Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 7-й де́нь.
Святы́хъ священному́ченикъ, въ Херсо́нѣ епи́скопствовавшихъ: Васи́лія, Ефре́ма, Капи́тона, Евге́нія, Еѳе́рія и про́чихъ.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Да́лъ еси́ зна́меніе.

Ефре́мъ сла́вный,* и Васи́лій богому́дрый,* и Капи́тонъ вели́кій,* боже́ственный Агаѳодо́ръ* со Елпи́діемъ, и Еѳе́ріемъ,* и Евге́ніемъ сла́внымъ* словесы́ боже́ственными да ублажа́тся,* преподо́бнѣ бо пожи́вше и свяще́нно пострада́вше,* Ца́рствія яви́шася небе́снаго жи́теліе.

Умертви́въ мудрова́ніе плотско́е по́двиги,* Васи́лій сла́вный мертвеца́ воскреси́* призыва́ніемъ Боже́ственнымъ;* Капи́тонъ же па́ки, свяще́ннѣйшій па́стырь,* посреди́ пла́мене стоя́, ра́дуяся,* ви́дѣнъ бы́сть неопали́мь.* Тѣ́хъ моли́твами, Человѣколю́бче,* умилостивле́ніе на́мъ да́руй* и ве́лію Твою́ ми́лость.

Сла́ва, и ны́нѣ, богоро́диченъ, гла́съ и подо́бенъ то́йже:

Скве́рну отмы́й стра́стнаго се́рдца моего́,* Богоро́дице Всепѣ́тая,* и вся́ я́звы и гное́нія сего́,* я́же отъ грѣха́, очи́сти, Чи́стая,* и ума́ моего́ уста́ви непостоя́ніе,* я́ко да си́лу Твою́* и вели́кое заступле́ніе* велича́ю, окая́нный* и непотре́бный ра́бъ Тво́й.

Крестобогоро́диченъ, подо́бенъ то́йже:

Распина́ема Христа́ Человѣколю́бца* ви́дящи Пречи́стая* и ре́бра ископава́ема копіе́мъ,* пла́чущи, вопія́ше:* что́ сіе́, Сы́не Мо́й?* Что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ?* И тщи́шися безча́дствовати Мя́, Вселю́безнѣйшій.* Удивля́юся, Благоутро́бне,* Твоему́ во́льному распя́тію.


[НА УТРЕНИ,]
Кано́нъ, его́же краегране́сіе: Седмочи́сленный па́стырей ли́къ почита́ю. Іо́сифъ. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Боже́ственными свѣтоли́тіи му́ченицы облива́еми, свѣтоно́сный се́й и свѣ́тлый пра́здникъ ва́шъ всегда́ благоче́стно хва́лящія, страсте́й мглы́ изба́вите.

Сло́во Бо́жіе, вопло́щся, ва́съ показа́, всеблагосла́вныя па́стыри, Того́ возвѣсти́ти Божество́ заблу́ждшимъ, преподо́бніи, и невѣ́дѣніемъ бѣ́дствующимъ.

Во́дъ животво́рныхъ Ду́ха исполня́еми, иста́явшія зно́емъ лю́тымъ безбо́жія напои́сте и къ водѣ́, сла́вніи, спасе́нія наста́висте.

Богоро́диченъ: Разрѣши́ся пра́отцевъ, Чи́стая, запреще́ніе, па́че ума́ Рождество́мъ Твои́мъ, Пречи́стая, и пе́рвый воспрія́ша рая́ вхо́дъ, велегла́сно восхваля́юще Тя́.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Огне́мъ Боже́ственнымъ у́мъ разже́гъ, Васи́ліе всему́дре, я́коже па́стырь изря́днѣйшій, ве́щь безбо́жія попали́лъ еси́.

Ду́ха свѣ́томъ су́щія во тмѣ́ лю́тыхъ, сла́вне, къ просвѣще́нію привле́клъ еси́ свята́го креще́нія.

Стези́ твоя́ къ Бо́гу испра́вишася, Васи́ліе, вся́ отъ преле́стнаго пути́ благода́тію къ богоразу́мію обрати́ша.

Богоро́диченъ: Избавля́ющего человѣ́ки отъ наси́лія вра́жія, родила́ еси́ си́льнаго Го́спода, Пречи́стая Дѣ́во Всепѣ́тая.

Сѣда́ленъ, гла́съ 3. Подо́бенъ: Красотѣ́ дѣ́вства.

Мѵ́ромъ пома́занія освяти́вшеся, па́стыріе яви́стеся лю́демъ богому́дрымъ, и, я́ко а́гнцы чи́сти, поже́ршеся, принесо́стеся Сло́ву Началопа́стырю, поже́ршемуся, я́ко овча́ти, му́ченицы всехва́льніи и свѣти́льницы всемíрніи. Тѣ́мже торжеству́емъ вси́ любо́вію боже́ственную па́мять ва́шу.

