ: Небе́сныхъ чино́въ.

Священнопобѣ́дныхъ му́чениковъ и побѣдоно́сныхъ* ли́къ дне́сь другíй яви́ся,* озаря́ющь собо́ръ боже́ственныхъ страстоте́рпцевъ,* тве́рдое число́, избра́нное во́инство,* ему́же нача́льствуетъ Кодра́тъ,* благосла́вный побѣди́тель проявля́емь.

Ри́торскія у́бо му́дрости многопи́санная плете́нія* сѣчи́тельнымъ твои́мъ сло́вомъ* разори́лъ еси́, я́ко мглу́,* прехва́льный Кодра́те,* науча́еши вѣ́рно и стра́ждеши терпѣли́вно за Христа́,* во обои́хъ благоукраша́яся* и вку́пѣ со страстоте́рпцы вѣнча́емь.

Сла́ва, и ны́нѣ, богоро́диченъ, гла́съ и подо́бенъ то́йже:

Одержи́мы прегрѣше́ніи ненаде́жными, Чи́стая,* Тя́ Предста́тельницу еди́ну стяжа́вше, Дѣ́во,* вопіе́мъ благода́рственно:* очи́сти ны́, Пресвята́я Богоневѣ́сто,* Ты́ бо еси́ мíра прибѣ́жище* и заступле́ніе ро́да на́шего.

Крестобогоро́диченъ. Подо́бенъ то́йже:

Воздви́жена я́ко ви́дѣ на Крестѣ́ Агнца* непоро́чная Дѣ́ва, пла́чущи, вопія́ше:* сла́дкое Мое́ Ча́до,* что́ но́вое и пресла́вное видѣ́ніе?* ка́ко содержа́й вся́ческая го́рстію,* на дре́вѣ пригвожда́ешися пло́тію?


[НА УТРЕНИ,]
Кано́нъ. Ки́ръ Іо́сифа. Гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Му́чениковъ свяще́нныхъ, свяще́нно страда́вшихъ, свяще́нный и чу́дный наста́ пра́здникъ, свѣтозаре́ніемъ Ду́ха вся́ свѣтоводя́щи, соше́дшеся, празднолю́бцы, по до́лгу си́хъ ублажи́мъ.

Яко со́лнце свѣ́тлое, добродѣ́телей свѣтоно́сіемъ возсія́лъ еси́ на́мъ, Кодра́те страда́льче, свѣтолу́чными твои́ми сія́ніи тму́ многобо́жія отгоня́, блаже́нне, и просвѣща́я вѣ́рныхъ составле́нія.

Ка́мень жи́зни Іису́са Спа́са возвѣща́юще Бо́га, пострада́сте тве́рдо, и исто́чникъ свяще́нія, ка́мень, пріе́мшіи, крове́й тече́нія содѣ́ласте, му́ченицы сла́вніи.

Богоро́диченъ: Отъ тимѣ́нія страсте́й, помышле́ній треволне́нія, отъ стрѣ́лъ вра́жіихъ, отъ вся́каго прило́га сопроти́вна спаси́, Чи́стая Богороди́тельнице, ду́ши пою́щихъ Твое́ несказа́нное Рождество́, Всенепоро́чная.

Пѣ́снь 3.

Ирмо́съ: Яко непло́ды роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Тве́рдіи адама́нти, убива́еміи мече́мъ и болѣ́зней ви́домъ приобща́ющеся терпѣли́вно, чу́дному Бо́гу на́шему взыва́ху: Свя́тъ еси́, Го́споди.

Прему́дростію Кодра́тъ богода́нною упраздни́ е́ллинскую му́дрость, любопрѣ́нія стражда́, и свои́ми кровьми́, Ду́хомъ Боже́ственнымъ удобря́яся.

Съ Кодра́томъ Ане́кта и съ Па́вломъ Криске́нта, Кипріа́на боже́ственнаго и Діони́сія, вѣ́рніи, благочестному́дренно пѣ́сньми вѣнча́емъ, вѣ́рою пострада́вшихъ.

Богоро́диченъ: Ниже́ небе́сный у́мъ па́че ума́ Рождества́ Твоего́ мо́жетъ сказа́ти, Отрокови́це, Ума́ бо пе́рваго во утро́бѣ Сло́во, Чи́стая, зачала́ еси́, вся́ческая сло́вомъ соста́вльшаго.

