Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 6-й де́нь.
Святы́хъ 42-хъ му́ченикъ, и́же во Амморíи.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Зва́нный свы́ше.

Отведе́ніемъ, Христо́вы му́ченицы,* ну́жнымъ свя́зани бы́сте* и затворе́ни въ темни́цѣ вси́ на до́лгое вре́мя,* Боже́ственніи вѣ́ры* су́ще храни́теліе.* Отону́дуже, яря́ся, звѣ́рь злоимени́тый,* мече́мъ вы́ умертви́,* не хотя́щія повину́тися* сего́ злы́мъ повелѣ́ніемъ,* и ны́нѣ вы́шняя наслѣ́довасте ра́достно,* четы́редесяте ко двѣма́ прило́жшеся,* пресла́вніи, Ца́рствія.

Съ Константи́номъ Васо́я и Ка́ллиста,* Ѳео́дора вси́ и Ѳео́фила* и про́чій боже́ственный собо́ръ страстоте́рпецъ* велегла́сно восхва́лимъ,* умре́ти бо произво́лиша* за вся́ческихъ Живота́,* закала́ющеся ра́достно.* И ны́нѣ во гра́дѣ Бо́га Жива́го почива́ютъ* и про́сятъ обрѣсти́ на́мъ* согрѣше́ній оставле́ніе въ де́нь Суда́* и соверше́нное избавле́ніе.

Сла́ва, и ны́нѣ, богоро́диченъ:

Иже благоче́стно* покланя́ющіяся Твоему́ Рождеству́* отъ вся́каго спаса́й навѣ́та вра́жія,* Богороди́тельнице Всенепоро́чная,* я́ко Предста́тельница всего́ ро́да на́шего су́щи.* Тя́ бо ны́нѣ по́мощь вси́ стяжа́хомъ,* прибѣ́жище же и утвержде́ніе* и Хода́таицу ко Влады́цѣ Христу́ и Го́споду.* Его́же моли́* дарова́ти ми́ръ мíру, мо́лимся,* и грѣхо́въ разрѣше́ніе* притека́ющимъ въ кро́въ Тво́й.

Или́ крестобогоро́диченъ:

Не рыда́й Мене́, Ма́ти,* зря́щи на дре́вѣ повѣ́шена* Твоего́ Сы́на и Бо́га,* Иже на вода́хъ повѣ́сившаго зе́млю неодержи́мо* и всю́ тва́рь созда́вшаго,* и́бо воскресну́, и просла́влюся,* и а́дова ца́рствія сокрушу́ крѣ́постію,* и погублю́ того́ си́лу,* и свя́занныя изба́влю отъ злодѣ́йства его́,* я́ко Благоутро́бенъ,* и Отцу́ Моему́ приведу́,* я́ко Человѣколю́бецъ.

Аще случи́тся въ суббо́ту или́ въ недѣ́лю, пое́тся и самогла́сенъ се́й.
Сла́ва, гла́съ 2. Меѳо́діево:

Це́рковь дне́сь торжеству́етъ та́инственно, но́вою оде́ждою одѣ́явшися, я́ко порфи́рою и виссо́номъ, кровьми́ но́выхъ страстоте́рпцевъ: сія́ бо во благоче́стіи воспита́вши, же́ртву непоро́чну, прія́тну и благоуго́дну, Христе́, Тебѣ́ принесе́. Тѣ́мъ побѣди́тели сія́ пребеззако́нныхъ показа́вый, и вѣнча́вый, и просла́вивый, и на́мъ низпосли́ тѣ́хъ моли́твами ве́лію ми́лость.

На стихо́внѣ, Сла́ва, гла́съ 6. Сикео́та:

По́лкъ боговѣнча́ненъ новоявле́нныхъ му́ченикъ, заколе́ніе непоро́чное за Христа́ пожре́ное усе́рдно, святоизбра́нное во́инство четы́редесяти двою́, мучениколю́бцы, пріиди́те, всесвяще́нную па́мять духо́вно соверши́вше, возопіи́мъ къ ни́мъ: сокруши́те сверѣ́пство ага́рянъ безбо́жныхъ и изба́вите лю́ди благочестному́дренныя моли́твами ва́шими вся́каго обстоя́нія.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего, иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.


НА УТРЕНИ,
Кано́нъ, творе́ніе Игна́тіево. Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Во глубину́ мя па́дша грѣхо́въ и Твое́й пучи́нѣ прибѣга́юща щедро́тъ, мольба́ми, Христе́, страстоно́сецъ во спасе́нія приста́нище наста́ви.

Блиста́яся добро́тою добродѣ́телей, нося́ багряни́цу отъ крове́й му́ченическихъ, я́ко ски́петръ, держа́ кре́стъ, ца́рствуеши съ Го́сподемъ, Ѳео́доре.

