Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 5-й де́нь.
Свята́го му́ченика Ко́нона.

[ВЕЧЕРЪ,]
Стихи́ры, гла́съ 8. Подо́бенъ: О, пресла́внаго чудесе́!

О, и́стины проповѣ́дниче!* нече́стія показа́вся* мечено́сный супротивобори́телю,* враго́въ отсѣ́клъ еси́ страда́ніемъ главы́, прему́дре,* и боже́ственное велѣ́ніе я́сно проповѣ́далъ еси́,* лю́демъ ненака́заннымъ глаго́ля лу́чшая.* О, Ко́ноне, сожи́тельниче му́чениковъ!* моли́ся Изба́вителю* изба́вити рабы́ твоя́ отъ страсте́й, пою́щія тя́.

О, до́браго измѣне́нія* десни́цею Вы́шняго!* я́же на тебѣ́ содѣ́я отце́въ Госпо́дь,* страстоте́рпче всесла́вне,* отъ невѣ́рнаго ко́рене пло́дъ благоцвѣту́щь,* Ко́ноне всеблаже́нне и прехва́льне, ты́ яви́лся еси́* и де́моновъ полки́,* имѣ́я Христа́ изря́днѣйша Чинонача́льника,* побѣди́лъ еси́ держа́вно.

Сла́ва, и ны́нѣ, богоро́диченъ, гла́съ и подо́бенъ то́йже:

Ра́дуйся, Свѣ́та Боже́ственнаго носи́ло,* свѣтлѣ́йшая звѣздо́ и сѣ́нь свяще́нія.* Свѣ́тъ на́мъ возсія́* изъ пречи́стыхъ чре́слъ Твои́хъ,* просвѣща́я мíра концы́* и освѣща́я Свое́ю благода́тію.* Ра́дуйся, на́чало спасе́нія, Пречи́стая;* ра́дуйся, ужа́сное слы́шаніе и глаго́ланіе* надѣ́ющимся на Тя́.

Крестобогоро́диченъ. Подо́бенъ то́йже:

Тя́ ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, —* Ча́до сла́дкое,* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ вся́ изба́вивый милосе́рдіемъ Твои́мъ?

Тропа́рь, гла́съ 4: [1]

Яко дѣ́вственника преди́вна и му́ченика непоколеби́ма, блаже́ннаго страда́льца, на бѣ́сы вла́сть пріи́мшаго, Ко́нона пѣ́сньми восхва́лимъ и къ нему́ возопіи́мъ: моли́ Христа́ Бо́га, да спасе́тъ ду́ши на́ша.


[НА УТРЕНИ,]
Кано́нъ, его́же краегране́сіе: Пою́ Ко́нона, му́ченика вѣнцено́снаго. Гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Пѣсносло́віи тя́ боже́ственными Христо́ва похвали́ти му́ченика и тве́рдаго подви́жника, мое́ помышле́ніе свѣ́томъ, и́же въ тебѣ́ прея́вственно, му́чениче, озари́.

Науче́нъ боже́ственнымъ, а́нгельскимъ, блаже́нне, наказа́ніемъ, я́коже а́нгелъ на земли́ вои́стинну преизя́ществовалъ еси́ пло́тію, по́хоти обуздова́я и удобря́яся.

Зако́ны Боже́ственныя соблю́дъ, е́ллинскаго беззако́нія, преподо́бне, возгнуша́лся еси́ проявле́нно и мно́ги приве́лъ еси́ къ Бо́гу уче́ньми и свяще́нными увѣ́ривъ чудесы́.

Богоро́диченъ: Украси́вшися добро́тою добродѣ́телей, Кра́снаго родила́ еси́ па́че всѣ́хъ человѣ́ковъ, Свои́ми, Всенепоро́чная, на́съ красота́ми му́дрѣ украша́ющаго.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Украси́въ Боже́ственными добродѣ́тельми, преподо́бне, ду́шу твою́, жили́ще сію́ Отца́, и Сы́на, и Ду́ха, вои́стинну Свята́го, му́чениче, соверши́лъ еси́.

Иже дре́вле пре́лести во глубину́ впа́дшіи окая́ннѣ, въ явле́нную высоту́ высо́кими твои́ми уче́ніи возво́дятся далечесія́тельно, му́чениче Ко́ноне, воспѣ́вающе тя́.

Хра́мъ бы́въ Бо́жій, призыва́ніи боже́ственными низложи́лъ еси́, всеблаже́нне, предста́въ во хра́мѣ истука́ннаго, наставля́я заблу́ждшія къ боже́ственному разумѣ́нію.

