Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта во 8-й де́нь.
Преподо́бнаго отца́ на́шего и исповѣ́дника Ѳеофила́кта, епи́скопа Никомидíйскаго.

[ВЕЧЕРЪ,]
На Го́споди воззва́хъ: стихи́ры, гла́съ 1. Подо́бенъ: Всехва́льніи му́ченицы.

Отче Ѳеофила́кте,* Бо́га зря́, блаже́нне,* я́ко пости́жно и ви́димо,* соедине́ніемъ лу́чшимъ наслажда́яся Сего́* и прича́стіемъ обожа́емь,* Еди́наго жела́ннаго и блаже́ннаго,* ра́дуяся, прія́лъ еси́, іера́рше всече́стне,* со а́нгелы ны́нѣ водворя́яся.

Отче Ѳеофила́кте,* отъ земли́ преста́вився,* восте́клъ еси́ къ небеси́,* и въ небе́сныхъ жи́ти селе́ніихъ* сподо́бился еси́, блаже́нне,* изгна́нія ра́ди, е́же за Христа́ претерпѣ́лъ еси́.* Его́же ны́нѣ моли́* дарова́ти душа́мъ на́шимъ* ми́ръ и ве́лію ми́лость.

Сла́ва, и ны́нѣ, богоро́диченъ:

Неду́говавшую, Пресвята́я,* лю́тѣ ду́шу мою́* страстьми́ лука́выми исцѣли́,* я́же Цѣли́теля и Спа́са* всѣ́хъ Христа́ ро́ждшая,* вся́ку я́зю* исцѣли́вшаго уя́звленнаго* діа́вольскимъ зломы́сліемъ* и сме́рти на́съ измѣ́ншаго.

Крестобогоро́диченъ:

Своего́ Агнца* Агница и непоро́чная Влады́чица* на Крестѣ́ я́ко ви́дѣ,* зра́ка не иму́ща, ниже́ добро́ты,* увы́ Мнѣ́, — рыда́ющи, глаго́лаше, —* гдѣ́ добро́та Твоя́ за́йде, Сладча́йшій?* гдѣ́ благолѣ́піе?* гдѣ́ благода́ть блиста́ющая* о́браза Твоего́,* Сы́не Мо́й любе́знѣйшій?

Тропа́рь, гла́съ 6: [1]

Тая́ся, пожи́лъ еси́, прехва́льне, но Христо́съ тя́ показа́, я́ко свѣти́ло на свѣ́щницѣ мы́сленнѣмъ, и скрижа́ли ти́ вручи́ уче́ній духо́вныхъ, ими́же, озари́ и на́съ.


[НА УТРЕНИ,]
Кано́нъ, его́же краегране́сіе: Боже́ственнаго Ѳеофила́кта въ пѣ́снѣхъ восхвалю́. Ки́ръ Ѳеофа́на. Гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Престо́лу Влады́чню, о́тче богоно́се Ѳеофила́кте, предстоя́, вѣ́рою соверша́ющія па́мять твою́ сохрани́.

Пома́за тя́ досто́йно благода́ть Ду́ха, всеблаже́нне, и́стины ра́ди и нра́вовъ твои́хъ ра́ди бла́гости.

Да небе́сная, блаже́нне, получи́ши, земна́я попра́лъ еси́ вся́ и Христу́ Бо́гу послѣ́довалъ еси́.

Богоро́диченъ: Ве́сь жела́ніе, Иже изъ чре́ва Твоего́, Богоневѣ́стная, благоизво́ливъ роди́тися, сла́дость е́сть и Свѣ́тъ незаходи́мый.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Зако́номъ ты́ повину́яся Влады́ки твоего́, сла́вне архіере́е, о зако́нѣхъ царе́й пребеззако́нныхъ небре́глъ еси́.

Боже́ственное изображе́ніе Христо́во и Пречи́стое почита́лъ еси́ че́стнѣ, нече́ствующихъ нече́стія отмета́яся.

Претерпѣ́лъ еси́ муче́ніе со́вѣсти пе́рвѣе по́стнически и ны́нѣ му́ченическимъ увя́злся еси́ вѣнце́мъ.

