Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 5-й де́нь.
Слу́жба свято́му преподобному́ченику Адріа́ну, игу́мену Пошехо́нскому, чудотво́рцу.

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 6:

Посто́мъ и моли́твою вооружи́вся, ю́ностныя стра́сти побѣди́лъ еси́, Адріа́не всече́стне, и, во оби́тели преподо́бнаго Корни́лія подвиза́вся, дости́глъ еси́ въ му́жа соверше́нна о Христѣ́, Ему́же ны́нѣ со а́нгелы предстои́ши и при́сно мо́лишися спасти́ся душа́мъ на́шимъ.

Лю́діе пребеззако́нніи, собра́вшеся во оби́тель твою́, преподо́бне, со ору́жіемъ и дреко́льми, сме́рти му́ченичестѣй тя́ преда́ша, Адріа́не многострада́льне, тѣ́мже, чту́ще свято́е твое́ страда́ніе, мо́лимъ тя́, Христо́въ уго́дниче: помоли́ся ко Го́споду спасти́ся душа́мъ на́шимъ.

Сла́ва, гла́съ то́йже:

Отъ младе́нчества Христу́ угоди́въ, преподо́бне, вѣнце́мъ му́ченическимъ отъ Него́ укра́сился еси́ досто́йно, и, чуде́съ благода́ть получи́въ, исцѣля́еши неду́жныя, съ вѣ́рою къ тебѣ́ притека́ющія, Адріа́не преблаже́нне, моли́твенниче о душа́хъ на́шихъ.

И ны́нѣ, богоро́диченъ:

Досто́йно е́сть [я́ко вои́стинну, блажи́ти Тя́ Богоро́дицу: въ Твое́ бо пречи́стое вше́дъ чре́во всѣ́хъ Содѣ́тель, пло́ть бы́сть, не преложи́вся естество́мъ, ниже́ мечта́вся о смотре́ніи, но воспрія́тѣй изъ Тебе́ слове́сно одушевле́ннѣй пло́ти соедини́вся, по ѵпоста́си. Отню́дуже благоче́стно во обои́хъ естества́хъ явля́ющихся ра́знство твори́мъ. Того́ моли́, Честна́я Пресвята́я, низпосла́ти на́мъ ми́ръ и ве́лію ми́лость].

На стихо́внѣ стихи́ры, гла́съ 1:

Прехва́льно житіе́ твое́, Адріа́не богоно́сне, ди́вно терпѣ́ніе твое́ и незло́біе, страстоте́рпче преподо́бне, пресла́вны и чудотворе́нія твоя́, и́миже просла́ви тя́ Христо́съ, небе́сный Вѣнцеда́тель, Его́же моли́ дарова́ти на́мъ ми́ръ и ве́лію ми́лость.

Сти́хъ: Честна́ предъ Го́сподемъ сме́рть преподо́бныхъ Его́.

Преподобному́чениче всече́стне, твое́ житіе́ равноа́нгельно бы́сть на земли́, твоя́ му́ченическая кончи́на, я́коже же́ртва ту́чна, Бо́гови яви́ся, Иже чуде́съ благода́тію тя́ просла́ви и твои́ми моли́твами да́руетъ на́мъ ми́ръ и ве́лію ми́лость.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Пребога́тое сокро́вище исцѣле́ній яви́ся на́мъ всечестна́я ра́ка твоя́, Адріа́не преподо́бне, страда́льче всеблаже́нне. За мучи́телей твои́хъ моли́лся еси́ Бо́гу, я́ко и́стинный Христо́въ подо́бникъ, и, му́ченическую кончи́ну воспрія́въ, чудесы́ просла́вился еси́. Тѣ́мже и ны́нѣ помоли́ся о вѣ́рно чту́щихъ святу́ю па́мять твою́, дарова́ти на́мъ ми́ръ и ве́лію ми́лость.

Сла́ва, гла́съ 4:

Ору́жіемъ Креста́ Христо́ва, преподобному́чениче Адріа́не, побѣди́лъ еси́ вся́ діа́вольскія искуше́нія, послѣди́ же отъ люде́й всезло́бныхъ до кро́ве пострада́въ, му́ченическую кончи́ну воспрія́лъ еси́, и со страстоте́рпцы увѣнча́лся еси́, и мо́лишися Христу́ о душа́хъ на́шихъ.

И ны́нѣ, богоро́диченъ:

При́зри на моле́нія Твои́хъ ра́бъ, Всенепоро́чная, [утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ].

Тропа́рь, гла́съ 4:

Христо́ву му́ченику Адріа́ну тезоимени́тъ бы́лъ еси́, преподо́бне, мно́гія труды́ подъя́лъ еси́ въ жи́зни вре́меннѣй, оби́тель и́ноческую созида́я въ пусты́ни, идѣ́же пострада́лъ еси́ да́же до кро́ве отъ злы́хъ разбо́йникъ и му́ченическую сме́рть отъ ни́хъ прія́лъ еси́, Адріа́не сла́вне, чуде́съ благода́тію обогати́вся, предстои́ши всѣ́хъ Царю́, Христу́ Бо́гу, Его́же моли́ спасти́ся душа́мъ на́шимъ.