Въ пѣ́снѣхъ Ѳео́дора, вѣ́рніи, Ка́ллиста, и Васо́я и Ѳео́фила съ ни́ми, вку́пѣ съ Константи́номъ до́блимъ, и про́чія восхва́лимъ му́ченики.

Богоро́диченъ: Изблева́ Евы во у́ши я́дъ душетлѣ́нный льсте́цъ и вражде́бникъ, Христа́ же ро́ждши, Богома́ти, сего́ вре́дъ исцѣли́ла еси́.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Просвѣща́емь заре́ю я́ко вои́стинну, сла́вне, богоче́стія и добро́тою украша́емь Боже́ственныхъ дѣя́ній, ва́рварскаго безбо́жія мра́чное разруши́лъ еси́, блаже́нне, злоче́стіе.

Крове́й то́ки, рѣка́ми те́кшіи изъ пречи́стыхъ тѣле́съ страстоте́рпецъ Твои́хъ, Ца́рствіе Твое́ и сла́дости пото́къ си́мъ исхода́тай, Благоутро́бне Го́споди.

Яко звѣ́зды, неле́стныя страда́льцы просія́вше Це́ркве святы́я ны́нѣ тве́рди, всю́ озари́ша вселе́нную луча́ми свои́хъ страда́ній, до́блественнѣйшіи.

Богоро́диченъ: Вопло́щся во чре́вѣ Твое́мъ и бы́въ Человѣ́къ лу́чшаго ра́ди, Сы́й еди́нъ Человѣколю́бецъ спаса́етъ человѣ́ка отъ вра́тъ сме́ртныхъ, Богома́ти Пречи́стая, еди́на Всепѣ́тая.

Конда́къ, гла́съ 4. Подо́бенъ: Вознесы́йся.

На земли́ Христа́ ра́ди страда́льчествовавше, я́вльшеся, благочести́віи вѣне́чницы, небеса́ прія́сте жи́ти въ ра́дости: вся́кую бо ко́знь вра́жію низложи́вше болѣ́зньми и кровьми́ ва́шихъ я́звъ, хва́лящимъ свы́ше при́сно грѣхо́въ разрѣше́ніе подава́ете.

Сѣда́ленъ, гла́съ 8. Подо́бенъ: Прему́дрости.

Ведо́ми бы́сте свя́зани отъ враго́въ и въ темни́цѣ заключе́ни на времена́ мно́га, вѣ́рою соблюда́емы, невре́дни пребы́сте и, отрѣ́шшеся мечи́ тѣле́съ, святíи, Боже́ственнымъ жела́ніемъ я́вѣ связа́стеся. Тѣ́мже, я́ко свѣти́ла, просія́ете въ мíрѣ, вся́ просвѣща́юще Ду́ха благода́тію, страстоте́рпцы блаже́нніи, моли́те Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять ва́шу.

Сла́ва, и ны́нѣ, богоро́диченъ:

Яко Дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи, Огнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ Пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою Пресвято́му Рождеству́ Твоему́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Укра́шся добро́тами по́двиговъ твои́хъ, одѣ́ялся еси́ во хлами́ду, отъ крове́й твои́хъ очервле́ную му́ченическихъ, и украси́лся еси́ діади́мою побѣ́ды. Тѣ́мже съ му́ченики предъ лице́мъ Госпо́днимъ слику́еши, всеблаже́нне Ѳео́доре.

Въ темни́цѣ окова́ны но́ги твоя́ желѣ́зомъ, Ка́ллисте непобѣди́ме, муче́нія неле́стную стезю́ ше́ствовати невозбра́нно моли́лся еси́, разрѣши́вся же мече́мъ отъ тѣ́ла, а́біе любо́вію связа́лся еси́ Зижди́теля.

Боже́ственное во́инство, богособра́нный по́лкъ, отъ мно́гихъ мѣ́стъ же и градо́въ дво́ица проста́ страда́лецъ съ четверочи́сленною десяти́цею ны́нѣ возсія́, зако́нно пострада́вше и усѣка́еми въ главы́ за Главу́ всѣ́хъ — Христа́.

Богоро́диченъ: Ты́ вѣ́рныхъ похвала́ еси́, Безневѣ́стная, Ты́ Предста́тельница, Ты́ и прибѣ́жище христіа́нъ, стѣна́ и приста́нище, къ Сы́ну бо Твоему́ мольбы́ но́сиши, Всенепоро́чная, и спаса́еши отъ бѣ́дъ вѣ́рою и любо́вію Богоро́дицу Чи́стую Тя́ сла́вящія.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Предзря́ вѣнцы́ и пребыва́ющую сла́ву, Ѳео́доре, дерзнове́ннымъ нра́вомъ стра́ждущимъ съ тобо́ю вопія́лъ еси́: сме́рти ника́коже ужаса́йтеся, е́юже по ма́лѣ весе́ліе и живо́тъ пріи́мете несказа́нный.

