Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 23 мая 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 4-й де́нь.
Преподо́бнаго отца́ на́шего Гера́сима, иже на Іорда́нѣ.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Преподо́бне о́тче Гера́симе,* въ пусты́няхъ при́сно, и пеще́рахъ, и гора́хъ* вѣ́рою пребыва́я,* Бо́га взыска́лъ еси́* и Того́ обрѣ́лъ еси́,* я́коже возжелѣ́лъ еси́.* Невозвра́тною душе́ю вжиля́емь,* вхожде́ніи до́брыми всегда́,* и мона́шествующихъ мно́жества приве́лъ еси́,* Бо́гу спаса́емая.

Ты́, повину́яся ма́ніемъ* Всеви́дца Бо́га,* отъ Него́ благода́ть прія́лъ еси́* дѣ́йствовати чудеса́* и прогоня́ти ду́хи лука́вствія,* ди́вія же звѣ́ри повину́ти ума́ чистото́ю.* Тѣ́мже почита́емъ тя́* и боже́ственную па́мять твою́ до́лжно* вѣ́рою пра́зднуемъ, богоблаже́нне.

Сла́ва, и ны́нѣ, богоро́диченъ, гла́съ и подо́бенъ то́йже:

Тя́ мо́лимъ, Пречи́стая,* Предста́тельницу на́шу,* смуща́еміи въ печа́лехъ:* не пре́зри до конца́ поги́бнути рабы́ Твоя́,* но ускори́ язъя́ти ны́* настоя́щаго гнѣ́ва и печа́ли,* о Богора́дованная, Пресвята́я Чи́стая,* Ты́ бо на́ша еси́ стѣна́ и по́мощь необори́ма.

Крестобогоро́диченъ, подо́бенъ то́йже:

Тя ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, —* Ча́до сла́дкое,* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ вся́ изба́вивый милосе́рдіемъ Твои́мъ?


[НА УТРЕНИ,]
Кано́нъ, его́же краегране́сіе: Гера́сима хвалю́, я́ко вѣне́цъ плету́. Гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Сла́ву безсме́ртія и нетлѣ́нія боже́ственный вѣне́цъ до́брѣ подви́гшемуся Христо́съ тебѣ́ подаде́, Гера́симе.

Имѣ́я Свѣтода́теля, твои́хъ послу́шающа моле́ній, де́моновъ тму́ ума́лилъ еси́, о́тче Гера́симе.

Струя́ми твои́хъ сле́зъ, я́коже дре́во, о́тче, тучня́емое, плоды́ безсме́ртія произне́слъ еси́, богому́дре Гера́симе.

Богоро́диченъ: Пречи́стая Богоро́дице, уста́ви болѣ́зни се́рдца моего́, я́же Христа́ безболѣ́зненно, па́че ума́ же и сло́ва ро́ждшая.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Распя́тіе во́льное Претерпѣ́вшему, преподо́бне, послѣ́дуя, ве́сь распя́лся еси́ житію́ и страсте́мъ.

Возмо́глъ еси́, укрѣпля́емь вседѣ́тельнымъ, му́дре, манове́ніемъ, крѣ́пкаго вся́ сѣ́ти попра́ти, Гера́симе.

Смире́ннымъ мудрова́ніемъ и смире́ннымъ, му́дре, ду́хомъ, ты́ укрѣ́плься, стра́сти душетле́нныя всеконе́чно смири́лъ еси́.

Якоже вели́кое со́лнце, чуде́съ твои́хъ сія́ньми просвеща́еши всѣ́хъ сердца́, вѣ́рно восхваля́ющихъ тя́.

Богоро́диченъ: Родила́ еси́, Всенепоро́чная, Отцу́ Сы́на сопресто́льна и соесте́ственна, всѣ́мъ вхо́ды жи́зненныя показа́вшаго.

Сѣда́ленъ, гла́съ 4. Подо́бенъ: Яви́лся еси́ дне́сь.

Де́моновъ, преподо́бне, кова́рства кре́стною благода́тію и дѣ́йствомъ преше́дъ, положе́ніемъ бо́гъ бы́лъ еси́; тѣ́мже тя́ вѣ́рно почита́емъ, Гера́симе.