Сла́ва, и ны́нѣ, богоро́диченъ:

Еже отъ вѣ́ка утае́нное, [и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша].


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры [на 8], гла́съ 4:

Духо́внымъ жела́ніемъ распали́вся, преподо́бне, вся́, я́же въ мíрѣ кра́сная, возненави́дѣлъ еси́, Христа́ еди́наго возлюби́въ, и, Его́ ра́ди оте́чество твое́ оста́вивъ, путе́мъ тѣ́снымъ ше́ствовалъ еси́ и́ноческаго житія́, Адріа́не преблаже́нне, моли́твенниче о душа́хъ на́шихъ. [Три́жды.]

Житіе́ твое́ благо́е во оби́тели преподо́бнаго Корни́лія, Адріа́не богоно́сне, привлече́ на тя́ благода́ть Ду́ха Свята́го, и бы́лъ еси́ сосу́дъ Его́ избра́нъ и че́стенъ. Тѣ́мже а́нгельскаго собесѣ́дованія досто́инъ яви́лся еси́ и Боже́ственныхъ видѣ́ній сподо́бился еси́, я́ко и́стинный Христо́въ уго́дникъ и моли́твенникъ о душа́хъ на́шихъ. [Три́жды.]

Госпо́дь, хотя́ яви́ти тебѣ́, преподо́бне о́тче, мѣ́сто пусты́нное для твоего́ безмо́лвія, посла́ къ тебѣ́ а́нгела Своего́ и наста́вника, и́же во о́бразѣ стра́нника ста́рца приведе́ тя въ пусты́ню, Бо́гомъ тебѣ́ предуста́вленную, и а́біе неви́димь бы́сть, Адріа́не богоно́сне, моли́твенниче о душа́хъ на́шихъ. [Два́жды.]

Сла́ва, гла́съ 6:

Пріиди́те, вѣ́рніи, пріиди́те, и́ноковъ ликостоя́нія и пусты́ни сея́ ча́да духо́вная, восхва́лимъ Христа́ Бо́га, просла́вльшаго здѣ́ Своего́ уго́дника, преподобному́ченика и чудотво́рца Адріа́на, его́же святы́я мо́щи, многолѣ́тнѣ въ земли́ сокрове́нныя въ пу́стѣ мѣ́стѣ, яви́ чуде́сно на утѣше́ніе и исцѣле́ніе на́ше, я́ко неду́ги врачу́етъ страстоте́рпецъ Христо́въ и мо́лится о душа́хъ на́шихъ.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ, проки́менъ дне́, чте́нія три́ преподо́бническія.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 2:

Егда́, Боже́ственнымъ жела́ніемъ распаля́емь, пустынножи́тельствовати возжелѣ́лъ еси́, о́тче богому́дре, тогда́ Бо́гъ о́бразомъ преди́внымъ а́нгела, я́ко стра́нна человѣ́ка, тебѣ́ посла́, и́же тя́ въ пусты́ню путеводи́въ и а́біе неви́димь та́мо предъ тобо́ю сотвори́ся, да та́ко удостовѣ́ришися, я́ко безпло́тный тебѣ́ яви́ся, уго́дниче Бо́жій преди́вный и моли́твенниче на́шъ при́сный, Адріа́не преподо́бне.

Егда́ прише́лъ еси́ въ пусты́ню, преподо́бне о́тче, ико́ну Пречи́стыя Богоро́дицы съ собо́ю нося́, и ту́ на дре́вѣ поста́вилъ еси́, чу́до ве́ліе сотвори́ся отъ нея́: рыболо́ву дерзнове́нному, ико́ну сня́ти восхотѣ́вшу, ру́цѣ и но́зѣ разслабѣ́ша, и я́ко ме́ртвъ бы́сть, да не де́рзнетъ про́чее на достоя́ніе твое́, уго́дниче Бо́жій преди́вный и моли́твенниче на́шъ при́сный, Адріа́не преподо́бне.

Сла́ва, гла́съ то́йже:

Оста́вивъ мíръ, преподо́бне о́тче, премíрно подвиза́лся еси́ въ пусты́ни и псалмопѣ́ніи немо́лчно Бо́га сла́вилъ еси́, служа́ сло́вомъ и дѣ́ломъ спасе́нію человѣ́ческому, тѣ́мже сла́вимъ святу́ю па́мять твою́ и вопіе́мъ ти́: ра́дуйся, страстоте́рпче преподо́бне, моли́твенниче о душа́хъ на́шихъ.

И ны́нѣ, богоро́диченъ:

О, чудесе́ но́ваго, [всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша].