Богоро́диченъ: Еди́нъ Святы́й изъ Тебе́ ражда́ется, Пресвята́я, па́че ума́ же и сло́ва, освяща́я земна́я, скве́рнымъ врага́ совѣ́томъ страсте́мъ рабо́тающія.

Сѣда́ленъ, гла́съ 8. Подо́бенъ: Прему́дрости.

Христо́вымъ всеору́жіемъ вооружи́вся, де́моновъ яви́лся еси́ всегуби́тель и бы́лъ еси́ же́ртва вѣ́рныхъ неразру́шна, непристу́пенъ имѣ́я сто́лпъ вѣ́ры, къ высотѣ́ взима́еши на́съ чуде́съ твои́хъ. Отню́дуже и побѣ́ды отъ Бо́га вѣнцы́ досто́йно прія́лъ еси́, му́чениче Ко́ноне многострада́льне. Сего́ ра́ди вопіе́мъ ти́: моли́ Христа́ Бо́га прегрѣше́ній оставле́ніе дарова́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ воплоще́нному безъ сѣ́менне моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихъ Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Хра́мы низложи́лъ еси́ безбо́жныхъ, свя́те, и бо́ги поги́бели коне́чнѣй, му́чениче, преда́лъ еси́, чудодѣ́йствуя и соверша́я досточу́дная зна́менія.

Свя́то, преподо́бне, ше́ствующу тебѣ́, де́монскій ро́дъ Бо́жіе Сло́во покори́ тебѣ́ и тя́ чуде́съ мно́гими показа́ньми просла́ви.

Вельми́ любя́ тя Преблагíй, Михаи́ла тебѣ́, вели́каго наказа́теля, даде́, науча́юща тя́, велича́йшій Ко́ноне, я́вѣ превели́кимъ та́йнамъ.

Богоро́диченъ: Свята́я Влады́чице, Всесвято́е воплоти́вшая Сло́во, освяще́ніе души́ мое́й да́руй, руководя́щи м́ой у́мъ, безпу́тіями порѣва́емый.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Тече́ніемъ крове́й твои́хъ свяще́нныхъ хлами́ду тебѣ́ самому́ му́ченическую прея́вственно обагри́въ, му́чениче доблему́дренне, и живе́ши, ра́дуяся, въ вы́шнихъ жили́щахъ и свѣ́тлостехъ.

Просте́ръ тя́, блаже́нне, злоу́мный, ве́сь просте́ртъ къ Бо́гу у́мъ, приснопа́мятне, иму́щаго, ра́нами ссѣца́етъ, призыва́ющаго и́мя вели́кое Вседержи́теля.

Благода́тію вжили́вся, терпѣ́лъ еси́ ка́пли я́звенныя, му́ченически украша́яся, и безбо́жіе, Ко́ноне, побѣжда́я, и безсме́ртія сподобля́емь.

Богоро́диченъ: Изба́вльшеся вся́кія прароди́тельныя, Пречи́стая, кля́твы, Тобо́ю благослове́ніе получи́хомъ. Тѣ́мже благослови́мъ, и велича́емъ, и любо́вію Тя́ чти́мъ, и ублажа́емъ.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Облиста́въ, я́ко со́лнце, свѣтолу́чными добродѣ́тельми и пресла́вными чудесы́, терпѣ́ніемъ же страда́ній вельми́ украша́яся, просвѣща́еши концы́, великоимени́тый му́чениче, хва́лящія тя́.

Ра́нъ добро́тами краснѣ́йшій показа́вся, чудодѣ́йствуеши изря́дная, и у́меръ, па́ки по погребе́ніи прогоня́я неду́ги и отгоня́ пре́лести, блаже́нне, ду́хи.

Стра́сти уврачу́й ду́шъ на́шихъ, му́дре, и пло́ти отжени́ неможе́нія, изря́днѣйшій вра́чь на́мъ, чту́щимъ тя́, отъ Бо́га да́нъ еси́, Ко́ноне сла́вне.

Богоро́диченъ: Призрѣ́ Госпо́дь на Тя́ и Тобо́ю посѣще́ніе содѣ́ла уда́льшимся, Пречи́стая, отъ Него́. Тѣ́мже, я́коже рекла́ еси́, ро́ди спаса́емыхъ ублажа́ютъ Тя́.