Богоро́диченъ: Да стезю́, Влады́ко, къ святы́ни веду́щую, пока́жеши на́мъ, во утро́бу Пречи́стую всесвя́то всели́лся еси́.

Сѣда́ленъ, гла́съ 8. Подо́бенъ: Прему́дрости.

Пости́вся, преподо́бне о́тче му́дре, іера́рхъ пома́зался еси́, священнодѣ́йствовати Боже́ственная та́инства, душа́мъ въ снабдѣ́ніе. Христо́ву же ико́ну почествова́въ, претерпѣ́лъ еси́ изгна́нія, ско́рби и многовре́менное заключе́ніе. Тѣ́мже, по кончи́нѣ источа́я исцѣле́нія, цѣли́ши стра́ждущія и просвѣща́еши пою́щія, святи́телю Ѳеофила́кте; моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихъ Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Не устраши́лся еси́ огня́ искуше́ній, всеблаже́нне богодохнове́нне, не разсла́би си́лу твою́ пи́щная сла́дость, Ѳеофила́кте.

Храни́ло твои́мъ усто́мъ положи́ Бо́гъ, и устна́ма, преподо́бне, тѣ́мже пребы́лъ еси́ непоколеби́мь нечести́вымъ, ста́вшимъ проти́ву тебе́.

Терпя́, претерпѣ́лъ еси́ и́же на ка́мени но́зѣ твои́ поста́вльшаго, и вня́тъ тебѣ́ Вы́шній, Того́ о́бразу покло́ншуся.

Богоро́диченъ: Изба́вльшеся Рождество́мъ Твои́мъ грѣхо́внаго до́лга, Пренепоро́чная, ра́достно воспѣва́ніе возсыла́емъ Ти́, Богоневѣ́стная.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Ру́цѣ твои́, преподо́бне богодохнове́нне, къ Зижди́телю, о́тче, воздѣ́емы, злочести́выя побѣди́ша.

Держа́въ ру́ку твою́, Вы́шній, богоно́се о́тче, наста́ви тя́ къ небе́сному наслажде́нію.

Стезю́ тѣ́сную, Ѳеофила́кте, ше́ствовавъ, къ широтѣ́ дости́глъ еси́ рая́, чу́дне.

Богоро́диченъ: Тя́, Богоро́дицу, невѣ́дущіи, Богома́ти, Свѣ́та не и́мутъ ви́дѣти, ро́ждшагося изъ Тебе́, Пречи́стая.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Умертви́въ чу́вствія воздержа́нно, надъ страстьми́ ца́рствовалъ еси́ и ны́нѣ, Ѳеофила́кте, безстра́стія наслажда́ешися свѣтлостьми́.

Образу Спа́сову покланя́тися вся́ научи́лъ еси́, дѣ́лы и уче́ніи просія́въ я́вѣ, Ѳеофила́кте.

Облакъ тя́, ту́чу жи́зни источа́ющь, Христо́съ показа́, о́тче, святи́телю Бо́жій Ѳеофила́кте.

Богоро́диченъ: Красе́нъ па́че всѣ́хъ человѣ́къ Сы́нъ Тво́й, Пречи́стая, добро́тою Божества́, а́ще и пло́ть на́съ ра́ди бы́сть.

Конда́къ, гла́съ 2. Подо́бенъ: Вы́шнихъ ища́.

Свѣти́льникъ свѣ́телъ показа́лся еси́ въ концѣ́хъ, святи́телю Ѳеофила́кте, единосу́щна Отцу́ и Ду́ху Сло́ва ты́ проповѣ́давъ, боже́ственныхъ оте́цъ собо́ръ уясни́лъ еси́, Тро́ицѣ уго́дникъ яви́лся еси́. Ейже предстоя́, моли́ непреста́нно о всѣ́хъ на́съ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Тече́ніе Боже́ственное соверши́въ и вѣ́ру твою́ соблю́дъ до конца́, твои́хъ болѣ́зней, му́дре, прія́лъ еси́ вѣне́цъ, зовы́й: благослове́нъ еси́, Го́споди Бо́же, во вѣ́ки.