На стихо́внѣ стихи́ры, гла́съ 4:

Пусты́нныя по́двиги терпѣли́во проходи́лъ еси́, преподо́бне о́тче, алка́я и жажда́я, сна́ очесе́мъ твои́мъ не да́лъ еси́ и вся́чески пло́ть твою́ удручи́лъ еси́, до́ндеже безстра́стія дости́глъ еси́, и съ Бо́гомъ и а́нгелы досто́йно бесѣ́довалъ еси́, Адріа́не приснопа́мятне.

Сти́хъ: Честна́ предъ Го́сподемъ сме́рть преподо́бныхъ Его́.

Всели́вся въ пусты́ню, о́тче богому́дре, ча́да послуша́нія въ не́й духо́вно породи́лъ еси́ и Бо́гови сія́ приве́лъ еси́ уче́ніемъ твои́мъ святы́мъ, е́же всѣ́мъ бы́сть на по́льзу душе́вную, Адріа́не приснопа́мятне.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Весели́лся еси́, преподо́бне о́тче, ду́хомъ твои́мъ, ви́дѣвъ це́рковь Бо́жія Ма́тере, въ пусты́ни твое́й зи́ждиму, въ не́йже ны́нѣ моща́ми твои́ми святы́ми почива́еши и вся́ ны́ освяща́еши чуде́съ твои́хъ благода́тію, Адріа́не приснопа́мятне.

Сла́ва, гла́съ 8:

Весе́ліе вѣ́чное и ра́дость несконча́емую унаслѣ́довалъ еси́, преподобному́чениче сла́вне, пострада́въ отъ всезло́бныхъ разбо́йникъ, вѣнце́мъ му́ченическимъ увѣнча́лся еси́ отъ Христа́, Царя́ и Бо́га, Ему́же моли́ся за чту́щія святу́ю и всечестну́ю па́мять твою́.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь то́йже, [два́жды]. Сла́ва, и ны́нѣ, богоро́диченъ: Еже отъ вѣ́ка утае́нное...

По 1-мъ стихосло́віи сѣда́ленъ, гла́съ 4:

Свѣ́томъ чуде́съ по сме́рти сія́я, преподобному́чениче Адріа́не, благода́тно просвѣща́еши ду́ши на́ша, врачу́я вся́кія тѣле́сныя въ на́съ неду́ги прикоснове́ніемъ къ честнѣ́й ра́цѣ многоцѣле́бныхъ моще́й твои́хъ. Тѣ́мже сла́вимъ тя́, цѣле́бника благода́тнаго. [Два́жды.]

Сла́ва, и ны́нѣ, богоро́диченъ:

Подъ кро́въ Тво́й, Пречи́стая Дѣ́во, прибѣга́ющихъ мольбу́ пріемши́, непреста́нно моли́ о на́съ Человѣколю́бца, спасти́ рабы́ Твоя́.

По 2-мъ стихосло́віи сѣда́ленъ, гла́съ 4:

Явльшагося ти́ а́нгела ви́дѣвъ, преподо́бне о́тче Адріа́не, не позна́лъ еси́ его́, но мня́ человѣ́ка стра́нна бы́ти, съ любо́вію вве́лъ еси́ его́ въ свою́ ке́ллію, съ ни́мже пото́мъ ше́ствуя, пусты́ни дости́глъ еси́ и, неви́дима спу́тника твоего́ узрѣ́въ, воспѣ́лъ еси́ Христу́ хвале́бную пѣ́снь: аллилу́ія. [Два́жды.]

Сла́ва, и ны́нѣ, богоро́диченъ:

Въ Тво́й покро́въ Боже́ственный а́зъ прибѣго́хъ, смире́нный, Богоро́дице, молю́: поми́луй, Чи́стая, я́ко беззако́нія моя́ превзыдо́ша главу́ мою́, и бою́ся, Влады́чице, муче́нія и трепе́щу, моли́тву сотвори́, Чи́стая, къ Сы́ну Твоему́ отъ си́хъ изба́вити мя́.

Велича́ніе:

[Ублажа́емъ тя́, преподобному́чениче Адріа́не, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 8:

Смире́ніе христоподража́тельное возлюби́лъ еси́, Адріа́не богому́дре, и нищету́ па́че бога́тства избра́лъ еси́, да смири́вшемуся на́съ ра́ди до ра́бія зра́ка Христу́ уго́денъ бу́деши, и́же, вѣнце́мъ му́ченическимъ тя́ увѣнча́въ, чудесы́ мно́гими просла́ви. Ему́же помоли́ся, преподо́бне, за чту́щія любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Всенепоро́чная Невѣ́сто Творца́, я́ко неискусому́жная Ма́ти Изба́вителя, прія́телище я́ко су́щи Утѣ́шителя, Всепѣ́тая, беззако́нію мя́ су́ща скве́рное обита́лище и де́мономъ игра́лище въ ра́зумѣ бы́вша, потщи́ся отъ тѣ́хъ злодѣ́йствія мя́ изба́вити и свѣ́тло жили́ще добродѣ́телей соверши́, Свѣтоно́сная, Нетлѣ́нная, отжени́ о́блакъ страсте́й и вы́шняго прича́стія сподо́би и Свѣ́та невече́рняго моли́твами Твои́ми.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе отъ Ма́рка, зача́ло 37.