Сла́ва, и ны́нѣ, богоро́диченъ:

Яко невоздѣ́ланная, Дѣ́во, лоза́, краснѣ́йшій Гро́здъ прозябла́ еси́, источа́ющь на́мъ вино́ спасе́нія, всѣ́хъ веселя́щее ду́ши же и тѣлеса́. Тѣ́мже, я́ко вину́ Тя до́брыхъ блажа́ще при́сно, со а́нгеломъ вопіе́мъ Ти́: ра́дуйся, Благода́тная.

Крестобогоро́диченъ:

Неискусобра́чная Чи́стая и Ма́ти Твоя́, Христе́, ви́дящи Тя́ ме́ртва ви́сяща на Крестѣ́, ма́терски пла́чущи, глаго́лаше: что́ Тебѣ́ воздаде́ евре́йскій беззако́нный собо́ръ и неблагода́рный, и́же мно́гихъ и вели́кихъ Твои́хъ, Сы́не Мо́й, даро́въ наслади́выйся? Пою́ Твое́ Боже́ственное снизхожде́ніе.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Свяще́ннѣйшихъ му́ченикъ ли́къ да пое́тся, свяще́нства благода́тію и муче́нія озаря́емь, и пое́тъ, веселя́ся: сла́ва си́лѣ Твое́й, Го́споди.

Богоно́сніи ко́рмчіи Це́ркве, Ефре́мъ и Агаѳодо́ръ, Васи́лій и Капи́тонъ, Еѳе́рій, Евге́ній и боже́ственный Елпи́дій, Ду́хомъ Святы́мъ яви́шася.

Научи́вшеся боже́ственнымъ, отцы́ боже́ственніи, лю́ди въ преподо́біи и пра́вдѣ и́стинно упасо́сте и коне́цъ блаже́нный муче́ніемъ прія́сте.

Уме́ршіи невѣ́ріемъ уме́ршаго воста́ніемъ получи́ша жи́знь вѣ́чную, тобо́ю вѣ́ровавше Христу́ Бо́гу на́шему, му́чениче свяще́ннѣйшій Васи́ліе.

Богоро́диченъ: Умерщвле́нныя оживи́ла еси́ человѣ́ки, Жи́знь ѵпоста́сную ро́ждши, Дѣ́во, па́че вся́кія мы́сли, Христа́, Бо́га на́шего, Человѣ́ка за милосе́рдіе бы́вша.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ча́шу честна́го муче́нія испи́сте, и́мя Госпо́дне, богоно́сніи отцы́, вѣ́рно призыва́юще.

Еди́нъ, ме́ртвымъ вдыха́яй воскресе́ніе, моли́твою твое́ю уме́ршаго, Васи́ліе, воздвиза́етъ, уясня́я твое́ проповѣ́даніе.

Равноче́стна Отцу́ Сы́на проповѣ́дающе, многобо́жное мучи́тельство идолонеи́стовства, отцы́, отгна́сте.

Богоро́диченъ: Блаже́ни су́ть лю́діе, вѣ́дущіи Тя́, Всенепоро́чная, Влады́ки всѣ́хъ Ма́терь и любо́вію ублажа́ющіи Тя́.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Похвала́ми Агаѳодо́ра же, и Евге́нія, и Васи́лія вели́каго, и му́драго Елпи́дія увѣнча́емъ, іера́рхи и до́блія су́щія му́ченики.

Зако́нными воспита́ніи ду́ха, всему́дріи, беззако́ннующимъ зако́ны спаси́тельныя предложи́вше, благоче́стія къ просвѣще́нію ты́я привлеко́сте.

Яви́стеся отъ разли́чныхъ гра́дъ овча́та, еди́нѣхъ же люде́й па́стыріе и Боже́ственнаго гра́да наслѣ́дницы, въ не́мже обита́ютъ Бо́гу угоди́вшіи му́ченицы.

Богоро́диченъ: Зако́на Тя́ сѣ́ни, проро́ковъ же гада́нія прообража́ху, Дѣ́во, неизрече́ннымъ сло́вомъ Рождество́ имѣ́вшую, спаса́ющее мíръ, Всенепоро́чная.

Конда́къ, гла́съ 2. Подо́бенъ: Въ вы́шнихъ живы́й.

Свѣтоно́сный де́нь наста́ па́стырей, епи́скопствовавшихъ свѣ́тло въ Херсо́нѣ, и́хже воспѣва́емъ пра́здникъ, пострада́вшихъ за Христо́вы о́вцы. Священному́ченицы, моли́те Пастыренача́льника Христа́ и на́съ причести́ десна́го ове́цъ стоя́нія, да вопіе́мъ ва́мъ: ра́дуйтеся, свяще́нніи отцы́, за Христа́ кро́вь свою́ излія́вшіи.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Ра́дуяся, вше́лъ еси́, о́тче Капи́тоне, въ пе́щь, пребы́лъ же еси́ неопали́мь, я́коже о́троцы тріе́, невѣ́рныя изыма́я огня́ бу́дущаго, вѣ́ровавшія боже́ственнымъ твои́мъ чудесе́мъ.