Уязвля́емь любо́вію, блаже́нне, Влады́ки твоего́ и огне́мъ опаля́емь Того́ жела́ніемъ, муче́нія ча́шу испи́лъ еси́, я́же скве́рнами вторы́ми ника́коже оскверня́ется, страда́льче всеприснопа́мятне Ка́ллисте.

Терпѣливому́дрымъ нра́вомъ пе́рвый къ страда́нію самоотше́лъ еси́, поуче́ніе му́жества состра́ждущимъ бы́лъ еси́, Ѳео́доре, съ ни́миже наслѣ́дствовалъ еси́ вѣ́чная поко́ища и сла́дость, при́сно пребыва́ющую.

Богоро́диченъ: Разрѣше́ніе согрѣше́ній Твои́ми моли́твами пода́ждь рабо́мъ Твои́мъ, избавля́ющи сія́ напа́стей, и бѣ́дъ, и скорбе́й, и ху́льныхъ еретико́въ одержа́нія, Богоро́дице Дѣ́во Всенепоро́чная.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Крове́й твои́хъ тече́нія, рѣ́чно излива́емая, пре́лести му́тныя пото́ки изсуши́ша, вѣ́рныхъ же напои́ша всѣ́хъ сердца́, досточу́дне Ѳео́доре.

Отъ стра́сти глуби́нныя возводя́ Твоя́ му́ченики, на ка́мени терпѣ́нія тѣ́хъ утверди́лъ еси́, враго́въ стопы́ и стропти́выхъ путе́й уклони́вшіяся, Человѣколю́бче.

Красно́, я́ко рѣка́, изъ Еде́ма устреми́вшаяся, гра́дъ Бо́жій ва́шими кровьми́ веселите́, му́ченицы, нече́стія скве́рну благоче́стно очи́стивше.

Богоро́диченъ: Яко одушевле́нный киво́тъ, Законоположи́теля вмѣсти́ла еси́, и, я́ко свя́тъ же хра́мъ, прія́ла еси́ Свята́го, бы́вша Человѣ́ка на благодѣя́ніе человѣ́ковъ, Богоро́дице Чи́стая.

Конда́къ, гла́съ 2. Подо́бенъ: Вы́шнихъ ища́.

Новоявле́нныя звѣ́зды вѣ́ры, за Христа́ усе́рдно пострада́вшія, похва́льными вѣнцы́ досто́йнѣ вси́ вѣнча́емъ, о на́съ моля́щіяся Христу́, я́ко су́ще столпы́ и забра́ла христіа́нскаго нача́льства.

Икосъ:

Ага́рянскую безбо́жную вѣ́ру и лю́таго бѣ́са пре́лесть, отъ души́, страда́льцы, ненави́дяще и гнуша́ющеся и печа́ть Христо́ву Боже́ственную обнося́ще цѣ́лу въ сердца́хъ, плещи́ враго́мъ, ненави́дящимъ Того́, не да́сте, па́че же усе́рдно вси́ за Него́, я́коже а́гнцы, закала́еми, просія́сте по кончи́нѣ, я́ко со́лнце, безсме́ртную сла́ву обрѣ́тше, я́ко столпы́ и забра́ла христіа́нскаго нача́льства.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Яко зако́нно пострада́въ, пра́вды вѣнцы́ прія́лъ еси́ отъ Еди́наго Влады́ки и ны́нѣ Боже́ственною добро́тою наслажда́ешися, о Ѳео́доре, вопія́: оте́цъ на́шихъ Бо́же, благослове́нъ еси́.

Къ заколе́нію во́льнѣ, я́ко а́гнецъ на же́ртву, му́чениче ведо́мъ, на вы́шнѣй положи́лся еси́ трапе́зѣ же́ртва, пѣснопоя́, внегда́ закала́тися: оте́цъ на́шихъ Бо́же, благослове́нъ еси́.

Любве́ Твоея́, Сло́ве, огне́мъ въ се́рдцы опаля́емь, те́рніе злосла́вія попали́лъ е́сть му́ченикъ, воспѣва́я Тебѣ́, Калли́стъ: оте́цъ на́шихъ Бо́же, благослове́нъ еси́.

Исмаи́лъ пребезу́мный, богому́дрыя увѣща́ти Христа́ отврещи́ся мнѣ́въ, посра́мленъ бы́сть, тíи бо внегда́ умира́ти, благоче́стно взыва́ху: оте́цъ на́шихъ Бо́же, благослове́нъ еси́.