По 50-мъ псалмѣ́ стихи́ра, гла́съ 6:

Го́ры, и хо́лмы, и дубра́ва пусты́нная, возра́дуйтеся съ на́ми въ торжествѣ́ свята́го засту́пника на́шего, преподобному́ченика и чудотво́рца Адріа́на, его́же святы́я мо́щи стяжа́хомъ сокро́вище исцѣле́ній и того́ и́мамы отца́ и утѣ́шителя, моля́щася при́сно ко Го́споду о спасе́ніи ду́шъ на́шихъ.

Кано́нъ, гла́съ 3.

Пѣ́снь 1.

Ирмо́съ: Су́шу глубороди́тельную зе́млю со́лнце наше́ствова иногда́: я́ко стѣна́ бо, огустѣ́ обапо́лы вода́ лю́демъ пѣшомореходя́щимъ и богоуго́дно пою́щимъ: пои́мъ Го́сподеви, сла́вно бо просла́вися.

Агнче Бо́жій, Іису́се Всеблагíй, прему́дрости и смы́сла Пода́телю, да́ждь ми́, Сло́ве Бо́жій, грѣ́шному и недосто́йному, воспѣ́ти уго́дника Твоего́, до́бляго страда́льца и чудотво́рца Адріа́на, его́же въ чудесѣ́хъ сла́вно просла́вилъ еси́.

Бы́лъ еси́ вои́стинну дѣ́латель до́брый виногра́да Христо́ва, Адріа́не блаже́нне, въ пусты́ни его́ насади́въ и сле́зъ твои́хъ струя́ми сію́ напои́въ, пло́дъ трудо́въ твои́хъ Бо́гови прине́слъ еси́, зовы́й: сла́вно бо просла́вися.

Всего́ себе́ въ же́ртву Бо́гу прине́слъ еси́, преподо́бне, во́лю твою́ всецѣ́ло Ему́ повину́въ, а́нгеловымъ указа́ніемъ пусты́ни дости́глъ еси́ и въ не́й трудолю́бно подвиза́лся еси́, при́сно поя́ Го́сподеви: сла́вно бо просла́вися.

Богоро́диченъ: Господороди́тельнице, Влады́чице Пречи́стая, моли́, Его́же родила́ еси́, Бо́га и Спа́са на́шего, со преподобному́ченикомъ Адріа́номъ, да ми́лостивъ на́мъ бу́детъ въ де́нь су́дный.

Пѣ́снь 3.

Ирмо́съ: Непло́дная душе́ и безча́дная, стяжи́ пло́дъ благосла́вный, веселя́щися, возопíй: утверди́хся Тобо́ю, Бо́же, нѣ́сть свя́тъ, нѣ́сть пра́веденъ, па́че Тебе́, Го́споди.

Ду́хомъ Го́сподеви рабо́тая, за́повѣди Христо́вы отъ ю́ности твоея́ возлюби́лъ еси́, о́тче преблаже́нне, и сія́ свѣ́тъ стезя́мъ твои́мъ имѣ́лъ еси́, богоно́сне, тѣ́мже непреткнове́нно возше́лъ еси́ на го́ру небе́сную, идѣ́же ра́достно пое́ши: нѣ́сть свя́тъ и нѣ́сть пра́веденъ, па́че Тебе́, Го́споди.

Егда́ позави́дѣ вра́гъ спасе́нія человѣ́ческаго твои́мъ по́двигомъ, преподо́бне, зло́бныхъ разбо́йникъ наусти́ разгра́бити оби́тель твою́ и тя́ му́ченичестѣй сме́рти преда́ти, но ты́ среди́ муче́ній кро́тцѣ вопія́лъ еси́: нѣ́сть свя́тъ и нѣ́сть пра́веденъ, па́че Тебе́, Го́споди.

Житіе́ твое́ равноа́нгельное и страда́ніе непови́нное, Адріа́не всече́стне, въ воню́ благоуха́нія духо́внаго воспрія́ Госпо́дь и дарова́ тебѣ́ ве́лію благода́ть цѣле́бную, е́юже безме́здно врачу́еши ду́ши и тѣлеса́ на́ша, да хвале́бно пое́мъ: нѣ́сть свя́тъ и нѣ́сть пра́веденъ, па́че Тебе́, Го́споди.

Богоро́диченъ: Зачала́ и родила́ еси́ Отчее Сло́во, Его́же моли́, Богоро́дице, со преподобному́ченикомъ Адріа́номъ изба́вити отъ бѣ́дъ рабы́ Твоя́, вои́стинну призыва́ющія Тя́, святы́й одушевле́нный Бо́жій Киво́те.

