Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 3-й де́нь.
Святы́хъ му́ченикъ Евтро́пія и дружи́ны его́, Клеони́ка и Васили́ска.

[ВЕЧЕРЪ,]
На Го́споди воззва́хъ: стихи́ры, гла́съ 1. Подо́бенъ: Всехва́льніи му́ченицы.

Евтро́пія,* Клеони́ка тве́рдаго,* Васили́ска пѣ́сньми духо́вными восхва́лимъ,* огне́мъ бо попали́ша безбо́жія ве́щь,* благоче́стія благода́тію.* И ны́нѣ просвѣща́ютъ концы́* Боже́ственными огня́ свѣтлостьми́,* я́ко свѣти́льницы пресвѣ́тліи,* я́ко пре́лесть всю́ омрачи́вше.

Главы́ отсѣка́еми,* врагу́ главу́ сокруши́сте* кра́сными нога́ми ва́шими,* до́бліи страда́льцы,* неле́стныя звѣ́зды,* же́ртвы одушевле́нныя,* хра́ма небе́снаго сокро́вища,* Евтро́піе сла́вне,* Васили́ске и Клеони́че,* ми́ръ всѣ́мъ испроси́те.

Сла́ва, и ны́нѣ, богоро́диченъ:

Ра́дуйся, стра́нное слы́шаніе, Чи́стая;* ра́дуйся, дре́во свято́е,* рая́ богосажде́нное;* ра́дуйся, потребле́ніе лука́выхъ де́моновъ;* ра́дуйся, ору́жіе обою́дуострое,* врага́ главу́ отсѣ́кши* стра́ннымъ рождество́мъ Твои́мъ,* Всесвята́я Пренепоро́чная,* устра́ншіяся ны́ воззови́.

Крестобогоро́диченъ:

Своего́ Агнца* Агница и Непоро́чная Влады́чица* на Крестѣ́ я́ко ви́дѣ,* зра́ка не иму́ща, ниже́ добро́ты,* увы́ Мнѣ́, рыда́ющи, глаго́лаше,* гдѣ́ добро́та Твоя́ за́йде, Сладча́йшій?* гдѣ́ благолѣ́піе,* гдѣ́ благода́ть блиста́ющая* о́браза Твоего́,* Сы́не Мо́й любе́знѣйшій?


[НА УТРЕНИ,]
Кано́нъ, его́же краегране́сіе: Тріе́хъ велича́йшихъ страда́нія честву́ю му́чениковъ. Ки́ръ Іо́сифа. Гла́съ 1.

Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяномъ пу́ть глубины́ новосодѣ́лавшая.

Премíрными блиста́ньми Трисо́лнечныя Зари́ озаря́еми, му́ченицы всехва́льніи, благоче́стно ва́съ ны́нѣ блажа́щія во свѣтоно́снѣмъ ва́шемъ страда́ніи просвѣти́те.

Глаго́лы, я́ко стрѣла́ми, прему́дріи, пребеззако́нныхъ сердца́ уязви́сте, тѣ́мже претерпѣ́сте пожда́нно я́звы и ра́ны, исповѣ́дающе Бо́жіе свято́е и́мя.

Священносло́віи свяще́нными предъ мучи́тельскими суди́щи проповѣ́давше, му́ченицы приснопа́мятніи, на́съ ра́ди пострада́ти Изво́лившаго, наноси́мыя тве́рдо му́ки претерпѣ́сте.

Богоро́диченъ: Яви́лася еси́ ши́рши небе́съ, нигдѣ́же вмѣсти́маго вопло́щши, Того́ у́бо моли́ вся́кія на́съ тѣсноты́ изба́вити и вѣ́чнаго, Дѣ́во Ма́ти, муче́нія.

Пѣ́снь 3.

Ирмо́съ: Еди́не Вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й: одушевле́нный хра́ме неизрече́нныя сла́вы Твоея́, Человѣколю́бче.

Ума́ чи́стыми прило́ги Боже́ственная зря́ще, му́жескимъ нра́вомъ, блаже́нніи, къ му́камъ устреми́стеся, вражде́бнаго безпло́тнаго страда́льца побѣжда́юще съ тѣ́ломъ, тѣ́мже прославля́етеся.

Уде́съ отсѣче́нія за Христа́, му́дріи, претерпѣ́вше, крове́й боже́ственными проли́тіи зе́млю преподо́бно освяти́сте и на тре́бищныя де́мономъ приноси́мыя уста́висте, му́ченицы, кро́ви.