Сла́ва, и ны́нѣ, богоро́диченъ:

Пречи́стыя ру́ки Твоя́, Дѣ́во Ма́ти, просте́рши, покры́й упова́ющія на Тя́ и Сы́ну Твоему́ зову́щія: всѣ́мъ пода́ждь, Христе́, ми́лости Твоя́.

Крестобогоро́диченъ:

На дре́вѣ ви́дящи воздви́жена Сы́на Твоего́, Пречи́стая, утро́бою ма́тернею растерза́ема, жа́лостно взыва́ла еси́: увы́ Мнѣ́, ка́ко заше́лъ еси́, Свѣ́те Мо́й безлѣ́тный?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Хра́мъ бы́сть Ду́ха просвѣще́нное, о́тче, се́рдце твое́, тѣ́мъ то́читъ дарова́нія, исцѣля́я неду́ги Боже́ственною благода́тію.

Зако́ну Боже́ственному повину́яся, о́тче, отъ ю́ности послѣ́довалъ еси́ Го́споду, облобыза́лъ безпло́тныхъ житіе́ съ тѣ́ломъ.

Ше́ствія твоя́, преподо́бне, къ спаси́тельнѣй стези́ испра́вишася наставле́ніемъ Боже́ственнаго Ду́ха, въ тя́, преподо́бне, все́льшагося.

Богоро́диченъ: Іису́са Человѣколю́бца, Его́же несказа́нно чревоноси́ла еси́, умоли́, Всенепоро́чная, спасти́ вся́, пою́щія Тя́.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Умо́мъ очище́нымъ пріе́мъ лучи́ Свята́го Ду́ха, свѣ́тъ мона́шествующихъ бы́лъ еси́.

Житіе́ твое́, ну́ждею естества́ сія́я, а́нгела земна́го съ пло́тію тя́ показа́.

Во́дъ живото́чныхъ Ду́ха испо́лненъ, рѣ́ки источи́лъ еси́ чуде́съ, о́тче Гера́симе.

Богоро́диченъ: Яко ту́ча, на Тя́ сни́де, Богоро́дице, Сло́во, воплоща́емое въ просвѣще́ніе ду́шъ на́шихъ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Пло́ти твоея́ немощно́е, си́лою укрѣпля́емо отъ Дѣ́вы на́мъ Чи́стыя возсія́вшаго, всю́ смири́ си́лу, о́тче, вражде́бныхъ безпло́тныхъ, преподо́бне.

Сокруши́въ мы́сленныхъ льво́въ че́люсти благода́тію, покори́лъ еси́ чу́вственныхъ стремле́нія, преподо́бне; тѣ́мъ повину́ется тебѣ́ ле́въ, я́ко па́стырю благопоко́рно служа́.

Житіе́ а́нгельское, мудрова́ніе, о́тче, смире́нно стяжа́въ о Христѣ́, кро́токъ бы́лъ еси́ и ны́нѣ всели́лся еси́ въ земли́ кро́ткихъ, ра́дости Боже́ственныя исполня́емь.

Богоро́диченъ: Всели́ся въ Тя́ Отчее, Чи́стая, озаре́ніе и, ро́ждься пло́тію, мíръ просвѣти́, и тмы́ изба́ви многобо́жія; сего́ ра́ди воспѣва́емъ Тя́.

Конда́къ, гла́съ 4. Подо́бенъ: Вознесы́йся.

Возгорѣ́вся раче́ніемъ го́рнимъ, же́стость пусты́ни Іорда́новы, па́че всѣ́хъ мíра сла́дкихъ предпоче́лъ еси́, отону́дуже повину́ся тебѣ́ звѣ́рь да́же до сме́рти, о́тче, послу́шнѣ и жа́лостнѣ на гро́бѣ твое́мъ сконча́ся, просла́вльшу тя́ та́ко Бо́гу, къ Нему́же моля́ся, и о на́съ, о́тче Гера́симе, помина́й.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Свѣ́тъ возсія́ тебѣ́, о́тче, и сопру́гъ сего́ весе́ліе, въ небе́сныхъ кро́вѣхъ при́сно водворя́ему и пѣснопою́щу: благослове́нъ еси́, Го́споди Бо́же, во вѣ́ки.