Сѣда́ленъ, гла́съ 4. Подо́бенъ: Вознесы́йся.

Терпѣ́ніемъ лю́тыхъ умертви́лъ еси́ го́рдаго врага́, страстоте́рпче, ме́чную сме́рть претерпѣ́лъ еси́, вку́пѣ со стра́ждущими съ тобо́ю всему́дрыми, Кодра́те. Тѣ́мже пра́зднуемъ честну́ю ва́шу па́мять, вопію́ще: помяни́те на́съ ко Влады́цѣ, непобѣди́міи му́ченицы.

Сла́ва, и ны́нѣ, богоро́диченъ:

Нечи́стыхъ помысло́въ мои́хъ мно́жество и безмѣ́стныхъ мы́слей обурева́нія кто́ изрещи́ мо́жетъ, Всенепоро́чная? Настоя́нія же безпло́тныхъ вра́гъ мои́хъ кто́ исповѣ́сть и си́хъ зло́бу? Но Твое́ю мольбо́ю, Блага́я, си́хъ мнѣ́ всѣ́хъ избавле́ніе да́руй.

Крестобогоро́диченъ:

Иже отъ Безнача́льнаго Отца́ рожде́ннаго напослѣ́докъ Тя́ пло́тію ро́ждшая, на Крестѣ́ ви́сяща зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́ распина́ешися? Пою́ Тя, Долготерпѣли́ве.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Му́дростію твои́хъ слове́съ нему́дрыя посрами́лъ еси́, и наказа́ніемъ богови́дныхъ уче́ній твои́хъ, му́чениче Кодра́те, улови́лъ еси́ боже́ственнаго Ане́кта, Влады́цѣ твоему́ приво́диши терпѣли́ва му́ченика.

Отъ пеле́нъ присво́ился еси́ вся́ Сотво́ршему, издѣ́тска соверше́нна му́жа смы́слъ избра́въ и прему́дрости возжелѣ́въ, ве́сь бы́лъ еси́ чистѣ́йшее, му́чениче, Христо́во оби́телище.

Шестосвѣ́тлый свѣ́щникъ му́чениковъ Твои́хъ, Го́споди, та́йнымъ еле́емъ напои́вся, отгна́ многобо́жія но́щь и озари́ зову́щія: сла́ва, Христе́, си́лѣ Твое́й.

Богоро́диченъ: Свята́я Богоро́дица, въ Не́йже всели́тися благоволи́, я́ко благово́ненъ хра́мъ, Сло́во Отчее единосу́щное, не опали́ ложе́снъ, не болѣ́знова, и́бо роди́ Емману́ила, Бо́га и Человѣ́ка.

Пѣ́снь 5.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Просвѣще́ніемъ ра́зума неразу́мія мглу́ отгоня́, Го́сподеви приво́диши собо́ръ страда́лецъ, му́дре Кодра́те, съ ни́ми вѣнча́емь.

По́стнически пе́рвѣе побѣди́въ страсте́й привозста́нія, второ́е погуби́лъ еси́ держа́ву злочести́выхъ, Кодра́те му́чениче, пострада́въ крѣпча́йше.

Исполня́ется невла́жный ка́мень пролія́ньми честны́хъ твои́хъ крове́й и струи́ свѣ́тлы дае́тъ вѣ́рнымъ, освяща́я Боже́ственными манове́ньми.

Богоро́диченъ: Созда́вый, Пречи́стая, Еву отъ ребра́, изъ Твоея́ чи́стыя утро́бы зи́ждется, спасти́ Ада́ма за благоутро́біе восхотѣ́въ, я́ко Человѣколю́бецъ.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Шесточи́сленный страстоте́рпецъ ли́къ на́мъ возсія́, я́коже звѣ́зды на церко́внѣй честнѣ́й тве́рди, вѣ́рныя просвѣща́яй и пре́лести тму́ разгоня́яй.

Пучи́ну му́къ преидо́сте, му́ченицы, нево́лненно и вы́шнюю тишину́ получи́сте, вѣ́рныхъ приста́нище бы́вше и моли́твенницы теплѣ́йшіи.

Да похва́лимъ со Ане́ктомъ Кодра́та сла́внаго и съ Па́вломъ Діони́сія, Криске́нта, Кипріа́на, Христо́ва виногра́да добропло́дныя ро́зги.