Сѣда́ленъ, гла́съ 3:

Бога́тство тлѣ́нное и сла́ву мимотеку́щую оста́вилъ еси́, преподо́бне о́тче, и́нокъ соверше́нъ бы́въ, пусты́ни дости́глъ еси́ и въ не́й трудолю́бно подвиза́лся еси́, во́лею же Бо́жіею та́мо му́ченически пострада́лъ еси́ отъ лю́тыхъ разбо́йникъ и ны́нѣ со а́нгелы и му́ченики Влады́цѣ всѣ́хъ предстои́ши, моля́ся непреста́нно о всѣ́хъ на́съ. [Два́жды.]

Сла́ва, и ны́нѣ, богоро́диченъ:

Яко недѣ́ланъ, Дѣ́во, виногра́дъ, прекра́сный Гро́здъ прозябла́ еси́, источа́ющій на́мъ вино́ спасе́нія, всѣ́хъ веселя́щее, тѣ́мже, я́ко вино́вную до́брымъ, ублажа́юще, вопіе́мъ со а́нгеломъ: ра́дуйся, Благода́тная, Госпо́дь съ Тобо́ю!

Пѣ́снь 4.

Ирмо́съ: Положи́лъ еси́ къ на́мъ тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́лъ еси́. Тѣ́мже Ти́ зове́мъ, благодаря́ще: сла́ва си́лѣ Твое́й, Го́споди.

Егда́ му́чити нача́ша тя́ всезло́бніи разбо́йницы, преподо́бне о́тче, тогда́ кро́тцѣ и́мъ вѣща́лъ еси́: почто́, о человѣ́цы, му́чити мя́ хо́щете и отъ свѣ́та сего́ сла́дкаго отлучи́ти мя́ тщи́теся? Но молю́, осла́бите ми́ ма́ло, да помолю́ся ко Го́споду и возопію́: сла́ва си́лѣ Твое́й, Го́споди.

Яко звѣ́ри ди́віи, устреми́шася на тя́ разбо́йницы, о́тче преблаже́нне, и ножа́ми изра́ниша все́ тѣ́ло твое́, о́гнь къ ра́намъ твои́мъ прилага́юще, лю́тѣ тя́ му́чиша, ты́ же за ни́хъ моли́лся еси́ Бо́гу и, му́чимый, взыва́лъ еси́: сла́ва си́лѣ Твое́й, Го́споди.

Исполня́я за́повѣдь Христо́ву, страда́льче преподо́бне, среди́ муче́ній, я́ко первому́ченикъ Стефа́нъ, моли́лся еси́ за своя́ мучи́тели, взыва́я: Го́споди, не поста́ви и́мъ грѣха́ сего́! И до послѣ́дняго издыха́нія твоего́ вѣ́рно пѣ́лъ еси́: сла́ва си́лѣ Твое́й, Го́споди.

Богоро́диченъ: Кади́льнице всезлата́я, Марíе Всенепоро́чная, съ преподобному́ченикомъ Адріа́номъ, вѣ́рнымъ Твои́мъ слуго́ю, моли́ Христа́ Бо́га, Его́же родила́ еси́, изба́витися на́мъ отъ бѣ́дъ и огня́ вѣ́чнующаго, да, спасе́нніи моли́твами Твои́ми, возопіе́мъ: сла́ва Тебѣ́, Всеблагослове́нная.

Пѣ́снь 5.

Ирмо́съ: Къ Тебѣ́ у́тренюю, всѣ́хъ Творцу́, преиму́щему вся́къ у́мъ мíрови: зане́ свѣ́тъ повелѣ́нія Твоя́, въ ни́хже наста́ви мя́.

Сокруши́лъ еси́ терпѣ́ніемъ всю́ си́лу вра́жію, преподобному́чениче добропобѣ́дный, и, муче́нія пу́ть до́блественно проше́дъ, дости́глъ еси́ въ несконча́емый поко́й небе́сный, идѣ́же со а́нгелы лику́еши во свѣ́тѣ всѣ́хъ Творца́.

Моли́твѣ, бы́вшей во устѣ́хъ твои́хъ, страда́льче преподо́бне, по земли́ ко́ньми влачи́мый, преда́лъ еси́ ду́шу твою́ въ ру́цѣ Жива́го Бо́га и побѣдоно́сно со сла́вою возше́лъ еси́ въ черто́гъ Его́ небе́сный.

Нечести́віи разбо́йницы не умили́шася, ви́дѣвше кончи́ну твою́ му́ченическую, преподо́бне о́тче, но са́мое тѣ́ло твое́ ме́ртвое похи́тиша и сокры́ша, е́же ди́вно откры́ Госпо́дь и просла́ви тя́ чуде́съ благода́тію.