На колесни́цѣ Боже́ственныхъ добродѣ́телей ѣ́здяй, къ высотѣ́ возне́слся еси́, Бо́гу же ны́нѣ предстои́ши, зовы́й: благослове́нъ еси́, Го́споди Бо́же, во вѣ́ки.

Вѣ́сть Созда́вый наединѣ́ сердца́ человѣ́ковъ, богоно́се, се́рдца твоего́ Боже́ственное и на престо́лѣхъ уче́нія посади́, Ѳеофила́кте треблаже́нне.

Богоро́диченъ: Къ Тебѣ́ ны́нѣ прибѣга́ю, Богоро́дице, и покро́ву Твоему́, и боже́ственному предста́тельству, изба́витися отъ лю́тыхъ молю́ся прегрѣше́ній, Благослове́нная Всечи́стая, Бо́га пло́тію ро́ждшая.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Идѣ́же веселя́щихся жили́ще, ны́нѣ всели́лся еси́, исповѣ́дниче и и́стины побо́рниче, и свѣ́тъ тебѣ́ возсія́, я́коже пра́веднику, всему́дре, и му́ченическія пострада́вшу по́двиги, съ ни́миже и взыва́еши: свяще́нницы, благослови́те, лю́діе, превозноси́те во вся́ вѣ́ки.

Терпѣ́нія вѣне́цъ прія́лъ еси́, богопрія́тне, во изгна́нія бо го́рькая всели́лся еси́, мзды́ ожида́я воспрія́ти страда́ній твои́хъ, и благíя не погрѣши́лъ еси́ наде́жды, Христу́ ны́нѣ взыва́я: свяще́нницы, благослови́те, лю́діе, превозноси́те во вся́ вѣ́ки.

Свѣтоявле́ннѣ па́мять твоя́, богоно́се, соверша́ется ны́нѣ, исповѣ́данія свѣ́томъ свѣтя́щися, святы́й бо о́бразъ Христо́въ поче́лъ еси́, и Богоро́дицы, и святы́хъ всѣ́хъ, съ ни́миже ны́нѣ воспѣва́еши: свяще́нницы, благослови́те, лю́діе, превозноси́те во вся́ вѣ́ки.

Богоро́диченъ: Богома́ти Пречи́стая, души́ моея́ я́звы и грѣхо́вныя стру́пы истреби́, Бо́га ро́ждшая, су́щаго надъ всѣ́ми, Отрокови́це Чи́стая, отъ дѣви́ческихъ, Неискусобра́чная, ложе́снъ. Его́же о́троцы благословя́тъ, свяще́нницы воспѣва́ютъ, лю́діе превозно́сятъ во вся́ вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Вели́кихъ дарова́ній, о́тче, сподо́бился еси́, за Христа́ бѣ́дствовавъ умо́мъ терпѣли́вымъ, богоно́се богоблаже́нне.

На́съ, пою́щихъ тя́, блаже́нне, назира́й, отъ напа́стей и бѣ́дъ избавля́я, ерети́ческая сокруша́я кова́рства.

Цѣлому́дренно и пра́ведно, я́ко свяще́нникъ явле́нъ пожи́въ, му́чениче, бы́лъ еси́ свѣ́телъ, багряни́цу себѣ́ истка́въ отъ крове́й твои́хъ.

Богоро́диченъ: Яко у́тро, су́щимъ во тмѣ́ и заблу́ждшимъ, Пра́вды Со́лнце иму́щи, на объя́тіихъ нося́щи, Дѣ́во, Христа́, возсія́ла еси́.

Примѣчаніе:
[1] Тропарь печатается по изданію: Псалти́ръ съ возслѣ́дованіемъ. Черни́говъ: Въ Тѵпогра́фіи оби́тели Свя́то-Тро́ицкой Ильи́нской, 1763 г. Ли́стъ 472.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 24 – 37.

/ Къ оглавленію раздѣла /


Наверхъ / Къ титульной страницѣ

0