Богоро́диченъ: Онебеси́ла еси́ озе́мствованное естество́, Всенепоро́чная, человѣ́ковъ и истлѣ́вшее сіе́ новосодѣ́лала еси́, сего́ ра́ди, Отрокови́це, вси́ немо́лчными гла́сы Тя́ сла́вимъ.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Во огни́ муче́ній свы́ше пріе́млюще ро́су терпѣ́нія, со о́троки до́бліи взыва́ху му́ченицы: препѣ́тый Го́споди, Бо́же оте́цъ на́шихъ, благослове́нъ еси́.

Одожде́ніемъ честны́я кро́ве ва́шея, страстоте́рпцы, ка́мень невла́жный пре́жде испо́лнися, струи́ пролива́ющь исцѣле́ній пою́щимъ: Бо́же оте́цъ, благослове́нъ еси́.

Яко мѵрополо́жница мы́сленная, мѵ́ро врачева́ній, Кодра́те, моще́й твои́хъ ра́ка источа́етъ, страсте́й отгоня́щи злосмра́діе и опаля́ющи де́моновъ ополче́нія си́лою Боже́ственною.

Богоро́диченъ: Благослове́нъ Пло́дъ благослове́нныя утро́бы Твоея́, Его́же благословя́тъ небе́сныя си́лы и человѣ́честіи собо́ри, на́съ изба́вльшаго отъ кля́твы дре́внія, Благослове́нная.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Просвѣ́щся страда́ній свѣ́тлостію, вѣнцено́сецъ Го́споду предстои́ши со страда́вшими съ тобо́ю, сла́вне, воспѣва́я, Кодра́те: вся́ дѣла́, благослови́те, по́йте Го́спода.

Добродѣ́телей свѣ́томъ удобря́емь, при кончи́нѣ му́ченическую свѣ́тлость наслѣ́довалъ еси́, всему́дре, воспѣва́я, Кодра́те: вся́ дела́, благослови́те, по́йте Го́спода.

Предогражде́нія Кори́нѳъ стяжа́, святы́хъ честны́я мо́щи, и врачева́ніе безме́здно хра́мъ, идѣ́же вѣ́рою вся́къ притека́яй болѣ́зней и страсте́й измѣня́ется.

Богоро́диченъ: Изба́вльшеся кля́твы прама́тернія Тобо́ю, Чи́стая Богома́ти, благослове́нная Влады́чице, благослови́мъ Тя́ вѣ́рою и пѣсносло́вимъ, Пресвята́я Дѣ́во Богоневѣ́сто.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Гное́нія ва́ша му́ченическая испуща́ютъ благово́ніе, по́лно благода́ти, кро́ви си́хъ цѣле́бъ излива́ютъ то́ки Боже́ственнымъ Ду́хомъ и стра́сти душетлѣ́нныя исцѣля́ютъ, я́же досто́йно ублажи́мъ.

Красе́нъ я́звъ добро́тами бы́въ, а́нгеломъ уподо́бился еси́: кро́вію же излія́нною, Кодра́те, всѣ́дъ, я́ко на колесни́цу, возлетѣ́лъ еси́ къ Вы́шнимъ Ца́рствомъ, по́чести болѣ́зней пріе́мля.

Источа́я боже́ственную сла́дость изъ у́стъ, страда́льческій собо́ръ увѣща́лъ еси́, му́чениче Кодра́те, страда́ти съ тобо́ю, Ане́кта, и Па́вла, и Криске́нта, Кипріа́на же и боже́ственнаго Діони́сія, съ ни́миже лику́еши, досточу́дне.

Де́нь пра́здника ва́шего страда́нія, страстоте́рпцы, вси́ почита́емъ, въ се́й бо, вѣне́цъ нетлѣ́нія взе́мше, сы́нове бы́сте свѣ́та же и дне́, лику́юще о́крестъ престо́ла Всецаря́.

Богоро́диченъ: Явльшися всѣ́хъ Творца́ Роди́тельница па́че вся́каго ума́, Всенепоро́чная, небе́съ вы́шши показа́лася еси́ и всѣ́ми влады́чествующи, Дѣ́во Богороди́тельнице нескве́рная, тѣ́мъ Тя́ вси́ непреста́нно велича́емъ.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 51 об. – 54 об.

/ Къ оглавленію раздѣла /


Наверхъ / Къ титульной страницѣ

0