Богоро́диченъ: Упова́ніе и наде́жда Ты́ еси́, Пречи́стая Богоро́дице, всѣ́мъ правосла́внымъ христіа́номъ: спаси́ Импера́тора и лю́ди, вѣ́рно Тебѣ́ моля́щіяся, сомоли́твенника пріе́мъ преподобному́ченика Адріа́на, и́мя Твое́ просла́вльшаго оби́телію, во сла́ву Твою́ посвяще́нною.

Пѣ́снь 6.

Ирмо́съ: Бе́здна послѣ́дняя грѣхо́въ обы́де мя́, и исчеза́етъ ду́хъ мо́й, но простры́й, Влады́ко, высо́кую Твою́ мы́шцу, я́ко Петра́, мя, Упра́вителю, спаси́.

При́званъ бы́лъ еси́ во дворы́ небе́сныя, страстоте́рпче преподо́бне, тѣ́ло твое́, му́ченически ура́ненное, оста́вилъ еси́ на́мъ въ наслѣ́діе духо́вное, е́же разбо́йницы, а́ще и скры́ша, но Бо́гъ ди́вно откры́ и оби́тели твое́й дарова́, я́ко сокро́вище бога́тое исцѣле́ній.

Разумѣ́имъ вси́ Бо́жіе преди́вное смотре́ніе во откры́тіи и пренесе́ніи святы́хъ моще́й твои́хъ, преподобному́чениче Адріа́не, я́же мно́го лѣ́тъ невѣ́домы бы́вше и въ пу́стѣ мѣ́стѣ земле́ю покрове́ни лежа́вше, ны́нѣ всѣ́мъ явле́ни и отъ всѣ́хъ почита́еми быва́ютъ.

Свяще́нства благода́ть пріе́мъ на земли́, о́тче преподо́бне, въ ски́ніи небе́снѣй ны́нѣ священнодѣ́йствуеши и со дерзнове́ніемъ мо́лиши Тріеди́наго Бо́га о Це́ркви святѣ́й и оби́тели твое́й, почита́ющей вѣ́рно святу́ю па́мять твою́.

Богоро́диченъ: Ты́ еси́, Пречи́стая Богоро́дице, прибѣ́жище на́ше и утвержде́ніе, Тя́ стяжа́ Помо́щницу преподобному́ченикъ Адріа́нъ, сооруди́вый во и́мя Твое́ хра́мъ че́стенъ въ пусты́ни, съ ни́мже моли́ Сы́на Твоего́ и Бо́га на́шего пода́ти на́мъ спасе́ніе и грѣхо́въ оставле́ніе.

Конда́къ, гла́съ 6:

Жите́йскія молвы́ избѣжа́въ, преподо́бне, въ пусты́ню всели́лся еси́, и, та́мо оби́тель и́ноковъ возгради́въ, послѣди́ отъ разбо́йникъ му́ченически пострада́лъ еси́, и ны́нѣ сія́еши нетлѣ́ніемъ и чудесы́, Адріа́не многострада́льне, моли́твенниче о душа́хъ на́шихъ.

Икосъ:

Ангеломъ собесѣ́дника и му́ченикомъ сострада́льца, пѣ́сньми духо́вными восхва́лимъ, бра́тіе: то́й бо нача́льникъ оби́тели бы́сть и, ангелоподо́бнѣ въ не́й подвиза́вся, му́ченически сконча́ся, о́бразъ всѣ́мъ на́мъ въ себѣ́ подава́я терпѣ́нія и незло́бія, и́же, му́чимь, не пререка́ше и, убива́емь, за убíйцы своя́ моля́шеся, ны́нѣ же, увѣ́нчанъ отъ Христо́вой десни́цы, чудесы́ сія́етъ и вся́ ны́ благода́тнѣ озаря́етъ, да зове́мъ ему́: ра́дуйся, Адріа́не многострада́льне, моли́твенниче о душа́хъ на́шихъ.

Пѣ́снь 7.

Ирмо́съ: Тріе́ о́троцы въ пещи́, Тро́ицу прообрази́вше, преще́ніе о́гненное попра́ша и, пою́ще, вопія́ху: благослове́нъ еси́, Бо́же оте́цъ на́шихъ.

Пою́ще, сла́вимъ твоя́ по́двиги пусты́нныя, преподо́бне о́тче, и, твое́ страда́ніе му́ченическое воспомина́юще, про́симъ твоего́ моли́твеннаго предста́тельства за ны́ ко Го́споду, Ему́же вопіе́мъ: благослове́нъ еси́, Бо́же оте́цъ на́шихъ.

Кро́вію твое́ю обагре́нный и ра́ны нося́ на тѣ́лѣ твое́мъ, я́ко у́твари драгíя, предста́лъ еси́, преподо́бне, всѣ́хъ Царю́ Христу́ Бо́гу, Ему́же помоли́ся, страда́льче, и за ны́, грѣ́шныя, чту́щія святу́ю па́мять твою́ и вопію́щія: благослове́нъ еси́, Бо́же оте́цъ на́шихъ.