Богоро́диченъ: Изъ дѣ́вственнаго чре́ва вопло́щся, яви́лся еси́ на спасе́ніе на́ше. Тѣ́мже, Твою́ Ма́терь вѣ́дуще, Богоро́дицу, благода́рно взыва́емъ: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Страда́льцевъ ли́къ прило́гъ тя́ прія́тъ, муче́нія добро́тами сія́юща, возду́хъ освяти́ся въ возвраще́ніи твое́мъ, му́чениче, и а́нгельская собра́шася мно́жества, земля́ освяти́ся, идѣ́же лежи́тъ тѣ́ло твое́, о терпѣливому́дренне Ѳео́доре треблаже́нне!

Наслѣ́дія у́же Госпо́дне бы́въ и къ заколе́нію самово́лею влеко́мь, у́жемъ связа́тися тебѣ́ не прія́лъ еси́, Калли́сте, отсѣка́емѣй главѣ́ святѣ́й. Тѣ́мже вѣнцено́сецъ возше́дъ, лику́еши съ вы́шними во́инствы во вѣ́ки вся́.

Да ублажи́тся Калли́стъ и похва́ленъ бу́ди Ѳео́доръ, вку́пѣ съ Константи́номъ чу́дный Ѳео́филъ, Васо́й крѣпча́йшій и про́чій му́чениковъ ли́къ, со а́нгельскими ликовству́я ли́ки и поя́ немо́лчно: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Въ рѣку́ вве́ржени му́ченицы бы́вше сла́вніи, по ме́чнѣмъ томле́ніи ведя́хуся ко приста́нищу благоти́шному, е́же о Христѣ́ осла́бы, во́ды преле́стныя, то́ками крове́й изсуши́вше, е́же пѣ́ти научи́ша: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Богороди́тельнице Всечи́стая, души́ моея́ я́звы и грѣхо́вныя стру́пы очи́сти, исто́чниками омыва́ющи, су́щими изъ ре́бръ Рождества́ Твоего́ и су́щими отъ ни́хъ очища́ющи струя́ми, къ Тебѣ́ бо взыва́ю, и къ Тебѣ́ прибѣга́ю, и Тя́ призыва́ю, Богоблагода́тную.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Дре́внихъ му́жеству поревнова́въ страстоте́рпцевъ, тѣ́хъ и зва́нія и ра́дости получи́лъ еси́, Ѳео́доре, вои́стинну. Но на́съ помина́й, соверша́ющихъ твою́ благоче́стно па́мять святу́ю, я́ко имѣ́я дерзнове́ніе ко Влады́цѣ, е́же спасти́ся на́мъ.

Въ струя́хъ Іорда́нскихъ крести́выйся, крести́вшіяся свои́ми кровьми́ и Того́ сме́рти поревнова́вшія благоче́стно, въ рѣцѣ́ му́ченики соедини́, вве́рженныя главы́ къ тѣлесе́мъ совокупи́въ и ты́я въ приста́нище наста́вивъ невла́емое.

Четверочи́сленная му́чениковъ боже́ственная десяти́це съ дво́ицею честно́ю, моли́теся, на небесѣ́хъ ны́нѣ живу́ще въ ра́дости, о на́съ, мо́лимся, соверша́ющихъ на земли́ ва́шу всесвяту́ю и свѣтоно́сную па́мять, вся́каго изба́витися обстоя́нія.

Богоро́диченъ: Зачала́ еси́, Дѣ́во, безъ сѣ́мене вся́ческая созда́вшаго Сло́ва Бо́жія, кромѣ́ хотѣ́ній пло́ти; безъ истлѣ́нія же родила́ еси́, безъ болѣ́зней ма́тернихъ. Тѣ́мъ Тя́, Богоро́дицу, и язы́комъ и се́рдцемъ исповѣ́дающе, велича́емъ.

Свѣти́ленъ. Подо́бенъ: Жены́, услы́шите.

Му́чениковъ ка́я у́бо бу́детъ сы́тость мучениколю́бцу па́мяти Боже́ственныя, я́ко рече́ Васи́лій пре́жде Вели́кій? На́мъ же ны́нѣ предстои́тъ пѣ́ти Боже́ственныя му́ченики, два́ и четы́редесять, терпѣли́вно пострада́вшія за Христа́ Спа́са.

Богоро́диченъ:

Прему́дрость Ѵпоста́сную, и Сло́во Пресу́щественное, и Врача́ тѣле́съ и ду́шъ ро́ждшая, стру́пы и я́звы души́ моея́ исцѣли́ лю́тыя и вре́менныя и се́рдца моего́ ути́ши болѣ́зни, Дѣ́во.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 26 – 30 об.

/ Къ оглавленію раздѣла /


Наверхъ / Къ титульной страницѣ

0