Положе́ни бы́сте, я́коже свѣтоза́рніи, на высотѣ́ страда́нія, я́ко вои́стинну звѣ́зды, озаря́юще вселе́нную незаходи́мыми сія́ньми и тму́ рѣша́ще ле́сти, святíи, сего́ ра́ди вѣ́рно ублажа́етеся.

Богоро́диченъ: Во чре́вѣ прія́ла еси́ Христа́, чре́во истощи́вшаго а́дово вседѣ́йственнымъ совѣ́томъ. Того́ моли́, Богора́дованная, отъ рабо́ты изба́вити грѣхо́вныя вся́, вѣ́рно при́сно блажа́щія Тя́.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Тро́ицу Честну́ю тро́ица му́чениковъ предъ мно́гими исповѣ́да наро́ды и лико́мъ причто́шася безпло́тныхъ, страда́вше. Си́хъ дне́сь восхва́лимъ вѣ́рою, пра́зднующе свяще́нную и́хъ па́мять и міроспаси́тельную.

Сла́ва, и ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ же и сло́ва, непреста́нно моли́ съ вы́шними си́лами пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно Тя́ сла́вящимъ.

Крестобогоро́диченъ:

Нескве́рная Агница, Агнца и Па́стыря повѣ́шена на дре́вѣ ме́ртва зря́щи, пла́чущи вѣща́ше, и Ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тіе и во́льныя Стра́сти, Бо́же Преблагíй?

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Стоя́ху тріе́ на три́знищи, проповѣ́дающе Еди́наго Трисо́лнечна Бо́га и ра́нъ разжже́ніе крѣ́пко терпя́ще, столпы́ о́гненны Це́ркве яви́шася, благочести́выхъ о Христѣ́ предводя́щіи.

Поста́вльше но́зѣ на ка́мени вѣ́ры, не поколеба́стеся мно́гихъ искуше́ній кова́рствіи, но яви́стеся непоколеби́ми, злочести́выя запина́юще, му́ченицы, и вся́чески охужда́юще благода́тію.

Яко честно́е ка́меніе, на земли́ валя́ющеся, зда́ніе лука́вное многобо́жія вои́стинну, прему́дріи, разори́сте, и себе́ са́мыя Бо́жія хра́мы созда́сте, и ко хра́му небе́сному взя́стеся.

Богоро́диченъ: Яви́ся Твоя́ утро́ба богоно́сная пала́та, въ не́йже всѣ́хъ Ца́рь почи́, Христо́съ, хра́мы содѣва́я, Ма́ти Чи́стая, и свѣтоза́рная жили́ща благочести́выя непристу́пнаго Божества́.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія правосла́вно пою́щихъ Тя́.

Зако́нъ Боже́ственный соблюда́юще, добропобѣ́дніи му́ченицы, беззако́ннымъ му́жескимъ нра́вомъ противоста́сте и, уязвля́еми и растерза́еми тѣлесы́, побѣ́ду вѣ́чную взя́сте.

Восхва́лимъ Васили́ска и вѣ́рою почти́мъ Клеони́ка и Евтро́пія велему́дрыя, вѣ́рою пострада́вшія за Тро́ицу Всесвяту́ю и па́че со́лнца просія́вшія.

Чудеса́ соверша́юще въ сла́ву Бо́га на́шего, привлеко́сте зря́щія къ вѣ́рѣ Спа́совѣ, му́ченицы многострада́льніи, цвѣ́ти кра́сніи ра́йстіи, церко́вная утвержде́нія.

Богоро́диченъ: Сія́ніемъ отъ Тебе́ па́че ума́ возсія́вшаго озари́ на́ша мы́сли, Всенепоро́чная, и тму́ ума́ли помысло́въ душетлѣ́нныхъ, я́ко да пое́мъ Тя́, Влады́чице.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Ра́дуется земля́ и небе́сная, лику́ютъ человѣ́цы, лѣ́тній соверша́юще пра́здникъ, е́же за Христа́ страда́нія блаже́нная до́блественно претерпѣ́вшихъ ума́ тве́рдостію.

Почти́лъ еси́ до́брыми твои́ми нра́вы, Евтро́піе, Бо́га Преблага́го, побѣди́лъ еси́ хи́трости вра́жія. Тѣ́мже тя́ почита́ютъ вси́ человѣ́цы, тобо́ю прегрѣше́ній разрѣше́ніе прія́ти надѣ́ющіися.

Исцѣле́ній исто́чники излива́юще, зно́й отгна́сте неду́говъ и скорбе́й, му́дріи, всѣ́мъ благоздра́віе посыла́юще, благоче́стно ва́шему покро́ву при́сно притека́ющимъ.