Христу́, на́съ ра́ди на Крестѣ́ ру́цѣ Свои́ распросте́ршему, подо́бствовалъ во́льнымъ распя́тіемъ пло́ти твоея́ со страстьми́ грѣхо́вными, Адріа́не преблаже́нне, послѣди́ рѣ́заніемъ и о́гненнымъ опале́ніемъ отъ разбо́йникъ сію́ въ же́ртву жи́ву Бо́гу прине́слъ еси́, зовы́й: благослове́нъ еси́, Бо́же оте́цъ на́шихъ.

Богоро́диченъ: Отъ утро́бы Твоея́ про́йде у́мное, Богоро́дице, Со́лнце, Сего́ моли́, я́ко Сы́на Твоего́ и Бо́га, со преподобному́ченикомъ Адріа́номъ возсія́ти на́мъ де́нь спасе́нія и сы́ны свѣ́та показа́ти, да ра́достно отъ души́ вопіе́мъ: благослове́нна еси́, Всенепоро́чная Влады́чице.

Пѣ́снь 8.

Ирмо́съ: Веще́ственного огня́ пла́мень невеще́ственнымъ увяди́ша богозри́міи о́троцы и поя́ху: благослови́те, вся́ дѣла́ Госпо́дня, Го́спода.

Мо́лимъ тя́, преблаже́нне: помоли́ся ко Го́споду, Благовѣ́рному Импера́тору на́шему въ ми́рѣ и здра́віи пребыва́ти, и всѣ́мъ лю́демъ россíйскимъ спасти́ся, да ра́достно вопіе́мъ просла́вльшему тя́ Влады́цѣ: благослови́те, вся́ дѣла́ Госпо́дня, Го́спода.

Враги́ неви́димыя побѣди́лъ еси́, преподо́бне, отъ ви́димыхъ же всезло́бныхъ разбо́йниковъ ра́ны лю́тыя претерпѣ́лъ еси́ до́блественнѣ, и, му́ченическую кончи́ну воспріе́мъ, но́вый му́ченикъ яви́лся еси́ въ земли́ Россíйстѣй, зовы́й Бо́гу, тя́ вѣнча́вшему: благослови́те, вся́ дѣла́ Госпо́дня, Го́спода.

Возшумѣ́ на тя́ лю́тая бу́ря страда́ній тѣле́сныхъ, о́тче богому́дре, но не поколеба́ му́жества души́ твоея́ и терпѣ́нія твоего́ крѣ́пкаго: взира́лъ бо еси́ на воздая́ніе небе́сное и моли́твенно вопія́лъ еси́ среди́ муче́ній: благослови́те, вся́ дѣла́ Госпо́дня, Го́спода.

Богоро́диченъ: Ще́драго и Человѣколюби́ваго Бо́га роди́ти, Богоро́дице, сподо́билася еси́, Сего́ моли́, Неискусобра́чная Отрокови́це, съ Адріа́номъ многострада́льнымъ ниспосла́ти на́мъ вѣ́ры утвержде́ніе и ве́лію ми́лость.

Пѣ́снь 9.

Ирмо́съ: Въ зако́нѣ сѣ́ни и писа́ній о́бразъ ви́димъ, вѣ́рніи: вся́къ му́жескій по́лъ, ложесна́ разверза́я, свя́тъ Бо́гу. Тѣ́мъ перворожде́нное Сло́во Отца́ Безнача́льна, Сы́на, первородя́щася Ма́терію неискусому́жно, велича́емъ.

Анто́нія Пече́рскаго духо́вное порожде́ніе, и Корни́лія Коме́льскаго пусты́нное воспита́ніе, Адріа́не преподо́бне, си́хъ добродѣ́тели въ себѣ́ совокупи́лъ еси́ и бы́лъ еси́ до́брый наслѣ́дникъ обои́хъ, съ ни́миже тя́ вку́пѣ, я́ко вѣ́рна уго́дника Бо́жія, въ пѣ́снѣхъ велича́емъ.

Безмо́лвіе пусты́нное возлюби́лъ еси́, богому́дре о́тче, и, красоту́ небе́сную мы́сленнымъ о́комъ созерца́я, къ не́й по́двигами пусты́нными восходи́лъ еси́, а́нгелъ земны́й и человѣ́къ небе́сный вои́стинну бы́въ. Тѣ́мже тя́ немо́лчно въ пѣ́снехъ велича́емъ.

Рыда́ніе го́рькое оста́вилъ еси́ бра́тіи твое́й, Адріа́не многострада́льне, егда́ лю́тѣ му́чима и убіе́нна отъ разбо́йникъ тя́ ви́дѣвше, лиши́шася и свята́го твоего́ тѣлесе́, увезе́ннаго изъ твоея́ оби́тели и безвѣ́стнѣ сокрове́ннаго въ земли́, е́же обрѣ́тше и о се́мъ ра́дующеся, въ пѣ́снехъ тя́ велича́емъ.