Ту́чами сле́зъ напои́въ твое́, богоно́се, се́рдце, добродѣ́тельныя прозяба́еши плоды́, и́миже сла́дость го́рнюю во вѣ́ки прія́лъ еси́ со всѣ́ми преподо́бными.

Во устѣ́хъ нося́ пѣ́ніе въ подража́ніи непреста́нно а́нгельстѣмъ, бдѣ́ннымъ умо́мъ, Гера́симе, вопія́лъ еси́: благослове́нъ еси́, Го́споди Бо́же, во вѣ́ки.

Богоро́диченъ: Огнь ника́коже Тя́, Богоро́дице, Божества́ опали́, Дѣ́во, Тя́ бо купина́ иногда́ образова́ше въ горѣ́, опаля́ема, Пречи́стая, и ника́коже сгара́ющи.

Пѣ́снь 8.

Ирмо́съ: Богоглаго́ливіи о́троцы въ пещи́, со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Просвѣще́нъ предста́лъ еси́ Влады́цѣ по́стническими сія́ньми, чудоно́сче Гера́симе, и безпло́тныхъ лико́мъ счисли́лся еси́.

Въ беззло́біи житіе́ проводи́въ, лука́ваго сѣда́лище отню́дъ охуди́лъ еси́, по́стниковъ красото́, богому́дре Гера́симе.

Во оде́жду нетлѣ́нія одѣ́ялся еси́ страсте́й совлече́ніемъ, о́тче богому́дре Гера́симе, и черто́гъ Боже́ственный досто́йно получи́лъ еси́.

Богоро́диченъ: Яко благоуха́нный кри́нъ, обрѣ́тъ Тя́ во удо́ліихъ житія́ Пресу́щественный, Всечи́стая, Тобо́ю благоуха́ніе мíрови вдохну́.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Стопа́мъ всѣ́хъ, до́брѣ на земли́ ходи́вшихъ, послѣ́дуя, любо́вь имѣ́лъ еси́, вѣ́ру, наде́жду, мѣ́рность, му́дрость и неоску́дную моли́тву, воздержа́ніе неизрече́нное, о́тче Гера́симе, наслажда́яся чи́стыми восхожде́ніи.

О, чу́до! ка́ко, я́ко слове́сенъ, повинова́шеся тебѣ́ звѣ́рь повелѣ́нію твоему́, Гера́симе, со усе́рдіемъ служа́, Бо́гу прославля́ющу твое́ житіе́ равноа́нгельное, зна́меніи, преподо́бне, и безчи́сленными дивесы́ и чудесы́?

Утвержде́ніе яви́лся еси́ мона́шествующихъ и молча́щихъ, богоно́се, наказа́ніе, тѣснѣ́йшую бо воздержа́нія стезю́ ше́ствовалъ еси́, боже́ственными наде́ждами ду́шу при́сно разширя́я. Тѣ́мже простра́нно въ се́лѣхъ избра́нныхъ обрѣ́лъ еси́ селе́ніе.

Процвѣ́лъ еси́, о́тче, во дво́рѣхъ Бо́га на́шего, я́ко фи́никсъ высокора́сленный, я́ко кипари́съ, возвели́чился еси́ боже́ственными возноше́ніи. Отону́дуже па́мять твою́ вѣ́рно вси́ пра́зднуемъ, въ ню́же мо́лимся: искуше́ній ны́ вся́кихъ спаси́.

Богоро́диченъ: Нося́щи Емману́ила на руку́ Твое́ю, Чи́стая, я́коже Младе́нца, Богора́дованная, вопія́ла еси́: Ча́до Мое́ сладча́йшее, ка́ко пода́мъ Тебѣ́ сосе́цъ, пита́ющему вся́ческая? ка́ко повію́ Тя́ пелена́ми, мгло́ю повива́ющаго мо́ре?

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 19 об. – 21.

/ Къ оглавленію раздѣла /


Наверхъ / Къ титульной страницѣ

0