Богоро́диченъ: Увяди́вшая Твои́мъ прозябе́ніемъ, Всенепоро́чная, дре́вле прозя́бшую преступле́ніемъ зло́бу вра́жію, въ души́ мое́й прозяба́ющія душетлѣ́нныя и терно́вныя по́мыслы исто́ргни.

Пѣ́снь 7.

Ирмо́съ: Тебе́, у́мную, Богоро́дице, пе́щь разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Якоже наслажде́ніе боже́ственное вмѣня́юще удо́въ отсѣче́ніе, зауше́нія, строга́нія и сме́рть ну́жную, му́ченицы веселя́щеся и Бо́гу усе́рдно пою́ще: хва́льный отце́въ Бо́гъ и препросла́вленъ.

По мно́гихъ томле́ніихъ тѣлесе́ кре́стъ претерпѣ́сте крѣ́пко въ подо́біи Изба́вителя, сла́вне Евтро́піе, вели́кій Клеони́че, и блаже́нную кончи́ну получи́сте, хва́льнаго воспѣва́юще Бо́га и препросла́вленнаго.

Взира́ти ва́мъ предповелѣва́я къ безсме́ртнымъ воздая́ніемъ, въ темни́цѣ яви́ся Христо́съ, Его́же ви́дѣвше, дерзнове́нія испо́лнистеся, взыва́юще, му́ченицы сла́вніи: хва́льный отце́въ Бо́гъ и препросла́вленъ.

Богоро́диченъ: Изба́ви ны́, Пресвята́я Влады́чице, отъ язы́ческаго наше́ствія, срѣ́тенія лука́ваго, вся́каго обстоя́нія и осужде́нія вѣ́чнаго, вѣ́рою зову́щія: хва́льный отце́въ Бо́гъ и препросла́вленъ.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Просте́ртъ иму́ще у́мъ, ко Еди́ному Влады́цѣ простро́стеся, уязвля́еми, всехва́льніи, зѣ́льнѣ и му́чими, вопію́ще: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Возвы́сившеся на крестѣ́, я́коже дре́вле Влады́ка, вели́каго сподо́бистеся благосла́вія, страда́льцы, вопію́ще и глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Си́лою Боже́ственною, всеблагосла́вніи, укрѣ́пльшеся, страстоте́рпцы, беззако́нныхъ ополче́нія побѣди́ша крѣ́пко, пою́ще и глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Тро́иченъ: Яко Еди́ницу естество́мъ, Тя́ пою́, Божество́ Всесвято́е, Треми́ же Ѵпоста́сьми несѣ́чно раздѣля́я, зову́, ра́дуяся: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Богоро́диченъ: Хра́мъ яви́лася еси́ Емману́ила и две́рь, Еюже Еди́нъ вни́де и изы́де, я́коже Са́мъ вѣ́сть, Чи́стая, спаса́я зову́щія: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Да Іису́са пріобря́щете, насу́щаго житія́ вся́ вмѣни́сте уме́ты, я́коже Па́велъ боже́ственный научи́. Сего́ ра́ди до́брѣ пострада́вше, на небесѣ́хъ обита́ете, вѣнцено́сцы великоимени́тіи.

Яви́ся, я́коже сто́лпъ треуго́льный, свяще́нныхъ му́ченикъ боже́ственное собра́ніе, стѣ́ны лука́ваго безбо́жія низложи́ша благода́тію, и ны́нѣ живу́тъ во гра́дѣ Бо́га Жива́го, перворо́дныхъ въ ски́ніихъ.

Вѣне́цъ нетлѣ́нія, святíи, отъ Христа́ пріе́мше, багряни́цу же омочи́вше отъ му́ченическихъ ва́шихъ крове́й, предстоите́ Царю́ вѣко́въ, осія́еми свѣ́тлыми свѣтоли́тіи и всебога́тными раздая́ніи.

Уже́ Бо́гу прибли́жившеся и со безпло́тными собо́ры пра́зднующе, на земли́ ва́съ при́сно блажа́щія и па́мять ва́шу пра́зднующія, му́ченицы, небе́сную получи́ти свѣ́тлость испроси́те.

Богоро́диченъ: Ужаса́ются а́нгельстіи чи́ни отъ Твои́хъ ложе́снъ Возсія́вшаго, Его́же о на́съ, Дѣ́во Ма́ти, моли́, я́ко да стра́шныя вся́ изба́витъ му́ки и тмы́ кромѣ́шныя, пою́щія Тя́.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 16 – 19 об.

/ Къ оглавленію раздѣла /


Наверхъ / Къ титульной страницѣ

0