Конда́къ, гла́съ 3:

Чистото́ю я́ко а́нгелъ на земли́ пожи́въ, отону́дуже собесѣ́дникъ а́нгеломъ бы́ти сподо́бился еси́, и роди́тели ко Христо́ву позна́нію приве́лъ еси́, и, еди́наго Бо́га въ Тро́ицѣ исповѣ́давъ, пострада́лъ еси́ до кро́ве, му́чениче Ко́ноне, моли́ Его́ непреста́нно о всѣ́хъ на́съ.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Свѣ́тъ тебѣ́ незаходи́мый возсія́, возненави́дѣвшему страсте́й тму́, преподо́бне, весе́ліе же прія́тъ тя́, до́брый по́двигъ сконча́вша тща́ніемъ. Тѣ́мже помина́й на́съ, предстоя́ Христу́.

Се́рдце твое́ кро́тко и мудрова́ніе смире́нно яви́ся, преподо́бне, и́мже погуби́лъ еси́ возноше́нія вся́ врага́, возвыша́емь Боже́ственными добродѣ́тельми и чудесы́ стра́шными, Ко́ноне, му́чениковъ основа́ніе.

Стра́шенъ всѣ́мъ де́мономъ бы́лъ еси́, си́мъ повелѣва́я винова́тися твои́мъ свяще́ннымъ, богому́дре, велѣ́ніемъ, Бо́гу тя́ просла́вльшу, Того́ дѣ́лы до́брыми на земли́, Ко́ноне, просла́вльшаго.

Богоро́диченъ: Во́лею вся́ содѣ́ловаяй, во Твою́ восхотѣ́въ всели́тися пренепоро́чную, Богоро́дице, утро́бу вои́стинну, еди́нъ во святы́хъ совѣ́тѣхъ прославля́емый Бо́гъ, я́ко вели́кій и стра́шный.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Тве́рдо сопроти́вился еси́ суему́дренному, мня́щу тебе́ повину́ти, че́сти чужди́мъ принести́, страда́льче, о́нѣмъ ме́рзостнымъ. Тѣ́мъ, я́ко зако́нно пострада́въ, просла́вился еси́.

Де́монскими уязви́вшіися прило́ги уче́ніи боже́ственными твои́ми исцѣлева́ются и ско́рбныхъ избавле́ніе пріе́млютъ, воспѣва́юще благода́ть твою́, богому́дре.

Неду́говъ вся́кихъ здра́віе почерпи́те, къ ра́цѣ преподо́бнаго вѣ́рою приступа́ющіи: источа́етъ бо я́вѣ Ду́ха благода́тію и пото́ки страсте́й изсуша́етъ.

Богоро́диченъ: Мольбу́ Зижди́телю Бо́гу принеси́ ду́ши на́ша спасти́, Богора́дованная, и страсте́й одержа́нія на́съ изба́вити и злодѣ́йственныхъ человѣ́къ искуше́нія.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Яко кора́бль, ви́дѣнъ бы́лъ еси́, препла́вающь мірску́ю немо́кренно, богоно́се, бу́рю, до́брыхъ бре́мя спаса́ющь къ кра́снымъ приста́нищемъ поко́я, и Ца́рствія Бо́жія, и свѣ́тлости.

Кресто́мъ, я́ко броня́ми, одѣ́явся, вра́жія, всеблаже́нне, обнажи́лъ еси́ полки́ и нога́мъ твои́мъ кра́снымъ порабо́тилъ еси́, ра́бъ же Влады́цѣ и́скренній бы́въ, порабоще́нныя враго́мъ избавля́я.

О на́съ, любо́вію восхваля́ющихъ тя́, па́мять сотвори́, Христу́, вѣнцено́сецъ, предстоя́ съ вы́шними безчи́сленными си́лами, я́ко да моли́твами твои́ми обря́щемъ ми́лость и злолю́тыхъ измѣне́ніе, Ко́ноне всехва́льне.

Богоро́диченъ: Свѣ́томъ Твои́мъ мя́, Дѣ́во, просвѣти́, но́щію при́сно уны́нія одержи́ма, и къ земли́ погорбле́на, и дѣ́юща вся́къ грѣ́хъ ра́зума развраще́ніемъ, я́ко да, Тобо́ю спаса́емь, пою́ Тя́, Многопѣ́тую.

Примѣчаніе:
[1] Тропарь печатается по изданію: Псалти́ръ съ возслѣ́дованіемъ. Черни́говъ: Въ Тѵпогра́фіи оби́тели Свя́то-Тро́ицкой Ильи́нской, 1763 г. Ли́стъ 471 об.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 22 об. – 25 об.

/ Къ оглавленію раздѣла /


Наверхъ / Къ титульной страницѣ

0