Богоро́диченъ: Чу́ждыхъ на́съ яви́, Влады́чице, вла́сти лю́таго міроде́ржца и въ ча́съ кончи́ны на́шея на по́мощь ускори́ къ на́мъ, безпомо́щнымъ: приво́димъ Ти́ на умоле́ніе за ны́ вѣ́рнаго Твоего́ уго́дника и слугу́ Адріа́на страстоте́рпца преподо́бнаго, съ ни́мже вку́пѣ за ны́ Христу́ помоли́ся и отъ поги́бели вѣ́чныя на́съ изба́вити, да Тя́ непреста́нно велича́емъ.

Свѣти́ленъ, гла́съ 1:

Ди́вное чу́до проповѣ́дуемъ, а́нгела, страннообра́зно я́вльшагося и преподо́бному сопу́тствовавша до Бо́гомъ угото́ванныя ему́ пусты́ни, идѣ́же а́біе неви́димь бы́сть, да сла́вимъ а́нгеловъ и человѣ́ковъ Творца́. [Два́жды.]

Сла́ва, и ны́нѣ, богоро́диченъ:

Тя́ пѣ́сньми ублажа́емъ, Дѣ́во, Бо́га бо родила́ еси́ и на руку́ носи́ла еси́, Того́ моли́ спасти́ ду́ши на́ша.

На хвали́техъ стихи́ры [на 4], гла́съ 2:

Преподо́бне о́тче Адріа́не, свѣ́томъ добродѣ́телей твои́хъ возсія́лъ еси́, я́ко звѣзда́ богосвѣ́тлая, и о́бразъ безстра́стія на́мъ въ себѣ́ явля́еши, да послѣ́дуемъ свято́му твоему́ примѣ́ру и вку́пѣ съ тобо́ю унаслѣ́дуемъ Ца́рство небе́сное. [Два́жды.]

Преподо́бне о́тче Адріа́не, ты́ Ева́нгеліе Христо́во свѣ́тъ стезя́мъ твои́мъ имѣ́лъ еси́ и бы́лъ еси́ па́стырь до́брый тобо́ю собра́ннаго и́ноческаго ста́да, руководя́ духо́вная ча́да твоя́ путя́ми пра́выми въ Ца́рство небе́сное.

Преподо́бне о́тче Адріа́не, возлюби́въ Пречи́стую Богоро́дицу, по Бо́зѣ все́ упова́ніе твое́ на Ту́ возложи́лъ еси́, и хра́мъ въ пусты́ни твое́й во и́мя Ея́ Успе́нія освяти́лъ еси́, и оби́тель и́нокомъ возгради́лъ еси́, и мно́гія ду́ши человѣ́ческія приве́лъ еси́, уго́дниче Бо́жій, въ Ца́рство небе́сное.

Сла́ва, гла́съ 8:

Сле́зное твое́ рыда́ніе, и моли́твенное воздыха́ніе не умили́ разбо́йниковъ, тя́ му́чившихъ, преподо́бне о́тче, къ ни́мже кро́тцѣ вѣща́лъ еси́: за ко́е дѣ́ло хо́щете мя́ уби́ти? Азъ пріидо́хъ къ ва́мъ повелѣ́ніемъ Бо́жіимъ, на спасе́ніе ва́ше, вы́ же мя́ ны́нѣ сме́рти предае́те, но молю́ся ва́мъ, отцы́ и бра́тіе, отпусти́те мя́ въ пре́жнее мое́ селе́ніе, идѣ́же и́ноческое мое́ положи́хъ обѣща́ніе, да та́мо почíю о Го́сподѣ. Но не послу́шаша тя́ разбо́йницы и лю́тѣй сме́рти тя́ преда́ша, уго́дниче Бо́жій многострада́льный, въ небе́сная тя́ селе́нія посла́вше, ко Го́споду, моли́тися о душа́хъ на́шихъ.

И ны́нѣ, богоро́диченъ:

Влады́чице, пріими́ моли́тву ра́бъ Твои́хъ и изба́ви на́съ отъ вся́кія ну́жды и печа́ли.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нны отъ кано́на пѣ́снь 3-я и 6-я. [Проки́менъ, гла́съ 7: Восхва́лятся преподо́бніи во сла́вѣ и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, хвале́ніе Его́ въ це́ркви преподо́бныхъ.] Апо́столъ къ Ри́мляномъ, зача́ло 99. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе отъ Луки́, зача́ло 64. Прича́стенъ: Ра́дуйтеся пра́ведніи [о Го́сподѣ, пра́вымъ подоба́етъ похвала́].

Источникъ: Слу́жба со ака́ѳистомъ свято́му преподо́бному Адріа́ну, игу́мену Пошехо́нскому, чудотво́рцу. — М.: Сѵнода́льная Тѵпогра́фія, 1912. — Л. 1 – 11 об., 30 об. – 33 об.

/ Къ оглавленію раздѣла /


Наверхъ / Къ титульной страницѣ

0