Не устраши́вся, не убоя́вся повелѣ́нія, о́тче свяще́нный Капи́тоне, въ свяще́нную ри́зу обле́клся еси́, въ не́йже у́гліе о́гненное нося́, блаже́нне.

Пу́ть загради́лъ еси́ неразу́мія боже́ственными словесы́ твои́ми, ра́зумъ благоче́стія всѣ́мъ вложи́въ, во глубину́ попо́лзшимся идолонеи́стовства, священнодѣ́телю Капи́тоне богопрія́тне.

Богоро́диченъ: Созда́вый руко́ю Еву, Сло́во Бо́жіе, Отрокови́це, назда́ти вся́ восхотѣ́въ, изъ чре́ва Твоего́ зи́ждется, нача́ло пріе́мля, Отцу́ и Ду́ху сопресто́льный.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Умертви́вше болѣ́зньми пло́ть, жи́знь безсме́ртную исхода́таисте, отцы́ преподо́бніи, всѣ́мъ, ме́ртвымъ бого́мъ служа́щимъ, и́же и, спа́сшеся, съ ва́ми при́сно зову́тъ: благослови́те, вся́ дѣла́ Госпо́дня, Го́спода.

Согла́сно Евге́нія, вѣ́рніи, и Агаѳодо́ра, Ефре́ма и Елпи́дія съ Еѳе́ріемъ воспои́мъ, Васи́лія же и Капи́тона, я́ко низложи́тели врага́ и іера́рхи Христо́вы, Ему́же вопіе́мъ: вся́ дѣла́, благослови́те Госпо́дня Го́спода.

Возвесели́лъ еси́ лю́ди, о́тче Ефре́ме, твои́ми уче́ньми и ны́нѣ преше́лъ еси́ къ невече́рнему сія́нію и къ весе́лію присносу́щному, твои́хъ трудо́въ воздая́нія пріе́мля и взыва́я: вся́ дѣла́, благослови́те Госпо́дня Го́спода.

Пожи́въ, всеблаже́нне Васи́ліе, на земли́, я́ко а́нгелъ, надъ страстьми́ плотски́ми ты́ ца́рствовалъ еси́ благода́тію и преше́лъ еси́ къ Ца́рствомъ небе́снымъ, Христу́ Царю́ предстоя́ и взыва́я: благослови́те, вся́ дѣла́ Госпо́дня, Го́спода.

Богоро́диченъ: Ви́дѣнъ бы́сть я́ко человѣ́къ изъ Тебе́ ражда́емь Пресу́щественный, сугу́бъ естество́мъ, Пречи́стая, дѣ́йствы, и хотѣ́ніи, и́мже уподо́бися, изво́ливъ явля́яся, Ему́же вопіе́мъ: вся́ дѣла́, благослови́те Госпо́дня Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Священному́чениковъ святы́хъ свяще́нную соверша́юще па́мять, пѣ́сньми свяще́нными, пріиди́те вси́, велегла́сно тѣ́хъ почти́мъ, о на́съ моля́щіяся Всеще́дрому Бо́гу на́шему.

Яви́стеся, я́ко честно́е ка́меніе, по земли́ отъ безбо́жныхъ, му́ченицы, влачи́ми, боже́ственніи, и пре́лести утвержде́нія си́лою Бо́жіею сокруша́юще: сего́ ра́ди досто́йно ублажа́етеся.

Дне́сь гра́дъ Херсо́нъ ва́шу па́мять пра́зднуетъ: сему́ бо яви́стеся столпи́, и боже́ственна забра́ла, и утвержде́нія, па́стыріе, и учи́теліе, и моли́твенницы, богоблаже́нніи.

Уже́ лико́мъ а́нгельскимъ ли́къ оте́цъ сочисли́ся: со Евге́ніемъ Ефре́мъ и Капи́тонъ, Елпи́дій же и Еѳе́рій, и Васи́лій сла́вный, и богому́дрый Агаѳодо́ръ.

Богоро́диченъ: Нося́щи Христа́ на объя́тіихъ, руко́ю нося́щаго вся́, Богоблагода́тная Отрокови́ца, дивя́щися, вопія́ше, глаго́лющи: ка́ко и Сы́на познава́ю Тя́ и Творца́ Моего́ непостижи́маго?

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 30 об. – 34.

/ Къ оглавленію раздѣла /


Наверхъ / Къ титульной страницѣ

0